1, 2. ¿Toni panok itech tonal Pentecostés xiuit 33?

KATKA se domingo kualkan itech Pentecostés xiuit 33 uan itech se kali ompa Jerusalén moajsiaj 120 imomachtijkauan Jesús (Hech. 1:13-15; 2:1). Seki tonalmej achto, Jesús kiniluijka maj yetonij ompa Jerusalén porin kiseliskiaj se taman (Hech. 1:4, 5). ¿Uan toni panok?

² Sepasaj “mokayik ke chikauak taijkoyokaya [...]. Uan ual taejekaya de ne eluiyaktsinko uan tachikaukakomonik ne kalijtik”. Ijkuak, tokniuan kiitakej “sekin titsitsin ten moxexeloj uan mokauak ipan cada se” uan nochin kiselijkej yektikatsin espíritu (Hech. 2:2-4). Ijkon, Jiova kinmakak iespíritu itekitikauan (Hech. 1:8). Yejuan akin yekinika kinixpejpenak ika iespíritu * uan kichiayaj nemiskej iluikak uan tekiuajtiskej iuan Jesús.

3. ¿Keyej akin moajsiaj itech Pentecostés senkis kineltokakej ke Dios kinixpejpenka ika iespíritu?

³ Komo ompa timoajsiskiaj iniuan tokniuan uan tikitaskiaj keniuj titsitsin motaliaj tokuapan uan peua titajtouaj tataman tajtolmej, amo keman tikelkauaskiaj (Hech. 2:5-12). Senkis tikneltokaskiaj ke Dios no techixpejpenak ika iespíritu. Sayoj ke ¿no ijkon Dios kinixpejpena nochin akin  kichiaj yaskej iluikak? Amo. ¿Keniuj tikmatij? Maj tikitakan.

4. Itech yekinika siglo, ¿sepasaj kinixpejpenkej nochin taixpejpenalmej? Xikonmelaua.

⁴ Yekinika maj ika titajtokan kemanian Dios kiixpejpena se tokniuj ika iespíritu. Itech Pentecostés xiuit 33, Dios amo sayoj kinixpejpenak 120 itekitikauan, ta ijkuak kemej 3,000 no kiselijkej yektikatsin espíritu. Yejuan, Dios kinixpejpenak keman moauijkej (Hech. 2:37, 38, 41). Sayoj ke, xiujmej satepan oksekin amo kinixpejpenkej niman ke moauijkej. Kemej neskayot, samaritanos kinixpejpenkej seki tonalmej satepan ke moauijkej (Hech. 8:14-17). Cornelio uan akin moajsiaj ichan, kinixpejpenkej achto ke moauiskiaj, se taman tein amo panotoya (Hech. 10:44-48).

5. Kemej kijtoua 2 Corintios 1:21, 22, ¿keniuj Jiova kiixpejpena se tokniuj?

⁵ Axkan maj ika titajtokan keniuj Jiova kiixpejpena se tokniuj ika iespíritu. Seki tokniuan xa amo kineltokaskej ke Jiova kinixpejpenak uan xa motajtaniskej, ¿keyej Dios nechixpejpenak? Oksekin xa amo ijkon momachiliskej. Sayoj ke tein yeski tein kimachiliskej, tatitanil Pablo kijtoj toni kinpanoua nochin akin taixpejpenalmej: “Keme namejuan nantakuautamatke ya iuan Cristo, ika ya nojon Totajtsin Dios namechteaxkatiliko [oso namechneskayotij] * para xiiaxkatikan keme nanikoneuan. [...] Uan Totajtsin Dios techmaktilijtinemi in Yektikatsin [e]spíritu para ma tikyekajsikamatikan ke tikselitiue se kualtsin ajsikaherencia” (Efes. 1:13, 14). Nejin kijtosnekij ke ika iespíritu, Jiova senkis kinmatiltia nejin tokniuan ke kinixpejpenakya. Ijkon espíritu kinmatiltiaj ke satepan nemiskej iluikak uan amo nikan taltikpak (xikonixtajtolti 2 Corintios 1:21, 22).

