1-2. Ni ky’okutangaaza ki ekyabaireho aha izooba rya Pentekoote 33 Y.A.K.?

RIKABA riri eizooba rya Sande omu kasheeshe omuri Yerusaalemu. Gukaba guri omwaka 33 Y.A.K., aha izooba rya Pentekoote. Abeegi ba Yesu nka 120 bakaba bari hamwe omu kishengye ky’ahaiguru. (Byak. 1:13-15; 2:1) Ebiro bikye enyima, Yesu akaba yaabagambiire kuguma omuri Yerusaalemu ahakuba bakaba nibaija kuheebwa ekiconco ky’omutaano. (Byak. 1:4, 5) Bwanyima hakabaho ki?

² ‘Ahonaaho, hakabaho okuhoorera kuruga omu iguru, nk’oku omuyaga gurikuhoorera n’amaani.’ Okuhoorera okwo kukaba nikuhurirwa omu nju yoona. Reero, “endimi nk’ez’omuriro” zaaza aha mitwe y’abeegi, kandi boona ‘baijura omwoyo gurikwera.’ (Byak. 2:2-4) Omu muringo gurikutangaaza Yehova akashuka omwoyo gurikwera aha bantu abo. (Byak. 1:8) Nibo baabandize kushukwaho omwoyo gurikwera * reero bakaheebwa amatsiko g’okuza omu iguru kutegyeka na Yesu.

3. Ahabw’enki abaabaire bari aha bugyenyi bwa Pentekoote batarabangaaniise ngu baashukwaho omwoyo gurikwera?

³ Ku ogire ngu okaba ori omwe aha beegi ba Yesu abaabaire bateeraniire omu kishengye ky’ahaiguru aha izooba eryo, okaba otarikwija kwebwa ekyabaireho. Teekateeka orikureeba ekintu ekiri nk’orurimi rw’omuriro kiri aha mutwe gwawe, reero okatandika kugamba omu ndimi! (Byak. 2:5-12) Buzima okaba  otarikwija kubangaanisa na kakye ngu Ruhanga yaakushukaho omwoyo gurikwera. Kwonka shi boona nibashukwaho omwoyo gurikwera omu muringo gurikushushana kandi omu bwire bumwe? Ngaaha. Eki nitukimanya tuta?

4. Mbwenu shi Abakristaayo boona omu kyasha ky’okubanza bakashukwaho omwoyo gurikwera omu bwire nibwo bumwe? Shoboorora.

⁴ Ka tugambe aha bwire bw’okushukwaho omwoyo gurikwera. Abakristaayo 120 tibo bonka abaashukirweho omwoyo gurikwera aha izooba rya Pentekoote, 33 Y.A.K. Bwanyima omu izooba eryo, abantu nka 3,000 nabo bakashukwaho omwoyo gurikwera nk’oku Yesu yaabaire araganiise. Bakashukwaho omwoyo gurikwera bwanyima y’okubatizibwa. (Byak. 2:37, 38, 41) Kwonka omu myaka eyaakuratsireho, Abakristaayo boona bakashukwaho omwoyo gurikwera barikubatizibwa. Abasamaria bakabanza baabatizibwa reero ku haahingwireho obwire baashukwaho omwoyo gurikwera. (Byak. 8:14-17) Kandi Koruneelio n’ab’omu ka ye omu muringo gw’omutaano bakashukwaho omwoyo gurikwera batakabatiziibwe.​—Byak. 10:44-48.

5. Kurugiirira aha biri omu 2 Abakorinso 1:21, 22, niki ekirikubaho omuntu yaashukwaho omwoyo gurikwera?

⁵ Ka twetegyereze ekirikubaho omuntu yaashukwaho omwoyo gurikwera. Abamwe ku barikushukwaho omwoyo gurikwera omu kubanza nikibaasa kubagumira kwikiriza ngu Yehova abatooraine. Nibabaasa kwebuuza bati: ‘Ahabw’enki Ruhanga atooraine nyowe?’ Kwonka abandi nibabaasa kuteehurira batyo. Oku omuntu arikwehurira tikyo kikuru, entumwa Paulo naashoboorora ekirikuhika ahari boona abarikushukwaho omwoyo gurikwera ati: ‘Ku mwaikiriize, mwahamibwa n’akamanyiso * k’omwoyo gurikwera ogwaraganisiibwe, nigwo mukwato gw’obuhunguzi bwaitu.’ (Efe. 1:13, 14) N’ahabw’ekyo Yehova naakoresa omwoyo gurikwera kuhamiza Abakristaayo aba ngu abatooraine. Omu muringo ogu, omwoyo gurikwera nigwo ‘mukwato [omusingo nari ekiraganiso]’ eki Yehova arikubaha kubahamiza  ngu omu biro by’omumaisho nibaija kutuura omu iguru ebiro byona, hatari mu nsi.​—Shoma 2 Abakorinso 1:21, 22.

