1-2. Ki suseso espektakular a tuma lugá riba Pentekòste di aña 33?

TABATA Pentekòste di aña 33, un djadumingu mainta. Mas o ménos 120 disipel a reuní den e kamber ariba di un kas na Herúsalèm. (Echo. 1:13-15; 2:1) Un par di dia promé, Hesus a bisa nan pa no bai for di Herúsalèm pasobra nan lo a risibí un regalo spesial. (Echo. 1:4, 5) Kiko a pasa despues?

² Beibel ta bisa: “Diripiente tabatin un zonido for di shelu manera di un bientu fuerte.” E zonido a resoná den henter e kas. Djei, “loke tabata parse lenga di kandela” a bai para riba kabes di kada un di e disipelnan, i nan tur “a yena ku spiritu santu.” (Echo. 2:2-4) Di e manera espektakular ei, Yehova a drama su spiritu santu riba e grupo ei. (Echo. 1:8) Nan tabata e proménan ku a ser ungí ku spiritu santu * i ku a risibí e speransa di goberná ku Hesus den shelu.

3. Dikon e disipelnan ku a reuní riba e dia di Pentekòste no tabatin niun duda ku nan a ser ungí ku spiritu santu?

³ Si bo tabata un di e disipelnan ku a reuní den e kas ei, hamas lo bo lubidá e dia ei. I lo bo no tabatin niun duda ku bo a ser ungí ku spiritu santu. Algu ku a parse manera  un lenga di kandela a bini para riba bo kabes, i bo a kuminsá papia diferente idioma! (Echo. 2:5-12) Pero, ta tur hende ku ser ungí ku spiritu santu ta risibí esei na mes momento i di un manera espektakular? Nò. Kon nos por sa esei?

4. Ta tur kristian den promé siglo a ser ungí na mes momento? Splika.

⁴ Laga nos papia tokante e momento ku un hende risibí spiritu santu. E grupo di mas o ménos 120 disipel no tabata e únikonan ungí ku spiritu santu riba Pentekòste di aña 33. Mas despues, riba e mesun dia ei, mas o ménos 3.000 hende tambe a risibí e spiritu santu ku Hesus a primintí. Nan a ser ungí na momento ku nan a batisá. (Echo. 2:37, 38, 41) Pero den e añanan ku a sigui, no ta tur kristian a ser ungí na momento ku nan a batisá. Por ehèmpel, e samaritanonan a ser ungí ku spiritu santu algun tempu despues ku nan a batisá. (Echo. 8:14-17) I den e kaso eksepshonal di Kornelio i su hendenan di kas, nan a ser ungí asta promé ku nan a batisá.—Echo. 10:44-48.

5. Segun 2 Korintionan 1:21 i 22, kiko ta pasa ora un hende ser ungí ku spiritu santu?

⁵ Laga nos papia awor di kiko ta pasa ora un hende ser ungí ku spiritu santu. Na prinsipio, algun ta haña difísil pa aseptá ku Yehova a skohe nan. Nan ta puntra nan mes: ‘Dikon Dios a skohe ami?’ Pero, no ta tur ta pensa asina. Sea kual sea e kaso, apòstel Pablo a splika kiko ta pasa ku tur ungí: “Despues ku boso a kere, Dios a seya * boso tambe pa medio di dje ku e spiritu santu ku el a primintí—ku ta un garantia di antemano di nos herensia.” (Efe. 1:13, 14) Pues, Yehova ta usa su spiritu santu pa indiká na e kristiannan ei bon kla ku el a skohe nan. Di e manera ei, spiritu santu ta “un garantia,” òf promesa, ku ta sigurá nan ku den futuro nan lo biba pa semper den shelu i no riba tera.—Lesa 2 Korintionan 1:21, 22.

6. Kiko un kristian ungí mester hasi pa risibí su rekompensa den shelu?

 ⁶ Si un kristian ser ungí, akaso esei ke men ku outomátikamente e ta risibí su rekompensa den shelu? Nò. E tin e siguransa ku el a ser skohí pa bai shelu, pero e tin ku kòrda e spièrtamentu akí: “Rumannan, hasi tur boso esfuerso pa boso por ta sigur di boso yamamentu i skohementu; pasobra si boso sigui agregá e kualidatnan akí na otro, boso lo no frakasá nunka.” (2 Ped. 1:10) P’esei, aunke un kristian a ser skohí, òf yamá, pa biba den shelu, lo e haña su rekompensa solamente si e keda fiel.—Flp. 3:12-14; Heb. 3:1; Rev. 2:10.

