1, 2. ¿Imataq 33 wata Pentecostes fiestachö pasakurqan?

DOMINGU qoya 33 wata Pentecostes fiesta junaqmi 120 Jesuspa qateqninkuna juk wayichö juntarëkäyarqan (Hëch. 1:13-15; 2:1). Jesusqa Jerusalenchö quedakuyänampaqqa mandakushqanam karqan, tsëchömi juk shumaq qarëta chaskiyänan karqan (Hëch. 1:4, 5). ¿Imataq tsë junaqqa pasarqan?

² “Illaqpita imëka shukukï vientunöraq ciëlupita bunruroq wiyakärirqan, y tëkäyanqan wayi juntam wiyakärirqan”. Tsënam janankunachö, ‘qallunö qallunö ninakuna rikakärirqan’ y llapankunam Diospa santu espïritunta chaskiriyarqan (Hëch. 2:2-4). Tsënömi tsëchö juntarëkaq cristiänukunaqa Jehoväpa santu espïritunta chaskiyarqan (Hëch. 1:8). Pëkunam puntataqa Jehoväpa santu espïritunta * chaskiyarqan Jesuswan ciëlupita mandakayämunampaq.

3. ¿Imanötaq tsë cristiänukunaqa següru këkäyarqan ciëluta mandakoq ëwayänampaq?

³ Tsë witsan kawashqa karqa, kushikunkimanchi karqan tsëchö rikanqëkipita. Tsë junaq qallunö qallunö nina janëkiman rataramuptin jukläya jukläya parlarninqa,  tsëqa següruchi kankiman karqan Jehovä akrashunqëkita (Hëch. 2:5-12). ¿Tsënöllaku Jehoväqa ciëluta ëwayänampaq cristiänukunata akran? Manam. Këpita yachakurishun.

4. Ciëlupaq kaqkunaqa, ¿llapanku igual akrashqa kayarqan? Parlakaramï.

⁴ Puntataqa tsë cristiänukunata imë Dios akranqanta yachakurishun. 33 wata Pentecostes fiestachöqa manam 120 cristiänukunallatatsu Jehoväqa akrarqan. Jina tsë junaqllam 3.000 nunakuna Diospa santu espïritunwan akrashqa kayarqan. Pëkunaqa bautizakuyanqan junaqran akrashqa kayarqan (Hëch. 2:37, 38, 41). Peru watakuna pasariptinqa, manam llapan cristiänukunatsu bautizakuyanqan junaqlla akrashqa kayarqan. Tsëmi pasakurqan Samaria nunakunawan, pëkunaqa tiempuwanran ciëlupaq akrashqa kayarqan (Hëch. 8:14-17). Y Corneliuwan familianqa manaraq bautizakurmi ciëluta ëwayänampaq akrashqa kayarqan (Hëch. 10:44-48).

5. 2 Corintius 1:21, 22 Bibliachö ninqannö, ¿imanötaq següru këkäyan ciëlupaq akrashqa kayanqanta?

⁵ Diospa santu espïritunwan akrashqakunata ima pasanqanta yachakurishun. Wakimpaqqa mana creipaqnömi Jehovä akranqanqa. Y wakinqa kushikuyanmi akrashqa kayanqampita. Imanö kaptimpis apostol Pabluqa ciëluta ëwaqkunapaqqa kënömi nirqan: “Qamkunataqa pëman creiriyaptikim Cristuta inshir änikushqa santu espïrituwan sellayäshurqunki *, tsëqa chaskinapaq kaq herenciapa garantïanmi” (Efes. 1:13, 14). Awmi, tsënömi Jehoväqa cläru rikätsin kikin akranqanta. Jehoväqa santu espïritunwanmi ciëlupaq akrashqakunata musyatsin Jesuswan mandakayämunampaq kaqta (leyi 2 Corintius 1:21, 22).

6. Juk akrashqa cristiänuqa, ¿imatataq ruranan ciëluta ëwanampaq?

 ⁶ Diospa santu espïritunwan juk cristiänu akrashqa karninqa, ¿següruku këkan ciëluta ëwanampaq? Manam. Manaran segürutsu ciëluta ëwanampaq kaqqa. Y kë willakuytam yarpäyänan: “Wawqikuna y panikuna, qayashqa y akrashqa kënikikuna qamkunapaq següru kananrëkur masraq kallpachakuyë, [...] tsëkunata rurar sïguirqa, manam ni imëpis trompisar ishkiyankitsu” (2 Pëd. 1:10). Tsëmi akrashqa kaqkunaqa Jehoväta mana jaqipa sirwirninraq ciëluta ëwayanqa (Filip. 3:12-14; Heb. 3:1; Rev. 2:10).

