1-2. Koo kabakoman juman lo kɛra saan 33 Pantekɔte loon na?

AN BE dimansilon sɔgɔma, saan 33 Pantekɔte loon na Zeruzalɛmu. Kalanden 120 ɲɔgɔn lajɛnnin lo sangaso dɔ kɔnɔ (Kɛw. 1:13-15; 2:1). Tile damanin ka kɔn o ɲɛ, Yezu tun y’a fɔ u ye ko u ka to Zeruzalɛmu sabu u bena nilifɛn kɛrɛnkɛrɛnnin dɔ sɔrɔ (Kɛw. 1:4, 5). Mun lo kɛra o kɔ?

² “Mankanba dɔ barila ka bɔ sankolo la. Mankan nin tun be i n’a fɔ fɔɲɔba mankan. Kalandenw tun be boon min kɔnɔ, o bɛɛ fara mankan nin na. U ye fɛɛn dɔw ye i n’a fɔ tasuma, a tilantilanna ka jigi u kelen kelen bɛɛ kuun na. U bɛɛ fara Nii Senuman na.” (Kɛw. 2:2-4). O cogo kabakoman lo la Jehova y’a ka hakili senu jigi o mɔgɔw kan (Kɛw. 1:8). Olu lo kɛra mɔgɔ fɔlɔw ye minw mɔnna ni hakili senu * ye ani ka jigiya sɔrɔ ka mara kɛ ni Yezu ye sankolo la.

3. Saan 33 Pantekɔte loon na, mun na kalandenw ma sigasiga hali dɔɔni k’u mɔnna ni hakili senu ye?

³ Kalanden minw tun lajɛnnin lo sangaso kɔnɔ, n’i tun b’u cɛma o loon na, koo min kɛra i tun tɛna ɲinɛ o kɔ abada. Fɛɛn dɔ jigira i kuun na i n’a fɔ tasuma ani i y’a daminɛ ka kaan wɛrɛ fɔ! (Kɛw. 2:5-12). I tun tɛna sigasiga hali dɔɔni ko i mɔnna ni hakili senu ye. Nka, minw mɔnna  ni hakili senu ye, yala u bɛɛ ta be kɛ cogo kelen na wa? Ayi. Mun na an b’o fɔ?

4. Saan kɛmɛkulu fɔlɔ la, yala kerecɛn mɔlenw bɛɛ mɔnna ni hakili senu ye wagati kelen na wa? A ɲɛfɔ.

⁴ Wagati min na mɔgɔ be mɔ ni hakili senu ye, an ka kuma o koo la. Yezu ka kalanden 120 nunu dɔrɔn lo ma mɔ ni hakili senu ye saan 33 Pantekɔte loon na. O loon na, mɔgɔ 3 000 ɲɔgɔn fana ye hakili senu sɔrɔ. U mɔnna ni hakili senu ye u batize tuma na (Kɛw. 2:37, 38, 41). Nka saan minw tugura o kɔ, kerecɛn mɔlenw bɛɛ ma mɔ ni hakili senu ye u batize tuma na. Ɲɛyirali fɛ, Samarikaw mɔnna ni hakili senu ye, u batizenin kɔ (Kɛw. 8:14-17). Kɔrinɛyi n’a somɔgɔw mɔnna ni hakili senu ye cogo kabakoman na. Olu ta kɛra sanni u ka batize yɛrɛ.​—Kɛw. 10:44-48.

5. Ka kɛɲɛ ni 2 Korɛntikaw 1:21, 22 ye, mun lo be kɛ kerecɛn mɔlen kelen kelen bɛɛ sugandi wagati la?

⁵ Min be kɛ ni mɔgɔ mɔnna ni hakili senu ye, an ka kuma o koo la. Minw mɔnna ni hakili senu ye, n’a sɔrɔ a be se ka gwɛlɛya u dɔw ma a daminɛ na ka sɔn a ma ko Jehova y’olu sugandi tiɲɛn na. U be se k’u yɛrɛ ɲininga ko: “Mun na Ala ye ne sugandi?” N’a sɔrɔ dɔw tɛna u yɛrɛ ɲininga o la. A mana kɛ min o min ye, ciden Pol y’a ɲɛfɔ min be kɛ kerecɛn mɔlen kelen kelen bɛɛ sugandi wagati la. A ko: “Aw fana lar’a la ka kisi o barika la, ka Nii Senuman sɔrɔ, min ye taamasiɲɛ * ye an kan, Ala tun y’a daa di min na. Ale lo b’a yira an na ko an bena niyɔrɔ sɔrɔ Ala fɛ.” (Efɛz. 1:13, 14). O la, Jehova be tɛmɛ a ka hakili senu fɛ k’a yira o kerecɛnw na ko ale y’u sugandi. O cogo la, hakili senu “b’a yira [wala a be garanti di]” ko sini ma, u bena ɲɛnamaya kɛ kudayi  sankolo lo la, dugukolo kan tɛ.​—2 Korɛntikaw 1:21, 22 kalan.

