1-2. Kova neobično nastan slučingja pe ko prazniko Pedesetnica 33 berš a.e.?

NEDELA sabajle, ko prazniko Pedesetnica 33 berš a.e., ki jekh upruni soba ko Erusalim sine khedime okolu 120 učenikija (Dela 1:13-15; 2:1). Nekobor dive angleder adava, o Isus vakergja lenge te ačhoven ko Erusalim adaleske so valjani sine te dobinen jekh posebno poklon (Dela 1:4, 5). So slučingja pe tegani?

² I Biblija vakerela: „Taro jekh puti šundilo jekh zvuko taro nebo, sar keda phudela silno bavlal“. Adava zvuko šaj sine te šunel pe ko celo kher. Palo adava, o učenikija dikhle nešto sar „jaga so ličinena sar čhibja“ kola so hulile upro lengere šere hem sarine pherdile „sveti duhoja“ (Dela 2:2-4). Ko asavko vpečatlivo način, o Jehova dengja plo sveti duh adale učenikonge (Dela 1:8). Ola tane o prva so sine pomazime sveti duhoja. * Adalea sine lenge dendi nadež kaj ka vladinen e Isusea taro nebo.

3. Soske o učenikija ki Pedesetnica ni hari na sumningje pe kaj tane pomazime sveti duhoja?

³ Te ove sine maškar o učenikija so sine khedime ki upruni soba, nikogaš nane sine te bistre  adava dive. Zamislin tuke sar upro tlo šero avela nešto sar jag so ličinela sar čhib, hem sar počminea te kere lafi ki javer čhib! (Dela 2:5-12). Dali barem hari ka sumnine tut kaj sian pomazimo sveti duhoja? Ni hari! Ama, dali sarine soj tane pomazime sveti duhoja ovena pomazime ko nesavo vpečatlivo način, hem dali tane pomazime ko isto momenti ko životo? Na. Kotar džanaja?

4. Dali sa o pomazime hristijanja ko isto momenti taro životo dobingje plo nebesno povik? Objasnin.

⁴ Najangle te dikha keda nekoj šaj te ovel pomazimo. Adaja grupa taro okolu 120 učenikija na sine o edinstvena so sine pomazime sveti duhoja ki Pedesetnica 33 berš a.e. Pokasno o isto dive, panda okolu 3.000 javera dobingje o vetimo sveti duh. Ola sine pomazime keda krstingje pe (Dela 2:37, 38, 41). Ama, ko berša palo adava, na sine sarine pomazime odma keda krstingje pe. O Samarjanja sine pomazime palo nesavo vreme otkeda krstingje pe (Dela 8:14-17). A ko jekh posebno slučaj, o Kornelij hem sarine taro leskoro kher sine pomazime sveti duhoja panda angleder te krstinen pe (Dela 10:44-48).

5. Sprema 2. Korinkjanite 1:21, 22, so slučinela pe keda nekoj tano pomazimo sveti duhoja?

⁵ Akana te dikha so slučinela pe keda nekoj tano pomazimo sveti duhoja. Nesave soj pomazime, ko početok pharo lenge te haljoven soske o Jehova biringja lende. Šaj pučena pe: „Soske o Devel biringja baš mande?“ Javera šaj na osetinena pe agjaar. Bizi razlika sar osetinena pe, o apostol Pavle objasningja so slučinela pe sarinencar soj tane pomazime. Ov vakergja: „Otkeda verujngjen, sien sine zapečatime * e vetime sveti duhoja, kova tano garancija bašo amaro nasledstvo“ (Ef. 1:13, 14). Sprema adava, o Jehova koristinela plo sveti duh te šaj but jasno te sikavel lenge kaj ov biringja len te džan ko nebo. Ko adava  način, o sveti duh služinela sar „garancija“, ili jekh vrsta kapara koja so o Devel dela lenge te šaj te uverinel len kaj ki idnina ka živinen ko nebo, a na ki Phuv. (Čitin 2. Korinkjanite 1:21, 22).

6. So mora te kerel sekova pomazimo hristijani te šaj te dobinel pli nagrada ko nebo?

⁶ Keda nesavo hristijani tano pomazimo, dali adava značinela kaj sigurno ka dobinel nagrada ko nebo? Na. Ov tano sigurno kaj tano birimo te džal ko nebo. Ama, mora te ovel le ki godi akava sovet: „Phraljalen, panda poviše den tumendar sa te šaj te potvrdinen adava so sien vikime hem birime, soske ako kerena adava nikogaš nane te peren“ (2. Pet. 1:10). Znači, iako jekh pomazimo hristijani tano birimo, javere lafencar vikimo te živinel ko nebo, ov ka dobinel pli nagrada samo ako ačhovela verno dži ko krajo (Fil. 3:12-14; Evr. 3:1; Otk. 2:10).