7. ¿Imanötaq musyayan ciëlupaq akrashqa kayanqanta?

⁷ Ciëlupaq akrashqa kayanqantaqa musyayan, apostol Pablu Römachö këkaq akrashqakunapaq kënö ninqanchömi: “Qamkunaqa manam esclävu këman y yapë mantsakëman chätsikoq espïritutatsu chaskiyarqunki, sinöqa tsurinkuna kayänëkipaq legitimäkoq espïritutam, tsë espïrituwanmi sinchipa ‘¡Abba, Teyta!’ nintsik. Santu espïritum shonquntsikwan juntu musyatsikun Diospa tsurinkuna kanqantsikta” (Rom. 1:7; 8:15, 16). Tsënömi ciëlupaq akrashqa kayanqanta, Jehoväqa santu espïritunwan musyatsin (1 Tes. 2:12).

8. 1 Juan 2:20, 27 Bibliachö ninqannö, ¿imanirtaq ciëlupaq akrashqakunaqa següruna këkäyan?

⁸ Akrashqa cristiänukunataqa Jehovämi ciëluta ëwayänampaq cläru musyatsin (leyi 1 Juan 2:20, 27). Tsënö kaptimpis, akrashqa kaqkunaqa llapan cristiänukunanömi Jehovä yachatsinanta wanayan. Peru Jehovä akrashqa kaptinmi, akrashqa cristiänukunaqa següruna ciëluta ëwayänampaq kayan.

9. Efesius 1:18 Bibliachö ninqannö, ¿imanötaq Dios akranqan cristiänukunaqa pensar qallëkuyan?

⁹ Jehovä Diosqa nunakunata kamashqa Patsachö kawayänampaqmi. Tsëchi wakimpaqqa ciëluchö kawayänampaq Dios akraptinqa fäciltsu creiyänan (Gen. 1:28; Sal. 37:29). Peru ciëluchö kawayänampaq Dios akrarninqa, pensëninkunataran cambian, tsëmi ciëluchö kawëtana shuyaräyan (leyi Efesius 1:18).

10. Yapë yurikuyqa, ¿ima ninantaq? (Willakuytawan rikäri).

¹⁰ Pitapis ciëlupaq Jehovä akraptinqa, yapë yurikoq cuentam kayan. * Jesuspis nirqanmi Patsachö kawaqkunata, yapë yurikoqkunapaq parlapë fäcil mana kanqanta (Juan 3:3-8).

11. Ciëlupaq akrashqa cristiänukunaqa, ¿imanötaq pensar qallëkuyan?

¹¹ Ciëluta ëwayänampaq Dios manaraq akraptinqa Patsachö kawëtam munayarqan. Y mana alli nunakunata ushakäratsir, juk Shumaq Huertaman Jehovä tikratsinantam pëkunaqa shuyaräyarqan. Itsa rikëta munayarqan kuyashqa familiankuna y amïgunkuna kawarimoqta. Peru Jehovä santu espïritunwan pensëninkunata cambiashqa kaptinmi ciëlupaq akrashqakunaqa kë Patsachö kawëtaqa shuyaräyannatsu.

12. 1 Pëdru 1:3, 4 Bibliachö ninqannö, ¿imatataq ciëlupaq akrashqakunaqa pensayan?

 ¹² Ciëlupaq akrashqa cristiänuqa itsa tsë shumaq qarë pëpaq mana kanqanta pensan, peru Jehovä akrashqa kanqantaqa segürum këkan. Tsëmi ciëluchöna kawanampaq kaqta musyarqa kushikun (leyi 1 Pëdru 1:3, 4).

13. Ciëlupaq akrashqakunaqa, ¿imanötaq rikäyan kë Patsachö kawëninkunata?

¹³ Ciëlupaq akrashqakunaqa, ¿wanuytaku munayan? Manam. Tsëtam apostol Pabluqa ciëlupaq akrashqakunata carpa wayitawan igualatsirnin kënö nirqan: “Kë carpa wayichö këkaqkunaqa llakikurmi waqantsik, alläpa nitipakashqa karnin, [...] manam kë carpa wayita qotukïta munantsiktsu, sinöqa juknin kaqtam vistikïta munantsik, tsënöpa wanoqlla kaqta kawë tragarinampaq” (2 Cor. 5:4). Tsënö nirqa, manam ciëlupaq akrashqakuna kë Patsachö kawëta manana munayanqantatsu rikätsikun. Pëkunaqa Jehovä Diostam familiankunawan y amïgunkunawan kushishqa sirwiyan. Tsënö kaptimpis ciëluchöna kawayänampaqmi kushishqa shuyaräyan (1 Cor. 15:53; 2 Pëd. 1:4; 1 Juan 3:2, 3; Rev. 20:6).

