1-2. Ki kezahalo mañi yekomokisa yeezahala fa lizazi la Pentekota ya 33 C.E.?

KI LA Sunda kakusasana mwa Jerusalema. Mi ki fa lizazi la Pentekota mwa silimo sa 33 C.E. Sikwata sa balutiwa bababato eza 120 bakopani hamoho mwa ndu yeñwi mwa muzuzu wa kwahalimu. (Lik. 1:13-15; 2:1) Mazazi asikai pili lizazi leo lisika fita kale, Jesu naabalaezi kuli bazwelepili kuina mwa Jerusalema kakuli nebaka amuhela mpo yeipitezi. (Lik. 1:4, 5) Ki lika mañi zeezahala hasamulaho?

² “Honafo [kuutwahala] mulumo ozwa kwa lihalimu, oswana sina mulumo wa moya ofuka ka maata.” Mulumo wo uutwahala mwa ndu kaufela. Hasamulaho, “malimi aswana sina malimi a mulilo” abonahala fa litoho za balutiwa, “mi kaufelaa bona batala moya okenile.” (Lik. 2:2-4) Jehova usululela moya wahae okenile kwa sikwata seo ka nzila yekomokisa. (Lik. 1:8) Balutiwa bao baba bona bapili kutoziwa ka moya okenile * ni kufiwa sepo ya kuyo busa ni Jesu kwa lihalimu.

3. Ki kabakalañi Bakreste bane bafumanehile fa lizazi la Pentekota hane basakakanyi kuli nebatozizwe ka moya okenile?

³ Kambe nemuli yomuñwi wa balutiwa bane baliteñi mwa muzuzu wa kwahalimu fa lizazi lani, nemusike mwalibala lizazi leo. Kaniti luli, nemusike mwalibala kuli nto yeñwi yenebonahala  inge lilimi la mulilo neibonahezi fa toho yamina, mi semukala kubulela puo isili! (Lik. 2:5-12) Nemusike mwakakanya nihanyinyani kuli mutozizwe ka moya okenile. Kono kana Bakreste kaufela babatozizwe ka moya okenile batoziwanga ka nzila yekomokisa ni ka nako yeswana? Batili. Luziba cwañi cwalo?

4. Kana Bakreste kaufela bane batozizwe mwa linako za baapositola nebatozizwe ka nako yeswana? Mutaluse.

⁴ Halunyakisiseñi za nako ya kutoziwa kwa batu. Sikwata sa Bakreste bababato eza 120 haki bona feela bane batozizwe ka moya okenile fa Pentekota ya 33 C.E. Hasamulaho, fa lizazi leliswana leo, batu bababato eza 3,000 ni bona nebaamuhezi moya okenile one usepisizwe. Nebatozizwe ka nako yene bakolobezwa. (Lik. 2:37, 38, 41) Kono mwa lilimo zenetatami hasamulaho, Bakreste babañwi nebasika toziwa ka nako yene bakolobezwa. Masamaria nebatozizwe hase kufitile nako kuzwa fobakolobelezwa. (Lik. 8:14-17) Mi Kornele ni lubasi lwahae bona mane nebatozizwe basika kolobezwa kale, ili nto yenesika ezahala kale.—Lik. 10:44-48.

5. Ka kuya ka liñolo la 2 Makorinte 1:21, 22, ki lika mañi zeezahalanga mutu hatoziwa ka moya okenile?

⁵ Hape halunyakisiseñi zeezahalanga mutu hatoziwa ka moya okenile. Kwa makalelo, Bakreste babatozizwe babañwi mwendi kubabelanga taata kulumela kuli Jehova ubaketile. Bakana baipuza kuli: ‘Ki kabakalañi Jehova haketile na?’ Kono babañwi bona mwendi habaikutwangi cwalo. Kusina taba ni mobaikutwelanga, muapositola Paulusi utalusa zeezahalanga kwa Bakreste babatozizwe kaufela, uli: “Hase mulumezi, mwaswaiwa * hape ka yena, ka moya okenile one usepisizwe, yona swalele ya saanda selusepisizwe.” (Maef. 1:13, 14) Kacwalo, Jehova uitusisanga moya wahae okenile kuli atuse Bakreste bao kuziba kuli ubaketile luli. Ka nzila yeo, moya okenile ki “swalele [sepiso]” yebonisa kuli kwapili bakapila kuya kuile kwa lihalimu isiñi fa lifasi.—Mubale 2 Makorinte 1:21, 22.

