1, 2. ¿Kasa alataka soʼu juyakat 33 sükalioʼu tü miʼiraakat Pentecostés?

SÜNAIN tü miʼiraa aainjünakat soʼu juyakat 33, tü kanüliakat Pentecostés, eejana maʼaka 120 nikirajüin Jesuu jutkatüin suluʼu wanee miichi chajatü Jerusalén; rimiinkoʼulujatü tia wattaʼa maalü (Aluw. 1:13-15; 2:1). Maʼaka jeʼra kaʼi süpülapünaa tia, nüküjain Jesuu namüin na nikirajüinkana makatüinjanain naya Jerusalén. Naʼatapajüinjatü wanee kasa aapünajatka namüin (Aluw. 1:4, 5, TNM). ¿Kasa alataka soʼu tia?

² Antalaa müsü sirumatuʼujee wanee kasa koʼlotüinsü maʼin, müsü aka saaʼin joutai eekai katsüin maʼin. Emetutsü maʼin suluʼupünaa tü miichikat eejanale jutkatüin na nikirajüinkana Jesuu. Neʼrakalaka wane müsü aka saaʼin suwarala siki suluʼu shiyeekuaippayaain shia wayuu. Nüntakalaka chi naaʼinkai Maleiwa naaʼu waneʼewai nakua (Aluw. 2:2-4, TNM). Müsü sukuwaʼipa süpüla nüntüin chi naaʼinkai Maleiwa naaʼu na nikirajüinkana Jesuu (Aluw. 1:8, TNM). Naya palajanakana nüneeküin Maleiwa nükajee chi naaʼinkai * otta chainjana naya aluwataain iipünaa nümaa Jesuu.

3. ¿Jamüsü pansaaka maʼin namüin na nikirajüinkana Jesuu naneekünüin nükajee chi naaʼinkai Maleiwa?

³ Nnojotsüjeʼe motuin paaʼin tü piʼrakat müleka chajachire pia soʼu kaʼikat tia. Antüsüjeʼe paaʼu wanee kasa müsü aka saaʼin suwarala siki suluʼu shiyeekuaippayaain shia wayuu otta aashajaashijeʼe  pia süka anüikii naatajatü (Aluw. 2:5-12). Pansaasüjeʼe maʼin pümüin nüneeküin pia Maleiwa nükajee chi naaʼinkai. ¿Naaʼinrüinche Maleiwa wanee kasa pülasü nüneekapa na anoujashii chainjanakana iipünaa? ¿Nüneeküinche naya soʼu tü kaʼi nüneekakalü oʼu na waneinnua? Nnojo. ¿Jamüsü watüjaaka saaʼu nnojoluin müin shia? Joʼu wekirajaai sünain tia.

4. Nükalioʼu Jesuu, ¿aneekünüshiiche na chainjanakana iipünaa wanaajiraa namaa na waneinnua? Püküja jamüin sukuwaʼipa tia.

⁴ Wekirajaa palajana sünain joujain maʼin naneekünüin na chainjanakana iipünaa. Nnojoishii nayain neʼe aneekünüin namüiwaʼa na 120 nikirajüinkana Jesuu soʼu tü juyakat 33 sükalioʼu tü miʼiraakat Pentecostés. Soʼuleʼeya kaʼikat tia, antüshi chi naaʼinkai Maleiwa naaʼu 3.000 anoujashii; shia nüküjaka achiki Jesuu tia paala. Aneekünüshii naya soʼu woutiisain naya (Aluw. 2:37, 38, TNM; Aluw. 2:41). Kojuya juya süchikijee tia, nnojoishii aneekünüin napüshuaʼa na chainjanakana iipünaa soʼu woutiisain naya. Ichaʼasa aneekünüin na anoujashii chajanakana Samaria süchikijee woutiisain naya (Aluw. 8:14-17, TNM). Eekajasaʼa Cornelio otta na nüpüshikana, aneekünüshii naya süpülapünaa woutiisain naya. Nayaʼala neʼe makana akuwaʼipa (Aluw. 10:44-48, TNM).

