1-2. Eaa tei tupu i te rā Penetekote i te 33 T.N.?

E POPONGI Tapati i Ierusalema. Ko te mataiti 33 T.N., e ko te rā Penetekote teia. Kua akaputuputu mai e 120 pipi i runga i te tauu are. (Anga. 1:13-15; 2:1) I tetai rā i mua ua ake, kua akaue a Iesu ia ratou kia noo i Ierusalema no te mea ka riringiia mai te vaerua tapu ki runga ia ratou. (Anga. 1:4, 5) Eaa tei tupu mai?

² “E kare akera i mamia, ko te aruru maira no runga mai i te rangi, mei te matangi viviki maata ra.” Ki rava akera te are i te maniania. I reira, kua mama maira ‘te arero manga, mei te ai ra te tu,’ ki rungao i te upoko o te au pipi, e kua “ki akera ratou ravarai i te vaerua tapu.” (Anga. 2:2-4) Kua riringi a Iehova i tona vaerua tapu ki te reira pupu. (Anga. 1:8) Ko ratou te aronga mua tei akatainuia e te vaerua tapu * e te orongaia ra te manakonakoanga no te tutara ma Iesu i te rangi.

3. Akapeea te aronga ia Penetekote kare i ekoko e kua akatainuia ratou e te vaerua tapu?

³ Me ko koe tetai o te au pipi tei akaputuputu ki runga i te tauu o te are i te reira rā, kare rava e ngaropoina ia koe. Tetai apinga mei te arero ai te tu tei to ki runga i to ratou  upoko, e kua tuatua akera ratou! (Anga. 2:5-12) E mea papu tikai e kua akatainuia ratou e te vaerua tapu. Inara kua rauka ainei ia ratou tetai manako papu na roto i tetai turanga umere e i taua taime rai i roto i to ratou oraanga? Kare. Akapeea tatou e kite ei?

4. Kua aiteite ainei te tuatau i akatainuia ai te aronga Kerititiano i te anere mataiti mua? Akamārama mai.

⁴ Akamanako ana i te tuatau me akatainuia tetai tangata. Kare ko te pupu Kerititiano ua e 120 tei akatainuia e te vaerua tapu i te Penetekote, 33 T.N. Mari ra, e 3,000 aronga ke mai tei akatainuia. Kua akatainuia ratou i to ratou papetitoia anga. (Anga. 2:37, 38, 41) I te au mataiti i aereia mai, kare te au Kerititiano katoatoa i akatainuia i to ratou tuatau papetito anga. Kua akatainuia to Samaria i muri ake i to ratou papetito anga. (Anga. 8:14-17) Pera katoa tetai akaraanga manea, kua akatainuia a Korenelio e tona ngutuare tangata na mua ake ka papetitoia ai ratou.—Anga. 10:44-48.

5. Kia tau ia 2 Korinetia 1:21, 22, eaa te ka tupu ki tetai tangata tei akatainuia e te vaerua tapu?

⁵ Akamanako tatou eaa te ka tupu me akatainuia tetai tangata e te vaerua tapu. Tetai pae tei akatainuia, penei e ngata ia ratou i te āriki e kua iki a Iehova ia ratou. Penei ka manako ratou, ‘Eaa ra te Atua i iki mai ei iaku?’ Penei kare tetai pae e manako akapera ana. Akamārama te apotetoro ko Paulo, eaa te ka tupu ki te aronga pouroa tei akatainuia: “E kotou katoa i akarongo, i akairoiaʼi * kotou e ia, i te Vaerua Tapu i tuatuaia maira, Ko te akakite ïa o ta tatou tuanga.” (Ephe. 1:13, 14) Taangaanga a Iehova i tona vaerua tapu kia akataka meitaki ki teia au Kerititiano e kua ikiia ratou. Na teia tu, ko te vaerua tapu, “ko te akakite ïa [i te akapapu anga me kore taputou]” tei orongaia kia ratou e a te tuatau ki mua, ka noo  mutu kore ratou ki te rangi e kare i te enua nei.—E tatau ia 2 Korinetia 1:21, 22.

6. Akapeea tetai Kerititiano akatainuia me āriki i tana tutaki i te rangi?

⁶ Me akatainuia tetai Kerititiano, ko te aiteanga ainei e e mea papu ka aere aia ki te rangi? Kare. E tika kua ikiia aia no te rangi. Inara, kia akamanako aia i teia akamatakiteanga: “E teianei, e aku au taeake, ka akamaroiroi, kia kitea tikaia to kotou kapiki angaia e te iki angaia; kia pera oki kotou, kare ua ïa e inga.” (2 Pete. 1:10) No reira noatu e kua ikiia te au Kerititiano akatainuia, me kore kua kapikiia ki te rangi, ka orongaia tana tutaki me vai tiratiratu aia.—Phili. 3:12-14; Ebe. 3:1; Apo. 2:10.

