1, 2. Jméni xi koan nga sʼuí Pentecostés nga nó 33.

KʼIANGA taingo tanjio ya Jerusalén, nga kisʼejna je sʼuí Pentecostés nga nó 33, jngo siento kao kanla mani je chjotale Cristo xi tjíojtín (Hech. 1:13-15; 2:1). Jngo jao nichxin tongini, je Jesús kʼoakitsole nga yala naxinandá katabatio nga̱ nʼio chjíle jmeni xi kʼoaile (Hech. 1:4, 5). Jméni xi koan nga kui nichxin.

² Je Biblia itso: “Ndi̱toon jaʼaini ngʼajmi jngo xi fane, joni ntjao̱ xi nʼio faʼa. Janeya ngayije niʼya jña nga tjío”. Kʼoa je chjotale Cristo xi ya tjío “joni tsa ni̱je̱nlʼí” kjoan xi tsabe xi kisatioson jko̱, kʼoa kitsʼaile “ngatsʼi je Espíritu Santo” (Hech. 2:2-4). Kʼoasʼin kitsjoanile Jeobá je nganʼiotsjele je chjotale Cristo xi tjíojtín nga kʼia (Hech. 1:8). Jé xi títjon kitjoejin kao nganʼiotsjele Niná, * kʼoa jé xi tsakʼai títjonle kjoanda nga koa̱n ya koatexomakao je Jesús ya ngʼajmi.

3. Ánni nga tsín jao kisationi kon je chjotale Cristo nga sʼuí Pentecostés nga kao nganʼiotsjele Niná kitjoejinni.

³ Tsa jilani xi tsakʼaili nganʼiotsje nga sʼuí Pentecostés alikuijin cha̱jinli jme xi koan nga kui nichxin. Nga jo ni̱je̱nlʼí kji xi kisʼejnason  jkui kʼoa nga kjaʼaí kjaʼaí én kinokjoai (Hech. 2:5-12). Alikuijin jao tjín tokuin nga kao nganʼiotsjele Niná kiskoejinnili. Tonga a tongantsjai nga kʼoasʼin kjoejin Niná je chjotale Cristo xi ya ngʼajmi koai. Mai. Jósʼin ʼyañá. Kʼoa kʼiáni tjoejin.

4. Kʼianga siglo 1, kʼiáni kitjoejin je chjotale Cristo xi ya ngʼajmi kisʼele kjoachoya. Tʼeyanajmí.

⁴ Kataʼyala jmeni xi ma nga kao nganʼiotsjele Niná tjoejinni je chjotale Cristo xi ya ngʼajmi sʼele kjoachoya. Kʼianga sʼuí Pentecostés nga nó 33, jngo siento kao kanla mani chjotale Cristo xi tjíojtín xi tsakʼaile nganʼiotsjele Niná, tonga ali tojejin xi kitjoejin. Nga tikuini nichxin, ngi janla jmi mani chjota xi kʼoati tsakʼaile nganʼiotsjele Niná. Kʼiaa kitjoejin chjota jebi kʼianga kisʼenngindá (Hech. 2:37, 38, 41). Tonga nga koanskanni, je chjotale Cristo xi ya ngʼajmi tjínle kjoachoya alikui tongatsʼi nga kʼia kitjoejin kʼianga kisʼenngindá. Tobʼelañá, je chjota samaritano alikui kʼia kitjoejin kʼianga kisʼenngindá, skaan kitjoejin (Hech. 8:14-17). Kʼoa tojé Cornelio kao xi tjío ya niʼyale xi kʼia kitjoejin nga kjesa fisʼenngindájin (Hech. 10:44-48).

