LARTIK LETID 4
“Lespri Bondie Zwenn Li Ansam ar Nou Lespri”
“Lespri Bondie zwenn li ansam ar nou lespri pou deklare ki nou zanfan Bondie.”—ROM. 8:16.
KANTIK 25 Enn Dibien Spesial
REZIME *
Zeova ti devers so lespri sin dan enn fason extraordiner lor anviron 120 Kretien zour Lapantkot (Get paragraf 1-2)
1-2. Ki levennman extraordiner inn arive zour Lapantkot 33 Nou Lepok?
SE ENN Dimans gramatin dan Zerizalem. Nou an lan 33 Nou Lepok, ek se zour Lapantkot. Anviron 120 disip inn reini ansam lao dan enn lakaz. (Zist. 1:13-15; 2:1) De-trwa zour avan, Zezi finn donn zot lord pou res dan Zerizalem parski zot ti pou gagn enn kado spesial. (Zist. 1:4, 5) Ki arive apre?
2 “Enn sel kout enn son terib . . . sorti depi lesiel parey kouma enn divan violan ki pe soufle.” Sa son-la ranpli lakaz-la net. Lerla, “bann ti laflam dan form lalang” poz lor latet bann disip, ek zot tou ‘ranpli ar lespri sin.’ (Zist. 2:2-4) Par sa fason extraordiner la, Zeova devers so lespri sin lor sa group dimounn la. (Zist. 1:8) Sa group disip la, zot bann premie Kretien ki Bondie swazir par so lespri sin * ek Li donn zot lesperans pou regn avek Zezi dan lesiel.
KI ARIVE KAN LESPRI SIN SWAZIR ENN KIKENN POU AL DAN LESIEL?
3. Kifer bann Kretien ki ti reini zour Lapantkot ti sir ki lespri sin ti swazir zot?
3 Si to ti enn parmi bann disip ki ti reini dan sa lakaz-la zour Lapantkot, zame to pa ti pou bliye sa levennman-la. Enn laflam dife ki ti resanble enn lalang ti poz lor to latet, ek to ti koumans koz dan lezot lang. (Zist. 2:5-12) To ti pou sir ki lespri sin finn swazir twa! Me, eski sa pas parey pou tou bann Kretien ki pou al dan lesiel, setadir eski lespri sin swazir zot dan enn fason extraordiner koumsa ek dan mem moman zot lavi? Non. Kouma nou konn sa?
4. Eski dan premie siek, tou bann ki ti ena lesperans pou al dan lesiel ti gagn lespri sin dan mem moman zot lavi? Explike.
4 Anou gete ki moman lespri sin swazir enn dimounn. Pandan Lapantkot 33 Nou Lepok, lespri sin pa ti swazir zis sa group 120 disip la. Plitar sa zour-la, anviron 3,000 lezot disip ti gagn lespri sin. Zot ti gagn lespri sin kan zot ti pran batem. (Zist. 2:37, 38, 41) Me pandan bann lane apre, pa tou bann Kretien ki ena lesperans pou al dan lesiel ki ti gagn lespri sin pandan zot batem. Par exanp, bann Samariten ti gagn lespri sin enn tipe letan apre zot batem. (Zist. 8:14-17) Parkont, Korney ek so fami ti gagn lespri sin dan enn fason bien diferan. Zot ti gagn lespri sin avan zot batem.—Zist. 10:44-48.
5. Dapre 2 Korintien 1:21, 22, ki arive kan lespri sin swazir enn kikenn?
5 Anou get osi seki arive kan lespri sin swazir enn dimounn. Sertin dimounn o-koumansman kitfwa gagn difikilte pou aksepte ki Zeova inn swazir zot. Kitfwa zot demann zotmem: ‘Kifer Bondie finn swazir mwa?’ Lezot kitfwa pena sa reaksion-la. Mem si zot ena bann reaksion diferan, lapot Pol explike seki arive kan Bondie swazir enn dimounn par so lespri sin. Li dir: “Apre ki zot finn krwar, inn met enn sele * lor zot avek lespri sin ki ti promet gras-a li, ki enn garanti ki gagne alavans pou nou leritaz.” (Efe. 1:13, 14, NW) Zeova servi so lespri sin pou montre sa bann Kretien-la dan enn fason bien kler ki Li finn swazir zot. Dan sa fason-la, lespri sin li “enn garanti [ouswa enn promes]” ki Bondie donn sa bann Kretien-la pou konfirme ki dan lavenir, zot pou viv pou touletan dan lesiel me pa lor later.—Lir 2 Korintien 1:21, 22, NW. *
6. Pou ki enn Kretien gagn so rekonpans pou al dan lesiel, ki li bizin fer?
6 Si Bondie swazir enn Kretien pou al dan lesiel, eski savedir ki otomatikman li pou gagn sa rekonpans-la? Non. Li sir ki Bondie finn swazir li pou al dan lesiel. Me fode pa li bliye sa lavertisman-la: “Mo bann frer ek ser, double zot zefor pou montre vremem ki Bondie finn swazir ek apel zot; ler zot fer sa, zame zot pa pou tom dan lemal.” (2 Pier 1:10) Alor, mem si Bondie inn swazir enn Kretien pou al dan lesiel, li pou gagn so rekonpans zis si li res fidel.—Fil. 3:12-14; Ebre 3:1; Rev. 2:10.
