1, 2. ¿Mbaʼépa oiko raʼe pe Pentekostés áño 33-pe?

PE Pentekostés áño 33-pe, peteĩ domingo pyhareve oñembyaty Jerusalénpe 120 disípulorupi, ha oĩ hikuái peteĩ ógape, pe koty yvateguápe (Hech. 1:13-15; 2:1). Unos kuánto día upe mboyve, Jesús heʼi kuri idisipulokuérape opyta hag̃ua Jerusalénpe pórke orresivíta hikuái peteĩ rregálo iporãitereíva (Hech. 1:4, 5). ¿Mbaʼépa oiko raʼe upérõ?

² “Upeichaháguinte oñehendu peteĩ tyapu guasu yvágagui, ku yvytu atã oipejurõguáicha, ha ojagarrapa pe óga”. Upe rire “ohecha hikuái peteĩ mbaʼe ojoguáva tatarendýpe” umi disípulo akã ári, “ha enterove henyhẽ espíritu sántogui” (Hech. 2:2-4). Upe oiko vaʼekue ningo ndaijojahái, ha péicha Jehová omeʼẽ ijespíritu sánto umi disípulope (Hech. 1:8). Haʼekuéra hína umi primeroite ojeporavo vaʼekue espíritu sánto rupive, * ha oñemeʼẽ chupekuéra pe esperánsa oho hag̃ua yvágape ogoverna hag̃ua Jesús ndive.

3. ¿Mbaʼérepa umi kristiáno oikuaa porã kuri ojeporavo hague chupekuéra espíritu sánto rupive?

³ Epensamíntena nde haʼeha peteĩva umi disípulo oñembyaty vaʼekue upérõ, ha ne akã ári ojekuaaha “peteĩ mbaʼe ojoguáva tatarendýpe” ha reñepyrũha reñeʼẽ ótro idiómape. ¡Ni mbaʼevéicharõ ningo nanderesaraimoʼãi upe oiko vaʼekuégui! (Hech. 2:5-12). Ni michĩmi nderedudamoʼãi kuri rejeporavo  hague espíritu sánto rupive. Péro, ¿siémprepa Jehová ojapo upeichagua milágro oiporavo hag̃ua ijespíritu sánto rupive enterove umi ohótavape yvágape? ¿Oiporavópa Jehová enterovépe al mísmo tiémpo? Nahániri. ¿Mbaʼérepa jaʼe upéva?

4. ¿Ojeporavópa raʼe entéro umi kristiánope pe primer síglope al mísmo tiémpo? Emyesakã.

⁴ Jahechamína arakaʼépa ojeporavo peteĩ persónape espíritu sánto rupive. Pe Pentekostés áño 33-pe oñembyaty kuri 120 disípulorupi, péro ndahaʼéi chupekuérante ojeporavo vaʼekue upérõ. Upe rire, upe díape voi, 3.000 persónarupi orresivi avei pe espíritu sánto Jesús opromete vaʼekue. Chupekuéra ojeporavo vaʼekue ojevautisárõ guare (Hech. 2:37, 38, 41). Péro naentéroi umi kristiáno ojeporavo ojevautisárõ guare. Por ehémplo, umi samaritánope ojeporavo ojevautisa riréma (Hech. 8:14-17). Ha Cornelio ha umi hogaygua katu ojeporavo ojevautisa mboyve jepe (Hech. 10:44-48).

5. Heʼiháicha 2 Corintios 1:21, 22, ¿mbaʼépa oiko peteĩ persóna ojeporavo jave espíritu sánto rupive?

⁵ Jahechamína koʼág̃a mbaʼépa oiko ojeporavo jave peteĩ persónape espíritu sánto rupive. Ikatu ningo primerorã ijetuʼu peteĩ kristiánope oasepta hag̃ua Jehová oiporavo hague chupe ijespíritu sánto rupive. Ikatu voi oñeporandu mbaʼérepa Ñandejára oiporavo chupe. Péro oĩ avei noñeñandúiva upéicha. Tahaʼe haʼeháicha, apóstol Pablo ohechauka porã mbaʼépa oiko oñeunhi jave peteĩ kristiánope. Haʼe heʼi: “Peẽ pejerovia rire hese, Ñandejára oipuru pe espíritu sánto opromete vaʼekue omoĩ hag̃ua penderehe peteĩ márka. * Haʼe ojevale Crístore ojapo hag̃ua upéva. Pe espíritu sánto haʼe hína peteĩ garantía ohechaukáva Ñandejára omeʼẽtaha ñandéve entéro mbaʼe opromete vaʼekue” (Efes. 1:13, 14). Jahechaháicha, Jehová oipuru ijespíritu sánto oikuaauka porã hag̃ua koʼã ermánope oiporavóma hague chupekuéra. Péicha, “pe espíritu sánto haʼe hína peteĩ garantía” oaseguráva chupekuéra oikotaha pára siémpre yvágape, ndahaʼéi ko yvy ape ári (elee 2 Corintios 1:21, 22).

