1-2. Ania ti nakaskasdaaw a napasamak iti aldaw ti Pentecostes idi 33 C.E.?

AGSAPA idi ti Domingo idiay Jerusalem. Ti tawen ket 33 C.E., aldaw ti Pentecostes. Maysa a grupo ti agarup 120 nga adalan ti nagtataripnong iti makinngato a kuarto ti maysa a balay. (Ara. 1:13-15; 2:1) Sumagmamano nga aldaw sakbayna, imbilin ni Jesus nga agtalinaedda idiay Jerusalem ta adda awatenda nga espesial a regalo. (Ara. 1:4, 5) Ania ti simmaruno a napasamak?

² “Bigla nga adda uni manipud langit, a kas iti bumanesbes a napigsa nga angin.” Mangngeg ti uni iti intero a balay. Idi kuan, adda “apuy a kasla dila ti langada” a nagdisso iti ulo dagiti adalan, ket “napnoda amin iti nasantuan nga espiritu.” (Ara. 2:2-4) Iti daytoy a nakaskasdaaw a pamay-an, imbukbok ni Jehova ti nasantuan nga espirituna iti dayta a grupo. (Ara. 1:8) Dagitoy ti immuna a napulotan iti nasantuan nga espiritu * ken naipaayan iti namnama a makipagturay ken Jesus idiay langit.

3. Apay a saan nga agduadua dagidiay adda idi Pentecostes a napulotanda iti nasantuan nga espiritu?

³ No maysaka kadagiti adalan a nagtataripnong idi iti makinngato a kuarto, sigurado a saanmo a pulos malipatan dayta. Adda apuy a kasla dila a nagdisso iti ulom, ken nakapagsaoka iti nagduduma a lengguahe! (Ara. 2:5-12) Saanka a pulos nga  agduadua a napulotanka iti nasantuan nga espiritu. Ngem amin kadi a napulotan iti nasantuan nga espiritu inawatda dayta iti naisangsangayan a pamay-an ken iti isu met laeng a tiempo iti biagda? Saan. Kasanotayo nga ammo?

4. Amin kadi a napulotan idi umuna a siglo ket napulotan iti isu met laeng a tiempo iti biagda? Ilawlawag.

⁴ Pagsasaritaantayo no kaano a mapulotan ti maysa nga indibidual. Saan laeng a dayta a grupo ti agarup 120 a Kristiano ti napulotan iti nasantuan nga espiritu idi Pentecostes, 33 C.E. Iti dayta met laeng nga aldaw, agarup 3,000 a dadduma pay ti immawat iti nasantuan nga espiritu nga inkari ni Jesus. Napulotanda idi nabautisaranda. (Ara. 2:37, 38, 41) Ngem iti simmaruno a tawtawen, saan nga amin a napulotan a Kristiano ket immawat iti nasantuan nga espiritu idi nabautisaranda. Napulotan dagiti Samaritano sumagmamano a tiempo kalpasan a nabautisaranda. (Ara. 8:14-17) Ken iti naidumduma a kasasaad, napulotan ni Cornelio ken ti sangakabbalayanna sakbay a nabautisaranda.—Ara. 10:44-48.

5. Sigun iti 2 Corinto 1:21, 22, ania ti mapasamak no ti maysa ket mapulotan iti nasantuan nga espiritu?

⁵ Pagsasaritaantayo met no ania ti mapasamak no mapulotan ti maysa a tao iti nasantuan nga espiritu. Iti damo, mabalin a marigatan ti dadduma a napulotan a mangakseptar a pinili ida ni Jehova. Mabalin a mapanunotda, ‘Apay a siak ti pinili ti Dios?’ Mabalin a saan met a kasta ti reaksion ti dadduma. Aniaman kadagita, ilawlawag ni apostol Pablo ti mapasamak iti amin a napulotan: “Kalpasan a namatikayo, naselioankayo * babaen kenkuana iti naikari a nasantuan nga espiritu, a maysa a nasaksakbay a garantia ti tawidtayo.” (Efe. 1:13, 14; ftn.) Usaren ngarud ni Jehova ti nasantuan nga espirituna tapno agbalin a naan-anay a nalawag kadagitoy a Kristiano a pinilina ida. Iti daytoy a pamay-an, ti nasantuan nga espiritu ket agserbi a “garantia [wenno, kari]” nga iti masanguanan, agbiagda nga agnanayon idiay  langit imbes a ditoy daga.—Basaen ti 2 Corinto 1:21, 22.

