1-2. C.E. 33 Pentikost nîah eng thil mak tak nge thleng?

JERUSALEM khuaah Chawlhni tûk a ni a. Chumi nî chu C.E. 33 Pentikost nî a ni. Zirtîr 120 vêl chu in pakhata pindan chungnungah an awm khâwm a. (Tirh. 1:13-15; 2:1) Chumi hma nîahte chuan, Isua’n anni chu thilpêk danglam tak dawng tûr an nih avângin, Jerusalem khuaa awm reng tûrin a hrilh a ni. (Tirh. 1:4, 5) A hnuah eng thil nge thleng?

² “Thâwklehkhatan vân ata ri, thlipui tleh angin a lo thleng ta phut a.” Chu ri chuan an awm khâwmna in chu a tikhat ta vek a. Tichuan, ‘lei te chu mei angin’ zirtîrte chungah a chuang ṭheuh va, an zain “thlarau thianghlimin an khat ta vek a.” (Tirh. 2:2-4) Chutiang kawng mak tak chuan, Jehova’n a thlarau thinghlim chu an chungah a leih a ni. (Tirh. 1:8) Anni chu thlarau thianghlima hriak thih * hmasak berte niin, vânah Isua nên rorêl tûra beiseina pêk an ni.

3. Engvângin nge Pentikost nîa pindan chungnunga awmte chuan thlarau thianghlima hriak thih an ni tih an rinhlelh loh?

³ Chumi nia pindan chungnunga awm zirtîrte zîngah tel ta la, chu thilthleng chu i theihnghilh ngai lo vang. Lei ang tak mei alh chu i lu chungah awmin, ṭawng dangin thu i sawi ṭan ta  a! (Tirh. 2:5-12) Thlarau thianghlima hriak thih i ni tih chu i ringhlel hauh lo vang. Mahse, thlarau thianghlima hriak thih zawng zawngte chuan hriak thih an nihna chu mak danglam takin an dawng vek em? Dawng vek lo. Engtin nge kan hriat? Eng hunah nge hriak thih an nihna chu an dawn?

4. Kum zabi khatnaa hriak thih zawng zawngte chu a ruala hriak thih an ni em? Hrilhfiah rawh.

⁴ Mi tuemaw hriak thih a nih hun chu i lo ngaihtuah ang u. Chûng Kristian 120 vêlte chu C.E. 33 Pentikost nîa thlarau thianghlima hriak thih awm chhun an ni lo. Chumi ni vêk chuan, mi dang 3,000 vêl pawhin Isua’n pêk a tiam thlarau thianghlim chu an dawng a. Hriak thih an nihna chu baptisma an chan hunah a thleng a ni. (Tirh. 2:37, 38, 41) Mahse, chumi hnu kumahte chuan, hriak thih Kristian zawng zawngte’n hriak thih an nihna chu baptisma an chan hunah an dawng vek lo. Samari mite chu baptisma an chan hnu hun engemaw chen a liam hnuah hriak thih an ni. (Tirh. 8:14-17) Baptisma an chan hmaa Kornelia leh a chhûngte hriak thih an ni chu danglam tak a ni.—Tirh. 10:44-48.

5. Korinth thawn hnih 1:21, 22-a sawi angin, mi chu thlarau thianghlima hriak thih a nih hunah eng thil nge thleng?

⁵ Mi tuemaw thlarau thianghlima hriak thih a nih huna thilthleng chu i lo ngaihtuah ang u. Hriak thih ṭhenkhat chuan Jehova thlan an ni chu atîrin pawm harsa an ti mai thei a. ‘Engvângin nge Pathianin mi thlan?’ tiin an ngaihtuah mai thei a ni. Mi dangte chuan chutiang chuan an chhâng lêt lo pawh a ni thei. A enga pawh chu ni se, tirhkoh Paula chuan hriak thih zawng zawngte chunga thilthleng chu heti hian a hrilhfiah a ni: “Rin pawh in rin hnuin, amahah chuan thlarau thianghlim tiam chuan chhinchhiahin * in awm kha. Chu chu . . . kan roluahna tûra zakhamna a ni,” tiin. (Eph. 1:13, 14) Chuvângin, Jehova chuan chûng Kristiante chu a thlang tih a thlarau thianghlim hmangin a hriat chiantîr a. Chutiang kawng chuan, nakinah leiah ni lovin, vânah chatuanin an  nung dâwn tih chiang taka inhre tûrin thlarau thianghlim “zakhamna [tiamkamna, a nih loh leh thutiam]” chu a pe a ni.—2 Korinth 1:21, 22 chhiar rawh.