KOUMA ENN KIKENN KONE KI BONDIE INN SWAZIR LI POU AL DAN LESIEL?
7. Kouma bann Kretien ki Bondie inn swazir kone ki zot pou al dan lesiel?
7 Kouma enn dimounn kone ki Bondie inn swazir li pou al dan lesiel? Nou trouv repons sa kestion-la kan nou get seki Pol ti dir bann Kretien dan Rom. Sa bann Kretien-la ti’nn “apele” par Bondie. Pol ti dir zot: “Sa Lespri ki zot finn gagne la, li pa enn lespri esklavaz, e ki replonz zot dan lafreyer, me zot finn resevwar enn Lespri ki fer zot zanfan Bondie, e ki fer nou kriye, ‘Abba! Papa!’ Lespri Bondie zwenn li ansam ar nou lespri pou deklare ki nou zanfan Bondie.” (Rom. 1:7; 8:15, 16) Alor, atraver so lespri sin, Bondie fer sa bann Kretien-la kone dan enn fason bien kler ki zot pou al dan lesiel.—1 Tes. 2:12.
8. Kouma eski 1 Zan 2:20, 27 montre ki bann Kretien ki ena lesperans pou al dan lesiel pa bizin ki lezot konfirm zot ki zot ena sa lesperans-la?
8 Zeova fer an-sort ki sa bann Kretien-la pena okenn dout ki Li’nn swazir zot pou al dan lesiel. (Lir 1 Zan 2:20, 27, NW. *) Zeova servi so lorganizasion pou ansegn bann Kretien ki ena lesperans pou al dan lesiel parey kouma Li fer pou tou dimounn. Me sa bann Kretien-la pa bizin personn pou konfirm zot ki zot ena lesperans pou al dan lesiel. Kifer? Parski Zeova servi so lespri sin, setadir lafors pli pwisan ki ena dan liniver, pou fer zot konpran ki zot ena sa lesperans-la.
ZOT “REPRAN NESANS”
9. Dapre Efezien 1:18, par ki sanzman enn dimounn pase kan Bondie swazir li pou al dan lesiel?
9 Laplipar serviter Bondie azordi kitfwa gagn difikilte pou konpran seki ariv enn dimounn kan Bondie swazir li pou al dan lesiel. Li normal parski zot pena sa lesperans-la. Bondie inn kree bann dimounn pou viv pou touletan lor later, pa dan lesiel. (Zen. 1:28; Ps. 37:29) Me Zeova finn swazir sertin pou viv dan lesiel. Alor, kan Li swazir zot, Li sanz zot lesperans ek zot fason panse net. Lerla, sa bann Kretien-la kontan pou al viv dan lesiel.—Lir Efezien 1:18, NW. *
10. Ki savedir “repran nesans”? (Get not.)
10 Kan Bondie swazir enn Kretien par so lespri sin, sa Kretien-la “repran nesans,” ouswa li “pran nesans depi lao.” * Anplis, Zezi ti dir ki li inposib pou explik enn kikenn ki pa’nn gagn lesperans pou al dan lesiel seki enn dimounn resanti kan li “repran nesans,” ouswa “pran nesans dan Lespri.”—Zan 3:3-8.
11. Explike kouma fason panse enn Kretien sanze kan li gagn lesperans pou al dan lesiel.
11 Kouma eski enn Kretien koumans pans dan enn lot fason kan li gagn lesperans pou al dan lesiel? Avan ki Zeova swazir enn Kretien pou al viv dan lesiel, sa Kretien-la ti bien kontan so lesperans pou viv pou touletan lor later. Li ti pe atann avek enn gran lazwa moman kot Zeova pou tir tou move kitsoz ek fer later vinn enn paradi. Kitfwa li ti pe mazinn moman kot li pou akeyir bann manb so fami ouswa bann kamarad ki’nn mor ek ki pou resisite. Me apre ki li’nn gagn lesperans pou al dan lesiel, li’nn koumans pans dan enn lot fason. Kifer? Se pa parski li nepli apresie lesperans pou viv lor later, ouswa parski li’nn fer enn depresion ek li’nn soufer boukou. Li pa sanz so fason panse enn kout koumsa parski li panse ki sa pou monotonn pou viv pou touletan lor later. Okontrer, se Zeova ki servi So lespri sin pou sanz fason panse ek lesperans sa Kretien-la.
