1-2. Kova neobično događaj hine ki Pedesetnica ko 33. berš ki nevi era?

JEKH grupa ando 120 e Isusese učenikija čedindže pe ko Jerusalim, ki soba upre ko jekh čher. Hine nedelja sabalje, 33. berš, ki nevi era. On čedindže pe sebepi o praznik kova vičindža pe Pedesetnica (Dela 1:13-15; 2:1). Nekobor dive angleder, o Isus zapovedindža lendže te ačhon ko Jerusalim, sose ka dobinen jekh posebno dar (Dela 1:4, 5). So ulo palo odova?

² „Kotar jekhvar šundža pe bari buka ando nebo sar ked phudela bari bavlal.“ Sa o manuša kola bešlje ko odova čher šundže akija buka. Tegani, „diso sar čhibja andi jag“, pojavindže pe upro e učenikonenge šere hem „sare pherdilje e sveto duhoja“ (Dela 2:2-4). Ko akava neobično način, akija grupa dobindža sveti duh ando Jehova (Dela 1:8). On hine prva manuša kas o Jehova pomazindža pe sveto duhoja * hem kola dobindže nada so ka vladinen e Isuseja ko nebo.

3. Sose o hrišćanja ki Pedesetnica hine uverime so hine pomazime sveto duhoja?

³ Ked bi tu oveja maškaro odola hrišćanja kola čedindže pe ki Pedesetnica, tegani niked na bi bistreja odova  so ulo. Diso sar čhibja andi jag, alo ko toklo šero hem tu počmindžan te vačere avere čhibjencar (Dela 2:5-12). Tu bi oveja potpuno uverimo so hijan pomazimo e sveto duhoja. Ama, da li sa o manuša tane pomazime e sveto duhoja ko disavo neobično način hem ko isto vreme? Na. Sar džanaja odova?

4. Da li sa o hrišćanja kola živindže ko prvo veko hine pomazime ko isto vreme? Objasnin.

⁴ Akana ka dikha ked neko šaj te ovel pomazimo. Ki Pedesetnica na hine pomazimi samo odija grupa ando 120 manuša. Hari kasnije ko odova dive, hem avera 3 000 manuša dobindže o sveti duh. On hine pomazime ked krstindže pe (Dela 2:37, 38, 41). Sar nakhlje o berša, hem avera hrišćanja hine pomazime, ama na ko dive ked krstindže pe. Na primer, o Samarićanja hine pomazime disavo vreme palo olengo krštenje (Dela 8:14-17). O Kornelije hem olesi porodica, ko jekh neobično način dobindže o sveti duh, čak angleder so krstindže pe (Dela 10:44-48).

5. Premalo 2. Korinćanima 1:21, 22, so desini pe ked neko ovela pomazimo e sveto duhoja?

⁵ Akana ka dikha so desini pe ked jekh osoba tani pomazimi e sveto duhoja. Nekase kova tano pomazimo šaj te ovel pharo te prihvatini e Jehovaso poziv. Šaj te pučel pe: „Sose o Devel birindža baš man“? Avera šaj averčhane ka reagujinen. O apostol Pavle objasnindža so ovela odole manušencar kola ovena pomazime: „Palo odova so mothovdžen so verujinena, prekalo leste hijen lje obeležime pečateja *, e sveto duhoja, kova hine obećimo, kova tano garancija ando amaro nasledstvo“ (Ef. 1:13, 14). O Jehova prekalo poklo sveti duh jasno mothovi odole hrišćanendže so birindža len. Ko odova način, o sveti duh tano „garancija“ ja obećanje kova uverini len so ki budućnost zauvek ka živinen ko nebo,  a na ki phuv. (Čitinen 2. Korinćanima 1:21, 22.)

6. Sostar zavisini da li o hrišćanin kova tano pomazimo ka dobini pi nebesko nagrada?

⁶ Ako jekh hrišćanin tano pomazimo, da li odova značini so sigurno ka dobini pi nebesko nagrada? Na. Ov tano sigurno soj tano birimo te džal ko nebo. Ama, na valjani te bistrel akava savet: „Odolese, phraljaljen, den sa tumendar te ačhon verna maškaro okola kas o Devel vičindža hem birindža, sose ked adžahar čerena niked na ka peren“ (2. Petr. 1:10). Odolese, iako jekh pomazimo hrišćanin tano birimo ja vičimo te džal ko nebo, i nagrada ka dobini samo ako ačhola verno e Jehovase (Fil. 3:12-14; Jevr. 3:1; Otkr. 2:10).