5. Tojo tso 2 Corintios 1:21, 22, jmé xi ma kʼianga jngo chjotale Cristo tjoejin nga ya ngʼajmi sʼele kjoachoya.

⁵ Kuila chótʼayajiaan ndʼaibi jmeni xi ma nga kao nganʼiotsjele Niná tjoejinni je chjotale Cristo xi ya ngʼajmi sʼele kjoachoya. Nga tjoejin jngo chjotale Cristo, tsakui nichxin ñʼai koa̱nle nga koa̱njinle nga je kiskoejin Jeobá nga ya ngʼajmi koai, kʼoa tsakui nichxin kui sikjaʼaitsjen ánni nga je kitjoejinni. Kʼoa tjínjinkʼa je xi tsín kʼoasʼin sikjaʼaitsjen. Tojosʼinni, je pastro Pablo kʼoatso josatío kon ngatsʼi je chjotale Cristo xi ya ngʼajmi tjínle kjoachoya. Itso: “Jon xi jekoankjainno, je Espíritu Santo xi kinisʼengino tsakasénchoa̱no * nga̱ tiyokao Cristo. Kʼoasʼin Niná tsakʼéjnanginá je Espíritu Santo xi tʼatsʼe kjoatjaoná” (Efes. 1:13, 14). Je Jeobá kui nganʼiotsjele síchjén nga tsín jao satío kon je chjotale Cristo xi tjoejin nga ya ngʼajmi tjínle kjoachoya. Jngoyale kui sʼejnangile je nganʼiotsjele Niná nga tsín jao satío kon nga ya ngʼajmi koatio ngantsjai nichxin,  nga tsín i̱ Sonʼnde koatio (tʼexkiai 2 Corintios 1:21, 22). *

6. Jméni xi tjínnele sʼin nga ya ngʼajmi koai jngo chjotale Cristo xi kui kjoachoya bʼaile.

⁶ Kʼianga jngo chjotale Cristo tjoejin nga ya ngʼajmi koai, a kui xi tsonile nga to jeya koai. Mai. Tokui kjoachoya bʼaile. Tjínnele sikjaʼaitsjen jmeni xi tso Biblia, nga tso: “ʼNdíndsʼe, ngisa nda tixítíyalao yaono nga koakosontsaon nga Niná kinchja̱no kʼoa tsakjaʼájinno. Tsa kʼoasʼiaon je kjoabi, nitokʼiajin tsao̱ngio” (2 Ped. 1:10). Tojo tso je Énle Niná, ninga tjínkʼa je chjotale Cristo xi tjoejin nga ya ngʼajmi koai, tokʼiaa nga ya koai tsa kixi koaitʼale Niná (Filip. 3:12-14; Heb. 3:1; Apoc. 2:10).

7. Jósʼin beni jngo chjotale Cristo nga kui kjoachoya bʼaile nga ya ngʼajmi koai.

⁷ Jósʼin beni jngo chjotale Cristo nga kui kjoachoya bʼaile nga ya ngʼajmi koai. Yaa tsoyaná jokitsole Pablo je chjotale Cristo xi Roma tsʼe xi kui kjoachoya tsakʼaile. I kitsole: “Jon alikui kichjoao kjoafaʼaitsjen xi tsʼe xi tjíonʼio, nga ngijngokʼa sʼe̱no kjoajkon, tonga kichjoénío je Espíritu Santo xi bekonná joni tsa xtile. Xi totʼatsʼe je Espíritu Santo nokjoaa Abba, xi tsoni Nʼai. Tijeni Espíritu Santo tojngo tsjoá kjoakixi kao ni̱ma̱ná nga kuiaa ʼndíle Niná” (Rom. 1:7; 8:15, 16). Je Niná kui nganʼiotsjele síchjén nga kʼoatsole jngo chjotale Cristo nga kui kjoachoya sʼele nga ya ngʼajmi koai (1 Tes. 2:12).

8. Tojo tso 1 Juan 2:20, 27, ánni kʼoabixónsíñá nga tsín tjínnele kjaʼaí xi kʼoakuitsole jngo chjotale Cristo nga ya ngʼajmi tjínle kjoachoya.

