Content de lai

Malawm Ni Hpe Lai U

Hkaja Na Sumhpa 4

Dai Wenyi Nan Sakse Hkam Ya

Dai Wenyi Nan Sakse Hkam Ya

“Dai Wenyi nan anhte a wenyi hte hkrum nna, anhte Karai Kasang a kashu kasha ni rai nga ga ai hpe, sakse hkam ya ma ai.”​—ROM 8:16.

Mahkawn 25 Laksan Madu Hkrum Ai Ni

Sumhpa Hta Lawm Ai Lam *

Pentekoti nhtoi hta Hkristan 120 daram lawm ai uhpung hpe mauhpa lam hku nna Yehowa gaw chyoi pra ai wenyi ru jaw ya (Laika pang 1-2 hpe yu u)

1-2. A.D. 33 Pentekoti nhtoi hta gara mauhpa lam byin wa ai kun?

YERUSALEM na laban nhtoi jahpawt manap hta re. Shaning gaw A.D. 33 hta rai nna, Pentekoti nhtoi hta re. Sape 120 daram gaw nta langai a ntsa htap kaw arau hpawng nga ai. (Kas 1:13-15; 2:1) Lai wa sai nhtoi loi mi daram hta, shanhte gaw laksan kumhpa lu la na re ai majaw, Yerusalem hta matut nga nga na matu Yesu tsun da ai. (Kas 1:4, 5) Dai hpang hpa byin ai kun?

2 “Shaloi lamu de nna nbung laru kaba wa ai zawn, akajawng sha kadu pru” wa ai. Dai nsen hpe nta ting na lu ai. Sape ni a baw ntsa hta “wan shinglet zawn” re ai kumla pru wa nna, shanhte yawng gaw “Chyoi pra ai Wenyi hpring” wa ai. (Kas 2:2-4) Mauhpa lam hte, Yehowa gaw dai hpung a ntsa chyoi pra ai wenyi ru jaw ya ai. (Kas 1:8) Shanhte gaw shawng nnan chyoi pra ai wenyi hte namman chya hkam ai ni * byin wa ai. Yesu hte arau sumsing lamu hta uphkang na myit mada lam lu wa ai.

Marai Langai Namman Jaw Hkrum Ai Shaloi Hpa Byin Ai Kun?

3. Pentekoti nhtoi hta nga taw ai ni gaw chyoi pra ai wenyi hte namman jaw hkrum wa ai hpe hpa majaw hkrak chye lu ai kun?

3 Lama na, nang gaw dai nhtoi hta, ntsa htap kaw hpawng nga ai sape ni hta lawm yang, dai mabyin hpe galoi n malap sai. Na a baw ntsa kaw wan shinglet zawn re ai lama ma nga taw nna, kaga amyu ga ni hpe tsun hpang wa ai. (Kas 2:5-12) Nang gaw chyoi pra ai wenyi hte namman jaw hkrum ai hpe nang nan teng sha chye na re. Chyoi pra ai wenyi hte namman chya hkam ai yawng gaw, aten langai hta sha, mauhpa lam hte namman jaw hkrum wa ai kun? N re. Gara hku chye lu ai kun?

4. Tsa ban langai na namman chya hkam ai ni yawng gaw kalang ta arau namman jaw hkrum ai kun? Sanglang dan u. 

4 Namman jaw hkrum ai aten a lam hpe hkaja yu ga. A.D. 33 Pentekoti nhtoi hta Hkristan 120 daram lawm ai uhpung gaw chyoi pra ai wenyi hte namman jaw hkrum wa ai. Raitim, uhpung nawng namman jaw hkrum wa ai gaw dai uhpung sha n re. Dai hpang hta, marai 3,000 daram mung ga sadi tawn da ai chyoi pra ai wenyi hpe lu la wa ai. Shanhte hkalup hkam la ai shaloi, namman chya hkam ai ni byin wa ai. (Kas 2:37, 38, 41) Raitim, hpang de gaw, namman chya hkam ai Hkristan yawng gaw, hkalup hkam ai shaloi namman jaw hkrum wa ai n re. Samari masha ni gaw hkalup hkam ngut ai hpang aten langai ngai hta, namman chya hkam ai ni byin wa ai. (Kas 8:14-17) Korneli hte shi a nta masha ni gaw kaga ni hte n bung ai sha, hkalup garai n hkam shi ai kaw nna namman chya hkam ai ni byin nga sai.​—Kas 10:44-48.

5. 2 Korinhtu 1:21, 22 hku nga yang marai langai namman jaw hkrum ai shaloi hpa byin ai kun?

