ບົດຄວາມສຶກສາທີ 4
“ພະລັງຂອງພະເຈົ້າຢືນຢັນໃຫ້ພວກເຮົາໝັ້ນໃຈ”
“ພະລັງຂອງພະເຈົ້າຢືນຢັນໃຫ້ພວກເຮົາໝັ້ນໃຈວ່າພວກເຮົາເປັນລູກຂອງພະເຈົ້າ.”—ຣມ. 8:16
ເພງ 25 ສົມບັດອັນລ້ຳຄ່າຂອງພະເຈົ້າ
ໃຈຄວາມສຳຄັນ *
ໃນວັນເພັນເຕກອດ ພະເຢໂຫວາໄດ້ໃຫ້ພະລັງບໍລິສຸດຂອງພະອົງກັບພວກລູກສິດ 120 ຄົນ ໃນແບບທີ່ໜ້າງຶດງໍ້. (ເບິ່ງຂໍ້ 1-2)
1-2. ມີເຫດການທີ່ໜ້າງຶດງໍ້ຫຍັງເກີດຂຶ້ນໃນວັນເພັນເຕກອດປີ ຄ.ສ 33?
ໃນຕອນເຊົ້າຂອງວັນອາທິດໃນເມືອງເຢຣູຊາເລັມເຊິ່ງເປັນວັນເພັນເຕກອດປີ ຄ.ສ 33 ກຸ່ມພວກລູກສິດ 120 ຄົນໄດ້ມາປະຊຸມກັນຢູ່ຫ້ອງຊັ້ນເທິງ. (ກຈກ. 1:13-15; 2:1) ບໍ່ເທົ່າໃດມື້ກ່ອນໜ້ານັ້ນ ພະເຢຊູໄດ້ສັ່ງພວກເຂົາໃຫ້ຢູ່ເມືອງເຢຣູຊາເລັມເພາະພວກເຂົາຈະໄດ້ຮັບຂອງຂວັນທີ່ພິເສດຫຼາຍ. (ກຈກ. 1:4, 5) ໃຫ້ເຮົາມາເບິ່ງວ່າມີຫຍັງເກີດຂຶ້ນ?
2 “ທັນໃດນັ້ນ ມີສຽງຈາກຟ້າຄືກັບສຽງພາຍຸ” ສຽງນັ້ນໄດ້ດັງສະໜັ່ນໄປທົ່ວເຮືອນ. ຈາກນັ້ນ “ແປວໄຟເຊິ່ງມີຮູບຮ່າງຄືກັບລີ້ນ” ລອຍຢູ່ເທິງຫົວພວກລູກສິດແຕ່ລະຄົນ ແລະພວກເຂົາກໍ “ເຕັມໄປດ້ວຍພະລັງບໍລິສຸດ.” (ກຈກ. 2:2-4) ໂດຍວິທີທີ່ໜ້າງຶດງໍ້ນີ້ ພະເຢໂຫວາໄດ້ເທພະລັງບໍລິສຸດຂອງພະອົງໃສ່ພວກເຂົາ. (ກຈກ. 1:8) ພວກເຂົາເປັນກຸ່ມທຳອິດທີ່ຖືກເຈີມດ້ວຍພະລັງບໍລິສຸດ * ແລະມີຄວາມຫວັງທີ່ຈະໄດ້ຮ່ວມປົກຄອງກັບພະເຢຊູໃນສະຫວັນ.
ເກີດຫຍັງຂຶ້ນເມື່ອບາງຄົນຖືກເຈີມ?
3. ເປັນຫຍັງພວກລູກສິດທີ່ປະຊຸມກັນໃນວັນເພັນເຕກອດຈຶ່ງໝັ້ນໃຈວ່າພວກເຂົາຖືກເຈີມດ້ວຍພະລັງບໍລິສຸດ?
3 ຖ້າເຈົ້າເປັນຄົນໜຶ່ງໃນກຸ່ມພວກລູກສິດທີ່ໄດ້ປະຊຸມກັນຢູ່ຫ້ອງຊັ້ນເທິງໃນມື້ນັ້ນ ເຈົ້າຈະບໍ່ມີວັນລືມເລີຍ. ເຈົ້າໄດ້ເຫັນແປວໄຟເຊິ່ງມີຮູບຮ່າງຄືກັບລີ້ນລອຍຢູ່ເທິງຫົວຂອງເຈົ້າ ແລະເຈົ້າກໍເລີ່ມເວົ້າພາສາຕ່າງໆໄດ້! (ກຈກ. 2:5-12) ເຈົ້າຄືຊິໝັ້ນໃຈແທ້ໆວ່າເຈົ້າຖືກເຈີມດ້ວຍພະລັງບໍລິສຸດ. ແຕ່ທຸກຄົນທີ່ຖືກເຈີມດ້ວຍພະລັງບໍລິສຸດໄດ້ຖືກເຈີມໃນແບບທີ່ໜ້າງຶດງໍ້ນີ້ແລະໃນໄລຍະເວລາດຽວກັນຂອງຊີວິດບໍ? ບໍ່. ເຮົາຮູ້ໄດ້ແນວໃດ.
