1-2. Anni i kappabbaw nga nesimmu ta aggaw na Pentecostes 33 C.E.?

UMMA na Liggu ta Jerusalem. I dagun ay 33 C.E., anna aggaw yatun na Pentecostes. Naggarammammung i ma-120 nga disipulos ta utun nga kuarto na tadday nga balay. (King. 1:13-15; 2:1) Piga aggaw nige natun, nibilin ni Jesus nira nga mattalupaddian ira ta Jerusalem megafu ta egga i alawatadda tu espesial nga regalu. (King. 1:4, 5) Anni i tumunug nga nesimmu?

² “Ganganalaman ay naginna da i guni nga naggafu ta langi nga kagitta na avvanuvu na masikan nga paddag.” Maginna yatun nga guni ta interu balay. Egga i “sinan-zila ira nga afi” nga nattun ta ulu na disipulos, ay tu “napannuan ira ngamin ta Espiritu Santo.” (King. 2:2-4) Kappabbaw i pinangivuvvu ni Jehova tu masanto nga espirituna tatun nga grupo. (King. 1:8) Ira i nabbalin tu ollu nga nazelugan na masanto nga espiritu * anna neddan tu iddanama nga makipammaguray kani Jesus ta langi.

3. Ngatta siguradu danuri egga ta Pentecostes 33 C.E. nga zinelugan ira na masanto nga espiritu?

³ Nu tadday ka ta disipulos nga egga tari ta utun nga kuartu, siguradu nga ariammu vuluvuga kattaman yatun. Egga i sinan-zila nga afi nga nattun ta ulum, anna pinegafuanammu i naguvovug ta nadduruma nga lengguahe! (King. 2:5-12) Magga siguradu ka nga zinelugan naka na masanto nga espiritu. Ngem  ngamin kari nga nazelugan na masanto nga espiritu ay kappabbaw i katunnoda anna para-parehu kari nga tiempo ta pattoleda i katunnoda? Ari. Kunnasi tam nammuan?

4. Para-parehu kari nga tiempo i nikatunno na ngamin nga nazelugan ta ollu-siglo? Ipakanawag.

⁴ Ikonsidera tam i tiempo na katunno na tadday nga tolay. Ari laman tu yatun nga grupo na ma-120 nga Cristiano i zinelugan na masanto nga espiritu tatun nga aggaw na Pentecostes, 33 C.E. Ta pangultimu natun nga aggaw, ma-3,000 paga i nakalawa ta nepromesa nga masanto nga espiritu. Nabbalin ira tu nazelugan turi ta nabawtisowan ira. (King. 2:37, 38, 41) Ngem ta tumunug ira nga dagun, ari tu ngamin nga nazelugan nga Cristiano ay natunno ta mismu nga aggaw na bawtismoda. Nazelugan i Samaritano ira kabalin na bawtismoda. (King. 8:14-17) Nerumu-ruma gapa i katunno ni Cornelio anna na tangabbalayanna megafu ta nazelugan ira nige paga ira nabawtisowan.​—King. 10:44-48.

5. Segun ta 2 Corinto 1:21, 22, anni i mesimmu nu zinelugan na masanto nga espiritu i tadday nga tolay?

⁵ Ikonsidera tam gapa nu anni i mesimmu ta tadday nga tolay nu mazelugan yayya na masanto nga espiritu. Baka ari insigida maaksepta na karuan nga nazelugan nga pinili ira ni Jehova. Baka kudda, ‘Ngatta pinilinà na Dios?’ Awayyana nga ari gapa tu kunnatun i reaksion na tanakuan. Maski anni paga tatun, niyesplika ni apostol Pablo nu anni i mesimmu ta ngamin nga nazelugan: “Gafu ta angngurug nu kani Cristo, niyawa na Dios nikamu i Espiritu Santo nga nitabba na anna yaw i marka * na pakakkua na nikamu. Yaw nga Espiritu i mamakurug tu alawatat-tam i nitabba na Dios ta totolay na.” (Efe. 1:13, 14) Yari tu usu-usan ni Jehova i masanto nga espirituna tapenu mammuan danaw nga Cristiano nga mananawag nga pinilina ira. Gafu taw, i masanto nga espiritu ay “pamakurug [tadday nga tabba onu promesa]” nga meyawa tapenu garantiyan nira nga ta mappange ay mattolay ira tu mannanayun ta langi, ari tu ta davvun.​—Bibbigan i 2 Corinto 1:21, 22.