5. Sünainjee tü sümakat 2 Corinto 1:21, 22, ¿kasa alataka nüneekünapa wanee anoujashi?

⁵ Wekirajaa jooluʼu süchiki tü alatakat nüneekünapa wanee anoujashi nükajee chi naaʼinkai Maleiwa. Eesüjaʼa kapüleere nümüin wanee anoujashi niyaawatüin saaʼu jamüin nüneekünaka nutuma Jeʼwaa. Eepejeʼe na anoujamaatakana sünain naneekünüin. Anuu nünüiki Pablo nüchiki wanee anoujashi eekai nüneekünüin: «Saaʼu jünoujaitpain sünain tü shiimainkat, [...] aapünüshi jümüin chi Naaʼinkai Maleiwa, [...] maa aka sukuaippa wane jeerü. * [...] Meeria nütüma süpüshua tü naapajatkat wamüin mapeena» (Éf. 1:13, 14). Süpüla pansaainjatüin namüin naneekünüin nutuma Jeʼwaa, nüneeküin naya nükajee chi naaʼinkai. Naapüin chi naaʼinkai namüin süpüla nayaawatüinjatüin saaʼu chainjanain naya iipünaa süpüla kaʼikat süpüshuaʼa (paashajeʼera 2 Corinto 1:21, 22).

6. ¿Kasa naaʼinrajatka chi anoujashi aneekünakai süpüla nuʼunuinjachin iipünaamüin?

 ⁶ Nüneekünüle wanee anoujashi süpüla nuʼunuinjachin iipünaamüin, ¿oʼuneeiche nia chamüin? Eeshijaʼa nnojoleechire nuʼunuin. Anuu wanee pütchi jülüjainjatka naaʼin: «Tawalayuwaa, shia anaka aluʼu müleka kachiiruale jaaʼin aaʼinraa tü nüchekakat chi Maleiwakai jüpüleerua [...]. Je sünainjee tü kasa anasü jaaʼinrakat, jütüjaa aaʼulu sünain shiimüin aneekuushin jia nütüma Maleiwa süpüla nüpüshinjanain jia» (2 Ped. 1:10). Nüneekünüle wanee anoujashi süpüla nuʼunuinjachin iipünaamüin, oʼuneechi nia waneepiale nia nümaa Jeʼwaa (Filip. 3:12-14; Heb. 3:1; Alat. Map. 2:10).

7. ¿Jamüsü süpüla nütüjaain saaʼu wanee anoujashi nüneekünüin süpüla oʼunaa chaa iipünaamüin?

⁷ ¿Jamüsüche süpüla nütüjaain saaʼu wanee anoujashi nüneekünüin süpüla oʼunaa chaa iipünaamüin? Atüjaana aaʼu tia sutuma tü nümakat Pablo namüin na anoujashii chajanakana Roma, na aneekuushikana nutuma Maleiwa. Müshi nia namüin: «Saaʼu naapünüichipain wamüin chi Naaʼinkai, nnojoliinapa waya mmolüin sheema süchepchiaa kaainjalaa wachikua. Aluʼujasa jooluʼu, süka nüchooinapain waya Maleiwa, ‹Taata Maleiwa›, wainküin wamüin nümüin. Nükaaliijain waya chi Naaʼinkai sünain ayaawataa saaʼu sünain nüchooinapain waya» (Roma 1:6, 7; 8:15, 16). Nükajee chi naaʼinkai Maleiwa nüpansaajüin namüin na anoujashii nüneekakana sünain neenaküin naya süpüla chainjanain naya chaa iipünaa (1 Tes. 2:12).

8. Saashin 1 Juan 2:20, 27, ¿jamüsü nnojotka choʼujaain namüin na aneekuushikana süküjünajatüin namüin natuma na waneinnua chainjanain naya iipünaa?