5 Chyoi pra ai wenyi hku nna marai langai namman jaw hkrum ai shaloi hpa byin wa ai hpe hkaja yu ga. Namman chya hkam ai nkau gaw Yehowa shanhte hpe lata la ai lam hpe hkap la na matu shawng nnan hta yak chye ai. ‘Karai Kasang gaw ngai hpe hpa majaw lata ai kun?’ nga nna mau na re. Nkau mi gaw dai zawn n hkamsha ai. Hpa mi raitim, namman chya hkam ai ni yawng gaw hpa byin ai hte seng nna, kasa Pawlu ndai hku sanglang dan ai: “Shi hta e kam sham ngut yang, ndat da ai Chyoi pra ai Wenyi hte dazik * kap ai, hkrum ma nit dai: Wenyi chyawm gaw, . . . anhte a sali wunli a masat dingsat rai nga ai” (Ehp 1:13, 14) Dai majaw, Yehowa gaw chyoi pra ai wenyi hpe akyu jashawn nna, dai Hkristan ni hpe shi lata ai lam hkrak chye shangun ai. Dai lam hku nna, shanhte hpe htawm hpang hta ginding aga kaw n re ai sha, sumsing lamu kaw htani htana asak hkrung na matu, chyoi pra ai wenyi hte “masat dingsat [sakse (sh) ga sadi]” jaw ai.​—2 Korinhtu 1:21, 22 hpe hti u.

6. Sumsing lamu shaman chyeju lu na matu namman chya hkam ai Hkristan langai gaw hpa galaw ra na kun?

6 Lama na, Hkristan langai gaw namman jaw hkrum yang, sumsing lamu shaman chyeju hpe teng sha lu la sai kun? N re. Shi gaw sumsing lamu de sa na matu lata la hkrum ai gaw teng ai. Raitim, ndai sadi jaw ga hpe gaw dum ra ai: “Hpunau ni e, shaga la hkrum ai ni, lata la hkrum ai ni hku nna, matut sadi dung lu na matu shakut shaja nga mu. Dai atsam ningja ni nga hkra ayan na shakut na nga yang, nanhte galoi mung hkrat sum na n re.” (2 Pe 1:10, NW) Sumsing lamu de shaga la hkrum ai namman chya hkam ai Hkristan langai raitim pyi, matut sadi dung yang she, dai shaman chyeju lu la na re.​—Hpl 3:12-14; Heb 3:1; Shr 2:10.

Marai Langai Gaw Shi Namman Jaw Hkrum Ai Hpe Gara Hku Chye Ai Kun?

7. Namman chya hkam ai ni gaw sumsing lamu de shanhte shaga la hkrum ai hpe gara hku chye ai kun?

7 Marai langai gaw sumsing lamu de shaga la hkrum ai hpe shi gara hku chye ai kun? Roma kaw nga ai “chyoi pra ai ni hku nna shaga la hkrum ai ni” hpe Pawlu tsun ai ga kaw nna asan sha chye lu ai. Shanhte hpe shi ndai hku tsun ai: “Bai hkrit kang na matu, mayam a wenyi hpe nanhte hkam la ma nit dai n rai; Aba, Wa e, nga nna jahtau chye ai, yin la ai kasha a wenyi hpe she, nanhte hkam la ma nit dai. Dai Wenyi nan anhte a wenyi hte hkrum nna, anhte Karai Kasang a kashu kasha ni rai nga ga ai hpe, sakse hkam ya ma ai.” (Rom 1:7, NW; 8:15, 16) Sumsing lamu de shaga la hkrum ai hpe namman chya hkam ai ni asan sha chye hkra, Karai Kasang gaw chyoi pra ai wenyi hte shadum ya ai.​—1 Ht 2:11.

8. Namman chya hkam ai Hkristan ni hpe kaga ni sa n tsun dan ra ai hpe 1 Yawhan 2:20, 27 hta gara hku tsun da ai kun?

8 Sumsing lamu de saw shaga hkrum ai ni a myit masin hta, ntsen ai myit n nga hkra Yehowa galaw ya ai. (1 Yawhan 2:20, 27 hpe hti u.) Namman chya hkam ai Hkristan ni mung kaga ni zawn sha, nawku hpung hku nna Yehowa sharin achyin ya ai lam hpe hkam la ra ai. Raitim, namman chya hkam ai ni re ai hpe kaga ni sa n tsun dan ra ai. Yehowa gaw ninggawn tawa hta atsam kaba htum re ai chyoi pra ai wenyi hpe akyu jashawn nna, shanhte hpe hkrak chye shangun ai.

