MWAHA WOOSOMIYA 4
‘Nnepa unaavaha usaahiti’
“Nnepa yooyo unaavaha usaahiti ni nnepeehu wiira hiiva nikhanle asaana Nluku.”—AROO. 8:16.
NCIPO 25 Os Filhos Ungidos de Jeová
NINHALA WIITTHUCANI? *
Nihuku no Pentekositi, Yehova ahaavaha nnepaawe wowaarya atthari ookhalaka 120 ni mananna ootikhiniha (Uwehe iparaagarafu 1-2)
1-2. Itthuni yootikhiniha yaakhumelenle nihuku no Pentekositi o mwaakha wo 33?
YAARI Itominku uwicisu, u Yerusalemu. Iyo Itominkwiiyo naari nihuku no Pentekositi o mwaakha wo 33. Atthari a Yesu ookhalaka 120 yaanoothukumana nnupani, isaala yooculu. (Mite. 1:13-15; 2:1) Nihinaphiya nno nihukunno, Yesu ahowiirela wiira ayo ahikhume u Yerusalemu, kontha yaanaahala waakhela itthuvo yuulupale. (Mite 1:4, 5) Isiyani yaakhumelenle-tho?
2 “Woohipica, yaaheewiya itthu yoonyakula wiirimu, yoolikanaca niiphyoo yuulupale.” Iyo itthwiiyo yahocara mpaani motheene. Vano, khula ntthari a Yesu yahomweemela wanru “itthu yoopharela toko malimi omooro,” ni atthari otheene “wahaacarela nnepa wowaarya.” (Mite 2:2-4) Ni ayo mananna ootikhinihaayo, Yehova ahovaha nnepa wowaarya ile ikhurupwiile. (Mite. 1:8) Ayo phaatthu apacenre uthanliya ni nnepa wowaarya * ni uvahiya niweherero noorwaa wahoolo ulamulela nkhayi ni Yesu wiirimu.
INONKHUMELELA ISIYANI NTTHU ATHANLIYAKA?
3. Kontha isiyani makristau yaari nihuku no Pentekositi yaanaakupali wiira yahothanliya ni nnepa wowaarya?
3 Weeva unari ntthari mmoca a Yesu waathukumanne mpaani u Yerusalemu, khawaahala uliyala nne nihukunne. Ni khawaahala uvaanyiha mena vakaani wiira uhothanliya ni nnepa wowaarya. Kontha itthu yookhala toko mooro yahoweemela wanru ni weeva wahancera wuuluma iluuka cene! (Mite. 2:5-12) Masi niireke atthu otheene anthaliya ni mananna mamocaaru? Mena. Nincuwela cani iyo?
4. Niireke atthu otheene oseekulu yoopacera, yaakhenle nnepa wowaarya ukati mmocaaru? Utaphulele.
4 Woopacera, nttwee noone ukatini ntthu unthanliyaawe. Atthu yaathanliye nihuku no Pentekositi o mwaakha wo 33, khayaari paahi atthari 120. Uvira waya ukati nenne nihukunne, atthu ookhalaka 3.000 yahaakhela nnepa wowaarya. Ayo yaathanliye ukati waapattisiyaaya. (Mite. 2:37, 38, 41) Masi uvira waya myaakha, khunakhala wiira makristau oothanliya otheene yaakhenle nnepa wowaarya ukati waapattisiyaaya. Atthu o Samariya yaathanliye ni nnepa wowaarya unavinre ukati waapattisiyaaya. (Mite. 8:14-17) Ni itthu imoca yoovirikana, phiile yankhumelenle Korneeliyu ni atthu yaakhala uwanuwawe. Ayo yaathanliye ni nnepa wowaarya ahinaaya upattisiya.—Mite. 10:44-48.
