CHIBAABA CHAKUDIZA 4
“Spiritu Yeniyi Yashimunaña Wunsahu”
“Spiritu yeniyi yashimunaña wunsahu hamu naspiritu yetu nawu tudi anyana kaNzambi.”—ROM. 8:16.
KAMINA 25 Himuza Walema
NSAÑU YIDI MUCHIBAABA *
Yehova wechilili spiritu yindi yajila hadi izanvu dawakwaKristu akushika ku 120 muchihayamisha haPentekosta (Talenu maparagilafu 1-2)
1-2. Chumanyi chakuhayamisha chamwekeni haPentekosta 33 C.E.?
HADIÑA HAMULUNGU nantetemena muYerusalema. Mwadiña mu 33 C.E., haPentekosta. Izanvu dawatumbanji 120 dapompeli mukapeka kahewulu mwitala. (Yil. 1:13-15; 2:1) Henohu kanda apompi, Yesu wayilejeli kushala muYerusalema kulonda akatambwili chawana. (Yil. 1:4, 5) Chumanyi chahiñilihu?
2 “Hohenohu mwiwulu mwafumini lushindu neyi lwampepela yinakukunka nañovu.” Lushindu lwatiyakeni mwitala mwejima. Kuhiñahu, “madimi amwekeneña neyi nyizuzu yakesi” amwekeneni hanyitu yawatumbanji “nawa wejima wawu enzeli naspiritu yajila.” (Yil. 2:2-4) Muniyi njila yakuhayamisha, Yehova wechilili spiritu yindi yajila hadi ona mukanka. (Yil. 1:8) Dichi ekalili atachi kuyiwayisha naspiritu yajila * nikwikala nakuchiñeja kwakuyuula hamu naYesu mwiwulu.
YUMANYI YAMWEKANAÑA NEYI MUNTU ANAMUWAYISHI?
3. Muloñadi antu adiña haPentekosta chabuliliwu kujinoka nawu ayiwayishili naspiritu yajila?
3 Neyi ninenu mwadiña hakachi kanana atumbanji adiña mukapeka kahewulu hadina ifuku, himwadi kavulamenaku. Chuma chamwekeneña neyi muzuzu wakesi chenjili hamutu wenu nawa mwatachikili nikuhosha mwidimi dacheñi! (Yil. 2:5-12) Himwadi kujinoka nenu anayiwayishi naspiritu yajilaku. Komana antu ejima awayishañawu naspiritu yajila ayiwayishaña muchihayamisha nawa hampinji yoyimu? Inehi. Tuneluki ñahi?
4. Komana awayishewa ejima amumafuku awapostolu ayiwayishili hampinji yoyimu? Lumbululenu.
4 Tuhanjekenu mpinji yinateli kumuwayishawu muntu. Bayi neyi izanvu dawakwaKristu akushika ku 120 diwu awayishiliwu naspiritu yajila haPentekosta, 33 C.E hohuku. Ilaña hadodina ifuku, antu akushika ku 3,000 niwena atambwilili spiritu yajila yayikaniniwu. Ayiwayishili hampinji yayipapatishiliwu. (Yil. 2:37, 38, 41) Ilaña yaaka yahiñilihu, akwaKristu awayishewa ejima hiyayiwayishili hefuku dakuyipapatishaku. A Samariya ayiwayishili hanyima yakupapatishewa. (Yil. 8:14-17) Kwambukaku, Konelisu niantu amwitala dindi wena ayiwayishili henohu kanda apapatishewi.—Yil. 10:44-48.
5. Kwesekeja na 2 Akorinda 1:21, 22, chumanyi chamwekanaña neyi muntu anamuwayishi naspiritu yajila?
5 Tuhanjekenu cheñi chuma chamwekanaña neyi muntu anamuwayishi naspiritu yajila. Amakwawu neyi dihu hanayiwayishiwu, chayikalilaña kwiteja nawu Yehova nayitondi. Anateli kudihula nawu, ‘Muloñadi Nzambi chinantondeliyi?’ Amakwawu dichatiyañawu wanyi. Hichidi namuloña nachinateli kutiyayi muntuku, kapostolu Pawulu walumbulwili chamwekanaña kudi antu ejima awayishewa nindi: “Chimwakuhweleleli, ayilamikili * kuhitila mudi yena naspiritu yajila yakaniniwu, oyu yekala chinjikijilu chawuswana wetu wakumbidi.” (Efwe. 1:13, 14; tth.) Dichi, Yehova wazatishaña spiritu yindi yajila hakuyimwekeshela hatooka awa akwaKristu nindi nayitondi. Muniyi njila, spiritu yajila ‘dichilamiku’ chayimwekeshelañayi nawu kumbidi akashakama mwiwulu bayi hamasekiku.—Tañenu 2 Akorinda 1:21, 22.