6. Anni i mawag nga kuan na nazelugan nga Cristiano tapenu malawana i bala-balona ta langi?

 ⁶ Nu nazelugan i tadday nga Cristiano, automatiko kari nga umay yayya ta langi? Ari. Siguradu yayya nga napili yayya nga umay ta langi. Ngem mawag tu daddammanna yaw nga tabarang: “Wawwaragi, mas mattalikarag kamu gafu tapenu masiguradunu nga kavulu kamu ta nagalan anna napili, nu kanayunnu nga kuan danaw, ariannu vuluvuga nga madismaya.” (2 Ped. 1:10, NW ) Maski gafu napili onu nagalan nga umay ta langi i tadday nga Cristiano nga nazelugan, malana laman i bala-balona nu mattalupaddian yayya nga matalo.​—Fil. 3:12-14; Heb. 3:1; Nep. 2:10.

7. Kunnasi mammuan na nazelugan ira nga nembitan ira nga umay ta langi?

⁷ Ngem kunnasi mammuan na tadday nu nembitan yayya nga umay ta langi? Manawag nga masingan i tabbag ta kinagi ni Pablo ta taga-Roma ira nga “pinili na [Dios] nga nabbalin ngana tu totolay na.” Kunna nira: “I Espiritu nga niyawa na Dios nikamu, ay arian nakamu nga pabbalinan tu aripan nga kegafuan na paganassing nu. Pinabbalin nakamu lallagu na Espiritu tu ána na Dios. Ay megafu ta pakapangngua na Espiritu, agalat-tam i Dios tu, ‘Ama! Ama!’ Mattadday i Espiritu na Dios anna espiritu tam nga mamakurug tu ána ittam na Dios.” (Roma 1:7; 8:15, 16) Gukaban gafu na masanto nga espiritu na Dios, manawag nga ipasinganna ta nazelugan ira nga nembitan ira nga umay ta langi.​—1 Tes. 2:12.

8. Kunnasi ipasingan na 1 Juan 2:20, 27 nga ari kawagan na nazelugan ira nga Cristiano nga kumfirman na tanakuan i nikapilida?

⁸ Siguraduan ni Jehova nga ari madduda ta nono anna ta futu danuri nakalawa tu imbitasionna nga umay ta langi. (Bibbigan i 1 Juan 2:20, 27, NW.) Siempre, mawag nga tudduan ni Jehova danuri nazelugan nga Cristiano gukaban na kongregasion kagitta lagapa na tanakuan nga wawwaragi. Ngem ariadda kawagan i maski sinni nga makkumfirma nga nazelugan ira. Inusa ni Jehova i pinakamakapangngua nga fuersa ta uniberso, i masanto nga espirituna, tapenu mananawag nga ipasiguradu nira nga nazelugan ira!

9. Nu nazelugan i tadday, anni nga panguli i maekspiriensana kagitta na mabibbig ta Efeso 1:18?

⁹ Aru ta aripan na Dios ta maddaggun i marigatan nga alippawatan nu anni i mesimmu nu zinelugan na Dios i tadday. Gagangay laman yatun megafu ta ari mabba ira nga nazelugan. Pinaratu na Dios i totolay nga mattolay tu mannanayun ta davvun, ari tu ta langi. (Gen. 1:28; Sal. 37:29) Ngem pinili ni Jehova i karuan nga mattolay ta langi. Nu pilianna ira nga mabbalin tu nazelugan, dakal i ulianna ta iddanamada anna ta appana-panonoda tapenu magiddanama ira nga mattolay ta langi.​—Bibbigan i Efeso 1:18.