6. Hriak thih Kristian chuan vân lam lâwmman dawng tûrin eng nge a tih ngai?

⁶ Kristian pakhat hriak thih a nih hian, vân lam lâwmman chu a dawng ngei ngei dâwn tihna a ni em? Ni lo ve. Vâna kal tûra thlan a ni tih chu a inhre chiang a. Mahse, he fuihna hi a hre reng tûr a ni: “Unaute u, a kohna leh a thlanna che u chu tinghet tûrin taihmâk chhuah lehzual rawh u; chûng chu in tih [zêl] zawngin engtikah mah in tlu lo vang,” tih hi. (2 Pet. 1:10) Chuvângin, hriak thih Kristian chu vâna kal tûra thlan, a nih loh leh koh pawh ni se, a rinawm reng chauhvin lâwmman pêk a ni ang.—Phil. 3:12-14; Heb. 3:1; Thup. 2:10.

7. Hriak thihte chuan vân kohna an dawng tih engtin nge an inhriat?

⁷ A nih leh, miin vân kohna a dawng tih engtin nge a inhriat? A chhânna chu Rom khuaa hriak thih “mi thianghlima awm tûra kohte” hnêna Paula thusawiah chiang taka hmuh theih a ni. Ani chuan an hnênah: “Hlauva awm leh tûrin bâwih nihna thlarau in hmu a ni si lo va; fa nihna thlarau in hmu a ni zâwk e, chu thlarau avâng chuan ‘Abba! (Ka pa!)’ tiin kan au ṭhin hi. Thlarau ngei chuan keimahni thlarau nên Pathian fate kan ni tih min hriattîr ṭhîn,” tiin a hrilh a. (Rom 1:7; 8:15, 16) Chuvângin, Pathian chuan tuemaw chu vân kohna a dawng tih a thlarau thianghlim hmangin chiang takin a hriattîr a ni.—1 Thes. 2:11-12.

8. Johana thawn khat 2:20, 27-na chuan hriak thih Kristiante’n hriak thih an nih chungchângah tu ma nemngheh an ngai lo tih engtin nge a târ lan?

⁸ Jehova chuan vân kal tûra a sâwmna dawngtute rilru leh thinlungah rin nghehna a neihtîr a. (1 Johana 2:20, 27 chhiar rawh.) Ni e, hriak thih Kristiante chuan mi dangte ang bawkin, kohhran kal tlanga Jehova zirtîrna chu an mamawh a ni. Mahse, hriak thih an ni tih erawh tu ma nemngheh an ngai lo. Jehova chuan hriak thih an ni tih chiang taka inhriatna nei tûrin chakna thiltithei ber, a thlarau thianghlim chu a hmang a ni!

9. Ephesi 1:18-a târ lan angin, tuemaw hriak thih a nih hian ani chuan eng inthlâk danglamnate nge a tawn?

⁹ Tûn laia Pathian chhiahhlawh a tam zâwkte chuan Pathianin tuemaw hriak a thih huna thilthleng chu hriatthiam harsa an ti mai thei. Hriak thih an nih ve loh avângin, chu chu thil pângngai tak a ni. Pathianin mihringte chu vânah ni lovin, leia chatuana nung tûrin a siam a. (Gen. 1:28; Sâm 37:29) Mahse, Jehova’n mi ṭhenkhat chu vâna nung tûrin a thlang a. Chuvângin, hriak a thih hian, vân nunna an beisei theih nân an ngaihtuah dânte leh an beiseinate chu nasa takin a thlâk danglamsak a ni.—Ephesi 1:18 chhiar rawh.

10. ‘Piang thar’ nih awmzia chu eng nge ni? (Footnote en bawk rawh.)