4. ຜູ້ຖືກເຈີມທຸກຄົນໃນສະຕະວັດທຳອິດໄດ້ຖືກເຈີມໃນໄລຍະເວລາດຽວກັນຂອງຊີວິດພວກເຂົາບໍ? ຂໍໃຫ້ອະທິບາຍ.
4 ໃຫ້ເຮົາມາເບິ່ງເວລາ ທີ່ພວກເຂົາຖືກເຈີມ. ກຸ່ມຄລິດສະຕຽນ 120 ຄົນນັ້ນບໍ່ແມ່ນກຸ່ມດຽວທີ່ຖືກເຈີມດ້ວຍພະລັງບໍລິສຸດໃນວັນເພັນເຕກອດປີ ຄ.ສ 33. ຕໍ່ມາໃນມື້ດຽວກັນ ກໍມີອີກ 3.000 ຄົນໄດ້ຮັບພະລັງບໍລິສຸດຕາມທີ່ພະເຢຊູສັນຍາ ພວກເຂົາຖືກເຈີມຕອນທີ່ໄດ້ຮັບບັບເຕມາ. (ກຈກ. 2:37, 38, 41) ແຕ່ຫຼາຍປີຕໍ່ມາ ກໍບໍ່ແມ່ນຄລິດສະຕຽນທຸກຄົນໄດ້ຖືກເຈີມຕອນຮັບບັບເຕມາ. ຄົນຊາມາເຣຍຫຼາຍຄົນໄດ້ຖືກເຈີມຫຼັງຈາກທີ່ພວກເຂົາຮັບບັບເຕມາໄລຍະໜຶ່ງແລ້ວ. (ກຈກ. 8:14-17) ແລະໃນກໍລະນີພິເສດ ໂກເນລີໂອກັບຄົນທີ່ຢູ່ໃນເຮືອນຂອງລາວກໍໄດ້ຖືກເຈີມກ່ອນທີ່ພວກເຂົາຮັບບັບເຕມາ.—ກຈກ. 10:44-48
5. ຕາມ 2 ໂກຣິນໂທ 1:21, 22 ເກີດຫຍັງຂຶ້ນກັບຜູ້ທີ່ຖືກເຈີມດ້ວຍພະລັງບໍລິສຸດ?
5 ໃຫ້ເຮົາມາເບິ່ງວ່າເກີດຫຍັງຂຶ້ນ ກັບຜູ້ທີ່ຖືກເຈີມດ້ວຍພະລັງບໍລິສຸດ. ຜູ້ຖືກເຈີມບາງຄົນອາດຮູ້ສຶກຍາກທີ່ຈະຍອມຮັບວ່າເປັນຫຍັງພະເຢໂຫວາເລືອກພວກເຂົາ. ພວກເຂົາອາດສົງໄສວ່າ ‘ເປັນຫຍັງພະເຈົ້າຄືເລືອກຂ້ອຍ?’ ແຕ່ບາງຄົນອາດບໍ່ໄດ້ຮູ້ສຶກແບບນັ້ນ. ບໍ່ວ່າຈະເປັນແບບໃດກໍຕາມ ອັກຄະສາວົກໂປໂລອະທິບາຍເຖິງສິ່ງທີ່ເກີດຂຶ້ນກັບທຸກຄົນທີ່ຖືກເຈີມວ່າ: “ເມື່ອພວກເຈົ້າເຊື່ອແລ້ວ ພະເຈົ້າໄດ້ໃຊ້ພະຄລິດໃຫ້ປະທັບກາ *ພວກເຈົ້າດ້ວຍພະລັງບໍລິສຸດຂອງພະອົງຕາມທີ່ສັນຍາໄວ້. ການປະທັບການັ້ນເປັນການຮັບຮອງລ່ວງໜ້າວ່າພວກເຮົາຈະໄດ້ຮັບມໍລະດົກແນ່ນອນ.” (ອຟຊ. 1:13, 14; ໄຂເງື່ອນ) ດັ່ງນັ້ນ ພະເຢໂຫວາຈຶ່ງໃຊ້ພະລັງບໍລິສຸດເພື່ອເຮັດໃຫ້ຄລິດສະຕຽນເຫຼົ່ານີ້ຮູ້ສຶກໝັ້ນໃຈວ່າພະອົງໄດ້ເລືອກພວກເຂົາ. ໂດຍວິທີນີ້ ພະລັງບໍລິສຸດໄດ້ “ຮັບຮອງ [ຄ້ຳປະກັນຫຼືສັນຍາ]” ໃຫ້ພວກເຂົາໝັ້ນໃຈວ່າໃນອະນາຄົດພວກເຂົາຈະມີຊີວິດຕະຫຼອດໄປໃນສະຫວັນ ບໍ່ແມ່ນແຜ່ນດິນໂລກ.—ອ່ານ 2 ໂກຣິນໂທ 1:21, 22
6. ຄລິດສະຕຽນທີ່ຖືກເຈີມຕ້ອງເຮັດຫຍັງເພື່ອຈະໄດ້ໄປສະຫວັນ?