7. Kon e ungínan sa ku nan a haña invitashon pa biba den shelu?

⁷ Pero kon un hende sa si el a haña invitashon pa biba den shelu? E kontesta ta bisto den e palabranan di Pablo pa e kristiannan ungí na Roma, kendenan a ser “yamá pa ta santu.” El a bisa nan: “Boso no a risibí un spiritu di sklabitut ku ta bolbe kousa miedu, ma boso a risibí un spiritu di yu adoptá, i pa medio di e spiritu ei nos ta grita: ‘Aba, Tata!’ E spiritu ei tambe ta duna testimonio huntu ku nos spiritu ku nos ta yu di Dios.” (Rom. 1:7; 8:15, 16) Pues, Dios ta usa su spiritu santu pa indiká bon kla na e ungínan ku nan a haña invitashon pa biba den shelu.—1 Tes. 2:12.

8. Kon 1 Huan 2:20 i 27 ta mustra ku un kristian ungí no mester di konfirmashon di otro hende pa e tin sigur ku e ta ungí?

⁸ Yehova no ta laga niun duda den mente i kurason di e hendenan ku a haña invitashon pa biba den shelu. (Lesa 1 Huan 2:20, 27.) Klaru ku tur kristian ungí, meskos ku tur persona, mester haña instrukshon di Yehova mediante e kongregashon. Pero, nan no mester di konfirmashon di niun hende pa nan tin sigur ku nan ta ungí. Yehova ya a usa e forsa di mas poderoso di universo, su spiritu santu, pa duna nan e siguransa ei!

9. Segun Efesionan 1:18, ki kambio ta tuma lugá ora un hende ser ungí?

⁹ Pa mayoria di Dios su sirbidónan awe ta difísil pa komprondé kiko ta pasa ora un hende ser ungí. Esei ta di komprondé, ya ku nan mes no a ser ungí. Dios a krea hende pa biba pa semper riba tera, no den shelu. (Gén. 1:28; Sal. 37:29) Pero, Yehova a disidí di skohe algun hende pa biba den shelu. Pues, ora e ungi un hende, e ta kambia e speransa i manera di pensa di e hende ei drástikamente. Lo e kuminsá anhelá pa biba den shelu.—Lesa Efesionan 1:18.

10. Kiko ke men “nase di nobo”? (Wak tambe e nota.)

¹⁰ Ora un kristian ser ungí ku spiritu santu, e ta “nase di nobo,” òf “nase di ariba.” * Hesus tambe a indiká ku ta imposibel pa splika eksaktamente na un persona ku no a ser ungí kon un hende ta sintié ora e “nase di nobo,” òf “nase di spiritu.”—Huan 3:3-8; nota.

11. Splika ki kambio ta sosodé den mente di un kristian ku a ser ungí.

¹¹ Kiko ta sosodé den mente di un kristian ora e ser ungí? Promé ku Yehova a ungié, e tabatin e speransa di biba pa semper riba tera. E tabata anhelá pa mira e dia ku Yehova lo kaba ku tur maldat  i hasi e tera un paradeis. Kisas el a asta imaginá su mes ta duna un miembro di famia òf amigu ku a muri un bon biní. Pero ora el a ser ungí, el a kuminsá pensa diferente. Dikon? No ta pasobra e no gusta e speransa di biba pa semper riba tera mas, ni pasobra e ta deprimí òf ta pasando den difikultat. Ni tampoko pasobra diripiente el a haña ku biba pa semper riba tera lo ta laf. Mas bien, Yehova a usa su spiritu santu pa kambia e manera ku e kristian ei ta pensa i e speransa ku e tabata gusta asina tantu.

12. Segun 1 Pedro 1:3 i 4, kon e ungínan ta sinti nan ku e speransa ku nan tin?

¹² Un kristian ku a ser ungí kisas ta sinti ku e no meresé e maravioso privilegio ei. Pero, niun momento so e no ta duda ku Yehova a skoh’é. E ta masha kontentu i gradisidu pa su speransa di biba den shelu.—Lesa 1 Pedro 1:3, 4.