¹⁰ Kristiante chu thlarau thianghlima hriak thih an nih chuan anni chu ‘piang thar,’ a nih loh leh “chung lam aṭanga piang” * an ni a. Isua chuan hriak thih ni lo tuemaw hnênah ‘piang thar,’ a nih loh leh “thlarauva piang” nih dân dik tak chu hrilh fiah theih a ni lo tih a târ lang bawk.—Joh. 3:3-8.

11. Tuemaw hriak thih a nih huna a ngaihtuahna inthlâk danglam dân chu hrilhfiah rawh.

¹¹ Kristiante chu hriak thih an nih hian engtin nge an ngaihtuahna a danglam tâk? Chûng Kristiante chuan, Jehova’n hriak a thih hma  chuan leia chatuana nun beiseina an neih chu an ngaihlu hle a. Pathian Jehova’n suahsualna zawng zawng a tihboral hun tûr leh lei hi paradis-a a siam hun tûr chu an nghâkhlel hle a ni. An chhûngte, leh an ṭhian thi tawh rawn tholehte lo hmuah chu an mitthla mai thei bawk. Mahse, hriak thih an nih hnu chuan an ngaihtuah dân chu a danglam ṭan ta a ni. Engvângin nge? Lei lam beiseinaa lungawina an neih tâwk loh vâng a ni lo. Beidawnna emaw, nasa taka hrehawm tawrhna emaw vânga rilru inthlâk danglam an ni hek lo. Chu bâkah, leia chatuana nun chu a ninawm hle dâwn nia an ngaih avânga an ngaihtuahna thlâk thut an ni lo bawk. Chu aiin, Jehova chuan a thlarau thianghlim hmangin an ngaihtuah dân leh an ngaihhlut tak an beiseina chu a thlâk danglamsak a ni.

12. Petera thawn khat 1:3, 4-a sawi angin, hriak thih Kristiante chu an beiseina avângin engtin nge an awm?

¹² Hriak thih tuemaw chuan chu chanvo hlu tak chu phû lo a inti mai thei a. Mahse, Jehova’n a thlang a ni tih erawh rinhlelhna chhe tê mah a nei lo. Vân lam nun a beiseina a ngaihtuah chuan a thinlung chu hlimna leh lâwmnain a khat zâwk a ni.—1 Petera 1:3, 4 chhiar rawh.

13. Hriak thihte chuan an lei nun chu engtin nge an ngaih?

¹³ Chutiang a nih avângin, hriak thihte chuan thih an duh tihna a ni em? Tirhkoh Paula’n chu zawhna chu a chhâng a. Ani chuan an mihring taksa chu puan in nên khaikhinin heti hian a sawi a ni: “Keini he awmnaa awmte hi rit phurin kan rûm tak zet si a, sin lova awm kan duh vâng a ni lo va, sin thuaha awm kan duh vâng a ni zâwk, thi thei hi nunna lem zawhin a awm theih nân,” tiin. (2 Kor. 5:4) Chûng Kristiante chuan he lei nun hi ninawm an tih avângin thih vat an châk tihna a ni lo. Chumi nêna inkalh takin, anni chuan he leia nun hi nuam an ti a, an chhûngte leh ṭhiante nêna nî tina Jehova rawngbâwl chu an duh a. An thiltih chu engpawh ni se, nakin huna an neih tûr beiseina ropui tak chu an hre reng a ni.—1 Kor. 15:53; 2 Pet. 1:4; 1 Joh. 3:2, 3; Thup. 20:6.

