1-2. Ke tiragalo efe e sa tlwaelegago yeo e ilego ya direga ka Pentekoste ya 33 C.E.?

E BE e le mesong ya Sontaga sa Pentekoste ya ngwaga wa 33 C.E. kua Jerusalema. Barutiwa ba e ka bago ba 120 ba be ba bokane mmogo ka phapošing ya ka godimo. (Dit. 1:13-15; 2:1) Matšatši a sego kae pele ba ka bokana, Jesu o be a ba laetše gore ba šale moo Jerusalema ka gobane o be a tlo ba nea mpho e kgethegilego. (Dit. 1:4, 5) Go ile gwa direga’ng ge barutiwa bao ba be ba newa mpho yeo e kgethegilego?

² Beibele e re: “Ka tšhoganetšo gwa ba le lešata le le tšwago legodimong le [le] bjalo ka ledimo le matla.” Lešata leo le ile la tlala ntlo ka moka. Ke moka “dikgabo tša mollo tše e kego ke maleme” tša dula godimo ga dihlogo tša barutiwa ba Jesu, gomme ka moka “ba tlala moya o mokgethwa.” (Dit. 2:2-4) Ka tsela ye yeo e bego e se ya tlwaelega, Jehofa o ile a tšhollela moya wa gagwe o mokgethwa go barutiwa bao ba Jesu. (Dit. 1:8) Barutiwa ba e bile ba mathomo ba go tlotšwa ka moya o mokgethwa * gomme ba newa kholofelo ya go yo buša le Jesu legodimong.

3. Ke ka baka la’ng barutiwa bao ba bego bokane kua Jerusalema ba be ba kgodišegile gore ba tloditšwe ka moya o mokgethwa?

³ Ge nkabe o be o le gare ga barutiwa bao ba bego bokane ka phapošing ya ka godimo kua Jerusalema, o be o ka se tsoge o lebetše  letšatši leo. Nagana o le ka phapošing yeo gomme kgabo ya mollo yeo e kego ke leleme e dula hlogong ya gago, ke moka o thoma go bolela leleme le lengwe. (Dit. 2:5-12) Ruri o be o tla kgodišega gore o tloditšwe ka moya o mokgethwa. Eupša na batho ka moka bao ba tlotšwago ka moya o mokgethwa go ba le selo se itšego seo se diregago ge ba tlotšwa? Aowa. Re tseba se bjang? Le gona, ba tlotšwa neng ka moya o mokgethwa?

4. Na Bakriste ka moka ba nakong e fetilego ba ile ba tlotšwa ka moya o mokgethwa ka morago ga gore bakolobetšwe? Nea mohlala.

⁴ Anke ga bjale re boleleng ka taba ya gore motho a ka tlotšwa neng. Barutiwa ba Jesu ba 120 ga se bona feela ba ilego ba tlotšwa ka moya o mokgethwa ka letšatši la Pentekoste ya 33 C.E. Ka morago lona letšatšing leo, batho ba bangwe ba e ka bago ba 3 000 ba ile ba tlotšwa ka moya o mokgethwa woo Jesu a bego a ba tshepišitše wona. Ba ile ba tlotšwa ka moya o mokgethwa ge ba be ba kolobetšwa. (Dit. 2:37, 38, 41) Eupša mengwageng e latetšego, ga se Bakriste ka moka ba ilego ba tlotšwa ka moya o mokgethwa ge ba be ba kolobetšwa. Ka mohlala, Basamaria ba ile ba tlotšwa ka moya o mokgethwa ka morago ga nako e itšego ba kolobeditšwe. (Dit. 8:14-17) Eupša Koronelio le ba lapa la gagwe bona ba ile ba tlotšwa ka moya o mokgethwa le pele ba ka kolobetšwa.—Dit. 10:44-48.

