1-2. Ku yentxeke ntxhumu wini wa ku hlamalisa hi siku dzra Pentekoxta hi 33 N.Y.?

A A LI mixo wa Sonto a Yerusalema. Lembe a dzri li 33 N.Y., nakone a a li siku dzra Pentekoxta. Ntlawa wa kolomu ka 120 wa vadondzrisiwa a wu tlhangane a ndlwini ya le henhla ka muti wa kukazri. (Min 1:13-15; 2:1) Masikunyana a mahlweni ka swoswo, Yesu a a va lelete leswaku va tsrhama a Yerusalema hikusa a va li kusuhi ni ku yamukela nyiko ya ku hlawuleka. (Min 1:4, 5) Xana ku game ku yentxeka yini?

² ‘Kan’we ku yingeliwe a pongwe ledzri pfaka tilwini, dzri fanaka ni dzra xidzedze lexa ku lebya.’ Yindlu hinkwayu yi tala hi pongwe. Kutani, a tinhlokweni ta vadondzrisiwa ku voneka ‘tindzrimi leti yavaniki swanga ndzrilo’, kutani hinkwavu va ‘tala hi Moya lowa ku xwenga’. (Min 2:2-4) Hi ndlela leyi ya ku hlamalisa, Yehovha a txhulule moya wakwe wa ku xwenga ka ntlawa lowo. (Min 1:8) Va ve vone va ku sungula ku totiwa hi moya wa ku xwenga * va va va nyikiwa dumbo dzra ku fuma na Yesu a tilweni.

3. Ha yini lava a va li Pentekoxta va nga vanga na ku ganaganeka leswaku va totiwe hi moya wa ku xwenga?

³ Loko a wo va mun’we wa vadondzrisiwa lava a va tlhanganile a ndlwini ya le henhla siku ledzro, a wu nge ti dzrivala leswi humeleliki ni siku ni dzrin’we. A nhlokweni yaku a ku ta va ku tsrhame ntxhumu wa ku fana ni lidzrimi dzra ndzrilo, u va u sungula ku vulavula hi tindzrimi ta ku siyana-siyana! (Min 2:5-12) A ku nge ti va na ku ganaganeka a miyanakanywini yaku leswaku u totiwile hi moya wa ku xwenga. Kambe xana hinkwavu lava totiwiki  hi moya wa ku xwenga va yamukela ku totiwa kwavu hi ndlela ya ku hlamalisa nakone hi nkama wun’we a wuton’wini byavu? Im-him. Hi swi tivisa kuyini?

4. Xana hinkwavu vatotiwa a dzaneni dzra ku sungula va kume vitaniwo dzravu hi nkama wun’we a wuton’wini byavu? Tlhamuxela.

⁴ A hi buleni hi mhaka ya nkama. Ntlawa lowo wa kolomu ka 120 wa vakriste a hi wone ntsena wu nga totiwa hi moya wa ku xwenga hi Pentekoxta, 33 N.Y. Hi siku dzrodzro, van’wana lava djulaka ku va 3.000 na vone va game va yamukela moya wa ku xwenga. Ku totiwa kwavu ku humelele loko va babatisiwile. (Min 2:37, 38, 41) Kambe ka malembe lama landzreliki, a hi hinkwavu vakriste lava totiwiki va kumiki ku totiwa kwavu loko va babatisiwa. Va-Samariya va kume ku totiwa kwavu na ku khalute nkamanyana na va babatisiwile. (Min 8:14-17) Nakone hi ndlela leyi kunene a yi hambanile, Korneliyu ni ndangu wakwe va totiwe na va nga si na babatisiwa.​—Min 10:44-48.

5. Hi ku ya hi 2 Ba-le-Korinte 1:21, 22, ku yentxeka yini loko mhunu a totiwa hi moya wa ku xwenga?

⁵ A hi tlheleni hi bula hi leswi swi yentxekaka loko mhunu a totiwa hi moya wa ku xwenga. Van’we va lava totiwaka ku sungula swi nga ha va bindzrela ku pfumela leswaku Yehovha a va hlawulile. Va nga ha tivutisa leswi: ‘Ha yini Xikwembu Nkulukumba a ni langile?’ Van’wana va nga ha yangula hi ndlela leyi hambaniki. Nambi swi li tanu, mupostola Pawulo a tlhamuxela leswaku ku yentxeka yini ka hinkwavu lava va totiwaka, loko a ku: ‘[Nkama lowu] n’wi nga pfumela ku yene . . . n’wi fungiwi * hi Moya lowa ku xwenga, lowa xidumbiso; lowu wu nga xizrangana xa pfindla dzrezru.’ (Ef 1:13, 14) Kutani Yehovha a tizrisa moya wakwe wa ku xwenga akuva a swi beka ku khanyeni swinene ka vakriste lava leswaku a va hlawulile. Hi ndlela leyo, moya wa ku xwenga wu va ‘xizrangana [xitiyiso kumbe xidumbiso]’ lexi nyikiwaka ku va tiyisekisa leswaku a nkameni lowu taka va ta hanya hi la ku nga helikiki a tilweni, ku nge misaveni.​—Dondzra 2 Ba-le-Korinte 1:21, 22.