6 ເມື່ອຄລິດສະຕຽນຄົນໜຶ່ງຖືກເຈີມແລ້ວ ນັ້ນໝາຍຄວາມວ່າລາວຈະໄດ້ໄປສະຫວັນແທ້ໆບໍ? ບໍ່. ລາວໝັ້ນໃຈວ່າລາວຖືກເລືອກໃຫ້ໄປສະຫວັນ ແຕ່ລາວຕ້ອງຈື່ຄຳເຕືອນນີ້ທີ່ວ່າ: “ພີ່ນ້ອງເອີຍ ໃຫ້ພວກເຈົ້າພະຍາຍາມຫຼາຍຂຶ້ນເພື່ອຍຶດໝັ້ນກັບສິດທິພິເສດທີ່ພະເຈົ້າເອີ້ນແລະເລືອກພວກເຈົ້າມາ ຖ້າເຮັດແບບນັ້ນຕໍ່ໄປ ພວກເຈົ້າຈະບໍ່ມີວັນປະຖິ້ມຄວາມເຊື່ອເລີຍ.” (2 ປຕ. 1:10) ດັ່ງນັ້ນ ເຖິງວ່າຄລິດສະຕຽນຜູ້ຖືກເຈີມໄດ້ຖືກເລືອກຫຼືຖືກເອີ້ນໃຫ້ໄປສະຫວັນ ແຕ່ລາວຈະໄດ້ຮັບລາງວັນນີ້ກໍຕໍ່ເມື່ອລາວຮັກສາຄວາມສັດຊື່ເທົ່ານັ້ນ.—ຟລປ. 3:12-14; ຮຣ. 3:1; ພນມ. 2:10
ບາງຄົນຮູ້ໄດ້ແນວໃດວ່າຕົວເອງຖືກເຈີມ?
7. ຜູ້ຖືກເຈີມຮູ້ໄດ້ແນວໃດວ່າພວກເຂົາຖືກເລືອກໃຫ້ໄປສະຫວັນ?
7 ຜູ້ຖືກເຈີມຮູ້ໄດ້ແນວໃດວ່າພວກເຂົາຖືກເລືອກໃຫ້ໄປສະຫວັນ? ຄຳຕອບທີ່ຈະແຈ້ງນີ້ເຫັນໄດ້ຈາກຄຳເວົ້າຂອງໂປໂລທີ່ຂຽນເຖິງຄລິດສະຕຽນໃນເມືອງໂຣມເຊິ່ງຖືກ “ເອີ້ນໃຫ້ມາເປັນຄົນບໍລິສຸດ.” ລາວບອກພວກເຂົາວ່າ: “ພະລັງຂອງພະເຈົ້າບໍ່ໄດ້ເຮັດໃຫ້ພວກເຮົາຕົກເປັນທາດຫຼືຕ້ອງຢ້ານອີກ ແຕ່ເຮັດໃຫ້ພວກເຮົາຖືກຮັບເປັນລູກແລະດ້ວຍພະລັງນີ້ພວກເຮົາຈຶ່ງເອີ້ນພະເຈົ້າວ່າ: ‘ອັບບາ! ເຊິ່ງໝາຍເຖິງພໍ່.’ ພະລັງຂອງພະເຈົ້າຢືນຢັນໃຫ້ພວກເຮົາໝັ້ນໃຈວ່າພວກເຮົາເປັນລູກຂອງພະເຈົ້າ.” (ຣມ. 1:7; 8:15, 16) ດັ່ງນັ້ນໂດຍທາງພະລັງບໍລິສຸດ ພະເຈົ້າເຮັດໃຫ້ຜູ້ຖືກເຈີມຮູ້ຢ່າງຈະແຈ້ງວ່າພວກເຂົາຖືກເລືອກໃຫ້ໄປສະຫວັນ.—1 ທຊ. 2:12
8. 1 ໂຢຮັນ 2:20, 27 ບອກໃຫ້ຮູ້ແນວໃດວ່າຜູ້ຖືກເຈີມບໍ່ຈຳເປັນຕ້ອງໃຫ້ໃຜມາຢືນຢັນວ່າພວກເຂົາຖືກເຈີມແທ້?