10. Anni i kayà kagian na “meyana uli”? (Innan gapa i footnote.)

¹⁰ Oras tu zinelugan na masanto nga espiritu i Cristiano ira, “meyana uli” * ira. Kinagi paga ni Jesus nga imposible nga espesipiko nga iyesplika ta tadday nga ari nga nazelugan i matageno na “meyana uli,” onu “meyana ta Espiritu.”​—Juan 3:3-8; ftn.

11. Iyesplika i panguli ta appanono na tadday nu mazelugan yayya.

¹¹ Anni nga panguli ta appanono i mesimmu nu mazelugan i Cristiano ira? Nige nga zinelugan ni Jehova danaw nga Cristiano, tagibaloradda i iddanamada nga mattolay tu mannanayun  ta davvun. Talaga iinnaggadda i tiempo sonu alsan ni Jehova i ngamin nga kinamarake anna pabbalinanna tu paraiso i davvun. Awayyana nga nononopadda nga dafungadda noka i miembro na familiada onu kofudda nga natay. Ngem turi ta nazelugan ngana ira, nanguli i appanonoda. Ngatta kunna? Ari tu nawanan ira tu ganas ta pattolay tu mannanayun ta davvun. Ariadda gapa inuli i nonoda megafu ta nadepres onu grabe i nipazziga-rigada. Ariadda gavva natageno nga awan tu ganas na mattolay tu mannanayun ta davvun. Lallagu, inusa ni Jehova i masanto nga espirituna tapenu ulian i appanonoda anna i iddanama nga talaga tagibaloradda.

12. Segun ta 1 Pedro 1:3, 4, anni i matageno na nazelugan ira nga Cristiano meyannung ta iddanamada?

¹² Baka matageno na tadday nga nazelugan nga ari yayya mepangngo taw nga nabala-balor nga pribilehio. Ngem ari yayya vuluvuga madduda nga pinili yayya ni Jehova. Magaya-ayayya yayya anna mappappabalo kada manonona i iddanamana nga mattolay ta langi.​—Bibbigan i 1 Pedro 1:3, 4.

13. Anni i matageno na nazelugan ira ta pattoleda taw ta davvun?

¹³ Kebalinan kari naw nga kayà na nazelugan ira nga matay? Tabbagan ni apostol Pablo yatun nga pakkiavu. Nikumparana i baggida ta tadday nga tolda anna kunna: “Ta kegga tam pagalaman taw nga tolda, maddagi-raging ittam megafu ta ziga-riga. Ari tu megafu ta ikaya tam nga mapawan i neravvunan nga baggi tam, ngem ikaya tam tu matalian ta nelangitan nga baggi. Ta kunnuri, i baggi tam nga matay ay matalian ta inango nga adde noka.” (2 Cor. 5:4) Ari gapa nga nawanan tu ganas ta pattolay danaw nga Cristiano yari tu kayàda ngana i matay. Lallagu, magayayya ira ta pattolay anna kayàda nga usan i kada aggaw tapenu masserbi kani Jehova kavulu i kafamilia anna i kokkofudda. Ngem, maski anni paga i kukukuadda, sigga-nono ira ta makakkasta nga iddanamada ta mappange.​—1 Cor. 15:53; 2 Ped. 1:4; 1 Juan 3:2, 3; Nep. 20:6.