6. Kerecɛn mɔlen ka ɲi ka mun lo kɛ n’a b’a fɛ k’a ka sara sɔrɔ sankolo la?

⁶ Ni kerecɛn dɔ mɔnna ni hakili senu ye, yala o kɔrɔ ko siga t’a la a bena a ka sara sɔrɔ sankolo la wa? Ayi. A lanin b’a la ko a sugandira walisa ka taga sankolo la. Nka, a ka ɲi k’a hakili to lasɔmini kuma nin na: “N badenw, o la sa, aw k’aw timinadiya, Ala y’aw woloma k’aw wele min kama, o ka sabati aw bolo. N’aw tora k’a kɛ ten, aw tena ben hakɛ la abada.” (2 Piyɛri 1:10). O la, hali ni kerecɛn dɔ sugandira walisa ka taga sankolo la, a ka ɲi ka to kantigiya la n’a b’a fɛ k’a ka sara sɔrɔ.​—Filip. 3:12-14; Eburuw 3:1; Yir. 2:10.

7. Mɔgɔ b’a lɔn cogo di ko ale sugandira walisa ka taga sankolo la?

⁷ Nka, mɔgɔ b’a lɔn cogo di ko ale sugandira walisa ka taga sankolo la? Ciden Pol ye kuma minw sɛbɛ Ɔrɔmukaw ma, o ɲiningali jaabili be sɔrɔ o kɔnɔ. Ala tun y’o kerecɛnw “wele ka kɛ a ta mɔgɔ saninmanw” ye. Pol y’a fɔ u ye ko: “Aw ye Nii min sɔrɔ, ale t’aw bila jɔnya ni siranya la, Nii Senuman lo. Ale lo barika la aw kɛra Ala ka deenw ye, ani ale barika la an b’a fɔ Ala ye ko Baba, an Faa. O Nii Senuman nin b’a yira an na ko an kɛra Ala deenw ye.” (Ɔrɔm. 1:7, Biblu Ala ta Kuma; 8:15, 16). O la, hakili senu barika la, Ala b’a yira kerecɛn mɔlenw na ka gwɛ k’u sugandira walisa ka taga sankolo la.​—1 Tes. 2:12.

8. Ka kɛɲɛ ni 1 Zan 2:20, 27 ye, mun na kerecɛn mɔlenw mako t’a la tɔɔw k’a fɔ u ye ko u mɔnna ni hakili senu ye?

⁸ Jehova ye minw sugandi walisa u ka taga sankolo la, a b’a to u tɛ sigasiga o la hali dɔɔni (1 Zan 2:20, 27 kalan). Tiɲɛn lo ko kerecɛn mɔlenw mako b’a la Jehova ka tɛmɛ kafo fɛ k’u kalan i ko a b’a sagokɛla tɔɔw kalan cogo min na. Nka, u mako t’a la mɔgɔ si k’a fɔ u ye k’u mɔnna ni hakili senu ye tiɲɛn na. Fanga min ɲɔgɔn tɛ yen, Jehova tɛmɛna o lo fɛ k’a yira u la ka gwɛ ko u ye kerecɛn mɔlenw ye! O fanga ye hakili senu lo ye.

9. Ka kɛɲɛ ni Efɛzikaw 1:18 ye, ni Jehova ye dɔ mɔ ni hakili senu ye, yɛlɛmani jumanw lo be kɛ a tigi fɛ?

⁹ Ni Jehova ye mɔgɔ dɔ mɔ ni hakili senu ye, yɛlɛmani minw be kɛ a tigi fɛ, n’a sɔrɔ a ka gwɛlɛ Jehova sagokɛlaw fanba ma k’o faamu. Mun na do? Sabu olu yɛrɛ ma mɔ ni hakili senu ye. Ala ye adamadenw dan walisa u ka ɲɛnamaya kɛ fɔɔ abada dugukolo lo kan. A m’u dan walisa u ka ɲɛnamaya kɛ sankolo la (Zɛnɛzi 1:28; Zab. 37:29). Nka, a ye dɔw sugandi walisa u ka taga ɲɛnamaya kɛ sankolo la. O la, n’a ye dɔ mɔ ni hakili senu ye, a b’a tigi miiricogo n’a ka jigiya yɛlɛma pewu! A tigi bena ɲɛnamaya kɛ sankolo la minkɛ, a ninsɔn be diya o kosɔn.​—Efɛzikaw 1:18 kalan.