8 ພະເຢໂຫວາເຮັດໃຫ້ຜູ້ຖືກເຈີມໝັ້ນໃຈແລະບໍ່ສົງໄສວ່າພວກເຂົາຖືກເລືອກໃຫ້ໄປສະຫວັນ. (ອ່ານ 1 ໂຢຮັນ 2:20, 27) ແນ່ນອນວ່າ ຜູ້ຖືກເຈີມຈຳເປັນຕ້ອງໄດ້ຮັບການສອນຈາກພະເຢໂຫວາຜ່ານທາງປະຊາຄົມຄືກັບຄົນອື່ນໆ ແຕ່ພວກເຂົາບໍ່ຈຳເປັນຕ້ອງໃຫ້ຄົນອື່ນມາຢືນຢັນວ່າພວກເຂົາຖືກເຈີມ. ເພາະພະເຢໂຫວາໄດ້ໃຊ້ພະລັງທີ່ມີລິດເດດຫຼາຍທີ່ສຸດໃນເອກະພົບເຊິ່ງກໍຄືພະລັງບໍລິສຸດເພື່ອເຮັດໃຫ້ພວກເຂົາໝັ້ນໃຈແທ້ໆວ່າພວກເຂົາໄດ້ຖືກເຈີມແລ້ວ!
ພວກເຂົາ “ເກີດໃໝ່”
9. ຕາມທີ່ອະທິບາຍໃນເອເຟໂຊ 1:18 ມີການປ່ຽນແປງຫຍັງກັບຄົນທີ່ຖືກເຈີມ?
9 ໃນທຸກມື້ນີ້ ຜູ້ຮັບໃຊ້ຂອງພະເຈົ້າສ່ວນຫຼາຍອາດຮູ້ສຶກວ່າຍາກທີ່ຈະເຂົ້າໃຈສິ່ງທີ່ເກີດຂຶ້ນກັບຄົນທີ່ພະເຈົ້າເຈີມ. ນີ້ບໍ່ແມ່ນເລື່ອງແປກ ເພາະພວກເຂົາບໍ່ໄດ້ຖືກເຈີມ. ພະເຈົ້າສ້າງມະນຸດໃຫ້ມີຊີວິດຕະຫຼອດໄປເທິງໂລກ ບໍ່ແມ່ນສະຫວັນ. (ຕົ້ນ. 1:28; ເພງ. 37:29) ແຕ່ພະເຢໂຫວາເລືອກບາງຄົນໃຫ້ມີຊີວິດຢູ່ໃນສະຫວັນ. ດັ່ງນັ້ນ ຕອນທີ່ພະອົງເຈີມພວກເຂົາ ພະອົງກໍຈະປ່ຽນຄວາມຫວັງແລະວິທີຄິດຂອງພວກເຂົາຢ່າງສິ້ນເຊີງເພື່ອທີ່ພວກເຂົາຈະເບິ່ງໄປທີ່ຊີວິດໃນສະຫວັນ.—ອ່ານເອເຟໂຊ 1:18
10. ການ “ເກີດໃໝ່” ໝາຍຄວາມວ່າແນວໃດ? (ເບິ່ງໄຂເງື່ອນ)
10 ເມື່ອຄລິດສະຕຽນຖືກເຈີມດ້ວຍພະລັງບໍລິສຸດ ພວກເຂົາກໍ “ເກີດໃໝ່” ຫຼື “ເກີດຈາກທາງເທິງ.” * ພະເຢຊູຍັງບອກວ່າ ເປັນໄປບໍ່ໄດ້ທີ່ຈະອະທິບາຍຄວາມຮູ້ສຶກໃຫ້ຄົນທີ່ບໍ່ໄດ້ຖືກເຈີມເຂົ້າໃຈວ່າການ “ເກີດໃໝ່” ຫຼື “ເກີດຈາກພະລັງຂອງພະເຈົ້າ” ນັ້ນເປັນແນວໃດ.—ຢຮ. 3:3-8; ໄຂເງື່ອນ.
11. ຄວາມຄິດຂອງຄລິດສະຕຽນໄດ້ປ່ຽນໄປແນວໃດເມື່ອຖືກເຈີມ?
