1-2. Sowtu foondoo sani pasa na a Pinksterfesa fu a yali 33?

NA A Pinksterfesa fu a yali 33, wan sani fu 120 disipel be kon makandaa aini wan kambaa a wan sodoo a Yelusalem (Toli 1:13-15; 2:1). Wantu dei pasa, Yesesi be taigi den taki den be mu tan a Yelusalem fu di den be o fende wan pelensipali kado (Toli 1:4, 5). San pasa di den kon makandaa?

² „Wanboowanboo den yee enke wan gaan winta e wai a hemel.” Den be e yee a sani ya aini a hii osu. Neen „sani enke pikin faya” kon a den disipel tapu ede. Ala den be fende „santa yeye” (Toli 2:2-4). Na a foondoo fasi ya Yehofa salufu den Kelesten ya (Toli 1:8). A den a be den fosi sama di be salufu anga santa yeye *. Den be fende a gaandi fu tii makandaa anga Yesesi a hemel.

3. Saide den sama di be de na a sodoo be sabi kiin taki den be salufu anga santa yeye?

³ Efi yu a be wan fu den disipel di be de na a sodoo, noiti i be o feegete a dei de. Wan sani di be gei pikin faya be de a yu ede, neen i bigin taki aini omen sowtu tongo! (Toli 2:5-12) I be o sabi kiin taki i be salufu anga santa yeye. Ma na ala sama di salufu anga santa yeye e  salufu na aseefi fasi? Nono. Fa u du sabi?

4. Na aseefi yuu ala den salufu Kelesten fu a ten fu den apostel be salufu anga santa yeye?

⁴ Meke u luku on ten wan sama e salufu anga santa yeye. A ná den 120 Kelesten di be de na a sodoo wawan be toon salufu Kelesten na a Pinksterfesa fu a yali 33. Aseefi dei de, ete wan sani fu 3000 Kelesten be fende a santa yeye di Yesesi be paamisi den bakaman fi en. Di den dopu neen den salufu anga santa yeye (Toli 2:37, 38, 41). Ma den yali baka dati, a ná ala salufu Kelesten be salufu anga santa yeye na a dei di den dopu. Den Samaliyasama dati a wan pisiten baka di den dopu fosi den be salufu anga santa yeye (Toli 8:14-17). Koneiliyesi anga en osufamii dati a fosi den dopu den be salufu anga santa yeye.​—Toli 10:44-48.

5. Enke fa 2 Korentesama 1:21, 22 e soi, da san e pasa te wan sama toon wan salufu Kelesten?

⁵ Meke u luku san e pasa te wan sama toon wan salufu Kelesten. Biginbigin son Kelesten e si enke den á fiti fu Yehofa salufu den anga santa yeye. Kande den e akisi denseefi taki: ’Saide Gadu teke mi?’ Ma a ná ala den e fii so. Winsi fa wan sama e fii te Gadu salufu en, apostel Pawlesi e soi u san e pasa anga ala den salufu Kelesten. A taki: „Baka di u soi taki wi e biibi, neen Gadu gi wi a santa yeye di a be paamisi u. Gadu meke Yesesi gi wi a santa yeye enke wan sitampu *. A santa yeye de enke wan maiki di e soi taki wi o fende wan gudu” (Efe. 1:13, 14.) A sani ya e soi taki Yehofa e koboloiki en santa yeye fu soi den Kelesten ya kiin taki a teke den fu go a hemel. A so a santa yeye e meke a sama „sabi kiin” taki aini a ten di e kon, a ná goontapu a o libi fu teego,  ma a hemel. ​—Leisi 2 Korentesama 1:21, 22.

6. San wan salufu Kelesten mu du fu fende a sani di Gadu paamisi en?

⁶ Te wan Kelesten salufu anga santa yeye, a sani de wani taki kaba taki a o go hemel? Nono. A sabi taki Gadu kai en fu go a hemel. Ma a mu holi a sani ya a pakisei. Beibel taki: „Baala, neen ede meke u mu du ala san u poi fu tan tyai useefi enke wan sama di Gadu kai, wan sama di a teke. Efu wi e du den sani ya, noiti wi o fika a biibi” (2 Peit. 1:10). Neen meke winsi Gadu kai wan Kelesten fu go a hemel, efu a á holidoo, a ná o fende a gaandi ya.​—Filip. 3:12-14; Heb. 3:1; Openb. 2:10.