⁸ Na anoujashii nüneekakana Maleiwa süpüla oʼunaa chaa iipünaamüin, natüjaa aaʼu sünain shiimain naneekuushin süka nükaalinjain naya Maleiwa sünain ayaawataa saaʼu tia (paashajeʼera 1 Juan 2:20, 27). Choʼujaapejeʼe namüin naya anoujashiikana nekirajünüin nutuma Jeʼwaa nakajee na wawalayuukana maʼaka wekirajünüin wayakana wapüshuaʼa. Tü nnojotkat choʼujaain namüin shia süküjünüin namüin natuma na waneinnua naneekuushin süpüla oʼunaa iipünaamüin. Nükaalinjain naya Jeʼwaa nükajee chi naaʼinkai süpüla nayaawatüin saaʼu tia.

9. Saashin Éfeso 1:18, ¿kasa eeʼiranajaaka sünain nukuwaʼipa wanee anoujashi aneekünakai nutuma Maleiwa süpüla oʼunaa chaa iipünaamüin?

⁹ Watta naalii wawalayuu nnojoliikana ayaawatüin saaʼu tü alatakat nümüin wanee anoujashi nüneekünapa nutuma Jeʼwaa süpüla oʼunaa chaa iipünaamüin. Nnojotsü nayaawatüin saaʼu tia süka nnojoliin naneekuushin süpüla oʼunaa iipünaamüin. Nukumajala Maleiwa na wayuukana süpüla yaainjanain naya yaa Mmapaʼa süpüla kaʼikat süpüshuaʼa, nnojoishii nukumajalain naya süpüla chainjanain chaa iipünaa (Gén. 1:28; Sal. 37:29). Nüneekapejeʼe Jeʼwaa waneinnua wayuu aʼwaajakana nia süpüla chainjanain naya chaa iipünaa. Soʼu nüneeküin naya, eeʼiranajaasü sukuwaʼipa tü kasa anasü naʼatapajakat otta eeʼiranajaasü naaʼin, shiaitpa keeʼireeka naaʼin oʼunaa chaa iipünaa (paashajeʼera Éfeso 1:18).

10. ¿Jamaluʼulu «jemein nüchikuaʼa» wanee anoujashi? (Paashajeʼera tü nootakat).

¹⁰ Nüneekünapa wanee anoujashi süpüla oʼunaa iipünaamüin, müshi jemeikai naaʼin nüchikuaʼa. * Naashin Jesuu, kapüleeshaatasü nümüin wanee anoujashi chainjachikai chaa iipünaa nüküjain nümüin wanee anoujashi yaainjachikai yaa Mmapaʼa kasain antajaain suluʼu naaʼin nüneekünapa nutuma Maleiwa (Juan 3:3-8).

11. ¿Kasa eeʼiranajaaka suluʼu naaʼin wanee anoujashi aneekünakai nutuma Maleiwa süpüla oʼunaa chaa iipünaamüin?

¹¹ ¿Kasa eeʼiranajaaka suluʼu naaʼin wanee  anoujashi aneekünakai nutuma Maleiwa süpüla oʼunaa chaa iipünaamüin? Süpülapünaa nüneekünüin nutuma Maleiwa, suchuntaapuʼuin naaʼin yaainjachin nia waneepia yaa saaʼu tü Mmakat. Niʼree amüinrü najaʼlajeʼerüin Jeʼwaa tü kasa mojusükat otta niʼree amüinrü Paʼaraiisüin tü Mmakat nutuma Jeʼwaa,. Eesüjaʼa jülüjapuʼule naaʼin niʼrüinjachin nüchikuaʼa wanee nüpüshi jee niale wanee naʼaleewain asoʼiraakai aaʼin. Shiasaʼa nüneekapa nia Jeʼwaa, eeʼiranajaasü naaʼin, nnojoluitpa jülüjain naaʼin tia. Nnojotpejeʼe shiawalain sutuma nnojolujaain naaʼin shiiʼiree kepiaa yaa saaʼu tü Mmakat. Nnojotsü shiain sutuma shapaain naaʼin jee sutuma sülatüin kasa mojusü nümüin. Nia Jeʼwaa eeʼiranajeʼetka naaʼin chia anoujashikai nükajee chi naaʼinkai, müsüjeseʼe naataitpain tü jülüjakat naaʼin jee tü naʼatapajakat.