6. ¿Toni moneki kichiuas se taixpejpenal uan ijkon uelis yas iluikak?

⁶ Komo se tokniuj Dios kiixpejpena ika iespíritu, ¿kijtosneki nejon ke amo teyi  kitsakuilisok maj youi iluikak? Amo. Yejua kimati ke Dios kiixpejpenak maj youi iluikak. Sayoj ke, moneki kielnamikis nejin tein Biblia kinnejmachtia: “Ximofuerzajuikan de xikyekmatikan de ke Dios namechnotsak ya uan namechijitak ya [...]. Porin komo nanmofuerzajuijtiyoue, ijkuakon amo keman nanmoyojyolkueptiyoue tech namotakuautamatilis” (2 Ped. 1:10). Nejon kijtosneki ke se taixpejpenal yas iluikak, sayoj komo nochipa kitakamati Jiova (Filip. 3:12-14; Heb. 3:1; Apoc. 2:10).

7. ¿Keniuj kimati se tokniuj ke Dios kiixpejpenak maj youi iluikak?

⁷ ¿Uan keniuj kimati se tokniuj ke Dios kiixpejpenak maj youi iluikak? Tanankilil tikajsij itech tein Pablo kinijkuilouilij tokniuan taixpejpenalmej akin yetoyaj Roma. Yejua kiniluij: “Nankiselijke ya namoyolijtik in Yektikatsin [e]spíritu. Pero ne Yektikatsin [e]spíritu amo [...] se ejekat tenika nanyolmouiliske Totajtsin Dios. Ta, [...] namechmachililtijtinemi ke [...] nanitakpakoneuan. Ika ya nojon ika in chikaualis [...] tiknotstinemij Totajtsin Dios ijkuin: ‘Abba’ ten kijtosneki Notasojtajtsin. Uan nijin Yektikatsin [e]spíritu techyolnojnotstinemi tech totalnamikilis uan techmachililtijtinemi ke tejuan tiikoneuan de Dios” (Rom. 1:7; 8:15, 16). Ijkon, Dios ika iespíritu senkis kinmatiltia nejon tokniuan ke kinixpejpenak maj yakan iluikak (1 Tes. 2:12).

8. Kemej kijtoua 1 Juan 2:20, 27, ¿keniuj tikmatij ke akin taixpejpenalmej amo moneki maj kiniluikan ke Dios kinixpejpenak?

⁸ Jiova senkis kinmatiltia nejin tokniuan ke kinixpejpenak maj yakan iluikak (xikonixtajtolti 1 Juan 2:20, 27). Sayoj ke, taixpejpenalmej no moneki maj Jiova kinmachti itechkopa inechikol. Sayoj ke amo akin moneki kiniluis ke yejuan taixpejpenalmej. Jiova ika iespíritu, tein okachi ueyi chikaualis tein onkak, senkis kinmatiltijya ke yejuan taixpejpenalmej.

9. ¿Toni mopata keman se tokniuj kiixpejpenaj maj youi iluikak kemej kijtoua Efesios 1:18?

⁹ Miakej itekitikauan Dios kinouijmaka kiajsikamatiskej toni kipanoua se tokniuj keman Dios kiixpejpena. ¿Keyej? Porin yejuan Dios amo kinixpejpenak maj yakan iluikak uan no porin yejuatsin kinchijchiuak taltikpakneminij maj nemikan nochipaya nikan taltikpak, amo iluikak (Gén. 1:28; Sal. 37:29). Sayoj ke Jiova kinixpejpenak sekin maj yakan iluikak. Yejua ika keman kinmatiltia ika iespíritu ke taixpejpenalmej, kinpatilia kemej tanemiliaj uan tein kichiaj uan kichiua maj kinejnekikan nemiskej iluikak (xikonixtajtolti Efesios 1:18).

