1-2. Ino nshiinshi shakacitika pabushiku bwa Pentekositi mu mwaaka wa 33 C.E?

BUSHIKU bwakalinga Pasondo macuunsa, pa Pentekositi mu mwaaka wa 33 C.E., Yesu kaali waboolela kale kwiculu. Bashikwiiya bakwe Yesu mpashi bakalinga kushika kuma 120 bakabungana mu Jelusalemu mucipinda ca peculu. (Milimo 1:13-15; 2:1) Tapana kwiinda nshiku shiinji kuswa ciindi Yesu ndyaakabalwiita ayi bakekale mu Jelusalemu kushikila ndyeshi bakatambule cipo cilibetele. (Milimo 1:4, 5) Ino nshiinshi shakacitika pabushiku ubu?

² “Mpomunyaawo bakanyumfwa coongo cakuba anga ncipuupu kuswa kwiculu akususha ŋanda yoonse njebakalingaamo. Lyalo bakabona shimwi shakalinga kuboneka anga njimilaka ya mulilo iyo yakaya mukwikala pali womwi awomwi, mpeeke boonse bakasushikwa amushimu usalashi.” (Milimo 2:2-4) Ishi shakatondesha kwaamba ayi Yehova wakananika likoto ili amushimu usalashi. (Milimo 1:8) Mbobakalinga bataanshi kunanikwa amushimu usalashi * akupekwa bulindilishi bwa kulela pomwi a Yesu kwiculu.

3. Ino nceebonshi bashikwiiya bakananikwa amushimu usalashi pa Pentekositi ncebakashomena cakutatoonsha?

³ Nimwalinga womwi wa bashikwiiya balya bakalinga mucipinda ca peculu, mpashi naakwiinga abobulya muciibaluka  mbocakalinga bushiku bulya. Mpashi naakwiinga mweebaluka mbocakalinga cakalinga kuboneka anga ngumulaka wa mulilo ndyecakesa mukukala pamutwi wanu, alimwi ambomwakatalika kwaamba mushobo umwi! (Milimo 2:5-12) Inga tamutoonshi nabibo paniini ayi mwakananikwa amushimu usalashi. Ano sa lyoonse Yehova na wananika muntu amushimu usalashi kulaba shicitika shilibetele, alimwi sa boonse balananikwa paciindi comwi mubuumi bwabo? Sobwe. Ino tulishi buyani ayi teshi mbocibete ubo?

4. Sa bananikitwe boonse bamuciindi ca batumwi bakananikwa paciindi comwi? Amusansulule.

⁴ Atubandike paciindi bantu ndyebananikwa. Beneklistu bakalinga mpashi 120 abo bakabungana mucipinda ca peculu, teshi mbo beenka bakananikwa amushimu usalashi pabushiku bwa Pentekositi mu, 33 C.E. Kwakalinga abamwi bakalinga kushika kuma 3,000 bakatambula mushimu usalashi Yesu ngwaakashomesha. Bakananikwa ciindi ndyebakabombekwa. (Milimo 2:37, 38, 41) Ano mumyaaka yakaboolawo, teshi Beneklistu boonse bakananikwa amushimu usalashi ndyebakabombekwa. Kucakubonenaako, bene Samaliya bakananikwa pesule lya nshiku shiinji kuswa ciindi ndyebakabombekwa. (Milimo 8:14-17) Alimwi Koneliyo lakwe amukwashi wakwe bakananikwa munshila ipuseneeko abuumbi, bakananikwa kabatana kubombekwa.​—Milimo 10:44-48.