⁸ Jé Jeobá xosʼín nga tsín jao satío kon nga ya ngʼajmi koai je xi kui kjoachoya bʼaile (tʼexkiai 1 Juan 2:20, 27). * Jé jtín síchjén Jeobá nga tsoyale ngatsʼi choʼndale, ni ya ngʼajmi tjínle kjoachoya kʼoa ni i̱ Sonʼnde koyale koatio. Tonga alikui tjínnele nga kjaʼaí xi kʼoakuitsole jngo chjotale Cristo nga ya ngʼajmi tjínle kjoachoya. Je Jeobá kui nganʼiotsjele síchjén nga tsín jao sʼe kon nga kui kjoachoya sʼele nga ya ngʼajmi koai.

9. Jósʼin bʼantjaiya je kjoafaʼaitsjenle chjotale Cristo xi kui kjoachoya bʼaile nga ya ngʼajmi koai, tojo tso Efesios 1:18.

⁹ Tsakui nichxin me tongatsʼi nga tsín majinle josʼe kon jngo chjotale Cristo kʼianga kui kjoachoya tsjoále Jeobá nga ya ngʼajmi koai. Toxá tsín majinnile je xi tsínkui kjoachoya tjínle. Je Niná kui xá kisindani je chjota nga i̱ Sonʼnde koatio ngantsjai nichxin, ali tsa yajin ngʼajmi (Gén. 1:28; Sal. 37:29). Tonga tíkjoejin kʼa chjota nga ya ngʼajmi koai. Kʼianga jngo chjotale Cristo tjoejin nga kui kjoachoya bʼaile nga ya ngʼajmi koai, jé Jeobá xosʼín nga bʼantjaiya je kjoachoya xi sʼele, nga bʼantjaiya josʼin síkjaʼaitsjen kʼoa nga kui símekon nga ya ngʼajmi kʼoéjna (tʼexkiai Efesios 1:18). *

10. Jmé xi tsoyanile nga tsin “ngijngo kʼa” jngo chjotale Cristo (kʼoati chótsenlai nota).

¹⁰ Kʼianga kao nganʼiotsjele Niná tjoejinni jngo chjotale Cristo, tsin “ngijngo kʼa”. * Je Jesús kʼoakitso nga tsínkʼia koa̱njinle xi tsín ya ngʼajmi tjínle kjoachoya josʼe kon je “xi tʼatsʼe  Espíritu Santo kitsinni”, xi tsonile, je xi ya ngʼajmi tjínle kjoachoya nga ya koai (Juan 3:3-8).

11. Jósʼin bʼantjaiya josʼin síkjaʼaitsjen je chjotale Cristo xi ya sʼele kjoachoya ya ngʼajmi.

¹¹ Jósʼin bʼantjaiya josʼin síkjaʼaitsjen je chjotale Cristo xi ya sʼele kjoachoya ya ngʼajmi. Ngasʼa ñaki kʼoatjín kon nga i̱ Sonʼnde kʼoéjna ngantsjai nichxin. Kʼoa kʼoati kui kiskoyale nga kjoaʼaí nichxin nga ʼndenaxó sikao Jeobá i̱ Sonʼnde kʼoa nga kjoaʼaxin ngayeje kjoatsʼen. Tsakui nichxin kui kiya jko̱ tsakai nga skoéya je xínkjín kao miyole xi jekʼien nga jekjoaʼáyanile. Tonga kʼianga jetsakʼaile nganʼiotsje nga ya ngʼajmi sʼele kjoachoya, jebʼantjaiya josʼin síkjaʼaitsjen. Ánni. Ali tsakuijin nga tsín timenile nga i̱ Sonʼnde kʼoéjna. Kʼoa ali tsakuijin nga kjoa tífaʼatojin, kʼoa nikuijinla nga toxijña kʼoasʼin síkjaʼaitsjen nga si koa̱nle nga i̱ Sonʼnde kʼoéjna ngantsjai nichxin. Kuinga bʼantjaiyani josʼin síkjaʼaitsjen nga̱ kui je nganʼiotsjele Jeobá síkʼantjaiya kjoafaʼaitsjenle kʼoa kui kjoachoya tsjoále nga ya ngʼajmi koai.

