1, 2. ¿Imataj karqa 33 watamanta Pentecostés fiestapi?

KAY 33 watapi Jesusqa yachachisqasninman kamacherqa, Diospa atiyninta japʼinankupaj Jerusalenpi qhepakunankuta (Hech. 1:4, 5). Chaymanta pisi diasninman, domingo diapi Pentecostés fiesta karqa. Chay paqarenqa, Jesuspa yachachisqasnin 120 jina uj wasej alto patanpi tantasqa kasharqanku (Hech. 1:13-15; 2:1). ¿Imataj chanta karqa?

² “Ujllata sinchʼi wayraj sonaynin jina cielomanta sonamorqa, chay sonaytaj wasi ukhuman juntʼaykorqa”. Chantá Jesuspa yachachisqasninman “nina lauray qallus jina rikhurerqa, tʼaqakuspataj sapa ujpa patanman tiyaykorqa”. “Tukuyninkutaj Diospa atiyninwan juntʼasqa karqanku” (Hech. 2:2-4). Chay jinamanta Jehová Diosqa, espíritu santonta paykunaman tʼakaykorqa (Hech. 1:8). Chayta ruwaspataj, Jehová Diosqa paykunata ñaupajta ajllarqa * Jesuswan khuska cielomanta kamachimunankupaj.

3. Jerusalenpi tantasqa kasharqanku chay cristianos, ¿imajtintaj sutʼita yacharqanku ajllasqa kasqankuta?

³ Jerusalenpi tantasqa kasharqanku chay cristianoswan kashasunman karqa chayqa, manachá qonqasunmanchu karqa imachus chay kutipi kasqanta. Imajtinchus nina lauray qallus jina sapa ujpa umankuman tiyaykorqa, tukuyninkutaj waj parlaypi parlayta qallarerqanku (Hech. 2:5-12). Ajinamanta sutʼita yacharqanku Jehová Dios paykunata atiyninwan ajllasqanta. Jinapis, ¿tukuy ajllasqa cristianostachu Jehová Dios kikinta  ajllarqa? Mana. Imajtinchus chayta nisqanchejta qhepan parrafopi yachakusun.

4. Ñaupa tiempopi tukuy ajllasqa cristianoschu, ¿Diospa atiyninta kikinta japʼerqanku?

⁴ Maykʼajchus uj cristiano cieloman rinanpaj ajllasqa kasqanmanta parlarina. Pentecostés 33 watapeqa, mana Jesuspa 120 yachachisqasnillanchu Diospa atiyninwan ajllasqa karqanku. Jehová Diosqa chay kikin diallapitaj, 3 mil runasta jina atiyninwan ajllallarqataj. Paykunaqa bautizakusqankutawan Diospa atiyninta japʼerqanku (Hech. 2:37, 38, 41). Chaywanpis mana tukuy ajllasqa cristianoschu, bautizakusqankutawan Diospa atiyninta japʼerqanku. Samariamanta cristianosqa, bautizakusqankumanta qhepamanraj Diospa atiyninta japʼerqanku (Hech. 8:14-17). Corneliowan, wasinpi kajkunawantaj, niraj bautizakushajtinku Diospa atiyninta japʼerqanku. Chaytaj tʼukunapaj jina karqa (Hech. 10:44-48).

5. Kay 2 Corintios 1:21, 22 nisqanman jina, ¿imatataj ajllasqa cristianos japʼinku?

⁵ Jehová Dios uj runata atiyninwan ajllajtin, imachus kasqanmanta parlarina. Wakin ajllasqa cristianosqa, mana entiendeyta atillankuchu imaraykuchus Jehová Dios paykunata ajllasqanta. Ichapis ninku: “¿Imaraykutaj Dios noqata ajllawanri?”, nispa. Wakintajrí ichapis mana ajinatachu yuyanku. Chaywanpis apóstol Pabloqa, Jehová Dios uj cristianota ajllajtin imachus kasqanta sutʼincharqa. Payqa ajllasqa cristianosman nerqa: “Creesqaykichejtawantaj, Cristonejta sellasqa * karqankichej Diospa atiyninwan, mayqentachus Dios qonanta nerqa, chaywan. Chaytaj herenciata japʼinanchejpaj garantía jina”, nispa (Efe. 1:13, 14). Jehová Diosqa ajllasqa cristianosman atiyninnejta sutʼita rikuchin, paykunata ajllasqanta. Chay atiytaj paykunapaj uj “garantía jina”, chayri uj seña jina aswan qhepaman cielopi wiñay kausayta japʼinankumanta (2 Corintios 1:21, 22 leey).