6. Omukristaayo oshukirweho omwoyo gurikwera naaba aine kukora ki kutunga ekiconco kye ky’okuza omu iguru?

⁶ Mbwenu shi Omukristaayo yaashukwaho omwoyo gurikwera nikimanyisa ngu n’obu haakubaho ki naija kuza omu iguru? Ngaaha. Naaba naahamiza kimwe ngu atoorainwe kuza omu iguru. Kwonka, aine kwijuka okurabura oku: ‘B’eishe-emwe, mwongyere kwezirika kuhamya okwetwa kwanyu n’okutooranwa kwanyu, ahakuba ku muraatwaze mutyo, timurikwija kugwa ebiro byona.’ (2 Pet. 1:10) N’ahabw’ekyo n’obu Omukristaayo yaakuba atoorainwe kuza omu iguru, tarikubaasa kutunga ekiconco kye yaaba atagumire ari omwesigwa.​—Fil. 3:12-14; Heb. 3:1; Kush. 2:10.

7. Abashukirweho omwoyo gurikwera nibamanya bata ngu beetsirwe kuza omu iguru?

⁷ Kwonka omuntu naamanya ata ngu ayetsirwe kuza omu iguru? Eky’okugarukamu kiri omu bigambo bya Paulo ebi yaahandiikiire Abakristaayo b’omuri Rooma, “abaayetsirwe kuba abarikwera.” Akabagira ati: ‘Timurahairwe omwoyo gw’obuhuuku kugaruka kutiina, kureka mukaheebwa omwoyo ogwabahindwire abaana ba Ruhanga, ogurikutugambisa tukagira tuti: ‘Abba, Taata!’ Omwoyo ogwo nigwo gurikuhamya n’emyoyo yaitu ku turi abaana ba Ruhanga.’ (Rom. 1:7; 8:15, 16) N’ahabw’ekyo Ruhanga naakoresa omwoyo gurikwera kuhamiza otoorainwe ngu ayetsirwe kuza omu iguru.​—1 Tes. 2:12.

8. Ebiri omu 1 Yohaana 2:20, 27 nibyoreka bita ngu abashukirweho omwoyo gurikwera tibarikwenda omuntu weena kubahamiza ngu batoorainwe?

⁸ Abashukirweho omwoyo gurikwera Yehova tarikubarekamu kubanganisa kwona omu mutima n’omu biteekateeko ngu abatooraine kuza omu iguru. (Shoma 1 Yohaana 2:20, 27.) Kandi, Abakristaayo abashukirweho omwoyo gurikwera baine kuguma nibeegyesibwa Yehova kurabira omu kibiina nk’abandi boona. Kwonka tibarikwetenga omuntu weena kubahamiza ngu batoorainwe. Yehova naakoresa omwoyo gurikwera nigo maani agarikukirayo omu nsi n’omu iguru, kubahamiza ngu batoorainwe!

9. Nk’oku kirikushoboororwa omu Abaefeso 1:18, ni mpindahinduka ki ezirikuhika aha muntu yaatooranwa kuza omu iguru?

⁹ Omu bunaku obu, abaheereza ba Ruhanga baingi nikibaasa kubagumira kwetegyereza ekirikuba aha muntu yaashukwaho omwoyo gurikwera. Eki kiri kityo ahakuba bo nibaba batashukirweho omwoyo gurikwera. Ruhanga akahanga abantu kutuura omu nsi ebiro byona, beitu hatari mu iguru. (Kut. 1:28; Zab. 37:29) Kwonka Yehova atooraine bamwe kuza kutuura omu iguru. N’ahabw’ekyo ku arikubashukaho omwoyo gurikwera, naahindurira kimwe amatsiko gaabo n’emiteekateekyere yaabo, n’ahabw’ekyo nibaba baine ekihika ky’okuza omu iguru.​—Shoma Abaefeso 1:18.

