1, 2. ¿Iman pasaran 33 wata Pentecostés fiesta p’unchaypi?

PENTECOSTÉS fiestapi 33 watapi domingo tutamantanmi Jesuralenpi 120 discipulokuna juñunasqa kasharanku altos patapi (Hech. 1:13-15; 2:1). Pisi p’unchaykuna ñaupaqtan Jesusqa discipulonkunata niran chay llaqtapi qhepakunankupaq sumaq regalota chaskinankupaq (Hech. 1:4, 5). ¿Iman chay kutipi pasaran?

² ‘Chayllamanmi cielomanta juj suenay uyarikuran sinchi wayraq suenasqan jina. Jinan qallu jina nina rauraykunata rikuranku, chay nina rauraykunataq ch’eqerispa sapankankuq uman pataman tiyaykuran, jinan llapanku santo espirituwan junt’a karanku’ (Hech. 2:2-4). Chayta ruwaspan Jehová Diosqa santo espiritunta qomuran chay cristianokunaman (Hech. 1:8). Paykunan ñaupaqtaqa santo espirituwan ajllasqa karanku * Jesuswan kuska janaq pachamanta kamachimunankupaq.

3. ¿Imaraykun altos patapi cristianokuna mana iskayarankuchu santo espirituwan ajllasqa kasqankumanta?

³ Sichus chay altos wasipi qanpas kashawaq karan chayqa manan jayk’aqpas qonqawaqchu karan chay p’unchaypi pasasqanta.  Nina qallu jina rauraykunan kasharan sapanka runaq uman patanpi, jinan qanpas juj simikunapi rimayta qallariranki (Hech. 2:5-12). Chaykunawanqa manan iskayawaqchu karan Diospa santo espiritunwan ajllasqa kasqaykimanta. Ichaqa, ¿llapa ajllasqa cristianokunatachu chay jinata Dios ajllan? Manan. ¿Imaynapin chayta yachanchis?

4. ¿Llapankuchu apostolkunaq tiemponpi cristianokuna bautizakusqanku p’unchaypi ajllasqa karanku?

⁴ Ñaupaqta qhawarisunchis jayk’aqchus juj runa santo espirituwan ajllasqa karan chayta. 33 watapi Pentecostés fiestapiqa manan 120 cristianokunallachu ajllasqa karanku, chay p’unchaypin 3.000 runakuna santo espirituta chaskiranku bautizakuqtinku (Hech. 2:37, 38, 41). Chay watakuna qhepamanmi ichaqa mana llapa janaq pachaman riqkunachu bautizakusqanku p’unchaypi ajllasqa karanku. Samaria llaqtamanta cristianokunaqa bautizakusqankumanta juj tiempo pasasqan qhepamanñan ajllasqa karanku (Hech. 8:14-17). Corneliopas familianpas manaraq bautizakushaspan ajllasqaña karanku santo espirituwan, paykunallawanmi ichaqa chay pasaran (Hech. 10:44-48).

5. 2 Corintios 1:21, 22 textopi nisqanman jina, ¿iman juj cristianota pasan santo espirituwan ajllasqa kaqtin?

⁵ Kunanqa qhawarisunchis Diospa ajllasqan cristianokunawan imachus pasasqanmanta. Wakinqa qallariypiqa ninkupaschá: “Manan ajllawananpaq jinachu kani”, nispa. Jujkunan ichaqa mana chaytachu ninku. Imaynaña kaqtinpas apóstol Pablon willaran ajllasqa cristianokunawan imachus pasasqanmanta, niranmi: “Paypi iñiqtiykichisñan Diosqa prometesqan santo espirituwan sellarasunkichis, * Cristowantaqmi chaytaqa ruwaranpas, chay espiritun garantía jina karan herenciata chaskinanchispaq”, nispa (Efes. 1:13, 14). Jehová Diosqa  espiritunwanmi paykunaman sut’ita rikuchin ajllasqa kasqankuta. Chhaynaqa santo espiritunwanmi garantizan jamuq tiempopi janaq pachapi tiyanankupaq (leey 2 Corintios 1:21, 22).

6. ¿Imatan ajllasqa cristianokuna ruwananku janaq pachaman rinankupaq?

⁶ Ajllasqa cristianokuna, ¿seguroñachu kashanku janaq pachaman rinankupaq? Manan. Paykunaqa ajllasqallaraqmi kashanku chaymi yuyarinanku kayta: “Wayqe-panaykuna, tukuy atisqaykichista ruwaychis Diospa wajasqankuna ajllasqankuna ukhullapi kashanaykichispaq, chaykunatachus ruwashallankichis chayqa, manan jayk’aqpas urmankichischu”, nispa (2 Ped. 1:10). Chaymi ajllasqa cristianokuna janaq pachaman rinankupaqqa Jehová Diospaq junt’aq kasqankuta rikuchishanallanku (Filip. 3:12-14; Heb. 3:1; Apo. 2:10).

7. ¿Imaynapin ajllasqakuna yachanku janaq pachaman rinankuta?

