1-2. Emru igbevwunu ọgo yọ phiare uvuẹn ẹdẹ i Pentecost ẹgbukpe 33 C.E.?

URHIỌKE i Sunday uvuẹn Jerusalem, ẹgbukpe 33 C.E. ẹdẹ i Pentecost, idibo i Jesu ri te 120 ni kokori uvuẹn oberun oghwa owu. (Acts 1:13-15; 2:1) Ẹdẹ ezẹko ri vrẹnren na, Jesu ọ ta rẹn aye nẹ aye daji uvuẹn Jerusalem, fọkime a samọ yẹ aye ẹghẹlẹ ọghoghanren owu. (Acts 1:4, 5) Me yọ phiare ọke oru?

² “Ogege edon no nẹ odjuwu rhe, jerẹ edon aphẹrẹ ọgbogbanhon.” Ne rhon edon na uvuẹn ọsoso oghwa na. Omarana, “ẹrẹnmo ri họhọ erhanren” ni homaphia oberun urhomu idibo na, “aye ephian ne vuọnren rhẹ ẹhẹn ọfuanfon.” (Acts 2:2-4) Uvuẹn izede igbevwunu ọrana, Jehova no tiobọnẹ ẹhẹn ọfuanfon ọnẹyen rẹn ẹko ọrana. (Acts 1:8) Aye ni me rhiẹ ihworho erukaro ra ha ẹhẹn ọfuanfon * na djẹha, jeghwai vwo ifiẹrorhọ rẹ aye ine leli Jesu sun obẹ odjuwu.

3. Mesoriẹ ihworho ra djẹha ẹdẹ i Pentecost na i vwe vwo ẹhẹn eveva kpahen use aye?

³ Orhianẹ wẹwẹ owuọwan usuẹn idibo ri kokori uvuẹn oberun oghwa na ẹdẹ ọrana, ọ vwọ samọ sẹruọ ẹro dẹ-ẹ.  Oborẹ ọ họhọ ẹrẹnmo erhanren nọ homaphia uvuẹn urhomuo, ne wu tuẹn edjadjẹ ẹrọrọ ẹdjẹ rhọ! (Acts 2:5-12) Itiọrurhomẹmro, wu ne vi vwo imwẹro taghene a ha ẹhẹn ọfuanfon na djọ ha ne. Ọrẹn, ọsoso ihworho ra djẹha yi mẹrẹn oka aye uvuẹn izede igbevwunu ọrhẹ uvwre ọke owu uvuẹn akpenyerẹn aye? Ẹjo. Marhẹ ọwan i ru rhe?

4. Ọke owu ya djẹ ọsoso Ilele Kristi erukaro na ha? Dje yi fiotọre.

⁴ Jene yono kpahen ọke ra na sabu djẹ ohworho ha. Orhiẹ ẹko Ilele Kristi awan 120 na ọvo ya ha ẹhẹn ọfuanfon djẹha uvuẹn Pentecost, 33 C.E ọke ọrana-a. Ọke oru, uvuẹn ẹdẹ ọrana, na ji ha ẹhẹn ọfuanfon djẹ emrẹ ihworho ri te 3,000 ha. A djẹrẹ aye ha uvwre ọke aye e bromarhame. (Acts 2:37, 38, 41) Ọrẹn uvuẹn ẹgbukpe ri lelirie, orhiẹ Ilele Kristi ephian ra djẹha yi vwo ẹhẹn ọfuanfon na ọke aye e bromarhame-e. A djẹ itu i Samaria ha ọke aye e bromarhame hin ne. (Acts 8:14-17) A djẹ i Cornelius ọrhẹ ekrun ọnẹyen ha aye i ki tobọ bromarhame, ọnana oborẹ e vwe kiki mẹrẹn.​—Acts 10:44-48.

5. Lele oborẹ ọ ha uvuẹn 2 Corinthians 1:21, 22, me yọ phia arha ha ẹhẹn ọfuanfon djẹ ohworho ha?

⁵ Jene yono kpahen oborẹ ọ phia arha djẹ ohworho ha rhẹ ẹhẹn ọfuanfon. Ọnọ sabu bẹn rẹ ihworho ra djẹha ine kwe taghene Jehova ọ djẹrẹ aye ha. Aye ina sabu roro, ‘Mesoriẹ Osolobrugwẹ ọ djẹ mẹ?’ Awọrọ ina sabu vwo iroro ọrọrọ. Kerhirhiẹ kerhirhiẹ, ọnyikọ Paul o dje oborẹ ọ phia rẹn ọsoso ihworho ra djẹha: “Ọke are e vwo imwẹro, na koka * rhọ are nyoma yen rhẹ ẹhẹn ọfuanfon re vive kpahen na, ro rhiẹ osa ra kwa rhotọre rẹn uku ọwan.” (Eph. 1:13, 14; ekete ra djokarhọ) Jehova ọ nyoma ẹhẹn ọfuanfon ọnẹyen djeyi phia rẹn ihworho enana taghene ọ djẹrẹ aye ha ne. Nyoma izede ọnana, ẹhẹn ọfuanfon na “oka [yanghene  ive]” ra yẹrẹ aye taghene aye ine rhirhiẹ odjuwu bẹmẹdẹ.​—Se 2 Corinthians 1:21, 22.

