1, 2. ¿Alkye tbʼanelxix tiʼ ikʼ toj Pentecostés te abʼqʼi 33?

OTOQ pon qʼij te Pentecostés te abʼqʼi 33 ex kubʼ tzʼaq toj qʼij domingo. Te prim moqa te qlax, ateʼtoq junlo 120 t-xnaqʼtzbʼen Jesús toj tkabʼin nivel te jun ja toj tnam Jerusalén (Hech. 1:13-15; 2:1). Kyoj qeju qʼij tjaqʼxi, otoq txi tqʼamaʼn Jesús kye t-xnaqʼtzbʼen tuʼn kykyaj ten toj tnam, ¿tiquʼn? Tuʼnju tzultoq kykʼamoʼn jun tiʼ nim toklen (Hech. 1:4, 5). ¿Tiʼtzun bʼaj?

² Noq minabʼen «tzaj jun tqʼajqʼajel tuj kyaʼj, ik tzaʼn jun kyqʼiqʼ in xumin wen, ex nimxix tqʼajqʼajel» ul toj ja jatumel qʼuqli qe t-xnaqʼtzbʼen Jesús. Ex «o kyil jun señ ik keʼyin ik tzaʼn qʼaqʼ in julin, kubʼ ten tibʼaj kywiʼ» ex «noj tuj kyanmi tuʼn Xewbʼaj Xjan» (Hech. 2:2-4). Iktzun tten ttzaj tqʼoʼn Jehová xewbʼaj xjan kyibʼaj qeju t-xnaqʼtzbʼen Jesús (Hech. 1:8). Atzun qe tnejel okslal lu xi kykʼamoʼn kyoklen tuʼn kyxiʼ kawil tukʼil Jesús toj kyaʼj tuʼnju kuʼtz xewbʼaj xjan kyibʼaj. *

3. ¿Tiquʼn ok qeʼxix kykʼuʼj okslal tiʼj qa otoq che jaw skʼoʼn?

³ Noqwit tena kyxol qeju t-xnaqʼtzbʼen Jesús toj qʼij aju, mlayxlo tzʼel naj tiʼj tkʼuʼja aju bʼaj. Kubʼ ten jun tiʼ toj  kywiʼye ik tzeʼn tqan qʼaqʼ ex oklo tena yolil toj junxichaq yol (Hech. 2:5-12). Jakulo tzʼok qeʼxix tkʼuʼja tiʼj qa otoq jaw skʼoʼna tuʼn xewbʼaj xjan. Noqtzun tuʼnj, ¿axpe tten in xi kykʼamoʼn kykyaqil okslal skʼoʼn maj kyoklen? Miʼn. ¿Tiquʼn ojtzqiʼn jlu quʼn? Qo xnaqʼtzan tiʼj.

4. Tej kyjaw skʼoʼn okslal toj tnejel syent abʼqʼi, ¿axpe bʼaj kyiʼj kykyaqil tej kyjaw skʼoʼn? Chikʼbʼantza.

⁴ Tnejel qo xnaqʼtzan tiʼjju ambʼil aj tjaw skʼoʼn jun okslal tuʼn xewbʼaj xjan. Nya oʼkx qeju 120 okslal e jaw skʼoʼn tuʼn xewbʼaj xjan toj Pentecostés te abʼqʼi 33. Tej tikʼ junjuntl or te qʼij aju, ax ikx e jaw skʼoʼn oxe mil xjal tuʼn xewbʼaj xjan ik tzeʼn otoq tqʼama Jesús. E jaw skʼoʼn okslal lu toj ambʼil tej tjaw aʼ kywiʼ (Hech. 2:37, 38, 41). Pero tej kyikʼ junjuntl abʼqʼi, nya kykyaqil okslal e jaw skʼoʼn toj qʼij tej tjaw aʼ kywiʼ. Jun techel, e jaw skʼoʼn qe okslal te Samaria tej tikʼ chʼin ambʼil tjawlen aʼ kywiʼ (Hech. 8:14-17). Atzunte Cornelio kyukʼil qe toj tja, e jaw skʼoʼn tej naʼmxtoq tjaw aʼ kywiʼ ex oʼkx kyiʼj bʼaj jlu (Hech. 10:44-48).

