BAA ÍHOOʼAAH 4
Níłchʼi Diyinii Tʼáá Bí Ajéí Tłʼáahdi Ííłní
“Nihijéí tłʼáahdi níłchʼi diyinii tʼáá bí nihiníłchʼi ííłní.”—ROM. 8:16.
SIN 25 Tʼáá Sahdii Nídiiʼnilii
BAA NÁHÓDÓOTʼĮĮŁII *
Péntekast beiníłką́ągo 120 Oodlání áłah silı̨́įʼgo Jiihóvah biníłchʼi diyinii adah hooleʼgo yeidiyiizʼą́
1-2. Péntekast 33 C.E. yę́ędą́ą́ʼ haa hóótʼįįd?
PÉNTEKAST beiníłką́ągo 33 C.E. yę́ędą́ą́ʼ damóo abínígo Jerúsalemgi ahíjiikai. Éí 120 ídahoołʼaahii danílı̨́įgo hooghan náʼádeídi ahíikai. (Acts 1:13-15; 2:1) Díkwíí yiskánídą́ą́ʼ shı̨́ı̨́ Jesus éí tʼááká Jerúsalem bitsʼą́ąjįʼ dadookah yíilaʼ hodííniid. Háálá ákwii éí aa didootʼáłígíí bibaʼ ádanohtʼée dooleeł hodooʼniid. (Acts 1:4, 5) Áko áádóó haa hóótʼįįd?
2 “Ńtʼééʼ tʼáadoo hooyání ayóó átʼéego niyolígíí nahalingo yáʼąąshdę́ę́ʼ hodiistsʼą́ą́ʼ.” Hooghan tʼáá átʼéé ńtʼééʼ biiʼ hadéébįįd. “Atsooʼ kǫʼ nahalingo” ídahoołʼaahii bikʼijįʼ adahwiizleʼgo éí ‘níłchʼi diyinii hwiiʼ hadadéébįįd.’ (Acts 2:2-4) Ákweʼé ayóó átʼéego áhóótʼįįdgo ákwii nidzíiztánígíí Jiihóvah éí biníłchʼi diyinii hakʼijįʼ kóyiilaa. (Acts 1:8) Hó tsʼídá áłtsé níłchʼi diyinii bee anoint ádahoʼdiilyaa, * éí bee yáʼąąshdi Jesus bił dahojéeʼaah dooleełgo bee há ił chohooʼı̨́įgo ályaa.
ŁAʼDA ANOINT ÁLʼĮĮHGO HAITʼÉE ŁEH?
3. Péntekastdi níłchʼi diyinii bee anoint ádaalyaago éí haʼátʼíí biniinaa doo bił naaki danilíi da?
3 Ídahoołʼaahii éí náʼádeídi áłah silı̨́ı̨́ʼ yę́ędą́ą́ʼ ni anítahgoshąʼ éí shı̨́ı̨́ doo beidiyíínah da. Éí atsooʼ kǫʼ nahalingo nítáaʼgi dahooleʼ áádóó saad ałʼąą ádaatʼéii bee yáníłtiʼgo ániilaa! (Acts 2:5-12) Áko éí díí tʼáá bééhózinígo éí níłchʼi diyinii anoint ániilaa dooleeł. Kótʼéego níłchʼi diyinii bee anoint ádaalyaaígíí, éísh ałdóʼ tʼáá ákotʼéego bee anoint ádaalneʼ? Ndagaʼ, haitʼéego nihił béédahózin? Éí hahgo anoint ádaalneʼ?
