CHIHANDE CHAKULINANGULA 4
“Shipilitu Yivene Yeji Kuhananga Unjiho”
“Shipilitu yivene yeji kuhananga unjiho nashipilitu yetu ngwayo tuvana vaKalunga.”—LOMA 8:16.
MWASO 25 Luheto lwaKulipwila
VYUMA NATUSHIMUTWILA *
Yehova ahingunwinyine shipilitu yajila mujila yakukomwesa hali vaka-Kulishitu 120 haPendekoseta (Talenu palangalafu 1-2)
1-2. Chuma muka chakukomwesa chasolokele haPendekoseta mumwaka wa 33 C.E.?
LYASONDO nachimene haPendekoseta mumwaka wa 33 C.E., tumbaji vakuheta ku 120 valikungulwilile muzuvo yahelu muYelusalema. (Vili. 1:13-15; 2:1) Shimbu kanda likumbi kaneli, Yesu avalwezele vatwame lika muYelusalema mwomwo mukiko navakatambwila wana wakulipwila. (Vili. 1:4, 5) Uno vyuma muka vyasolokele halikumbi kana?
2 “Vakasumukile lushindo nalufuma mwilu nge kuhuhwa chapeho yangolo chikuma.” Lushindo kana lwevwakanyine muzuvo yosena. Kufumaho, “tumilangi twakakahya twakufwana nge malimi” twatwamine hali mutu himutu, kaha vosena “vazalile nashipilitu yajila.” (Vili. 2:2-4) Ngocho Yehova ahanyine vatu kana shipilitu yajila mujila yakukomwesa. (Vili. 1:8) Ava tumbaji vakiko vapwile vatete kuwavisa nashipilitu yajila * nakupwa nalutalililo lwakukayula naYesu mwilu.
VYUMA MUKA VYEJI KUSOLOKANGA NGE MUTU VANAMUWAVISA?
3. Uno vatu vaze vapwile haPendekoseta vatachikijile ngachilihi ngwavo vanavawavisa nashipilitu yajila?
3 Nge nayenu mwapwile hali vaze tumbaji valikungulwilile muze mukapete kahelu haPendekoseta, kachi kamweshi kukavulyama vyuma vyasolokele halikumbi kanako. Nayenu kachi mwapwile nachuma chize chasolokele nge mulangi wakakahya hamutwe wenu, nakuputuka kuhanjika malimi eka. (Vili. 2:5-12) Kaha kachi mwakunyukile chikupu ngwenu vanamiwavisa nashipilitu yajila. Uno vaka-Kulishitu vosena vaze veji kuwavisanga nashipilitu yajila veji kumonanga vyuma kanevi vyakukomwesa tahi? Kutala veji kuvawavisanga halwola lwolumwe tahi? Nduma. Twatachikiza ngachilihi ngocho?
4. Uno vaka-Kulishitu vamulikulukaji lyamyaka lyakulivanga vavawavishile halwola lwolumwe tahi? Lumbununenu.
4 Tushimutwilenu halwola luze Kalunga awavishilenga vatu. Kwapwile navatu veka vaze vawavishile haPendekoseta mu 33 C.E., keshi vaze vaka-Kulishitu 120 kahako. Halikumbi vene lize, vatu veka kafwe 3,000 vatambwile shipilitu yajila yize Yesu ashikile. Vavawavishile omu vavambapachishile. (Vili. 2:37, 38, 41) Oloze mumyaka yakavangijileho, vaka-Kulishitu vamwe kavavawavishilenga hahaze vene vavambapachishilengako. VaSamaliya vavawavishile omu mwahichile lwola kufuma haze vavambapachishile. (Vili. 8:14-17) Kolonelyu navaze vakuzuvo yenyi vavawavishile shimbu kanda vavambapachise, kaha chuma kana chapwile chakulipwila.—Vili. 10:44-48.