6. Xana mukriste lwa totiwiki a fanela ku yentxa yini akuva a kuma hakelo dzrakwe dzra le tilweni?

⁶ Loko mukriste a totiwa, xana swi hlaya  leswaku a ta dzri kuma hakelo dzrakwe dzra le tilweni nambi ku nga yentxeka yini na yini? A swi tanu. A wa tiyiseka leswaku a hlawuleliwe ku ya hanya a tilweni. Nambitanu, a fanela ku dzrimuka xilayu lexi: ‘Vamakwezru, hundzrisani ku khinyela a ku tiyisa vitaniwo ni hlawuliwo dzrenu, hikusa loko n’wi yentxa leswo, n’wi nga khunguvanyeki ni siku ni dzrin’we.’ (2Pe 1:10) Xileswo, nambi loko mukriste lwa totiwiki a hlawuliwile, kumbe a vitaniwile, leswaku a ya hanya a tilweni, a ta kuma hakelo dzrakwe ntsena loko a tsrhama na a dumbekile.​—Flp 3:12-14; Hb 3:1; Mpf 2:10.

7. Xana vatotiwa va swi tivisa kuyini leswaku va vitaneliwe ku ya hanya a tilweni?

⁷ Kambe xana mhunu a swi tivisa kuyini leswaku a vitaneliwe ku ya hanya a tilweni? Nhlamulo yi voniwa hi ku khanya a mazritwini ya Pawulo ka va-Roma lava ‘vitaniwiki ku va lava ku xwenga’. A te: ‘A n’wa yamukelanga moya wa vukazrawa wa kuva n’wi tlhela n’wi txhava; kambe n’wa yamukeli moya wa vun’wana lowu hi bandlukanaka ha wone: Abba, hi leswaku Tatana. Na wo Moya wu tiyisa kun’we ni moya wezru leswaku hi vana va Xikwembu Nkulukumba.’ (Ro 1:7; 8:15, 16) Xileswo, hi ku tizrisa moya wakwe wa ku xwenga, Xikwembu Nkulukumba a swi beka a livaleni ka vatotiwa leswaku va vitaneliwe ku ya hanya a tilweni.​—1Te 2:12.

8. Xana 1 Yohan 2:20, 27 yi swi kombisa hi ndlela yini leswaku vakriste lava totiwiki a swi vileli kuva va tiyisiwa hi van’wana leswaku va totiwile?

⁸ Yehovha a nga siyi ku ganaganeka nikutsrongo a miyanakanywini ni le timbilwini ta lava yamukelaka xizrambu xa ku ya hanya a tilweni. (Dondzra 1 Yohan 2:20, 27.) Hi swone leswaku vakriste lava totiwiki swa djuleka kuva va dondzrisiwa hi Yehovha hi ku tizrisa bandla swanga hi leswi swi nga hi xiswone ka vhanu hinkwavu. Kambe a va vileli ku tiyisiwa hi mhunu leswaku va totiwile. Yehovha a tizrise ntamu lowukulu ngopfu swinene a wuyakweni hinkwabyu, a nga moya wakwe wa ku xwenga, akuva a va khanyisela hi ku helela leswaku i vatotiwa!

9. Loko mhunu a totiwa, hi kwini ku txintxa loku yentxekaka ka yene, hi laha swi tlhamuxeliwaka ha kone ka Ba-le-Efesa 1:18?

⁹ Ku tala ka malandzra ya Xikwembu Nkulukumba namunhla swi nga ma bindzrela ku twisisa leswaku ku yentxeka yini ka mhunu loko Xikwembu Nkulukumba a mu tota. Leswi swa twisiseka hikusa vone hi ntshima a va totiwanga. Xikwembu Nkulukumba a hambe vhanu akuva va hanya hi la ku nga helikiki la misaveni, ku nga li a tilweni. (Gn 1:28; Ps 37:29) Kambe Yehovha a hlawule van’we akuva va ya hanya a tilweni. Xileswo, loko a va tota, a txintxa swinene dumbo dzravu ni mapimisela yavu, lakakuva va tsrhama na va yimela ku ya hanya a tilweni.​—Dondzra Ba-le-Efesa 1:18.