7. Akapeea te aronga akatainuia i kite ei e kua ikiia ratou no te rangi?

⁷ Akapeea tetai tangata e kite ei e kua ikiia aia no te rangi? Akataka mai te pauanga i roto i ta Paulo tuatua ki to Roma ko ratou tei “akonoia ei aronga tapu.” Akakite aia kia ratou: “Kare oki te vaerua tuikaa tei rauka ia kotou kia mataku akaou; ko te Vaerua akatamariki ra tei rauka ia kotou, i karangaʼi oki tatou e, E Aba, e taku Metua. Ko te Vaerua uaorai oki, e to tatou katoa nei oki vaerua, tei akakite ïa e, e tamariki tatou na te Atua.” (Roma 1:7; 8:15, 16) No reira na roto i tona vaerua tapu, akataka mai nei te Atua ki te aronga akatainuia e kua tau ratou no teia kapikianga ki te rangi.—1 Tesa. 2:12.

8. Akapeea a 1 Ioane 2:20, 27 te akaari anga ki te au Kerititiano akatainuia e kare e anoanoia tetai ke ei akapapu e kua akatainuia ratou?

⁸ Kare a Iehova i akaekoko i te manako e te ngakau o te aronga tei ikiia kia aere ki te rangi. (E tatau ia 1 Ioane 2:20, 27.) E tika, ka apiiia te aronga Kerititiano akatainuia e Iehova na roto i te putuputuanga mei tetai ke rai. Inara kare e anoanoia tetai ke ei akapapu e kua akatainuia ratou. Kua taangaanga a Iehova i tona mana ririnui i te ao katoa e pini ua ake, tona vaerua tapu, kia akataka meitaki kia ratou e kua akatainuia ratou!

9. Me akatainuia tetai, eaa te taui anga ta tetai tangata ka na roto, i akataka ei a Ephesia 1:18?

⁹ Te maata anga o to te Atua au tavini i teia tuatau, e ngata ia ratou te mārama, eaa te ka tupu ki tetai tangata me akatainu te Atua iaia. No teaa ra? No te mea kare ratou i akatainuia. Kua anga te Atua i te tangata kia ora e tuatau ua atu i te enua nei, kare i te rangi. (Gene. 1:28; Sala. 37:29) Inara kua iki a Iehova i tetai pae kia noo i runga i te rangi. No reira me akatainu aia ia ratou, ka taui aia i to ratou manakonakoanga e pera to ratou aerenga manako, kia akamanako ratou i tetai oraanga i te rangi.—E tatau ia Ephesia 1:18.

10. Eaa te aiteanga o te “anau akaou”? (Akara katoa i te tataanga i raro.)

¹⁰ Me akatainuia te au Kerititiano e te vaerua tapu, e aronga “anau akaou” ratou, me kore kua anau mei runga mai. * Akakite katoa a Iesu e e ngata i te akataka tikai ki tetai ke tei kore i akatainuia mei teaa ra te tu me “anau akaou,” me kore “ta te vaerua e anau ra.”—Ioa. 3:3-8.

11. Akamārama mai i te taui anga o te manako papu me akatainuia tetai.

¹¹ Eaa te taui anga manako ta te au Kerititiano tei akatainuia ka rave? I mua ake  ka akatainu ei a Iehova i te au Kerititiano, kua akaperepere ratou i te manakonakoanga kia ora ua atu i te enua nei. Te akara atura ratou ki te tuatau me takore a Iehova i te aronga kino e te akariro i te enua ei parataito. Penei ka manako ratou i te turou mai i to ratou ngutuare tangata me kore e oa tei mate ana. Inara i muri ake i to ratou akatainuia anga, kua akamata ratou i te manako tukeke. No teaa ra? Kare ratou i mareka i te manakonakoanga i te enua nei. Kare ratou i taui i to ratou manako no te manako taitaia e te mamae. Kare katoa ratou i manako e ka inangaro ratou i te noo e tuatau ua atu i te enua no te maromaroa. Mari ra, kua taangaanga a Iehova i tona vaerua tapu kia taui i to ratou manakonakoanga ta ratou i akaperepere.

12. Ia 1 Petero 1:3, 4, akapeea te au Kerititiano akatainuia me akamanako i to ratou manakonakoanga?

¹² No tetai tei akatainuia penei kua manako puapinga kore aia i teia tikaanga ngateitei. Inara kare aia e ekoko e kua iki a Iehova iaia. Kua mataora aia e te mareka ra i tona manakonakoanga a te tuatau ki mua.—E tatau ia 1 Petero 1:3, 4.