5. Toko cinthoonyeraaya 2 Akorintu 1:21, 22, isiyani inonkhumelela ntthu athanliyaka ni nnepa wowaarya?
5 Vano, nttwee noone isiyani inonkhumelela ntthu athanliyaka ni nnepa wowaarya. Woopacera, atthu akiina unawaarika utthuna wiira ahothanliya ni Nluku. Ayo anawiikoha: ‘Nlattuni Nluku waahalaawe ukithanla miiva?’ Masi ahaavo atthu akhwaawe ahineecoona commo. Hataa ukhalaka cani, Paulu hotaphulela itthu inaakhumelela otheene ale anthanliya: “Ukati waaminniinyu, Nluku, mwa ncina nawe uyo, hootthittani * ni nnepa wowaarya ukhuluvelihiye, ukhanle nikhuluveliho notthuvo inhaleehu waakhela.” (Efesu 1:13, 14; niwehero.) Iyo maanaaya wiira Yehova avarelaka nteko nnepa wowaarya, nawaathoonyera ayo makristau ayo wiira ahothanliya. Commo, nnepa wowaarya unkhala “nikhuluveliho” ninaakupaliha wiira anhala urwaa ukhala wiirimu mpaka, kahi watuninyani.—Usome 2 Akorintu 1:21, 22. *
6. Isiyani nkristau inlamuliyaawe upanka wiira aakhele itthuvwaawe yo wiirimu?
6 Nkristau athanliyaka, niireke iyo inthoonyera wiira uyo haakhela itthuvwaawe? Mena. Uyo naakupali wiira hothanliya wiira arwee wiirimu. Masi uyo haana oopuwelaka ila ikanweela: “Mayamunna, mwiikurumice uvarelela cinene wiihaniya winyu ni uthanliya winyu, kontha mwaahihiyeke upanka nnya citthunnya, khannohala uvonya.” (2 Pet. 1:10) Phimaana, hataa ukhalaka wiira nkristau hothanliya wiira arwee wiirimu, uyo nhala waakhela itthuvo aahihiyeke ukhala ookhuluvelya.—Afili. 3:12-14; Mabere. 3:1; Apoka. 2:10.
NTTHU NCUWELA CANI WIIRA HOTHANLIYA?
7. Makristau oothanliya ancuwela cani wiira aholattuliya urwaa ukhala wiirimu?
7 Masi ntthu ncuwela cani wiira hothanliya urwaa ukookhala wiirimu? Waakhuliya waya, unawoonannya nhina moolumo Paulu yaawantikhenlyaawe makristau o Rooma, ‘yaathanliye wiira akhale owaarya.’ Uyo aheera: “Nyuuva khamwaakhenle nnepa wo wuukhalihani ipottha, waahala wuuphwanyihani tootho woova, masi mwaakhenle nnepa wo wuukhalihani asaana ni, nlattu wo uyo nnepooyo, ninaakhuwela niiraka: ‘Aba, Paapa!’ Nnepa yooyo unaavaha usaahiti ni nnepeehu wiira hiiva nikhanle asaana a Nluku.” (Aroo. 1:7; 8:15, 16) Coo, Nluku naavarela nteko nnepaawe wowaarya wiira anthoonyere ntthu wiira uyo holattuliya urwaa ukhala wiirimu.—1 Atesal. 2:12.
8. Toko cinthoonyeraaya 1 Joau 2:20, 27, kontha isiyani makristau oothanliya khanweherera uhimyereehiya ni ntthu nkhwaawe wiira ahothanliya awula mena?
8 Yehova nawaathoonyera sana-saana mmuru waya ni wanrimani waya wiira ayo ahothanliya urwaa ukhala wiirimu. (Usome 1 Joau 2:20, 27.) * Unawoonannya wiira makristau oothanliya ahaana yiitthucihiyaka ni Yehova wanlokoni, toko atthu akiina cineetthucihiyaaya. Masi ayo khanweherera uhimeryeehiya ni ntthu nkiina wiira akupali khampa ahothanliya awula mena. Yehova haakupaliha iyo ratta-raatta avarelaka nteko ikuru yooverihela irivo, nnepaawe wowaarya!
AYO ‘ANAAYARIYA-THO’
9. Toko cinthoonyeraaya Efesu 1:18, ntthu athanliyaka inonkhumelela isiyani?
9 Atthu enci anonswalela Nluku ilelo, atthunaka unawaarika ucuweleeha isiyani inonkhumelela ntthu athanliyaka ni nnepa wowaarya. Nlattuni unaarikaaya? Kontha ayo khanakhala atthu oothanliya ni nnepa wowaarya. Nluku wumpale apinaatamu wiira akhale watuninyani mpaka, kahi wiirimu. (Upha. 1:28; Isaa. 37:29) Masi Yehova holakela waathanla atthu akhwaawe wiira arwee yakhale wiirimu. Phimaana, Yehova anthanlaka ntthu, naarukunusa woowaakuvyaaca itthu yaawehereraawe ni moopuwelelwaawe uyo ntthuuyo, wiira apheele urwaa ukhala wiirimu.—Usome Efesu 1:18. *
10. Ntthu ‘uyariya-tho’ maanaaya isiyani? (Uwehe ciicammo niwehero no vathi ipaagina.)
10 Nkristau athanliyaka ni nnepa wowaarya, uyo ‘naayariya-tho,’ awula ‘naayariya wiirimu.’ * Yesu ciicammo hothoonyera wiira khunkhitirya unhimyera ntthu hithanliye mananna ntthu cineecoonaawe ‘ayariyaka-tho,’ awula ‘ayariyaka munnepani.’—Joau 3:3-8, niwehero.