5. Kweseka nachisoneka chaWavaka-Kolinde 2, 1:21, 22, vyuma muka vyeji kusolokanga nge mutu vanamuwavisa?
5 Tushimutwilenu nawa havyuma vyeji kusolokanga nge mutu vanamuwavisa nashipilitu yajila. Hakavanga, vatu vamwe cheji kuvakaluhwilanga kwitavila ngwavo Yehova navasakula. Veji kulihulisanga ngwavo, ‘Mwomwo ika Kalunga nangusakwila?’ Oloze veka kavashinganyeka ngochoko. Kaposetolo Paulu alumbunwine vyuma vyeji kusolokanga kuvatu nge vanavawavisa. Ambile ngwenyi: “Omu mwetavile, vamihakile katachikijilo * kuhichila muli ikiye nashipilitu yajila yize vashikile, yize yinapu chijikilo chauswana wetu wakulutwe.” (Efwe. 1:13, 14) Ngocho, Yehova eji kuzachisanga shipilitu yenyi yajila mangana ava vaka-Kulishitu vatachikize ngwavo navasakula vakaye mwilu. Shikaho, shipilitu yajila yapwa “chijikilo,” chipwe unjiho wakusolola nge navakayoyela mwilu haya myaka yosena, keshi hano hamavuko.—Tangenu Wavaka-Kolinde 2, 1:21, 22.
6. Chuma muka atela kulinga muka-Kulishitu wakuwavisa numba akatambule fweto yenyi?
6 Nge muka-Kulishitu vanamuwavisa, kutala echi chalumbununa nge chikupu vene mwakatambula fweto yenyi tahi? Nduma. Eji kutachikizanga chikupu ngwenyi mwakaya mwilu. Oloze atela kwanukanga mazu akwamba ngwavo: “Enu vandumbwami, zatenu chikuma nangolo mangana kumisanyika chize vamisanyika nakumisakula chize vamisakula vizame mbe muli enu, mwomwo kachi nge namulinganga vyumevi, kaha chikupu vene kamweshi kwiza kukalimbukako.” (Petu. 2, 1:10) Ngocho muka-Kulishitu himuka-Kulishitu uze vawavisa katela kwechelela chuma numba chimwe chimuhonese kuzachila Yehovako. Numba tuhu vanamusanyika kuya mwilu, oloze atela kutwalaho lika kupwa wakushishika numba akatambule fweto yenyi.—Fwili. 3:12-14; Hepe. 3:1; Kuso. 2:10.
UNO MUTU EJI KUTACHIKIZANGA NGACHILIHI?
7. Uno mutu eji kutachikizanga ngachilihi ngwenyi vanamusakula akaye mwilu?
7 Uno mutu eji kutachikizanga ngachilihi ngwenyi vanamusakula akaye mwilu? Kukumbulula tunahase kuchiwana mumazu ahanjikile Paulu kuli vandumbwenyi vawavisa vamuLoma, vaze ‘vasanyikile nakupwa vaka-kujila.’ Avalwezele ngwenyi: “Enu kamwatambwile shipilitu yaundungo yakumivwisa cheka womako, oloze mwatambwile shipilitu yakumitavila kupwa muvana, yize tweji kutambakananga nayo ngwetu: ‘Apa, Ove Tata!’ Shipilitu yivene yeji kuhananga unjiho nashipilitu yetu ngwayo tuvana vaKalunga.” (Loma 1:7; 8:15, 16) Shikaho, Kalunga eji kuzachisanga shipilitu yenyi yajila nakuhana mutu unjiho wakusolola hatoma nge vanamusakula mangana akaye mwilu.—Teso. 1, 2:12.
8. Uno chisoneka chaWaYowano 1, 2:20, 27 chasolola ngachilihi ngwacho muka-Kulishitu kasakiwa kumulweza kumutu weka ngwenyi vanamuwavisako?