5. Kweelana a 2 Bene Kolinto 1:21, 22, ino nciinshi cicitika na muntu wananikwa amushimu usalashi?

⁵ Atubandike pashicitika na muntu wananikwa amushimu usalashi. Bamwi na bananikwa cilaba ciyumu pakutaanguna kwaamba ayi basumine ayi Yehova wabasala kuya kwiculu. Mpashi inga batalika kuliipusha ayi, ‘Ino nceebonshi Lesa ncaakasalila ndime?’ Bamwi mpashi teshi mbobalinyumfwa. Tacicite mulandu amuntu mbwaalinyumfwa na wananikwa, mutumwi Paulo wakaamba mbociba na muntu wananikwa. Wakaamba ayi: “Mwakashoma Klistu, paceebo ceeco Lesa wakamupa keshibilo * kakwaamba ayi muli bantu bakwe pakumupa mushimu usalashi uyo ngwaakashomesha.”  (Efe. 1:13, 14) Aboobo Yehova ulasebensesha mushimu usalashi kushomesha Beneklistu aba kwaamba ayi wakabasala. Munshila iyi mushimu usalashi uli anga “ncitondesho [na cishomesho]” Lesa ncaabapa kwaamba ayi bashome cakutatoonsha kwaamba ayi kunembo balaakuba abuumi butamaani kwiculu kuteshi pacishi capanshi.​—Amubelenge 2 Bene Kolinto 1:21, 22.

6. Ino Mwineklistu wakananikwa alyeelete kucita buyani kwaamba ayi akatambule cilambu cakuya kwiculu?

⁶ Ano sa Mwineklistu na wananikwa nkokwaamba ayi camana watambula kale cilambu ca kuya kwiculu? Sobwe. Ncakwiila kwaamba ayi ulishinishite ayi Lesa wakamusala kuya kwiculu. Nacibi boobo, alyeelete kwiibaluka kwaamba ayi Baibo ilaamba ayi: “Nobamakwesu, amusebense cankusu kwaamba ayi mushinishe bwiite akusalwa kwanu, mukwiinga na mwatolelela kucita shintu ishi, teshi mukaalilwewo.” (2 Pita 1:10) Aboobo nabi kwaamba ayi Mwineklistu wasalwa na kwiitwa kwaamba ayi akaye kwiculu, alyeelete kutolelela kushomeka kwaamba ayi akatambule cilambu.​—Fili. 3:12-14; Ebu. 3:1; Ciyu. 2:10.

7. Ino bananikitwe balashiba buyani ayi balakuya kwiculu?

⁷ Ino muntu ulashiba buyani ayi ulicite bulindilishi bwakuya kwiculu? Paulo wakakumbula kabotu mwiipusho uyu mu maswi ngaakalembela bananikitwe bakalinga ku Loma “bakeetwa kuba basalalite.” Wakabalwiita ayi: “Mukwiinga mushimu ngomwakatambula toomwaaluli basha akumulenga boowa alimwi, sombi mwakatambula mushimu umupa kuba bana bakwe Lesa, kwiinda mumushimu uyu muloolobesha ayi: ‘Abba, Ta!’ Mushimu Wakwe Lesa Wiine Ulasuminishanya amushimu wesu ayi tuli bana bakwe Lesa.” (Loma. 1:7; 8:15, 16) Aboobo kwiinda mumushimu wakwe usalashi, Lesa alapa kwaamba ayi bananikitwe bashome cakushinisha ayi wakabasala kuya kwiculu.​—1 Tesa. 2:12.

8. Ino lilembo lya 1 Joni 2:20, 27 lilatondesha buyani ayi taakuwo muntu umwi weelete kubalwiita ayi bakananikwa?

⁸ Yehova alalengesha baabo mbwaakasala kuya kwiculu kushoma cakutatoonsha ayi ncakwiila balaakuya kwiculu. (Amubelenge 1 Joni 2:20, 27.) Nacibi boobo, Beneklistu bananikitwe abalo balyeelete kwiishikwa a Yehova kwiinda mulibungano bweenka mbuli Mwineklistu uli woonse. Sombi taakuwo muntu weelete kubalwiita ayi mwebo Lesa wakamusala. Yehova wakasebensesha nkusu shakwe shiinditewo, nkokwaamba ayi mushimu usalashi, kwaamba ayi ubalengeshe kuba bashinishite ayi ncakwiila bakasalwa!

9. Kweelana a Bene Efeso 1:18, ino nshiinshi shaaluka na muntu wananikwa?

⁹ Munshiku shino basebenshi bakwe Yehova baanji balaalilwa kunyumfwishisha shicitika na muntu wananikwa. Cili boobu mukwiinga baanji tabananikitwe. Lesa wakalenga bantu aluyaando lwa kukala abuumi butamaani pacishi capanshi, kuteshi kwiculu. (Mata. 1:28; Kulu. 37:29) Nacibi boobo, Yehova wasala bamwi kwaamba ayi bakekale kwiculu. Aboobo na wabananika, alaalula bulindilishi bwabo akuyeeya kwabo peenkapo, nkokwaamba ayi balatalika kulangila kuba abuumi kwiculu.​—Amubelenge Bene Efeso 1:18.