10. ¿Toni kijtosneki maj se tokniuj taixpejpenal ‘yankuikayoli’? (No xikonita nota.)

¹⁰ Keman se tokniuj Dios kiixpejpena ika iespíritu, kemej yeskia ‘yankuikayoli’. * Jesús no kijtoj ke amo ueli se kimelauilia akin amo taixpejpenal toni kimachilia se tokniuj taixpejpenal akin ‘yankuikayoli’ (Juan 3:3-8).

11. ¿Keniuj mopata kemej tanemilia se tokniuj keman Dios kiixpejpena?

¹¹ ¿Keniuj mopata kemej tanemilia se tokniuj keman Dios kiixpejpena? Achto ke Jiova kiixpejpenaskia kinejnekia nemis nochipaya nikan taltikpak. Kichiaya kiitas maj Jiova kiixpolo nochi tein  amo kuali uan maj kichiua se xochital nikan taltikpak. Xa kinemiliaya ke keman moajokuis se itasojikniuj oso se ichankauj akin momikilij yejua kiseliskia. Sayoj ke keman Dios kiixpejpenak mopatak tein kinemiliaya. ¿Keyej? Amo porin amo kinekiaok nemis nikan taltikpak. Amo no kinejneki nemis iluikak porin nikan semi tajyouia uan motekipachoua, nion no porin kinemilia ke amo kualtsin yeskiaok nemis nochipaya itech taltikpak. Ta yejua Jiova ika iespíritu kipatilia kemej tanemilia uan kichiua maj kichia nemis iluikak.

12. Kemej kijtoua 1 Pedro 1:3, 4, ¿keniuj momachilia se tokniuj taixpejpenal keman tanemilia itech tein kichia?

¹² Se tokniuj taixpejpenal uelis kimachilis ke amo kinamiki nejon tatiochiualis. Sayoj ke, amo keman motajtania ox yekmelauj Jiova kiixpejpenak, ta senkis kineltoka. Keman tanemilia itech tein kichia semi yolpaki uan motasojkamati (xikonixtajtolti 1 Pedro 1:3, 4).

13. ¿Keniuj kiitaj taixpejpenalmej nemiskej nikan taltikpak?

¹³ ¿Kijtosneki nejon ke taixpejpenalmej kinekij momikiliskej porin kinekijya yaskej iluikak? Tatitanil Pablo kinankilij nejon netajtanil keman kinneskayotij taixpejpenalmej kemej se takenkal, yejua kijtoj: “Tiyoltinemij tech nijin [...] totakayo ten tamati keme se tochan, ijkuakon [...] tiyoltajyouiaj [...] amo sayo porin tikyolnejnekij ke ma Dios techajchiuili tosoltiktakayo. Ta, [...] porin semi tikyolnejnekij [...] ma ixpoloui totakayo ten ipa kipia de tamis para ijkon timotakentiske ika ne yankuik nemilis ten amo keman tamis” (2 Cor. 5:4). Nejin amo kijtosneki ke tokniuan taixpejpenalmej kinejnektokej niman momikiliskej porin amo kiuelitajok nemiskej nikan taltikpak. Ta kiuelitaj nemiskej nikan uan mojmostaj kitemouaj kitekitiliskej Jiova iniuan ininchankauan uan inintasojikniuan. Sayoj ke, tein yeski tein kichiujtoskej nochipa tanemiliaj itech tein kichiaj iluikak (1 Cor. 15:53; 2 Ped. 1:4; 1 Juan 3:2, 3; Apoc. 20:6).

14. ¿Toni amo kinextia ke se tokniuj taixpejpenal?