5. Go ya ka Bakorinthe ba Bobedi 1:21, 22, Bakriste bao ba tloditšwego ka moya o mokgethwa ba diragalelwa ke’ng?

⁵ Anke ga bjale re boleleng ka taba ya gore motho o ikwa bjang ge a tloditšwe. Ba bangwe ba batho bao ba tloditšwego, mathomong ba ka thatafalelwa ke go dumela gore Jehofa o kgethile bona. Ba ka ipotšiša gore: ‘Go re’ng Jehofa a kgethile nna?’ Eupša ba bangwe ba ka no se ipotšiše potšišo ye. Go sa šetšwe gore motho o ikwa bjang, moapostola Paulo o re hlalosetša seo se diragalelago batho ka moka bao ba tlotšwago. O re: “Ka morago ga ge le dumetše, le ile la ba la swaiwa * ka moya o mokgethwa wo o holofeditšwego ka yena, woo e lego pontšho ya ge  e sa le pele ya bohwa bja rena.” (Baef. 1:13, 14) Ka gona, Jehofa o diriša moya wa gagwe o mokgethwa go dira gore Bakriste ba ba tloditšwego ba tloge ba kgodišega gore Modimo o kgethile bona. Ka tsela ye, moya o mokgethwa ke “pontšho” [goba tshepišo] yeo e kgodišago Bakriste ba tloditšwego gore nakong e tlago ba tlo phela ka mo go sa felego legodimong, e sego mo lefaseng.—Bala 2 Bakorinthe 1:21, 22.

6. Mokriste yo a tloditšwego o swanetše go dira’ng gore a tle a hwetše moputso wa gagwe wa go yo phela legodimong?

⁶ Ge e ba Mokriste a tloditšwe ka moya o mokgethwa, na se se ra gore ga go tselapedi o tlo ya legodimong? Aowa. Ke nnete gore Mokriste yoo o kgodišegile gore o kgethilwe go yo phela legodimong. Eupša o swanetše go gopola keletšo ya Petro yeo e rego: “Bana bešo, dirang sohle se le ka se kgonago gore le kgonthišetše go bitšwa le go kgethwa ga lena; gobane ge e ba le tšwela pele le dira dilo tše, gona le ka se ke la palelwa le ka mohla.” (2 Pet. 1:10) Ka gona le ge Mokriste yo a tloditšwego a kgethilwe goba a bileditšwe go yo phela legodimong, o tlo hwetša moputso woo ge feela a ka dula a botega.—Bafil. 3:12-14; Baheb. 3:1; Kut. 2:10.

7. Batlotšwa ba tseba bjang gore ba kgethilwe go yo phela legodimong?

⁷ Motho a ka tseba bjang gore o kgethilwe go yo phela legodimong? Re hwetša karabo mantšung a Paulo ao a a ngwaletšego Bakriste ba kua Roma “bao ba biditšwego gore e be bakgethwa.” O ba boditše gore: “Ga se la amogela moya wa bokgoba woo o tlago go boela wa baka poifo, eupša le amogetše moya wa go amogelwa le le barwa, e lego moya wo ka wona re goeletšago ra re: ‘Aba, Tate!’ Moya wo ka bowona o hlatselana le moya wa rena gore re bana ba Modimo.” (Baroma 1:7; 8:15, 16) Ka gona, Jehofa o diriša moya o mokgethwa gore batlotšwa ba bone gore ka nnete ba kgethilwe go yo phela legodimong.—1 Bathes. 2:12.

8. Go ya ka Johane wa Pele 2:20, 27, ke ka baka la’ng go sa nyakege gore motho yo mongwe a kgonthišetše Bakriste ba tloditšwego gore ka nnete ba tloditšwe?

⁸ Jehofa o dira gore Bakriste bao ba tloditšwego ka moya o mokgethwa ba se ke ba belaela gore ka nnete ba kgethilwe go yo phela legodimong. (Bala 1 Johane 2:20, 27.) Ke therešo gore Bakriste ka moka ba tloditšwego ba swanetše go rutwa ke Jehofa diphuthegong go no swana le batho ka moka. Eupša ga go nyakege gore motho yo mongwe a ba kgonthišetše gore ka nnete ba tloditšwe ka moya o mokgethwa. Ka baka la’ng? Ka gobane Jehofa o dirišitše matla a magolo ao a sa bapišwego le selo, e lego moya wa gagwe o mokgethwa, go ba kgonthišetša gore ka nnete o ba kgethile.

9. Go ya ka Baefeso 1:18, ge Mokriste a tlotšwa ka moya o mokgethwa, ke’ng seo se fetogago go yena?

⁹ Lehono bahlanka ba ba bantši ba Modimo ba ka thatafalelwa ke go kwešiša seo se diragalelago motho yo Modimo a mo tlotšago ka moya o mokgethwa. Seo ga se makatše ka gobane bona ka bobona ga se ba tlotšwa ka moya o mokgethwa. Le gona, ka moka ga rena Jehofa o be a re bopetše go phela mo lefaseng, e sego legodimong. (Gen. 1:28; Ps. 37:29) Eupša Jehofa o kgethile batho ba bangwe gore ba yo phela legodimong. Ka gona ge a ba tlotša ka moya o mokgethwa o fetoša kholofelo yeo ba bego ba na le yona le tsela ya bona ya go nagana ka mo go feletšego, e le gore ba nyake go yo phela legodimong.—Bala Baefeso 1:18.