13. Akapeea te aronga akatainuia me akamanako i to ratou oraanga i te enua nei?

¹³ No reira te aiteanga ainei e ka mate te aronga tei akatainuia? Ka pau te apotetoro ko Paulo i teia uianga. Kua akaaite aia i te kopapa tangata ki tetai puakapa e kua karanga: “Tatou ra e noo i roto i teianei puakapa, te ngunguru nei ïa i te teiaa, kare ra no te mea te anoano nei tatou kia [“kiriti i teia, mari ra kia aao i tetai mai,” NW], kia apuku uaia te mea mate ua nei e te ora.” (2 Kori. 5:4) Kare te inangaro o teia au Kerititiano i ngere i roto i to ratou oraanga, e te inangaro ra i te mate vave. I tetai tua, te mataora ra ratou i te au rā ravarai i te tavini ia Iehova ma to ratou ngutuare tangata e te au oa. Inara, noatu ta ratou e rave ra, ka maara ia ratou tetai manakonakoanga kaka te ka tupu a te tuatau ki mua.—1 Kori. 15:53; 2 Pete. 1:4; 1 Ioa. 3:2, 3; Apo. 20:6.

14. Eaa te akapapu anga e kua akatainuia tetai e te vaerua tapu?

¹⁴ Penei te manako ra koe me ko koe tetai tei akatainuia e te vaerua tapu. Me koia ia, akamanako ana i teia au uianga: E anoano maata ainei toou i te rave i to Iehova anoano? Te manako ra ainei koe e te maoraora ra koe i roto i te angaanga tutu aere? Te mataora ra ainei koe i te apii Pipiria e te inangaro i “te au mea oonu rai o te Atua”? (1 Kori. 2:10) Te manako ra ainei koe e te oronga maira a Iehova i tetai ravenga manea i roto i te angaanga tutu aere? E inangaro ainei toou i tetai apainga i te tauturu i tetai ke i te pae vaerua? Kite ainei koe i ta Iehova tauturu na roto i tetai au ravenga ke mei toou oraanga? Me pau koe i teia au uianga e ae, te akapapu ra ainei e ko koe tetai tei kapikiia i te rangi? Kare. No teaa ra? No te mea ka manako pouroa te au tavini o te Atua me kua akatainuia ratou e me kare. E no tona vaerua tapu, ka oronga mai a Iehova i te mana ki tetai o tona au tavini, noatu to ratou manakonakoanga. E tika, me kua manako koe e ko koe tetai tei akatainuia e te vaerua tapu, te akapapuia atu nei e kare ko koe tetai. Ko te aronga ra tei kapikiia e Iehova, kare ratou e ekoko e kua akatainuia ratou e me kare! Kua kite ratou!

15. Akapeea tatou e kite ei e kare ko te aronga ua tei orongaia te vaerua tapu o te Atua te ka aere ki te rangi?

¹⁵ Na roto i te Pipiria, e maata te au  akaraanga o te aronga tiratiratu tei rauka ia ratou te vaerua tapu; inara kare o ratou manakonakoanga kia noo i te rangi. Kua aratakiia a Davida e te vaerua tapu. (1 Samu. 16:13) Kua tauturu te vaerua tapu iaia kia mārama i te au mea oonu no runga ia Iehova e kua arataki katoa iaia kia tata i te au tuanga o te Pipiria. (Mare. 12:36) Noatu rai, karanga te apotetoro ko Petero e “kare oki a Davida i tae ki runga i te rangi.” (Anga. 2:34) “Akakiia [a Ioane Bapetizo] e te vaerua tapu.” (Luka 1:13-16) Karanga a Iesu e kare e tangata e maata atu ia Ioane, no te mea karanga aia kare a Ioane i kapitiia ki roto i te Patireia o te rangi. (Mata. 11:10, 11) Kua taangaanga a Iehova i tona vaerua tapu, kia oronga i te mana ki teia au tangata kia rave i tetai angaanga umere, inara kare aia i taangaanga i te vaerua kia iki ia ratou kia noo i te rangi. Ko te aiteanga ainei e iti ua te aronga tiratiratu tei ikiia ei tutara i te rangi? Kare. Te aiteanga ka akaoki mai a Iehova ia ratou ki tetai oraanga Parataito i te enua nei.—Ioa. 5:28, 29; Anga. 24:15.

16. Eaa te tutaki ta te maata anga o te au tavini o te Atua e akara atura ki mua?

¹⁶ Te maata anga o te au tavini o te Atua i runga i te enua nei, kare o ratou manakonakoanga i te noo i te rangi. Mei ia Aberahama, Sara, Davida, Ioane Bapetizo e te vai atura te au tane e te au vaine i roto i te Pipiria, ka tapapa ratou i te noo i te enua nei me tutara mai to te Atua Patireia ki rungao ia ratou.—Ebe. 11:10.

17. Eaa te au uianga ka uriuri tatou i te atikara ka aru mai?

¹⁷ No te mea i teia tuatau, te vaira te aronga akatainuia i rotopu i te iti tangata o te Atua, e uianga ta tetai pae. (Apo. 12:17) Ei akaraanga, akapeea te aronga akatainuia me akamanako ia ratou uaorai? Me tangata tetai i roto i taau putuputuanga tei kai i te oroa i ko i te Akamaaraanga, akapeea koe me akono i tera tangata? Akapeea te aronga tei karanga e kua akatainuia ratou, te tupu ua atura to ratou numero? Ka manamanata ainei koe? Ka pau tatou i teia au uianga i te atikara ka aru mai.