8 Yehova eji kuvakunyulanga hakuvahana unjiho wakutamo, wakusolola nge navakaya nakuyoyela mwilu. (Tangenu WaYowano 1, 2:20, 27.) Vaka-Kulishitu vawavisa navakiko vasakiwa kuvanangula kuli Yehova ngana mwavatu vosena. Oloze kavasakiwa mutu wakuvalweza ngwenyi chikupu vene vanavawavisako. Yehova eji kuzachisanga shipilitu yenyi yajila, yize yapwa ngolo jajinene, mangana ahane unjiho wakusolola ngwenyi chikupu vene vatu kana vanavawavisa.
‘VASEMUKA CHEKA’
9. Kweseka nachisoneka chaWavaka-Efwesu 1:18, vyuma muka vyeji kwalumukanga kuli mutu nge vanamuwavisa?
9 Hakuwana nge vangamba jaKalunga vavavulu makumbi ano kavapwa vakuwavisako, ngocho chinahase kuvakaluhwila kwivwishisa kanawa vyuma vyeji kusolokanga kumutu nge vanamuwavisa. Kalunga atengele vatu vatwamenga hano hamavu haya myaka yosena, keshi mwiluko. (Kupu. 1:28; Samu 37:29) Oloze Yehova asakula vamwe hamavu mangana vakaye mwilu. Ngocho, nge Kalunga navawavisa eji kuvalingisanga vatalilile kukayoyela mwilu, nakwalumuna nawa vishinganyeka vyavo hahaze vene.—Tangenu Wavaka-Efwesu 1:18.
10. Uno ‘kusemuka cheka’ chalumbununa ika? (Talenu nawa kwinyikila chamwishi.)
10 Nge vaka-Kulishitu vanavawavisa nashipilitu yajila, veji ‘kusemukanga cheka,’ chipwe ngwetu ‘kusemuka kufuma mwilu.’ * Mazu ahanjikile Yesu asolola nge chapwa chachikalu mutu uze vanawavisa kulumbunwina mutu uze kavawavisako omwo chapwa ‘kusemuka cheka’ chipwe ngwetu ‘kusemuka kufuma mwilu.’—Yowa. 3:3-8, kwinyikila chamwishi.
11. Lumbununenu omu vishinganyeka vyamutu vyeji kwalumukanga nge vanamuwavisa.
11 Uno nge muka-Kulishitu vanamuwavisa, vishinganyeka muka vyeji kwalumukanga? Shimbu kanda vaka-Kulishitu vavawavise, vatalililile kukayoyela hamavu haya myaka yosena. Vafwililile kukamona omu Yehova mwakafumisako vyuma vyavipi vyosena nakulingisa mavu kupwa palachise. Pamo vashinganyekelenga kukamona cheka vausoko wavo namasepa javo vaze vafwa. Oloze omu vavawavishile, vishinganyeka vyavo vyalumukile. Mwomwo ika? Kavalumwine vishinganyeka vyavo mwomwo yakuhona kusuuluka nalutalililo lwavo lwakuyoyela hamavu, chipwe mwomwo yakuhomba nakuyandako. Kaha nawa kavashinganyekelenga ngwavo navakevwa uli kuyoya haya myaka yosena hano hamavuko. Oloze Yehova azachishile shipilitu yenyi yajila yalumune vishinganyeka vyavo nalutalililo lwavo.
12. Kweseka namazu vasoneka hali WaPetulu 1, 1:3, 4, uno vaka-Kulishitu vawavisa veji kwivwanga ngachilihi halutalililo lwavo?
12 Mutu uze vanawavisa nahase kulivwa ngwenyi katelemoko. Chipwe ngocho, eji kutachikizanga chikupu ngwenyi Yehova ikiye namusakula. Eji kuwahililanga nakusakwilila chikuma hawana kana.—Tangenu WaPetulu 1, 1:3, 4.