10. Go tswalwa gape go ra go re’ng? (Bona le mongwalo wa ka tlase.)

¹⁰ Ge Bakriste ba tlotšwa ka moya o mokgethwa, ba ‘tswalwa gape.’ * Jesu le yena o ile a re  ga go kgonege go hlalosetša motho yo a sego a tlotšwa ka moya o mokgethwa gore a kwešiše gore go bjang go “tswalwa gape” goba go ‘tswalwa ka moya o mokgethwa.’—Johane 3:3-8.

11. Ke ka baka la’ng motho yo a tlotšwago ka moya o mokgethwa a thoma go nagana ka tsela e fapanego?

¹¹ Ka morago ga gore Bakriste ba tlotšwe ka moya o mokgethwa, ba thoma go nagana ka tsela e sa swanego le ya rena. Pele Bakriste bao ba ka tlotšwa, ba be ba tšeela godimo tokelo ya go tlo phela ka mo go sa felego mo lefaseng. Ba be ba fela pelo ya go tlo bona ge Modimo a fediša dilo ka moka tše mpe gomme a fetoša lefase paradeise. Mohlomongwe e bile ba be ba ipona ba tlo bona gape bagwera goba batho ba bangwe ba gabo bona ba tsošwa bahung. Eupša ka morago ga gore ba tlotšwe ka moya o mokgethwa ba ile ba thoma go nagana ka tsela e fapanego. Ke ka baka la’ng ba ile ba thoma go nagana ka tsela e fapanego? Ga se gore ba ile ba thoma go nagana gore go phela ka mo go sa felego mo lefaseng go ka se be bose. Ga se ba ka ba fetoša menagano ya bona ka gobane ba be ba na le kgateletšego ya monagano goba ka baka la dilo tše sehlogo tšeo di ba diragaletšego. Le gona ga se gore kapejana ba ile ba no ikhwetša ba šetše ba nagana gore bophelo bja mo lefaseng bo tlo tšwafiša nakong e tlago. Eupša ke ka gobane Jehofa o ile a diriša moya wa gagwe go dira gore ba fetoše tsela yeo ba naganago ka yona, le go fetoša kholofelo yeo ba bego ba na le yona ya go tlo phela mo lefaseng.

12. Go ya ka Petro wa Pele 1:3, 4, batlotšwa ba ikwa bjang ka kholofelo yeo ba nago le yona?

¹² Motho yo a tloditšwego ka moya o mokgethwa a ka ikwa eka ga a swanelege go yo buša legodimong. Eupša le gateetee ga a belaele gore Jehofa o mo kgethile. Go e na le moo, o thaba kudu ge a nagana ka gore Jehofa o mo kgethile gore a yo phela legodimong.—Bala 1 Petro 1:3, 4.

13. Batlotšwa ba ikwa bjang ka bophelo bja bona bja mo lefaseng?

¹³ Ka ge batlotšwa ba thaba ge ba nagana ka go yo phela legodimong, na se se ra gore ba nyaka go hwa e le gore ba ye legodimong kapejana? Moapostola Paulo o ile a araba potšišo ye ka go swantšha mebele ya batlotšwa le tente. O itše: “Ge e le gabotse, rena bao re lego tenteng ye re a tsetsela, ka ge re imetšwe ke dipelaelo; gobane ga re nyake go e apola, eupša re nyaka go apara e nngwe gore se se hwago se tšeelwe legato ke bophelo.” (2 Bakor. 5:4) Ga se gore batlotšwa ba tšwafiša ke bophelo bja mo lefaseng gomme ba nyaka go hwa kapejana gore ba yo phela legodimong. Eupša ba thabela bophelo e bile ba nyaka go hlankela Jehofa letšatši le letšatši ba na le bagwera ba bona le ba leloko. Ka gona go sa šetšwe gore ba dira eng, ba dula ba naganne ka kholofelo e kgahlišago yeo ba nago le yona ya go yo phela legodimong.—1 Bakor. 15:53; 2 Pet. 1:4; 1 Joh. 3:2, 3; Kut. 20:6.