14. Anni ira i ari mamakurug nga zinelugan na masanto nga espiritu i tadday?

¹⁴ Baka nononopammu nu tadday ka nga zinelugan na masanto nga espiritu. Nu kunna, nonopammu danaw nga importante nga pakkiavu: Masiki-sikan kari i pakkaraga mu nga kuan i uray ni Jehova? Matageno mu kari nga kuruga matalikarag ka nga mallayyagayya? Malappo ka kari nga maggigiammu tu Uvovug na Dios anna kakayà mu nga ammuan “i kononaggan nga uray na Dios”? (1 Cor. 2:10) Matageno mu kari nga bebbendisionan ni Jehova i pallayyagayyam? Daka-dakal kari i pakkaraga mu nga duffunan i tanakuan ta espiritual? Napakurug mu ngana kari nga namippiga naka ngana nga espesipiko nga zinuffunan ni Jehova ta pattolem? Nu wan i tabbag mu tatun ira nga pakkiavu, pakurugan kari natun nga nagalakka nga umay ta langi? Ari. Ngatta? Megafu ta ngamin nga aripan na Dios ay awayyada i makatageno tu kunnatun, maski nazelugan ira onu ari. Anna gukaban na masanto nga espiritu ni Jehova, duffunanna i maski sinni nga kuan danatun nga gannug, maski anni paga i iddanamada. Kakuruganna, nu ari ka siguradu nga nazelugan naka na masanto nga espiritu, kebalinan natun nga padduda nga ari ka nga nazelugan. Danuri inagalan ni Jehova ay ariadda madduda nu talaga nga nazelugan ira onu ari! Siguradu ira!

15. Ngatta ari tu ngamin nga nakalawa tu espiritu na Dios ay napili nga umay ta langi?

¹⁵ Ta Biblia, aru i ehemplo na matalo nga lallaki nga nakalawa tu masanto nga espiritu;  ngem, ari tu ta langi i iddanamada. Nigiya na masanto nga espiritu si David. (1 Sam. 16:13) Zinuffunan yayya na masanto nga espiritu tapenu alippawatan i monag ira nga gannug meyannung kani Jehova anna nidirektana gapa yayya nga itura i karuan nga parte na Biblia. (Mar. 12:36) Maski kunna, kagian ni apostol Pedro nga si David ay ‘ari nga minay ta langi.’ (King. 2:34) ‘Napannuan tu espiritu santo’ si Juan Bautista. (Luc. 1:13-16) Kinagi ni Jesus nga awan tu tolay nga mas dakal i kekuentanna anne kani Juan, ngem kinagina nga ari melagum si Juan ta nelangitan nga Pappatulan. (Mat. 11:10, 11) Inusa ni Jehova i masanto nga espirituna tapenu iddan danatun nga lallaki tu pakapangngua nga mangngua tu kappabbaw ira nga gannug, ngem arianna inusa yatun nga espiritu tapenu pilian ira nga mattolay ta langi. Kayà kari kagian naw nga ari ira kuruga matalo kumpara turi ira ta napili nga mammaguray ta langi? Ari. Kayàna laman kagian natun nga paginnolayan ira noka ni Jehova ta Paraiso nga davvun.​—Juan 5:28, 29; King. 24:15.

16. Anni nga bala-balo i iddanaman na magaru nga aripan na Dios ta maddaggun?

¹⁶ I aru ta aripan na Dios ta davvun ta maddaggun ay awan tu iddanamada nga mattolay ta langi. Kagitta da Abraham, Sara, David, Juan Bautista, anna aru paga nga lallaki anna babbay ta tiempo na Biblia, iddanamadda i mattolay ta davvun sonu Pappatulan na Dios ngana i mammaguray nira.​—Heb. 11:10.

17. Anni ira nga pakkiavu i tabbagattam ta tumunug nga artikulo?

¹⁷ Ta maddaggun, egga paga i nazelugan ira nga kavulu tam, yari tu gagangay laman nga egga ira i pakkiavu tam. (Nep. 12:17) Angngariganna, kunnasi nakuan imammatan na nazelugan ira i baggida? Nu egga i makiparte tu emblema ta Memorial ta kongregasiommu, kunnasim nakuan tratuan yatun nga tolay? Kunnasi nu umara-aru i bilang danuri makkagi nga nazelugan ira? Mavurukka kari tatun? Tabbagattam danatun nga pakkiavu ta tumunug nga artikulo.