6. Me yẹ Olele Kristi ra djẹha ono vi ru nọ ki sabu riẹ odjuwu?

⁶ Orhianẹ a djẹ Olele Kristi owu ha, o mevirhọ taghene ono vi riẹ odjuwu? Ẹjo. Ono vi mwuien ẹro taghene a djẹriẹ ha no riẹ odjuwu. Ọrẹn, ọnọ vi karorhọ urhebro ọnana: “Imizu, are i ru ekete omẹgbanhon are o teri, neneyo use re se rẹ are ọrhẹ odjẹ ra djẹre are orhiẹ ọrẹ imwẹro, fọkime are e rhe ruẹ ekwakwa enana, are ine fikparobọ.” (2 Pet. 1:10) Omarana, arha tobọ djẹ yanghene se Olele Kristi no riẹ odjuwu, ọnọ mẹrẹn osa onana orhianẹ ọ sabu sẹrorẹ atamwu ọnẹyen toba.​—Phil. 3:12-14; Heb. 3:1; Rev. 2:10.

7. Marhẹ era djẹha na e ru rhe taghene a djẹrẹ aye ha ne?

⁷ Marhẹ ohworho o ru rhe taghene a djẹriẹ ha no riẹ odjuwu? Ẹkpaherhọ na ọ ha uvuẹn ẹmro i Paul ọ ya vwe imizu ri ha Rome re “seri ni rhiẹ ihworho efuanfon na.” Nọ ta rẹn aye: “Fọkime a yẹ are ẹhẹn ọvrẹn rọ rharhumu suẹ ofẹ-ẹn, ọrẹn a yẹrẹ are ẹhẹn ọrẹ a dẹ are ha jẹrẹ emọ Osolobrugwẹ, nyoma ẹhẹn ọnana yẹ ame e kperẹ phia: ‘Abba, Ọsẹ!’ Ẹhẹn na ọvo yo se oseri rẹn ẹhẹn ọwan taghene ọwan emọ Osolobrugwẹ.” (Rom. 1:7; 8:15, 16) Omarana, nyoma ẹhẹn ọfuanfon na, Osolobrugwẹ no dje yi phia rẹn era djẹha na taghene a djẹrẹ aye ha ne.​—1 Thess. 2:12.

8. Marhẹ 1 John 2:20, 27 o ru djephia taghene era djẹha i vwe fiẹrorhọ taghene ohworho yọ nọ ta rẹn aye taghene a djẹrẹ aye ha-a?

⁸ Jehova o vwo ruie nẹ ihworho rọ djẹha ni riẹ odjuwu ni vwo ẹhẹn eveva kpahen use aye-e. (Se 1 John 2:20, 27.) O fori nẹ era djẹha i ji yono mie i Jehova nyoma ukoko Ilele Kristi jerẹ awọrọ. Ọrẹn, aye i vwe fiẹrorhọ taghene ohworho yọ nọ ta rẹn aye taghene a djẹrẹ aye ha-a. Jehova ọ ha omẹgbanhon ọnẹyen ro rhiẹ ẹhẹn ọfuanfon na, yẹ aye imwẹro taghene a djẹrẹ aye ha ne!

9. Arha djẹ ohworho ha, ewene ego ri ha uvuẹn Ephesians 1:18 yẹ ọravwọ o rhiẹromẹrẹn?

⁹ Ọnọ sabu bẹn rẹ idibo Osolobrugwẹ buebun inyenana ine vwẹruọ oborẹ ọ phia arha djẹ ohworho ha ne. Ọnana oserhọ, fọkime a ji djẹ aye ha dẹ-ẹ. Osolobrugwẹ ọ ma ituakpọ nẹ aye i nyerẹn uvuẹn otọrakpọ na bẹmẹdẹ, orhiẹ odjuwu-u. (Gen. 1:28; Ps. 37:29) Ọrẹn, Jehova ọ djẹ ezẹko ha nẹ aye i rhirhiẹ odjuwu. Omarana ọrhọ djẹ aye ha ne, no wene ẹruefirhọ ọrhẹ iroro aye, neneyo aye i sabu fiẹrorhọ akpenyerẹn obẹ odjuwu.​—Se Ephesians 1:18.