11 ຄວາມຄິດຂອງຄລິດສະຕຽນໄດ້ປ່ຽນໄປແນວໃດເມື່ອຖືກເຈີມ? ກ່ອນພະເຢໂຫວາຈະເຈີມຄລິດສະຕຽນເຫຼົ່ານີ້ ພວກເຂົາກໍມີຄວາມສຸກກັບຄວາມຫວັງທີ່ຈະມີຊີວິດຕະຫຼອດໄປເທິງໂລກ. ພວກເຂົາຄອຍຖ້າເວລາທີ່ພະເຢໂຫວາຈະກຳຈັດຄວາມຊົ່ວທັງໝົດແລະເຮັດໃຫ້ໂລກນີ້ເປັນອຸທິຍານ. ບາງເທື່ອພວກເຂົາກໍນຶກພາບວ່າຕົວເອງໄດ້ຕ້ອນຮັບຄົນໃນຄອບຄົວຫຼືໝູ່ທີ່ຄືນມາຈາກຕາຍ. ແຕ່ເມື່ອຖືກເຈີມແລ້ວ ຄວາມຄິດຂອງພວກເຂົາກໍປ່ຽນໄປ. ຍ້ອນຫຍັງ? ບໍ່ແມ່ນຍ້ອນພວກເຂົາບໍ່ມັກຄວາມຫວັງທີ່ຈະມີຊີວິດຢູ່ແຜ່ນດິນໂລກ ພວກເຂົາບໍ່ໄດ້ປ່ຽນຄວາມຄິດຍ້ອນທໍ້ໃຈຫຼືເຈິຄວາມທຸກ ບໍ່ແມ່ນຍ້ອນວ່າຢູ່ບໍ່ຢູ່ພວກເຂົາກໍຮູ້ສຶກວ່າຊີວິດຕະຫຼອດໄປເທິງແຜ່ນດິນໂລກເປັນຕາເບື່ອ. ແຕ່ເປັນຍ້ອນພະເຢໂຫວາໄດ້ໃຊ້ພະລັງບໍລິສຸດເພື່ອປ່ຽນແປງຄວາມຄິດແລະຄວາມຫວັງຂອງພວກເຂົາ.
12. ຕາມ 1 ເປໂຕ 1:3, 4 ຄລິດສະຕຽນຜູ້ຖືກເຈີມຮູ້ສຶກແນວໃດກັບຄວາມຫວັງຂອງພວກເຂົາ?
12 ຜູ້ຖືກເຈີມອາດຮູ້ສຶກວ່າບໍ່ຄູ່ຄວນກັບສິດທິພິເສດນີ້. ແຕ່ລາວກໍບໍ່ເຄີຍສົງໄສເລີຍວ່າພະເຢໂຫວາເລືອກລາວແທ້ຫຼືບໍ່. ລາວພັດມີຄວາມສຸກແລະຮູ້ຄຸນຄ່າຫຼາຍແທ້ໆເມື່ອຄິດເຖິງຄວາມຫວັງທີ່ຈະມີຊີວິດຢູ່ໃນສະຫວັນ.—ອ່ານ 1 ເປໂຕ 1:3, 4
13. ຜູ້ຖືກເຈີມຮູ້ສຶກແນວໃດກັບຊີວິດໃນໂລກນີ້?
13 ນີ້ໝາຍຄວາມວ່າຜູ້ຖືກເຈີມຢາກຕາຍຫວາ? ອັກຄະສາວົກໂປໂລໄດ້ຕອບຄຳຖາມນີ້. ລາວສົມທຽບຮ່າງກາຍຂອງພວກເຂົາກັບເຕັ້ນ ລາວບອກວ່າ: “ທີ່ຈິງ ໃນຮ່າງກາຍທີ່ປຽບຄືເຕັ້ນຫຼັງນີ້ ພວກເຮົາເປັນທຸກຄ່ຳຄວນ ບໍ່ແມ່ນຍ້ອນຢາກຈະຖິ້ມເຕັ້ນຫຼັງນີ້ໄປ ແຕ່ຍ້ອນພວກເຮົາຢາກອາໄສຢູ່ໃນເຕັ້ນອີກຫຼັງໜຶ່ງ ເພື່ອຊີວິດຕະຫຼອດໄປຈະມາແທນທີ່ຮ່າງກາຍທີ່ຕາຍໄດ້.” (2 ກຣ. 5:4) ຄລິດສະຕຽນເຫຼົ່ານີ້ບໍ່ໄດ້ເບື່ອຊີວິດໃນແຜ່ນດິນໂລກແລ້ວຢາກຕາຍໄວໆ. ກົງກັນຂ້າມ ພວກເຂົາມີຄວາມສຸກກັບຊີວິດແລະຢາກຮັບໃຊ້ພະເຢໂຫວາພ້ອມກັບຍາດພີ່ນ້ອງແລະໝູ່ຄູ່. ບໍ່ວ່າພວກເຂົາກຳລັງເຮັດຫຍັງ ພວກເຂົາກໍບໍ່ລືມຄວາມຫວັງອັນດີເລີດໃນອະນາຄົດ.—1 ກຣ. 15:53; 2 ປຕ. 1:4; 1 ຢຮ. 3:2, 3; ພນມ. 20:6
ພະເຢໂຫວາເຈີມເຈົ້າບໍ?