7. Sar o pomazanikija džanena soj tane vičime te džan ko nebo?

⁷ Ama, sar neko džanela soj tano vičimo te džal ko nebo? O Pavle dela jasno odgovor ko lafija kola pisindža e hrišćanendže ko Rim, kola hine „vičime te oven sveta“. Ov phendža lendže: „Sose e Devleso duho na čhivela tumen te oven robija hem te daran, nego prekalo odova duh amen hijam usvojime sar čhave, hem odova duho čhivela amen te phena: ’Ava, Dade!‘ E Devleso duho jasno mothovi amendže so hijam e Devlese čhave“ (Rimlj. 1:7; 8:15, 16). Odolese, prekalo poklo sveti duh, o Jehova jasno mothovi olendže so dobindže poziv te džan ko nebo (1. Sol. 2:12).

8. Sar o lafija kotar 1. Jovanova 2:20, 27 mothovena so niko na valjani te potvrdini e pomazanikonendže soj tane pomazime?

⁸ Ked o Jehova vičini nekas ko nebo, on ki pikli godi hem ko poklo vilo tane uverime so dobindže nebesko poziv. (Čitinen 1. Jovanova 2:20, 27.) Sar amen, adžahar hem e pomazanikonen o Jehova sikavi prekali skupština. Olendže niko na valjani te potvrdini da li tane pomazanikija ja na. O Jehova koristindža najmoćno sila ko svemir, poklo sveti duh, te uverini len soj tane pomazime.

9. Premalo Efešanima 1:18, savi promena doživini jekh osoba koja tani pomazimi?

⁹ But e Devlese sluge na haljona so desini pe ked o Devel nekas pomazini pe sveto duhoja. Odova nane ništa čudno sose on nane pomazanikija. O Devel stvorindža e manušen te živinen večno ki phuv, a na ko nebo (Post. 1:28; Ps. 37:29). Ama, o Jehova birindža disaven te živinen hem ko nebo. Odolese, ked pomazini len, ov menjini olengi nada hem o način sar on razmislinena. Palo odova, on radujinena pe so šaj te živinen ko nebo. (Čitinen Efešanima 1:18.)

10. So značinena o lafija „palem bijande“? (Dikh i fusnota.)

¹⁰ Ked o hrišćanja ovena pomazime e sveto duhoja, on tane „palem bijande“ ja „bijande upral“. * O Isus phendža so nekase kova nane pomazimo tano pharo te objasnini pe so značini te ove „palem bijando“ ja te ove „bijando ando duho“ (Jov. 3:3-8).

11. Objasnin kola promene ovena ko hrišćanja kola tane pomazime.

¹¹ Sar odola hrišćanja počminena averčhane te razmislinen ked ovena pomazime? Angleder te oven pomazime, on radujindže pe so šaj te živinen ki phuv. On  hine bahtale sose džandže so pana hari ka avel o vreme ked o Jehova ka uništini sa o lošnipe hem ka čerel ki phuv te ovel raj. Šaj razmislindže odolestar, sar adžičerena nekas andi olengi porodica ja ando amala te uštel ando grobo. Ama, ked hine pomazime, počmindže averčhane te razmislinen. Sose alo dži odova? O razlog na hine odova so na hine zadovoljna odoleja so ka živinen ki phuv. Olengi nada na menindža pe odolese so hine len stres ja bare problemija. Na počmindže te mislinen so o večno dživdipe ki phuv ka ovel dosadno. Umesto odova, o Jehova prekalo poklo sveti duh menindža o način sar razmislinena hem menindža olengi nada.

12. Premalo 1. Petrova 1:3, 4, sar o pomazana hrišćanja osetinena pe sebepi pikli nada?

¹² Te ove pomazimo tani bari čast. Odolese neko koj tano pomazimo šaj mislini so nane dostojno odolese. Ama, ov nane le ni jekh sumnja so o Jehova birindža le. Ked odija osoba razmislini andi pi nada, oj tani bahtali hem zahvalno e Jehovase. (Čitinen 1. Petrova 1:3, 4.)