⁷ ¿Imaynapin juj cristiano yachan janaq pachapaq ajllasqa kasqanta? Chaypaq yuyarisun imatas apóstol Pablo niran Roma llaqtamanta cristianokunata. Niranmi: “Qankunaqa manan kamachi kanaykichispaqchu espiritutaqa chaskirankichis, nitaq wajmanta manchasqa kanaykichispaqpaschu, aswanpas Diospa wawankuna jina adoptasqa kanaykichispaqmi, chay espiritun kallpachawanchis: ‘¡Abba, papáy!’, nispa wajakunanchispaq. Diospa espiritunmi sonqonchispi sut’ita rikuchin Diospa wawankuna kasqanchista”, nispa (Rom. 1:7; 8:15, 16). Chay jinaqa Diospa espiritunmi paykunaman sut’ita rikuchin janaq pachapaq ajllasqa kasqankuta (1 Tes. 2:12).

8. 1 Juan 2:20, 27 textopi nisqanman jina, ¿imaraykun janaq pachaman riqkuna mana necesitankuchu ajllasqa kasqankumanta jujkunaq sut’inchananta?

⁸ Janaq pachaman rinankupaq ajllasqa cristianokunaqa manan sonqonkupi iskayankuchu invitasqa kasqankumanta, Diosmi paykunaman chayta sut’ita rikuchin (leey 1 Juan 2:20, 27). Ajllasqa cristianokunaqa llapa cristianokuna jinan necesitanku Diospa llaqtanpi yachachisqa kayta. Ichaqa manan necesitankuchu ajllasqa kasqankumanta pipas sut’inchanantaqa. Jehová Diosmi santo espiritunwan sut’ita paykunaman chayta rikuchin.

9. Efesios 1:18 textopi nisqanman jina, ¿iman pasan janaq pachaman riq cristianokunata?

⁹ Yaqa llapa cristianokunan mana entiendenkuchu Diospa ajllasqan cristianokuna imachus piensasqankuta imachus sientesqankutapas. ¿Imarayku? Mana ajllasqa kasqankurayku. Diosqa runakunata kamaran kay allpapi wiñaypaq tiyanankupaqmi manan janaq pachapi tiyanankupaqchu (Gén. 1:28; Sal. 37:29). Wakintan ichaqa ajllaran janaq pachapi tiyanankupaq. Chaypaqmi ichaqa imachus piensasqankuta cambian, jinan paykunaqa mayta munanku janaq pachapi tiyayta (leey Efesios 1:18).

10. ¿Iman wajmanta nacey? (Qhaway willakuyta.)

¹⁰ Janaq pachaman rinankupaq cristianokunaqa wajmantan nacenku. * Jesusqa willaranmi wajmanta naceymanta otaq espiritumanta naceymanta waj ovejakunaman entiendechiyqa manapuni atikusqanta (Juan 3:3-8; willakuyta qhaway).

11. ¿Imayna piensaytan qallarin janaq pachaman riq cristiano?

 ¹¹ ¿Imaynatan janaq pachapaq ajllasqa cristiano piensayta qallarin? Ñaupaqpiqa anchatan munaran wiñaypaq kay allpapi tiyayta, Jehová Dios kay allpata paraisoman tukuchinanta, millay kausaytapas chinkachinanta. Yaqapaschá payqa piensasharanña wakin familianwan otaq amigonkuwan kausarimpuy tiempopi tupayta. Janaq pachaman rinanpaq ajllasqa kaqtinmi ichaqa mana chhaynatañachu piensan. ¿Imarayku? ¿Manañachu munan kay pachapi tiyayta? ¿Sinchi llakisqa kaspachu otaq sinchita sufrisqanraykuchu manaña munan kay pachapi tiyayta? Manan chhaynachu. Aswanpas Jehová Diosmi santo espiritunwan imachus piensasqanta cambiapun, jinaspa mayta munan janaq pachapi tiyayta.

12. 1 Pedro 1:3, 4 textopi nisqanman jina, ¿imaynan janaq pachapaq ajllasqa cristiano sientekun?

¹² Janaq pachapaq ajllasqa cristianoqa ninpaschá: “¿Imatan ruwarani ajllasqa kanaypaq?”, nispa. Chaywanpas payqa manapunin iskayanchu Jehová Diospa ajllasqan kasqanmanta. Anchatataq kusikun chay kausayta suyakuspa jinaspa Jehová Diosta agradecekun (leey 1 Pedro 1:3, 4).

13. ¿Imaynatan ajllasqakuna qhawarinku kay pachapi kausasqankuta?