10. Ino “kushalwa cipya” cilaamba nshi? (Amubone maswi amweela.)

¹⁰ Na Mwineklistu wananikwa amushimu usalashi, nkokwaamba ayi ‘washalwa cipya.’ * Yesu nshaakaamba shilatondesha ayi nciyumu kusansululwiita  muntu umwi utana kunanikwa ‘kushalwa cipya’ na ‘kushalwa kuswa kumushimu’ mbokunyumfwika.​—Joni 3:3-8.

11. Amusansulule mbociba kwaamba ayi muntu aalule mbwalinga kuyeeya na wananikwa.

¹¹ Ino Beneklistu bananikitwe balaaluka buyani mushintu nshobayeeya? Yehova kaatana kubananika Beneklistu aba balaba alusuno lwa kukala buumi butamaani pacishi capanshi. Balalangila cakuyandishisha kuciindi Yehova ndyeshi akakushe shibiibi shoonse pacishi capanshi akulengesha kwaamba ayi cibe paladaiso. Mpashi bakalinga kuyeeya mbweshi cikabe ndyeshi bakanootambula beshikamukowa abeshicibusa babo bakafwa. Ano ndibakananikwa, bakacileka kuyeeya boobo. Ino nceebonshi? Sa nceebo cakwaamba ayi bakacileka kusuna bulindilishi bwakukala pacishi capanshi? Na mpashi nceebo cakwaamba ayi bakalinga kulisukama abuumbi na mpashi bakalinga kucite mapensho aanji? Sa nceebo cakwaamba ayi bakatalika kuyeeya ayi kukala pacishi capanshi kulaakubalensha butolo? Sobwe napaceyi, Yehova wakasebensesha mushimu wakwe usalashi kwaalula bulindilishi mbobakalinga kusuni abuumbi bwakukala pacishi capanshi, akwaalula mbobayeeya.

12. Kweelana a 1 Pita 1:3, 4, ino Beneklistu bananikitwe balalinyumfwa buyani na bayeeya pabulindilishi bwabo?

¹² Na muntu wananikwa, cimwi ciindi inga watalika kulibona anga taashikitewo pakuba womwi wabaabo beshibakanoolela pomwi a Yesu kwiculu. Nacibi boobo tatoonshi nabi paniini kwaamba ayi Yehova wakamusala kuya kwiculu. Alasangalala abuumbi akulumba na wayeeya bulindilishi bwakuya kwiculu.​—Amubelenge 1 Pita 1:3, 4.

13. Ino bananikitwe balanyumfwa buyani kukala pacishi capanshi?

¹³ Ano sa ici cilaamba ayi bananikitwe balisuni kufwa? Mutumwi Paulo wakakumbula mwiipusho uyu. Wakakoshanisha mubili wabananikitwe ku tente akwaamba ayi: “Kwalo, swebo sotuli mutente iyi tulatongela, tulalisukama abuumbi, mukwiinga tatusuni kwaamba ayi twiifuule, sombi tulisuni kufwala yeeyo imwi kwaamba ayi iyi ifwa iminwe abuumi.” (2 Koli. 5:4) Beneklistu aba tabana kulema kukala pacishi capanshi alimwi tabasuniiwo kufwa bwangu. Sombi balisuni buumi alimwi balisuni kusebensela Yehova bushiku abushiku pomwi amikwashi yabo abeshicibusa. Nacibi boobo, lyoonse balayeeya pabulindilishi bwabo bubotu mbobacite bwakuya kwiculu.​—1 Koli. 15:53; 2 Pita 1:4; 1 Joni 3:2, 3; Ciyu. 20:6.

