1-2. Ki biten èstraòwdinè ki rivé jou a Lapannkòt 33 ?

SÉ DIMANCH maten, nou a Jérizalèm é nou an 33 a épòk an nou. Sé jou a Lapannkòt é apépré 120 disip sanblé adan on pyès anho a on kaz (Akt 1:13-15 ; 2:1). Déotwa jou avan, Jézi té mandé-yo rété Jérizalèm pas i té kay ba-yo on kado èspésyal (Akt 1:4, 5). Ka ki ka pasé apré ?

² ‘Onsèl kou, on dézòd ka sòti an syèl-la, i ka fè menm dézòd ki on gwo koudvan.’ Yo ka tann dézòd-lasa an tout kaz-la. Aprésa ni « dé biten ki ka sanm dé ti flanm difé » ki ka parèt asi tèt a sé disip-la, é yotout ka « vin ranpli èvè lèspri sen » (Akt 2:2-4). Sé konsa Jéova ka voyé lèspri sen a-y asi gwoupmoun-lasa. I ka fè sa on mannyè ki èstraòwdinè (Akt 1:8). Sé asi yo prèmyé Jéova ka voyé lèspri sen * a-y pou yo vin wen é sa ka ba-yo lèspwa dè gouvèné èvè Jézi an syèl-la.

3. Poukwa moun ki té la jou a Lapannkòt té sèten kè lèspri sen té chwazi-yo pou yo vin wen ?

³ Si ou té èvè sé disip-la adan chanm-la anho a kaz-la, ou pa té’é jen oubliyé sa. On biten ki té ka sanm on ti flanm difé té’é vin pozé-y asi tèt a-w, é ou té’é mété-w ka palé adan enpé lang diféran (Akt 2:5-12). Ou té’é sèten kè lèspri sen chwazi-w pou ou vin wen. Men ès tout sé  moun-la ki ka rèsèvwa lèspri sen pou yo vin wen ka rèsèvwa-y on mannyè èstraòwdinè konsa ? Ès yotout ka rèsèvwa-y a menm moman-la an vi a yo ? Awa. Kijan nou fè sav sa ?

4. Èskè tout sé moun-la ki vin wen o 1^é syèk vin wen a menm moman-la adan vi a yo ? Bay on ti èsplikasyon.

⁴ An-nou vwè a ki moman on moun ka vin wen. A pa yenki sé 120 disip-la ki vin wen jou a Lapannkòt 33. Tibwen plita an jouné-la, lèspri sen désann asi 3 000 moun apépré ankò. Yo vin wen lè yo pran batèm (Akt 2:37, 38, 41). Men a pa konsa sa pasé pou touséla ki vin wen apré. Pa ègzanp, sé Samariten-la vin wen kèlkè tan apré batèm a yo (Akt 8:14-17). Kòwnèy é moun ki té ka viv akaz a-y vin wen avan yo té batizé. É sa sé on biten ki pa té ni labitid fèt (Akt 10:44-48).

5. Dapré sa ki maké adan 2 Korentyen 1:21, 22, ka ki ka rivé lè Bondyé ka voyé lèspri sen a-y anlè on moun pou i vin wen ?

⁵ An-nou vwè aprézan ka ki ka pasé lè on moun ka rèsèvwa lèspri sen pou i vin wen. Ni sèwten wen, lè Bondyé sòti chwazi-yo, yo ni dimal a aksèpté sa. Pétèt yo ka mandé-yo : « Men poukwa sé mwen Bondyé chwazi ? » Ni dòt aprézan ki pa’a réyaji menmjan-la. Men kèlkèswa jan yo réyaji, tout sé krétyen wen la ka viv sa lapòt Pòl ka èspliké lè i ka di : « Apré zò kwè adan-y, Bondyé mèt so * a-y asi zòt grasa lèspri sen a-y kè i té ja pwomèt-zòt. Lèspri sen ka ban-nou on garanti avan lè kè nou ké rèsèvwa éritaj an nou » (Éféz. 1:13, 14; nòt). Donk Jéova ka itilizé lèspri sen a-y pou fè sé krétyen-lasa konprann on mannyè ki klè kè i chwazi-yo. Kifè, lèspri sen sé on« garanti » kè Bondyé ka ba-yo pou yo sèten kè talè, a pa si latè yo ké viv men an syèl-la. É sé ké pou touttan (li 2 Korentyen 1:21, 22).

