1-2. Acintu ci icakuzungusya cino cacitisile pa wanda wa Pentekosti mu mwaka wa 33?

CALINJI apa sabata umutondo tondo mu Yerusalemu pa wanda wa Pentekosti mu mwaka wa 33 C.E. Apano awasambi ukufika kwe 120 walongine mu muputule wa papela. (Imili. 1:13-15; 2:1) Patazimvile ukufumilila pano e Yesu wawanenile ukuti watize wafume mu Yerusalemu amuno walinji nu kupocelele ica wila iciyiwele. (Imili. 1:4, 5) Uzye acani cino cacitisile pe wo-o uwanda?

² ‘Mu kupumincizya vye awivwa icongo cafuma mupela ngati akupuupa kwa muza uwukalambane.’ Icongo cizula ing’anda yonsinye. Nga ‘indimi izikole umulilo’ aziloleka pa mitwe ya wasambi, wonsinye ‘awizulamo umuzimu wutele.’(Imili. 2:2-4) Yo-o ayili inzila yino Yehova wawomvizye pa kupongololela umuzimu wutele pe wa-a awantu. (Imili. 1:8) Awano walinji awantu wa kutalicila ukupakwa nu muzimu wutele * nu kuwa ni suwilo lya kuteka ne Yesu mwi yulu.

3. Uzye wano walinji pa Pentekosti wasinincizizye wuli ukuti wapasilwe nu muzimu wutele?

³ Awasambi wano wawungine mu muputule wa papela mu Yerusalemu wafwile watiwilizile cino cacitisile pe wowo uwanda.  Pa mitwe yawo palinji vimwi vino vyalolekanga ngati amulilo swinya watalisile nu kulandila mu ndimi zinji. (Imili. 2:5-12) Fwandi watavwilikanga ukuti wapasilwe nu muzimu uwutele. Lelo vino vyacitisile pe wo-o uwanda asa vino vyacitikanga ku Wina Klistu wonsinye wano Leza wasolanga ukuwa ni suwilo lya kuya kwi yulu. Twamanya wuli?

4. Uzye awapakwe wonsinye mu mpindi ya watumwa, wapasilwe pa mpindi iyili yonganye? Londololani.

⁴ Twatalicila ukulanda impindi yino wumwi angapakwa. Asa wasambi vye 120 wano wapasilwe nu muzimu wutele pa Pentekosti mu mwaka wa 33, lelo kwalinji na wantu wanji mupipi ne 3,000 wano wapocelezile umuzimu wutele wulyanye uwanda. Wapasilwe nu muzimu wutele pa nsizi ya ku batizwa. (Imili. 2:37, 38, 41) Mu myaka yino yakonsilepo, asa Wina Klistu wonsi wano wapakwanga pano wabatizwa vye. Awina Samaria wizile awapakwa lyo wabatizwa kaali. (Imili. 8:14-17) E Korneli na wa mu lupwa lwakwe wapasilwe nu muzimu wutele lyo watani wabatizwe. Ala calinji acakuzungusya.​—Imili. 10:44-48.

5. Ukulingana ni waliko lye 2 Wakorinte 1:21, 22, cikawa wuli nga ca kuti umuntu wapakwa nu muzimu wutele?

⁵ Lekani nomba tulande vino cikawa umuntu nga wapakwa. Wamwi wano wakapakwa pa kutalika wakavilwa ukusinincizya ukuti e Yehova awasozile. Wakayiwuzya ukuti, ‘Amulandu ci wuno e Leza asolezile nene?’ Lelo kwe wanji asa vino cikawa. Asa mulandu na vino umuntu angayivwa nga wasolwa. Umutumwa Paulo walondolozile vino cikawa kwe wonsinye wano wapakwa ukuti: ‘Pano mwasuwizile, wamipile icifwati * nu ku milaya ukupitila mu muzimu wutele, acili icimanyilo ca kuti e Leza alitupa cino watulaya.’ (Efes. 1:13, 14) Fwandi e Yehova akawomvya umuzimu wutele pa kwavwa Umwina Klistu ukusinincizya ukuti apasilwe. Umuzimu wutele wukawa ‘acimanyilo akuli ukuti icilayo’ cino  cikalenga wasinincizye ukuti waliyikala umuyayaya kwi yulu.​—Wazyani 2 Wakorinte 1:21, 22.