5. Ik tzeʼn in tzaj tyekʼin 2 Corintios 1:21 ex 22, ¿tiʼ in bʼaj tiʼj jun okslal aj tjaw skʼoʼn tuʼn xewbʼaj xjan?

⁵ Atzun jaʼlo qo yolin tiʼjju in bʼaj aj tjaw skʼoʼn jun okslal tuʼn xewbʼaj xjan. Tnejel, bʼalo ateʼ junjun skʼoʼn maj mintiʼxix in xi kynimen tiquʼn otoq che jaw skʼoʼn tuʼn Jehová. Atzun junjuntl, in ten junxitl kyximbʼetz tiʼj. Noq tiʼxku in kubʼ kynaʼn, tqʼama apóstol Pablo jun tiʼ in bʼaj kyiʼj kykyaqil: «Tej t-xi kyokslaʼne Crist, [...] ma tzʼok qʼoʼn jun sey * kyiʼje tuʼn Xewbʼaj Xjan, aju tziyimaj tuʼn Dios. Ate Xewbʼaj Xjan ma tzaj qʼoʼn te jun señ tuʼn qkʼmonte jun qetzbʼil» (Efes. 1:13, 14). Tuʼn jlu in nel qnikʼ tiʼj qa in najbʼen xewbʼaj xjan tuʼn Jehová tuʼntzun tok qeʼxix kykʼuʼj okslal tiʼj qa otoq che jaw skʼoʼn. In nok xewbʼaj xjan te  «jun señ» kyiʼj tuʼntzun tok qeʼ kykʼuʼj tiʼj qa atz che anqʼil toj kyaʼj ex nya tzalu twitz Txʼotxʼ (kjawil uʼjit 2 Corintios 1:21, 22).

6. ¿Tiʼ kbʼantel tuʼn jun okslal skʼoʼn maj tuʼn t-xiʼ toj kyaʼj?

⁶ Qa o jaw skʼoʼn jun okslal tuʼn xewbʼaj xjan, ¿ape t-xilen jlu qa te jumajx in nok techel tiʼj tuʼn t-xiʼ toj kyaʼj? Miʼn. Tuʼnju oʼkx o txi qʼoʼn txokbʼil tiʼj tuʼn t-xiʼ toj kyaʼj. Pero il tiʼj tuʼn ttzaj tnaʼn nabʼil lu: «Tzʼok tililx kyuʼne tuʼn tqeʼxix kykʼuʼje tuʼnju o che txkete tuʼn Dios ex o che jaw skʼoʼne tuʼn; porke qa ma kybʼinchaye jlu, mlayx che kubʼ tzʼaqe» (2 Ped. 1:10). Tuʼntzunju, qa ma jaw skʼoʼn jun okslal tuʼn xewbʼaj xjan tuʼn t-xiʼ toj kyaʼj, oʼkx kxeʼl qa kukx ma ten tzʼaqli twitz Jehová (Filip. 3:12-14; Heb. 3:1; Apoc. 2:10).

7. ¿Tzeʼn in nel tnikʼ jun okslal tiʼj qa o jaw skʼoʼn tuʼn t-xiʼ toj kyaʼj?

⁷ ¿Tzeʼn in nel tnikʼ jun okslal tiʼj qa o jaw skʼoʼn tuʼn t-xiʼ toj kyaʼj? Kyaj tqʼamaʼn apóstol Pablo tzaqʼwebʼil tiʼj jlu tej t-xi ttzʼibʼin tuʼj kye okslal te tnam Roma, aqeju otoq txi qʼoʼn txokbʼil kyiʼj tuʼn Dios tuʼn kyok te xjan. Tqʼama jlu: «Ma kykʼame aju Xewbʼaj Xjan, mya tuʼn kytene juntl maj te majen ex mya tuʼn kytene juntl maj tuj xobʼajil; noq oʼkx ma kykʼame Xewbʼaj Xjan tuʼn kyoke te tkʼwaʼl Dios; tuʼntzunju nnoʼk qmaʼn te Qman Dios: Tat, qo chi. Porke axte Xewbʼaj Xjan tukʼix qanmi in kymaʼn qa tkʼwaʼl Dios qoʼ» (Rom. 1:7; 8:15, 16). Tuʼntzunju in najbʼen xewbʼaj xjan tuʼn Jehová tuʼntzun telxix kynikʼ okslal skʼoʼn maj tiʼj qa che xeʼl anqʼil toj kyaʼj (1 Tes. 2:12).

8. Ik tzeʼn in tzaj tyekʼin 1 Juan 2:20 ex 27, ¿tiquʼn nya il tiʼj tuʼn t-xi qʼamaʼn te jun okslal qa o jaw skʼoʼn tuʼn xewbʼaj xjan?

