TANE MEKUN 4
“Ua a Anyipicine Koi Së”
“Ua a anyipicine koi së ka hape, itre nekö i Akötresieti hë së.”—ROM. 8:16.
NYIMA 25 Nöje Hna Itön
MEKUN KA TRU *
Hnei Iehova hna neng la uati hmitrötre i Nyidrë kowe la ala 120 lao Keresiano ngöne lo Penetekos (Wange ju la paragarafe 1-2)
1-2. Nemene la ka traqa ngöne lo Penetekos macatre 33 M.K.?
PANE mekune jë laka, easë e Sabath hmakany e Ierusalema. Easë ngöne lo macatre 33 M.K., ngöne lo ijine Penetekos. Kola icasikeu hnene la 120 lao hlue i Iehova ngöne la ketre hnahag. (Itre hu. 1:13-15; 2:1) Iesu la ka upi angatr troa lapa e Ierusalema ke, hetre ahnahna hnei angatr hna troa kapa. (Itre hu. 1:4, 5) Nemene la ka traqa e thupen?
2 “Ame hna drenge la ketre mejene qaa hnengödrai, kösë eny ka hnahna catr.” Maine jë, hna drenge la mejene cili ngöne la hnalapa asë. Thupene lai, hna mama la “itre ukahlokine eë kösë itre thinem” hune la he i angatr, ame hna ‘tiqa pi angatr hnei uati hmitrötr.’ (Itre hu. 2:2-4) Celë hi hna kuca hnei Iehova, matre troa sië angatre hnei uati hmitrötr. (Itre hu. 1:8) Angatre hi la itre hna pane iën hnei uati hmitrötr * matre troa ce musi me Iesu e koho hnengödrai.
NEMENE LA KA TRAQA THUPENE LA HNA IËN LA KETRE ATR?
3. Pine nemene matre xecie hnyawa kowe la itre pane Keresiano laka, hna ië angatr hnei uati hmitrötr ngöne lo Penetekos?
3 Maine easë fe ngöne la hnahag memine la itre Keresiano, thatreine kö tro sa thëthëhmine la ka traqa. Hna mama hune la itre he së la ketre ewekë kösë eë, nge easë ha ithanata ngöne nyimu qene hlapa! (Itre hu. 2:5-12) E cili, xecie hnyawa koi së laka, hna ië së hnei uati hmitrötr. Ngo hapeu, aqane iëne kö la nöjei hna iën hnei uati hmitrötr? Nge caasi hi la ijine kola ië angatr? Ohea. Nemene la ka amamane lai?
4. Hapeu, caasi hi la ijine kola iëne la itre pane Keresiano hnei uati hmitrötr? Qejepengöne jë.
4 Tro sa ce wang la ijine kola iëne la ketre atr. Tha hna iëne hi la 120 lao Keresiano ngöne lo Penetekos 33 M.K. Ame ngöne lo drai cili, ala 3 000 fe la itre ka kapa la uati hmitrötr. Hna ië angatr ngöne lo angatr a xomi bapataiso. (Itre hu. 2:37, 38, 41) Ngo tha celë kö aqane kuca ngöne la itre macatre thupen. Hna sië angetre Samaria hnei uati hmitrötr, itre drai thupene lo kola bapataiso angatr. (Itre hu. 8:14-17) Nge hna ië Konelio me hnepe lapa i angeic, qëmekene troa bapataiso angatr.—Itre hu. 10:44-48.
5. Thenge la 2 Korinito 1:21, 22, nemene la ka traqa ngöne la kola iëne la ketre atr hnei uati hmitrötr?
5 Tro sa ce wang la ka traqa ngöne la kola iëne la ketre atr hnei uati hmitrötr. Ame kowe la itre xaa hna iën, jol koi angatr troa mekun laka, hnei Iehova hna ië angatr. Maine jë, angatr a hnying ka hape, ‘Hnauëne la Akötresieti a ië ni?’ Tha celë kö aqane mekune la itre xan. Hnei Paulo aposetolo hna qaja la ka traqa kowe la itre hna iën. Öni nyidrë: “Pine laka hnei nyipunieti hna mejiun, Keriso a atihatrenyi * nyipunieti jë, jëne la uati hmitrötr hna thingehnaean. Nge celë hi hatrene ka canga anyipicine la edrö së.” (Efe. 1:13, 14; ftn.) Hnene la uati hmitrötr matre xecie koi angatr laka, hna ië angatr hnei Iehova. Ceitu hi la uati hmitrötr memine la ketre “hatrene [hna thingehnaean maine isisinyikeu]” ka anyipicine laka, tro kö angatr elany a mel epine palua e koho hnengödrai ngo tha e celë fene kö.—E jë la 2 Korinito 1:21, 22.