6. Ania ti masapul nga aramiden ti maysa a napulotan a Kristiano tapno maawatna ti nailangitan a gunggonana?

⁶ No ti maysa a Kristiano ket napulotan, automatiko kadin a mapan idiay langit? Saan. Nupay sigurado a napili a mapan idiay langit, masapul a laglagipenna daytoy a balakad: “Kakabsat, aramidenyo ti amin a kabaelanyo nga agtalinaed a matalek kas naayaban ken napili, ta no itultuloyyo nga aramiden dagitoy, saankayto a pulos mapaay.” (2 Ped. 1:10) Isu nga uray no napili a mapan idiay langit ti maysa a napulotan a Kristiano, maawatna laeng ti gunggonana no agtalinaed a matalek.—Fil. 3:12-14; Heb. 3:1; Apoc. 2:10.

7. Kasano nga ammo dagiti napulotan nga adda nailangitan nga awisda?

⁷ Ngem kasano nga ammo ti maysa a tao nga isu ket naawis a mapan idiay langit? Makita ti nalawag a sungbat iti imbaga ni Pablo kadagiti taga-Roma a naayaban nga “agbalin a nasantuan.” Imbagana kadakuada: “Ti espiritu ti Dios saannakayo a pagbalinen nga adipen a pakaigapuan manen ti buteng. Ngem babaen dayta nga espiritu, naamponkayo kas annak, ken dayta nga espiritu ti mangtignay kadatayo a mangibaga iti: ‘Abba, Ama!’ Ti espiritu a mismo ti mangpaneknek iti espiritutayo nga annaknatayo ti Dios.” (Roma 1:7; 8:15, 16) Usaren ngarud ti Dios ti nasantuan nga espirituna tapno agbalin a nalawag kadagiti napulotan nga adda nailangitan nga awisda.—1 Tes. 2:12.

8. Kasano nga ipakita ti 1 Juan 2:20, 27 a saan a kasapulan dagiti napulotan a Kristiano ti asinoman a mangpatalged a napulotanda?

⁸ Ikkaten ni Jehova ti aniaman a panagduadua iti panunot ken puso dagidiay umawat iti awis a mapan idiay langit. (Basaen ti 1 Juan 2:20, 27.) Siempre, kas kadatayo amin, masapul a sursuruan ni Jehova dagiti napulotan a Kristiano babaen ti kongregasion. Ngem dida kasapulan ti asinoman a mangpatalged a napulotanda. Inusar ni Jehova ti kabibilgan a puersa iti uniberso, ti nasantuan nga espirituna, tapno naan-anay a nalawag kadakuada a napulotanda!

9. No mapulotan ti maysa a tao, ania a panagbalbaliw ti mapadasanna kas nadeskribir iti Efeso 1:18?

⁹ Mabalin a marigatan ti kaaduan nga agserserbi ita iti Dios a mangtarus iti mapasamak no pulotan ti Dios ti maysa a tao. Normal dayta ta saanda met a napulotan. Pinarsua ti Dios dagiti tattao nga agbiag nga agnanayon ditoy daga, saan nga idiay langit. (Gen. 1:28; Sal. 37:29) Ngem adda dagiti pinili ti Dios nga agbiag idiay langit. Isu a no pulotanna ida, balbaliwanna a dagus ti namnamada ken ti pamay-an ti panagpampanunotda tapno magagaranda nga agbiag idiay langit.—Basaen ti Efeso 1:18.