14. Mi chu thlarau thianghlima hriak thih a ni tih engin nge finfiah lo?

¹⁴ Thlarau thianghlima hriak thih i nih leh nih loh i ngaihtuah mai thei. Chutiang a nih chuan, hêng zawhna pawimawh takte hi ngaihtuah ang che: Jehova duh zâwng tihnaah ṭhahnem ngai tak niin i inhria em? A bîk takin, thu hrilh rawngbâwlnaah ṭhahnem ngai tak niin i inhria em? “Pathian thu ril” chungchâng zir nuam titu Bible zirlai taima tak niin i inhria em? (1 Kor. 2:10) Jehova’n i thu hrilh rawngbâwlnaah nasa takin mal a sâwm che niin i inhria em? Mi dangte chu thlarau lama ṭanpui tûra mawhphurhna nei niin i inhria em? I nunah Jehova’n kawng tam takin a ṭanpui che tih finfiahna i hmu em? Chûng zawhnate chu ‘aw’ tia chiang taka i chhâng a nih chuan, chu chu vân kohna i chang ta tihna a ni em? Ni lo. Engvângin nge a nih loh? Hriak thih an ni emaw, ni lo emaw pawh ni se, Pathian chhiahhlawh zawng zawngte chuan chutianga inhriatna an neih theih vâng a ni. Chu bâkah, an beisei chu engpawh ni se, Jehova chuan a chhiahhlawh zawng zawngte chu a thlarau thianghlim hmangin chakna thuhmun a pe thei a ni. Dik tak chuan, thlarau thianghlima hriak thih i nih leh nih loh chungchângah rinhlelhna i nei a nih chuan, chu chu hriak thih i ni lo tihna a ni. Jehova kohna dawngtute chuan hriak thih an nih leh nih loh chungchângah buaina an nei lo! An inhre chiang hle si a!

15. Engtin nge Pathian thlarau dawngtu zawng zawngte chu vâna kal tûra sâwm an ni vek lo tih kan hriat?

 ¹⁵ Bible bu pumah hian, thlarau thianghlim dawng mi rinawm tam tak chanchin a chuang a; mahse, anni chuan vân lam nun beiseina an nei lo. Davida chu thlarau thianghlim kaihhruaiin a awm a. (1 Sam. 16:13) Thlarau thianghlim chuan Jehova chungchâng thu rilte hre thiam tûra a ṭanpui bâkah, Bible-a lehkhabu ṭhenkhat ziak tûrin thlarauva thâwk khum a ni. (Marka 12:36) Chuti chung pawhin, tirhkoh Petera chuan Davida “zawng vânah a lâwn chho lo a ni,” tiin a sawi. (Tirh. 2:34) Baptistu Johana pawh ‘thlarau thianghlimin a khat a.’ (Lk. 1:13-16) Isua chuan Johana aia ropui zâwk tu mah an la awm ngai lo tih sawi mah se, ani chu vân lam Lalramah a tel lo vang tih a sawi bawk. (Mt. 11:10, 11) Jehova’n chûng mite chu thil ropui takte an tihtheih nân a thlarau thianghlim hmangin thiltihtheihna a pe a; mahse, chu thlarau thianghlim hmang chuan vâna kal tûrin a thlang lo. Chu chu vâna rorêl tûra thlante aiin an rinawm tâwk lo tihna a ni em? Ni lo ve. Jehova’n lei Paradis-a nung tûrin a kaitho leh dâwn tihna mai zâwk a ni.—Joh. 5:28, 29; Tirh. 24:15.

16. Tûn laia Pathian chhiahhlawh a tam zâwkte chuan eng lâwmman nge an beisei?

¹⁶ Tûn lai khawvêla Pathian chhiahhlawh a tam zâwkte chuan vân lam nun beiseina an nei lo va. Anni chuan Abrahama te, Sari te, Davida te, Baptistu Johana te, leh Bible hun laia a hmei a pate angin, Pathian Ramin leia ro a rêl huna nun chu an beisei a ni.—Heb. 11:10.

17. A dawta thuziakah eng zawhnate nge kan sawiho vang?

¹⁷ Tûn laiah, Pathian mite zîngah hriak thih ṭhenkhat an la awm avângin, zawhna ṭhenkhat a lo chhuak thei a. (Thup. 12:17) Entîr nân, engtin nge hriak thihte chuan mahni an inthlîr ang? Kohhrana tuemawin Hriatrengna chhang leh uain chu kîl ṭan ta se, engtin nge ani chu kan cheibâwl ang? Chu bâkah, hriak thih nia insawite chu pung chho zêl ta se, engtin nge ni ang? Chumi chungchânga kan lo buai a ngai em? Chûng zawhnate chu a dawta thuziakah chhân a ni ang.