12. Tojo tso 1 Pedro 1:3, 4, jósʼe kon je chjotale Cristo xi ya ngʼajmi tjínle kjoachoya kʼianga kui síkjaʼaitsjen jme kjoanda xi sʼe̱le.

¹² Je chjotale Cristo xi ya ngʼajmi tjínle kjoachoya, tsakui nichxin kʼoasʼin síkjaʼaitsjen nga tsín bakinle nga kʼoasikji tse kjoanda kʼoaile, tonga je xi tsín jao tjínle kuinga je Jeobá kiskoejin. Kʼianga kui síkjaʼaitsjen je kjoachoya xi tjínle, nʼio tsjoa sʼele kʼoa tsjoá kjoanda (tʼexkiai 1 Pedro 1:3, 4). *

13. Jósʼin síkjaʼaitsjen je chjotale Cristo xi ya ngʼajmi tjínle kjoachoya nga sʼasa i̱ Sonʼnde tjío.

¹³ A kui xi tsonile nga mele kuiyá je chjotale Cristo xi ya ngʼajmi tjínle kjoachoya. Je pastro Pablo tsoyaná xi tʼatsʼe jebi. Kʼianga kui kisingóson je yaole chjotale Cristo xi ya ngʼajmi tjínle kjoachoya kao jngo ndʼianajño, i kitso: “Kʼoatisʼinni jinjin xi tiyuijin je ndʼianajñobi, tsenaijin nga ñʼai kjinenajin kjoa, likui nga menajin nga chja̱ʼaxinnajin ndʼianajñobi, tonga kui nga menajin chʼa̱kjásuinjin, jméni nga je xi mʼe kʼoasʼin kʼoantjaiyajinni kao kjoabijnachon” (2 Cor. 5:4). Je chjotale Cristo xi ya ngʼajmi tjínle kjoachoya ali tsa kʼoajinsʼin síkjaʼaitsjen nga tsín timenile nga tosi tonda i̱ Sonʼnde koatio. Tosaa kui xi mele nga ñatjen sixále Jeobá kao xínkjín kʼoa kao miyole jokji tse koatio. Ninga kʼoalani, tojmeni xi sʼin kui síkjaʼaitsjen je kjoachoya xi tjínle (1 Cor. 15:53; 2 Ped. 1:4; 1 Juan 3:2, 3; Apoc. 20:6).

14. Tsa ʼyani xi nʼio nda tísíxále Niná kʼoa tsa ñaki tíbe josʼin tíbasenkao Jeobá, a kui xi tsonile nga ya ngʼajmi tjínle kjoachoya.

¹⁴ Tsakui nichxin kui nikjaʼaitsjain tsa ji kiskoejinli Jeobá nga ya ngʼajmi kʼuín. Tsa kʼoalani, tikjaʼaitsjenjin xi tʼatsʼe jebi: a nʼio nimetokuin nga nitjosuin je xále Niná, a ñaki kao kjoatsjoa ʼmiyasuin, a nʼio tsjoachai nga chotʼayajin je Biblia kʼoa nga fasjaiyai “je xi ñʼai tjín xi tsʼe Niná”, a tiʼyaní josʼin tísíchikontʼainli je Jeobá nga tibʼenelai yaoli nga tiʼmiyasuin, a kʼoasʼin nikjaʼaitsjain nga kui xá kjineli nga kuisenkoai je xi ngikʼa nga nda koatio ngixko̱n Niná, a tiʼyaní josʼin tíbasenkaoli Jeobá (1 Cor. 2:10). Kʼiatsa kʼoatinʼiai jotso kjoachjonangi jebi, a kui xi tsonile nga ji kiskoejinli Niná nga ya ngʼajmi kʼuín. Mai. Nga̱ xá kʼoasatíoni kon ngatsʼi choʼndale Jeobá, ni ya ngʼajmi tjínle kjoachoya kʼoa ni i̱ Sonʼnde. Xi ijngosani, je Jeobá tsjoále nganʼiotsjele je choʼndale tojñani koyale koatio. Tsa tsín ñaki tjínjngo tokuin nga ya ngʼajmi tjínli  kjoachoya, kui xi tsonile nga tsín ji kiskoejinli Niná nga ya kʼuín. Je xi kui kjoachoya tjínle ali tsakuijin kjonangile yaole, nga̱ ñaki tjíojngo kon nga ya koai.