Shanhte Gaw “Bai Shangai” Hkrum Ai Ni Re

9. Marai langai namman jaw hkrum ai shaloi Ehpesu 1:18 hta tsun da ai hte maren shanhte gara hku galai shai mat ai kun?

9 Marai langai hpe Karai Kasang namman jaw ya ai shaloi, gara hku byin ai lam hpe dai ni aten na Karai a mayam law malawng gaw chye na na matu yak ai. Hpa majaw kun? Shanhte gaw namman chya hkam ai ni n re ai majaw re. Karai Kasang gaw shinggyim masha ni hpe sumsing lamu kaw n re ai sha, ginding aga hta htani htana asak hkrung na matu hpan da ai. (Nin 1:28; Shk 37:29) Raitim, nkau mi hpe gaw sumsing lamu kaw nga na matu Yehowa lata ai. Shanhte hpe shi namman jaw ya ai shaloi, shanhte a myit mada lam hte myit mang ai lam hpe tsep kawp galai shai kau ya ai. Dai majaw, shanhte mung sumsing lamu na asak aprat hpe myit mada wa ai.​—Ehpesu 1:18 hpe hti u.

10. “Bai shangai” ai ngu ai gaw hpa lachyum rai kun? (Lawu matsing hpe yu u.)

10 Hkristan ni gaw chyoi pra ai wenyi hte namman jaw hkrum ai shaloi, shanhte gaw “bai shangai” ai ni (sh) ‘ntsa de nna shangai ai masha’ * ni byin wa ai. Bai shangai ai ni (sh) “wenyi e shangai ai masha” ni gaw gara hku hkamsha ai lam namman n jaw hkrum ai ni hpe sanglang dan na matu, n mai byin ai hpe Yesu mung tsun dan wa ai.​—Yhn 3:3-8.

11. Marai langai gaw namman jaw hkrum ai shaloi shanhte a myit mang ai lam gara hku galai shai mat ai hpe sanglang dan u.

11 Hkristan ni gaw namman jaw hkrum ai shaloi shanhte a myit mang ai lam gara hku galai shai mat ai kun? Dai Hkristan ni hpe Yehowa namman garai n jaw shi yang, shanhte gaw ginding aga hta htani htana asak hkrung na myit mada lam hpe manu shadan wa ai. Nhkru ai lam yawng hpe yeng seng kau nna, ginding aga hpe hparadisu byin hkra Yehowa galaw ya na aten hpe sharawng awng let myit mada wa ai. Si mat ai nta masha (sh) manang hpe bai hkap tau la na matu shanhte myit mada wa na re. Raitim, namman jaw hkrum ai hpang, shanhte a myit mada lam galai shai mat ai. Hpa majaw kun? Ginding aga myit mada lam hpe myit n dik mat ai majaw n re. Myit daw myit hten ai (sh) myit shuk mat ai majaw shanhte galai shai mat ai mung n re. Ginding aga hta htani htana nga na matu, myit n lawm mat ai majaw kalang ta galai shai kau ai mung n re. Yehowa gaw chyoi pra ai wenyi hpe akyu jashawn nna, shanhte ra sharawng ai myit mada lam hte myit mang ai lam hpe galai shai ya ai majaw re.

12. 1 Petru 1:3-5 hku nga yang namman chya hkam ai Hkristan ni gaw shanhte a myit mada lam hte seng nna gara hku hkamsha ai kun?

12 Namman chya hkam ai marai langai gaw, manu dan ai dai ahkaw ahkang hte n ging dan ai ngu hkamsha chye ai. Raitim, shi hpe Yehowa lata la ai lam ntsen ai myit kachyi mi mung n nga ai. Shi a htawm hpang myit mada lam hpe myit ai shaloi, grai kabu nna chyeju dum ai.​—1 Petru 1:3-5 hpe hti u.