12. Saashin 1 Pedro 1:3, 4, ¿jamüsü naaʼin wanee anoujashi chainjachikai iipünaamüin?

¹² Eesüjaʼa jülüjale naaʼin nnojolin anain nia süpüla tia aʼyatawaakat, niyaawatapejeʼe saaʼu nüneekünüin nutuma Jeʼwaa. Talatüsü maʼin naaʼin jee kojutusü nümüin chainjachin nia iipünaamüin (paashajeʼera 1 Pedro 1:3, 4).

13. ¿Jamüsü naaʼin na anoujashii chainjanakana iipünaa süka yaayüliin naya Mmapaʼa?

¹³ ¿Keeʼireesüche naaʼin na anoujashii aneekuushikana outuin naya süpüla noʼunamaatüinjanain chaa iipünaa? Anuu nünüiki chi aluwataaushikai Pablo süchiki tia: «Ashapataasü waaʼin waya yaakana suluʼu piichikat tüü süka wainmain tü müliaa weʼrakat; nnojotpejeʼe keeʼireein waaʼin waakatüin shia woulia, tü keeʼireekat waaʼin shia waʼatüinjatüin wanain tü jeketkat shiiʼirakain süka anaʼleejeerüin shia» (2 Cor. 5:4, TNM). Na aneekuushikana nutuma Jeʼwaa, nnojotsü keeʼireein naaʼin outuin naya süpüla noʼunamaatüinjanain chaa iipünaa. Talatüshii naya süka katüin noʼu otta anasü namüin kottiraain naya sümaa napüshi otta naʼaleewainyuu sünain aʼyatawaa nümüin Jeʼwaa soʼunnaa yaain naya yaa Mmapaʼa. Jülüjasü naaʼin waneepia chainjanain naya iipünaa jaʼitairü kasain naʼyataain anain maaʼutpünaa (1 Cor. 15:53; 2 Ped. 1:4; 1 Juan 3:2, 3; Alat. Map. 20:6).

14. ¿Jarat tü pütchi wayaawatakalü atuma nnojoluin nüneekünüin wanee anoujashi?

¹⁴ «¿Nüneeküinche taya Maleiwa süpüla oʼunaa chaa iipünaa?», eesüjaʼa maa müle paaʼin. Müle pünüiki suluʼu paaʼin, jülüja paaʼin pütchikalüirua tüü: «¿Suchuntuinche maʼin paaʼin paaʼinrüin tü keeʼireekat naaʼin Maleiwa? ¿Kamalainsüche maʼin pümüin aküjaa pütchi? ¿Kamalainsüche maʼin pümüin ekirajawaa sünain tü Wiwüliakat otta ekirajawaa sünain ‹tü kasa kapüleesü nümaʼanajeejatkat Maleiwa›? ¿Nükaalinjainche pia Jeʼwaa süpüla anainjatüin sukuwaʼipa tü paaʼinrakat sünain aküjaa pütchi? ¿Pükaalinjeeinche maʼin na waneinnua süpüla nekirajaain nüchiki Maleiwa? ¿Piʼrüinche nükaalinjain pia Jeʼwaa? (1 Cor. 2:10). «Aa», pümüle shiʼipajee tia pütchikalüirua, ¿nüneeküinche pia Jeʼwaa süpüla oʼunaa chaa iipünaamüin? Nnojo. Maʼleesia naaʼin napüshuaʼa na aʼyataashiikana nümüin Jeʼwaa jaʼitaina chainjanain iipünaa jee yaainjanain Mmapaʼa. Jee müsia, naapüin Jeʼwaa chi naaʼinkai namüin napüshuaʼa na aʼyataashiikana nümüin jaʼitaina chainjanain iipünaa jee yaainjanain Mmapaʼa. Müleka nnojorüle pansaain pümüin nüneeküin pia Jeʼwaa nükajee chi naaʼinkai, nnojoishijaʼa mata nüneeküin pia süpüla oʼunaa chaa iipünaamüin. Na nüneekakana Jeʼwaa nükajee chi naaʼinkai, pansaasü namüin chainjanain naya iipünaa, nnojotsü wainmajüin naaʼin saaʼu tia.