⁸ In nonin Jehová tiʼj jun okslal tuʼntzun tok qeʼxix tkʼuʼj tiʼj qa o tzaj qʼoʼn txokbʼil tiʼj tuʼn t-xiʼ toj kyaʼj (kjawil uʼjit 1 Juan 2:20, 27). Ax ikx in xi tqʼoʼn Jehová xnaqʼtzbʼil kye okslal skʼoʼn maj ik tzeʼn in bʼant tuʼn kyukʼil txqantl tmajen. Noqtzun tuʼnj, nya il tiʼj tuʼn t-xi qʼamaʼn kye tuʼn juntl okslal qa o che jaw skʼoʼn. ¿Tiquʼn? Tuʼnju in najbʼen xewbʼaj xjan tuʼn Jehová tuʼntzun telxix kynikʼ tiʼj qa o che jaw skʼoʼn.

9. Ik tzeʼn in tzaj tqʼamaʼn Efesios 1:18, ¿tiʼ chʼixpubʼil in bʼaj tiʼj jun okslal aj tjaw skʼoʼn tuʼn Jehová?

⁹ Bʼalo kwest tuʼn tel kynikʼ txqantl tmajen Jehová tiʼj tiʼxix in bʼaj tiʼj jun okslal aj tjaw skʼoʼn tuʼn xewbʼaj xjan. Ex toj tumel jlu, tuʼnju nya skʼoʼn maj qe. O qo kubʼ tbʼinchaʼn Jehová tuʼn qximen tiʼj tuʼn qanqʼin te jumajx tzalu twitz Txʼotxʼ ex nya toj kyaʼj (Gén. 1:28; Sal. 37:29). Noqtzun tuʼnj, o che jaw tskʼoʼn junjun okslal tuʼn kyxiʼ anqʼil toj kyaʼj. Aj tbʼant jlu tuʼn Jehová, in chʼexpaj qʼuqbʼil kykʼuʼj ex kyximbʼetz, ex in xi tzyet tuʼn kyximen tiʼj kyanqʼibʼil toj kyaʼj (kjawil uʼjit Efesios 1:18).

10. ¿Tiʼ t-xilen aju tuʼn tul itzʼj jun okslal «tkabʼmajiʼn»? (Qʼonka twitza tiʼj tqanil).

¹⁰ Aj tjaw skʼoʼn jun okslal tuʼn xewbʼaj xjan, in nul itzʼj «tkabʼmajiʼn» moqa aju itzʼjlen te toj kyaʼj. * Ax ikx yolin Jesús tiʼj qa kwest tuʼn t-xi chikʼbʼet te jun okslal nya skʼoʼn maj tiʼxix in tnaʼn jun okslal aj tul itzʼj «tkabʼmajiʼn» (Juan 3:3-8).

11. ¿Tiʼ chʼixpubʼil in bʼaj tiʼj t-ximbʼetz jun okslal aj tjaw skʼoʼn tuʼn xewbʼaj xjan?

 ¹¹ ¿Tiʼ chʼixpubʼil in bʼaj tiʼj t-ximbʼetz jun okslal aj tjaw skʼoʼn tuʼn xewbʼaj xjan? Tej naʼmxtoq tjaw skʼoʼn, in noktoq tqʼoʼn toklen qʼuqbʼil tkʼuʼj tuʼn tanqʼin tzalu twitz Txʼotxʼ. Tajtoq tuʼn tpon ambʼil tuʼn tel tiʼn Jehová tkyaqil nya bʼaʼn ex tuʼn tok Txʼotxʼ te jun tbʼanel najbʼil. Bʼalo kubʼ t-ximen tuʼn t-xi tqʼoʼn jun bʼaʼn kyulen kye qeju toj tja ex qe tamiw aj kyjaw anqʼin. Pero tej tjaw skʼoʼn, chʼexpaj t-ximbʼetz. ¿Tiquʼn? Nya tuʼnju ya mintiʼtoq in tzalaj tiʼj tanqʼibʼil tzalu twitz Txʼotxʼ. Ex nya tuʼnju ma sikt tiʼj tkyaqil nya bʼaʼn, moqa tuʼnju kubʼ t-ximen qa kbʼajeltoq tgan tuʼn tanqʼin te jumajx tzalu twitz Txʼotxʼ. Sino chʼexpaj t-ximbʼetz tuʼnju ajbʼen xewbʼaj xjan tuʼn Jehová ex xi tqʼoʼn juntl akʼaj qʼuqbʼil tkʼuʼj.