14. ສິ່ງໃດພິສູດວ່າຄົນໜຶ່ງບໍ່ໄດ້ຖືກເຈີມດ້ວຍພະລັງບໍລິສຸດ?
14 ບາງທີເຈົ້າກຳລັງສົງໄສວ່າພະເຢໂຫວາໄດ້ເຈີມເຈົ້າບໍ? ຖ້າເປັນແນວນັ້ນ ຂໍໃຫ້ຄິດເຖິງຄຳຖາມສຳຄັນຕໍ່ໄປນີ້: ເຈົ້າຮູ້ສຶກຢາກເຮັດຕາມຄວາມຕ້ອງການຂອງພະເຈົ້າສຸດຊີວິດບໍ? ເຈົ້າຮູ້ສຶກວ່າຕົວເອງກະຕືລືລົ້ນເປັນພິເສດໃນວຽກປະກາດບໍ? ເຈົ້າເປັນນັກສຶກສາພະຄຳພີທີ່ມັກຮຽນຮູ້ “ສິ່ງທີ່ເລິກເຊິ່ງຂອງພະເຈົ້າ” ບໍ? (1 ກຣ. 2:10) ເຈົ້າຮູ້ສຶກວ່າພະເຢໂຫວາໄດ້ໃຫ້ເຈົ້າເກີດຜົນດີໃນວຽກປະກາດບໍ? ເຈົ້າມີຄວາມຮູ້ສຶກເລິກໆວ່າເປັນໜ້າທີ່ຮັບຜິດຊອບອັນຍິ່ງໃຫຍ່ທີ່ຈະຊ່ວຍຄົນອື່ນໃຫ້ຮຽນຮູ້ເລື່ອງພະເຢໂຫວາບໍ? ເຈົ້າເຫັນຫຼັກຖານທີ່ວ່າພະເຢໂຫວາໄດ້ຊ່ວຍເຈົ້າໃນຫຼາຍໆວິທີທີ່ສະເພາະເຈາະຈົງໃນຊີວິດຂອງເຈົ້າບໍ? ຖ້າເຈົ້າຕອບຄຳຖາມທັງໝົດນີ້ວ່າແມ່ນ ນີ້ພິສູດວ່າເຈົ້າໄດ້ຖືກເລືອກໃຫ້ໄປສະຫວັນບໍ? ບໍ່ແມ່ນ. ຍ້ອນຫຍັງ? ກໍຍ້ອນວ່າຜູ້ຮັບໃຊ້ຂອງພະເຈົ້າທຸກຄົນ ສາມາດຮູ້ສຶກແບບນີ້ໄດ້ ບໍ່ວ່າເຂົາເຈົ້າຈະຖືກເຈີມຫຼືບໍ່ກໍຕາມ. ໂດຍທາງພະລັງບໍລິສຸດຂອງພະອົງ ພະເຢໂຫວາສາມາດໃຫ້ຄວາມສາມາດແບບດຽວກັນນີ້ແກ່ຜູ້ຮັບໃຊ້ຂອງພະອົງຄົນໃດກໍໄດ້ ບໍ່ວ່າເຂົາເຈົ້າຈະໄດ້ລາງວັນຢູ່ໃນສະຫວັນຫຼືຢູ່ໃນໂລກນີ້. ທີ່ຈິງ ຖ້າເຈົ້າກຳລັງສົງໄສວ່າຕົນເອງຖືກເຈີມດ້ວຍພະລັງບໍລິສຸດຫຼືບໍ່ ນີ້ກໍໝາຍຄວາມວ່າເຈົ້າບໍ່ໄດ້ ຖືກເຈີມ. ຜູ້ທີ່ພະເຢໂຫວາເລືອກຈະບໍ່ສົງໄສກ່ຽວກັບເລື່ອງນີ້ຢ່າງເດັດຂາດ! ເພາະພວກເຂົາຮູ້ດີວ່າຕົວເອງຖືກເຈີມແທ້!
ພະເຢໂຫວາໃຫ້ພະລັງບໍລິສຸດກັບອັບຣາຮາມ ຊາຣາ ດາວິດ ແລະໂຢຮັນຜູ້ໃຫ້ບັບເຕມາເພື່ອຈະເຮັດສິ່ງຕ່າງໆທີ່ພິເສດໄດ້ ແຕ່ພະອົງບໍ່ໄດ້ໃຊ້ພະລັງນີ້ເພື່ອເລືອກພວກເຂົາໃຫ້ໄປສະຫວັນ (ເບິ່ງຂໍ້ 15-16) *
15. ເຮົາຮູ້ໄດ້ແນວໃດວ່າບໍ່ແມ່ນທຸກຄົນທີ່ໄດ້ຮັບພະລັງບໍລິສຸດຂອງພະເຈົ້າຖືກເລືອກໃຫ້ໄປສະຫວັນ?
