CIPANDE CA KUSAMBILILAMO 4
“Umupasi Uwineco Ukasimika Unte”
“Umupasi uwineco ukasimika unte nu mupasi witu ukuti sweswe ana yakwe Leza.”—LOMA 8:16, NWT.
LWIMBO NA. 25 Antu Yakwe Leza Aiyeele
VINO TUMASAMBILILAPO *
Yeova wapongolwelile mupasi wakwe mu cizungusyo pa Pentekositi lino Aina Klistu 120 yalonganyile (Lolini mapalaglafu 1-2)
1-2. I cizungusyo ci icacitike pa Pentekositi mu 33 C.E.?
CALI a pa Mulungu mu Yelusalemu. Nupya wali uwanda wa Pentekositi mu 33 C.E. Iumba lya yasambi 120 lyalonganyile mu muputule wa mu ng’anda uwa papela. (Mili. 1:13-15; 2:1) Lino kwasiile sile amanda anono ukuti uwanda uwo ufike, Yesu wayanenyile ukutwalilila ukuya umu Yelusalemu pano yali nu kupokelela upe uiyele. (Mili. 1:4, 5) I vyani vyacitike lyene?
2 “Mu kupumikizya iciunda cikoline wa cipupu cikulu cuvwika kufuma kwi yulu.” Iciunda cuvwikike ing’anda yonsi. Lyene “cimbilimbili ca moto ciputokele, cikuloleka wa lulimi” cikazile pa mitwe ya yasambi, nupya yonsi “yazuziwe nu mupasi wa muzilo.” (Mili. 2:2-4, NWT.) Mu cizungusyo, Yeova wapongolwelile umupasi wa muzilo pa antu yaya. (Mili. 1:8) Yali ali ya kutandikilako ukupakwa nu mupasi wa muzilo * nu kupeelwa upalilo wa kuteeka pamwi na Yesu ukwi yulu.
I VYANI VIKACITIKA NGU MUNTU WAPAKWA NU MUPASI WA MUZILO?
3. U mulandu ci uno aapasilwe pa wanda wa Pentekositi yatatwisikilanga nga yapasilwe nu mupasi wa muzilo?
3 Ndi cakuti mwali pa asambi yaya alongine mu muputule wa papela, nga mutilila ivyacitike uwanda uwa. Cimwi icali wa lulimi lwa moto cizile nu kwikala pa mutwe winu imutandika nu kuvwanga umu ndimi zipusanepusane. (Mili. 2:5-12) Nga mutaatwisikanga ukuti imupakwa nu mupasi wa muzilo. Nomba uzye yonsi akapakwa nu mupasi wa muzilo yakapakwa mu cizungusyo nupya pa nsita ili imwi na yauze? Awe. Twamanya uli vivyo?
4. Uzye apakwe yonsi aliko mu nsita ya Ina Klistu akutandikilako yapasilwe pa nsita yonga? Londololini.
4 Lekini tulande pali lino umwi angapakwa. Asi iumba sile ilya Ina Klistu yaya 120 aapasilwe nu mupasi wa muzilo pa Pentekositi, mu 33 C.E. Pa nsita yuze uwanda kwene uli umwi, antu mupipi na 3,000 yauze yapokelile umupasi wa muzilo uno Yesu wayalavile ukuti alayatumila. Yapasilwe pa cisila ca kuwatiziwa. (Mili. 2:37, 38, 41) Nomba imyaka iyalondelilepo, asi Aina Klistu yonsi apakwe apasilwe pa cisila ca kuwatiziwa. Aina Samaliya yapasilwe ale ipapita insita kufuma pano yawatiziwilwe. (Mili. 8:14-17) Nupya kupakwa kwakwe Koneli na amu ng’anda yakwe kwene kwapusineko, pano yene yapasilwe ala yatatala yawatiziwa.—Mili. 10:44-48.
5. Ukulingana ni lembelo lyakwe 2 Kolinto 1:21, 22, i vyani vikacitika ndi cakuti umwi wapakwa nu mupasi wa muzilo?
5 Lekini tulande na pali vino vikacitika ngu muntu wapakwa nu mupasi wa muzilo. Yamwi apakwe cikayatalila ukuzumila ukuti Yeova watayasoolola. Yakatandika ukwelenganya ukuti: ‘U mulandu ci uno Leza wasoolwela sile nene?’ Yauze yene asi vino yakayuvwa. Asi mulandu na vino umuntu angayuvwa, mutumwa Paulo walondolwile ivikacitika kuli yonsi apakwe, watiile: “Lino mwataile, Leza wamupeezile umupasi wa muzilo uno mwalavilwe ukuya usininkizyo * wa kulanga ukuti mwemwe antu yakwe.” (Efes. 1:13, 14, NWT.) Fwandi Yeova akaomvya umupasi wa muzilo ukuleka Aina Klistu yayo yasininkizye ukuti mu cumi cumi wayasoolola. Umu nzila ii, umupasi wa muzilo waya ali ‘usininkizyo [ali ulayo]’ uno ukapeelwa kuno yali kuti yasininkizye ukuti uku nkoleelo yalikala amanda pe ukwi yulu asi pano nsi foo.—Welengini 2 Kolinto 1:21, 22.