15. Jósʼin ʼyañá nga tsín ya ngʼajmi koai ngatsʼi je xi bʼaile nganʼiotsjele Niná.

¹⁵ Ya Biblia nʼio nkjín chjota síkʼaxki̱ xi kixi kitʼale Niná xi kʼoati tsakʼaile nganʼiotsje, tonga xi tsín ya ngʼajmi ki. Tobʼelañá, je David kui nganʼiotsjele Niná tsakándiaale (1 Sam. 16:13). Nga kui nganʼiotsjele Niná tsakándiaale koanjinle jme xi ñʼai tjín xi tʼatsʼe Niná kʼoa kui tsakándiaale nga nkjín xo̱n xi tsʼe Biblia kiski (Mar. 12:36). Ninga kʼoalani, je pastro Pedro kʼoakitso nga tsín ya ngʼajmi ki je David (Hech. 2:34). Kʼoa je Biblia kʼoatso nga tsakʼaile “Espíritu Santo” je Juan Bautista (Luc. 1:13-16). Kʼoa je Jesús kʼoakitso “nga jinle chjotasonʼnde tsín xi ngisa títjon ma kaoni tsa Juan Bautista”. Ninga kʼoalani, kʼoakitso nga tsín ya ngʼajmi koai nga ya koatexoma (Mat. 11:10, 11). Je Jeobá kui nganʼiotsjele kisichjén nga tsakinyakao chjota jebi nga tomaxkónná jme xi kisʼin, tonga alikui kui xá kitsjoanile je nganʼiotsjele nga ya ngʼajmi koai. A kui xi tsonile nga tsín kixi koan kʼoa nga tsín bakinle nga ya ngʼajmi koatexomakao je Jesús. Mai. Kui xi tsonile nga je Jeobá tsjoá ijngokʼanile kjoabijnachon i̱ Sonʼnde kʼianga jeʼndenaxó koa̱n (Juan 5:28, 29; Hech. 24:15).

16. Jñáni koyale nga koatio je choʼndale Niná xi ngisa nkjín mani xi tjío ndʼaibi.

¹⁶ Nichxin xi tiyoaa ndʼaibi, me ngatsʼi je choʼndale Niná xi tsínkui kjoachoya tjínle nga ya ngʼajmi koai. Joni je Abrahán, Sara, David, Juan Bautista kʼoa kao xi ngikʼa chjota xi síkʼaxki̱ Biblia, xi xʼin kao xi yánchjín, kui koyale nga i̱ Sonʼnde koatio nga jekoatexoma Chjotaxále Niná (Heb. 11:10).

17. Jmé xi chótʼayajiaan ya kjoaʼmiya xi ijngo.

¹⁷ Nichxin xi tiyoaa ndʼaibi, tjíosa kʼa i̱ Sonʼnde je chjotale Cristo xi ya ngʼajmi tjínle kjoachoya. Kuinga sakʼoa chjonangiñá tsa jmeni (Apoc. 12:17). Tobʼelañá, jósʼin tjínnele skoe̱kon yaole je xi ya ngʼajmi koai. Jósʼin tjínnele jchatokoán tsa ʼyani xi koakjen je nioxtila kʼoa skʼuí vino nga kjoaʼaítsjenya Kjoabiyale Cristo. Kʼoa jósʼin si̱kjaʼaitsjeen tsa sa nkjín sa nkjín mani nga xki̱ nó xi kʼoakuitso nga ya koai ngʼajmi. Yaa kjoaʼmiya xi ijngo chótʼayá xi tʼatsʼe jebi.