4. Ałkʼidą́ą́ʼ Oodlání yę́ę hahgo anoint ádaalyaa?
4 Díí baa nídadíitʼįįł: Łaʼda éí hahgo anoint álʼįįh. Péntekast 33 C.E. yę́ędą́ą́ʼ 120 Oodlání doo tʼáá bí tʼéiyá ákwii yoołkáałgo anoint ádaalyaa da. Tʼáá éí bijı̨́ tʼahádóó 3,000dóó baʼaan ałdóʼ baptize dóó níłchʼi diyinii bee anoint ádabiʼdilyaa. (Acts 2:37, 38, 41) Ndi tʼahádóó éí Oodlání anoint ádaalyaaígíí doo tʼáá átʼé kótʼéego anoint ádaalyaa da. Samériya dineʼé baptize ádabiʼdilyaa áádóó tʼahádóó índa anoint ádaalyaa. (Acts 8:14-17) Ndi łahgo éí Korníílyas dóó bighan hazʼą́ą́dóó yił tʼah doo baptize ádabiʼdilnééhgóó anoint ádaalyaa.—Acts 10:44-48.
5. 2 Corinthians 1:21, 22 éí łaʼda níłchʼi diyinii bee anoint álʼįįhgo haitʼée łeh ní?
5 Łaʼda níłchʼi diyinii bee anoint ábiʼdilʼįįhgo haitʼée łeeígi baa nídadíitʼįįł. Łaʼda anoint ábiʼdilʼįįhgo áłtsé éí ‘Daʼ shí?’ índa ‘Haʼátʼíí biniyé Diyin náshidiiłtı̨́?’ danízin łeh. Łaʼ shı̨́ı̨́ éí doo kódeinízin da łeh. Kódeiznízin shı̨́į ndi, tʼáá átʼé anoint ádaalyaaígíí Paul díí átʼéego yaa chʼíhoníʼą́: “Níłchʼi diyinii nihaidiníʼánígíí bee nihéédahózingo * ádanihiʼdiilyaa. Éí [níłchʼi diyinii] yee yikʼé naʼníláago bííʼ silı̨́įʼii” átʼé. (Eph. 1:13, 14; ftn.) Áko Jiihóvah biníłchʼi diyinii choyoołʼı̨́įgo éí díí Oodlání náyiizláaʼgi yichʼįʼ tʼáá bééhózinígo áyiilaa. Áko éí níłchʼi diyinii bee tʼáá bítséedi ‘bikʼé niilyáago’ ályaa. Éí yáʼąąshdi hoolʼáágóó dahiináa doo, nahasdzáán bikáaʼgi éí ndagaʼ.—2 Corinthians 1:21, 22 yíníłtaʼ.
6. Oodlání anoint ályaaígíí éí yáʼąąshgóó há ahóótʼiʼgi haitʼéego tʼéiyá haa doolyééł?
6 Oodlání łaʼ anoint ályaago éísh yáʼąąshgóó há ahóótʼiʼígíí tʼóó hachʼįʼ kódoolnííł? Ndagaʼ. Tʼáá aaníí doo hoł naaki nilı̨́ı̨́góó yáʼąąshdę́ę́ʼ háká áhodooʼniid ndi díí bééjílniih doo. “Shikʼisóó, tʼáadoo nihił naaki danilínígóó Diyin God nihíká ádííniidígíí áádóó yitah nihiizláʼígíí tʼáá aaníí nihił béédahózin doo, háálá díí tʼáá ałtso bidaʼołʼı̨́įgo tsʼídá doo tʼą́ą́ʼ anídínóohdah da.” (2 Pet. 1:10) Áko Oodlání łaʼ anoint ályaaígíí éí yáʼąąshgóó bíká áhodooʼniidgo éí tʼáá bí wołí bee átʼéego beʼoodląʼ bidziilgo áyósin doo.—Phil. 3:12-14; Heb. 3:1; Rev. 2:10.
ŁAʼDA ANOINT ÁLYAAGO HAITʼÉEGO BIŁ BÉÉHÓZIN?