6. Mukreste yatozizwe utokwa kuezañi kuli afiwe mupuzo wahae wa kuya kwa lihalimu?

 ⁶ Mukreste hatoziwa, kana fo kutalusa kuli utamehile kufiwa mupuzo wahae? Kutokwa. Unani buikolwiso bwa kuli umemilwe kuyo pila kwa lihalimu. Kono uswanela kuhupula kelezo ye, yeli: “Mizwale, mueze ka momukonela kaufela kuli mutiise kubiziwa ni kuketiwa kwamina, kakuli haiba muzwelapili kueza lika ze, hamuna kupalelwa nikamuta.” (2 Pit. 1:10) Kacwalo, nihaikaba kuli Mukreste yatozizwe uketilwe kamba ubizizwe kuli ayo pila kwa lihalimu, ukona feela kufiwa mupuzo wahae haiba azwelapili kusepahala.—Mafil. 3:12-14; Maheb. 3:1; Sin. 2:10.

7. Bakreste babatozizwe bazibanga cwañi kuli babizizwe kuyo pila kwa lihalimu?

⁷ Kono mutu ukona kuziba cwañi kuli umemilwe kuyo pila kwa lihalimu? Lukona kufumana kalabo kwa puzo yeo halunyakisisa zanaabulezi Paulusi kwa mizwale bane bapila mwa Roma ‘bane babizizwe kuba babakenile.’ Naababulelezi kuli: “Nemusika amuhela moya wa butanga otahisa sabo ku mina hape, kono nemuamuhezi moya wa kuañulwa sina bana, wo ka ona luhuwa kuli: ‘Abba, Ndate!’ Ona moya kasibili upaka hamoho ni moya waluna kuli lu bana ba Mulimu.” (Maro. 1:7; 8:15, 16) Kacwalo, ka moya wahae okenile, Mulimu utusanga batu babatozizwe kukolwa luli kuli babizizwe kuya kwa lihalimu.—1 Mates. 2:12.

8. Liñolo la 1 Joani 2:20, 27 libonisa cwañi kuli Bakreste babatozizwe habatokwi kutalusezwa ki mutu yomuñwi kuli batozizwe?

⁸ Jehova utusanga Bakreste babatozizwe kukolwa luli mwa lipilu ni mwa minahano yabona kuli ubamemile kuyo pila kwa lihalimu. (Mubale 1 Joani 2:20, 27.) Niteñi, Bakreste babatozizwe batokwa kulutiwa ki Jehova sina batu babañwi kaufela mwa puteho. Kono habatokwi kuli mutu yomuñwi abakolwise kuli batozizwe. Jehova uitusisize maata ahae amatuna ka kufitisisa, ili ona moya wahae okenile, kuli abakolwise luli kuli batozizwe!

9. Mutu hatoziwa, ki nto mañi yecincanga ka za sepo yahae sina mokutaluselizwe kwa Maefese 1:18?

⁹ Batanga ba Mulimu babañata kacenu bapalelwanga kuutwisisa luli zeezahalanga ku mutu hatoziwa ki Mulimu. Hakusika fosahala kuikutwa cwalo, kakuli batu babaikutwanga cwalo habasika toziwa. Mulimu naabupile batu kuli bapile kuya kuile fa lifasi isiñi kwa lihalimu. (Gen. 1:28; Samu 37:29) Kono Jehova uketile babañwi kuli bayo pila kwa lihalimu. Kacwalo, Mulimu haabatoza, sepo yabona, ni munahano wabona, zacincanga honafo feela mi banyolelwanga kuyo pila kwa lihalimu.—Mubale Maefese 1:18.