10. Nikimanyisa ki ‘okuzaarwa ogwa kabiri’? (Reeba obugambo obw’ahansi.)

¹⁰ Omukristaayo ku arikushukwaho omwoyo gurikwera, ‘naazaarwa ogwa kabiri.’ * Kandi Yesu akooreka ngu tikirikubaasika kushoboororera omuntu otashukirweho omwoyo gurikwera reero akeetegyereza gye oku ‘ozairwe ogwa kabiri’ nari ‘ozairwe omwoyo’ arikwehurira.—Yoh. 3:3-8.

11. Omuntu naahindura ata emiteekateekyere ye yaashukwaho omwoyo gurikwera?

¹¹ Abakristaayo nibahikwaho mpindahinduka  ki baashukwaho omwoyo gurikwera? Yehova atakashukire omwoyo gurikwera aha Bakristaayo aba, nibaba baine amatsiko g’okutuura omu nsi ebiro byona. Nibaba baine ekihika ky’okureeba obu Yehova araiheho ebikorwa bibi omu nsi yoona, kandi akagihindura Paradiso. Obundi bakaba nibateekateeka ngu omu nsi ensya nibaija kutangirira abanyabuzaare na banywani baabo abaafiire. Kwonka bwanyima y’okushukwaho omwoyo gurikwera, emiteekateekyere yaabo neehinduka. Ahabw’enki? Ti kugira ngu batamirwe amatsiko g’okutuura omu nsi. Tibarikuhindura emiteekateekyere yaabo ahabw’amaganya nari obujune. Ti kugira ngu nibateekateeka ngu okutuura omu nsi ebiro byona nikiija kuba nikirusya nari nikitama. Kureka, Yehova naakoresa omwoyo gwe ogurikwera kuhindura emiteekateekyere yaabo n’amatsiko agu baine.

12. Kurugiirira aha biri omu 1 Petero 1:3, 4, Abakristaayo abashukirweho omwoyo gurikwera nibatwara bata amatsiko gaabo?

¹² Orikuba atoorainwe kuza omu iguru naabaasa kwereeba nk’otashemereire kutunga omugisha ogwo. Kwonka tarikubangaanisa yaaba Yehova amutooraine. Naaba ashemereirwe munonga ku arikuteekateeka aha matsiko ge, kandi naaguma naasiima ahabw’okugira omugisha ogu.​—Shoma 1 Petero 1:3, 4.

13. Abashukirweho omwoyo gurikwera nibeehurira bata baaba bari aha omu nsi?

¹³ Mbwenu shi eki nikimanyisa ngu abashukirweho omwoyo gurikwera nibaba nibenda kufa? Entumwa Paulo naagarukamu ekibuuzo ekyo. Akagyeragyeranisa omubiri gwabo gw’omuntu n’eihema, yaagira ati: “Ahakuba itwe abakiri omu nju egi ey’orusiisira nitutsinda turemeirwe, ti habw’okwenda kujuurwa, kureka okwongyera kujwekwa, ngu eky’okufa kimirwe amagara.” (2 Kor. 5:4) Abakristaayo aba nibaba batatamirwe magara aga, barikuhurira barikwenda kufa juba. Kureka, nikibashemeza kukoresa amagara g’obuntu buri izooba kuheereza Yehova bari n’ab’omu maka gaabo na banywani baabo. Kwonka kyona eki barikukora, nibaguma nibateekateeka aha matsiko gaabo g’omuhendo munonga ag’ebiro by’omumaisho.​—1 Kor. 15:53; 2 Pet. 1:4; 1 Yoh. 3:2, 3; Kush. 20:6.

