SIRONGWA SELIRONGO 4
‘Mpepo zaKarunga kugava undipo’
“Mpepo zaKarunga kulipakerera nompepo zetu, zi gave undipo asi ose vana vaKarunga.”—ROM. 8:16.
RUSUMO 25 Muhoko gwaKarunga
ETWAROMO *
Jehova kwa powomwenene mpepo zokupongoka monkedi zokulikarera koVakriste wokusika 120 poPentekoste (Tara paragarafu 1-2)
1-2. Sininke musinke sokutetukisa sa horokere poPentekoste momvhura 33?
AZO kwa kere Sondaha ngurangura moJerusarema. Ezuva olyo kwa kere lyoPentekoste momvhura 33. Varongwa wokusika po-120, kwa pongere kumwe monzugo zekeguru. (Yirug. 1:13-15; 2:1) Komeho zezuva olyo, Jesus kwa va tanterere va kare moJerusarema yipo ngava gwane uhwi wokulikarera. (Yirug. 1:4, 5) Yisinke ya kweme ko?
2 Bibeli kutanta asi: “Va liharuka ko, meguru tamu tundu sipupiro somuhagaro ngwendi ekundungu.” Muhagaro ogo kwa zwidire nzugo nazinye. Makura, tava mono “maraka gomundiro” ponomutwe dawo, ano navenye makura “tava zura Mpepo zoKupongoka.” (Yirug. 2:2-4) Jehova kwa va powomwenene mpepo zokupongoka monkedi ozo zokutetukisa. (Yirug. 1:8) Varongwa owo, yiwo va hovere kugwaveka nompepo zokupongoka * nokugwana ehuguvaro lyokukapangera kumwe naJesus meguru.
YISINKE AYI HOROKA APA MUNTU AVA MU GWAVEKE?
3. Yisinke ya ninkisire vantu ava va kere poPentekoste va yi dive asi awo vana va gwaveke?
3 Ngano nove gumwe govarongwa ava va pongere monzugo zekeguru mezuva olyo, ngano kapi ngo divara sihorokwa oso. Sininke sokufana ngwendi eraka lyomundiro kwa wizire nokuyatembera pomutwe goge makura to tameke kuuyunga eraka lyapeke. (Yirug. 2:5-12) Ove wa yi divire nawa-nawa asi nove vana kugwaveke nompepo zokuponga. Eyi kutanta nye asi vantu navenye ava ava gwaveke nompepo zokupongoka kuvagwaveka monkedi zokutetukisa ntani posiruwo sokulifana ndi? Hawe. Morwasinke tuna kuuyungira ngoso?
4. Vantu navenye ava va gwavekere mosiruwo sovapositoli kwa va gwavekere posiruwo sokulifana ndi? Faturura.
4 Tu zeni tu zogere kuhamena siruwo. Vakriste owo 120 kapisi yiwo velike va gwavekere nompepo zokupongoka poPentekoste momvhura 33. Konyima zosiruwo mezuva olyo, vantu wokusika 3 000 nawo kwa gwene mpepo zokupongoka. Vantu owo kwa va gwavekere apa va gwene ekuho. (Yirug. 2:37, 38, 41) Monomvhura edi da kweme ko, kapisi Vakriste navenye kwa va gwavekere apa va gwene ekuho. Vasamaliya kwa va gwavekere konyima zokugwana ekuho. (Yirug. 8:14-17) Ano Koroneliusa nepata lyendi kwa va gwavekere monkedi zokulisiga novakwawo. Awo kwa va gwavekere komeho va gwane ekuho.—Yirug. 10:44-48.
5. Kuliza no-2 Vakolinte 1:21, 22, yisinke ayi horoka apa muntu ava mu gwaveke nompepo zokupongoka?
5 Tu zogereni eyi ayi horoka apa muntu ava mu gwaveke nompepo zokupongoka. Apa ava va gwaveke vantu vamwe, ayo kuvadigopera mokuyipura asi Jehova ana va horowora. Awo kuvhura va lipure asi, ‘Morwasinke ana horowere nge Karunga?’ Nye vamwe kapisi yimo ava lizuvhu ngoso. Yi kare asi ngapi omu ava lizuvhu, mupositoli Paurusa kwa faturura eyi ayi horokere vantu ava ava gwaveke. Age kwa tente asi: ‘Apa mwa pulire Kristusa, makura Karunga yiyo ga mu tura sinongweneso * sendi, Mpepo zoKupongoka, ezi ga mu tumbwidilire. Mpepo zoKupongoka kukoreka asi ngatu ka pinga eyi ga pingidira Karunga vantu vendi.’ (Efe. 1:13, 14) Yipo nye, Jehova kuruganesa mpepo zokupongoka mokulikida Vakriste asi age ana va horowora. Monkedi ozo, mpepo zokupongoka “kukoreka” asi muntu ogo komeho nga ka parukira narunye meguru, nye kapisi pevhu.—Resa 2 Vakolinte 1:21, 22.