13. Uno vaka-Kulishitu vawavisa veji kwivwanga ngachilihi hakuyoya chavo chahano hamavu?
13 Uno echi chalumbununa nge vawavisa vasaka kufwa tahi? Kaposetolo Paulu akumbulula chihula kana. Afwanyishile mijimba yavo yautu kumbalaka. Kaha ambile ngwenyi: “Chikupu vene etu tuli mumbalaka yino, tweji kulikemenenanga hakuwana nge tunalemuwa, mwomwo etu katwasakile ngwetu tuzule mbalaka yinoko, oloze ngwetu tuvwale yeka, mangana echi cheji kufwanga vachimine kuli kuyoya.” (Koli. 2, 5:4) Ava vaka-Kulishitu kavasaka kufwa washiko. Veji kulivwisanga kuwaha kuyoya, kaha vasaka kuzachila Yehova hakumbi hakumbi hamwe kaha najitanga javo namasepa javo. Chipwe ngocho, veji kwanukanga vyuma avashika Kalunga, chamokomoko navyuma vali nakulinga oholyapwa.—Koli. 1, 15:53; Petu. 2, 1:4; Yowa. 1, 3:2, 3; Kuso. 20:6.
UNO YEHOVA NAMIWAVISA TAHI?
14. Vyuma muka vize kavyasolola nge mutu vanamuwavisako?
14 Pamo muli nakukakasana numba nge Yehova namiwavisa nyi chiku. Nge mukiko, kaha lihulisenu vihula vino vyavilemu: Kutala mwafwila kuzachila chikuma Yehova tahi? Kutala mwamona ngwenu mweji kuzatanga natwima mumulimo wakwambulula tahi? Uno mweji kulinangulanga chikuma Mazu aKalunga ‘navyuma vyakujiminyina vyaKalunga’ tahi? (Koli. 1, 2:10) Kutala mwamona ngwenu Yehova ali nakumikafwa mufukile mumulimo wakwambulula tahi? Kutala mwazanga chikuma vakwenu nakufwila kuvakafwa vazachile Yehova tahi? Uno mukwechi unjiho wakusolola nge Yehova namikafwe mujijila jimwe mukuyoya chenu tahi? Kachi nge munakumbulula vihula vyosenevi ngwenu eyo, kutala chinalumbununa nge vanamiwavisa tahi? Nduma. Mwomwo ika? Mwomwo mukiko vanahase kwivwa vangamba jaKalunga vosena, numba vapwa vakuwavisa chipwe chiku. Kaha nawa Yehova nahase kuzachisa shipilitu yajila hakukafwa vangamba jenyi vosena valinge vyuma kana. Kachi nge muli nakuhuhwasana numba nge vanamiwavisa nyi chiku, kaha tachikizenu ngwenu kavamiwavisako. Vatu vaze asakula Yehova kavahuhwasanako. Vatachikiza chikupu ngwavo, vavawavisa.
Yehova ahanyine Apalahama, naSala, naNdavichi, naYowano Muka-kumbapachisa shipilitu yenyi yajila mangana valinge vyuma vyakukomwesa, oloze kavapwile vakuwavisako (Talenu palangalafu 15-16) *
15. Uno twatachikiza ngachilihi ngwetu keshi vosena vaze veji kutambulanga shipilitu yaKalunga vavasanyika kuya mwiluko?
15 MuMbimbiliya vavulukamo vatu vakushishika vaze Yehova ahanyine shipilitu yenyi yajila, oloze kavapwile nalutalililo lwakuyoyela mwiluko. Ndavichi nayikiye vamutetekelele nashipilitu yajila. (Samwe. 1, 16:13) Shipilitu yajila yamukafwile atachikize kanawa vyuma vyakujiminyina vyaYehova nakumutwaminyina asoneke mikanda yimwe yamuMbimbiliya. (Mako 12:36) Chipwe ngocho, kaposetolo Petulu ambile ngwenyi, Ndavichi “kayile mwiluko.” (Vili. 2:34) Yowano Muka-kumbapachisa nawa ‘azalile nashipilitu yajila.’ (Luka 1:13-16) Numba tuhu Yesu ambile ngwenyi kakweshi mutu wakuhambakana Yowanoko, oloze ambile nawa ngwenyi Yowano keshi kukapwa muWangana wamwiluko. (Mateu 11:10, 11) Yehova ahanyine ava malunga shipilitu yenyi yajila mangana valinge vyuma vyakukomwesa, oloze kavapwile vakuwavisako. Uno echi chalumbununa nge kavapwile vakushishika ngana vaze navakayula mwiluko tahi? Nduma. Yehova mwakavasangula vakayoye cheka muPalachise hano hamavu.—Yowa. 5:28, 29; Vili. 24:15.