10. ‘Kupepwa sinca’ kutalusañi? (Mubone ni litaluso ze kwatasi.)

¹⁰ Bakreste habatoziwa ka moya okenile ‘bapepwanga sinca’ kamba ‘kupepwa kuzwa kwahalimu.’ * Jesu ni yena naabonisize kuli kutaata hahulu kutaluseza mutu yasika toziwa mokuutwahalela luli ‘kupepwa sinca’ kamba ‘kupepwa ka moya.’—Joa. 3:3-8; litaluso ze kwatasi.

11. Mutaluse mwacincezanga munahano wahae mutu hamulaho wa kutoziwa.

¹¹ Bakreste bacincanga cwañi munahano wabona basatoziwa feela? Pili Jehova asika mema kale Bakreste ba kuya kwa lihalimu, Bakreste bao nebaitebuha hahulu sepo ya kupila  kuya kuile fa lifasi. Nebanyolelwanga hahulu nako yeo Jehova naakazwisa bumaswe kaufela fa lifasi ni kulifetula kuba paradaisi. Mwendi nebanahananga mobakato amuhelela ba mwa lubasi lwabona bane bashwile kamba balikani babona. Kono hane batozizwe, nebacincize munahano wabona. Kabakalañi? Nesi ka libaka la kuli nebakalile kunahana kuli habaswaneli kupila fa lifasi. Kamba kabakala kuli nebazwafile kamba nebanyanda hahulu. Hape nebasika nahana kuli kupila kuya kuile fa lifasi kukanyikwisa. Kono Jehova naaitusisize moya wahae okenile kuli acince munahano wabona ni kuli banyolelwe mupuzo usili obaka fiwa kwapili.

12. Ka kuya ka liñolo la 1 Pitrosi 1:3, 4, Bakreste babatozizwe baikutwa cwañi ka za sepo yabona?

¹² Mutu yatozizwe ukona kuikutwa kuli haswaneli kufiwa buikalabelo bobuipitezi bo. Kono hakakanyi nihanyinyani kuli Jehova umuketile. Unani tabo yetuna mi uitebuha hahulu tohonolo yeo ya kuyo pila kwa lihalimu.—Mubale 1 Pitrosi 1:3, 4.

13. Bakreste babatozizwe baikutwa cwañi ka za bupilo bwabona fa lifasi?

¹³ Kana fo kutalusa kuli Bakreste babatozizwe babata kushwa? Muapositola Paulusi naatalusize mobaikutwelanga babatozizwe. Naabapanyize mibili yabona kwa “tende” mi naabulezi kuli: “Mane luna baba mwa tende ye lwatonga, luimezwi, kakuli halubati kutubula tende ye, kono lubata kuapala tende yeñwi, kuli sesishwa simiziwe ki bupilo.” (2 Makor. 5:4) Bakreste ba habasika nyikwa bupilo bwa fa lifasi mi hababati kushwa kapili. Baikola bupilo mi babata kuitusisa bupilo bwabona kwa kusebeleza Jehova inze bali ni lubasi lwabona ni balikani babona. Kono kusina taba ni zebaeza, bazwelanga pili kuhupula lika zende zabasepisize Mulimu kwapili.—1 Makor. 15:53; 2 Pit. 1:4; 1 Joa. 3:2, 3; Sin. 20:6.