13. Namman chya hkam ai ni gaw ginding aga asak aprat hte seng nna gara hku hkamsha ai kun?

13 Rai yang, namman chya hkam ai ni gaw si mayu ai ngu ai lachyum kun? Kasa Pawlu mahtai jaw da ai. Shinggyim masha ni a hkum hkrang hpe ginsum hte shingdaw nna shi ndai hku tsun da ai: “Ndai dinghta sum hta naw nga ai shaloi gun hpai ai lit e dip gamyet ai hpe hkam sha ai myit hte madai nga ga ai. Shingrai madai ai lam gaw anhte a dinghta hkum hkrang hpe gun kabai kau mayu ga ai majaw n rai, si mat chye ai hpe htani htana asak hkrung ai de galai mat na matu sumsing lamu na hkum hkrang hpe anhte dagraw la mayu ai majaw rai nga ai.” (2 Ko 5:4, JCLB) Dai Hkristan ni gaw ndai prat hpe ra sharawng ai. Alawan mung aten n jahtum mayu ma ai. Asak hkrung ai hpe ra sharawng nna, nta masha ni, manang ni hte arau Yehowa a magam hpe shani shagu gunhpai mayu ai. Hpa mi galaw ai raitim, htawm hpang na sumsing lamu myit mada lam gaw shanhte a myit mang ai lam hta galoi mung nga taw ai.​—1 Ko 15:53; 2 Pe 1:4; 1 Yh 3:2, 3; Shr 20:6.

Yehowa Nang Hpe Namman Jaw Ya Ai Kun?

14. Gara lam ni gaw marai langai chyoi pra ai wenyi hte namman jaw hkrum ai hpe sakse n madun ai kun?

14 Chyoi pra ai wenyi hte ngai hpe namman jaw ya wa ai kun? ngu nna myit chye ai. Rai yang, ndai ahkyak ai ga san ni hpe myit yu u: Yehowa a myit ra ai lam hpe sharawng awng let galaw mayu nga ai kun? Hkaw tsun bungli hta lak lak lai lai myit rawt nga ai ngu hkamsha nga ai kun? ‘Karai Kasang a sung htum ai lam’ hte Chyum Laika hpe sharin la na matu grai myit rawt nga ai kun? (1 Ko 2:10) Hkaw tsun bungli hpe Yehowa gaw laklai ai hku shaman chyeju jaw nga ai ngu hkamsha nga ai kun? Kaga ni hpe wenyi lam hta karum ya na lit nga ai ngu hkamsha nga ai kun? Na a prat hta Yehowa gaw lam amyu myu hte laklai ai hku karum ya wa ai kun? Dai ga san ni hpe re ai ngu mahtai jaw lu yang, sumsing lamu de saw shaga hkrum ai ngu tsun mayu ai kun? N re. Hpa majaw nga yang, namman chya hkam ai ni raitim, ginding aga myit mada lam nga ai ni raitim, Karai a mayam yawng gaw dai zawn hkamsha ma ai majaw re. Gara myit mada lam nga ai raitim, Yehowa gaw shi a mayam yawng hpe chyoi pra ai wenyi maren sha jaw ai. Gaja nga yang, chyoi pra ai wenyi hte ngai hpe namman jaw ya ai kun? nga nna myit nga ai shaloi kaw nna nan, n jaw hkrum ai ngu ai lachyum re. Yehowa a shaga la hkrum ai ni gaw, shanhte namman jaw hkrum ai kun? n hkrum ai kun? ngu nna ung ang ai myit n nga ai. Shanhte hkrak chye ai.

Yehowa gaw chyoi pra ai wenyi hpe akyu jashawn nna, Abraham, Sara, Dawi hte Hkalup Sara Yawhan hpe laklai ai lam ni galaw na matu atsam jaw wa ai. Raitim, shanhte hpe sumsing lamu myit mada lam jaw na matu dai wenyi hpe akyu n jashawn wa ai (Laika pang 15-16 hpe yu u) *

15. Karai a chyoi pra ai wenyi lu la ai ni yawng gaw sumsing lamu de shaga la n hkrum ai hpe gara hku chye lu ai kun?

15 Chyum Laika hta, sumsing lamu myit mada lam n nga tim, chyoi pra ai wenyi lu la ai sadi dung ai masha law law a lam lawm ai. Dawi gaw chyoi pra ai wenyi hte lam matsun hkrum ai. (1 Sa 16:13) Yehowa hte seng nna sung htum ai lam ni hpe chye na na matu hte Chyum Laika daw nkau mi hpe ka na matu chyoi pra ai wenyi gaw shi hpe karum ya ai. (Mrk 12:36) Raitim, Dawi gaw “sumsing lamu de lung wa sai n rai” nga nna kasa Petru tsun ai. (Kas 2:34) Hkalup Sara Yawhan mung, “chyoi pra ai Wenyi hte hpring” wa ai. (Luk 1:13-16) Yawhan hta na grau htum ai wa n nga ai ngu Yesu tsun ngut ai hpang, sumsing Mungdan hta gaw Yawhan lawm na n re ngu bai tsun ai. (Mat 11:10, 11) Yehowa gaw chyoi pra ai wenyi hku nna dai la ni hpe laklai ai lam ni galaw lu ai atsam jaw tim, sumsing lamu de sa na matu gaw n saw shaga ai. Dai hku tsun ai majaw, shanhte gaw sumsing lamu kaw uphkang na matu lata la ai ni daram makam masham n nga ai ngu tsun mayu ai kun? N re. Mungkan Hparadisu hta asak hkrung na matu shanhte hpe Yehowa bai jahkrung ya na re.​—Yhn 5:28, 29; Kas 24:15.