12. Ik tzeʼn in tzaj tqʼamaʼn 1 Pedro 1:3 ex 4, ¿tiʼ in kubʼ tnaʼn jun okslal skʼoʼn maj aj t-ximen tiʼj qʼuqbʼil tkʼuʼj?

¹² Bʼalo in kubʼ t-ximen jun okslal skʼoʼn maj qa mintiʼ toklen tuʼn t-xi tkʼamoʼn tbʼanelxix oklenj lu, pero qʼuqli tkʼuʼj tiʼj qa o jaw skʼoʼn tuʼn Jehová. Aj t-ximen tiʼjju in nayon tiʼj, nimxix in tzalaj ex in xi tqʼoʼn chjonte tiʼj toklen (kjawil uʼjit 1 Pedro 1:3, 4).

13. ¿Alkye kyximbʼetz skʼoʼn maj at tiʼj kychwinqlal tzalu twitz Txʼotxʼ?

¹³ ¿Ape t-xilen jlu qa kyaj skʼoʼn maj tuʼn kykyim? In tzaj tqʼoʼn apóstol Pablo tzaqʼwebʼil tiʼj xjel lu. Ok tmojbʼaʼn kyxmilal skʼoʼn maj tukʼil jun pach ex tqʼama: «Atoʼxkuʼ tojuʼ qxmilal nakuʼj pach nqo bʼisun ex nqo sikt, mya awt qajbʼiljuʼ tuʼn qelqʼiʼn toj, a qajbʼiljuʼ tuʼn tokjuʼ qxmilal nakuʼj qja akʼaʼj» (2 Cor. 5:4). Tuʼn jlu in nel qnikʼ tiʼj qa mintiʼ in kubʼ kyximen skʼoʼn maj tuʼn ya miʼn kyanqʼin ex qa kyaj tuʼn kykyim naj. Sino in che tzalaj tiʼj kychwinqlal ex in najbʼen kyuʼn tuʼn kyajbʼen te Jehová junx kyukʼil qe toj kyja ex qe kyamiw. Pero noq tiʼxku in bʼant kyuʼn, kukx in tzaj kynaʼn tbʼanel qʼuqbʼil kykʼuʼj o txi qʼoʼn (1 Cor. 15:53; 2 Ped. 1:4; 1 Juan 3:2, 3; Apoc. 20:6).

14. ¿Alkyeqe tiʼchaq mintiʼ in tzaj kyyekʼin qa o jaw skʼoʼn jun okslal tuʼn xewbʼaj xjan?

¹⁴ Bʼalo jaku kubʼ t-xjelina qa axix tok o jaw skʼoʼna tuʼn Jehová tuʼn xewbʼaj xjan. Qa a jlu in bʼaj tiʼja, nim toklen tuʼn t-ximana kyiʼj xjel lu: ¿In kubʼpe tnaʼna qa at nim tgana tuʼn tbʼant tajbʼil Jehová tuʼna? ¿In kubʼpe tnaʼna qa tgana tuʼn tpakbʼana? ¿In tzalajpe teya aj t-xnaqʼtzaʼna tiʼj Tyol Dios ex tgana tuʼn tel tnikʼa kyiʼj «t-ximbʼetz Dios, aju mlay tzʼel [naj] qnikʼ tiʼj»? ¿In kubʼpe t-ximana qa o tzaj tkʼiwlaʼn Jehová aju in bʼant tuʼna toj tpakbʼabʼila? ¿In kubʼpe t-ximana qa nim toklen tuʼn tonina kyiʼj txqantl tuʼn tchʼiy kyamiwbʼil tukʼil Jehová? ¿Ope tzʼok tkeʼyina tzeʼnxix o tzʼonin Jehová tiʼja toj tanqʼibʼila? (1 Cor. 2:10). Qa ikju, ¿ape t-xilen jlu qa o jaw skʼoʼna tuʼn Jehová tuʼn t-xiʼya toj kyaʼj? Miʼn. Tuʼnju ax jlu jaku kubʼ kynaʼn kykyaqil tmajen Jehová qa skʼoʼn maj qe moqa miʼn. Ax ikx, jaku tzaj tqʼoʼn Jehová xewbʼaj xjan kye kykyaqil tmajen ex noq alkyexku qʼuqbʼil kykʼuʼj at. Tuʼntzunju, qa nya qʼuqli tkʼuʼja tiʼj qa o jaw skʼoʼna tuʼn xewbʼaj xjan, a jlu in tzaj tyekʼin qa mintiʼ o jaw skʼoʼna. Aqeju o tzaj qʼoʼn txokbʼil kyiʼj tuʼn kyxiʼ toj kyaʼj, mintiʼ in kubʼ kyxjelin qa o che jaw skʼoʼn, sino qʼuqli kykʼuʼj tiʼj jlu.

