MWISAMBO WA KULONGA 4
‘Kikudi kinabene akitushinkamiisha’
‘Kikudi kinabene akitushinkamiisha’shi twi baana b’Efile Mukulu.’—LOM. 8:16, EEM.
LOONO 25 Kisamba kipya
KYABAKWILA MWANKA *
Yehowa apongoola kikudi kyaaye ki selele mu mushindo wa kukanya kwi kisaka kya bena Kidisitu 120 (Tala kikoso 1-2)
1-2. Nkintu kinyi kya kukanya kibaadi kikitshikye mu kipwa kya 33 B.B. mwifuku dya Pentekote?
TWI MU DYA lubingo ku nakashika mu Yeelusaleme. Twi mu kipwa kya 33 B.B., mwifuku dya Pentekote. Kisaka kya balongi 120 nkibugye mu kadimbo ka kwiyilu. (Bik. 1:13-15; 2:1) Mafuku apeela kumpala, Yesu baadi mwibalungule bwabadya kushala ku Yeelusaleme bwa’shi bapete kya buntu ki pabwakyo. (Bik. 1:4, 5) Nkinyi kibaadi kikitshikye kunyima?
2 “Peenyi paapa, kubapushikile mwiyilu eunga bu dya kituumo kii bukopo kya kipunga.” Kyakya kituumo kibaawudile mu nshibo mubaabadi. Akupu, “ndjimi ya kaalo” nkutentama ku mitwe ya balongi, na boso “babaawudile na kikudi ki selele.” (Bik. 2:2-4) Mu uno mushindo wa kukanya, Yehowa baadi mupongolwele kino kisaka kikudi kyaye ki selele. (Bik. 1:8) Abafikile bantu ba kumpala babaadi bedibwe mwimu na kikudi ki selele * na kwibapa lukulupilo lwa kumunana na Yesu mwiyilu.
NKINYI AKIKITSHIKAA NSAA AYEDIBWA MUNTU MWIMU?
3. Bwakinyi baba boso abaadi mu Pentekote tababadi na mpaka’shi abedibwa mwimu?
3 Su boodi umune a ku baaba balongi babaadi bebungye mu kadimbo ka kwiyilu dyadya efuku, to kwidiluba’be. Kintu ki bu ludjimi lwa kaalo, kibakutentama ku mutwe, akupu bobanga kwakula mu ndjimi! (Bik. 2:5-12) Bodi mulombene kushinkamisha’shi bwedibwa mwimu kubukwashi bwa kikudi ki selele. Kadi, bano boso abedibwa mwimu ku bukwashi bwa kikudi ki selele, bakwete kwedibwa wanka mu mushindo wa kukanya na mu kipungo kimune su? Nya. Atwibiuku naminyi?
4. Bedibwe mwimu boso ba mu siekele a kumpala abapetele lwitamino lwabo mu kipungo kimune abo boso su? Patuula.
4 Tutaluuleyi mwanda wi na muulo. Tampenda kisaka kya bantu 120 kibaadi kyedibwe mwimu ku bukwashi bwa kikudi ki selele mu kipwa kya 33 B.B., mwifuku dya Pentekote nya. Kunyima, nka mu dyadya efuku dimune, bantu peepi na 3 000 abaadi bapete kikudi ki selele. Abaadi bedibwe mwimu nsaa ibabadi babatshishibwe. (Bik. 2:37, 38, 41) Kadi mu bipwa bibalondele, nta boso abaadi bedibwe mwimu pa kubatshishibwa kwabo nya. Bena Samadiya abaadi bedibwe mwimu mafuku apeela kunyima kw’abo kubatshishibwa. (Bik. 8:14-17) Kwedibwa mwimu kwa Korneye na kifuko kyaye kubaadi kwa pabwako, abaadi bedibwe mwimu kumpala kw’abo kubatshishibwa.—Bik. 10:44-48.
5. Muyile 2 Beena-Kodinda 1:21, 22, nkinyi akikitshikaa nsaa ayedibwa muntu mwimu kubukwashi bwa kikudi ki selele?
5 Tutaluuleyi akikitshikaa nsaa ayedibwa muntu mwimu ku bukwashi bwa kikudi ki selele. Abikelaa bangi bukopo bwabadya kukumiina’shi Yehowa bebasangula. Mbalombene kwiyipusha’shi: ‘Bwakinyi Yehowa bansangula nka’mi?’ Bangi namu tabeyipusha bino nya. Sunga muntu epusha naminyi, Mpoolo mutumibwa apatuula akikitshikila boso abedibwa mwimu’shi: ‘P’anwe kwiukumiina, nubediibwa kitampi * kia kikudi ki selele kibalayilwe, kiikale bu kyeeko kia bupyanyi bwetu.’ (Ef. 1:13, 14, Kilombeeno kipya 2014) Yehowa afubishaa kikudi kyaye ki selele bwa kulesha bano bena Kidishitu patooka’shi mmwibasangule. Kikudi ki selele ‘akibashinkamiisha’shi,’ mu mafuku aafiki abakekala na muwa wa looso mwiyilu kushi pa nsenga.—Badika 2 Beena-Kodinda 1:21, 22.
