1-2. Ndi cinthu cipi cakudzumatirisa cidacitika pa Pentekoste mu caka 33 Pakumala Kubalwa kwa Kristu?

IKHALI ntsiku ya Dimingu namacibese mu Yerusalemu, pa Pentekoste mu caka 33 Pakumala Kubalwa ka Kristu. Anyakupfundza cifupi na 120 agumanyikana mu sala ya nyumba yandzulu. (Mabasa 1:13-15; 2:1) Mbidzati kufika ntsiku ineyi, Yezu akhadaapanga toera akhonde kubuluka mu Yerusalemu thangwi akhafunika kutambira muoni wakupambulika. (Mabasa 1:4, 5) Buluka penepo ninji pidacitika?

² “Penepo pene kudzulu kwabveka kutitima ninga kwa mphepo ikulu.” Kutitima kweneku kwabveka n’nyumba yonsene. Buluka penepo, aoneka “malirimi a moto” mbaphama pa nsolo ubodzi na ubodzi wa anyakupfundza, natenepa onsene adzala na “nzimu wakucena.” (Mabasa 2:2-4) Munjira ineyi yakudzumatirisa, Yahova apereka nzimu wakucena kuna anyakupfundza anewa. (Mabasa 1:8) Iwo akhali akutoma kudzodzwa na nzimu wakucena * na kutambira cidikhiro cakutonga pabodzi na Yezu kudzulu.

3. Thangwi yanji Akristu a mu Pentekoste akhali na cinyindiro cakuti adzodzwa na nzimu wakucena?

³ Khala imwe mukhali m’bodzi wa anyakupfundza adagumanyikana mu sala ya nyumba yandzulu, mbamuphamirwa na cinthu  cakulandana na lirimi ya moto, pontho mbamutoma kulonga pilongero pyakusiyana-siyana, imwe nee mbamudaduwala pidacitika pa ntsiku ineyi. Pontho nee mbamudapenula kuti mwadzodzwa na nzimu wakucena. (Mabasa 2:5-12) Kodi onsene anadzodzwa na nzimu wakucena asadzodzwa munjira yakupambulika peno mu ndzidzi ubodzi ene? Nkhabe. Tisadziwa tani pyenepi?

4. Kodi Akristu a mu ndzidzi wa apostolo akhadzodzwa mu ndzidzi ubodzi ene? Fokotozani.

⁴ Pakutoma tendeni tione kuti ndi ndzidzi upi unadzodzwa munthu. Akristu cifupi na 120 nee ndiwo basi adadzodzwa na nzimu wakucena pa Pentekoste mu caka 33 P.K.K. Mukupita kwa ndzidzi, ntsiku ibodzi ene anthu cifupi na 3.000 atambirambo nzimu wakucena. Iwo adzodzwa mu ndzidzi udabatizwa iwo. (Mabasa 2:37, 38, 41) Mbwenye mu pyaka pidatowera, nee ndi Akristu onsene akhadzodzwa mu ndzidzi udabatizwa iwo. Asamariya adzodzwa na nzimu wakucena mu ndzidzi ungasi pakumala kubatizwa. (Mabasa 8:14-17) Pontho Kornelyo na anthu a panyumba pace adzodzwa munjira yakudzumisa kakamwe, iwo adzodzwa mbadzati kubatizwa.—Mabasa 10:44-48.

5. Mwakubverana na 2 Akorinto 1:21, 22, ninji pinacitika munthu angadzodzwa na nzimu wakucena?

⁵ Cincino tendeni tione kuti ninji pinacitika munthu angadzodzwa na nzimu wakucena. Anthu anango anadzodzwa, panango pakutoma pisakhala pyakunentsa toera kutawira kuti asankhulwa na Yahova. Panango asabvundzika: ‘Thangwi yanji Mulungu asankhula ine?’ Anango nee asakhala na mabvero anewa. Mbwenye mwakukhonda tsalakana pyonsene, mpostolo Paulu afokotoza pinthu pinacitika kuna ale anadzodzwa: “Pidakhulupira imwe Kristu, Mulungu akuikhani cidzindikiro * kubulukira mwa nzimu wakucena udapikira iye, wakuti ndi cipangizo ca unthaka wathu.” (Aef. 1:13, 14; cidzindikiro capantsi.) Natenepa Yahova asaphatisira nzimu wace wakucena toera kupangiza pakweca kuna Akristu anewa kuti asankhulwa na iye. Munjira ineyi, nzimu wakucena ndi “cidzindikiro” cinaapasa cinyindiro cakuti iwo  anaenda kakhala kudzulu, tayu pa dziko yapantsi.—Lerini 2 Akorinto 1:21, 22.