6. I vyani vino Umwina Klistu mupakwe alinzile kucita pakuti akapokelele cilambu cakuya ukwi yulu?
6 Uzye Umwina Klistu nga wapakwa ala casila alaya ukwi yulu? Awe foo. Alinzile kusininkizya ukuti wasoololwa ukuya ukwi yulu. Nomba alinzile ukwiusya icisinka cii: “Caleka, inane ezyini na maka kucita consi icingalanga ukuti Leza wamwama nupya wamusolola. Ndi mwatwalilila kucita cii, ale lyene mutalatala mupone mu utailo winu.” (2 Pet. 1:10) Fwandi, nanti icakuti umwina Klistu watasoololwa ukuya ukwi yulu, alapokelela sile icilambu nga watwalilila ukuya uwa cisinka.—Filipi 3:12-14; Ayeb. 3:1; Umbw. 2:10.
UZYE UMUNTU ANGAMANYA ULI UKUTI WATAPAKWA?
7. Uzye apakwe yakamanya uli ukuti yamwa ukuya ukwi yulu?
7 Uzye umuntu angamanya uli ukuti wakwata icilambu ca kuya ukwi yulu? Icasuko caya umu mazwi yano Paulo walembille aina Loma aamwanga ukuti “antu yakwe amuzilo.” Wayanenyile ukuti: “Umupasi uno Leza wamupeela asi mupasi wakumucita azya nu kumulenga ukuya ni intete. Lelo umupasi ukamulenga ukuya ana yakwe Leza nga nu kupitila mu maka yakwe. Tukalilila Leza tuti, ‘Abba, Tata!’ Umupasi uwineco ukasimika unte nu mupasi witu ukuti sweswe ana yakwe Leza.” (Loma 1:7; 8:15, 16, NWT.) Fwandi Leza akaomvya umupasi wa muzilo kuleka apakwe yamanye ukuti yamwa ukuya ukwi yulu.—1 Tesa. 2:12.
8. Uzye 1 Yoane 2:20, 27 ikalangilila uli ukuti Aina Klistu apakwe yatalinzile ukulolela yauze kuyanena ukuti yapakwa?
8 Yeova asileka apakwe yatwisika ukuti yamwa ukuya ukwi yulu. (Welengini 1 Yoane 2:20, 27.) Kuya kwene, Aina Klistu apakwe nayo kwene yalinzile ukusambiliziwa na Yeova lino yali pa kulongana wakwe vino cikaaya ku antu yonsi. Nomba yatalinzile kuloleela yauze kuyanena ukuti yapakwa. Yeova waomvya amaka yakwe, kuli kuti mupasi wa muzilo ku kulenga yasininkizye ukuti yapakwa!
YAKAVYALWA “IILA LYAKWE CIILI”
9. Lino umwi wapakwa, u kusenuka ci ukukacitika ukulingana na vino Efeso 1:18 ikalondolola?
9 Aomvi yakwe Leza aingi ndakai cikayatalila sana ukuvwikisya ivikacitika lino Leza wapaka umwi. U mulandu ci? Pano yene yatapakwa. Leza waumvile antu ukuti yaikala amanda pe pano nsi, asi kwi yulu foo. (Utan. 1:28; Masa. 37:29) Nomba Yeova wasoolola yamwi ukuyaikala ukwi yulu. Fwandi lino wayapaka, akasenula upalilo wao ni myelenganyizizye, pakuti iyatandika kupaalila kuipakizya umi wa kwi yulu.—Welengini Efeso 1:18.
10. Uzye cikasenula cani kuvyalwa “iila lyakwe ciili”? (Lolini futunoti.)
10 Lino Aina Klistu yapakwa nu mupasi wa muzilo, yakavyalwa “iila lyakwe ciili.” * Yesu walangilile ukuti tutange tulondolwele umuntu aatapakwa vino cikauvwika “kuvyalwa iila lyakwe ciili” nanti ‘kuvyalwa ku mupasi wa muzilo.’—Yoa. 3:3-8.