14. Ni bintu ki ebitarikuhamya ngu omuntu ashukirweho omwoyo gurikwera?

¹⁴ Obundi nooyebuuza yaaba oshukirweho omwoyo gurikwera. Kyaba nikwo kiri, teekateeka aha bibuuzo ebi: Oine ekyetengo ky’amaani eky’okukora ebi Yehova arikukunda? Nooreeba ngu oine omujinya gw’amaani omu kubuurira? Ori omwegi murungi w’Ekigambo kya Ruhanga orikukunda kucondooza aha bintu ebitoorobi kwetegyereza? (1 Kor. 2:10) Yehova akuhaire emigisha mingi omu omurimo gwawe gw’okubuurira? Nooreeba ngu oine obujunaanizibwa bw’amaani obw’okuhwera abandi omu by’omwoyo? Nooreeba obuhame oburikworeka gye ngu Yehova akuhweraire omu miringo mingi? Mbwenu shi waagarukamu ebibuuzo ebi byona ngu eego, nikimanyisa ngu oyetsirwe kuza omu iguru? Ngaaha buzima. Ahabw’enki? Ahakuba abaheereza ba Ruhanga boona nibabaasa kwehurira batyo yaaba bashukirweho omwoyo gurikwera nari batagushukirweho. Yehova naakoresa omwoyo gurikwera kuha amaani abaheereza be boona yaaba baine amatsiko g’okuza omu iguru nari kutuura omu nsi. Ku oraabe nooyebuuza yaaba oshukirweho omwoyo gurikwera, okubangaanisa okwo nikworeka ngu tori omwe aha bashukirweho omwoyo gurikwera. Abu Yehova atooraine kuza omu iguru tibarikubanganisa aha kutooranwa kwabo! Nibakimanya gye!

15. Nitumanya tuta ngu ti boona abarikuhwerwa omwoyo gurikwera batoorainwe kuza omu iguru?

 ¹⁵ Baibuli neeyoreka ngu hariho abashaija baingi abaahwereirwe omwoyo gurikwera, kwonka bakaba bataine matsiko g’okuza omu iguru. Daudi akaba naayebemberwa omwoyo gurikwera. (1 Sam. 16:13) Gukamuhwera kwetegyereza ebintu ebitoorobi ebirikukwata ahari Yehova n’okuhandiika bimwe aha biri omu Baibuli. (Mak. 12:36) N’obu kiraabe kiri kityo, entumwa Petero akagira ngu ‘Daudi we taratembire mu iguru.’ (Byak. 2:34) Yohaana Omubatizi akaba ‘aijwire omwoyo gurikwera.’ (Luk. 1:13-16) Yesu akagira ngu hakaba hatariho omushaija orikukira Yohaana, kwonka akagira ngu Yohaana akaba atarikwija kuza omu Bukama bw’omu iguru. (Mat. 11:10, 11) Yehova akakoresa omwoyo gurikwera kubaasisa abashaija aba kukora ebintu by’amaani, kwonka tarakoreise omwoyo nigwo gumwe kubatoorana kuza kutuura omu iguru. Mbwenu shi ekyo nikimanyisa ngu bakaba batari beesigwa munonga nk’abaraaze omu iguru kutegyeka? Ngaaha. Kureka nikimanyisa ngu Yehova naija kubazoora batungye amagara agatahwaho omu Paradiso omu nsi.​—Yoh. 5:28, 29; Byak. 24:15.

16. Baingi aha baheereza ba Ruhanga baine ekihika ky’okutunga kiconco ki?

¹⁶ Abaheereza ba Ruhanga baingi obunaku obu ti baine matsiko g’okuza kutuura omu iguru. Kureka nka Abrahamu, Saara, Daudi, Yohaana Omubatizi, n’abandi baingi abarikugambwaho omu Baibuli, baine ekihika ky’okutuura omu nsi, obwo barikutegyekwa Obukama bwa Ruhanga.​—Heb. 11:10.

17. Ni bibuuzo ki ebi turaagarukyemu omu kicweka ekirikukurataho?

¹⁷ Ahabw’okugira ngu hakiriho abaheereza ba Ruhanga abashukirweho omwoyo gurikwera abakirikutuura naitwe, obumwe nitubaasa kwebuuza ebibuuzo bitari bimwe na bimwe. (Kush. 12:17) Nk’eky’okureeberaho, abashukirweho omwoyo gurikwera bashemereire kweteekateekaho bata? Haagira owaatandika kurya n’okunywa aha bumanyiso bw’Ekiijutsyo omu kibiina kyanyu, oshemereire kumutwariza ota? Kandi shi omubaro gw’abarikurya kandi bakanywa aha bumanyiso bw’Ekiijutsyo gwaguma nigweyongyera kukanya? Ekyo kishemereire kukwerarikiriza? Nituza kugarukamu ebibuuzo ebi omu kicweka ekirikukurataho.