6. ¿Mbaʼépa ojapo vaʼerã peteĩ kristiáno unhído orresivi hag̃ua iprémio?

 ⁶ Peteĩ kristiáno oñeunhi jave, ¿heʼisépa upéva katuete ohotaha yvágape? Nahániri. Haʼe ningo ndodudái ojeporavo hague, upéicharõ jepe, tekotevẽ imanduʼa ko konséhore: “Ermanokuéra, peñehaʼãmbaitékena pendefiél, ikatu hag̃uáicha pesegi peime umi persóna Ñandejára ohenói ha oiporavo vaʼekue apytépe. Pórke pesegíramo pejapo koʼã mbaʼe, ni mbaʼevéicharõ ndapehejamoʼãi pe jerovia” (2 Ped. 1:10). Upéicharõ, ojeporavóramo jepe peteĩ kristiánope oho hag̃ua yvágape, haʼe ohupytýta iprémio iñeʼẽrendúramo añoiténte (Filip. 3:12-14; Heb. 3:1; Apoc. 2:10).

7. ¿Mbaʼéichapa umi unhído oikuaa porã ojeporavo hague oho hag̃ua yvágape?

⁷ Péro, ¿mbaʼéichapa peteĩ ermáno térã ermána oikuaa ojeporavo hague chupe oho hag̃ua yvágape? Pe rrespuésta jatopa umi mbaʼe Pablo heʼi vaʼekuépe umi kristiáno unhído oĩvape Rómape. Haʼe heʼi: “Ñandejára espíritu rupive peẽ ndahaʼevéi esklávo ni ndapekyhyjevéi. Peẽ perresivi peteĩ espíritu ohechaukáva Ñandejára pendeadoptaha itaʼýraramo, ha upe espíritu ñanemomýi jaʼe hag̃ua: ‘¡Abba, che Ru!’. Pe espíritu sánto ha umi mbaʼe ñañandúva oikuaauka porã ñandéve ñande haʼeha Ñandejára raʼy” (Rom. 1:7; 8:15, 16). Ijespíritu sánto rupive Jehová oikuaauka porã térã oasegura umi ermánope ojeporavo hague oho hag̃ua yvágape, ha haʼekuéra ni michĩmi ndodudái (1 Tes. 2:12).

8. Asegún 1 Juan 2:20, 27, ¿mbaʼérepa jaʼekuaa umi unhído noikotevẽiha ótro okonfirma chupekuéra ojeporavo hague?

⁸ Jehová oinvita vove peteĩ kristiánope oho hag̃ua yvágape, oñenkarga ani hag̃ua ni michĩmi oduda orekoha upe esperánsa. Haʼe oikuaa porã upéva ha oguerovia ipyʼaite guive (elee 1 Juan 2:20, 27). Añetehápe ningo umi kristiáno unhído oikotevẽ pe enseñánsa Jehová omeʼẽvare umi kongregasión rupive, péro haʼekuéra noikotevẽi avave okonfirma chupekuéra haʼeha unhído. Jehová oipuru ijespíritu sánto, pe fuérsa ipoderosovéva oĩva ko univérsope, okonfirma hag̃ua chupekuéra ojeporavóma hague oho hag̃ua yvágape.

9. Heʼiháicha Efesios 1:18, ¿mbaʼéichapa okambia peteĩ kristiáno oñeunhi jave?

⁹ Ñandejára siervokuéra apytépe la majoría ndahaʼéi unhído, upévare ikatu ijetuʼu chupekuéra ontende hag̃ua mbaʼépa oiko peteĩ kristiánore, Ñandejára oiporavo jave chupe oho hag̃ua yvágape. Ñandejára okrea yvyporakuérape oiko hag̃ua ko yvy ape ári, ndahaʼéi yvágape (Gén. 1:28; Sal. 37:29). Péro Jehová oiporavo unos kuántope oiko hag̃ua yvágape. Upévare Ñandejára oiporavo jave koʼã kristiánope, okambiaite voi chuguikuéra umi mbaʼe opensáva ha avei iñesperánsa, upéicha rupi haʼekuéra oikoséma yvágape (elee Efesios 1:18).