15. ¿Jamüsü watüjaaka saaʼu nnojoliinjanain noʼunuin chaa iipünaa napüshuaʼa na wayuu naapakana amüin Jeʼwaa chi naaʼinkai?

¹⁵ Aküjünüsü suluʼu tü Wiwüliakat nachiki wainma wayuu naapakana amüin Jeʼwaa chi naaʼinkai, nnojoliipejeʼe chainjanain naya oʼunuin iipünaa. Wanee wayuu nuʼunirakai Jeʼwaa  nükajee chi naaʼinkai nia David (1 Sam. 16:13). Nükaalinjain nia süpüla niyaawatüinjatüin saaʼu tü kasa kapüleesü ashajünakat nüchiki Jeʼwaa jee nüshajirüin nia waneirua karaloʼuta suluʼuka tü Wiwüliakat (Mar. 12:36). Nnojoipejeʼe David «ayalereʼennüin nütüma Maleiwakai sirumaluʼumüin» naashin Pedro (Aluw. 2:34). Jaʼitakajeʼe Juan, chi Owoutisaajüikai, eejachi chi naaʼinkai Maleiwa naaʼu süpülapünaa jemein nia (Luc. 1:13-16). Naashin Jesuu nnojoishi eeichin wanee wayuu alanaʼaleekai nuulia Juan, chi Owoutisaajüikai. Nüküjapejeʼe Jesuu nnojolin nüneekünüin Juan süpüla oʼunaa chaa iipünaa (Mat. 11:10, 11). Naapüin Jeʼwaa chi naaʼinkai namüin wayuukana naainnua süpüla nountuin naaʼinrüin kasa kapüleesü, nnojoliipejeʼe nüneeküin naya süpüla chainjanain naya iipünaa. ¿Nnojoishiiche naya oonooin waneepia sümaa nünüiki Maleiwa nnojoliika nüneeküin naya? Nnojotsiaajeʼe shiain tia, asoʼiraajeerü naaʼin nutuma süpüla yaainjanain naya kepiain Mmapaʼa (Juan 5:28, 29; Aluw. 24:15).

16. ¿Jalainjana kepiain na waneinnua wayuu aʼyataakana nümüin Maleiwa?

¹⁶ Maaʼulu yaa, watta naalii na aʼyataakana nümüin Maleiwa yaa Mmapaʼa nnojoliinjanaka oʼunuin chaa iipünaa. Yaainjana kepiain yaa saaʼu tü Mmakat nüikaleʼerapa Maleiwa sukuwaʼipa Nuluwataaya. Napüshi naya wayuukana, nia Abraham sümaa Sara, David, Juan chi Owoutisaajüikai otta waneinnua wayuu, tooloyuu sümaa jieyuu (Heb. 11:10, TNM).

17. ¿Jarat tü pütchi wasouteetkalü eʼipajee sünain tü wane ekirajaayakat?

¹⁷ Eeyüliʼiya yaa saaʼu tü Mmakat napüshi na anoujashii chainjanakana chaa iipünaa. Sutuma eeyüliʼinya naya, eesü waneirua kasa watüjaweekalü aaʼu (Alat. Map. 12:17). ¿Kasa tü nnojoluinjatkat naaʼinrüin? Eere wanee anoujashi ekakai tü pankat jee asakai tü wiinokot sünain tü Outkajawaakat eere Sotuin Waaʼin Outuin Jesuu, ¿jamüinjatü shiiʼiyatia nujutü wamüin? ¿Shapaainjatche waaʼin sutuma nawainmalaain juyawai na ekakana tü pankat jee na asakana tü wiinokot? Wasouteerü eʼipajee tia pütchikat sünain tü wane ekirajaayakat.