12. Dapre 1 Pier 1:3, 4, kouma bann Kretien ki ena lesperans pou al dan lesiel konsider zot lesperans?
12 Enn kikenn ki finn gagn lesperans pou al dan lesiel kitfwa pa santi li dign pou sa gran privilez-la. Selman, li pena okenn dout ki Zeova inn swazir li. Li bien kontan ek li ena enn gran rekonesans kan li pans sa lesperans-la.—Lir 1 Pier 1:3, 4.
13. Kouma bann Kretien ki ena lesperans pou al dan lesiel konsider zot lavi lor later?
13 Me eski sa vedir ki sa bann Kretien-la anvi mor? Lapot Pol reponn sa kestion-la. Li ti konpar lekor sa bann Kretien-la ar enn latant ek li ti dir: “Avredir, nou ki dan sa latant-la, nou pe plengne ek nou santi nou kraze parski nou pa anvi tir sa lor nou, me nou anvi met lot-la lor nou pou ki seki mortel ranplase par lavi.” (2 Kor. 5:4, NW) Sa bann Kretien-la pa finn degout zot lavi lor later ek zot pa anvi mor pli vit posib. Okontrer, zot kontan lavi ek zot anvi servi sak zour zot lavi pou servi Zeova ansam avek zot fami ek zot bann kamarad. Selman, ninport ki kitsoz zot fer, zot touletan pans zoli lesperans ki zot ena konsernan lavenir.—1 Kor. 15:53; 2 Pier 1:4; 1 Zan 3:2, 3, NW; Rev. 20:6.
ESKI ZEOVA FINN SWAZIR TWA POU AL DAN LESIEL?
14. Ki kitsoz pa montre ki enn dimounn ena lesperans pou al dan lesiel?
14 Eski to pe demann tomem si Zeova finn swazir twa pou al dan lesiel? Si wi, reflesi lor sa bann kestion inportan la: Eski to ena enn gran dezir pou fer volonte Zeova? Eski to trouve ki to bien zele dan predikasion? Eski to kontan etidie Labib ek to kontan aprann “bann kitsoz profon ki konsern Bondie”? (1 Kor. 2:10, NW) Eski to trouve ki Zeova fer twa gagn bann bon rezilta dan predikasion? Eski to konsider sa kouma enn gran responsabilite pou ed lezot aprann konn Zeova? Eski to’nn trouv lame Zeova dan to lavi dan bann fason bien presi? Si to reponn wi pou sa bann kestion-la, eski sa vedir ki to ena lesperans pou al viv dan lesiel? Non. Kifer non? Parski tou bann serviter Bondie kapav ena sa bann santiman-la, ki zot ena lesperans pou al dan lesiel ouswa non. Par mwayin so lespri sin, Zeova kapav ed tou so bann serviter pou fer sa bann kitsoz-la, mem si zot pena mem lesperans. Avredir, si to pe demann tomem si to ena lesperans pou al dan lesiel, sa bann dout-la montre ki to pena sa lesperans-la. Bann dimounn ki Zeova inn swazir pa demann zotmem si zot ena lesperans pou al dan lesiel ouswa non! Zot kone ki zot ena sa lesperans-la!
Zeova ti servi so lespri sin pou donn Abraam, Sara, David, ek Zan Batis pouvwar pou fer bann kitsoz extraordiner. Selman, Li pa ti swazir zot pou al viv dan lesiel (Get paragraf 15-16) *
15. Eski tou bann dimounn ki gagn lespri sin pou al regne dan lesiel? Explike.
15 Dan Labib, ena lexanp plizir zom ki ti ena lafwa ek ki ti gagn lespri sin; pourtan zot pa ti ena lesperans pou al dan lesiel. David ti les lespri sin diriz li. (1 Sam. 16:13) Lespri sin ti ed li pou konpran bann kitsoz profon lor Zeova ek ti osi gid li pou ekrir enn parti dan Labib. (Mark 12:36) Malgre sa, lapot Pier ti dir ki David “pa ti mont dan lesiel.” (Zist. 2:34) Zan Batis ti ‘ranpli ar lespri sin.’ (Lik 1:13-16) Zezi ti dir ki pa ti ena enn lot zom pli gran ki Zan, me apre sa li ti dir ki Zan pa pou form parti dan Rwayom ki dan lesiel. (Mat. 11:10, 11) Zeova ti servi so lespri sin pou donn sa bann zom-la pouvwar pou fer bann kitsoz extraordiner. Selman, Li pa ti swazir zot pou al viv dan lesiel. Eski sa vedir ki zot ti mwins fidel ki bann dimounn ki Bondie finn swazire pou al regne dan lesiel? Non. Se zis ki zot lesperans diferan. Zeova pou resisit zot pou viv dan Paradi lor later.—Zan 5:28, 29; Zist. 24:15.