10. Swi tlhamuxela yini ku ‘pswaliwa dzra wubidzri’? (Vona ni ntlhamuxelo wa le hansi.)

¹⁰ Loko vakriste va totiwa hi moya wa ku xwenga, va ‘pswaliwa dzra wubidzri’, kumbe va ‘pswaliwa hi le henhla’. * Yesu a tlhela a kombisa leswaku a swi koteki ku tlhamuxela hi ku kongoma mhunu lweyi a nga totiwangakiki leswaku swi yentxisa kuyini loko mhunu a ‘pswaliwa dzra wubidzri’ kumbe a ‘pswaliwa hi Moya’.​—Yh 3:3-8.

11. Tlhamuxela ku txintxa ka mapimisela loku humelelaka loko mhunu a totiwa.

¹¹ Hi kwini ku txintxa ka mapimisela loku humelelaka loko vakriste va totiwa? Na Yehovha  a nga si na tota vakriste lava, a va dzri zrandzra ngopfu dumbo dzra ku hanya hi la ku nga helikiki la misaveni. Hi ku navela lokukulu a va tsrhama na va yimele nkama lowu ha wone Yehovha a taka helisa wubihi hinkwabyu ni ku yentxa misava yi va paradeyisi. Kumbexana a va tivona na va hoyozela maxaka yavu kumbe vanghanu loko va pfuxiwa ku feni. Kambe ntsrhaku ka loko va totiwile, va sungule ku pimisa hi ndlela leyi hambaniki. Ha yini? A va nyenyentsiwanga hi ntxhumu hi dumbo ledzro dzra ku hanya la misaveni. Lexi va yentxiki va txintxa mapimisela yavu a hi ku vaviseka kumbe ku kazrala hi ku xaniseka. A ve na suka va ku ku hanya hi la ku nga helikiki la misaveni swi ta kazralisana. Ku hambana ni swoswo, Yehovha a tizrise moya wakwe wa ku xwenga akuva a txintxa ndlela leyi va pimisaka ha yone ni dumbo ledzri va nga nadzru.

12. Hi ku ya hi 1 Petros 1:3, 4, xana vakriste lava totiwiki va titwisa kuyini hi dumbo dzravu?

¹² Mhunu lwa totiwiki a nga ha titwa na a nga faneleki ku kuma tovoko ledzri ledzrikulu. Kambe a nga ganaganeki nikutsrongo leswaku Yehovha a mu hlawulile. Mbilu yakwe yi tala hi ku nyonxa ni ku khensa loko a pimisa hi ku lavisela loku a nga na kone.​—Dondzra 1 Petros 1:3, 4.

13. Xana vatotiwa va titwisa kuyini hi ku hanya la misaveni?

¹³ Kutani-ke, swi hlaya leswaku vatotiwa va navela ku fa? Mupostola Pawulo a hlamula xivutiso lexo. A fanise mizri yavu ya nyama ni ntsronga a gama a ku: ‘Kunene, hine lava he heke ntsrongeni lowu, ha konya, hi kamiwa, swi nge leswaku hi navela ku hliviliwa wone, kambe hi navela ku yambexiwa, akuva lowu wa ku fa wu mitiwa mfuzri hi vutomi.’ (2Ko 5:4, TLM) Vakriste lava a va tsrhikanga ku zrandzra wutomi bya nkama lowu, va navela leswaku byi hatla byi hela. Ku hambana ni swoswo, va swi zrandzra ku hanya nakone va djula ku tizrisa siku dzrin’wana ni dzrin’wana akuva va tizrela Yehovha xikan’we ni mindangu yavu ni vanghanu. Kambe, ka xin’wana ni xin’wana lexi va xi yentxaka, minkama hinkwayu va dzrimuka dumbo ledzri phatimaka ledzri va bekeliwiki dzrone ka nkama lowu taka.​—1Ko 15:53; 2Pe 1:4; 1Yh 3:2, 3; Mpf 20:6.