6. Nkristu wakudzodzwa asafunika kucitanji toera atambire muoni wace wakuenda kudzulu?

⁶ Kodi Nkristu angadzodzwa, cidikhiro cace cisakhala cakuenda na kwenda mu ndzidzi ubodzi ene? Nkhabe. Iye asakhala na cinyindiro cakuti asankhulwa toera kuenda kudzulu. Mbwenye asafunika kukumbuka uphungu uyu: “Natenepa abale, citani pyonsene pinakwanisa imwe toera mupitirize kukhala akukhulupirika ninga anthu adacemerwa na adasankhulwa, thangwi mungapitiriza kucita pyenepi, imwe nee munadzagwa.” (2 Ped. 1:10) Na thangwi ineyi, Nkristu angasankhulwa peno kucemerwa toera kuenda kudzulu, basi ene anatambira muoni unoyu angapitiriza kukhala wakukhulupirika.—Afil. 3:12-14; Aheb. 3:1; Apok. 2:10.

7. Akristu akudzodzwa asadziwa tani kuti ali na cidikhiro cakuenda kudzulu?

⁷ Munthu asadziwa tani kuti ali na cidikhiro cakuenda kudzulu? Ntawiro usagumanika m’mafala adalemba mpostolo Paulu kuna Akristu a ku Roma akuti ‘acemerwa toera kukhala anthu akucena.’ Iye aapanga: “Imwe nee mwatambira nzimu wa ubitcu wakuti unakucitisani pontho kugopa, mbwenye mwatambira nzimu unakucitisani kukhala ana a Mulungu, kubulukira mu nzimu unoyu tisakhuwa kuti: “Abha, Baba!” Nzimu wa Mulungu usapereka umboni kuna ife kuti ndife ana a Mulungu.” (Aroma 1:7; 8:15, 16) Natenepa, Mulungu asaphatisira nzimu wace wakucena toera kupangiza pakweca kuna munthu kuti ali na cidikhiro cakuenda kudzulu.—1 Ates. 2:12.

8. Kodi lemba ya 1 Juwau 2:20, 27 isapangiza tani kuti Akristu akudzodzwa nee asafunika kupangwa na anango toera kukhala na cinyindiro cakuti adzodzwa?

⁸ Yahova asapereka cinyindiro consene m’manyerezero na muntima mwa ale anacemera iye toera kuenda kudzulu. (Lerini 1 Juwau 2:20, 27.) Mwandimomwene, Akristu akudzodzwa asafunika kupfundziswa na Yahova kubulukira mu mpingo ninga pinapfundziswa anthu onsene. Mbwenye iwo nee asafunika kupangwa na anango toera kukhala na cinyindiro cakuti adzodzwa. Yahova aphatisira kale nzimu wace wakucena toera kuapangiza pakweca kuti iwo adzodzwa.

9. Mwakubverana na Aefesi 1:18, ndi macinjo api asakhala na munthu angadzodzwa?

⁹ Panango pinakhala pyakunentsa kuna atumiki azinji a Mulungu lero toera kubvesesa pinthu pinacitika kuna munthu anadzodzwa. Thangwi yanji? Thangwi iwo nee ndi akudzodzwa. Mulungu acita anthu toera akhale pa dziko yapantsi kwenda na kwenda, tayu kudzulu. (Gen. 1:28; Masal. 37:29) Mbwenye Yahova asasankhula anthu anango toera kuenda kudzulu. Natenepa iye angaadzodza, asacinja cidikhiro cawo na manyerezero awo, toera akhale na cifuno cakuenda kudzulu.—Lerini Aefesi 1:18.