¹³ Chhaynaqa, ¿ajllasqa cristianokuna usqhaytachu wañuyta munanku? Apóstol Pablon chay tapuyta kutichin. Paymi ajllasqa cristianokunaq cuerponta compararan juj karpawan, niranmi: “Kay karpapi kaqkunaqa lliumi imaymana llakikuywan khuyayta waqashanchis, manan kay aycha cuerpo wasita ch’utikuyta munaspachu, aswanpas juj kaqwan churakuyta munaspan, chhaynapi kay wañuq cuerponchista wiñay kausay chinkachipunanpaq”, nispa (2 Cor. 5:4). Chhaynaqa ajllasqa cristianokunaqa manan ninkuchu: “Imapaqñan kay pachapi kausayman”, nispaqa. Aswanmi kusisqa kashanku kay pachapi kausasqankumanta. Sapa p’unchaytaq kallpachakunku familiankunawan amigonkunawan Diosta servinankupaq. Ichaqa imataña ruwashaspapas piensashallankun sumaq kausayta chaskinankupi (1 Cor. 15:53; 2 Ped. 1:4; 1 Juan 3:2, 3; Apo. 20:6).

14. ¿Pipas tukuy sonqowan yachachisqanraykuchu, Diospa yanapayninta vidanpi rikusqanraykuchu ninman ajllasqa cristianon kani nispa?

¹⁴ Yaqapaschá piensashanki janaq pachapaq ajllasqa cristiano kanaykipaq. Chhayna kaqtinqa kaykunatan tapukuwaq: ¿Anchatachu munani Diospa munaynin ruwayta? ¿Tukuy sonqomantachu Diosmanta willani? ¿Anchatachu kusikuni Bibliata estudiaspa Diospa pakasqa yachachikuyninta entiendenaypaq? ¿Rikuranichu Diospa yanapayninta runakunata yachachisqaypi? ¿Kallpachakunichu Jehová Diosmanta runakunaman yachachinaypaq? ¿Rikuranichu Jehová Diospa yanapayninta vidaypi? (1 Cor. 2:10). ¿Chay tapuykunaman “arí” nispa kutichisqaykiraykuchu niwaq janaq pachapaq ajllasqa cristianon kani nispa? Manan, ¿imarayku? Janaq pachapaqña kay pachapaqña suyakuyniyoq cristianokunapas qan jinan sientekunkuman. Jinaspapas Jehová Diosqa santo espiritunwanmi mayqen serviqnintapas yanapanman chaykunata ruwananpaq. Sichus iskayashanki ajllasqa kasqaykimanta chayqa, manan janaq pachapaq ajllasqa cristianochu kanki.  Janaq pachaman riq cristianokunaqa manapunin iskayankuchu ajllasqa kasqankumanta.

15. ¿Imaynapin yachanchis manan llapa santo espirituta chaskiqkunachu janaq pachaman rinankuta?

¹⁵ Bibliapiqa willashanmi askha runakuna Diospa espiritunta chaskisqankuta, ichaqa manan janaq pachapaqchu ajllasqa karanku. Jujninmi karan rey David (1 Sam. 16:13). Diospa espiritunmi payta yanaparan Diospa yachachikuyninkunata entiendenanpaq, Bibliamanta wakin partekunata qelqananpaqpas (Mar. 12:36). Chaywanpas apóstol Pedro niran: “Manan Davidchu janaq pachamanqa wicharan”, nispa (Hech. 2:34). Bautizaq Juanpas santo espirituwanmi junt’a karan (Luc. 1:13-16). Jesusmi paymanta niran: “Warmimanta naceqkunamantaqa manan pipas bautizaq Juanmanta aswan kuraqqa kanchu”, nispa. Chaywanpas willaranmi janaq pachaman mana rinanta (Mat. 11:10, 11). Jehová Diosmi chay runakunaman espiritunta qoran musphanakunata ruwanankupaq ichaqa manan paykunata ajllaranchu janaq pachaman rinankupaq. Chhaynaqa, ¿janaq pachaman riqkunamanta aswan pisi iñiyniyoqchu karanku? Manan, aswanpas Diosmi paykunata kausarichinqa kay pachapi wiñaypaq kausanankupaq (Juan 5:28, 29; Hech. 24:15).

16. ¿Maypi tiyanankupaqmi suyakushanku kay tiempopi yaqa llapa Diosta serviqkuna?

¹⁶ Kay tiempopiqa yaqa llapa Diosta serviqkunan kay pachapi kausanankupaq suyakushanku. Abrahanpas, Sarapas, Davidpas, Bautizaq Juanpas, jujkunapas suyakushankun Diospa gobiernon kay pachata kamachimuqtin chaypi tiyayta (Heb. 11:10).

17. ¿Ima tapuykunamantan qatimuq yachachikuypi yachasun?

¹⁷ Kay pachapiqa kashanraqmi wakin ajllasqa cristianokuna (Apo. 12:17). Chaymi kay tapuykunata ruwakusunman: ¿Imaynatan qhawarikunanku ajllasqa cristianokuna? ¿Imatan ruwananchis iñiq t’aqanchismanta mayqen hermanopas t’antata mijuqtin vinota ujaqtin Jesuspa wañupusqanta yuyarinapaq juñunakuypi? ¿Llakikunanchischu “janaq pachaman riq cristianon kani” nispa niqkuna sapa wata yapakusqanwan? Chay tapuykunamantan qatimuqpi yachasun.