1-2. Kansi ni cocitika capadela cotyani cecitika pa siku ya Pentekosite mu 33 C.E.?

PENZE pa Sondo m’mawa ku Yerusalemu pa Pentekosite mu 33 C.E., Gulu ya ophunzila pafupifupi 120 yesonkhana pamozi m’cipinda capalulu mung’anda. (Mac. 1:13-15; 2:1) Masiku atontho izi zikaliyocitika, Yesu eŵauzhya kuti asafume mu Yerusalemu cifukwa enze kuzolondela mphaso yapadela. (Mac. 1:4, 5) Kansi n’cinji cecitika pavuli pake?

² “Mwazizizi kululu kwemvwika mlilimo monga ni mphepo yamphamvu.” Ndipo congo cezula ng’anda yonse. Pavuli pake, “mulilo wooneka monga ni malilime” wenkhala pa mitu pa ophunzila, ndipo onse “ezula na mzimu utuŵa.” (Mac. 2:2-4) Modabwisha, Yehova ekhutulila mzimu wake utuŵa pa gulu yamene ila. (Mac. 1:8) Enkhala oyamba kuzozewa na mzimu utuŵa, * ndipo enkhala na ciyembekezo cakuyolamulila na Yesu kululu.

3. Ndaŵa yanji ŵanthu epezeka pa Pentekosite aliyokaikile kuti ezozewa na mzimu utuŵa?

³ Ophunzila a Yesu amene esonkhana m’cipinda capalulu, aliyoluŵe zecitika. Vinthu viyakine vooneka monga ni  malilime a mulilo venkhala pa mitu pao, ndipo eyamba kulaŵila vilaŵilo vosiyanasiyana. (Mac. 2:5-12) Tetyo, aliyokaikile kuti ezozewa na mzimu utuŵa. Kansi ŵanthu onse ozozewa molingana na mwecizozewela Akhristu okwanila 120 pa nthawi yolingana pa umoyo wao? Yai. Kansi tuziŵa tyani?

4. Kansi ozozewa a m’vyaka 100 voyambilila ezozewa pa nthawi yolingana pa umoyo wao? Fotokozani.

⁴ Tiyeni lomba tilaŵizhyane nthawi yaakuzozewa ŵanthu. Ni gulu lini tyala ya Akhristu pafupifupi 120 amene ezozewa na mzimu utuŵa pa Pentekosite mu 33 C.E. Pa siku yamene ila, ŵanthu ayakine pafupifupi 3,000 elondela mzimu utuŵa. Kuzozewa kwao kwecitika panthawi yeenzobatizika. (Mac. 2:37, 38, 41) Koma vyaka vokonkhapo, ni Akhristu lini onse amene ezozewa panthawi ya ubatizo. Asamariya pecibatizika, pepita nthawi kuti azozewe. (Mac. 8:14-17) Pa vifukwa viyakine, Koneliyo na a m’banja mwake ezozewa akaliyobatizika.​—Mac. 10:44-48.

5. Molingana na 2 Akorinto 1:21, 22, n’cinji cucitika munthu akazozewa na mzimu utuŵa?

⁵ Tiyeni tilaŵizhyane cucitika munthu akazozewa na mzimu utuŵa. Ŵanthu ayakine zingaŵavute kuvomelezhya kuti Yehova waŵasankha. Angayambe kuzikonsha kuti, ‘Ndaŵa yanji Mulungu wanisankha?’ Pamene ayakine angamvwe lini teti. Olo kuti angamvwe mosiyana, mtumwi Paulo efotokoza zucitikila ŵanthu onse amene azozewa kuti: “Pemwekhulupilila, mweikiwa cizindikilo * na yove kupitila mu mzimu utuŵa wecilonjeza, camene ni cisimikizhyo ca coloŵa casu ca msogolo.” (Aef. 1:13, 14) Yehova oseŵenzesha mzimu wake utuŵa poŵasimikizhyila kuti asankhiwa. Mwa njila iyi, mzimu utuŵa uŵasimikizhyila kuti ali na ciyembekezo cakuyonkhala kululu.​—Ŵelengani 2 Akorinto 1:21, 22.

6. Kansi Mkhristu wozozewa ofunika kucita cinji kuti akalondele mphoto yoluta kululu?

 ⁶ Ngati Mkhristu wazozewa, niye kuti basi akalute kululu? Yai. Koma onkhala na cisimikizhyo cakuti akalamulile kululu. Nangu n’tetyo, ofunika kukumbukila malangizo aŵa akuti: “Citani ciliconse camungakwanishe kuti mupitilizhye kunkhala pakati pa ŵanthu amene Mulungu waŵaita noŵasankha, pakuti mukapitilizhya kucita zinthu izi, mukangiwe lini nangu patontho.” (2 Pet. 1:10) Nangu kuti Mkhristu wazozewa olo kusankhiwa kuti akalute kululu, ofunika kupitilizhya kunkhala wokhulupilika kuti akalondele mphoto yake.​—Afil. 3:12-14; Aheb. 3:1; Chiv. 2:10.