11. Utaphulele manannani cinrukunuwaaya moopuwelelo a nkristau athanliyaka ni nnepa wowaarya.
11 Manannani cinrukunuwaaya moopuwelelo a nkristau athanliyaka ni nnepa wowaarya? Hinaaya uthanliya ni Yehova, uyo aaweherera ukhala watuninyani mpaka. Uyo aanaapheela cinene woona nihuku Yehova ninhalaawe umalamaliha citthu coohinamaana cotheene ni urukunusa ituninya wiira ikhale ipeephoni. Atthunaka uyo aanaayuupuwelaka amwaakhelelaka mmucayaawe awula mpatthannyaawe khwaale. Masi ukati uthwanliyaawe ni nnepa wowaarya, uyo nkristawuuyo hancera wuupuwela ni mananna makiina. Nlattuni? Khunakhala nlattu woohipheela-tho ukhala watuninyani, nlattu wookhala ni masukhuli awula wonkhumelela masakha. Ciicammo khunakhala nlattu wo wuupuwela wiira ukhala watuninyani mpaka, unaahala woocyeeha. Uhiya commo, uyo nancera wuupuwela ni mananna makiina kontha Yehova hovarela nteko nnepaawe wowaarya wiira arukunuse mananna cinoopuwelaawe nkristau, ni horukunusa niweherero nancivela cinene.
12. Toko cinthoonyeraaya 1 Peturu 1:3, 4, makristau oothanliya aneecoona cani nlattu wo niweherero nirinaaya?
12 Nkristau oothanliya atthunaka noopuwela wiira khunomphwanela ukhalana iyo iparakheeyo. Hataa ukhalaka commo, uyo naakupaleeha sana-saana wiira Yehova honthanla. Uyo ciicammo naatteeliya cinene ni naasukhuru nlattu wo niweherero nirinaawe noohala urwaa ukhala wiirimu.—Usome 1 Peturu 1:3, 4. *
13. Makristau oothanliya anoonela cani ukumi urinaaya watuninyani?
13 Niireke iyo maanaaya wiira makristau oothanliya anawunlela ukhwa? Apostolu Paulu nawaakhula nno nikohonno. Uyo holattaniha irutthu yo makristau oothanliya ni heema, eeraka co: “Khweeliini, hiiva nikhanle nhina ula heemoola, ninawiipulela nlattu woosuphiya, kontha khanimpheela unhiya ula heemoola, masi nimpheela wiiwariha nkhwaawe, wiira ile ikhanle yookhwa imalamalihiye nuukumi.” (2 Akor. 5:4) Khunakhala wiira makristau oothanliya khunaaciva-tho ukumi watuninyani ni ampheela wiira woohipica akhwe. Uhiya commo, ayo unawaacivela ukumi ni ampheela uvarela nteko khula nihuku wiira answalele Yehova wamoca naamucyaaya ni apatthannyaaya. Hataa ukhalaka commo ni hataa yapankaka isiyani, makristau oothanliya anawuupuwela niweherero nomaana noohoolo nirinaaya.—1 Akor. 15:53; 2 Pet. 1:4; 1 Jo. 3:2, 3; Apoka. 20:6.
NIIREKE WEEVA UHOTHANLIYA NI YEHOVA?