6. Chumanyi chatela kwilayi mukwaKristu wawayishewa hakwila nawu yakatambwili wuloku windi wamwiwulu?
6 Neyi mukwaKristu anamuwayishi, komana chinayi mukwila nawu wakashikena kutambula wuloku windi wamwiwulu? Inehi. Welukaña chikupu nindi anamutondi kuya mwiwulu. Hela chochu, watela kwanukaña kusoñamisha kwakwila nawu: “Enu anakwami, zatenu nañovu kulonda mukwatishi kukukooleka kwenu kwakuyitambika nikwakuyitonda, muloña neyi mutwalekahu kubombelaku iyi yilwilu, chakadi nikujina mwakakañanya wanyi.” (2 Pet. 1:10) Hela chakwila mukwaKristu wawayishewa anamutondi hela natambwili mutambi wakuya mwiwulu, wakatambwila wuloku windi chiña hohu neyi yatwalekahu kwikala washinshika.—Fwi. 3:12-14; Heb. 3:1; Chim. 2:10.
MUNTU WELUKAÑA ÑAHI NINDI ANAMUWAYISHI?
7. Awayishewa elukaña ñahi nawu anayitondi kuya mwiwulu?
7 Hanu dinu muntu welukaña ñahi nindi anamutondi kuya mwiwulu? Ñakwilu yidi mumazu asonekeleliyi Pawulu antu amuRoma ‘ateneneñawu kwikala ajila.’ Wayilejeli nindi: “Himwatambwili spiritu yawuduñu yakuyitiyisha cheñi womaku, ilaña mwatambwili spiritu yakuyiteja kwikala anyana, nawa spiritu yeniyi diyi yatuleñelaña tubidikeña netu: ‘Aba, Tata!’ Spiritu yeniyi yashimunaña wunsahu hamu naspiritu yetu nawu tudi anyana kaNzambi.” (Rom. 1:7; 8:15, 16) Nzambi wazatishaña spiritu yindi yajila nakumwekeshela muntu wawayishewa hatooka nindi namutondi kuya mwiwulu.—1 Tes. 2:12.
8. 1 Yowanu 2:20, 27 yamwekeshaña ñahi nawu akwaKristu awayishewa akeñekaña wanyi muntu wakuyileja nawu awayishewa?
8 Yehova wayilejaña hatooka awa antu nindi nayitondi kulonda akayi mwiwulu. (Tañenu 1 Yowanu 2:20, 27.) Hela chochu, akwaKristu awayishewa atela kuyidizisha kudi Yehova neyi chadizishañayi antu ejima kuhitila muchipompelu. Ilaña akeñekaña wanyi muntu wakuyileja nawu awayishewa. Yehova wazatishaña ñovu yindi yazatikaña, dikwila nawu spiritu yajila, nakuyimwekeshela hatooka to-o nindi nayiwayishi!
‘ANAVWALIKI KAMUCHIYEDI’
9. Kwesekeja na Aefwesesa 1:18, neyi muntu anamuwayishi, yumanyi yahimpikaña?
9 Chinateli kuyikalila ambuña aNzambi makonu kwiluka chamwekanaña neyi muntu anamuwayishi kudi Nzambi. Muloñadi? Muloña wena ayiwayisha wanyi. Nzambi waleñeli antu kulonda akashakameña haya nyaaka hamaseki bayi mwiwuluku. (Kutach. 1:28; Mas. 37:29) Ilaña Yehova watonda amakwawu kuya nakushakama mwiwulu. Dichi neyi nayiwayishi, wahimpaña chatoñojokañawu nikuchiñeja kwawu kulonda atalileña wumi wamwiwulu.—Tañenu Aefwesesa 1:18.
10. “Kuvwalika kamuchiyedi” kwatalisha mudihi? (Talenu cheñi tumazu twaheshina.)
10 Neyi akwaKristu anayiwayishi naspiritu yajila, ‘avwalikaña kamuchiyedi’ hela “kuvwalika kufuma mwiwulu.” * Yesu wamwekesheli cheñi nindi chapela wanyi kumulumbulwila muntu wabula kuwayishawu chichatiyakanaña “kuvwalika kamuchiyedi” hela ‘kuvwalika kudi spiritu.’—Yow. 3:3-8; tth.