6. Avyani vino umupakwe azipizile ukucita pa kuti ayize apocelele icilambu?

⁶ Umwina Klistu nga wapakwa cisisula ukuti lyo calala casila aliya kwi yulu. Kweni asivwilika ukuti wasolwa ukuya kwi yulu. Lelo azipizile ukwizuka ukusunda kwa mutumwa e Peter ukwa kuti: ‘Wanawitu acaleka lemasyanji muleke ukwitwa kwinu nu kusolwa kwinu kuwe akwa cisinka, amuno ndi mwatwalilila ukucita ivintu nye vyovyo mutalipotwa.’ (2 Pet. 1:10) Fwandi pa kuti umupakwe ayize apocelele icilambu ca kwi yulu azipizile ukutwalilila ni cisinka kwe Yehova.​—Flpi. 3:12-14; Hebe. 3:1; Ukuwu. 2:10.

7. Uzye awapakwe wakamanya wuli ukuti wasozilwe ukuya kwi yulu?

⁷ Uzye awapakwe wakamanya wuli ukuti wasozilwe ukuya kwi yulu? Icasuko cawa mwe vino umutumwa Paulo walembezile awina Roma wano Leza wasozile ‘nu kuwita ukuwa awatele.’ Wawanenile ukuti: ‘Amuno mutapocelezile umuzimu wa wuzya ukuti muwatina, lelo mwapocelezile umuzimu wa kuwa mwe wana, wonye umuzimu awuno wukalenga tuwapunda ukuti: ‘Abba, Tata!’ Umuzimu wa kwe Leza wukasinila umuzimu witu ukuti swe wana wa kwe Leza.’ (Roma. 1:7; 8:15, 16) Fwandi ukupitila mu muzimu wutele, e Leza akalenga awapakwe ukusinincizya ukuti wawa ni suwilo lya kuya kwi yulu.​—1 Tes. 2:12.

8. Uzye iwaliko lye 1 Yohani 2:20, 27, likalanjizya wuli ukuti Awina Klistu awapakwe wasivwambikwa uwili wensinye ukuwanena ukuti wapakwa?

⁸ E Yehova akalenga awapakwe watavwilika ukuti waliya kwi yulu. (Wazyani 1 Yohani 2:20, 27.) Kweni nawonye wazipizile ukusambilila kwe Yehova ukupitila mwi wungwe lyakwe wulyanye vino cikawa ku Wina Klistu wonsinye. Lelo pa kumanya ukuti wapakwa pasilondekwa nu wakuwanena. Amuno umuzimu wa kwe Yehova wuno wawa na maka nkaninye awuno wukawasinila!

9. Ukulingana na Waefeso 1:18, avyani vino vikapiluka ndi wumwi wapakwa?

⁹ Awawomvi wa kwe Leza awavule pe yo-o impindi watanga wivwicisye vino cikawa ndi wumwi wapakwa. Amulandu ci? Amuno watapakwa. Swinya, e Leza wapanzile awantu ukuti wakwikala mu nsi umuyayaya, asa kwikala kwi yulu. (Inta. 1:28; Amalu. 37:29) Lelo e Yehova akasola wamwi ukuti wize wikale kwi yulu. Acino nga wawasola, akapilula amasuwilo yawo na melenganyo yawo yonsinye pa kuti watalike ukwelenganya pa wumi wa kwi yulu.​—Wazyani Waefeso 1:18.

