1-2. Ni mwatsi wahi w’eriswekya owabya omo Pentekoste y’omwaka 33 M.W.?

NI KIRO kye Yenga omo tututu eYerusalemu, omwaka 33 M.W., kandi ni kiro ky’ePentekoste. Abigha hakuhi 120 bahindene omo kisenge ky’endata eky’enyumba. (Emib. 1:13-15; 2:1) Biro bilebe embere syaho, Yesu mwabwirabo ati isibalwa eYerusalemu kundi bakendihabwa ekihembo eky’omughaso munene. (Emib. 1:4, 5) Enyuma syaho muhabyaki?

² ‘Omwitsumbukania, omulenge mwalua elubula, eribuhirira ng’erihunga erikalire.’ Omulenge oyo mwowika omo nyumba yosi. Neryo, “ebirimi ng’eby’omuliro” mubyahulukira oko mitwe y’abigha’, n’abosi “mubasulibwa n’ekirimu kibuyirire.” (Emib. 2:2-4) Omo nzira y’eriswekya eyi, Yehova muta ekirimu kiwe kibuyirire oko kikumula ky’abandu ekyo. (Emib. 1:8) Mubabya bandu b’erimbere abo ekirimu kibuyirire * ky’ahira kw’amaghuta n’erihebwa amaha w’erisyatabala haghuma na Yesu elubula.

3. Busanaki ababya oko Pentekoste mubikirirya kwenene ngoko mubahirwa kw’amaghuta n’ekirimu kibuyirire?

³ Nga wabya mughuma w’oko bigha ababya omo kisenge ky’endata ekiro ky’ePentekoste, siwang’ibirirwe ekiro ekyo n’ahake. Ekindu ekiri ng’ekirimi ky’omuliro ikikira oko mutwe waghu, neryo  iwatsuka eribugha omo mibughe mbiriri-mbiriri! (Emib. 2:5-12) W’endikirirya kwenene ngoko muwahirwa kw’amaghuta n’ekirimu kibuyirire. Nikwa, abosi abakahirawa kw’amaghuta n’ekirimu kibuyirire, bakanahirawa w’oko omo nzira y’eriswekya ng’oko Pentekoste kutse oko ndambi ngumerera omo ngebe yabo? Iyehe. Tukaminya ekyo kyo tuti?

4. Abosi abahirawa kw’amaghuta omo kighonye ky’erimbere mubanabirikirwa oko ndambi ngumerera omo ngebe yabo? Kanaya.

⁴ Tukanaye oko mughulu owo omundu angahirwa kw’amaghuta. ABakristo hakuhi 120 sibo basa abahirawa kw’amaghuta n’ekirimu kibuyirire oko Pentekoste y’oko mwaka 33 M.W. Enyuma omo kiro ekyo, abandi bandu hakuhi 3 000 nabo mubabana ekirimu kibuyirire ekyo Yesu alagha erituma. Mubahirwa kw’amaghuta omughulu babatisibawa. (Emib. 2:37, 38, 41) Aliwe omo myaka eyakwama, aBakristo bosi abahirawa kw’amaghuta mubatahirwa w’oko omughulu babatisibawa. Abasamaria mubahirwa kw’amaghuta habilaba mughulu mulebe ibabiribatisibwa. (Emib. 8:14-17) Erihirwa kw’amaghuta lya Kornelio n’ab’omo nyumba yiwe mulitabya ng’ery’abandi. Mubahirwa kw’amaghuta embere sy’eribatisibwa.​—Emib. 10:44-48.