14. Ke dilo dife tšeo di sa rego gore motho o tloditšwe ka moya o mokgethwa?

¹⁴ Mohlomongwe o ipotšiša ge e ba Jehofa a go tloditše ka moya o mokgethwa. Ge e ba go le bjalo, ipotšiše gore: Na ke hlankela Jehofa ka mafolofolo? Na ke phela ke le tšhemong? Na ke rata go bala Beibele le go ithuta “[dilo] tše di tseneletšego tša Modimo”? (1 Bakor. 2:10) Na Jehofa o ntiriša kudu go tliša batho ka phuthegong? Na ke rata go thuša batho ba bangwe gore ba be le segwera se sebotse le Jehofa? Na ke bone Jehofa a nthušitše ka ditsela tše dintši bophelong? Ge e ba o arabile dipotšišo tše ka ee, na se se ra gore o motlotšwa? Aowa. Ke ka baka la’ng re re’alo? Ka gobane bahlanka ba Jehofa ka moka ba ka ikwa ka tsela ye, go sa šetšwe gore ba yo phela legodimong goba mo lefaseng. Le gona Jehofa a ka diriša moya wa gagwe o mokgethwa go thuša mohlanka yo mongwe le yo mongwe wa gagwe go dira dilo tše, go sa šetšwe gore o yo phela legodimong goba mo lefaseng. Ge e le gabotse, ge e ba o ipotšiša ge e ba o tloditšwe ka moya o mokgethwa, seo ka bosona se ra gore ga se wena  motlotšwa. Batho bao Jehofa a ba kgethilego go ya legodimong ga ba hlwe ba ipotšiša ge e ba ba tloditšwe. Ba a tseba!

15. Re tseba bjang gore ga se batho ka moka bao Modimo a ilego a ba nea moya wa gagwe o mokgethwa bao ba ilego legodimong?

¹⁵ Ge re bala Beibele, re kwa ka batho bao ba nago le tumelo bao Modimo a ilego a ba nea moya o mokgethwa, eupša ba be ba se ba kgethwa gore ba yo phela legodimong. Ka mohlala, Dafida o be a hlahlwa ke moya o mokgethwa. (1 Sam. 16:13) Moya o mokgethwa o ile wa mo thuša gore a kwešiše dilo tše di tseneletšego ka Jehofa le go mo hlahla gore a ngwale dikarolo tše itšego tša Beibele. (Mar. 12:36) Le ge a dirile dilo tše ka moka, moapostola Petro o ile a ngwala gore Dafida “ga se a rotogela magodimong.” (Dit. 2:34) Johane Mokolobetši le yena o ile a “tlala moya o mokgethwa.” (Luka 1:13-16) Le gona Jesu o ile a bolela gore go be go se na motho yo mogolo go feta Johane, eupša ka morago o ile a bontšha gore Johane o be a se a kgethwa go yo buša legodimong. (Mat. 11:10, 11) Jehofa o ile a diriša moya wa gagwe o mokgethwa go thuša banna ba go dira mediro e megolo, eupša ga se a diriša moya woo wa gagwe go ba kgetha gore ba yo buša legodimong. Na se se ra gore batho ba ba be ba sa botege go swana le bao ba kgethilwego go yo buša legodimong? Aowa. Le bona ba be ba botega, ke ka baka leo Jehofa a tlago go ba tsoša bahung nakong e tlago gore ba tlo phela Paradeiseng mo lefaseng.—Joh. 5:28, 29; Dit. 24:15.

16. Lehono bahlanka ba Modimo ba bantši ba na le kholofelo efe?

¹⁶ Lehono bahlanka ba bantši ba Jehofa ga ba na kholofelo ya go yo phela legodimong. Eupša go no swana le Aborahama, Sara, Dafida, Johane Mokolobetši le banna ba bangwe le basadi bao go bolelwago ka bona ka Beibeleng, bahlanka ba ba Modimo ba na le kholofelo ya go tlo phela mo lefaseng ge Mmušo wa Modimo o tla be o buša.—Baheb. 11:10.

17. Re tlo araba dipotšišo dife sehlogong se se latelago?

¹⁷ Ka ge lehono go sa na le batlotšwa gare ga rena, go ka ba le dipotšišo tšeo re ipotšišago tšona. (Kut. 12:17) Ka mohlala, batlotšwa ba swanetše go itebelela bjang? Ge e ba motho yo mongwe ka phuthegong ya geno a thoma go ja senkgwa le go nwa beine Segopotšong, o swanetše go mo lebelela bjang? Le gona o swanetše go ikwa bjang ge palo ya batho bao ba jago Segopotšong e tšwela pele e gola? Na o swanetše go tshwenyega? Re tlo araba dipotšišo tše sehlogong se se latelago.