10. Uzye “ukukwatwa swinya” ku kasula cani? (Lolani ne fotunoti.)

¹⁰ Awina Klistu nga wapakwa nu muzimu wutele, “wakakwatwa swinya.” * E Yesu walanzile nu kuti citapepuka ukulondololela wino “atakwatwa swinya,” nanti “ukukwatwa ku muzimu” pa kuti ayivwicisye vino cikakwivwika ukupakwa nu muzimu wutele.​—Yoha. 3:3-8

11. Londololani vino amelenganyo yakapiluka nga ca kuti umuntu wapakwa.

¹¹ Uzye amelenganyo ya Mwina Klistu wino wapakwa yakapiluka wuli? Pano atani apakwe, akawa ni suwilo lya kwikala mu nsi umuyayaya. Akalondesya ukuti e Yehova ayize afumyepo iviwipe vyonsinye nu kulenga insi ukuwa paradaise. Pamwi akakwelenganya na vino aliwapocelela walupwa ni viwuza  wano wafwa. Nomba nga wapakwa amelenganyo yakwe yakapiluka. Amulandu ci wuno cikawela wo-o? Cino cikawela wo-o, citakusula ukuti akatalika ukwelenganya ukuti ukwikala mu nsi umuyayaya kutazipa, nanti ukutalika ukwelenganya wo-o pa mulandu wa ntazi nu kucula. Nanti ukwelenganya ukuti ukwikala mu nsi umuyayaya kulilenga ayize awakwivwa icitendwe. Lelo cino cikalenga, e Yehova akawomvya umuzimu wakwe uwutele ukupilula amelenganyo ni suwilo lino watemilwe nkaninye.

12. Ukulingana ne 1 Peter 1:3, 4, uzye Awina Klistu awapakwe wakakwivwa wuli pi suwilo lyawo?

¹² Nanti aca kuti wino wapakwa angayivwa ngati atafikapo ukupocelela lo-o ulongo uluyiwele, kweni asivwilika ukuti e Yehova wamusola. Lelo akawa sana ni nsansa swinya akasalifya nga welenganya pi suwilo lyakwe ilya kuya mu kwikala kwi yulu.​—Wazyani 1 Peter 1:3, 4.

13. Uzye awapakwe wakakwivwa wuli pa kuwa nu wumi mu nsi?

¹³ Uzye co-o cikusula ukuti awapakwe wakalondesya ukufwa? Umutumwa Paulo wasusile lyo-o iwuzyo. Pano walinginye imiwili yawo iya wuntu kwi tenti, watili: ‘Amuno sweswe swe wano tucili mwe lyo-o itenti tukalweta pa mulandu wa kuti twamwamilwa, asa pa mulandu wa kuti tukulonda ukulizula awe , lelo tukavwamba ukuzwala linji pa kuti pe lyo-o itenti lino likafwa, pize papyane ilya wumi.’ (2 Kor. 5:4) Awina Klistu awapakwe wasitendwa nu wumi wa mu nsi nu kutalika ukuvwambisya ukufwa zuwa. Wakayitopwa ukuwa nu wumi, swinya wakalondesya ukuwombela Yehova ponga ni ndupwa zyawo ni viwuza. Lelo wakakwelenganya pi suwilo lyawo ilya ku nkolelo mwe vyonsinye vino wakacita.​—1 Kor. 15:53; 2 Pet. 1:4; 1 Yoh. 3:2, 3; Ukuwu. 20:6.