5. Ngoko kiri omo 2 Abanya Korinto 1:21, 22, bikabya biti omughulu omundu akahirawa kw’amaghuta n’ekirimu kibuyirire?

⁵ Kandi tulangire nga bikabya biti omughulu omundu akahirawa kw’amaghuta n’ekirimu kibuyirire. Oko nzuko, kyanganakala oko bandu balebe abahirirwe kw’amaghuta eriligha ngoko babirisombolwa na Yehova. Banganayibulya bati, ‘oMungu mwakanisombola busanaki?’ Abandi sibangayowa batya. N’omo omundu angayowa ati, omukwenda Paulo mwakangania ebikahikira abosi abakasombolawa: ‘Omughulu mwowa omwatsi w’ekwenene w’engulu yuwene, ey’eribalamya omw’ikirirya Kristo. OMungu mwabahirako ekiminyikalo * kiwe, inyakabaha ekirimu kibuyirire eky’alagha.’ (Efe. 1:13, 14) Yehova akakolesaya ekirimu kiwe kibuyirire eriwatikya  aBakristo abo erikirirya kwenene ngoko abiribasombola. Omo nzira eyo, ekirimu kibuyirire ‘ni kiminyikalo’ ekyabirihirwaho eribakangania ndeke-ndeke ngoko omo biro ebikasa bakend’isyikala kera na kera omo lubula, butsira oko kihugho.​—Soma 2 Abanya Korinto 1:21, 22.

6. Omukisto oyuhirirwe kw’amaghuta atolere inyakolaki imwatoka erisyabana ekihembo kiwe ky’elubula?

⁶ OMukristo amahirwa kw’amaghuta, kyanamalukyakangania kiti n’omo hangabyaki akendisyaya elubula kwehi? Iyehe. Ikirirye ngoko abirisombolwa erisyayikala elubula. Aliwe, litolere inyibuka erihano lino: “Balikyetu, mubye n’omuhwa w’erihangania ndeke eribirikirwa lyenyu, kusangwa mwamakwama mutya, simwendisyatogha na kera.” (2 Pet. 1:10) N’omo oMukristo oyuhirirwe kw’amaghuta anasombolawa, kutse anabiribirikirwa eriya elubula, eribana ekihembo kiwe litolere inyasighala mutaleghula.​—Flp. 3:12-14; Ebr. 3:1; Erib. 2:10.

7. Abahirirwe kw’amaghuta bakaminya bati ngoko babiribirikirwa elubula?

⁷ Nikwa omundu akaminya ati ngoko abiribirikirwa erisyikala elubula? Ekisubiryo kiri omo binywa bya Paulo oko Bakristo b’eRoma “ababiribirikirwa eribya babuyirire.” Mwabwirabo ati: “kusangwa ekirimu ky’oMungu sikiribayiramo bakobe, sikirileka muk’ubaha kandi. Nikwa ekirimu kikabayiramo baghala b’oMungu; kandi omo butoki bw’ekirimu tukabirikira tuti, ‘abba, Thatha!’ Ekirimu ky’oMungu ikikyene kikatulagho haghuma n’ekirimu kyetu ko tuli baghala b’oMungu.” (Rom. 1:7; 8:15, 16, NWT) Neryo erilabira ekirimu kiwe, oMungu akakanganaya ndeke-ndeke abahirirwe kw’amaghutu ngoko babiribirikirwa elubula.​—1 Tes. 2:12.

8. 1 Yoane 2:20, 27 ikakangaya yiti ngoko aBakristo abahirirwe kw’amaghutu sibalaghire okw’ikanganibwa n’abandi bandu ngoko kwenene babirisombolwa?

⁸ Yehova akalusaya eritika-tika lyosi-lyosi omo malengekania n’omo mitima y’abandu abo abiribirikira elubula. (Soma 1 Yoane 2:20, 27.) Kwenene, aBakristo abahirirwe kw’amaghuta balaghire okw’ikangiriribwa na Yehova erilabira endeko yiwe ng’obuli mundu wosi-wosi. Aliwe, sibalaghire okw’ikanganibwa n’omundu wosi-wosi ngoko babirihirwa kw’amaghuta. Yehova akakolesaya ekirimu kiwe kibuyirire, akaghala kakulu kulenga, eribakangania ndeke-ndeke ngoko babirihirwa kw’amaghuta!

9. Ngoko kiri omo Abanya Efeso 1:18, omughulu omundu akahirawa kw’amaghuta, ni mbinduka syahi esyo akayilangirira?

⁹ Munabwire, kyanganakala oko baghombe ba Yehova bangyi eriminya ekikahikira omundu omughulu oMungu akamuhira kw’amaghuta. Busanaki? Kundi ibibene-bene sibalibahirwa kw’amaghuta. OMungu mwabumba abandu erisyikala oko kihugho kera na kera, butsira elubula. (Enz. 1:28; Esyo. 37:29) Aliwe, Yehova abirisombola abandu balebe erisyikala elubula. Neryo omughulu akasombolabo, akabindula kutsibu amaha n’enzira yabo y’erilengekania, neryo ibabya n’amaha w’erisyikala elubula.​—Soma Abanya Efeso 1:18.