6. Ka on krétyen wen dwèt fè pou i pé sa ni rékonpans a-y an syèl-la ?

 ⁶ Si Bondyé chwazi on krétyen pou i vin wen, ès sa vlé di kè sa sèten a san pou san kè i ké ay viv an syèl-la ? Awa. I sèten kè Bondyé chwazi-y pou i ay viv an syèl-la. Men fò i sonjé avèwtisman-lasa : ‘Frè an mwen, Bondyé kriyé-zòt é i chwazi-zòt, donk, toujou fè onlo éfò pou zò pa pèd privilèj-lasa, paskè si zò kontinyé fè sa, non, zò pé ké janmé abandoné’ (2 Pyè 1:10). Sé poukwa, menmsi Bondyé chwazi on krétyen, oben i kriyé-y, pou i ay viv an syèl-la, i ké ni rékonpans a-y yenki si i rété fidèl (Filip. 3:12-14 ; Ébr. 3:1 ; Rév. 2:10).

7. Kijan on moun ki wen ka fè pou sav kè Bondyé chwazi-y pou i ay viv an syèl-la ?

⁷ Kijan on moun ka fè pou sav kè Bondyé chwazi-y pou i ay viv an syèl-la ? Nou ka touvé on répons ki klè adan sa Pòl di sé frè-la ki té ka rété Wòm la é kè yo té « kriyé pou yo vin sen ». I di-yo : « Pas zòt pa rèsèvwa on lèspri ki ka fè-zòt vin èsklav é ki ka fè-zòt pè ankò, men zò rèsèvwa on lèspri ki ka fè Bondyé adòpté-zòt konm gason a-y, é sé lèspri-lasa ki ka fè-nou kriyé : “Aba, Papa !” Lèspri sen limenm é lèspri an nou ka fè-nou sav kè nou sé timoun a Bondyé » (Wom. 1:7 ; 8:15, 16). Donk, grasa lèspri sen a-y, Bondyé ka montré séla i chwazi la kè yo k’ay viv an syèl-la. É i ka montré-yo sa on mannyè ki klè (1 Tés. 2:12).

8. Kijan 1 Jan 2:20, 27 ka montré kè on krétyen wen pa bizwen ponmoun di-y kè i wen ?

⁸ Lè Jéova ka chwazi on moun pou i ay an syèl-la, i ka fè ansòt pou moun-la pa ni pon dout an lèspri a-y (li 1 Jan 2:20, 27). Sé vré, on moun ki wen bizwen Jéova anségné-y kon nenpòt ki moun grasa lasanblé-la. Men i pa bizwen ponmoun di-y kè i wen pou i sèten dè sa. Jéova limenm itilizé lèspri sen a-y, ki sé pli gran fòs ki ni adan linivè, pou montré-moun-lasa on mannyè ki klè kè i chwazi-y antankè wen !

9. Éfézyen 1:18 ka palé dè chanjman ki ka fèt andidan a on moun lè i ka vin wen. Ki chanjman ésa ?

⁹ Jòdijou, pétèt kè ni onlo sèwvitè a Bondyé ki pa’a rivé konprann sa ki ka pasé lèwvwè Bondyé ka chwazi on moun pou i vin wen. Men sa toutafè nòwmal piskè yomenm a yo pa wen. É anplisdisa, Bondyé pa kréyé lézimen pou yo ay viv an syèl-la, men pou yo viv si latè pou touttan (Jén. 1:28 ; Sòm 37:29). Men Jéova chwazi sèwten moun pou ay gouvèné èvè Jézi. Donk, lè i ka fè on moun vin wen, Jéova ka chanjé èspérans a-y é jan-la i ka pansé la a san pou san, kifè moun-lasa ka kontan i k’ay viv an syèl-la (li Éfézyen 1:18).