14. Avyani vino visimanyisya umuntu ukuti wasolwa ukuya kwi yulu?

¹⁴ Pamwi mukavwilika nga ca kuti Yehova wa misola ukuya kwi yulu. Nga aca kuti mukalola ngati mwapakwa, yelenganyani pe ya-a amawuzyo: Uzye mukawombesya ukucita ukulonda kwa kwe Yehova? Uzye mukalola ukuti mukawombesya nkaninye mu mulimo wa kuwizya? Uzye mwatemwa sana ukusambilila Baibolo nu kusambilila ‘ iviwome ivya kwe Leza’? (1 Kor. 2:10) Uzye pa mulandu wavizima vino vyafumamo, mukalola ukuti e Yehova akamyavwa sana ukusambilizya awantu awavule icisinka ca mu Baibolo? Uzye mukavwambisya ukwavwa wanji ukusambilila pe Yehova? Uzye kwawa vino vyamiciticila mu wumi vino vikalanjizya ukuti e Yehova akamyavwa nkaninye? Nga ca kuti icasuko cinu kwe ya-a amawuzyo we ee, uzye cikusula ukuti lyo mwasoolwa ukuya kwi yulu? Awe, amulandu ci? Amuno awawomvi wa kwe Leza wonsinye nampo nga wapakwa nanti watapakwa nawonye avino wangasuka kwe ya-a amawuzyo. Swinya ukupitila mu muzimu wakwe uwutele, e Yehova angapa awawomvi wakwe amaka asa mulandu ni suwilo lino wawa nalyo. Fwandi nga mukavwilika lyo mutapakwa, amuno wano Yehova wasola wamanya, swinya wasivwilika nanti katicinye ukuti waliya kwi yulu!

15. Twamanya wuli ukuti asa wantu wonsinye wano wakapocelela umuzimu wutele wano waliya kwi yulu?

¹⁵ Mwe Baibolo mwawa ivya kulolelako ivivule ivya wantu wano walinji ni cisinka kwe Yehova swinya wano wapocelezile nu umuzimu wutele, lelo watasozilwe ukuya mu kwikala kwi yulu. E Davidi watungululwanga nu muzimu wutele. (1 Sam. 16:13) Umuzimu wutele wamwavwizye ukwivwicisya ivintu ivizike pe  Yehova, swinya wamwavwizye nu kulembako amabuku yamwi aya mu Baibolo. (Mar. 12:36) Lelo nanti aca kuti wawomvile imilimo yonsinye yo-o, umutumwa Peter walanzile ukuti e Davidi “atayile kwi yulu.” (Imili. 2:34) E Yohani Kabatizya “wizuzilemo nu muzimu wutele.” (Luka 1:13-16) E Yesu walanzile ukuti kutalinji wino wacindime ukucila e Yohani, lelo wizile alanda ukuti e Yohani atalinji nu kuwa mu Wufumu wa mwi yulu. (Mat. 11:10, 11) Kweni e Yehova wawomvizye umuzimu wakwe uwutele ukupa wa-a awawomvi wakwe amaka ya kuwomba imilimo ya kuzungusya, lelo atawasozile ukuya mu kwikala kwi yulu. Nomba uzye cikupiliwula ukuti watalinji sana ni cisinka ica kuti watafisilepo ukuya kwi yulu? Awe. Nanti aca kuti atawasola ukuya kwi yulu, aliwazyulupula swinya waliyikala umuyayaya mu Paradaise monye mu nsi.​—Yoha. 5:28, 29; Imili. 24:15.

16. Acilambu ci cino awawomvi wa kwe Leza awawule wakalindilila?

¹⁶ Awawomvi wa kwe Leza awavule, watawa ni suwilo lya kuya kwi yulu. Pe wa-a, pawa ne Abrahamu, e Sara, e Davidi, e Yohani Kabatizya ukuwikako na wawomvi wa kwe Leza wanji awa ku nsizi. Wa-a wonsinye wakalindilila ukwizayikala mu nsi pano Uwufumu wa kwe Leza wuliwateka.​—Hebe. 11:10

17. Amawuzyo ci yano tuliyasuka mu cipande cino cikonsilepo?

¹⁷ Pa mulandu wa kuti tucili tukakwikala na wapakwe mu nsi, acino cikalenga tuwayiwuzya amawuzyo yamwi pa wapakwe. (Ukuwu. 12:17) Ku ca kulolelako, uzye awapakwe wazipizile wayilola wuli? Nga ca kuti wumwi mwi wungwe linu watalika ukulya umukate nu kumwa e waini pa Cizusyo, muzipizile muwamulola wuli? Uzye muzipizile ukusakamala ndi mwalola impendwa ye wano wakalya umukate nu kumwa e waini pa Cizusyo ikukulilako? Ya-a, ayali amawuzyo yano tuliyasuka mu cipande cino cikonsilepo.