10. “Eributwa kandi” ni bughambuki? (Lebaya n’ebinywa ebiri ahikwa.)

¹⁰ Omughulu aBakristo bakahirawa kw’amaghuta n’ekirimu kibuyirire, “bakabutawa kandi,” kutse “eributwa erilwa endata.” * Yesu naye mwakangania ngoko sikitokekene erikangania omundu oyutahirirwe kw’amaghuta nga bikabya biti “eributwa kandi,” kutse ‘eributwa n’ekirimu.’​—Yoane 3:3-8.

11. Kanaya okw’ibinduka ly’amalengekania erikahikira omundu omughulu akahirawa kw’amaghuta.

¹¹ Omughulu omundu akahirawa kw’amaghuta, ni binduka ly’amalengekania lyahi erikamuhikira?  Embere Yehova asombole aBakristo abo, babya n’amaha w’erisyikala kera na kera oko kihugho. Babya bakalindirira n’engumbu nene omughulu Yehova akendisyayira ekihugho mo paradiso n’erilusyaho obubi bosi. Alinga babya ibakanalengekanaya ibanemukokya omundu w’omo kihanda kutse omwira oyo abya inyabirihola. Aliwe babihirwa kw’amaghuta, mubatsuka erilengekania omo yindi nzira. Busanaki? Sibughambu bakenditsuka erilengekania bati amaha w’erisyikala kera na kera oko kihugho syuwene. Mubatabindula amalengekania wabo busana n’omutwe eritsanda kutse erihahuka. Mubatayowa omw’itsumbukanibwa ngoko erisyikala kera na kera oko kihugho likendisyaluhya. Aliwe, Yehova mwakolesya ekirimu kiwe kibuyirire eribindula enzira yabo y’erilengekania n’eribindula amaha awo babya batsemere kundu.

12. Ngoko kiri omo 1 Petero 1:3, 4, aBakristo abahirirwe kw’amaghuta bakayowa bati busana n’amaha wabo?

¹² Omundu oyuhirirwe kw’amaghuta anganayowa nga syatolere olusunzo lubuya olo. Aliwe syangatika-tika n’ahake ngoko Yehova abirimusombola. Akabya n’obutseme bunene n’erisima omughulu akalengekanaya oko maha wiwe w’erisyikala elubula.​—Soma 1 Petero 1:3, 4.

13. Abahirirwe kw’amaghuta, bakayowa bati busana n’engebe yabo hano oko kihugho?

¹³ Nikwa, ekyo kikasondibugha kiti abahirirwe kw’amaghuta bakatsemera erihola? Omukwenda Paulo mwasubirya oko ribulyo eryo. Mwasosekania omubiri wabo w’ekinya-mubiri ng’ehema, n’eribugha ati: “kandi omughulu tukine omo hema y’eno, tukasimba itukanubibawa. Sitwanzire erileka omubiri w’eno, nikwa twanzire eribana omubiri w’elubula, neryo omubiri w’engebe atoke eribya omo mwanya w’omubiri owakahola.” (2 Kor. 5:4) ABakristo abo sibughambu baponire engebe y’oko kihugho n’erianza bati bahole luba. Aliwe, bakatsemera engebe kandi bakanza erikolesya obuli kiro erikolera Yehova haghuma n’ebihanda n’abira babo. Kandi, n’omo bangabya ibanemukolaki, mughulu wosi bak’ibuka amaha w’olukengerwa awo bawite oko biro ebikasa.​—1 Kor. 15:53; 2 Pet. 1:4; 1 Yoa. 3:2, 3; Erib. 20:6.