10. Ka sa vlé di lè on moun ka « fèt ondòt fwa ankò » ? (gadé nòt-la osi).

¹⁰ Lè Bondyé ka voyé lèspri sen a-y asi on moun pou i vin wen, i ka « fèt ondòt fwa ankò * ». Jézi èspliké kè lè on moun pa wen, pa ni mwayen fè-y konprann vréman sa on moun ki « fèt ondòt fwa ankò » oben ki « fèt èvè lèspri sen » ka rèsanti (Jan 3:3-8, nòt).

11. Èspliké kijan lè on moun ka vin wen i ka rézonné ondòt jan.

¹¹ Lè on krétyen ka vin wen i pa’a pansé menmjan-la ankò. Kijansa ? Avan Jéova  té chwazi-y, i té ni lèspérans dè viv si latè é sa té ni onlo valè ba-y. A pa ti atann i té ka atann jou-la Jéova té’é fè latè wouvin on paradi ! É kanta lè i té’é woté laméchansté, pa menm palé ! Pétèt i té ja ka vwè-y ka akéyi fanmi a-y oben zanmi a-y ki mò. Men apré i vin wen, i pa ka rézonné menmjan-la ankò. Poukwa ? A pa paskè viv asi latè pou touttan pa té ka entérésé-y ankò. I pa enki mèt an tèt a-y kè onlè i ké las viv asi latè. É i pa enki chanjé èspérans pas i té ka soufè onlo é pas i té tris toubònman. An réyalité, sé Jéova ki sèvi èvè lèspri sen a-y pou chanjé mannyè-la i té ka rézonné la é èspérans a-y.

12. Dapré sa ki maké adan 1 Pyè 1:3, 4, ka sé krétyen wen la ka rèsanti lè yo ka sonjé èspérans a yo ?

¹² On moun ki ka vin wen pé ni lenprésyon kè i pa mérité privilèj-lasa. Men i pé’é jen douté kè Jéova chwazi-y. I ni onlo rèkonésans é i kontan toubònman davwa i k’ay viv an syèl-la (li 1 Pyè 1:3, 4).

13. Ka sé krétyen wen-la ka pansé dè vi-la yo ni la konnyéla asi latè ?

¹³ Donk ès sa vé di kè sé krétyen wen-la présé pou mò ? Lapòt Pòl réponn a kèsyon-lasa. I di kè kò a on moun ki wen ka touvé-y kon tant. Mi sa i maké : « Anfèt, nou ki adan tant-lasa, nou ka plenn, nou pi ba ki atè, pas a pa anvi nou anvi woté-y asi-nou, men nou anvi mèt lòt-la asi nou osi pou lavi fin bat èvè sa ki ka mò » (2 Kor. 5:4). Apapoudi sé krétyen-lasa pa anvi viv si latè ankò é kè yo présé mò. Men okontrè, yo enmé lavi é yo vé itilizé chak jou yo ka pasé asi latè pou sèvi Jéova ansanm èvè fanmi a yo é zanmi a yo. Men, kèlkèswa sa yo ka fè, bèl èspérans-la yo ni la pa’a jen sòti an tèt a yo (1 Kor. 15:53 ; 2 Pyè 1:4 ; 1 Jan 3:2, 3 ; Rév. 20:6).