10. Ka “segi ka wolo,” o kɔrɔ ko di? (Jukɔrɔla kunnafoni fana lajɛ.)

¹⁰ Kerecɛn minw mɔnna ni hakili senu ye, u be “segi ka wolo.” * Yezu y’a ɲɛfɔ ko mɔgɔ min tɛ kerecɛn mɔlen ye, mɔgɔ tɛ se k’a ɲɛfɔ o tigi ye tigitigi, a be min kɛ mɔgɔ la ka “segi ka wolo” wala ka wolo “Nii Senuman barika la.”​—Zan 3:3-8.

11. Ni dɔ mɔnna ni hakili senu ye, a ɲɛfɔ a miiricogo be yɛlɛma cogo min na.

¹¹ Kerecɛn minw mɔnna ni hakili senu ye, olu miiricogo be yɛlɛma cogo di?  Yanni Jehova k’u sugandi, u ka jigiya tun ye ka ɲɛnamaya kɛ fɔɔ abada dugukolo kan ani u ninsɔn tun ka di o kosɔn. Wagati min na Jehova bena juguya ban ani ka dugukolo yɛlɛma k’a kɛ alijɛnɛ ye, u tun kɔrɔtɔnin lo o wagati ka se. N’a sɔrɔ u tun be miiri k’a ye ko u b’u somɔgɔ wala u teri dɔ kunbɛnna min suu kununa. Nka tuma min na u mɔnna ni hakili senu ye, u miiricogo yɛlɛmana. Mun na do? U m’a daminɛ k’a miiri ko ka ɲɛnamaya kɛ kudayi dugukolo kan, o tɛ koo ɲuman ye. U m’u ka miiricogo yɛlɛma fana sabu hakiliɲagami bana tun b’u la wala u tun be tɔɔrɔla kojugu. U ma sin k’a miiri ko ka ɲɛnamaya kɛ fɔɔ abada dugukolo kan, o tɛna diya. Nka, Jehova lo tɛmɛna a ka hakili senu fɛ k’u ka miiricogo n’u ka jigiya yɛlɛma. O jigiya tun ka di u ye kosɔbɛ.

12. Ka kɛɲɛ ni 1 Piyɛri 1:3, 4 ye, kerecɛn mɔlenw be mun lo miiri u ka jigiya koo la?

¹² Ni dɔ mɔnna ni hakili senu ye, a be se k’a miiri ko ale man kan n’o nɛɛmaba ye. Nka, a tɛ sigasiga hali dɔɔni ko Jehova y’ale sugandi. A ninsɔn be diya kosɔbɛ ani a be Jehova waleɲuman lɔn n’a be miirila a ka jigiya koo la, o min ye ka taga sankolo la.​—1 Piyɛri 1:3, 4 kalan.

13. Kerecɛn mɔlenw b’u ka ɲɛnamaya jati cogo di dugukolo kan?

¹³ Yala o kɔrɔ ko kerecɛn mɔlenw b’a fɛ ka sa wa? Ciden Pol y’o ɲiningali jaabi. A ko: “Bari k’an to nii na, an be ŋunan. An dɛrɛnin lo, a ma kɛ ko an b’a fɛ ka sa . . . dɛ, nga an b’a fɛ ka farisogo sɔrɔ ka bɔ Ala fɛ fana waasa nii ka see sɔrɔ saya kan.” (2 Kor. 5:4). A ma kɛ komi ɲɛnamaya man di o kerecɛnw ye tugun ani u b’a fɛ ka sa joona. Ɲɛnamaya ka di u ye. U b’a fɛ k’u jija loon o loon ka Jehova sago kɛ ani ka kɛ n’u somɔgɔw n’u teriw ye. U be min o min kɛ, u b’u ka jigiya ɲuman to u hakili la tuma o tuma.​—1 Kor. 15:53; 2 Piyɛri 1:4, NW; 1 Zan 3:2, 3; Yir. 20:6.