14. Isiyani ihinthoonyera wiira ntthu hothanliya ni nnepa wowaarya?
14 Weeva atthunaka unawiikoha khampa uhothanliya ni nnepa wowaarya awula mena. Wakhala wiira unawiikoha, wuupuwele ala makoho moolupalyaala: Unawuucivela cinene upanka impheelaawe Yehova? Unawiicoona ukhala ntthu o wiikurumica wuulalyeerani? Ukhanle namasoma Ibiiblya o wiikurumica ni unawuucivela cinene wiitthuca “citthu cuulupale ca Nluku”? (1 Akor. 2:10) Unawoona wiira Yehova naacaaliha nteko woolalyeera unvaraa? Wanrimani waa, unaapheela cinene waakavihera akhwaa wiitthuca myaha ca Yehova? Unawoona mananna menci Yehova cinookaviheraawe muukumini waa? Wakhala wiira uhaakhula “iyee” makoho otheene ala, niireke iyo inthoonyera wiira weeva uhothanliya ni nnepa wowaarya? Mena, iyo khinathoonyera wiira weeva uhothanliya. Kontha isiyani? Kontha atthu otheene anonswalela Yehova pooti wiicoona commo, hataa yakhalaka oothanliya awula mena. Ni Yehova, avarelaka nteko nnepaawe wowaarya, pooti waavaha ikuru cimocaaru atthu otheene anonswalela, hataa ukhalaka wiira anweherera urwaa wiirimu awula mena. Ikhweeli phiila: wakhala wiira weeva unawiikoha khampa uhothanliya awula mena, iyo inthoonyera wiira weeva khuthanliye. Ale anthanliya ni Yehova khaneekoha khampa ahothanliya awula mena. Ayo anaakupali sana-saana wiira ahothanliya!
Yehova ahovarela nteko nnepaawe wowaarya wiira aavahe Aparahaamu, Sara, Davidi, Joau Mpattisa ikuru caahala waakhitiriha upanka citthu cootikhiniha, masi Yehova khaavarenle nteko nnepa wowaarya wiira aathanle urwaa ukhala wiirimu (Uwehe iparaagarafu 15-16) *
15. Nincuwela cani wiira atthu otheene yaakhenle nnepa wowaarya wa Nluku khayaathanliye wiira arwee yakhale wiirimu?
15 Mbiiblyani motheene, anawuulumiya atthu enci yaathoonyenre waamini yaakhenle nnepa wowaarya. Hataa ukhalaka wiira ayo yahaakhela nnepa wowaarya, ayo khayaathanliye wiira arwee yakhale wiirimu. Davidi aanaweettiheriya ni nnepa wowaarya. (1 Sam. 16:13) Nnepa wowaarya wahonkavihera wiiweeha citthu cuulupale ca Yehova ni wahomweettihera wiira antikhe miphantte co mbiiblyani. (Mark. 12:36) Hataa ukhalaka commo, apostolu Peturu heera wiira Davidi “kharwaale wiirimu.” (Mite. 2:34) Joau Mpattisa aari nlopwana ‘wancanre nnepa wowaarya.’ (Luka 1:13-16) Yesu aheera wiira khaarivo nlopwana nkiina ompwaha Joau, masi ciicammo aheera wiira Joau khaahala upanka mphantte nhina Umwene wo wiirimu. (Mat. 11:10, 11) Yehova ahovarela nteko nnepaawe wowaarya wiira aavahe ayo alopwanaayo ikuru caahala waakhitiriha upanka citthu cootikhiniha, masi Yehova khaavarenle nteko nnepa wowaarya wiira aathanle urwaa ukhala wiirimu. Niireke iyo maanaaya wiira ayo atthwaayo khayaari ookhuluvelya cinene wowaalikanana ale anthanliya urwaa ulamulela wiirimu? Mena. Iyo inthoonyera wiira Yehova naahala uwunweleliha wiira arwee yakhale wapeephoni watuninyani.—Joau 5:28, 29; Mite. 24:15.
16. Iparakhani inwehereraaya waakhela atthu enci anonswalela Nluku ilelo?
16 Atthu enci anonswalela Nluku ilelo ntuninyani, khanweherera urwaa ukhala wiirimu. Toko Aparahaamu, Sara, Davidi, Joau Mpattisa, alopwana ni athiyana ookhuluvelya enci o khalayi, ayo anaapheela cinene wiira uphiye ukati ituninya yotheene inhalaaya ulamuleliya ni Umwene wa Nluku.—Mabere. 11:10.
17. Makohoni anhala waakhuliya nhina mwaha nkiina unhaleehu usoma?
17 Ukhala wiira makristau oothanliya akiina nanlelo ari wamoca ni hiiva ilelo, ahaavo makoho ankhumelela. (Apoka. 12:17) Toko ala: Manannani makristau oothanliya cinlamuliyaaya wiiwehera? Ntthu o wanlokoni waa anceraka ukhuura iphaawu ni uwurya iviinyu wanuupuweleloni, weeva unlamuliya unwehera cani? Ni wakhalaka wiira makristau oothanliya ari mowuncerya, weeva uhaana ukhalaka ni masukhuli nlattu wo iyo? Mwaha nkhwaawe unhaleehu usoma, unaahala waakhula ayo makohwaayo.