10. Me yo mevirhọ na “rharhumu vwiẹ ohworho”? (Ji se ekete ra djokarhọ)

¹⁰ Arha ha ẹhẹn ọfuanfon djẹ Ilele Kristi ha ne, na “rharhumu vwiẹ” aye yanghene ne “vwiẹ aye nẹ obẹ odjuwu.” * Jesu o ji djephia taghene ọnọ bẹn re ne dje rẹn ohworho ra vwa ji djẹha oborẹ o mevirhọ ra na “rharhumu vwiẹ ohworho,” yanghene ne “vwiẹ aye nyoma ẹhẹn ọfuanfon na.”​—John 3:3-8; ekete ra djokarhọ.

11. Dje kpahen ewene rọ homaphia arha djẹ ohworho ha ne?

¹¹ Marhẹ iroro Ilele Kristi o ru wẹnẹ  arha djẹ aye ha ne? Bọmọke i Jehova ọ ki djẹ Ilele Kristi enana ha, aye i vwo omamerhomẹ kpahen ẹruefirhọ aye ine rhirhiẹ otọrakpọ na bẹmẹdẹ. Aye a hẹrhẹ rhẹ oruru ọgbogbanhon kpahen ọke i Jehova ono tiẹ irueruo ọkon ephian nie, jeghwai ruẹ akpọ na rhiẹ paradais. Ọkezẹko, aye i roro kpahen ọke aye ine rhiabọ dede ohworho ekrun, yanghene ugbehian aye ro hwuru. Ọrẹn ọke ra djẹ aye ha ne, aye ni wene iroro aye. Mesoriẹ? Aye i vwe nie taghene ẹruefirhọ rẹ aye ine nyerẹn uvuẹn akpọ na o je aye te-e. Aye e wene iroro aye fọkiẹ ẹhẹn ro seriotọre yanghene emiamo-o. Aye e nie taghene oma ọrhọ merhen aye ọke aye ine rhirhiẹ otọrakpọ na-a. Ukpomaran, Jehova yọ ha ẹhẹn ọfuanfon ọnẹyen wene iroro aye ọrhẹ ifiẹrorhọ aye i vwo ẹguọlọ kpahen.

12. Lele oborẹ ọ ha uvuẹn 1 Peter 1:3, 4, ukẹro ọgo yẹ era djẹha na a ha ni ifiẹrorhọ aye?

¹² Ohworho ra djẹha ọnọ sabu rhe roro taghene ọye o mwuovwan uphẹn ọghoghanren ọnana-a. Ọrẹn, o vwo vwo ẹhẹn eveva taghene Jehova ọ djẹriẹ ha-a. Oma ọ merhiẹn omamọ, no ji dje ọdaremẹro ọnẹyen phia ọke ro roro kpahen ifiẹrorhọ ro vwori.​—Se 1 Peter 1:3, 4.

13. Ukẹro ọgo yẹ era djẹha na a ha ni akpenyerẹn aye uvuẹn otọrakpọ na?

¹³ Ọnana no mevirhọ taghene era djẹha na i guọlọ hwu? Ọnyikọ Paul ọ kpahenrhọ onọ ọrana. Ọ ha ugboma aye vwanvwọn oghwọgbọ, nọ tare: “Itiọrurhomẹmro, ọwan ri ha uvuẹn oghwọgbọ ọnana a guan, ẹhẹn ọwan o seriotọre, fọkime ọwan a guọlọ fiẹ ọnana rhotọre-e, ọrẹn a guọlọ ku ọreva na rhọ, neneyo arhọ ọ sabu mwu ugboma na rọ.” (2 Cor. 5:4) Akpọ ọnana ọ ji bẹn Ilele Kristi enana te erhirhiẹ aye a guọlọ hwu phẹphẹrẹ-ẹ. Ukpomaran, aye a riakpọ jeghwai kwomakugbe ekrun ọrhẹ igbehian aye ga i Jehova kẹdẹkẹdẹ. Ọrẹn, o toro oborẹ aye e ruẹ-ẹ, aye a karorhọ ifiẹrorhọ ọghoghanren aye kpahen obaro na ọke ephian.​—1 Cor. 15:53; 2 Pet. 1:4; 1 John 3:2, 3; Rev. 20:6.