6. Yisinke va hepa kurugana vagwavekwa yipo ngava ka gwane mfeto zemeguru?
6 Nsene Mukriste vana mu gwaveke, ngoso kutanta asi nga za meguru ndi? Hawe. Apa ava mu gwaveke, age kuyidiva asi vana mu horowora nga ze meguru. Nye ga hepa kudiworoka epukururo eli asi: “Vakwetu, kondjeni nye unene, ezigido lyeni nehoroworo lyeni li kore. Nsene mu yi kara eyi, yosili ngano kapi ngomu punduka nampili rumwe.” (2 Pet. 1:10) Eyi kutanta asi nampili Mukriste gomugwaveka vana mu horowora ndi vana mu zigida nga ze meguru, age ngaka gwana tupu mfeto zendi nsene a twikira kulimburukwa.—Fil. 3:12-14; Heb. 3:1; Ehor. 2:10.
NGAPI OMU MUNTU NA YI DIVA ASI VANA MU GWAVEKE?
7. Ngapi omu vagwavekwa ava yi diva asi awo ngava za meguru?
7 Nye ngapi omu muntu a yi diva asi age nga za meguru? Elimbururo kuligwana mononkango daPaurusa edi ga tjangerere vantu womoRoma ava va kere vagwavekwa. Age kwava tanterere asi: “Mpepo ezi mwa tambura kwaKarunga kapisi zokumuninka vapika, asi mu kare hena moutjirwe. Azo Mpepo zokutuninka tu kare vana vaKarunga.” (Rom. 8:15, 16) Yipo nye, kupitira mompepo zokupongoka, Karunga kuyivazeresera asi awo ngava za meguru.—1 Tes. 2:12.
8. Ngapi omu 1 Johanesa 2:20, 27, azi likida asi Vakriste wovagwavekwa kapi va hepa muntu gokuvatantera nsene asi va va gwaveka ndi hawe?
8 Jehova kuyizeresera nawa-nawa vagwavekwa asi age ga va horowora va ze meguru. (Resa 1 Johanesa 2:20, 27.) Nye Vakriste wovagwavekwa simpe ga hepa kuvaronga Jehova kupitira mombungakriste ngwendi vantu navenye. Nye awo kapi va hepa gumwe ava tantere nsene vava gwaveka ndi hawe. Jehova nare ga va horowora nompepo zendi zokupongoka, nonkondo dendi dononene. Yipo nye, awo va yi diva nawa-nawa asi vava horowora!
AWO KWA VA “HAMPURUKURURA”
9. Kuliza noVaefeso 1:18, NW. yisinke ayi horoka apa muntu ava mu gwaveke?
9 Sinzi sovakareli vaJehova kapi ava yi kwata egano omu Karunga a gwaveke vantu. Morwasinke? Morwa kapi va va gwaveka rumwe. Karunga kwa sita vantu va parukire pevhu kapisi meguru. (Gen. 1:28; Epis. 37:29) Nye Jehova kwa horowora vamwe va ka parukire meguru. Apa Jehova a va gwaveke, age kutjindja ehuguvaro lyawo ntani nomonkedi omu ava gazara yipo va ndindire nononkondo eparu lyemeguru.—Resa Vaefeso 1:18, NW. *
10. Yisinke ayi tanta ‘kuhampurukurura’? (Tara nonkango dokonhi.)
10 Apa Vakriste ava va gwaveke nompepo zokupongoka, awo ‘kuvahampurukurura.’ * Jesus kwa tente asi ayo kapisi ureru kufatwilira muntu ogu va dira kugwaveka omu ava lizuvhu vantu ava va “hampurukurura” ndi va ‘hampurukurura moMpepo.’—Joh. 3:3-8.
11. Faturura eyi ayi horokere magazaro gomuntu nsene vana mu gwaveke.
11 Yisinke ayi horokere magazaro gomuntu nsene vana mu gwaveke? Komeho Jehova a gwaveke Vakriste ava, awo kundindira nononkondo mokukaparukira pevhu narunye. Awo kundindira nononkondo siruwo apa Jehova nga ka gusa po udona naunye no ku ka ninka evhu li kare paradisa. Awo nampo kulimona vene momagano omu ngava ka tambura vekoro lyawo ndi vakaume vawo ava va dogoroka. Nye konyima zapa ava va gwaveke, magazaro gawo kulitjindja. Morwasinke ayi horokere? Awo kapi ava tjindji magazaro gawo morwa kapi vana hara kukaparukira hena pevhu. Ndi morwa maudigu aga va ligwanekera nago. Awo kapi ava tjindji magazaro gawo morwa kugazara asi eparu moparadisa nga li ka seta. Nye morwa Jehova kwa ruganesa mpepo zendi zokupongoka mokutjindja magazaro gawo ntani nehuguvaro lyawo.