13. Kiko e ungínan ta pensa di nan bida aki riba tera?

¹³ Akaso esei ke men ku e ungínan ke muri? Apòstel Pablo ta kontestá e pregunta ei. El a kompará kurpa di e ungínan ku un tènt, bisando: “Sí, nos ku ta den e tènt akí ta keña, kargá ku ansiedat; pasobra no ta kita nos ke kita e tènt akí, sino mas bien, nos ke bisti e kas selestial, pa asina bida eterno por kaba ku loke ta mortal.” (2 Kor. 5:4) E kristiannan ungí no a pèrdè gana di biba riba tera, deseando di muri mas lihé posibel. Al kontrario, nan ta disfrutá di bida i ke usa kada dia pa sirbi Yehova huntu ku nan famia- i amigunan. Sinembargo, sin importá kiko nan hasi, semper nan ta kòrda riba e maravioso speransa ku nan tin den futuro.—1 Kor. 15:53; 2 Ped. 1:4; 1 Huan 3:2, 3; Rev. 20:6.

14. Kiko no ta proba ku un hende a ser ungí ku spiritu santu?

¹⁴ Kisas bo ta puntra bo mes si bo a ser ungí ku spiritu santu. Si bo ta kere ku sí, pensa riba e preguntanan importante akí: Bo tin un deseo fuerte pa hasi e boluntat di Yehova? Bo ta haña ku bo tin hopi zelo pa e trabou di prediká? Bo ta gusta studia Beibel i siña “e kosnan profundo di Dios”? (1 Kor. 2:10) Bo tin e impreshon ku Yehova a laga bo tin ekselente resultado den sirbishi? Bo ta sinti un gran responsabilidat di yuda otro hende siña tokante Yehova? Bo ta mira prueba ku Yehova a yuda bo di manera spesífiko? Si bo kontesta pa tur e preguntanan ei ta sí, akaso esei ta proba ku bo speransa ta pa biba den shelu? Nò. Dikon nò? Pasobra tur sirbidó di Yehova por eksperensiá e kosnan ei, sea nan ta ungí òf nò. I mediante spiritu santu, Yehova por duna e mesun forsa na kualke un di su sirbidónan pa hasi e kosnan ei, sin importá ki speransa nan tin. Bon mirá, si bo ta puntra bo mes si bo ta ungí òf nò, esei riba su mes so kaba ta mustra ku bo no ta. E kristiannan ku Yehova a skohe no ta duda si nan ta ungi òf nò. Nan sa esei sigur!

15. Kon nos sa ku no ta tur hende ku risibí Dios su spiritu santu a ser skohé pa biba den shelu?

¹⁵ Den Beibel tin hopi ehèmpel di hende fiel ku a risibí spiritu santu pero ku no tabatin e speransa di biba den shelu. Spiritu santu a guia David. (1 Sam. 16:13) Spiritu santu a yud’é komprondé hopi kos profundo tokante Yehova i tambe a gui’é pa skirbi algun parti di Beibel. (Mar. 12:36) Sinembargo, apòstel Pedro  a bisa ku David “no a bai shelu.” (Echo. 2:34) Huan Boutista tabata un hende “yen di spiritu santu.” (Luk. 1:13-16) Hesus a bisa ku no tabatin un hende mas grandi ku Huan, pero el a bisa tambe ku Huan lo no ta den e Reino di shelu. (Mat. 11:10, 11) Yehova a usa su spiritu santu pa duna e hendenan ei poder pa hasi kos asombroso, pero e no a skohe nan pa biba den shelu. Akaso esei tabata pasobra nan tabata ménos fiel ku e hendenan skohí pa goberná den shelu? Nò. Esei simplemente ta nifiká ku Yehova lo resusitá nan pa biba den Paradeis aki riba tera.—Huan 5:28, 29; Echo. 24:15.

16. Ki rekompensa mayoria di Dios su sirbidónan awe ta spera di risibí?

¹⁶ Mayoria di Dios su sirbidónan awe no tin e speransa di biba den shelu. Meskos ku Abraham, Sara, David, Huan Boutista i hopi otro hende di tempu bíbliko, nan ta anhelá pa biba riba tera goberná kompletamente pa e Reino di Dios.—Heb. 11:10.

17. Ki pregunta nos lo kontestá den e siguiente artíkulo?

¹⁷ Mirando ku tin algun ungí ainda entre e pueblo di Dios, ta normal ku ta lanta algun pregunta. (Rev. 12:17) Por ehèmpel, kon e ungínan mester mira nan mes? Si un hende den bo kongregashon kuminsá kome di e pan i bebe di e biña, kon bo mester trat’é? Anto kiko si e kantidat di hende ku ta bisa ku nan ta ungí sigui oumentá? Esei mester preokupá bo? E siguiente artíkulo lo kontestá e preguntanan ei.