7. Sar o pomazime hristijanja džanena kaj tane vikime te živinen ko nebo?

⁷ Ama, sar nekoj džanela dali isi le nebesno povik? O odgovor jasno dikhjola pe taro lafija so pišingja len o apostol Pavle e hristijanenge ko Rim, kola so sine „vikime te oven sveta“. Ov vakergja lenge: „Tumen na dobingjen duho so kerela tumen robija te šaj palem te daran, nego dobingjen duho e posvojbaskoro, kova so pottikninela amen te vikina: ’Ava, mo Dad!‘ Adava duho svedočinela amare duhoja kaj siem e Devleskere čhave“ (Rim. 1:7; 8:15, 16). Znači, preku plo sveti duh, o Devel kerela te ovel jasno e pomazime hristijanenge kaj tane vikime te živinen ko nebo (1. Sol. 2:12).

8. Sar o 1. Jovanovo 2:20, 27 sikavela kaj e pomazanikonge na valjani nikoj javer te potvrdinel kaj tane vikime te živinen ko nebo?

⁸ O Jehova na mukhela nisavi sumnja ki godi hem ko vilo okolenge so dobinena povik te živinen ko nebo. (Čitin 1. Jovanovo 2:20, 27.) Džangjola pe, e pomazime hristijanenge — isto sar sa e javerenge — valjanena o duhovna pouke so dela len o Jehova preku o sobranie. Ama, na valjani nikoj javer te potvrdinel lenge kaj tane pomazime. O Jehova uverinela len preku plo sveti duh — i najmokjno sila ko univerzum!

9. Sprema Efešanite 1:18, savi promena ovela nekaste keda tano pomazimo sveti duhoja?

⁹ Avdive, bute Devleskere slugenge tano pharo te haljoven so ovela keda nekoj tano pomazimo taro Devel. Akava tano normalno soske korkori ola na doživingje adava. Ustvari, o Devel kergja e manušen te živinen večno ki Phuv, a na ko nebo (1. Moj. 1:28; Ps. 37:29). Sepak, o Jehova odlučingja nesavenge te del životo ko nebo. Adaleske, keda pomazinela len, ov celosno meninela lengiri nadež hem o način sar razmislinena — ola tane bahtale so šaj te živinen ko nebo. (Čitin Efešanite 1:18.)

10. So značinela nekoj te ovel „palem bijamo“? (Dikh i fusnota)

¹⁰ E hristijanenge soj pomazime sveti duhoja o Isus vakergja kaj tane „palem bijame“. * Ov isto agjaar manglja te vakerel kaj našti te objasninel pe nekaske so nane pomazimo sar osetinena pe adala soj „palem bijame“, javere lafencar „bijame taro duho“ (Jovan 3:3-8).

11. Sar meninela pe o razmislibe okoleskoro soj pomazimo sveti duhoja?

 ¹¹ Keda nesave tane pomazime sveti duhoja, sar meninela pe lengoro razmislibe? Angleder te pomazinel len o Jehova, akale hristijanen sine len nadež kaj ka živinen večno ki Phuv. Ola edvaj adžikerena sine o vreme keda o Jehova ka cidel o lošnipe hem keda i Phuv ka kerel la raj. Šaj čak zamislinena peske sine sar adžikerena ple najmanglen so mule. Ama, otkeda ovena pomazime, ola počminena te razmislinen ko pojaver način. Soske? Dali meningje plo mislenje adaleske so osetinena pe sine obeshrabrime ili adaleske so doživingje but nevolje? Dali taro jekh puti halile kaj ka ovel dosadno te živinen večno ki Phuv, hem kaj nane te oven bahtale akate? Na. O Jehova koristingja plo sveti duh te šaj te promeninel lengiri nadež hem o način sar razmislinena.

12. Sprema 1. Petrovo 1:3, 4, sar osetinena pe o pomazime hristijanja keda razmislinena baši pli nadež?

¹² Nekoj soj tano pomazimo šaj mislinela kaj nane dostojno baši adaja posebno čest. Sepak, ni hari na sumninela pe kaj o Jehova biringja le. Ov tano but bahtalo hem blagodarno keda razmislinela bašo adava kaj ka živinel ko nebo. (Čitin 1. Petrovo 1:3, 4.)