7. Anoint ádaalyaaígíí éí yáʼąąshgóó bíká ádahodooʼniidgo haitʼéego bił béédahózin?
7 Łaʼda yáʼąąshgóó bíká áhodooʼniidgo tsʼídásh haitʼéego bił bééhózin? Paul éí Romedi diné Diyin ‘bidiyı̨́ı̨́ʼ danohłı̨́’ yidííniid yę́ę binahjįʼ díí bééhózinígo áyiilaa. Éí kwíidííniid: “Naalteʼ ídlı̨́ı̨́jí bikʼee ił náánáyéeʼgo nitsáhákeesii doo nídadooláa da, nidi níłchʼi diyinii bee nihidiʼneeszánígíí nídadiilyá; éí bee Ába, shiTaaʼ, dadiiʼní. Nihijéí tłʼáahdi níłchʼi diyinii tʼáá bí nihiníłchʼi ííłní, Diyin God baʼáłchíní danohłı̨́.” (Rom. 1:7; 8:15, 16) Áko níłchʼi diyinii binahjįʼ anoint ádaalyaaígíí éí Diyin tʼáá bééhózinígo ííłníigo éí yáʼąąshgóó yíká ádííniid.—1 Thess. 2:12.
8. Oodlání anoint ályaago tʼáá bí bił bééhózingi haitʼéego Romans 8:16 chʼíiníʼą́?
8 Jiihóvah éí yáʼąąshgóó yíká ádííniidii éí doo bił naaki danilı̨́ı̨́góó bíniʼ índa bijéí yiih yiyiizlaʼ. (Romans 8:16 yíníłtaʼ.) Díí Oodlání anoint ádaalyaaígíí éí tʼáá congregation nahazʼą́ą́góó bił yah aníjíjahígíí tʼáá altso Jiihóvah nahonitin. Ndi shí éí anoint áshiʼdiilyaa doo dajiníi da doo. Jiihóvah biníłchʼi diyinii ayóó ábóodziilii yee díí anoint ábiʼdilyaagi tʼáá bééhózinígo yił ííshjání ííłʼı̨́!
NÁÁDABIʼDIZHCHĮ́
9. Ephesians 1:18 éí łaʼda anoint álʼįįhgo haitʼéego nitsékees yileeh ní?
9 Ła’ anoint ábiʼdilʼįįhgo éí łah átʼéego nitsíkees yileehgi éí ląʼí Jiihóvah Yá Dahalneʼé doo ayóó yikʼidaʼdiitįįh da. Kótʼéego baa nitsáhákeesgo tʼáadoo átʼéhí da, háálá hó éí doo anoint ádahoʼdiilyaa da. Diyin éí bílaʼashdlaʼii nahasdzáán bikáaʼgi hoolʼáágóó hináa dooleełgo áyiilaa. Yáʼąąshdi éí ndagaʼ. (Gen. 1:28; Ps. 37:29) Ndi Jiihóvah éí łaʼ yáʼąąshdi dahiináa dooleełgo náyiizlááʼ. Éí nahasdzáán bikááʼ iiná, índa nitsídaakees yę́ęgi łah átʼéego yá áyiilaa. Anoint ádeeleʼgo yáʼąąshdi dahiináa dooleełgo yaa nitsídaakeesgo yíká dadéezʼı̨́ı̨́ʼ.—Ephesians 1:18 yíníłtaʼ.
10. ‘Nááhoʼdichíihgo’ haʼátʼíí óolyé? (Footnote ałdóʼ níníłʼı̨́.)
10 Oodlání łaʼ níłchʼi diyinii bee anoint ályaago éí ‘náábiʼdizhchı̨́į’ doo. * Jesus éí díí łaʼda hazhóʼó yikʼidiʼdootı̨́įłgi tʼáá bá nanitłʼahgo átʼé ní. Háálá éí ‘nááhoʼdichíihgo’ doodaiiʼ ‘níłchʼi diyinii bee nááhoʼdizhchı̨́įgo’ éí tsʼídá átʼéegi doo anoint ályaaígíí doo bił bééhózin da.—John 3:3-8.
11. Łaʼda anoint álʼįįhgo bintsékees yę́ę haitʼéego łahgo átʼé yileeh?