12. Kuliza na-1 Peturusa 1:3, 4, ngapi omu vagwavekwa ava lizuvhu kuhamena ehuguvaro lyawo?
12 Muntu ogu va gwaveka kuvhura a lizuvhe ngwendi kapi ana fire situmbukira oso. Nampili ngoso, age kapi a singanyeke nsene asi Jehova ana mu horowora ndi hawe. Age kuhafa ntani kukara norupandu apa a gazadara kuhamena ehuguvaro eli nga ka gwana komeho.—Resa 1 Peturusa 1:3, 4.
13. Ngapi ava lizuvhu vagwavekwa kuhamena eparu lyawo lyepevhu?
13 Mokumona asi vagwavekwa kwa kara nehuguvaro lyemeguru, eyi kutanta nye asi awo kwa hara kufa ndi? Elimbururo kuligwana mononkango daPaurusa. Age kwa hetakanesere rutu rwendi kotende ndi rutambo. Age kwa tente asi: “Ose ava tuna kara simpe morutambo oru rwepevhu, kuna kukema moudigu, morwa kapi tuna hara kutuhutura rutu oru, nye kutudwareka hena oru rwemeguru, makura rutu rwetu rokufa ngagu ru mine mwenyo.” (2 Kol. 5:4) Vakriste ava, simpe vana hara kuparuka pevhu ntani kapi vana hara kufa. Awo vana hara kuhafera eparu pevhu nokukarera Jehova nkenye ezuva kumwe nomapata gawo ntani novakaume vawo. Nampili ngoso, yi kare asi yisinke vana kurugana, awo nkenye apa kugazadara kuhamena ehuguvaro lyawo lyokomeho.—1 Kol. 15:53; 2 Pet. 1:4; 1 Joh. 3:2, 3; Ehor. 20:6.
NOVE GA KU GWAVEKA JEHOVA NDI?
14. Yininke musinke ayi dili kulikida nsene asi muntu va mu gwaveka nompepo zokupongoka ndi hawe?
14 Nampo kuna kulipura nsene asi nove va ku gwaveka nompepo zokupongoka ndi hawe. Nsene yimo, gazadara ko komapuro aga gomulyo: Nove wa kara neharo lyenene lyokurugana mpango zaJehova ndi? Ove kulizuvha asi wa kara noupampi wounene mosirugana sokuzuvhisa ndi? Ove kwa hara kulironga Nonkango daKarunga nokukonakona ‘magazaro gaKarunga aga ga horama konhiinhi’ ndi? (1 Kol. 2:10) Ove kulizuvha asi Jehova ga ku tungika mosirugana sokuzuvhisa ndi? Ove wa kara neharo lyenene lyokuvatera wopeke va karere Jehova ndi? Wa kara noumbangi asi Jehova kukuvatera mononkedi dokulikarera meparu lyoge ndi? Nsene elimbururo lyoge komapuro ogo asi nhi, eyi kulikida nye asi nove o mugwavekwa ndi? Hawe. Morwasinke? Morwa vakareli vaKarunga navenye kuvhura va lizuvhe monkedi zangoso, yi kare asi awo vagwavekwa ndi hawe. Kupitira mompepo zendi zokupongoka, Jehova kuvhura kugava nonkondo dokulifana kwankenye mukareli gwendi, yi kare asi mfeto musinke nga ka gwana. Nsene kuna kulipura asi nove va ku gwaveka nompepo zokupongoka ndi hawe, eyi kulikida nare asi ove kapi va ku horowora. Vantu ava ga horowora Jehova kapi va kara nomasinganyeko! Awo va yi diva!