13. Sar dikhena o pomazime hristijanja ko plo životo ki Phuv?

¹³ Dali akava značinela kaj o pomazanikija mangena te meren? O apostol Pavle odgovoringja ko akava pučibe. Ov sporedingja lengoro manušikano telo šatorea, hem vakergja: „Ustvari, amen, kola siem ko akava šatori, isi amen pharipe hem ofkinaja, soske amari želba nane te huljava amendar akava, nego te urava javer te šaj o životo te gltinel adava so merela“ (2. Kor. 5:4). Akala hristijanja na mangena te meren so posigate adaleske so dosadingje pe taro životo ki Phuv. Namesto adava, ola uživinena ko životo hem mangena te koristinen sekova dive te služinen e Jehovaske ple familijaja hem ple amalencar. Sepak, bizi razlika so kerena, ola na čhinavena te mislinen ki bari nadež koja so vetingja lenge o Devel baši idnina (1. Kor. 15:53; 2. Pet. 1:4; 1. Jov. 3:2, 3; Otk. 20:6).

14. So nane dokaz kaj nekoj tano pomazimo sveti duhoja?

¹⁴ Pučea tut li dali sian pomazimo sveti duhoja? Ako oja, razmislin bašo akala pučiba: Dali isi tut silno želba te kere e Jehovaskiri volja? Dali osetinea bari revnost ki služba? Dali hor proučinea i Biblija, hem dali uživinea te istražine „e Devleskere hor bukja“? (1. Kor. 2:10). Dali osetinea kaj o Jehova dela tut but bereketi ki služba? Dali hor ki tute osetinea odgovornost te pomožine e javerenge ko duhovno pogled? Dali dikhljan dokazija kaj o Jehova but puti pomožingja tut ko konkretna načinija? Ako tlo odgovor ko sa akala pučiba tano oja, dali akava tano dokaz kaj sian vikimo te živine ko nebo? Na. Soske? Adaleske so asavke čuvstvija šaj te oven sekole jekhe Devleskere sluga, a na samo adalen soj pomazime. Preku plo sveti duh o Jehova šaj te del i isto sila sa ple slugenge, bizi razlika savi nadež isi len. Ustvari, ako pučea tut dali sian pomazimo sveti duhoja, adava so na sian sigurno sikavela kaj na sian pomazimo. Okola so vikingja len o Jehova te živinen ko nebo na pučena pe dali tane pomazime ili na. Ola džanena adava!

15. Kotar džanaja kaj nesave taro adala so dobingje e Jehovaskoro duho nane vikime te živinen ko nebo?

 ¹⁵ Ki Biblija isi but primerija taro verna manuša kolenge so o Jehova dengja plo sveti duh. Sepak, len na sine len nadež te živinen ko nebo. Na primer, o David sine vodimo taro e Devleskoro duho (1. Sam. 16:13). O sveti duh pomožingja leske te haljovel o hor bukja bašo Jehova hem te pišinel delija tari Biblija (Mar. 12:36). Sepak, o apostol Petar vakergja kaj o  David na gelo ko nebo (Dela 2:34). O Jovan Krstitel sine „pherdo sveti duhoja“ (Luka 1:13-16). O Isus vakergja kaj nikoj taro manuša na sine pobaro taro Jovan. Ama isto agjaar, vakergja kaj o Jovan nane te vladinel sar cari taro nebo (Mat. 11:10, 11). O Jehova koristingja plo sveti duh te šaj te del sila akale slugenge te keren bare bukja, ama na koristingja le te šaj te vikinel len te živinen ko nebo. Dali akava značinela kaj ola na sine doborom verna sar adala soj birime te vladinen taro nebo? Na. Adava ednostavno značinela kaj o Jehova ka voskresninel len te živinen ko raj ki Phuv (Jovan 5:28, 29; Dela 24:15).

16. Savi nagrada adžikerena poviše Devleskere sluge avdive?

¹⁶ Pobaro delo taro e Devleskere sluge avdive nane len nadež te živinen ko nebo. Isto sar o Avraam, i Sara, o David, o Jovan Krstitel hem but javera murša hem džuvlja taro biblisko vreme, ola tane bahtale so isi len i nadež te živinen ki Phuv kote so ka vladinel e Devleskoro Carstvo (Evr. 11:10).

17. Bašo kola pučiba ka kera lafi ki javer statija?

¹⁷ Adaleske so avdive maškar e Devleskoro narodo panda isi pomazime hristijanja, šaj te oven amen nesave pučiba (Otk. 12:17). Na primer, sar valjani te dikhen ki peste o pomazanikija? Ako nekoj taro tlo sobranie počminela te lel taro simbolija ki Spomen-svečenost, sar valjani te ponašine tut lea? Hem, so ako bajrola o broj okolengoro so vakerena kaj tane pomazime? Dali valjani te sekirine tut? Akala pučiba ka oven odgovorime ki javer statija.