10. ¿Mbaʼépa heʼise ‘ñanase jey’? (Ehecha avei pe nóta).

¹⁰ Ojeporavo jave umi kristiánope oho hag̃ua yvágape, haʼekuéra “onase jey”. * Ha Jesús ontendeka ndaikatuiha voi ojeexplika porã peteĩ ndahaʼéivape unhído mbaʼépa oñandu peteĩ kristiáno ‘onase jeýva’, térã “onaséva espíritugui” (Juan 3:3-8).

11. ¿Mbaʼéichapa okambia opensa lája peteĩ kristiáno oñeunhi vove?

¹¹ Peteĩ kristiánope ojeporavo jave oho hag̃ua yvágape, oñepyrũma okambia opensa lája. ¿Mbaʼérepa jaʼe upéva? Jehová oiporavo mboyve koʼã kristiánope, haʼekuéra ovyʼaiterei  pe esperánsa orekóvare oikóvo pára siémpre ko yvy ape ári. Haʼekuéra oipotaitereíma og̃uahẽ pe tiémpo Jehová oipeʼataha entéro mbaʼe vai ko yvýgui, ha ojapo chugui peteĩ paraíso. Ikatu voi haʼekuéra oñeimahina raʼe omeʼẽvo la vienvenída peteĩ ifamília térã iñamígo orresusitávape. Péro Jehová ounhívo chupekuéra, oñepyrũma opensa diferénte hikuái. ¿Mbaʼérepa upéva? Ndahaʼéi ningo ndogustavéiva chupekuéra pe idéa oikóvo ko yvýpe. Ndahaʼéi avei okambiáva opensa lája pórke ou oñedeprimi, osufrieterei térã derrepénte opensáva ndaigustomoʼãiha jaiko pára siémpre ko yvy ape ári. ¿Mbaʼépa la oikóva upéicharõ? Jehová oipuru ijespíritu sánto okambia hag̃ua haʼekuéra opensa lája ha omeʼẽ hag̃ua chupekuéra peteĩ esperánsa pyahu.

12. Asegún 1 Pedro 1:3, 4, ¿mbaʼéichapa oñeñandu peteĩ unhído opensa jave iñesperánsare?

¹² Peteĩ kristiáno ojeporavóva oho hag̃ua yvágape ikatu opensa nomereseiha upe priviléhio iporãitéva. Upéicharõ jepe, ni michĩmi ndodudái Jehová oiporavo hague chupe, ha ovyʼaiterei ha oagradese voi ipyʼaite guive opensávo oikotaha yvágape (elee 1 Pedro 1:3, 4).

13. ¿Mbaʼéichapa oñeñandu umi unhído oikove aja ko yvy ape ári?

¹³ ¿Péro heʼisépa upéva umi unhído omanosentemaha? Apóstol Pablo okontesta upe porandu. Haʼe okompara umi unhído rete peteĩ óga kárpare, ha heʼi: “Jaiko aja ko óga oĩvape yvy ape ári, ñañelamenta jaikóvo ha ñañekevranta, péro ndahaʼéi jahejaségui ko óga kárpa jaipeʼaramoguáicha peteĩ ao. Ñande ñañeñandu péicha pórke jarresivise pe óga yvagapegua. Péicha ñande rete ikatúva omano rekovia, jarresivíta jeikove opaveʼỹva” (2 Cor. 5:4, nóta). Upéicharõ, ndahaʼéi ku ikueráimava ko yvýgui ha omanoséntemava. Upéva rangue, haʼekuéra ovyʼa ha oipuruse káda día oservi hag̃ua Jehovápe ifamília ha iñamigokuérandi. Péro tahaʼe haʼéva la ojapóva hikuái, siémpre imanduʼa pe esperánsa porãite orekóvare (1 Cor. 15:53; 2 Ped. 1:4; 1 Juan 3:2, 3; Apoc. 20:6).

14. Peteĩ persóna ikyreʼỹetereíramo Jehová servísiope térã ohechakuaa haʼe oipytyvõha chupe, ¿heʼisépa upéva haʼeha unhído?