11. Lumbululenu chahimpikaña yitoñojoka yamuntu neyi anamuwayishi.
11 Yitoñojoka yawakwaKristu yahimpikaña ñahi neyi anayiwayishi? Henohu Yehova kanda yayitondi awa akwaKristu, adiña nakuchiñeja kwakushakama hamaseki haya nyaaka. Achiñejeleña mpinji yakafumishahu Yehova kutama kwejima nakwilisha iseki kwikala paradisa. Hadaha adiña nakufwikija chakakinkililañawu antaña hela amabwambu jawu afwili dehi. Ilaña hanyima yakwila anayiwayishi dehi, ahimpili yitoñojoka yawu. Yitoñojokanyi? Hiyatachikili kutoñojoka nawu kushakama hamaseki haya nyaaka kwamukunkulwayiku. Hiyahimpili yitoñojoka yawu nawu muloña adiña nakuneña nikukabakanaku. Hiyatoñojokeleña nawu kushakama haya nyaaka hamaseki kukaletaña wudiku. Ilaña Yehova diyi wazatishili spiritu yindi yajila kuhimpa yitoñojoka yawu nikuchiñeja kwawu.
12. Kwesekeja na 1 Petulu 1:3, 4, akwaKristu awayishewa atiyaña ñahi nakuchiñeja kwawu?
12 Muntu anawayishiwu nateli kutoñojoka nindi washikilamu wanyi kutambwila iwu wuloku. Ilaña wajinokaña wanyi nindi Yehova namutondi. Wazañalalaña nikusakilila neyi nakutoñojoka hakuchiñeja kwindi kwakuya mwiwulu.—Tañenu 1 Petulu 1:3, 4.
13. Awayishewa atiyaña ñahi kushakama hanu hamaseki?
13 Komana chinayi mukwila nawu awayishewa akeñaña kufwa swayi? Kapostolu Pawulu wakwili ilu lwihu. Wesekejeli nyijimba yawu yawuntu ‘netenti,’ nindi: “Kafwampi, etu tudi munidi itenti twaabaña, twatiyaña kulema, muloña hitwakeñaña kudivuula idi itentuku, ilaña tunakukeña kuvwala dikwawu, kulonda iwu mujimba wafwaña awuminyi kudi wumi wahaya nyaaka.” (2 Kor. 5:4) Awa akwaKristu hiyatiyaña kutama kushakama hanu hamaseki chakwila akeñeña kufwa swayiku. Kwambukaku, atiyaña kuwaha kuhanda nawa akeñaña kuzata mafuku ejima kulonda amukalakeleña Yehova hamu nayisaka yawu niamabwambu jawu. Hela chochu, hichikweti muloña nayuma yinakwilawuku, anukaña kuchiñeja kwawu kwayuma yayiwahi yakumbidi.—1 Kor. 15:53; 2 Pet. 1:4; 1 Yow. 3:2, 3; Chim. 20:6.
KOMANA NINENU YEHOVA WAYIWAYISHA?
14. Yumanyi yabulaña kumwekesha nawu muntu anamuwayishi naspiritu yajila?
14 Hadaha munakujinoka neyi chakwila ninenu ayiwahisha naspiritu yajila. Neyi dimu, toñojokenu hanawa malwihu alema: Komana mukweti iyena dakwila nkeñelu yaYehova? Komana mwazataña neyena mumudimu wakushimwina? Komana mwadizaña chikupu Bayibolu nikwiluka “yuma yakunama yaNzambi”? (1 Kor. 2:10) Komana mwatiyaña nenu Yehova nayikwashi kuleta antu amavulu muchalala? Komana mwatiyaña nenu mukweti mudimu wakukwasha amakwawu kumukalakela Yehova? Komana munamoni chikupu nenu Yehova nayikwashi munjila jashiyashana muwumi wenu? Neyi ñakwilu yenu yidi nawu eña kunawa malwihu, komana chinayi mukwila nawu anayitondi kuya mwiwulu? Inehi. Muloñadi? Muloña antu jaNzambi ejima atiyaña chochimu, chili awayishewa hela nehi. Nawa Yehova wazatishaña spiritu yindi yajila kwinka ambuña indi ejima ñovu yoyimu, hichikweti muloña nakuchiñeja kukwetiwuku. Neyi munakujinoka neyi chakwila ayiwayisha naspiritu yajila hela nehi, dikwila nawu ayiwayisha wanyi. Antu atondawu kudi Yehova ajinokaña wanyi! Elukaña chikupu!