14. Ino nshiinshi shimwi shitatondeshi ayi muntu wakananikwa amushimu usalashi?

¹⁴ Mpashi mulatoonsha na mwakananikwa amushimu usalashi. Na mulatoonsha, amuyeeye pamiipusho iyi: Sa mulisuni kusebensa cankusu abuumbi muncito yakwe Yehova? Sa mulabona ayi mulasebensa cankusu abuumbi muncito yakushimikila? Sa mulisuni bunene kwiiya Baibo akwiiya “shishisitwe shakwe Lesa”? (1 Koli. 2:10) Sa mulabona ayi Yehova alamucafwa kwiisha bantu baanji cancine? Sa mulalinyumfwa ayi mulicite mukuli unene wakwiisha bantu pali Yehova? Sa kuli nshemwabona mubuumi bwanu shimupa kushoma kwaamba ayi Yehova alamucafwa mushintu shiinji? Na mwakumbula ayi ee kumiipusho iyi, sa nkokwaamba ayi Lesa wakamusala kuya kwiculu? Sobwe napaceyi. Ino nceebonshi? Mukwiinga basebenshi bakwe Lesa bananikitwe abatananikitwe boonse inga bakumbula ayi ee kumiipusho iyi. Kwiilikaawo, Yehova inga wasebensesha mushimu wakwe usalashi kucafwa basebenshi bakwe bacite bulindilishi bwakuya kwiculu na bwakukala pacishi capanshi kukumanisha sheeshi nshetwaambawo. Alimwi na mulatoonsha ayi mwakasalwa, nkokwaamba  ayi tamunanikitwe. Mukwiinga abo bakasalwa a Yehova tabatoonshi nabi paniini kwaamba ayi balaakuya kwiculu! Balishomete cakushinisha!

15. Ino tulishi buyani ayi teshi boonse bakatambula mushimu wakwe Lesa bacite bulindilishi bwakuya kwiculu?

¹⁵ Mu Baibo muli shakubonenaako shiinji sha basankwa abanakashi bakalinga kucite lushomo alimwi bakatambula mushimu usalashi; sombi tabakwe kupekwa bulindilishi bwakuba abuumi butamaani kwiculu. Defedi wakalinga kutanjililwa amushimu usalashi. (1 Samwe. 16:13) Mushimu usalashi wakamucafwa kushiba shiinji pali Yehova, alimwi wakamutanjilila akulembako mabuku amwi amu Baibo. (Maako 12:36) Nacibi boobo, mutumwi Pita wakaamba ayi Defedi “taakwe kuya kwiculu.” (Milimo 2:34) Joni Mubombeki wakalinga ‘kuswite mushimu usalashi.’ (Luka 1:13-16) Yesu wakaamba ayi taakuwo wakalinga kwiindite pali Joni, sombi wakeelikawo akwaamba ayi Joni taabete pabaabo beshibakanoolela anguwe mu Bwaami bwa kwiculu. (Mate. 11:10, 11) Yehova wakasebensesha mushimu wakwe usalashi kucafwa basankwa aba kucita shintu shikankamika, nacibi boobo taakwe kubasala kwaamba ayi bakanoolela pomwi a Yesu kwiculu. Ano sa ici cilaamba ayi basankwa aba tabakalinga kushomeka abuumbi bweenka mbuli baabo bakananikwa? Sobwe napaceyi. Cilaamba ayi Yehova alaakubabusha kwaamba ayi bakabe mu Paladaiso pacishi capanshi.​—Joni 5:28, 29; Milimo 24:15.

16. Ino ncilambu nshi basebenshi bakwe Lesa baanji munshiku shino ncobatolangila?

¹⁶ Buunji bwa basebenshi bakwe Lesa munshiku shino, tabacite bulindilishi bwakuya kwiculu. Bweenka mbuli Abulaamu, Saala, Defedi, Joni Mubombeki, alimwi abasankwa abanakashi baanji abo Baibo mboyaambawo, batolangila kuba abuumi butamaani pacishi capanshi, Bwaami bwakwe Lesa ndyeshi bukanoolela.​—Ebu. 11:10.

17. Ino njimiipusho nshi njeshi tukabandike mumutwi utokonkelaawo?

¹⁷ Mukwiinga amunshiku shino bananikitwe nkobali, inga twaba amiipusho imwi. (Ciyu. 12:17) Kucakubonenaako, ino bananikitwe balyeelete kunoolibona buyani? Ino na umwi mulibungano lyanu watalika kunwako waini na kulyako shinkwa pa Ciibalusho, mulyeelete kunoomubona buyani? Alimwi ino na namba yabaabo baamba ayi bakananikwa yatolelela kuya panembo? Sa tulyeelete kulisukama? Tulaakubandika shikumbulo kumiipusho iyi mumutwi utokonkelaawo.