13. Sar osetinena pe o pomazanikija dži živinena ki phuv?

¹³ Da li odova značini so o pomazanikija mangena so posigate te meren? O apostol Pavle dela odgovor. Ov olengo telo uporedindža e šatoreja hem phendža: „Amen kola hijam ko akava šatori isi amen bare pharipa, sose na mangaja te huljava akava, nego te urava aver, te šaj o večno dživdipe te uništini o telo kova propadini“ (2. Kor. 5:4). Akala pomazanikija na našaldže pi volja te živinen hem na mangena so posigate te meren sose tano olendže dosadno ki phuv. On uživinena ko dživdipe hem koristinena svako dive te služinen e Jehovase pe porodicaja hem pe amalencar. So god te čeren, on niked na bistrena pi nada (1. Kor. 15:53; 2. Petr. 1:4; 1. Jov. 3:2, 3; Otkr. 20:6).

14. So na mothovi so neko tano pomazimo e sveto duhoja?

¹⁴ Ako na hijan sigurno da li o Jehova pomazindža tut e sveto duhoja, razmislin kotar akala važna pučiba: Da li isi tut bari želja te čere e Jehovasi volja? Da li mislineja so hijan but revno ki služba? Da li uživineja ko odova te proučine e Devleso Lafi hem te istražujine e Devlese hor buča? (1. Kor. 2:10). Da li mislineja, so o Jehova ko posebno način blagoslovini tikli služba? Da li osetineja bari odgovornost te pomožine averendže te sikljon kotar Jehova? Da li dikhljan so o Jehova čače pomožindža tuče ko razna načinja? Ako toklo odgovor tano ja ko sa akala pučiba, da li odova mothovi so hijan vičimo ko nebo? Na. Sose na? Sose sa e Devlese sluge šaj te osetinen pe adžahar bizo obzir da li tane pomazime ja na. Prekalo poklo sveti duh, o Jehova pomožini sa e Devlese slugendže bizo obzir koja nada isi len. Ama, čim pučeja tut da li hijan pomazimo ja na, odova značini so na hijan. Okola kola tane birime ando Jehova, nane len sumnja. On tane uverime soj tane pomazanikija.

15. Sar džanaja so o Jehova na birindža svakone manuše kova dobindža oleso sveti duh te džal ko nebo?

¹⁵ Ki Biblija isi but manuša kola hine len zorali vera hem kola dobindže sveti duh. Ama, odola manuša na hine len nada so ka živinen upre ko nebo. Na primer, o kralj David hine le sveti duh (1. Sam. 16:13). Akava duh pomožindža lese te haljol e Devlese hor buča hem te pisini  disave delovija andi Biblija (Mar. 12:36). Ama, o Pavle phendža so o David na „ukljislo ko nebo“ (Dela 2:34). Isto adžahar, hem o Jovan Krstitelj hine le sveti duh (Luka 1:13-16). O Isus phendža so nane nijekh manuš kova tano pobaro ando Jovan Krstitelj, ama isto phendža hem so ov na ka ovel ko nebesko Kraljevstvo (Mat. 11:10, 11). Iako o Jehova dindža poklo sveti duh odole manušendže te čeren bare buča, ipak na koristindža isto akava duh te birini len te živinen ko nebo. Da li odova značini so on na hine odobor verna sar okola kola ka vladinen ko nebo? Na. Odova značini so o Jehova ka vazdel len ando meribe te živinen ko raj ki phuv (Jov. 5:28, 29; Dela 24:15).

16. Koja nada isi len but ando e Devlese sluge avdije?

¹⁶ But ando e Jehovase sluge kola avdije živinena ki phuv, nane len nada so ka džan ko nebo. Sar o Avraham, i Sara, o David, o Jovan Krstitelj hem but avera manuša ando purano vreme hem on jedva adžičerena te živinen ki phuv kuri e Devleso Kraljevstvo ka vladini upro lende (Jevr. 11:10).

17. Ko kola pučiba ka dobina odgovor ko aver članko?

¹⁷ Sebepi so o pomazanikija pana živinena maškaro amende, isi pana pučiba ko kola bi mangaja te džana o odgovor (Otkr. 12:17). Na primer, sar o pomazanikija valjani te dikhen kokri pes? Ako neko počmini te lel o simbolija ki tikli skupština, sar valjani te ponašine tut premalo leste? So ako o broj kotar okola kola lena simbolija nastavini te barjol? Da li valjani te brinine tut odolese? O odgovorija ko akala pučiba ka dikha ko aver članko.