Yehova wazatishili spiritu yindi yajila hadi Abarahama, Sara, Davidi niYowanu Mupapatishi kulonda yiyikwashi kukoña nyidimu yakuhayamisha, ilaña hazatishili spiritu yindi nakuyitonda kuya nakushakama mwiwuluku (Talenu maparagilafu 15-16) *
15. Tuneluki ñahi netu antu ejima atambwila spiritu yaNzambi ayitonda kuya mwiwulu wanyi?
15 MuBayibolu mwekala yakutalilahu yawantu amavulu adiña nachikuhwelelu atambwilili spiritu yajila yaYehova, ilaña adiña wanyi nakuchiñeja kwakuya mwiwulu. Davidi amulombweli naspiritu yajila. (1 Sam. 16:13) Spiritu yajila yamukwashili kwiluka yuma yakunama hadi Yehova nawa yamukwashili kusoneka nyikanda yikwawu muBayibolu. (Maku 12:36) Hela chochu, kapostolu Petulu wahosheli nindi Davidi “hayili mwiwuluku.” (Yil. 2:34) Yowanu Mupapatishi ‘wenzeli naspiritu yajila.’ (Luka 1:13-16) Yesu wahosheli nindi hikwadiña muntu wamubadikili Yowanuku, ilaña wahosheli cheñi nindi Yowanu wakekala wanyi muWanta wamwiwulu. (Mat. 11:10, 11) Yehova wazatishili spiritu yindi yajila hadi awa antu kulonda yiyikwashi kukoña nyidimu yakuhayamisha, ilaña hazatishili spiritu yindi nakuyitonda kuya nakushakama mwiwuluku. Komana chinayi mukwila nawu chikuhwelelu chawu chadiña chantesha kubadika antu atondañawu nakuya mwiwulu? Inehi. Ilaña, Yehova wakayisañula nakushakama muParadisa hamaseki.—Yow. 5:28, 29; Yil. 24:15.
16. Wulokwinyi watalilañawu ambuña aNzambi makonu?
16 Ambuña aNzambi amavulu makonu ekala wanyi nakuchiñeja kwakushakama mwiwulu. Antu adi neyi Abarahama, Sara, Davidi, Yowanu Mupapatishi niamayala nawambanda akunyima, akashakama hamaseki hampinji yakayuulaña Wanta waNzambi.—Heb. 11:10.
17. Malwihwinyi itukahanjeka muchibaaba chinalondeluhu?
17 Chineli nimakonu tuchidi nawawayishewa, tunateli kudihula malwihu. (Chim. 12:17) Chakutalilahu, awayishewa atela kudimona ñahi? Neyi muntu wamuchipompelu chenu yatachika kuda kuyifwikija haChanukishu, mwatela kumumona ñahi? Indi neyi antu awayishewa anakuvulilaku, mukwila ñahi? Komana mwatela kwakamena? Tukakula awa malwihu muchibaaba chinalondeluhu.
^ para. 5 Kufuma tuhu haPentekosta 33 C.E., kushika niyinu mpinji, Yehova wayinka akwaKristu amakwawu kuchiñeja kwakuyuula hamu naMwanindi mwiwulu. Hanu dinu, awa akwaKristu elukaña ñahi nawu anayitondi? Yumanyi yamwekanaña neyi muntu yatambwila iwu mutambi? Achinu chibaaba chinashindameni hachibaaba chidi mu Kaposhi Kakutalila ka January 2016. Chikwakula awa malwihu.
^ para. 2 MWATALISHA IDI IZU: Kuwayisha naspiritu yajila: Yehova wazatishaña spiritu yindi yajila kutonda nachu muntu kulonda yakayuuli hamu naYesu mwiwulu. Kuzatisha spiritu yindi, Nzambi wamukanaña muntu yuma yakumbidi hela “chinjikijilu.” (Efwe. 1:13, 14) Awa akwaKristu anateli kuhosha nawu spiritu yajila “yashimunaña wunsahu,” hela yayilejaña nawu wuloku wawu wekala mwiwulu.—Rom. 8:16.
^ para. 5 MWATALISHA IDI IZU: Chilamiku. Ichi chilamiku hichahaya nyaakaku, chiña hohu neyi muntu yatwalekahu kwikala washinshika kushika nimpinji yakufwa hela yalukadi lwasweja.—Efwe. 4:30; Chim. 7:2-4; talenu “Malwihu Kufuma Kudi Antañi” muKaposhi Kakutalila ka April 2016.
^ para. 10 Neyi munakukeña kwilukilahu yuma yikwawu mwatalisha “kuvwalika kamuchiyedi,” talenu Kaposhi Kakutalila ka May 1, 2009, ifu. 4.
KAMINA 27 Kumwekesha Anyana kaNzambi
^ para. 57 KULUMBULULA MWEVULU: Hela chakwila tudi mukaleya muloña wakashinshi ketu hela twakasunuka kushimwina nikutañisha antu chalala, twatela kutalila mpinji yitukashakamaña hamaseki hampinji yakayuulaña Wanta waNzambi.