14. Ni myatsi yahi eyitekanganaya ngoko omundu abirihirwa kw’amaghuta n’ekirimu kibuyirire?

¹⁴ Alinga ukanayibulaya nga wanabirihirwa kw’amaghuta n’ekirimu kibuyirire. Byamabya iko biri bitya, lengekanaya oko mabulyo w’omughaso ano: Unawite engumbu nene y’erikola erisonda lya Yehova? Unawite omuhwa munene omo mubiri w’eritulira? Ukanatsemera kutsibu erigha eKinywa ky’oMungu n’erigha oko “myatsi eyikalakalire y’oMungu”? (1 Kor. 2:10, NWT) Ukanalangira uti Yehova akakuha ebighuma ebyuwene omo mubiri w’eritulira? Ukanayowa ngoko uwite omubiri munene w’eriwatikya abandi bunya-kirimu? Wanabiriyilangirira emyatsi eyikakanganaya ngoko Yehova mwakuwatikya omo ngebe yaghu? Wamabisubirya uti inga oko mabulyo wosi aya, ekyo ikyanamakangania kiti lino wabiribirikirwa elubula? Iyehe. Busanaki? Kundi abaghombe b’oMungu bosi banganayowa batya n’omo bangabya ibahirirwe kw’amaghuta kutse iyehe. Kandi erilabira ekirimu kiwe kibuyirire, Yehova anganaha akaghala kaghumerera oko obuli mughombe wiwe, n’omo angabya n’amaha wahi. Neryo, wamabya iwukayibulaya ekirimu kibuyirire nga kyo kyanakuhira kw’amaghuta, eriyibulya utya lisa, likakanganaya ngoko siwuhirirwe kw’amaghuta. Abo Yehova abiribirikira sibaliyibulaya nga banahirirwe kw’amaghuta kutse iyehe! Bakabya ibanasi!

15. Tukaminya tuti ngoko si b’abosi ababiribana ekirimu ky’oMungu bo babirisombolwa eriya elubula?

¹⁵ EBiblia yikakanaya oko bandu bangyi ababana ekirimu kibuyirire, aliwe mubatabya n’amaha w’eriya elubula. Dawidi mwasondolwa n’ekirimu kibuyirire. (1 Sam. 16:13) Ekirimu  kibuyirire mukyamuwatikya eriminya emyatsi eyikalakalire ya Yehova kandi mukyamusondola erihandika ebitsweka bilebe omo Biblia. (Mar. 12:36) N’omo bine bitya, omukwenda Petero mwabugha ati Dawidi “mwatahetukira elubula.” (Emib. 2:34) Yoane Mubatisya “mwasulibwa n’ekirimu kibuyirire.” (Luka 1:13-16) Yesu mwabugha ati sihali omundu mukulu kulaba Yoane, aliwe kandi mwabugha ati syendisyabya mughuma w’oko abakendisyatabala omo Bwami bw’elubula. (Mat. 11:10, 11) Yehova mwakolesya ekirimu kiwe kibuyirie eriha abalume abo b’akaghala k’erikola emyatsi y’eriswekya, aliwe mwatakolesya ekirimu kiwe kibuyirire eribasombola erisyikala elubula. Nikwa eki kikasond’ibugha kiti obutaleghula bwabo bwabya buke kulenga obw’abakasombolawa eritabala omo lubula? Iyehe. Kikasond’ibugha kiti Yehova akendisyabalubukya oko ngebe omo kihugho paradiso.​—Yoa. 5:28, 29; Emib. 24:15.

16. Munabwire, abaghombe b’oMungu bangyi bawite amaha wahi?

¹⁶ Abangyi b’oko baghombe b’oMungu abali oko kihugho munabwire sibawite amaha w’erisyikala elubula. Nga Abrahamu, Sara, Dawidi, Yoane Mubatisya, n’abandi balume n’abakali bangyi b’oko mughulu w’eBiblia, bakalindirira erisyikala oko kihugho omughulu oBwami bw’oMungu bwasyatabalabo.​—Ebr. 11:10.

17. Omo mwatsi owakwamire tukendisubirya oko mabulyo wahi?

¹⁷ Kusangwa abahirirwe kw’amaghuta balebe bakine haghuma n’abandu b’oMungu munabwire, twanganayibulya amabulyo malebe. (Erib. 12:17) Abahirirwe kw’amaghuta batolere ibayilangira bati? Omundu mughuma omo ndeko yaghu amatsuka erirya oko mukati n’erinywa oko divai omughulu w’Eryibuka Oluholo lwa Yesu, wangamukolera wuti? Kandi, byangabya biti emighanzo y’abakabugha bati bahirirwe kw’amaghuta yamalola embere omwikanya? Kyanganatukenderya kwehi? Tukendisubirya oko mabulyo ayo omo mwatsi owakwamire.