10. Kodi ‘kubalwa pontho’ kusabvekanji?

¹⁰ Nkristu angadzodzwa na nzimu wakucena, iye ‘asabalwa pontho.’ * Yezu apangizambo kuti ndi pyakunentsa kufokotoza kuna munthu wakuti nee ndi wakudzodzwa, mabvero asakhala na munthu ‘anabalwa pontho’ peno ‘anabalwa na nzimu.’—Juw. 3:3-8.

11. Fokotozani macinjo anacitika kuna munthu angadzodzwa.

¹¹ Kodi Nkristu asakhala na manyerezero api angadzodzwa? Mbadzati kudzodzwa na Yahova, iye akhali na cidikhiro cakukhala pa dziko  yapantsi kwenda na kwenda. Iye akhadikhira kuona ntsiku inafuna Yahova kucinja dziko yapantsi kudza paraizu na kumalisa uipi onsene. Panango iye akhanyerezera pya kutambira m’bale wace peno xamwali wace adafa. Mbwenye angadzodzwa, iye asatoma kukhala na manyerezero akusiyana. Thangwi yanji? Tayu thangwi iye nee akhakomerwabve na cidikhiro cakukhala pa dziko yapantsi kwenda na kwenda, pontho iye nee acinja cidikhiro cace thangwi yakuthabuka na nyatwa zizinji, peno anyerezera kuti kukhala pa dziko yapantsi kwenda na kwenda nee ndi kwakutsandzayisa. M’mbuto mwace, Yahova aphatisira nzimu wace wakucena toera kucinja manyerezero ace na cidikhiro cikhali na iye cakukhala pa dziko yapantsi.

12. Mwakubverana na 1 Pedhru 1:3, 4, Nkristu wakudzodzwa asakhala na manyerezero api thangwi ya cidikhiro cace?

¹² Munthu adadzodzwa panango asanyerezera kuti nee athema kutambira mwai unoyu wakupambulika. Mbwenye iye nee asapenula kuti asankhulwa na Yahova. Pontho iye asatsandzaya kakamwe mbapereka takhuta thangwi ya cidikhiro cace cakuenda kudzulu.—Lerini 1 Pedhru 1:3, 4.

13. Anyakudzodzwa asanyerezera tani thangwi ya umaso wawo pa dziko yapantsi?

¹³ Kodi pyenepi pisabveka kuti anyakudzodzwa asafuna kufa? Mpostolo Paulu asatawira mbvundzo unoyu. Iye alandanisa manungo a anyakudzodzwa na khumbi, mbalonga: “Mwandimomwene, ife akuti tiri mu khumbi iyi tisabulira mbatinentseka, thangwi ife nee tisafuna kudula khumbi iyi, mbwenye tisafuna kubvala inango, toera umaso wakukhonda mala upite pa mbuto ya manungo athu akuti anakwanisa kufa.” (2 Akor. 5:4) Akristu anewa nee aneta na umaso pa dziko yapantsi mbafuna kufa mwakucimbiza. M’mbuto mwace, iwo asakomerwa na umaso, pontho asafuna kutumikira Yahova ntsiku zonsene pabodzi na acibale awo na axamwali awo. Mwandimomwene, mwakukhonda tsalakana mabasa anacita iwo, Akristu akudzodzwa ndzidzi onsene asanyerezera cidikhiro cawo cakutsandzayisa ca ntsogolo.—1 Akor. 15:53; 2 Ped. 1:4; 1 Juw. 3:2, 3; Apok. 20:6.