6. Uj ajllasqa cristiano cielopi wiñay kausayta japʼinanpaj, ¿imatataj ruwanan tiyan?

⁶ Uj cristiano ajllasqa kajtin, ¿nisunmanchu  cielopi wiñay kausayta japʼinantapuni? Mana. Chay cristianoqa cieloman rinanpaj wajyasqa kasqanta sutʼita yachan. Chaywanpis mana qonqananchu tiyan imatachus apóstol Pedro nisqanta. Pay nerqa: “Hermanos, astawanraj kallpachakuychej wajyasqas, ajllasqastaj kasqaykichejmanta sumajta japʼikunaykichejpaj. Chay imastachus ruwallankichejpuni chayqa, ni jaykʼaj urmankichejchu”, nispa (2 Ped. 1:10). Uj cristiano cieloman rinanpaj ajllasqa kajtinpis, wañupunankama cheqa sonqo kajtillan cielopi wiñay kausayta japʼenqa (Fili. 3:12-14; Heb. 3:1; Apo. 2:10).

7. ¿Imaynatá uj cristiano yachan cieloman rinanpaj ajllasqa kasqanta?

⁷ ¿Imaynatá uj cristiano yachan cieloman rinanpaj ajllasqa kasqanta? Imatachus apóstol Pablo Romapi cristianosman nisqanta qhawarina. Payqa chay cristianosman nerqa: ‘Diospaj tʼaqasqa kanaykichejpaj wajyasqas kankichej’, nispa. Chaymantataj nerqa: “Qankunaqa mana esclavo kanaykichejpajchu Diospa atiyninta japʼerqankichej, nitaj ujtawan manchachikunaykichejpajchu. Astawanqa chay atiynejta Diosqa wawasninpaj rejsikapusorqachej. Chayraykutaj tukuy sonqo ninchej: “¡Abba, Tatáy!”, nispa. Diospa atiynillantaj sutʼinchawanchej, Diospa wawasnin kasqanchejta”, nispa (Rom. 1:7; 8:15, 16). Jehová Diosqa ajllasqa cristianosman atiyninnejta sutʼita rikuchin, cieloman rinankupaj wajyasqa kasqankuta (1 Tes. 2:12).

8. Kay 1 Juan 2:20, 27 nisqanman jina, ¿ajllasqa cristianos necesitankuchu pillapis “ajllasqa kanki” nispa ninanta?

⁸ ¿Ajllasqa cristianos cieloman rinankupaj wajyasqa kasqankumanta iskayrayankuchu? Mana. Imaraykuchus Jehová Dios chay yuyayta paykunaj sonqonkuman churan (1 Juan 2:20, 27 leey). Ajllasqa cristianosqa, waj cristianos jinallataj Jehová Dios congregacionnejta paykunata yachachinanta necesitanku. Jinapis mana necesitankuchu, pillapis paykunaman “ajllasqa kanki” nispa ninanta. Jehová Diosqa paykunaman atiyninwan, nisunman espíritu santonwan sutʼita rikuchin paykunata ajllasqanta.

9. Efesios 1:18 nisqanman jina, ¿imatataj yachanku Diospa atiyninwan ajllasqa kajkuna?

⁹ Kay jallpʼapi kausakuyta suyakoj cristianosqa, mana entiendeyta atillanchejchu imaynachus uj ajllasqa cristiano sientekusqanta. Chaytaqa ajllasqa cristianoslla sutʼita entiendeyta atinku. Jehová Diosqa runasta ruwarqa kay jallpʼapi wiñaypaj kausakunankupaj, manataj cielopi kausakunankupajchu (Gén. 1:28; Sal. 37:29). Jinapis Jehová Diosqa, wakin cristianosta cielopi kausanankupaj atiyninwan ajllan. Ajinamanta payqa ajllasqa cristianospa yuyayninkuta, imatachus aswan qhepapaj suyakusqankutawan cambian. Chaymantapachataj, ajllasqa cristianosqa cielopi kausakuyta munanku (Efesios 1:18 leey).