6. Nemene la nyine tro la ketre hna iën a kuca matre troa mel e koho hnengödrai?
6 Maine hna iën la ketre trejin, hapeu, kolo kö lai a hape, ka tro hë angeic a mel e koho hnengödrai? Ohea. Xecie hnyawa koi angeic laka, hna ië angeic troa tro hnengödrai eë. Ngo, tha tro kö angeic a thëthëhmin la hna hape: “Ange trejin, isine jë troa lapa xome catrëne la manathithi nyipunie, ene la troa itre hna hën me iën hnei Akötresie, ke maine tro nyipunieti a catre kuca tun, tha tro jë pi kö nyipunieti a kei.” (2 Pet. 1:10) Ngacama hna iën la ketre trejin troa tro hnengödrai eë, ngo tro angeic a kapa la manathith cili, e hnei angeic hna mele nyipici.—Fil. 3:12-14; Heb. 3:1; Hna ama. 2:10.
NEMENE LA KA AMAMANE LAKA, HNA IËNE LA KETRE ATR?
7. Nemene la ka amamane kowe la ketre atr laka, hna ië angeic troa mel e koho hnengödrai?
7 Nemene la ka amamane kowe la ketre atr laka, hna ië angeic troa mel e koho hnengödrai? Hnei Paulo hna sa la hnying celë, ngöne lo nyidrëti a ithanata kowe la “itre hna iën troa hmitrötr” e Roma. Öni nyidrë: “Ame la uati hmitrötre i Akötresie, tha eje kö a upi së troa itre hlu me xou, ngo eje pe a kuca matre nyi kuku së, nge matre tro sa suene ka hape: ‘Abba Kaka!’ Nge ua a anyipicine koi së ka hape, itre nekö i Akötresieti hë së.” (Rom. 1:7; 8:15, 16) Jëne la uati hmitrötr, Akötresieti a amamane hnyawa kowe la itre hna iën laka, Nyidrëti a hë angatr troa elë hnengödrai eë.—1 Thes. 2:12.
8. Thenge la 1 Ioane 2:20, 27, nemene la ka amamane laka, pëkö ka atreine jelenyipicine la itre hna iën?
8 Hnei Iehova hna kuca matre tha tro kö a luelu hnene la itre hna iën. Xecie koi angatr laka, hna hë angatr troa elë hnengödrai eë. (E jë la 1 Ioane 2:20, 27.) Nyipiewekë tro Iehova a inine la itre trejin hna iën jëne la ekalesia, tune la nöjei trejin asë. Ngo pëkö ka atreine jelenyipici angatr. Jëne la uati hmitrötr, ene la mene i Nyidrë ka pëkö ifegon, Iehova a anyipicine koi angatr laka, hna ië angatr!
HNA “HNAHONE HMACA” ANGATR
9. Ame la kola iëne la ketre atr, nemene la ka saze thei angeic, tune la hna qaja ngöne Efeso 1:18?
9 Ame kowe la itre xaa hlue i Iehova enehila, jole troa trotrohnine la ka traqa ngöne la Akötresieti a iën la ketre atr. Pine nemen? Pine laka, tha hna ië angatre kö. Hnei Akötresieti hna xup la itre atr matre troa mel epine palua e celë fen, ngo tha e koho hnengödrai. (Gen. 1:28; Sal. 37:29) Ngo hnei Iehova hna iëne la itre xan troa mel e koho hnengödrai. Ame la Nyidrëti a iën la ketre atr, Nyidrëti a saze la mejiune i angeic memine la aqane mekuna i angeic. Angeice ha mejiune troa mel e koho hnengödrai.—E jë la Efeso 1:18.
10. Nemene la aliene la hna hape, troa “hnahone hmaca”? (Wange ju fe la ithuemacany.)
10 Ame la uati hmitrötr a iëne la ketre trejin, kösë angeic a “hnahone hmaca,” * maine “hnahon qaa hnengödrai.” Öni Iesu ka hape, thatreine kö tro la ketre hna iën a qejepengöne kowe la itre xan tha hna iëne kö, la ka traqa ngöne la kola “hnahone hmaca,” maine “hnahon hnei ua.”—Ioane 3:3-8; ftn.