¹⁴ Ikatu nde reñeporandu hína oimépa Jehová ndeporavo ijespíritu sánto rupive. Oiméramo upéicha, iporãta repensa koʼã porandúre: ¿Ndépa rejaposeterei voi Jehová volunta? ¿Nekyreʼỹetereípa predikasiónpe? ¿Restudiasetereípa Ñandejára Ñeʼẽ ha reikuaase “Ñandejára pensamiénto avave ndoikuaáiva jepe”? (1 Cor. 2:10). ¿Rehechakuaápa Jehová nepytyvõ hague rehupyty hag̃ua heta mbaʼe predikasiónpe? ¿Reñandúpa tekotevẽtereiha reipytyvõ umi héntepe oikuaa hag̃ua Jehovápe? ¿Eguerekópa pruéva Jehová nepytyvõma hague heta vése? Oiméramo rehechakuaa koʼã mbaʼe oikopaiteha nderehe, ¿heʼisépa upéva nde haʼeha peteĩ unhído? Nahániri, pórke entéro Ñandejára siervokuéra ikatu oñeñandu upéicha, tahaʼe unhído térã nahániri. Ijespíritu sánto rupive Jehová ikatu hína omombarete oimeraẽ isiérvope, tahaʼe haʼéva pe esperánsa orekóva. Jaʼe porãsérõ g̃uarã, oiméramo nde reduda ha reñeporandu hína ndépa unhído, upéva ohechauka porãma voi ndahaʼeiha. ¿Mbaʼérepa jaʼe upéva? Umi kristiáno Jehová oiporavóva ijespíritu rupive, ni michĩmi ndodudái haʼeha unhído, haʼekuéra oikuaa porã upéva.

15. ¿Mbaʼérepa jaʼekuaa naentéroi umi orresivi vaʼekue Ñandejára espíritu ojeporavo hague oho hag̃ua yvágape?

¹⁵ La Biblia oñeʼẽ hetaiterei kuimbaʼe ijerovia mbaretévare orresivi vaʼekue espíritu sánto,  péro ndorekóiva pe esperánsa oiko hag̃ua yvágape. Por ehémplo, pe espíritu sánto omombarete vaʼekue Davídpe (1 Sam. 16:13). Avei oipytyvõ chupe ontende hag̃ua umi mbaʼe hypyʼũvéva jepe, ha ogia avei chupe oskrivi hag̃ua heta párte oĩva la Bíbliape (Mar. 12:36). Upéicharõ jepe, apóstol Pedro heʼi vaʼekue ‘David ndojupíri hague yvágape’ (Hech. 2:34). La Biblia heʼi Juan el Bautista rehe ‘Ñandejára omeʼẽ hague chupe ijespíritu sánto’ (Luc. 1:13-16). Ha Jesús heʼi vaʼekue ndaiporiha “ko yvy ape ári ni peteĩ persóna tuichavéva Juan el Bautístagui”, péro upéi heʼi avei haʼe nogovernamoʼãiha yvágape (Mat. 11:10, 11). Jehová oipuru ijespíritu sánto omombarete hag̃ua koʼã kuimbaʼépe ikatu hag̃uáicha ojapo heta mbaʼe iñimportantetereíva, péro ndoipurúi ijespíritu oiporavo hag̃ua chupekuéra oho hag̃ua yvágape. ¿Heʼisépa upéva menove ifielha hikuái umi ohótavagui yvágape? Nahániri, síno heʼise Jehová omoingove jeytaha chupekuéra oiko hag̃ua pe paraísope ko yvy ape ári (Juan 5:28, 29; Hech. 24:15).

16. ¿Mbaʼe esperánsapa oreko la majoría Ñandejára siérvo koʼag̃agua?

¹⁶ Abrahán, Sara, David, Juan el Bautista ha hetave kuimbaʼe ha kuña yma guare oreko pe esperánsa oikóvo pára siémpre ko yvy ape ári. Upéicha avei la majoría umi Ñandejára siérvo koʼag̃agua, oreko pe esperánsa oikovévo pára siémpre ko yvy ape ári Ñandejára Rréino poguýpe, ndahaʼéi yvágape (Heb. 11:10).

17. ¿Mbaʼe mbaʼépa ñambohováita pe artíkulo oúvape?

¹⁷ Koʼág̃arupi oĩ mimi gueteri unhído ko yvy ape ári Ñandejára puévlope. Upévare ñañeporandu jepi algúna kósa (Apoc. 12:17). Por ehémplo, ¿mbaʼépa opensa vaʼerã ijehe umi unhído? Peteĩ ermáno ñane kongregasiongua oñepyrũramo hoʼu pe pan ha pe víno Konmemorasiónpe, ¿mbaʼéichapa jatrata vaʼerã chupe? ¿Jajepyʼapy vaʼerãpa hetavéramo ohóvo káda áño umi heʼíva ijehe unhidoha? Koʼã pregúnta ñambohováita pe artíkulo oúvape.