^ par. 5 Ukhuma nihuku no Pentekositi o mwaakha wo 33, Yehova nawaavaha makristau akhwaawe niweherero nomaana—urwaa ulamulela wiirimu nkhayi ni Mwanawe. Masi ayo ancuwela cani wiira ahothanliya ukhalana iyo iparakheeyo? Isiyani inonkhumelela ntthu alattuliyaka urwaa ulamulela wiirimu? Ula mwahoola unlipiheriya ni mwaha nkiina waakumiheriye nrevistani Ukhalenla yo Janeiro 2016. Ula mwahoola unaahala waakhula ayo makoho ootikhinihaayo.
^ par. 2 NUULUMO NOOTAPHULELIYA: Uthanliya ni nnepa wowaarya: Yehova naavarela nteko nnepaawe wowaarya wiira aathanle ale anhala urwaa ulamulela nkhayi ni Yesu wiirimu. Ni nnepaawe wowaarya, Yehova nawaavaha ayo atthwaayo niweherero, awula “nikhuluveliho,” noohoolo. (Efesu 1:13, 14) Ayo makristau ayo pooti waneeraaya wiira nnepa wowaarya “unaavaha usaahiti,” awula unawaathoonyera sana-saana wiira ayo anweherera urwaa wiirimu.—Aroo. 8:16.
^ par. 5 NUULUMO NOOTAPHULELIYA: Utthittiya. Ntthu naakhela iseelu awula ntthittiya khuliiru uhaleelaka ukati vakaani hinaaya ukhwa awula, wahoolo, uhalaka ukati vakaani wiira yancere masakha moolupale.—Efesu 4:30; Apoka. 7:2-4; Uwehe mwaha “Perguntas dos Leitores”, nhina irevista Ukhalenla yo Abril 2016 (yeekunya).
^ par. 5 2 Akorintu 1:21 Masi ule nonikhuluveliha wiira hiiva ni nyuuva nikhanle atthu a Kristu ni ule nithanlanle, khanle Nluku. 22 Uyo ciicammo honitthitta ni honivaha wanrimani wihu nikhuluveliho no citthu cinhala uwa, ukhanle nnepa.
^ par. 8 1 Joau 2:20 Ni nyuuva nhaana uthanliya winyu mwaakhenleenyu ni ule khanle oowaarya ni otheene cinyu nnaacuwela. 27 Ni nyuuva, wuuthanlani wawe khunoomalelani, ni khannoweherera wiira ntthu nkhwaawe awiitthuciheni. Masi wuuthanlani wawe unaawiitthucihani citthu cotheene, kontha ukhanle weekhweeli ni khunakhala wowoothiya. Toko cinwiitthucihannyaaya, nhihiye ukhala wamoca nuuyo.
^ par. 9 Efesu 1:18 Uyo homwaleela meetho o nrimeenyu, wiira ncuwele niwehereroni niwiihanenlyaaweni, mihakhuni coottitthima cuusunkenryaaweni khampa itthuvo yoohiyeriya yaatthu owaarya.
^ par. 10 Wapheela ucuweleeha ‘uyariya-tho’ maanaaya isiyani, uwehe irevista Ukhalenla 1 yo Abril 2009, ipaagina 3-12 (yeekunya).
^ par. 12 1 Peturu 1:3 Attitthimihiye Nluku ni Apaapaawe Pwiiyeehu Yesu Kristu, kontha, niikiriri caya cuulupale, ahoniphwanyiha uyariya wo naanaano wiira nikhalane niweherero neekhweeli nlattu wo wunwelelihiya muukhwani Yesu Kristu, 4 wiira nikhalane itthuvo yoohimala, yoohinihirihiri ni ihinfuttya. Iyo ikhanle itthuvo isunkeriyeenyu wiirimu.
NCIPO 27 A Vitória dos Filhos de Deus
^ par. 61 ILATARATO: Hataa ukhalaka wiira ninootthukeliya nkhattya nlattu wo waamini wihu awula niri ootaphuwa wiira nilalyeere ni niitthucihe ikhweeli, hiiva ninaaweherera cinene ukhala watuninyani ukati Umwene wa Nluku unhalaaya ulamulela.