14. Ki lika mañi zesatalusi kuli mutu utozizwe ki moya okenile?

¹⁴ Mwendi mwaipuzanga ka za haiba Jehova umitozize ka moya okenile. Haiba ki cwalo, munyakisise lipuzo za butokwa ze: Kana mutukufalezwi kueza tato ya Jehova? Kana muikutwa kuli munani tukufalelo yetuna mwa musebezi wa kukutaza? Kana mwaikolanga kuituta Bibele ni kuituta litaba “zetungile za Mulimu”? (1 Makor. 2:10) Kana muikutwa kuli Jehova umifuyauzi hahulu mwa musebezi wa kukutaza? Kana muikutwa kuli munani buikalabelo bobutuna bwa kutusa batu kusebeleza Jehova? Kana kunani nto yeneezahezi mwa bupilo bwamina yebonisa kuli Jehova umitusize hahulu? Haiba mualaba kuli ee kwa lipuzo zeo, kana fo kutalusa kuli mumemilwe kuyo pila kwa lihalimu? Batili, hakucwalo. Ki kabakalañi hakusi cwalo? Kakuli batanga ba Mulimu kaufela bakona kuikutwa cwalo, ibe kuli batozizwe kamba kutokwa. Mi ka moya wahae okenile, Jehova wakona kufa maata aswana kwa batanga bahae kusina taba ni kuli sepo yabona ki ya kupila kuya kuile fa lifasi kamba kwa lihalimu. Mane haiba mwakakanyanga ka za haiba mutozizwe ka moya okenile, fo kutalusa kuli hamusika toziwa. Babaketilwe ki Jehova habakakanyangi ka za taba yeo! Baziba luli kuli baketilwe!

15. Luziba cwañi kuli haki batu kaufela babaamuhezi moya okenile wa Mulimu babaketilwe kuya kwa lihalimu?

¹⁵ Mwa Bibele, kunani mitala ya batanga ba Mulimu babasepahala babañata bane baamuhezi moya okenile kono ili  bane basina sepo ya kuyo pila kwa lihalimu. Davida naaetelezwi ki moya okenile. (1 Sam. 16:13) Moya okenile neu mutusize kuutwisisa lika zetungile za Jehova mi hape neu muetelezi kuñola likalulo zeñwi za Bibele. (Mare. 12:36) Nihakulicwalo, muapositola Pitrosi naabulezi kuli Davida “naasika kambamela kwa mahalimu.” (Lik. 2:34) Joani Mukolobezi ‘naatezi moya okenile.’ (Luka 1:13-16) Jesu naabulezi kuli hakuna mutu yomutuna yafita Joani, kono hape naabulezi kuli Joani haana kubusa sina mulena mwa Mubuso wa kwa lihalimu. (Mat. 11:10, 11) Jehova naaitusisize moya wahae okenile kuli atuse batu bao kueza lika zemakaza, kono naasika itusisa ona kwa kubaketa kuli bayo pila kwa lihalimu. Kana taba yeo italusa kuli nebasa sepahali hahulu sina batu bane baketilwe kuyo busa kwa lihalimu? Kutokwa. Kono italusa kuli Jehova uka bakutiseza kwa bupilo mwa Paradaisi fa lifasi.—Joa. 5:28, 29; Lik. 24:15.

16. Ki mupuzo mañi obanyolelwa batanga ba Mulimu babañata kacenu?

¹⁶ Mwa linako zaluna, batanga ba Mulimu babañata habana sepo ya kuyo pila kwa lihalimu. Batu babacwale ka Abrahama, Sara, Davida, Joani Mukolobezi, mane ni baana ni basali babañwi babañata ba mwa linako zene iñolwa Bibele, balibelela kuto pila fa lifasi kuya kuile inze babusiwa ki Mubuso wa Mulimu.—Maheb. 11:10.

17. Ki lipuzo mañi zeluka nyakisisa mwa taba yetatama?

¹⁷ Bakeñisa kuli Bakreste babatozizwe basali teñi kacenu mwahalaa batanga ba Mulimu, lukona kuba ni lipuzo zeñwi. (Sin. 12:17) Ka mutala, Bakreste babatozizwe baswanela kuikutwa cwañi? Haiba mutu yomuñwi mwa puteho yamina akalisa kuca sinkwa ni kunwa waine fa Kupuzo, muswanela kumuunga cwañi? Mi kucwañi haiba palo ya bababulela kuli batozizwe izwelapili kuekezeha? Kana mwaswanela kubilaezwa ki taba yeo? Lukaalaba lipuzo zeo mwa taba yetatama.