14. Ki biten ki pa ka montré kè on moun wen ?

¹⁴ Pétèt ou ka mandé-w si Bondyé voyé lèspri sen a-y asi-w pou ou vin wen. Si sé sa, réfléchi si sé kèsyon enpòwtan lasa : Ès ou byen désidé a fè tousa Jéova ka mandé ? Ès ou ka santi kè ou ka pòté bon mannèv an prédikasyon ? Ès ou ka pran tan a-w pou étidyé Labib é pou aprann « biten a Bondyé ki fon » ? (1 Kor. 2:10). Ès ou ni lenprésyon kè Jéova ka béni prédikasyon a-w èspésyalman ? Ès ou vréman anvi édé lézòt aprann konnèt Jéova ? Ès ou ni lokazyon konstaté kè Jéova mèt men a-y an vi a-w a plizyè rèpriz ? Si ou réponn wi a tout sé kèsyon-lasa, ès savédi kè Bondyé chwazi-w pou ay viv an syèl-la ? Non. Poukwa nou ka di sa ? Pas tout sèwvitè a Bondyé pé réponn wi a sé kèsyon-lasa, ki yo wen, ki yo pa wen. É Bondyé pé ba nenpòt ki sèwvitè a-y lèspri sen pou fè tout sé biten-lasa kèlkèswa èspérans a-y. An réyalité, si ou ka mandé-w si Bondyé chwazi-w pou vin wen sé kè a pa  sa. Lè Jéova kriyé-w pou vin wen ou pa’a mandé-w si i envité-w ! Ou sav sa, tou senplèman !

15. Kijan nou fè sav kè a pa toutmoun ki rèsèvwa lèspri sen ki ké ay viv an syèl-la ?

¹⁵ Adan Labib, yo ka palé-nou dè onlo nonm ki té ni Lafwa é ki rèsèvwa lèspri sen a Bondyé. É poutan yo pa té ni lèspérans dè ay viv an syèl-la. Pa ègzanp, lèspri sen té ka gidé David (1 Sam. 16:13). Lèspri sen édé-y konprann dé biten enpòwtan asi Jéova é i jous pousé-y maké on pawti a Bib-la (Mawk 12:36). Sèlman,  lapòt Pyè di kè David « pa monté an syèl-la » (Akt 2:34). Jan Lèbatis té « ranpli èvè lèspri sen » (Lik 1:13-16). É Jézi di kè pa té ni ponmoun ki té pli gran ki Jan. Men magrésa, i di kè Jan pa té ké an wayòm a Bondyé an syèl-la (Mat. 11:10, 11). Jéova itilizé lèspri sen a-y pou ba sé nonm-lasa fòs pou fè dé biten èstraòwdinè, men i pa itilizé-y pou ba-yo lèspérans dè ay viv an syèl-la. Ès sa vlé di kè yo té ni mwens fwa ki séla yo chwazi la pou ay an syèl-la ? Men non. Savédi senplèman kè Bondyé ké fè-yo wouviv adan paradi-la asi latè (Jan 5:28, 29 ; Akt 24:15).

16. Ki rékonpans onlo sèwvitè a Bondyé ka atann jòdila ?

¹⁶ Lamajorité a sèwvitè a Bondyé ki asi latè konnyéla pa ni lèspérans dè ay viv an syèl-la. Kon Abraam, Sara, David, Jan Lèbatis é plen dòt misyé é madanm ki viv an tan a Labib, yo kontan toubònman lè yo ka sonjé kè yo ké viv asi latè anba dominasyon a wayòm a Bondyé (Ébr. 11:10).

17. A ki kèsyon nou ké réponn adan awtik-la ki ka vin la ?

¹⁷ Jòdijou, ka rété dé krétyen ki wen pawmi-nou toujou. Pétèt sa ka pousé-w pozé-w sèwten kèsyon (Rév. 12:17). Pa ègzanp, si on moun ka di i wen, ès fò i akwè-y ? Si on moun a lasanblé a-w ka koumansé manjé pen-la é bwè diven-la pannan Mémoryal-la, kijan pou ou aji èvè-y ? É si kantité moun ki ka di yo wen ka kontinyé ògmanté, ès sa dwètèt chouboulé-w ? Nou ké réponn a sé kèsyon-lasa adan awtik-la ki ka vin la.