10. Ania ti kayat a sawen ti “mayanak manen”? (Kitaen met ti footnote.)

¹⁰ No mapulotan iti nasantuan nga espiritu ti maysa a Kristiano, “mayanak manen,” wenno “mayanak manipud ngato.” * Impamatmat met ni Jesus nga imposible a maawatan a naan-anay ti maysa a saan a napulotan no ania ti rikna ti “mayanak manen,” wenno “mayanak iti espiritu.”—Juan 3:3-8; ftn.

11. Ilawlawag no kasano nga agbalbaliw ti panagpampanunot ti maysa no mapulotan.

¹¹ Kasano nga agbalbaliw ti panagpampanunot dagiti Kristiano no mapulotanda? Sakbay a pinulotan ni Jehova dagitoy a Kristiano,  napateg kadakuada ti namnamada nga agbiag nga agnanayon ditoy daga. Magagaranda unay iti tiempo inton ikkatenen ni Jehova ti amin a kinadakes ken pagbalinenna ti daga a paraiso. Baka pinampanunotda a sabtendanto dagiti mapagungar a kapamilia wenno gayyemda. Ngem idi napulotandan, nagbaliwen ti panagpampanunotda. Apay? Saan a gapu ta saandan a kontento iti naindagaan a namnamada. Saan a nagbaliw ti panunotda gapu ta madepdepresda wenno adda problemada. Saanda a bigla a narikna a makaumanto ti biag nga agnanayon ditoy daga. Imbes ketdi, inusar ni Jehova ti nasantuan nga espirituna a mangbaliw iti panagpampanunotda ken iti namnamada.

12. Sigun iti 1 Pedro 1:3, 4, ania ti panagrikna dagiti napulotan a Kristiano iti namnamada?

¹² Mabalin a marikna ti maysa a napulotan a saan a maikari iti daytoy a nagpateg a pribilehio. Nupay kasta, saan a pulos agduadua a pinili isuna ni Jehova. Agliplippias ti pusona iti rag-o ken apresasion no mapanunotna ti namnamana iti masanguanan.—Basaen ti 1 Pedro 1:3, 4.

13. Ania ti panagrikna dagiti napulotan maipapan iti biagda ditoy daga?

¹³ Kaipapananna kadi a kayat dagiti napulotan ti matayen? Sungbatan dayta ni apostol Pablo. Impadana ti bagi ti tao iti maysa a tolda. Imbagana: “Kinapudnona, datayo nga adda iti daytoy a tolda ket agas-asug ken madagdagsenan, ta saantayo a kayat nga uksoben dayta, ngem kayattayo nga isuot ti sabali, tapno ti biag alun-onenna ni patay.” (2 Cor. 5:4) Saan a napukaw dagitoy a Kristiano ti ganasda nga agbiag, a kasla ketdin kayatdan ti matay. Maragragsakanda ketdi nga agbiag ken kayatda ti agserbi ken Jehova iti inaldaw a kadua ti pamilia ken gagayyemda. Ngem aniaman ti ar-aramidenda, kanayon a mapampanunotda ti nadayag a namnamada iti masanguanan.—1 Cor. 15:53; 2 Ped. 1:4; 1 Juan 3:2, 3; Apoc. 20:6.