14. Me yo vwo djephia taghene a djẹ ohworho ha ne?

¹⁴ Ọkezẹko, we roro sẹ a djẹruọ ha ne. Orhiomaran, roro kpahen enọ enana: Wu vwo oruru ọgbogbanhon wu ne ruẹ ọhọre i Jehova? We roro taghene wu vwo oruru ọgbogbanhon kpahen owian aghwoghwo na? Wu vwo omamerhomẹ wu ne yono rhọ kpahen “ekwakwa ikokodo Osolobrugwẹ” ri ha uvuẹn i Baibol na? (1 Cor. 2:10) Wu mẹrẹn oka ro djerie phia taghene Jehova ọ yẹruọ erere eduado uvuẹn owian aghwoghwo na ne? Wu vwo omwemẹ wu na ha userhumu rẹn awọrọ ru riarorhọ uvuẹn ogame i Jehova? Wu mẹrẹn oborẹ o djephia taghene Jehova ọ ha userhumu wẹn omamọ uvuẹn akpenyerẹn ọnọ ne? Ẹkpahenrhọ ọnọ orho rhiẹ ee, ọnana no mevirhọ taghene a djẹruọ ha ne wu riẹ odjuwu? Ẹjo. Mesoriẹ? Fọkime idibo Osolobrugwẹ ephian e rhiẹromẹrẹn ebrurhọ enana, sẹ a djẹrẹ aye ha yanghene a djẹ aye ha-a. Nyoma ẹhẹn ọfuanfon na, Jehova ọnọ sabu ha omẹgbanhon ọnana rẹn idibo yi, o toro ifiẹrorhọ aye-e. Orhianẹ we roro sẹ a ha ẹhẹn ọfuanfon djọ ha ne, nọyẹ a ji djọ ha-a. Ihworho ri Jehova ọ djẹha i vwe vwo iroro eveva-a! O mwurun aye ẹro dẹn!

15. Marhẹ e ru rhe taghene orhiẹ ọsoso ihworho ri vwo ẹhẹn ọfuanfon i Jehova yi ne riẹ odjuwu-u?

 ¹⁵ Uvuẹn i Baibol na, o vwo idje ihworho buebun re tiobọnu ẹhẹn ọfuanfon na riẹn; ọrẹn aye e riẹ odjuwu-u. Ẹhẹn ọfuanfon na o suẹn i David. (1 Sam. 16:13) Ẹhẹn ọfuanfon na yọ ha userhumu riẹn vwẹruọ ekwakwa ikokodo kpahen Jehova, ji lẹrhiẹ ya ekete ezẹko uvuẹn i Baibol na. (Mark 12:36) Udabọ ọrana, ọnyikọ Peter ọ tare taghene David “o riẹ odjuwu-u.” (Acts 2:34) John ro Brawanrhame ọ ‘vuọnren rhẹ ẹhẹn ọfuanfon.’ (Luke 1:13-16) Jesu ọ tare taghene o vwo ohworho rọ dọ ghwẹ John ọnana-a, ọrẹn nọ tare taghene John ọ ha usuẹn eri ne riẹ odjuwu-u. (Matt. 11:10, 11) Jehova ọ ha ẹhẹn ọfuanfon ọnẹyen yẹ ehworhare enana omẹgbanhon aye ina ha ruẹ ekwakwa oghẹnrensan, ọrẹn ọ djẹ aye ha nẹ aye i riẹ odjuwu-u. Ọnana no mevirhọ taghene aye e vwo esegburhomẹmro te ihworho ra djẹha ni riẹ odjuwu-u? Ẹjo. Ọrana o mevirhọ taghene Jehova ọnọ rhọmọ aye rhiẹ Paradais uvuẹn otọrakpọ na.​—John 5:28, 29; Acts 24:15.

16. Ebrurhọ ọgo yẹ idibo Osolobrugwẹ buebun a tẹnroviẹ inyenana?

¹⁶ Ihworho buebun usuẹn idibo Osolobrugwẹ ri ha otọrakpọ na inyenana, e vwo ẹruefirhọ rẹ aye ine riẹ odjuwu-u. Jerẹ Abraham, Sarah, David, John ro Brawanrhame ọrhẹ ehworhare kugbe emẹse buebun ọke ahwanren, ọwan a tẹnrovi ọke re ne nyerẹn uvuẹn akpọ na uvuẹn otọre usun Uvie Osolobrugwẹ.​—Heb. 11:10.

17. Enọ ego ya na kpahenrhọ uvuẹn urhomu-ẹmro rọ ha kpahen ọnana?

¹⁷ Inyenana, era djẹha i ji ha usuẹn ọwan, omarana ọwan ina sabu vwo enọ ezẹko. (Rev. 12:17) Jerẹ udje, ukẹro ọgo yo fori nẹ era djẹha i ha ni oma aye? Orhianẹ ohworho owu uvuẹn ukoko wu havwọ nọ riẹ ibrẹdi na ji da enyo na, ukẹro ọgo wu na ha ni ọravwọ? Orhianẹ uchunu ihworho ra djẹha ne buẹnrhọ vwo? O fori ne wu brudu kpahiẹn? Ana kpahenrhọ enọ enana uvuẹn urhomu-ẹmro rọ ha kpahen ọnana.