11. Qejepengöne jë la aqane saze la mekuna ne la ketre hna iën.
11 Nemene la ka saze ngöne la mekuna ne la itre trejin hna iën? Qëmekene tro Iehova a ië angatr, angatr a mejiune troa mel epine palua e celë fen. Angatre lo a trengeneune la ijine tro Iehova a apatrene la ngazo me aparadraisone la fen. Maine jë, hnei angatre fe hna hane mekun troa kapa la itre sinee i angatr hna troa amelene hmaca. Ngo ame hë lo kola ië angatr, hna saze la mekuna i angatr. Tune kaa? Tha angatre kö a wangacone la mejiune troa mel e celë fen. Tha hnei angatre kö hna saze aqane mekun pine laka, kucakuca catre palaha angatr me akötr. Ketre, tha angatre kö a mekun laka, troa pë aliene la mele i angatr e celë fen. Jëne la uati hmitrötr, hnei Iehova hna saze la aqane mekuna i angatr memine la mejiune i angatr.
12. Thenge la 1 Peteru 1:3, 4, nemene la hna mekun hnene la itre trejin hna iën göne la mejiune i angatr?
12 Ame kowe la itre hna iën, tha ijiji angatre kö troa kapa la manathithi cili. Ngo tha luelu kö angatr laka, hnei Iehova hna ië angatr. Madrine catre angatr, nge tru la hni ne ole i angatr kowe la mejiune celë, ene la troa mel e koho hnengödrai.—E jë la 1 Peteru 1:3, 4.
13. Nemene la aqane goeëne hnene la itre hna iën, la mele i angatr e celë fen?
13 Hapeu, kolo kö lai a hape, itre hna iën a pi mec? Hnei Paulo aposetolo hna sa la hnying celë. Hnei nyidrëti hna aceitunëne la ngönetrei ne atr memine la ketre tat. Öni nyidrë: “Nyipici, eahuni itre ka lapa ngöne la itate celë a awe, ngo tha hnene kö laka, eahuni a pi unatrij ej, ngo aja huni troa hetrëne la ketre, matre ulume pi la ka mec hnene la mel.” (2 Kor. 5:4) Ame kowe la itre hna iën, ka nyipiewekë la mele i angatr e celë fen, nge tha aja i angatre kö troa canga mec. Angatre pe a mele madrin, nge aja i angatr troa nyihlue i Iehova o drai, memine la itre sinee i angatr. Ngo tha thëthëhmine kö angatr la mejiune i angatr koi elany.—1 Kor. 15:53; 2 Pet. 1:4; 1 Ioane 3:2, 3; Hna ama. 20:6.
HNEI IEHOVA KÖ HNA HANE IË SË?
14. Nemene la itre ewekë hna kuca hnene la nöjei hlue i Iehova, itre hna iën me itre xane fe?
14 Maine jë, easa thel e hna hane fe kö ië së hnei uati hmitrötr. Maine eje hi, pane mekune jë la itre hnying celë: Easë kö a ajane catrëne troa kuca la aja i Iehova? Hapeu, easë kö a catre cainöj? Easë kö a catre inine la Tusi Hmitrötr, me inine “la itre ewekë ka jui i Akötresie”? (1 Kor. 2:10) Easë kö a öhne la aqane amanathithine Iehova la huliwa ne cainöje së? Eje kö e kuhu hni së la aja troa xatuane la itre xan, troa atrepengöi Iehova hnyawa? Hapeu, öhne kö së la itre aqane xatua së hnei Iehova ngöne la mele së? Maine epuni a nangëne la nöjei hnying celë, kolo kö lai a anyipicine ka hape, hna hë epuni fe troa mel e koho hnengödrai? Ohea. Pine nemen? Pine laka, celë hi aqane mekun ne la nöjei hlue i Akötresie, itre hna iën maine itre xan. Jëne la uati hmitrötr, ijije hi tro Iehova a xatuane la nöjei hlue i Nyidrë troa kuca la itre ewekë cili, ngacama isapengöne kö la mejiune i angatr. Eje hi, maine tha xecie hnyawa koi së laka, hna ië së hnei uati hmitrötr, kolo lai a hape, tha hna ië së kö. Tha luelu kö la itre hna iën! Atre hi angatr laka, hna ië angatr!