10. ¿Ima niytataj munan ‘watejmanta nacekuy’? (Sutʼinchayninpi kaj publicacionesmanta kutichiy).

¹⁰ Diospa atiyninwan ajllasqa kajkunaqa, ‘watejmanta nacekunku’ * chayri ‘Diospa atiyninmanta nacekunku’. Mana ajllasqa kajkunaqa, mana entiendeyta atillanchejchu imaynachus ‘Diospa atiyninmanta nacekuy’ kasqanta. Jesuspuni ajina kananta nerqa (Juan 3:3-8).

11. ¿Imataj uj ajllasqa cristianoj yuyayninpi cambian?

¹¹ Cieloman rinankupaj ajllasqa cristianospa  yuyayninkupi, imachus cambiasqanmanta parlarina. Paykunaqa niraj ajllasqa kashaspa, kay jallpʼapi wiñaypaj kausakuyta mayta suyakusharqanku. Suyakushallarqankutaj Jehová Dios sajra kajta chinkachinanta, kay jallpʼatataj uj paraisoman tukuchinanta. Chantapis ichá wañupoj familiankuwan chayri uj amigonkuwan watejmanta tinkukapuyta munasharqanku. Jinapis ajllasqa kasqankutawan, niña ajinatachu yuyarqanku. Paykunaqa mana llakisqa kasqankuraykuchu, nitaj sufrisqankuraykuchu, uj jinata yuyayta qallarerqanku. Nillataj kay jallpʼapi wiñaypaj kausay mana allinchu kananta piensasqankuraykuchu, ajinata yuyarqanku. Astawanpis Jehová Dios paykunaj yuyayninkuta cambian, cielopi kausayta munanankupaj.

12. Kay 1 Pedro 1:3, 4 nisqanman jina, ¿imaynataj uj ajllasqa cristiano sientekun cielopi kausakunanpi piensaspa?

¹² Uj ajllasqa cristianoqa ichapis ajinata ninman: “Pitaj noqa kasqani cielopi Jesuswan khuska gobernamunaypajri”, nispa. Jinapis ni tumpitallatapis iskayrayanchu Jehová Dios payta ajllasqanmanta. Astawanpis mayta kusikun, agradecekuntaj cielopi kausakuyta suyakushasqanpi piensarispa (1 Pedro 1:3, 4 leey).

13. Ajllasqa cristianos cielopi kausakuyta suyakusqankurayku, ¿wañupullaytañachu munanku?

¹³ Ajllasqa cristianos cielopi kausakuyta mayta suyakusqankurayku, ¿wañupullaytañachu munanku? Apóstol Pablo chay tapuyman kutichiwanchej. Payqa ajllasqa cristianospa aycha cuerponkuta uj wasiwan kikincharqa, nerqataj: “Kay wasipi kashaspaqa, sinchʼi llakiykunasniyoj kanchej, phutiytataj waqanchej. Chaytataj ruwanchej, mana kay wasita saqeyta munaspachu, manachayqa cielopi kaj wasita japʼiyta munaspa. Ajinamanta wiñay kausay, wañoj cuerpota chinkachinanpaj”, nispa (2 Cor. 5:4). Ajllasqa cristianosqa mana wañurishankuchu wañunankumanta. Astawanpis paykunaqa kay jallpʼapi kausakuspa mayta kusikunku. Chantapis familiankuwan amigosninkuwan khuska, Diosta tukuy atisqankuta sirviyta munanku. Jinapis cielopi premionkumanta mana qonqakunkuchu (1 Cor. 15:53; 2 Ped. 1:4; 1 Juan 3:2, 3; Apo. 20:6).

14. 1) ¿Ima tapuykunataj rikuchiwanchej Jehová Dios tukuy kamachisninman atiyta qosqanta? 2) Chay tapuykunaman “arí” nispa kutichiy, ¿ninayanchu cieloman rinapaj ajllasqa kasqanchejta?