14. Mun lo t’a yira ko mɔgɔ mɔnna ni hakili senu ye?

¹⁴ N’a sɔrɔ i b’i yɛrɛ ɲiningara n’i mɔnna ni hakili senu ye. N’o lo, miiri ɲiningali nunu na minw kɔrɔtanin lo: Yala i b’a fɛ n’i dusu bɛɛ ye ka Jehova sago kɛ wa? Ele fɛ, i kisɛyanin lo kosɔbɛ waajuli la wa? A ka d’i ye ka Ala ka Kuma sɛgɛsɛgɛ ani ka “Ala ka koo dogoninw” faamu wa? (1 Kor. 2:10). I sera ka mɔgɔ caaman dɛmɛ waajuli la Jehova barika la wa? I b’a fɛ sɔbɛ la ka tɔɔw dɛmɛ u ka Jehova lɔn wa? I y’a ye ko Jehova y’i dɛmɛ siɲɛ caaman na cogo tigitigi dɔw la i ka ɲɛnamaya kɔnɔ wa? N’i y’o ɲiningaliw bɛɛ jaabi ko ɔnhɔn, yala o b’a yira ko i sugandira walisa ka taga sankolo la wa? Ayi, o tɛ. Mun na do? Sabu Ala sagokɛlaw bɛɛ be se k’o ɲiningaliw jaabi ko ɔnhɔn, u mana kɛ kerecɛn mɔlenw wala saga dɔ wɛrɛ mɔgɔw ye. Jehova ka hakili senu barika la, a be se k’a sagokɛlaw bɛɛ dɛmɛ u k’o koow kɛ, u ka jigiya mana kɛ min o min ye. N’i b’i yɛrɛ ɲiningara n’i mɔnna ni hakili senu ye wala n’i ma mɔ, o b’a yira ko i ma mɔ ni hakili senu ye. Minw mɔnna ni hakili senu ye, u t’u yɛrɛ ɲininga o la. U b’o lɔn le dɔrɔn!

15. An b’a lɔn cogo di ko minw ye Ala ka hakili senu sɔrɔ, u bɛɛ lo ma sugandi walisa ka taga sankolo la?

 ¹⁵ Mɔgɔ caaman kofɔra Bibulu kɔnɔ minw tun limaniyanin lo ani u ye hakili senu sɔrɔ. Nka, u ka jigiya tun tɛ ka ɲɛnamaya kɛ sankolo la. Ɲɛyirali fɛ, hakili senu ye Dawuda ɲɛminɛ (1 Sam. 16:13). Hakili senu y’a dɛmɛ a ye Jehova ka koo dunbaw faamu ani k’a ɲɛminɛ a ye Bibulu yɔrɔ dɔw sɛbɛ (Mariki 12:36). O bɛɛ n’a ta, ciden Piyɛri y’a fɔ ko “Dawuda ma yɛlɛ sankolo la.” (Kɛw. 2:34). Zan Batizelikɛla tun ‘fanin lo nii senuman na.’ (Luka 1:13-16). Yezu ko Zan mɔgɔba ɲɔgɔn ma sɔrɔ. Nka, a y’a yira ko minw bena sankolo Masaya sɔrɔ, Zan t’u cɛma (Mat. 11:10, 11). Jehova tɛmɛna a ka hakili senu fɛ ka fanga di o cɛɛw ma u ye koo kabakomanw kɛ. Nka, a m’u sugandi walisa u ka taga ɲɛnamaya kɛ sankolo la. Yala o kɔrɔ ko u tun tɛ kantigiw ye i ko minw sugandira ka taga masaya kɛ sankolo la wa? Ayi, o tɛ. O kɔrɔ ko Jehova bena u lakunu walisa u ka ɲɛnamaya kɛ alijɛnɛ kɔnɔ, dugukolo kan le.​—Zan 5:28, 29; Kɛw. 24:15, Bible senuma.

16. Ala sagokɛlaw fanba ka jigiya ye mun lo ye?

¹⁶ Ala sagokɛla minw be dugukolo kan bi, u fanba ka jigiya tɛ ka taga sankolo la. U be i ko Ibrayima, Sara, Dawuda, Zan Batizelikɛla ani cɛɛw ni muso caaman wɛrɛ minw ye ɲɛnamaya kɛ Bibulu sɛbɛwagati la. A ka di u ye k’a lɔn k’u bena ɲɛnamaya kɛ dugukolo kan tuma min na Ala ka Masaya bena dugukolo mara.​—Eburuw 11:10.

17. An bena ɲiningali jumanw lo jaabi barokun nata la?

¹⁷ Kerecɛn mɔlen dɔw bele b’an cɛma bi. O la, n’a sɔrɔ an b’an yɛrɛ ɲiningara koo dɔw la (Yir. 12:17). Ɲɛyirali fɛ, kerecɛn mɔlenw ka ɲi k’u yɛrɛ jati cogo di? I ka kafo kɔnɔ, ni dɔ y’a daminɛ ka buru dumu ani ka diwɛn min Hakilijigi lajɛn na, i ka ɲi k’o tigi jati cogo di? Minw b’a fɔ k’u ye kerecɛn mɔlenw ye, n’olu hakɛ be cayara ka taga, yala o ka ɲi k’i hakili ɲagami wa? An bena o ɲiningaliw jaabi barokun nata la.