7. Fa wan sama e du sabi taki a salufu anga santa yeye?

⁷ Fa wan sama e du sabi taki a salufu anga santa yeye? Luku san Pawlesi be taigi den salufu Kelesten fu Rome, di Gadu be teke enke „santa sama”. A taigi den taki: „A yeye fu Gadu nai meke u toon saafu. A nai meke u feele tu. Ma ai meke Gadu teke wi enke en manpikin. Ai meke u bali: ’Abba, Nda!’ Na a yeye fu Gadu e soi u kiin taki wi a Gadu pikin” (Rom. 1:7; 8:15, 16). Gadu e koboloiki a santa yeye fu meke wan sama sabi taki a kai en fu tii enke kownu anga Yesesi a hemel.​—1 Tes. 2:12.

8. Fa 1 Yohanisi 2:20, 27 e soi taki den salufu Kelesten ná abi sama fanowdu fu soi den taki den salufu?

⁸ Yehofa e meke den salufu Kelesten sabi taki a kai den fu go a hemel. (Leisi 1 Yohanisi 2:20, 27.) Yehofa e koboloiki a kemeente fu gi den salufu Kelesten leli, leti enke fa ai leli ala taa Kelesten. Ma tokuso den ná abi nawan sama fanowdu fu taigi den taki Gadu salufu den. Yehofa e koboloiki a moo gaan kaakiti, di den e kai a santa yeye, fu meke den sabi taki a salufu den.

9. San e pasa te wan sama salufu anga santa yeye enke fa Efeisesama 1:18 e soi?

⁹ Ai taanga gi omen baala anga sisa fu fusutan san e pasa te Gadu salufu wan sama anga santa yeye. Ma a sani ya nai foondoo wi, bika denseefi á salufu anga santa yeye. Gadu meke libisama fu libi fu teego a goontapu ya, a ná hemel a meke den fu libi (Gen. 1:28; Ps. 37:29). Ma Yehofa teke wantu sama fu go a hemel. Neen meke te a salufu den, ai kengi a howpu di den be abi. Ai kengi a fasi fa den e denki tu. A so den sama ya e bigin angii fu go a hemel.​—Leisi Efeisesama 1:18.

10. San a wani taki fu „meke ete wan leisi”? (Luku a maiki a ondoo.)

¹⁰ Den Kelesten di salufu anga santa yeye, e „meke ete wan leisi”. * Yesesi be taki noiti wan sama di á salufu anga santa yeye o man fusutan san a wani taki fu „meke ete wan leisi”.​—Yoh. 3:3-8.

11. Fa wan Kelesten e bigin denki baka te a salufu anga santa yeye?

¹¹ Fa wan Kelesten e bigin denki baka te a salufu anga santa yeye? Den Kelesten  ya be abi a fii fu libi fu teego a goontapu, fosi Yehofa gi den a fii fu go a hemel. Kande den be e angii fu si fa Yehofa o meke a goontapu toon wan paladeisi baka te a puu ala ogii. Kande den be e angii fu miti den famii efuso den mati fu den di o weki baka. Ma baka te den toon salufu Kelesten, den e bigin denki taa fasi. Saide? A ná si den e si enke a libi a hemel bun moo du fu goontapu. A ná den booko-ede fu a libi a goontapu, meke den wani go a hemel. A ná si den e si enke den o fuka te den o libi fu teego a goontapu. Ma a Yehofa kengi a fasi fa den be e denki. A kengi a howpu di den be abi tu.

12. Enke fa 1 Peitilisi 1:3, 4 e soi, da fa salufu Kelesten e si a howpu di den abi?

¹² Kande wan sama di salufu anga santa yeye e fii enke a á bun sai fu Gadu gi en a gaandi ya. Winsi ai fii so, tokuso a sabi kiin taki Yehofa kai en fu go a hemel. Ai piisii te a pakisei a howpu di a abi fu go a hemel. Ai teke en fu bigi tu taki Gadu gi en a gaandi ya.​—Leisi 1 Peitilisi 1:3, 4.