14. ¿Imanötaq musyantsik ciëlupaq akrashqa mana kanqantsikta?

¹⁴ Ciëlupaq Jehovä akrashunqëkita itsa tapukuykanki. Tsënö pensarqa kë tapukuykunaman pensë: ¿Jehovä munanqantaku imëpis ruranki?, ¿kushishqaku yachatsikur purinki?, ¿Jehovä Diospita y Palabran Bibliapita yachakuy gustashunkiku?, ¿yachatsikur purinqëkichö Jehoväpa bendicionninta rikarqunkiku?, ¿wakinkuna Jehovä Dioswan mas amïgu kayänampaq yanapakuyta munankiku?, ¿kawënikichö Jehovä yanapashunqëkita rikarqunkiku? (1 Cor. 2:10). Kë tapukuykunata awmi nirqa, ¿ciëlupaq akrashqaku kanki? Manam. Jehovä Diosta llapan sirweqkunapis tsëtam rurayan. Jina Jehoväqa santu espïritunwanmi Patsachö o ciëluchö kawayänan kaptimpis sirweqninkunata yanapan. Peru Diospa santu espïritunwan akrashqa kanqëkita següru mana karqa, manam ciëlupaq akrashqatsu kanki. Jehovä akranqankunaqa segürum këkäyan.

15. Diospa santu espïritunta chaskeqkunaqa, ¿llapanku ciëluta ëwayanqa?

¹⁵ Bibliachöqa tarintsik Jehovä Diospa mëtsikaq sirweqninkuna kallpanta chaskiyanqantam, tsënö karpis manam ciëlupaq akrashqatsu kayarqan. Jukqa karqan Davidmi (1 Sam. 16:13). Jehoväqa santu espïritunwanmi Davidta yanaparqan palabranta qellqanampaq (Mar. 12:36). Tsënö karpis apostol Pëdruqa nirqan, ciëluman David mana ëwanqantam (Hëch. 2:34). Bautizakoq Juannam Jehoväpa santu espïritunta chaskirqan (Lüc. 1:13-16). Pëpaq parlarmi Jesusqa kënö nirqan: “Warmipita yurishqakunapitaqa manam ni pipis Bautizakoq Juanpita mas precisaqqa sharkushqatsu”. Tsënö Jesus nirpis, Juanqa ciëlupaq akrashqa mana kanqantam nirqan (Mat. 11:10, 11). Jehovämi sirweqninkunata yanaparqan imëkata rurayänampaq, peru manam ciëlupaq akrashqatsu kayarqan. ¿Tsëqa rikätsikun ciëlupaq akrashqakunawan mana igual-lla kayanqantaku? Manam. Pëkunataqa Jehovä Diosmi kawaritsimunqa  Mushoq Patsachö kawayänampaq (Juan 5:28, 29; Hëch. 24:15).

16. Kanan witsan Jehoväta sirweqkunaqa, ¿mëchötaq kawëta shuyaräyan?

¹⁶ Kanan witsan cristiänukunaqa cäsi llapanmi Patsachö kawayänampaq kayan, manam ciëluta ëwayänampaqtsu. Abrahan, Sära, David, Bautizakoq Juan y mëtsikaq unë witsan Jehoväta sirweqninkunanömi kë Patsachö kawëta shuyaräyan (Heb. 11:10).

17. ¿Ima tapukuykunapitataq qateqnin kaq yachatsikuychö yachakushun?

¹⁷ Ciëlupaq akrashqa cristiänukunaqa kë Patsachö kayanran (Rev. 12:17). Tsëqa itsa kë tapukuykunaman yarpakachantsik: ¿Ciëlupaq akrashqakunaqa mas alli cristiänu kayanqantaku pensayanman? ¿Jesus wanunqan yarpëchö juk cristiänu tantata mikuptin y vïnuta upuptin imanötaq rikashwan? ¿Yarpachakushwantsuraq ciëlupaq akrashqakuna cada wata miraptin? Qateqnin kaq yachatsikuychömi kë tapukuykunapita yachakushun.