15. ¿Tiquʼn in xi qqʼamaʼn qa nya kykyaqil qeju in tzaj kykʼamoʼn xewbʼaj o che jaw skʼoʼn tuʼn kyxiʼ toj kyaʼj?

 ¹⁵ In yolin Xjan Uʼj kyiʼj nim tmajen Jehová te ambʼil ojtxe aqeju xi kykʼamoʼn xewbʼaj xjan, pero mintiʼ e jaw skʼoʼn tuʼn kyxiʼ toj kyaʼj. Jun techel, xi yekʼin tbʼe David tuʼn xewbʼaj xjan (1 Sam. 16:13). Ex onin tiʼj tuʼn tel tnikʼ kyiʼj junjun xnaqʼtzbʼil nim toklen tiʼj Jehová ex tuʼn tkubʼ ttzʼibʼin junjun plaj Tyol Dios (Mar. 12:36). Maske ikju, tqʼama apóstol Pedro qa mintiʼ xiʼ David toj kyaʼj (Hech. 2:34). Ax ikx, tzaj qʼoʼn xewbʼaj xjan te Juan el Bautista. Tqʼama Jesús jlu tiʼj: «Kyxol kykyaqil xjal mintiʼ jun mas maʼ toklen ik tzaʼn te Juan aju in che bʼyan xjal tuʼn». Maske ikju, tqʼama qa mlaytoq ten Juan tukʼil toj Tkawbʼil toj kyaʼj (Mat. 11:10, 11; Luc. 1:13-16). Ajbʼen xewbʼaj xjan tuʼn Jehová tuʼn tbʼant junjun tbʼanelxix tiʼchaq kyuʼn xjal lu, pero mintiʼ ajbʼen tuʼn tuʼn kyjaw tskʼoʼn tuʼn kyxiʼ toj kyaʼj. ¿Axpe t-xilen jlu qa mintiʼxix ok tilil kyuʼn tuʼn kyxiʼ anqʼil toj kyaʼj? Miʼn. Sino a t-xilen qa kxel tqʼoʼn Jehová juntl maj kyanqʼibʼil toj Tbʼanel Najbʼil tzalu twitz Txʼotxʼ (Juan 5:28, 29; Hech. 24:15).

16. ¿Jatumel che anqʼil chʼixmi kykyaqil tmajen Jehová?

¹⁶ Chʼixmi kykyaqil qeju tmajen Jehová in che anqʼin tzalu twitz Txʼotxʼ toj ambʼil jaʼlo, mlay cheʼx anqʼil toj kyaʼj. Sino kyaj tuʼn kyanqʼin tzalu twitz Txʼotxʼ tjaqʼ Tkawbʼil Dios ik tzeʼn te Abrahán, Sara, David, Juan el Bautista ex qe txqantl tmajen Jehová in yolin Xjan Uʼj kyiʼj (Heb. 11:10).

17. ¿Alkyeqe xjel kxel qqʼoʼn tzaqʼwebʼil kyiʼj toj juntl xnaqʼtzbʼil?

¹⁷ Kukx ateʼ junjun skʼoʼn maj tzalu twitz Txʼotxʼ, tuʼntzunju kukx in qo ximen kyiʼj junjun xjel (Apoc. 12:17). Jun techel, ¿tiʼ kyximbʼetz skʼoʼn maj ktel kyiʼjx? ¿Tiʼ qmod kbʼel qyekʼin tukʼil jun erman in xi tzyet tuʼn twaʼn tiʼj pan ex tuʼn tkʼan tiʼj vin toj Nabʼitz Tkyimlen Jesucristo? ¿Ilpe tiʼj tuʼn ttzaj bʼaj qkʼuʼj tuʼnju kukx in chʼiy kybʼet skʼoʼn maj tkyaqil abʼqʼi? Kxel qqʼoʼn tzaqʼwebʼil kyiʼj xjel lu toj juntl xnaqʼtzbʼil.