11 Oodlání anoint álʼı̨́įgo haitʼéego nitsékees yileeh? Éí Jiihóvah tʼah doo anoint ábílééhgóó éí nahasdzáán bikááʼ hoolʼáágóó hinishnáa doo danízin. Yaa bił dahózhǫ́ǫgo éí Jiihóvah nahasdzáán bikáaʼgi honóoshónígo ánéidoodlííł áádóó doo yáʼádaashxóonii ałtso nahjįʼ kwíidoolíłígíí yíká dadéezʼı̨́ı̨́ʼ. Áádóó bikʼéida, bikʼisda ádaadinę́ę náábidiʼdooljahgo yíká dadéezʼı̨́ı̨́ʼ. Anoint ádabiʼdilyaadóó bikʼijįʼ bintsékees yę́ę łahgo átʼé yileeh. Éí haʼátʼíí biniyé ákótʼé? Nahasdzáán bikááʼ iiná doo bóhoneedlı̨́į da hazlı̨́ı̨́ʼ doo danízin da. Yínííł bikʼee doodaiiʼ achʼįʼ nahwiiʼná biniinaa doo łahgo átʼéego nitsídadeezkéez da. Áádóó índa nahasdzáán bikááʼ hoolʼáágóó iináa ádadahodiidláa dooleeł, doo danízin da. Ndi łah átʼéego nitsídaakeesgo dóó bił chodahooʼı̨́įgo Jiihóvah biníłchʼi diyinii yee łah átʼéego nitsídadeezkéezgo áyiilaa.
12. 1 Peter 1:3, 4 bikʼehgo éí anoint ádaalyaaígíí bee bił chodahooʼíinii haitʼéego yaa nitsídaakees?
12 Łaʼda anoint álʼįįhgo shí éí haʼátʼíí biniyé tʼáadoo biniyéhégóó díí baa hózhǫ́ǫgo ílíinii shąąh niilyá nízin łeh. Ndi tsʼídá doo bił naaki nilı̨́ı̨́góó Jiihóvah éí náshidiiłtı̨́ nízin. Áko bijéí nabiiłnáago yaa ahééh nízingo yáʼąąshdi hinishnáa doo nízingo bił chohooʼı̨́.—1 Peter 1:3, 4 yíníłtaʼ.
13. Anoint ádaalyaaígíí nahasdzáán bikááʼ iiná haitʼéego yaa nitsídaakees?
13 Ákosh anoint ádaalyaaígíí tʼóó dadeestsaał danízingo nitsídaakees? Yilʼaadii Paul kóníigo nihił hoolneʼ. Éí danihitsʼíís níbaal nahalin níigo yee haadzííʼ. “Háálá tʼahdii díí nihitsʼíís níbaal nahalingo biiʼ kééhwiitʼı̨́įgo ádił nídahodiilchiłgo ádił háádeiidzoł; éí doo biiʼ hadahidiikah da daniidzin, nidi yáʼąąshdę́ʼígíí biih dahidiikah daniidzin, áko iiná ániidíii biniinaa díí atsʼíís dadootsaałii yóóʼadooldoh.” (2 Cor. 5:4) Iiná ádadéshłááʼ, índa tʼóó tsxı̨́įłgo nidootʼih doo danízin da. Ndi iiná yaa bił dahózhó índa tʼáá ákwíí jı̨́ bikʼéí dóó bikʼis yił Jiihóvah bá nideiilʼaʼ doo danízin. Haʼátʼíí shı̨́ı̨́ biniʼdoonishii yaa bił dahózhǫ́, ndi bá ił chodahooʼínígíí doo yaa dayoonéeh da.—1 Cor. 15:53; 2 Pet. 1:4; 1 John 3:2, 3; Rev. 20:6.
JIIHÓVAÁSH ANOINT ÁNIILAA?