14. Ania ti saan a pammaneknek a napulotan ti maysa a tao iti nasantuan nga espiritu?

¹⁴ Baka pampanunotem no napulotanka iti nasantuan nga espiritu. No kasta, panunotem dagitoy a napateg a saludsod: Umap-apuy kadi ti tarigagaymo a mangaramid iti pagayatan ni Jehova? Mariknam kadi a nakaregregtaka a mangasaba? Napasnekka kadi nga agadal iti Sao ti Dios ken magusgustuam nga adalen dagiti “nauneg a bambanag ti Dios”? (1 Cor. 2:10) Mariknam kadi a nasayaat ti resulta ti panangasabam gapu ta bembendisionan dayta ni Jehova? Mariknam kadi nga adda dakkel a responsabilidadmo a tumulong iti sabsabali iti naespirituan? Nakitam kadi ti pammaneknek a tultulongannaka ni Jehova iti nadumaduma a pamay-an? No wen ti sungbatmo kadagitoy a saludsod, pammaneknek kadi dayta nga adda nailangitan nga awismo? Saan. Apay? Ngamin, mabalin a marikna dayta ti amin nga agserserbi iti Dios, napulotanda man wenno saan. Ken babaen ti nasantuan nga espirituna, mabalin nga ipaay ni Jehova ti bileg iti asinoman nga adipenna, aniaman ti namnamada. Ti agpayso, no pagduaduaam a napulotanka iti nasantuan nga espiritu, ipakita dayta a saanka a napulotan. Dagidiay inayaban ni Jehova saanda nga agduadua no napulotanda wenno saan! Siguradoda iti dayta!

15. Kasanotayo nga ammo a saan nga amin nga immawat iti nasantuan nga espiritu ket napili a mapan idiay langit?

¹⁵ Iti Biblia, adu dagiti matalek a tattao nga immawat iti nasantuan nga espiritu, ngem awan ti namnamada nga agbiag idiay langit.  Ni David ket inwanwan ti nasantuan nga espiritu. (1 Sam. 16:13) Tinulongan ti nasantuan nga espiritu a mangtarus kadagiti nauneg a bambanag maipapan ken Jehova. Inwanwan met ti nasantuan nga espiritu a mangisurat iti dadduma a paset ti Biblia. (Mar. 12:36) Nupay kasta, imbaga ni apostol Pedro a “saan nga immuli ni David idiay langit.” (Ara. 2:34) Ni Juan a Mammautisar ket ‘napno iti nasantuan nga espiritu.’ (Luc. 1:13-16) Imbaga ni Jesus nga awan ti tao a natantan-ok ngem ni Juan, ngem imbagana met a saan a karaman ni Juan iti nailangitan a Pagarian. (Mat. 11:10, 11) Inusar ni Jehova ti nasantuan nga espirituna tapno makaaramid dagitoy a lallaki iti nakaskasdaaw a bambanag, ngem saanna nga inusar ti espirituna a mangpili kadakuada nga agbiag idiay langit. Kayatna kadi a sawen a saanda unay a matalek no ikompara kadagidiay napili nga agturay idiay langit? Saan. Kayatna laeng a sawen a pagungarento ida ni Jehova nga agbiag iti Paraiso a daga.—Juan 5:28, 29; Ara. 24:15.

16. Ania a gunggona ti namnamaen ti kaaduan nga adipen ti Dios ita?

¹⁶ Saan nga idiay langit ti namnamaen a pagbiagan ti kaaduan nga adipen ti Dios ita ditoy daga. Kas kada Abraham, Sara, David, Juan a Mammautisar, ken adu pay a lallaki ken babbai idi tiempo ti Biblia, namnamaenda ti agbiag ditoy daga inton iturayan ida ti Pagarian ti Dios.—Heb. 11:10.

17. Ania dagiti saludsod a sungbatantayo iti sumaruno nga artikulo?

¹⁷ Gapu ta ti dadduma a napulotan ket kadua pay laeng ti ili ti Dios ita, sigurado nga adda dagiti tumaud a saludsod. (Apoc. 12:17) Kas pagarigan, ania ti rumbeng a panangmatmat dagiti napulotan iti bagida? No mangan ken uminum ti maysa a kakongregasionmo kadagiti emblema ti Memorial, kasano ti rumbeng a panangtratom kenkuana? Ken kasanon no agtultuloy nga umadu ti bilang dagiti agkunkuna a napulotanda? Masapul kadi a pakaseknam dayta? Sungbatantayo dagitoy a saludsod iti sumaruno nga artikulo.