15 ໃນຄຳພີໄບເບິນມີຫຼາຍໆຕົວຢ່າງຂອງຜູ້ຮັບໃຊ້ທີ່ສັດຊື່ທີ່ໄດ້ຮັບພະລັງບໍລິສຸດຂອງພະເຢໂຫວາ ແຕ່ພວກເຂົາບໍ່ໄດ້ມີຄວາມຫວັງໄປສະຫວັນ. ດາວິດຖືກຊີ້ນຳໂດຍພະລັງບໍລິສຸດ. (1 ຊາມ. 16:13) ພະລັງບໍລິສຸດຊ່ວຍລາວໃຫ້ເຂົ້າໃຈສິ່ງທີ່ເລິກເຊິ່ງກ່ຽວກັບພະເຢໂຫວາແລະຍັງຊີ້ນຳລາວໃຫ້ຂຽນບາງສ່ວນຂອງຄຳພີໄບເບິນ. (ມຣກ. 12:36) ແຕ່ອັກຄະສາວົກເປໂຕບອກວ່າດາວິດ “ບໍ່ໄດ້ຂຶ້ນໄປສະຫວັນ.” (ກຈກ. 2:34) ໂຢຮັນຜູ້ໃຫ້ບັບເຕມາກໍໄດ້ຮັບ “ພະລັງບໍລິສຸດ.” (ລກ. 1:13-16) ແລະພະເຢຊູບອກວ່າ ບໍ່ມີໃຜຍິ່ງໃຫຍ່ກວ່າໂຢຮັນ ແຕ່ຈາກນັ້ນເພິ່ນກໍບອກວ່າໂຢຮັນຈະບໍ່ໄດ້ຮ່ວມປົກຄອງໃນສະຫວັນ. (ມທ. 11:10, 11) ເຮົາເຫັນວ່າພະເຢໂຫວາໃຫ້ພະລັງບໍລິສຸດກັບພວກເຂົາເພື່ອຈະເຮັດສິ່ງຕ່າງໆທີ່ພິເສດໄດ້ ແຕ່ພະອົງບໍ່ໄດ້ໃຊ້ພະລັງນີ້ເພື່ອເລືອກພວກເຂົາໃຫ້ໄປສະຫວັນ. ນີ້ໝາຍຄວາມວ່າພວກເຂົາບໍ່ສັດຊື່ສ່ຳກັບຄົນທີ່ຈະປົກຄອງໃນສະຫວັນບໍ? ບໍ່. ແຕ່ພະເຢໂຫວາຈະປຸກພວກເຂົາໃຫ້ຄືນມາມີຊີວິດໃນອຸທິຍານເທິງແຜ່ນດິນໂລກ.—ຢຮ. 5:28, 29; ກຈກ. 24:15
16. ໃນທຸກມື້ນີ້ ຜູ້ຮັບໃຊ້ຂອງພະເຈົ້າສ່ວນຫຼາຍມີຄວາມຫວັງແບບໃດ?
16 ໃນທຸກມື້ນີ້ ຜູ້ຮັບໃຊ້ຂອງພະເຈົ້າສ່ວນຫຼາຍບໍ່ໄດ້ມີຄວາມຫວັງທີ່ຈະໄປສະຫວັນ. ຄືກັບອັບຣາຮາມ ຊາຣາ ດາວິດ ໂຢຮັນຜູ້ໃຫ້ບັບເຕມາ ແລະຊາຍຍິງທີ່ສັດຊື່ຫຼາຍຄົນໃນສະໄໝຄຳພີໄບເບິນ ພວກເຂົາລໍຖ້າທີ່ຈະມີຊີວິດເທິງແຜ່ນດິນໂລກພາຍໃຕ້ການປົກຄອງຂອງພະເຈົ້າ.—ຮຣ. 11:10
17. ໃນບົດຄວາມຕໍ່ໄປເຮົາຈະຕອບຄຳຖາມຫຍັງແດ່?
17 ເນື່ອງຈາກທຸກມື້ນີ້ຍັງມີຜູ້ຖືກເຈີມຢູ່ກັບພວກເຮົາ ເຮົາອາດມີຄຳຖາມບາງຢ່າງ. (ພນມ. 12:17) ເຊັ່ນ: ຜູ້ຖືກເຈີມຄວນເບິ່ງຕົວເອງແນວໃດ? ຖ້າບາງຄົນໃນປະຊາຄົມຂອງເຈົ້າເລີ່ມກິນເຂົ້າຈີ່ແລະເຫຼົ້າແວງໃນການປະຊຸມອະນຸສອນ ເຈົ້າຄວນປະຕິບັດກັບຄົນນັ້ນແນວໃດ? ແລະຖ້າຈຳນວນຜູ້ທີ່ຖືກເຈີມເພີ່ມຂຶ້ນເລື້ອຍໆເດ ເຈົ້າຄວນກັງວົນເລື່ອງນີ້ບໍ? ໃນບົດຄວາມຕໍ່ໄປເຮົາຈະຕອບຄຳຖາມເຫຼົ່ານີ້.