11. Londololini kusenuka ukukacitika lino umwi wapakwa.
11 Uzye Aina Klistu yakatandika ukwelenganya uli mu nzila iiyele nga yapakwa? Lino Yeova atatala wapaka Aina Klistu yaa, yakweti upalilo wa kwikala amanda pe pano nsi. Yalondesyanga ukwizayako pa nsita ino Yeova alafumyapo uyi onsi nu kulenga insi ukuya paladaise. Yafwile yelenganyanga pa kwizazengela ya lupwa yao nanti cuza wao uwafwa. Nomba lino yapasilwe, amelenganyo yao yasenwike. U mulandu ci? Yatatandike ukwelenganya ukuti ukwikala pano nsi kulayuvwisya ukasu. Yatatandike ukwelenganya ivipusaneko pa mulandu wa kucuula sana. Yatatandike papo kwene sile kulola ukuti ukwikala pano nsi manda pe kutalazipa. Lelo, Yeova waomvizye mupasi wakwe uwa muzilo kusenula amelenganyo yao na vino yelenganyanga pa upalilo uno yatemilwe sana.
12. Kulingana na 1 Petulo 1:3, 4, uzye Aina Klistu apakwe yakauvwa uli pa upalilo uno yakwata?
12 Umwi nga wapakwa limwi angatandika ukuyuvwa ukuti atalinzile api syuko lino wapeelwa. Nomba asitwisika nanti panono ukuti Yeova wamusoolola. Akaya ni nsansa nu kulataizya nga welenganya pa upalilo wa kuya ukwi yulu.—Welengini 1 Petulo 1:3, 4.
13. Uzye apakwe yakauvwa uli ukwikala pano nsi?
13 Uzye lyene cii cikusenula ukuti apakwe yakalonda ukufwa? Mutumwa Paulo wasuka iuzyo lilyo. Wakolinye umwili wa muntu ukwi taalu watile: “Swemuno tuli mu mutanda uu [umwi taalu] tukanyomelwa nupya tukateta. Tusyalonda kusya mili ino ilafwa, lelo tukalonda kuzwalilapo yuze ino italatala ifwe. Pakuti icikafwa cizimiwe ni cisyafwa.” (2 Kol. 5:4) Aina Klistu yaa yasilola umi pano nsi ukuti utazipa, nupya yasilonda nu kufwa zuwa. Nomba yakaipakizya umi nupya yakalonda ukulaombela Yeova pamwi na ya lupwa na ya cuza yao cila wanda. Lelo asi mulandu na vino yakucita, lyonsi yakaelenganya pa upalilo uno yakwata pali vino vilayacitikila uku nkoleelo.—1 Kol. 15:53; 2 Pet. 1:4; 1 Yoa. 3:2, 3; Umbw. 20:6.
UZYE YEOVA WAMUPAKA?
14. I vyani visilenga umuntu ukumanyikwa ukuti wapakwa?
14 Limwi mukasakamala ndi cakuti mwapakwa nu mupasi wa muzilo. Ngi cakuti avino cili, elenganyini pa mauzyo yaa acindame: Uzye mukalondesya ukucita ukulonda kwakwe Leza? Uzye mukauvwa ukuti mwaya sana acicincile umu mulimo wa kusimikila? Uzye mukaipakizya ukuwelenga Izwi Lyakwe Leza nu kusambilila pa “vizike vya mapange yakwe Leza”? (1 Kol. 2:10) Uzye mukauvwa ukuti Yeova wamwazwa ukuomba ningo umu mulimo wa kusimikila? Uzye mukalola ukuti mwakwata umulimo ukulu uwa kwazwa yauze ukusambilila pali Yeova? Uzye mwalola ukuti Yeova wamwazwa umu nzila izingi umu umi winu muno mwalondekwanga uwazwilizyo? Ndi cakuti mwasuka ee uku mauzyo yaa yonsi, uzye cikulangilila ukuti mwamwa ukuya ukwi yulu? Awe foo. U mulandu ci? Pa mulandu wakuti aomvi yakwe Leza yonsi avino yakayuvwa, yaye apakwe nanti foo. Nupya pa mulandu nu mupasi wa muzilo, Yeova angamupeela amaka ali yamwi na yano akapeela aomvi yakwe yonsi, asi mulandu nu upalilo uno yakwata. Nupya, nga mukutwisika ndi cakuti mwapakwa nu mupasi wa muzilo, ala ukutwisika kuko kukupiliula ukuti mutapakwa. Yonsi yano Yeova wama yasitwisika ndi cakuti yapakwa nanti foo. Yamanya ningo sana ukuti yapakwa!