¹⁴ Ichapis yachayta munanki, Jehová Dios cieloman rinaykipaj ajllasusqantachus manachus. Jina kajtin, kay tapuykunapi piensariy: ¿Tukuy kallpaykiwanchu Diospa munayninta ruwayta munanki? ¿Sonqo kʼajaywanchu predicanki? ¿Gustasunkichu Bibliata estudiay, “Diospa pakasqa yachaynintapis” yachakuy? (1 Cor. 2:10). ¿Reparankichu Jehová Dios tʼukunapaj jina predicacionpi yanapasusqanta? ¿Maytachu hermanosta yanapayta munanki, Jehová Diosta sirvinallankupajpuni? ¿Reparankichu Jehová Dios kausayniykipi mayta yanapasusqanta? Chay tapuykunaman “arí” nispa kutichisqaykeqa, mana ninayanchu cieloman rinaykipaj ajllasqa kasqaykita. Imajtinchus ajllasqa kaspapis chayri manapis, tukuy ajina sientekusunman. Chantapis Jehová Diosqa, espíritu santonnejta tukuy kamachisninman atiyta qon, cieloman rinankupaj ajllasqa kajtinkupis chayri manapis. Chantapis cieloman rinaykipaj ajllasqa kasqaykipichus manachus piensarishanki chayqa, mana ajllasqachu kanki. Imaraykuchus ajllasqa cristianosqa, mana iskayrayankuchu Jehová Dios paykunata ajllasqanmanta. Paykunaqa sutʼita yachanku ajllasqa kasqankuta.

15. ¿Diospa atiyninta tukuy japʼejkunachu cieloman rinankupaj ajllasqa kanku?

 ¹⁵ Bibliaqa Jehová Diospa atiyninta japʼej kamachisninmanta parlan. Chaywanpis paykunamanta ashkhas, mana cieloman rinankupaj ajllasqachu karqanku. Chaykunamanta ujqa David karqa. Payqa Jehová Diospa atiyninta japʼerqa (1 Sam. 16:13). Chayraykutaj Diospa taripay mana atina yachayninta entienderqa, Bibliaj wakin capitulosnintapis qhelqarqa (Mar. 12:36). Jinapis apóstol Pedro nerqa: “Davidqa mana cielomanchu riporqa”, nispa (Hech. 2:34). Juan Bautistapis “Diospa atiyninwan juntʼa” karqa (Luc. 1:13-16). Jesusqa paymanta may sumajta parlarqa, jinapis nerqa cielopi kaj Gobiernoman mana risqanta (Mat. 11:10, 11). Jehová Diosqa atiyninta chay kamachisninman tʼukuna imasta ruwanankupaj qorqa, jinapis mana atiyninta paykunaman qorqachu cieloman rinankupaj. Chayqa mana ninayanchu paykuna mana cheqa sonqoschu kasqankuta, nillataj cieloman mana rinankupaj jinachu kasqankuta. Jehová Diosqa paykunata kay jallpʼapi kausarichimonqa uj paraisopi kausakunankupaj (Juan 5:28, 29; Hech. 24:15).

16. Jehová Diospa may chhika kamachisnin, ¿imatataj suyakushanku?

¹⁶ Kay tiempomanta Diospa may chhika kamachisnin, mana cielopi kausakuytachu suyakushanku. Paykunaqa Diospa Gobiernon kamachimushajtin, kay jallpʼapi kausakuyta suyakushanku. Ñaupa tiempomanta Abrahán, Sara, David, Juan Bautista, waj cheqa sonqo runaspis, chayllatataj suyakorqanku (Heb. 11:10).

17. ¿Ima tapuykunamantaj qhepan yachaqanapi kutichisun?

¹⁷ Kay tiempopeqa, ashkha ajllasqa cristianosraj kay jallpʼapi noqanchejwan khuska kashanku (Apo. 12:17). Chayrayku ichapis kay imasta yachayta munanchej: ¿Imaynataj ajllasqa cristianos kananku tiyan? Congregacionninchejpi uj hermano Señorpa Cenanpi tʼantata mikhuyta, vinota ujyayta ima qallarejtin, ¿imaynatá chay hermanota qhawananchej tiyan? ¿Llakikunanchejchu tiyan chayta ruwaj hermanos yapakushasqankumanta? Qhepan yachaqanapi chay tapuykunaman kutichisun.