14. Tʼáá aaníí anoint ályaaígíí éí haʼátʼíí binahjįʼ bee bééhózin?
14 Shí daatsʼí níłchʼi diyinii bee anoint áshiʼdiilyaa nínízin shı̨́ı̨́ łeh. Ákwii nínízingo díí baa nitsíníkees: Jiihóvah íinízinii bikʼehgóó áániiłgo ayóoísh bínindlı̨́? Nahaneʼgóó ayóoísh bínindlı̨́? Diyin Bizaad biiʼdóó diyin bitsʼą́ą́dóó “tsʼídá tʼáá aaníinii binaʼnitinii” baa íhoołʼaahgo ayóoísh bínindlı̨́? (1 Cor. 2:10, NW) Nahaneʼgóó Jiihóvah ayóó átʼéego shikʼi hasdliʼ nínízingoósh nitsíníkees? Łaʼda Jiihóvah yaa íhwiidoołʼáałgi naanishii átʼéego shąąh niilyá nínízingoósh nitsíníkees. Díkwíígóó shı̨́ı̨́ Jiihóvah yee níká eelwodígíí éísh baa ákonínízin? Díí tʼáá aaníí aooʼ ákótʼé nínízingo ákosh éí yáʼąąshgóó atah nándiiłtı̨́? Ndagaʼ. Haʼátʼíí biniinaa? Jó, tʼáá ałtso Diyin bá ndaalʼaʼii kótʼéego nitsídaakees łeh. Jiihóvah éí tʼáá éidí biníłchʼi diyinii tʼáá ałtso bá ndaalʼaʼí yee yíká análwoʼ. Áko shí daatsʼí níłchʼi diyinii bee anoint áshiʼdiilyaa nínízingo, ndi tʼóó daatsʼí nínízingo éí doo anoint ándiilyaa dago átʼé. Háálá Jiihóvah náyiizláʼígíí éí doo daatsʼí danízin da, ndi éí tʼáá aaníigo bił béédahozin.
Jiihóvah éí biníłchʼi diyinii choyoołʼı̨́įgo Éíbraham, Sárah, David dóó John Taah Iiníiłii ayóó átʼéii naanishii ádayiilaa, ndi éí níłchʼi diyinii doo yee yáʼąąshgóó bá chodahooʼı̨́įgo yá áyiilaa da (¶15-16 bił) *
15. Haitʼéego nihił béédahózingo Diyin biníłchʼi diyinii bikʼi dahooleʼ yę́ę éí yáʼąąshgóó doo bá ił chodahooʼı̨́į da?
15 Diyin Bizaad biiʼdę́ę́ʼ éí hastóí beʼoodląʼ dabidziilii níłchʼi diyinii bikʼi dahooleʼ haʼníigo baa haneʼ. Ndi éí yáʼąąshdi iináa doogo doo bá bee ił chodahooʼı̨́į da. David éí níłchʼi diyinii bíká análwoʼ ńtʼééʼ. (1 Sam. 16:13) Éí Jiihóvah tsʼídá tʼáá aaníí binaʼnitinii bikʼidiʼdootı̨́įłgi índa Diyin Bizaad łahdóó álnéehgi bee bíká eelwod. (Mark 12:36) Azhą́ ákótʼée ndi, yilʼaadii Peter áníigo David éí ‘tʼáadoo yáʼąąshgóó ííyáa da.’ (Acts 2:34) John Taah Iiníiłii éí “níłchʼi diyinii biiʼ hadeezbin” ńtʼééʼ. (Luke 1:13-16) Jesus áníigo éí John doo łaʼ biláahgo ájítʼée da, ndi John éí yáʼąąshdi nahatʼáii doo bee ajítah da. (Matt. 11:10, 11) Jiihóvah biníłchʼi diyinii bee díí hastóí éí ayóó átʼéii naanishii ádayiilaa ndi, éí yáʼąąshgóó doo bá chodahooʼı̨́į da. Ákosh éí yáʼąąshdi dahwéeʼaah dooleełgo náhaasdláʼígíí tʼáá bichʼįʼígo hweʼoodląʼ dabidziil níigo ání? Ndagaʼ. Éí áníigo éí nahasdzáán honóoshónígo ánályaago Jiihóvah áadi iiná yaa néidiyoodlééł.—John 5:28, 29; Acts 24:15.