Jëne la uati hmitrötr, hnei Iehova hna hamë Aberahama, Sara, Dravita, me Ioane Bapataiso la trengecatr troa kuca la itre ewekë ka tru, ngo tha hnei Nyidrëti kö hna ië angatr troa mel e koho hnengödrai (Wange ju la paragarafe 15-16) *
15. Nemene la ka amamane laka, tha hna iën asë hi la itre ka kapa la uati hmitrötr?
15 Alanyimu e hnine la Tusi Hmitrötr, la itre tulu ne lapaun, itre atr ka kapa la uati hmitrötr, ngo tha ka tro kö a mel e koho hnengödrai. Hna eatrongë Dravita hnei uati hmitrötr. (1 Sam. 16:13) Hnene la uati hmitrötr hna xatua angeic troa atrepengöi Iehova hnyawa, me cinyihane la itre xaa götrane la Tusi Hmitrötr. (Mar. 12:36) Ame pe, hnei Peteru aposetolo hna qaja ka hape, “tha elë kö Dravita hnengödrai eë.” (Itre hu. 2:34) Ketre, hnei Ioane Bapataiso hna “tiqa hnei uati hmitötr.” (Luka 1:13-16) Öni Iesu ka hape, pëkö ketre atr ka sisitria catre kö hui Ioane. Ngo ame pe, tha tro kö angeic a sine la Baselaia e koho hnengödrai. (Mat. 11:10, 11) Jëne la uati hmitrötr, hnei Iehova hna hamë angatr la trengecatr troa kuca la itre ewekë ka tru. Ngo tha hnei Nyidrëti kö hna ië angatr troa mel e koho hnengödrai. Hapeu, kolo kö lai a hape, co hi la lapaune i angatr hune la itre hna iën troa musi e koho hnengödrai? Ohea. Kolo pe a amamane laka, Iehova a troa amele angatre hmaca ngöne la Paradraiso e celë fen.—Ioane 5:28, 29; Itre hu. 24:15.
16. Nemene la mejiune ne la itre xaa hlue i Akötresieti enehila?
16 Ame thene la nöje i Akötresie enehila, ala xalaithe pe hi la itre ka mejiune troa mel e koho hnengödrai. Ame la itre xan, angatr a trengeneune troa mel e celë fen, fene la musi ne la Baselaia i Akötresie, tui Aberahama, Sara, Dravita, Ioane Bapataiso, me itre xane ju kö hna qaja hnei Tusi Hmitrötr.—Heb. 11:10.
17. Nemene la itre hnying hne së hna troa wang ngöne la ketre tane mekun?
17 Hetreny palahi enehila la itre trejin hna iën e celë fen, matre hetre itre hnying nyine tro sa mekun. (Hna ama. 12:17) Nemene la aqane tro la ketre hna iën a sipu goeë angeic? Nemene la aqane tro sa ujë kowe la ketre trejin ka xome la falawa me ije la waina ngöne la Drai Ne Amekunën? Tune kaa e kolo palahi a elë la etrune la itre hna iën? Hapeu, tro kö sa seseu me hnehengazo? Tro la ketre tane mekun a sa la itre hnying celë.
^ Qaane lo Penetekos 33 M.K. utihë enehila, Iehova a hamë mejiune kowe la itre Keresiano, ene la troa ce mus memine la Nekö i Nyidrëti e koho hnengödrai. Angatr a atre tune kaa ka hape, hna ië angatr kowe la manathith celë? Nemene la ka traqa ngöne la Iehova a hëne la ketre atr a tro hnengödrai eë? Hna nyitrepene la tane mekun celë hnene la Ita Ne Thup ne Januare 2016. Ej a troa sa la itre hnying celë.
^ GÖI TROA TROTROHNIN: Hna iën hnei uati hmitrötr: Jëne la uati hmitrötr, Iehova a iëne la atr ka troa ce musi me Iesu e koho hnengödrai. Akötresieti a thingehnaean maine hamëne la ketre “hatrene ka canga anyipicin.” (Efe. 1:13, 14) Ijije hi tro la itre hna iën a qaja ka hape, hnene la uati hmitrötr hna “anyipicin,” maine amamane koi angatr laka, edrö i angatr e koho hnengödrai.—Rom. 8:16.
^ GÖI TROA TROTROHNIN: Atihatren. Troa atihatrene la ketre atr qëmekene tro angeic a mec, e hnei angeic hna mele nyipici. Maine pena, troa atihatrei angatr qëmekene la akötr atraqatr.—Efe. 4:30; Hna ama. 7:2-4; wange ju la “Questions des lecteurs” ngöne la Ita Ne Thup ne Eiperem 2016, qene Wiwi.
NYIMA 27 Kola Mama La Itre Nekö i Akötresie
^ IATR: Ngacama hna akalabusi së maine pena easa cainöj me inine la nyipici koi itre xan, ngo easë asë hi a mejiune troa mel e celë fen fene la musi ne la Baselaia i Akötresie.