7. Kansi ozozewa oziŵa tyani kuti asankhiwa kuti akalute kululu?

⁷ Kansi munthu oziŵa tyani kuti wasankhiwa kuti akalute kululu? Yankho tuipeza pa mau yecilaŵila Paulo kwa Akhristu a ku Roma, “amene enzoitiwa kuti atuŵa.” Eŵauzhya kuti: “Pakuti muliyolondele mzimu wa ukapolo wocitisha wowa, koma mwelondela mzimu wakuti munkhale ŵana, watuita nao kuti ‘Abba, Atata!’ Mzimu ucitila umboni pamozi na mzimu wasu kuti nise ŵana a Mulungu.” (Aro. 1:7; 8:15, 16) Poseŵenzesha mzimu wake utuŵa, Mulungu oŵasimikizhyila kuti asankhiwa kuti akalute kululu.​—1 Ates. 2:12.

8. Kansi 1 Yohane 2:20, 27 yuonesha tyani kuti Akhristu ozozewa ofunika lini kucitouzhyiwa na ŵanthu ayakine kuti azozewa?

⁸ Yehova oŵasimikizhyila m’mitima mwao, na m’maganizo mwao kuti eitiwa kuluta kululu. (Ŵelengani 1 Yohane 2:20, 27.) Olo n’tetyo, Akhristu ozozewa ofunika kuphunzisiwa na Yehova kupitila mumpingo monga ni aliyense. Koma ofunika lini kucitouzhyiwa na munthu muyakine kuti asankhiwa. Yehova oseŵenzesha mphamvu yopambana m’cilengedwe, mzimu wake utuŵa, poŵasimikizhyila kuti azozewa.

9. Ngati munthu wazozewa, n’cinji cucinja monga ni mwayufotokozela Aefeso 1:18?

⁹ Masiku ŵano atumiki a Mulungu anyinji ovutika kuti amvwishe cucitika ngati munthu wazozewa na Mulungu. Zili tetyo cifukwa cakuti ove aliyosankhiwe. Mulungu elenga ŵanthu kuti ankhale pacalo kosasila. (Gen. 1:28; Sal. 37:29) Koma Yehova wasankha ayakine kuti akankhale kululu. Tetyo akazozewa, ciyembekezo cao na kaganizidwe kao zucinja, ndipo oyembekezela mwacidwi umoyo wakululu.​—Ŵelengani Aefeso 1:18.

10. Kansi “kuvyalika soti” kutanthauza cinji? (Onani mau a m’nyansi.)

¹⁰ Ngati Akhristu azozewa na mzimu utuŵa, niye kuti “ovyalika soti.” * Yesu naye eonesha kuti ni covuta kufotokozela munthu wakuti aliyozozewe mwacumvwikila ‘akavyalika soti,’ olo “kuvyalika mwa mzimu.”​—Yoh. 3:3-8.

11. Fotokozani kucinja kwamene kunkhalapo ngati munthu wazozewa.

¹¹ Kansi kaganizidwe ka Akhristu kocinja tyani ngati azozewa? Akhristu amene aŵa akaliyozozewa, onkhala na ciyembekezo conkhala pacalo mpaka kale-kale. Oyembekezela mwacidwi nthawi pati Yehova  akafumyepo vinthu vonse viipa nopanga calo kunkhala paladaiso. Payakine oyembekezela kuyolondela akwao na ayao akayoukishiwa kufuma kumanda. Koma akazozewa kaganizidwe kao kocinja. Ndaŵa yanji? Kaganizidwe kao kocinja lini cifukwa cosakhutila na ciyembekezo cao conkhala pacalo, olo cifukwa ca mavuto. Oganizila lini kuti kunkhala pacalo kukankhale koŵeŵesha. M’malo mwake, Yehova oseŵenzesha mzimu wake utuŵa kucinja kaganizidwe kao na ciyembekezo cao ceenzokonda conkhala pacalo.

12. Molingana na 1 Petulo 1:3, 4, kansi Akhristu ozozewa okumvwa tyani akaganizila za ciyembekezo cao?

¹² Akhristu ayakine amene azozewa, angazimvwe kuti ni osayenelela mwai wamtengo wapatali wamene uyu. Koma okaikila lini nangu patontho kuti Yehova waŵasankha. Mtima wao unkhala wozula na cimwemwe koma soti ciyamikilo akaganizila zakuyonkhala kululu.​—Ŵelengani 1 Petulo 1:3, 4.