16. Lutalililo muka vatwama nalwo vangamba jaKalunga vavavulu makumbi ano?
16 Vangamba jaKalunga vavavulu makumbi ano kaveshi kukaya mwiluko. Oloze vatalilila kukayoyela hano hamavu ngana mwaApalahama, naSala, naNdavichi, naYowano Muka-kumbapachisa, navatu veka vaze vasoneka muMbimbiliya, omu naukayula Wangana waKalunga.—Hepe. 11:10.
17. Vihula muka natushimutwila muchihande nachikavangizaho?
17 Hakuwana nge vawavisa vamwe vachili hano hamavu, ngocho tunahase kulihulisa vihula vyavivulu. (Kuso. 12:17) Chakutalilaho, uno vaze vawavisa vatela kulimona ngachilihi? Uno mwatela kumona ngachilihi mutu uze mwaputuka kulya mbolo nakunwa vinyo haKwanuka Kufwa chaMwata muchikungulwilo chenu? Kutala mwatela kulizakamina kachi nge vaze vali nakulya mbolo nakunwa vinyo vali nakuvulilako tahi? Vihula kana natuvikumbulula muchihande nachikavangizaho.
^ par. 5 Kufuma vene haPendekoseta mu 33 C.E., Yehova nahanenga vaka-Kulishitu vamwe lutalililo lwakukayula hamwe naMwanenyi mwilu. Uno ava vaka-Kulishitu veji kutachikizanga ngachilihi ngwavo vali nalutalililo kanelu? Vyuma muka vyeji kusolokanga nge mutu vanamusakula akaye mwilu? Vihula kana navavikumbulula muchihande chino. Kaha nawa chino chihande chinalifwane nachize chapwile muKaposhi Kakutalila waJanuary 2016.
^ par. 2 MAZU VANALUMBUNUNA: Kuwavisa nashipilitu yajila: Yehova eji kuzachisanga shipilitu yenyi yajila hakusakula mutu akayule naYesu mwilu. Shipilitu kana yapwa unjiho wakusolola nge mutu kana vanamufwelelesa kukayoyela mwilu, chipwe ngwetu vanamuhane “chijikilo.” (Efwe. 1:13, 14) Ava vaka-Kulishitu vetavila chikupu ngwavo shipilitu yajila “yeji kuhananga unjiho,” chipwe ngwetu yeji kuvakunyulanga vatachikize ngwavo navakayoyela mwilu.—Loma 8:16.
^ par. 5 MAZU VANALUMBUNUNA: Katachikijilo. Nge mutu vanamulamika katachikijilo kana kachalumbununa nge kunahu mwakatambula fweto yenyiko, kuvanga kaha nge mwatwalaho lika kupwa wakushishika swi nakukufwa chenyi chipwe kuluyando lwalunene.—Efwe. 4:30; Kuso. 7:2-4; talenu chihande chakwamba ngwavo, “Vihula Vyakufuma Kuli Vaka-Kutanga” muKaposhi Kakutalila waChingeleshi waApril 2016.
^ par. 10 Talenu Kaposhi Kakutalila waJuly 1, 2009, mafwo 3-12, uze alumbunwine omwo chapwa ‘kusemuka cheka.’
MWASO 27 Kusolola Vana vaKalunga
^ par. 57 MAZU AKULUMBUNUNA MUVWIMBIMBI: Numba tuhu vanatukase mukamenga, numba tupwa nalisesa lyakwambulula, tunahase kutalilila kukayoyela hano hamavu omu Wangana waKalunga naukayulanga.