16. Ki rekonpans laplipar bann serviter Bondie pe atann pou gagne dan lavenir?
16 Laplipar bann serviter Bondie ki lor later azordi pena lesperans pou al dan lesiel. Parey kouma Abraam, Sara, David, Zan Batis, ek boukou lezot zom ek fam ki ti viv dan lepok Biblik, zot ena lesperans pou viv lor later ki pou dirize par Rwayom Bondie.—Ebre 11:10.
17. Ki bann kestion nou pou reponn dan prosin lartik?
17 Azordi, ena bann Kretien ki ena lesperans pou al dan lesiel ki ankor pe viv parmi nou, akoz sa kitfwa nou poz noumem sertin kestion. (Rev. 12:17) Par exanp, ki lopinion bann Kretien ki ena lesperans pou al dan lesiel bizin ena lor zotmem? Si enn kikenn dan to lasanble koumans pran lanblem pandan Memoryal, kouma to bizin tret sa dimounn-la? Ek eski to bizin trakase si kantite bann dimounn ki pran lanblem pe kontign ogmante? Nou pou reponn sa bann kestion dan prosin lartik.
^ par. 5 Depi Lapantkot 33 Nou Lepok, Zeova finn donn sertin Kretien enn lesperans extraordiner, lesperans pou al regne avek so Garson dan lesiel. Me kouma eski sa bann Kretien-la kone ki Bondie finn swazir zot pou sa gran privilez-la? Ki arive kan enn kikenn gagn linvitasion pou al dan lesiel? Sa lartik-la pou reponn sa bann kestion-la ek li baze lor enn lartik ki ti paret dan Latour Degard Zanvie 2016.
^ par. 2 EXPRESION KI’NN EXPLIKE: Swazir par lespri sin. Zeova servi so lespri sin pou swazir enn dimounn pou regn avek Zezi dan lesiel. Par mwayin so lespri sin, Bondie fer sa dimounn-la enn promes ouswa donn li “enn garanti” konsernan bann kitsoz ki li pou gagne dan lavenir. (Efe. 1:13, 14, NW) Sa Kretien-la kapav dir ki lespri sin “zwenn li ansam ar [so] lespri,” setadir fer li konpran dan enn fason kler ki so rekonpans trouv dan lesiel.—Rom. 8:16.
^ par. 5 EXPRESION KI’NN EXPLIKE: Sele. Enn Kretien pa sele dan enn fason definitif kan Bondie swazir li par lespri sin. Se enn sele tanporer. Si Kretien-la res fidel, sa sele-la vinn permanan enn tipe letan avan so lamor ouswa avan ki gran detres koumanse.—Efe. 4:30; Rev. 7:2-4; get “Kestion Bann Lekter” dan Latour Degard Avril 2016, an Franse.
^ par. 5 2 Korintien 1:21, 22: “21 Me se Bondie Limem ki donn garanti ki zot ek nou, nou pou Kris, ek se Bondie ki finn swazir nou. 22 Li finn osi met so sele lor nou ek finn donn nou lespri sin dan nou leker kouma enn garanti pou seki pou arive.”
^ par. 8 1 Zan 2:20, 27: “20 Sa Kikenn ki sin la finn donn zot lonksion, ek zot tou ena konesans. 27 An rapor avek zot, lonksion ki zot finn gagne ar Li res dan zot, ek zot pa bizin ki personn ansegn zot; me lonksion ki zot finn gagne ar Li pe ansegn zot konsernan tou kitsoz ek li vre ek pena okenn mansonz. Parey kouma li finn ansegn zot, res ini avek Li.”
^ par. 9 Efezien 1:18: “Li finn fer lizie zot leker eklere, pou ki zot kone pou ki lesperans Li’nn apel zot, pou zot konn rises ranpli ar laglwar ki Li rezerv bann sin an eritaz.”
^ par. 10 Pou gagn plis ransegnman lor lexpresion repran nesans, get Latour Degard 1e Me 2009, p. 3-11.
KANTIK 27 Ler pou Fer Konn Bann Garson Bondie
^ par. 60 DESKRIPSION ZIMAZ: Ki nou dan prizon akoz nou lafwa ouswa nou lib pou prese ek ansegn laverite, nou atann avek lazwa moman kot nou pou viv lor later kan Rwayom Bondie pou dirize.