¹⁴ Xa tionmotajtania ox Jiova mitsonixpejpenak ika iespíritu. Komo ijkon, xiontanemili itech nejin netajtanilmej: ¿semi tikonnejneki tikonchiuas tein Jiova kiyolpaktia?, ¿tikonuelita tiontanojnotsas okachi ke okseki tokniuan?, ¿semi tikonuelita tionmomachtis Biblia uan tikonmatis hasta tein okachi ouij?, ¿tikonmachilia ke Jiova mitsonpaleuia maj kuali mitsonkakikan itech tanojnotsalis?, ¿tikonmachilia ke moneki tikonpaleuis oksekin maj okachi mouikakan iuan Dios?, ¿tikonitani ke Dios mitsonpaleuiani itech miak taman tein tikonpanouani itech monemilis? (1 Cor. 2:10). Komo tiontanankilia ke kemaj, ¿kijtosneki ke tiontaixpejpenal? Amo, porin nochin itekitikauan Jiova uelis ijkon momachiliskej maski amo taixpejpenalmej. Uan no, ika iespíritu, Jiova uelis kipaleuis akin yeski itekitikauj maj kichiua nejon. Tein melauj, komo amo senkis tikonneltoka ke Dios mitsonixpejpenak ika espíritu, nejon kijtosneki ke amo tiontaixpejpenal. Yejuan amo motajtaniaj ox yekmelauj Dios kinixpejpenak, ta senkis kineltokaj.

15. ¿Keniuj tikmatij ke amo nochin akin kiseliaj iespíritu Dios yaskej iluikak?

¹⁵ Biblia ininka tajtoua miakej akin Dios kinmakak iespíritu, sayoj ke amo kinixpejpenak maj yakan iluikak. Kemej neskayot, David kiixyekanak iespíritu Dios (1 Sam. 16:13). Nejon kipaleuij  maj kiajsikamati tamachtilis tein ouij tein Jiova kitemaka uan no maj kijkuilo seki taman tein moajsi itech Biblia (Mar. 12:36). Maski ijkon, tatitanil Pedro kijtoj ke “David amo tejkok ne eluiyak” (Hech. 2:34). No ijkon, Juan Taauijkej no kipiaya iespíritu Dios (Luc. 1:13-16). Hasta Jesús kijtoj: “Amo aken ongak okse kachi ueyi chiuke de nikan taltikpakuani. Ta, sayo ne Juan Taauijke”. Maski ijkon, Jesús kijtoj ke Juan amo tekiuajtiskia iuan ompa iluikak (Mat. 11:10, 11). Ika iespíritu Jiova kichiuak maj nejon takamej kichiuanij uejueyi taman, sayoj ke amo kinixpejpenak maj yakan iluikak. ¿Kijtosneki nejon ke amo semi kitekitilijkej Jiova kemej taixpejpenalmej? Amo. Sayoj kijtosneki ke Jiova kichiuas maj oksepa nemikan nikan taltikpak itech xochital (Juan 5:28, 29; Hech. 24:15).

16. ¿Kani kinejnekij nemiskej okachi miakej itekitikauan Dios?

¹⁶ Okachi miakej itekitikauan Dios amo yaskej iluikak. Ijkon kemej Abrahán, Sara, David, Juan Taauijkej uan okseki takamej uan siuamej akin nenkej ne uejkauj kinejnekij nemiskej nikan taltikpak kampa kinixyekanas iTekiuajyo Dios (Heb. 11:10).

17. ¿Katiyejua netajtanilmej tiknankiliskej itech okse tamachtilis?

¹⁷ Moajsijok seki taixpejpenalmej nikan taltikpak, yejua ika tiknekij tikmatiskej seki taman (Apoc. 12:17). Kemej neskayot, ¿keniuj moneki kiitaskej taixpejpenalmej tekit tein kipiaj? Uan komo se tokniuj itech tonechikol peua kikua pan uan tayi vino keman moelnamiki imikilis Cristo, ¿keniuj moneki tikitaskej? Uan komo kisentokaj momiakiliaj akin kijtouaj ke taixpejpenalmej, ¿moneki ika timotekipachoskej? Itech okse tamachtilis tiknankiliskej nejon netajtanilmej.