14. I yini swi nga kombikiki leswaku mhunu a totiwe hi moya wa ku xwenga?

¹⁴ Kumbexana wa tivutisa leswaku u totiwile hi moya wa ku xwenga kumbe im-him. Loko swi li tanu, pimisa hi swivutiso leswi swa lisima: Xana u ni ku navela lokukulu ka ku yentxa ku zrandzra ka Yehovha? U titwa na u hiseka hi ndlela leyi hlawulekiki a ntizrweni wa ku zrezra? Xana u mudondzri lwa hisekaka wa Zritu dzra Xikwembu Nkulukumba lwa zrandzraka ku dondzra hi ‘leswi yetiki swa Xikwembu Nkulukumba’? (1Ko 2:10) U vona leswaku Yehovha a ku nyike mihandzru leyi hlamalisaka a ntizrweni wa ku zrezra? U titwa ngopfu na u ni ntsrhwalu wa mfanelo wa ku pfuna van’wana hi le moyeni? U vone wumboni bya leswaku Yehovha a ku pfune hi tindlela ta ku tala ta ku kongoma a wuton’wini byaku? Loko nhlamulo yaku ka swivutiso leswi yi li ina, xana leswo swi tiyisa leswaku kutani u vitaneliwe ku ya hanya a tilweni? Im-him, a hi swone. Ha yini? Hikusa hinkwawu malandzra ya Xikwembu Nkulukumba ma nga titwa hi ndlela yoleyo, nambi ma totiwile kumbe im-him. Nakone hi ku tizrisa moya wakwe wa ku xwenga, Yehovha a nga nyika ntamu wolowu wa wun’we mun’wana ni mun’wana wa malandzra yakwe, na swi nge na mhaka leswaku dumbo dzrakwe hi dzrini. Nakunene, loko u tivutisa leswaku u totiwile hi moya wa ku xwenga kumbe im-him, ku ganaganeka koloko ku nga djula ku hlaya leswaku a wu  totiwanga. Lava va vitaniwiki hi Yehovha a va tivutisi leswaku va totiwile kumbe im-him! Vo vhela va swi tiva!

15. Hi swi tivisa kuyini leswaku a hi hinkwavu lava yamukelaka moya wa Xikwembu Nkulukumba lava hlawuleliwiki ku ya hanya a tilweni?

¹⁵ A Bibeleni, ku ni swikombiso swinyingi swa vhanu va lipfumelo lava yamukeliki moya wa ku xwenga. Nambitanu, a va vanga ni dumbo dzra ku ya hanya a tilweni. Davhida a kongomisiwe hi moya wa ku xwenga. (1Sa 16:13) Moya wa ku xwenga wu mu pfune ku twisisa mintxhumu ya ku yenta ha Yehovha wu tlhela wu mu kongomisa ku tsrala swiyenge swa Bibele. (Mr 12:36) Nambi swi li tanu, mupostola Petro a te Davhida a nga tlhantukelanga le matilweni. (Min 2:34) Yohane Mubabatisi a a tale ‘hi Moya lowa ku xwenga’. (Lk 1:13-16) Yesu a te a ku nge na mhunu lwa tlulaka Yohane hi wukulu, kambe a game a ku Yohane a a nge ti patsriwa ka Mfumu wa le tilweni. (Mt 11:10, 11) Yehovha a tizrise moya wakwe wa ku xwenga ku nyika vhanu lava ntamu wa ku yentxa mintxhumu ya ku hlamalisa, kambe a nga wu tizrisanga moya lowo ku va hlawula leswaku va ya hanya a tilweni. Xana leswo swi tlhamuxela leswaku ku dumbeka kwavu a ku nga tlhasi ka lava hlawuleliwiki ku fuma a tilweni? Im-him. Swo hlaya ntsena leswaku Yehovha a ta va pfuxa a Paradeyisini la misaveni.​—Yh 5:28, 29; Min 24:15.

16. Hi dzrini hakelo ledzri ku tala ka malandzra ya Xikwembu Nkulukumba ma dzri laviselaka namunhla?

¹⁶ Ntalu wukulu wa malandzra ya Xikwembu Nkulukumba la misaveni namunhla a wu na dumbo dzra ku ya hanya a tilweni. Ku fana na Abrahamu, Sara, Davhida, Yohane Mubabatisi ni van’wana vavanuna ni vavasati va ku tala lava hanyiki minkameni ya ku tsraliwa ka Bibele, va lavisela ku hanya la misaveni a nkameni lowu va taka fumiwa hi Mfumu wa Xikwembu Nkulukumba.—Hb 11:10.

17. Hi swini swivutiso leswi hi taka bula ha swone ka nhloko-mhaka leyi taka?

¹⁷ Leswi van’we va vatotiwa ve heke makazri ka vhanu va Xikwembu Nkulukumba namunhla, swa twala loko ku tlakuka swivutiso swa kukazri. (Mpf 12:17) Hi xikombiso, xana vatotiwa va fanela ku tivonisa kuyini? Loko mhunu wa kukazri a bandleni dzraku a sungula ku da swifanekiselo a Xidzrimuxweni, xana u fanela ku mu khomisa kuyini mhunu yelweyo? Nakone swi nga ku yini loko nhlayu ya lava liki va totiwile yi ya yi kula? Xana u fanela ku vindlavindleka ha swone? Hi ta hlamula swivutiso leswo ka nhloko-mhaka leyi taka.