13. Fa den salufu Kelesten e si a libi fu den a goontapu ya?

¹³ A sani ya wani taki den salufu Kelesten wani dede? Apostel Pawlesi be piki a akisi ya. A be taki a libisama sikin fu den de enke wan masanga. A taki: „Fu taki en kiin, wi e geme aini a masanga ya, bika ai tyotyo u. A ná wani u wani komoto aini a masanga ya, ma na a nyun wan u wani. Da libi o kon na a peesi fu dede” (2 Kor. 5:4). Den Kelesten ya á wani dede gawgaw fu di den weli fu a libi a goontapu ya. Den wani dini Yehofa makandaa anga den mati anga den famii fu den. Ma winsi san den e du, den e holi a sani di Gadu paamisi den a pakisei.​—1 Kor. 15:53; 2 Peit. 1:4; 1 Yoh. 3:2, 3; Openb. 20:6.

14. Sowtu sani nai soi taki wan Kelesten salufu anga santa yeye?

¹⁴ Kande yu e akisi iseefi efu Yehofa salufu i fu go a hemel. Efi yu e si enke a salufu i, akisi iseefi den sani ya: Yu e fii enke yu e dini Yehofa anga i hii ati? Yu e fii enke yu e peleiki anga i hii ati? Yu e du ala san i man fu sabi „den dipi toli fu Gadu”? (1 Kor. 2:10). Yu e si fa Yehofa e yeepi i te yu e peleiki? Yu e si en enke i faantiwowtu fu yeepi taawan fu dini Yehofa? I si fa Yehofa yeepi i omen leisi aini i libi? Kande yu o piki, eeye efu wan sama be o akisi i den sani ya. Ma a sani de wani taki Yehofa kai i fu go a hemel? Nono. Saide? Bika ala den sama di e dini Gadu e fii so, winsi den a ná salufu Kelesten. Yehofa e gi ala Kelesten a santa yeye fi en, winsi sowtu howpu den abi. Boiti dati, efi yu e akisi iseefi efu Gadu salufu yu anga santa yeye fu go a hemel, da dati wani taki a á salufu i. Den sama di Yehofa salufu nai akisi denseefi efu Yehofa salufu den. Den sabi taki a salufu den!

15. Fa u du sabi taki a ná ala den sama di Gadu be gi santa yeye a kai fu go a hemel?

¹⁵ Beibel e taki fu omen sama di Gadu be gi santa yeye, ma den á be go a hemel. A santa yeye be e tii David (1 Sam. 16:13). Santa yeye be yeepi en fu fusutan den dipi toli fu Yehofa. A be yeepi  en tu fu sikiifi son pisi fu Beibel (Malik. 12:36). Tokuso apostel Peitilisi taki David „á go a hemel” (Toli 2:34). Beibel e soi tu taki Yohanisi a Dopuman be „fuu anga a santa yeye” (Luk. 1:13-16). Yesesi seefi be taki sama á de di bigi moo Yohanisi, ma toku a taki Yohanisi á be o tii enke kownu a hemel (Mat. 11:10, 11). Yehofa be gi den man ya en santa yeye, neen meke den be man du gaan sani. Ma toku Yehofa á koboloiki en santa yeye fu kai den fu go a hemel. A sani ya wani taki den biibi á be taanga sai? A bun den á be bun sai fu go tii enke kownu a hemel? Nono. Yehofa o weki den baka fu libi aini a paladeisi a goontapu ya.​—Yoh. 5:28, 29; Toli 24:15.

16. Sowtu howpu gaanse Kelesten fu a ten ya abi?

¹⁶ Gaanse Kelesten fu a ten ya ná o go a hemel. Leti enke Abalaham, David, Yohanisi a dopuman anga omen taa sama fu fositen, den e wakiti a ten pe den o libi fu teego a goontapu aini wan paladeisi te a Kownukondee fu Gadu o tii.​—Heb. 11:10.

17. Sowtu akisi wi o luku aini a taa artikel?

¹⁷ Aini a ten ya, wantu salufu Kelesten de a goontapu ete, neen meke wi e wani sabi son sani (Openb. 12:17). Fa den sama di salufu anga santa yeye mu si denseefi? Fa i mu libi anga wan sama aini i kemeente di bigin nyan a beele efuso diingi a win na a Membeefesa? I mu booko yu ede efu moo sama e nyan a beele efuso diingi a win? Wi o piki den akisi ya aini a taa artikel.