16. Ląʼí Diyin bá ndaalʼaʼí éí haʼátʼíí bee bá ił chohooʼı̨́?
16 Dííshjı̨́įdi ląʼí Diyin bá ndaalʼaʼí éí yáʼąąshdi iináa dooleełgo doo bá bee ił chohooʼı̨́į da. Éíbraham, Sárah, David dóó John Taah Iiníiłii áádóó Diyin Bizaad biiʼdę́ę́ʼ ląʼí hastóí dóó sáanii baa dahaneʼii éí God biNahatʼaʼ nahasdzáán yikʼi hodeezʼą́ągo bikááʼ iiná dooleełgo yíká dadéezʼı̨́ı̨́ʼ.—Heb. 11:10.
17. Haʼátʼíí díí bikééʼdóó baa nídadíitʼįįł?
17 Anoint ádaalyaaígíí tʼahdii nihitahgóó nidaakaigo biniinaa kótʼéego naʼídíkid hólǫ́ǫ łeh. (Rev. 12:17) Éí anoint ádaalyaaígíí haitʼéego ádaa nitsídajíkees doo? Áádóó Memorial éʼélnéehgi łaʼ partake áʼiilaago baa ákoninizı̨́įʼgo, éí partake íʼiilaaígíí haitʼéego baa tsídííkos? Áádóó anoint áshiʼdiilyaa daaníigo áko éí tʼóó ląʼí yileełgo éísh bąąh nihíniʼ doo? Díí éí bikééʼdóó baa nídadíitʼįįł.
^ par. 5 Péntekast 33 C.E.dóó wóshdę́ę́ʼ Jiihóvah éí Oodlání łaʼ ayóó átʼéego bee ił chohooʼíinii yeidiníʼą́, éí yáʼąąshdi biYeʼ yił dahwéeʼaah doogo yá áyiilaa. Díí Oodlání éí haitʼéego hoł béédahózingo díí biniyé nídahoʼdiisdlááʼ? Oodlání łaʼ kótʼéego nábiʼdiiltı̨́įgo éí haitʼée łeh? Díí éí January 2016 Watchtower ályaa yę́ę binahjįʼ baa íhooʼaah doo. Éí díí ndaʼídíkidígíí yee ił náhodoolnih.
^ par. 2 ÁHYIŁNÍIGI: Níłchʼi diyinii bee anoint ályaa: Jiihóvah éí łaʼda Jesus yáʼąąshdi yił hooʼáał dooleełgo biníłchʼi diyinii choyoołʼı̨́įgo yee náyiilááh. Áko éí binahjįʼgo néidiiłtinígíí éí tʼáá aaníí náasdi bá dooleełii bił bééhózin doodaiiʼ tʼáá bítséedi ‘bikʼé naʼílyá.’ (Eph. 1:13, 14) Áko Oodlání nídabiʼdiisdláʼígíí éí tʼáá bééhózinígo níłchʼi diyinii ‘nihił halneʼgo’ yáʼąąshgóó nihá chohooʼı̨́ daaní.—Rom. 8:16.
^ par. 5 ÁHYIŁNÍIGI: Seal. Anoint ályaaígíí niʼníłdįįd bijı̨́įjįʼ beʼoodląʼ bidziilgo doodaiiʼ great tribulation tʼah doo bee hahalzhííshgóó éí bee bééhózinii ályaa yę́ę íʼdiidlííd nahalingo doo nahjįʼ kónídoolníił da.—Eph. 4:30; Rev. 7:2-4; The Watchtower, April 2016, “Questions From Readers” wolyéegi baa íídííłtah.
SIN 27 The Revealing of God’s Sons
^ par. 57 EELKIDÍGÍÍ: Azhą́ awáalya góneʼ siidáa ndi, doodaiiʼ tʼáá aaníinii baa nahwiilneʼ índa bee naʼniitingo tʼah nihá bee hazʼą́ągo éí God biNahatʼaʼ nahasdzáán yikʼi hodeezʼą́ągo éí bíká dadíníitʼı̨́įʼgo átʼé.