14. Ninji pinapangiza kuti munthu nee adzodzwa na nzimu wakucena?

¹⁴ Panango munabvundzika khala mwadzodzwa peno nkhabe. Khala ndi tenepo, nyerezerani mibvundzo iyi yakufunika kakamwe: Kodi imwe musakomerwa kakamwe kucita cifuno ca Yahova? Imwe musaona kuti ndimwe waphinga kakamwe m’basa yakumwaza mphangwa? Kodi musakomerwa na kupfundza Bhibhlya toera kukhala na “udziwisi wakubisika wa Mulungu”? (1 Akor. 2:10) Musapibva kuti Yahova asakuphedzani toera kukhala na maphindu m’basa yakumwaza mphangwa? Kodi musapibva kuti muli na basa ikulu yakuphedza anango toera kupfundza pya Yahova? Musakwanisa kuona njira zinakuphedzani Yahova mu umaso wanu? Mungatawira mibvundzo ineyi kuti inde, pyenepi pisabveka kuti imwe mwadzodzwa? Nkhabe. Thangwi yanji? Thangwi atumiki onsene a Mulungu anakwanisa kukhala na mabvero mabodzi ene, mwakukhonda tsalakana khala ndi akudzodzwa peno nkhabe. Pontho mukuphatisira nzimu wace wakucena, Yahova anakwanisa kuphedza atumiki ace toera kucita pyenepi mwakukhonda tsalakana cidikhiro cawo. Mwandimomwene, khala imwe musapenula kuti mwadzodzwadi na nzimu wakucena, pyenepi pisapangiza kuti imwe nee mwadzodzwa. Ale anacemerwa na Yahova nee asapenula khala adzodzwa peno nkhabe. Mbwenye asakhala na cinyindiro consene.

15. Tisadziwa tani kuti nee ndi onsene adatambira nzimu wa Mulungu ali na cidikhiro cakuenda kudzulu?

 ¹⁵ M’Bhibhlya tisagumana pitsandzo pizinji pya amuna akukhulupirika adatambira nzimu wakucena, mbwenye iwo nee akhali na cidikhiro cakuenda kudzulu. Dhavidhi akhatsogolerwa na nzimu wakucena. (1 Sam. 16:13) Nzimu wakucena wamphedza toera kubvesesa mwadidi pinthu pyakubisalika pinalonga thangwi ya Yahova, pontho wantsogolera toera kulemba makhundu anango a Bhibhlya. (Marko 12:36) Ngakhale tenepo, mpostolo Pedhru alonga kuti Dhavidhi “nee akwira kudzulu.” (Mabasa 2:34) Juwau M’batizi ‘akhadadzala na nzimu wakucena.’ (Luka 1:13-16) Yezu alonga kuti nee pakhali na munthu wankulu kupiringana Juwau, mbwenye iye alongambo kuti Juwau nee mbadacita khundu ya Umambo wakudzulu. (Mat. 11:10, 11) Yahova aphatisira nzimu wace wakucena toera kupasa mphambvu amuna anewa yakucita pinthu pyakudzumatirisa, mbwenye iye nee aphatisira nzimu wace toera kuapasa cidikhiro cakuenda kudzulu. Kodi pyenepi pisabveka kuti amuna anewa nee ndi akukhulupirika kakamwe kupiringana ale anasankhulwa toera katonga kudzulu? Nkhabe. Pisabveka kuti Yahova anadzaalamusa muli akufa toera akhale m’Paraizu pa dziko yapantsi.—Juw. 5:28, 29; Mabasa 24:15.

16. Ndi nkhombo ipi inadikhira atumiki azinji a Mulungu lero?

¹⁶ Atumiki azinji a Mulungu lero pa dziko yapantsi nee ali na cidikhiro cakuenda kudzulu. Ninga Abrahamu, Sara, Dhavidhi, Juwau M’batizi kuphatanizambo amuna na akazi azinji akukhulupirika a mu ndzidzi wakale, asadikhira kukhala pa dziko yapantsi yakutongwa na Umambo wa Mulungu.—Aheb. 11:10.

17. Ndi mibvundzo ipi inafuna kutawira ife mu nsolo unatowera?

¹⁷ Nakuti anyakudzodzwa anango aciri pabodzi na atumiki a Mulungu lero, panango tinabvundzika. (Apok. 12:17) Anyakudzodzwa asafunika kunyerezeranji thangwi ya iwo ene? Khala munthu atoma kudya nkate na kumwa vinyu pa Cikumbuso mu mpingo mwanu, musafunika kumuona tani? Mphapo ndiye tani khala numero ya anthu anewa analonga kuti ndi akudzodzwa ikuthimizirika? Kodi musafunika kudzudzumika na pyenepi? Tinatawira mibvundzo ineyi mu nsolo unatowera.