16. Dai ni aten na Karai a mayam law malawng gaw gara shaman chyeju hpe myit mada ma ai kun?

16 Dai ni aten na ginding aga kaw nga ai Karai a mayam law malawng gaw sumsing lamu myit mada lam n lu ma ai. Abraham, Sara, Hkalup Sara Yawhan hte Chyum Laika prat na kaga num la ni zawn, shanhte mung Karai Mungdan uphkang na ginding aga hta htani htana asak hkrung na matu myit mada ma ai.​—Heb 11:10.

17. Hpang na sumhpa hta hpa ga san ni hpe hkaja na kun?

17 Dai ni aten na Karai a mayam ni lapran, namman chya hkam ai nkau mi naw nga ai majaw, anhte hta ga san nkau mi nga chye ai. (Shr 12:17) Ga shadawn, namman chya hkam ai ni gaw shanhte hkum shanhte gara hku mu mada ging ai kun? Lama na, na a nawku hpung kaw nna marai langai ngai gaw Myit Dum Poi masat dingsat hpe shawng nnan sha ai nga yang, shi hpe gara hku kanawn mazum ging ai kun? Namman chya hkam ai ni law wa yang gara hku kun? Dai hte seng nna myit tsang ging ai kun? Dai ga san ni hpe hpang na sumhpa hta hkaja na re.

^ စာပိုဒ်၊ 5 A.D. 33 Pentekoti nhtoi kaw nna ya du hkra, Yehowa gaw Hkristan nkau mi hpe shi a Kasha hte arau sumsing lamu kaw uphkang na matu myit mada lam jaw nga ai. Dai zawn kabu hpa ahkaw ahkang hpe lu la ai lam hpe dai Hkristan ni gara hku chye ai kun? Marai langai saw shaga hkrum ai shaloi hpa byin ai kun? Dai myit lawm hpa ga san ni a mahtai hpe chye lu na re. Ndai sumhpa gaw 2016, January, Sin Langchyi hta lawm ai sumhpa langai hpe madung tawn da ai.

^ စာပိုဒ်၊ 2 Ga Si A Lachyum: Chyoi pra ai wenyi hte namman chya hkam ai: Yehowa gaw chyoi pra ai wenyi hpe akyu jashawn nna, sumsing lamu hta Yesu hte arau uphkang na matu masha hpe lata ai. Chyoi pra ai wenyi hku nna htawm hpang ga sadi (sh) “masat dingsat” hpe Karai Kasang jaw ai. (Ehp 1:13, 14) Sumsing lamu shaman chyeju lu la na hpe chyoi pra ai wenyi gaw “sakse hkam ai” (sh) hkrak chye shangun ai ngu dai Hkristan ni lu tsun ai.​—Rom 8:16.

^ စာပိုဒ်၊ 5 Ga Si A Lachyum: Dazik. Ndai dazik shakap ai gaw, sadi dung let marai langai garai n si shi yang (sh) ru tsang kaba garai n hpang shi ai aten langai du hkra, shaprai n mai ai dazik gaw n rai shi ai.​—Ehp 4:30; Shr 7:2-4; 2016, April Sin Langchyi-E kaw nna “Laika Hti Ai Ni Hpang De Na Ga San” ngu ai hpe yu u.

^ စာပိုဒ်၊ 10 “Bai shangai” ai ngu ai gaw hpa lachyum re ai hpe grau nna chye mayu yang, 2009, April 1 Sin Langchyi-BU a laika man 3-12 hta yu u.

Mahkawn 27 Karai A Kasha Ni Paw Pru Ai Lam

^ စာပိုဒ်၊ 57 SUMLA HPE HTAI DAN AI LAM: Makam masham a majaw htawng hkrat nga ai raitim, hkaw tsun na matu hte teng man ai lam hpe sharin ya na matu wanglu wanglang ahkaw ahkang nga ai raitim, anhte yawng gaw Karai Mungdan uphkang ai ginding aga hta htani htana asak hkrung na matu myit mada mai ai.