Yeova waomvizye umupasi wakwe uwa muzilo pa kupeela Abulaamu, Sala, Davidi na Yoane Kawatizya amaka ya kucita ivintu ivikulu, nomba ataomvizye umupasi kwene uu kuyapeela upalilo wa kwikala ukwi yulu (Lolini mapalaglafu 15-16) *
15. Uzye twamanya uli ukuti asi yonsi aapokelela umupasi wakwe Leza asoololwa ukuya ukwi yulu?
15 Muli Baibo mwaya antu aingi alandwapo aali nu utailo nupya aapokelile umupasi wa muzilo, nomba yatakweti upalilo wa kwikala ukwi yulu. Davidi watungululwanga nu mupasi wa muzilo. (1 Sam. 16:13) Umupasi wa muzilo wamwazwilizye ukumanya ningo ivintu ivizike pali Yeova nupya wamutungulwile nu kulemba iviputulwa vimwi ivya muli Baibo. (Mako 12:36) Nanti ciye vivyo umutumwa Petulo walanzile pali Davidi ukuti “atakwezile kwi yulu.” (Mili. 2:34) Yoane Kawatizya wali na “maka ya mupasi wa muzilo.” (Luka 1:13-16) Yesu walanzile ukuti kutaali umuntu ali wensi uwalusile Yoane, nomba lyene walanzile ukuti Yoane ataali apa yantu alateeka umu Wene. (Mate. 11:10, 11) Yeova waomvizye umupasi wa muzilo ukupeela aonsi yaa amaka akucita ivintu ivikulu, nomba ataomvizye umupasi kwene uu kuyapeela upalilo wa kwikala ukwi yulu. Uzye cii cikupiliula ukuti yakweti utailo unono ukucila yayo aasoololwa ukuya ukwi yulu? Awe foo. Cikupiliula sile ukuti Yeova alayatuutulula nu kuyapeela umi wa kwikala pano nsi.—Yoa. 5:28, 29; Mili. 24:15.
16. I cilambu ci cino aomvi yakwe Leza aingi yakaloleela?
16 Aomvi yakwe Leza aingi ayako ndakai, yatakwata upalilo wa kuya ukwi yulu. Wakwe Abulaamu, Sala, Yoane Kawatizya alino na onsi na anaci yauze, yalikala pa mpanga ya pansi lino Uwene wakwe Leza ulateeka.—Ayeb. 11:10.
17. A mauzyo cii aalasukwa mu cipande icilondelilepo?
17 Ndakai kwaya apakwe acili pamwi naswe, fwandi limwi tungakwata mauzyo yamwi. (Umbw. 12:17) Uzye apakwe yalinzile kuilola uli? Ndi cakuti umwi mu cilongano cinu watandika ukulya ivinkolanya, mulinzile kumulola uli? Nupya nga ndi cakuti impendwa ya apakwe ikuya ikukulilako sile, mungacita uli? Uzye cingalenga musakamale? Tulaasuka mauzyo yaa mu cipande cilondelilepo.
^ pala. 5 Kufuma pa Pentekositi wa mu 33 C.E., Yeova akapeela Aina Klistu yamwi upalilo wa kuteeka nu Mwanakwe ukwi yulu. Uzye lyene, Aina Klistu yaa yakamanya uli ukuti iyasoololwa nu kupeelwa isyuko lii? I vyani vikacitika nga Yeova wama umwi ukuya ukwi yulu? Cipande cii cimalanda pa vyeo ivyalanzilwepo mu Lupungu Lwa Mulinzi lwakwe Januwale 2016. Cimaasuka mauzyo yano antu yakalondesya kumanya.
^ pala. 2 IZWI ILYATILILONDOLOLWA: Kupakwa nu mupasi wa muzilo: Yeova akaomvya umupasi wa muzilo ukusoolola antu aalateeka pamwi na Yesu ukwi yulu. Ukupitila umu mupasi wakwe, Leza akapeela umuntu wino wasoolola ulayo wa ku nkoleelo nanti ‘usininkizyo.’ (Efes. 1:13, 14) Aina Klistu yaa yangati umupasi wa muzilo “ukasimika unte,” nanti ukulenga yasininkizye ukuti icilambu cao i ca kwi yulu.—Loma 8:16.
^ pala. 5 IZWI ILYATILILONDOLOLWA: Usininkizyo. Usininkizyo uu usiyelelela ukufikila lino umuntu wafwa uwa cisinka nanti lino kwasyala panono ukuti ucuzi ukulu cuze utandike.—Efeso 4:30; Umbwilo 7:2-4; Lolini Mauzyo Yano Aakawelenga Yakauzya mu Lupungu Lwa Mulinzi lwakwe Epuleo 2016.
LWIMBO NA. 27 Ana Yakwe Leza Apakwe Yasya Yasokololwe
^ pala. 57 ULONDOLOZI WA CIKOPE: Asi mulandu twanyepwa pa mulandu nu utailo nanti twakwata untungwa wa kusimikila nu kusambilizya antu icumi, tungataila ukuti tulikala mu nsi lino Uwene wakwe Leza ulatuteeka.