^ ຂໍ້ 5 ຕັ້ງແຕ່ວັນເພັນເຕກອດ ປີ ຄ.ສ 33 ຈົນຮອດຕອນນີ້ ພະເຢໂຫວາໄດ້ໃຫ້ຄລິດສະຕຽນບາງຄົນມີຄວາມຫວັງທີ່ດີເລີດເຊິ່ງກໍຄື ຄວາມຫວັງທີ່ຈະໄດ້ຮ່ວມປົກຄອງກັບລູກຊາຍຂອງພະອົງໃນສະຫວັນ. ແລ້ວຄລິດສະຕຽນເຫຼົ່ານີ້ຮູ້ໄດ້ແນວໃດວ່າພວກເຂົາຖືກເລືອກໃຫ້ໄດ້ຮັບສິດທິພິເສດນີ້? ເກີດຫຍັງຂຶ້ນກັບຜູ້ທີ່ພະເຢໂຫວາເລືອກໃຫ້ໄປສະຫວັນ? ເຮົາຈະມາເບິ່ງຄຳຕອບຂອງຄຳຖາມເຫຼົ່ານີ້ນຳກັນ. ບົດຄວາມນີ້ມີຂໍ້ມູນມາຈາກຫໍສັງເກດການ ມັງກອນ 2016.
^ ຂໍ້ 2 ການອະທິບາຍສຳນວນ: ຖືກເຈີມດ້ວຍພະລັງບໍລິສຸດ: ພະເຢໂຫວາໃຊ້ພະລັງບໍລິສຸດຂອງພະອົງເພື່ອເລືອກຄົນທີ່ຈະໄປຮ່ວມປົກຄອງກັບພະເຢຊູໃນສະຫວັນ. ແລະໂດຍທາງພະລັງບໍລິສຸດ ພະອົງໃຫ້ “ການຮັບຮອງລ່ວງໜ້າ” ຫຼືສັນຍາເລື່ອງອະນາຄົດກັບພວກເຂົາ. (ອຟຊ. 1:13, 14) ຄລິດສະຕຽນເຫຼົ່ານີ້ສາມາດເວົ້າໄດ້ວ່າພະລັງບໍລິສຸດ “ຢືນຢັນໃຫ້ [ພວກເຂົາ] ໝັ້ນໃຈ” ຫຼືເຮັດໃຫ້ພວກເຂົາເຂົ້າໃຈແຈ້ງວ່າລາງວັນຂອງພວກເຂົາຄືການໄປສະຫວັນ.—ຣມ. 8:16
^ ຂໍ້ 5 ການອະທິບາຍສຳນວນ: ປະທັບກາ. ການປະທັບການີ້ບໍ່ໄດ້ເປັນແບບຖາວອນຈົນກວ່າຈະເຖິງເວລາບໍ່ດົນກ່ອນທີ່ຄົນນັ້ນຈະຕາຍຢ່າງສັດຊື່ ຫຼືບໍ່ດົນກ່ອນຄວາມທຸກຍາກລຳບາກຄັ້ງໃຫຍ່ເລີ່ມຕົ້ນຂຶ້ນ.—ອຟຊ. 4:30; ພນມ. 7:2-4; ເບິ່ງ “ຄຳຖາມຈາກຜູ້ອ່ານ” ໃນຫໍສັງເກດການ ເດືອນເມສາ 2016 (ພາສາໄທ).
^ ຂໍ້ 10 ສຳລັບຄຳອະທິບາຍເພີ່ມເຕີມກ່ຽວກັບຄວາມໝາຍຂອງການ “ເກີດໃໝ່” ໃຫ້ເບິ່ງຫໍສັງເກດການ 1 ເມສາ 2009 ໜ້າ 3-11 (ພາສາໄທ).
ເພງ 27 ລູກຂອງພະເຈົ້າໄດ້ຮັບກຽດ
^ ຂໍ້ 57 ຄຳອະທິບາຍຮູບພາບ: ບໍ່ວ່າເຮົາຈະຕິດຄຸກຍ້ອນຄວາມເຊື່ອ ຫຼືປະກາດແລະສອນຄວາມຈິງໄດ້ຢ່າງເສລີ ເຮົາກໍລ້ວນແຕ່ລໍຖ້າຊີວິດເທິງແຜ່ນດິນໂລກພາຍໃຕ້ການປົກຄອງຂອງພະເຈົ້າ.