Jehova kwa ruganesere mpepo zendi zokupongoka mokupa Abirahamu, Sara, Ndafita naJohanesa Mukuhwi nonkondo dokurugana yininke yokutetukisa, nye kapi ga zi ruganesere mokuvahorowora va ze meguru (Tara paragarafu 15-16) *
15. Ngapi omu twa yi diva asi kapisi navenye ava va gwene mpepo zaKarunga kwa va zigida va ze meguru?
15 MoBibeli, mwa kara yihonena yoyinzi yovantu wovalimburukwi ava va gwene mpepo zokupongoka kwaJehova nye kapi va za meguru. Ndafita nage kwa mu gendesere mpepo zokupongoka. (1 Sam. 16:13) Azo kwa mu vaterere a kwate egano yininke yokonhiinhi kuhamena Jehova ntani kwa mu gendesere a tjange maruha gamwe gomoBibeli. (Mar. 12:36) Nampili ngoso, mupositoli Peturusa kwa tente asi Ndafita “kapi ga ronda meguru.” (Yirug. 2:34) Johanesa Mukuhwi kwa ‘zulire mpepo zokupongoka.’ (Ruk. 1:13-16) Jesus kwa uyungire asi kutupu ogu ga pita Johanesa, nye ga uyungire hena asi Johanesa kapi nga ka pangera moUntungi weguru. (Mat. 11:10, 11) Jehova kwa ruganesere mpepo zendi zokupongoka mokupa vagara ava nonkondo dokurugana yininke yokutetukisa, nye kapi ga zi ruganesere mokuvahorowora va ze meguru. Ngoso ayo kutanta nye asi kapi va limburukwire unene ngwendi ava va horowora va ka pangere meguru ndi? Hawe. Nye ayo kutanta asi Jehova nga ka va pindura koufe va ka paruke moParadisa pevhu.—Joh. 5:28, 29; Yirug. 24:15.
16. Mfeto musinke vana kundindira sinzi sovakareli vaKarunga?
16 Sinzi sovakareli vaKarunga ava vana kara pevhu ngesi kapi va kara nehuguvaro lyokukaparukira meguru. Ngwendi Abirahamu, Sara, Ndafita naJohanesa Mukuhwi ntani navamwe ava va tumbura moBibeli, awo kuna kundindira nononkondo mokukaparukira pevhu apa Uhompa waKarunga ngau ka pangera.—Heb. 11:10.
17. Mapuro musinke ngatu ka zogera mosirongwa sokukwama ko?
17 Mokumona asi vagwavekwa vamwe simpe poveli pevhu, eyi kuretesa po mapuro gokulisiga-siga. (Ehor. 12:17) Pasihonena, nkareso musinke va hepa kukara nazo vagwavekwa? Nsene gumwe gomombungakriste zeni a tameka kulya komboroto nokunwa kovhinyu poMurarero, ngapi nomu mu tekura? Nye ngapi nsene sivaro sowo ava uyunga asi awo vagwavekwa kuna kuligwederera? Kuvhura o kare nosinka kuhamena oyo ndi? Sirongwa sokukwama ko ngasi ka limburura mapuro ogo.
^ para. 5 Kutunda tupu poPentekoste momvhura 33, Jehova kupa vantu mpito zokukapangera meguru kumwe naMunwendi. Ngapi omu Vakriste ava yi diva asi awo va va horowora yipo ngava ze meguru? Yisinke ayi horoka apa muntu a gwana ezigido lyokukaparukira meguru? Sirongwa esi sa liza nesi sa pwege moRuhungu rwaMurongagona 2016. Aso ta si ka limburura mapuro ogo gomulyo.
^ para. 2 EFATURURO LYONKANGO: Kugwaveka nompepo zokupongoka: Jehova kuruganesa mpepo zokupongoka yipo a horowore ava ngava ka pangera kumwe naJesus meguru. Kupitira mompepo zokupongoka, Karunga “kukoreka” asi muntu ogo ga kara nehuguvaro lyokomeho. (Efe. 1:13, 14) Vakriste ava kuvhura va uyunge nye asi ‘mpepo zaKarunga kugava undipo,’ asi awo ngava ka gwana mfeto zawo meguru.—Rom. 8:16.
^ para. 5 EFATURURO LYONKANGO: Sinongweneso. Sinongweneso esi kusipameka tupu komeho mugwavekwa gomulimburukwi a fe ndi komeho udigu wounene u tameke.—Efe. 4:30; Ehor. 7:2-4; tara “Mapuro gokutunda kovaresi” moRuhungu rwaKudumogona 2016 moRuingilisa.
^ para. 9 Vaefeso 1:18, NW: “Age ga yi mu zeresera konomutjima deni yipo mu dive ehuguvaro eli ga mu zigidira, eli ngomu ka pinga one vapongoki.”
^ para. 10 Komauzera gomanzi kuhamena eyi ayi tanta kuhampurukurura, tara Ruhungu rwaKudumonkuru 2009, epe. 3-12.
RUSUMO 27 Ehoroko lyovana vaKarunga
^ para. 58 EFANO Epenuno 24: Yi kare asi ose kwa tu tura modorongo morwa epuliro lyetu ndi ose twa kara noumanguruki wokuzuvhisa nokuronga usili, natuvenye kuna kundindira nononkondo mokukaparukira pevhu apa Uhompa waKarunga ngau ka pangera.