13. Kansi ozozewa okumvwa tyani na moyo waali nao pacalo?

¹³ Ko izi zutanthauza kuti Akhristu ozozewa ofuna kufwa? Mtumwi Paulo eyankha konsho yamene iyi pecilinganizhya muŵili wa munthu na msasa, elaŵila kuti: “Ndipo seo tili mumsasa uno, tumimila cifukwa colemewa. Osati cifukwa cofuna kuuvula, koma kuti tivwale ng’anda iyakine, kuti cokwanisha kufwa, cimelewe na camoyo.” (2 Akor. 5:4) Akhristu aŵa oona lini kuti umoyo ni wosafunika na kuti afwe kamangu. Mosiyana na zamene izi, osangalala kuseŵenzesha siku iliyonse potumikila Yehova pamozi na abanja ŵao na ayao. Ndipo pakucita zamene izi, okumbukila ciyembekezo cao caulemelelo camsogolo.​—1 Akor. 15:53; 2 Pet. 1:4; 1 Yoh. 3:2, 3; Chiv. 20:6.

14. Kansi munthu angankhale lini wozozewa nangu kuti ocita vinthu votyani?

¹⁴ Payakine mukaikila kuti mwezozewa na mzimu utuŵa. Ngati n’tetyo, ganizilani makonsho ofunika aŵa: Kansi muli na cifuno camphamvu cocita cifunilo ca Yehova? Kansi muona kuti muli na cangu pa nchito yolalikila? Ko muli na khama yophunzila mau a Mulungu koma soti “zinthu zozama za Mulungu”? (1 Akor. 2:10) Mukaona zofumapo za nchito yanu yolalikila, ko muona kuti Yehova okudalisani? Kansi muona kuti nimwe ofunishisha kuyavya ayakine pa zinthu zauzimu? Ko muona kuti Yehova okuyavyani pa zocitika zosiyanasiyana pa umoyo wanu? Ngati yankho yanu pa makonsho aya ni yakuti eee, ko zutanthauza kuti mwesankhiwa kuya kululu? Yai. Ndaŵa yanji? Cifukwa atumiki onse a Mulungu okumvwa cimozimozi nangu ezozewa olo yai. Ndipo Yehova angaseŵenzeshe mzimu wake utuŵa kupasa mphamvu mtumiki aliyense, wozozewa olo wosazozewa. Ndipo ngati mukaikila kuti mwezozewa olo yai, kukaikila kwamene uko kungaoneshe kuti nimwe lini ozozewa. Onse amene ezozewa na Yehova okaikila lini, cifukwa oziŵa.

15. Kansi tuziŵa tyani kuti ni onse lini elondela mzimu wa Mulungu ati akalute kululu?

¹⁵ M’Baibo muli visanzo vinyinji va analume okhulupilika amene elondela mzimu utuŵa, koma enzeve ciyembekezo cakuyonkhala kululu. Davide esogolelewa na mzimu utuŵa. (1 Sam. 16:13) Mzimu utuŵa wemuyavya kumvwisha vinthu vozama  vokhuza Yehova, koma soti wemusogolela kulemba mbali ziyakine m’Baibo. (Mko. 12:36) Nangu mtumwi Petulo elaŵila kuti, Davide “aliyolute kululu.” (Mac. 2:34) Yohane m’batizi “ezula na mzimu utuŵa.” (Luka 1:13-16) Yesu elaŵila kuti kuliye munthu wopambana Yohane, koma elaŵila soti kuti Yohane ali lini mbali ya ŵanthu ati akalute kululu. (Mat. 11:10, 11) Yehova eseŵenzesha mzimu wake utuŵa kupasa atumiki amene aŵa mphamvu yocita zozizwisa, koma aliyoŵapase mzimu uyu kuti ankhale na ciyembekezo cakuyonkhala kululu. Kansi izi zutanthauza kuti enzeve cikhulupililo kusiyana na ŵala ati akalute kululu? Yai. Yehova akaŵaukishe kuti akankhale na moyo m’Paladaiso pacalo.​—Yoh. 5:28, 29; Mac. 24:15.

16. Kansi atumiki a Mulungu masiku ŵano ali na ciyembekezo cotyani?

¹⁶ Atumiki a Mulungu anyinji masiku ŵano ali na ciyembekezo conkhala pacalo. Monga Abulahamu, Sara, Davide, Yohane m’batizi, kuyangizhyilapo analume na anakazi a m’nthawi zakuvuli, enzoyembekezela mwacidwi kuyonkhala pacalo pamene Ufumu wa Mulungu ukolamulila.​—Aheb. 11:10.

17. Kansi tikalaŵizhyane makonsho otyani m’nkhani yokonkhapo?

¹⁷ Cifukwa cakuti Akhristu ayakine ozozewa akali pano pacalo, nthawi ziyakine tingankhale na makonsho. (Chiv. 12:17) Mwacisanzo, ngati munthu wazozewa, ko ofunika kuziona tyani? Ngati mumpingo mwanu muli wozozewa ndipo okulya viphiphiliso pa Cikumbuso, kansi mufunika kucita naye vinthu motyani? Kansi mufunika kucita nkhaŵa ngati ciŵelengelo ca ŵanthu amene akulya viphiphiliso cuyangizhyilika? Tikalaŵizhyane makonsho amene aŵa m’nkhani yokonkhapo.