6. Abitungu’shi mwina Kidishitu mwedibwe mwimu akite kinyi bwa kupeta bwedi bwaye bwa kwenda mwiyilu?
6 Su mwina Kidishitu bedibwa mwimu, apete bwedi bwaye bwa kwenda mwiyilu musango umune su? Nya. Ashinkamisha’shi mmusangudibwe bwa kwenda mwiyilu. Anka, abitungu atentekyeshe dino elango: “Anwe bakwetu, nyishaayi kwikala na nkatshinkatshi bwa kushinkamisha kwitanyinwa kwenu na kusangulwa kwenu; pa byaabya, tanukeekala mu masaku a kupona nguba kampanda nya.” (2 Mp. 1:10) Byabya, sunga mwina Kidishitu mmusangudibwe, sunga’shi mmwitaminwe bwa kwenda mwiyilu, apete bwedi bwaye nka su bashaala na lulamato.—Fid. 3:12-14; Eb. 3:1; Kibaf. 2:10.
MBIKUNYI ABITUNDULAA MUNTU’SHI BEDIBWA MWIMU?
7. Bedibwe mwimu abauka naminyi’shi abetaminyibwa mwiyilu?
7 Kadi mushindo kinyi autundulaa muntu’shi betaminyibwa bwa kwenda mwiyilu? Lwalulo alumweneka patooka mu mayi a Mpoolo kwi beena Looma babaadi ‘betaminwe bwa kwikala beselele.’ Bebalungwile’shi: ‘Tanwi bapete kikudi kya kwinwikasha bu bapika sunga kya kwinwalusha ku moo nya; anka kikudi nkinwikashe bu bana ba bupyaanyi b’Efile Mukulu, na kummwitaanyina’shi: abba, ngi’shi: Yaaya. Kino kikudi kinabene akitushinkamiisha’shi twi baana b’Efile Mukulu.’ (Lom. 1:7; 8:15, 16) Kubukwashi bwa kikudi kyakye, Efile Mukulu alesha bedibwe mwimu patoka’shi mbapete lwitamino lwa mwiyilu.—1 Tes. 2:12.
8. Mushindo kinyi wi 1 Yowano 2:20, 27 alesha’shi bena Kidishitu bedibwe mwimu tabe na lukalo lwa’shi muntu ebashinkamiishe’shi mbedibwe mwimu?
8 Yehowa talekaa mpaka mu binangu na mashimba a bano be na lwitamino lwa kwenda mwiyilu nya. (Badika 1 Yowano 2:20, 27.) Binyibinyi’shi, bena Kidishitu bedibwe mwimu be na lukalo lwa’shi Yehowa ebalongyeshe kukidila ku kakongye nka byalongyeshaa muntu ooso. Kadi tabe na lukalo lwa’shi muntu kampanda ebashinkamishe’shi mbedibwe mwimu. Yehowa mmufube na bukome bukile booso, kikudi kyaaye ki selele, bwa kwibashinkamiisha kalolo’shi mbedibwe mwimu!
ABATANDIKWAA “DYA KABIDI”
9. Nsaa ayedibwa muntu mwimu, nkinyi akishintulukaa mwadi, bu byabadi bebileshe mu Beena-Efeso 1:18?
9 Lelo uno, bafubi b’Efile Mukulu bebungi mbalombene kumona’shi bi bukopo kushinguula akikitshiikaa nsaa yabasangula muntu. Bino byoso mpa mwanda abo ta mbedibwe mwimu nya. Efile Mukulu bapangile bantu bwabadya kwikala na muwa wa looso pa nsenga, kushi mwiyilu. (Kib. 1:28; Mis. 37:29) Kadi Yehowa mmusangule bangi bwabadya nkashaala mwiyilu. Byabya, nsaa y’ebasangula, ashintuula lukulupilo lwabo na ngelelo abo a binangu musango umune, ababanga kutula binangu byabo ku nshalelo abo mwiyilu.—Badika Beena-Efeso 1:18.
10. ‘Kutandjikwa dya kabidi’ akulesha kinyi? (Tala mayi e kuushi kw’esaki.)
10 Bena Kidishitu p’abedibwa mwimu ku bukwashi bwa kikudi ki selele, ‘abatandjikwaa dya kabidi.’ * Yesu badi dingi muleshe’shi, bi bukopo kupatulwila muntu shi mmwedibwe mwimu, abipushaa muntu ‘mutandjikwe dya kabidi,’ sunga ‘kutandjikwa ku kikudi.’—Yo 3:3-8; note.
11. Patuula kushintuluka akumwenekaa nsaa ayedibwa muntu mwimu.
11 Mushindo kinyi aubangaa mwina Kidishitu kunangushena mu kingi kipaso aye bapu kwedibwa mwimu? Kumpala kwa’shi bano bena Kidishitu bedibwe mwimu, abasangelanga lukulupilo lwabo lwa kwikala na muwa wa looso pa nsenga. Abatengyelanga na muloo oso kipungo akikakatusha Yehowa bubi boso na kwikasha nsenga bu mpaladiiso. Pangi babadi abamono mu binangu byabo, byabakakukila bena kifuko nabo sunga ba kuuku babo abadi bafwe. Anka kunyima kw’abo kwedibwe mwimu, ababanga kunangushena ungi mushindo. Bwakinyi? Ta nkwamba’shi ababanga kubepuula lukulupilo lwabo lwa muwa wa looso pa nsenga nya. Ta mbashintuule binangu byabo mwanda wa’shi abekalanga bapwe kukooka na makyenga abapetanga nya. Musango umune tabapwandikisha’shi kwikala na muwa wa looso akwibakalakasha nya. Anka, Yehowa afubu na kikudi kyaye ki selele bwa kushintuula mweneno abo na lukulupilo lwabasangelanga.
12. Muyile 1 Mpyeele 1:3, 4, bena Kidishitu bedibwe mwimu abapushaa naminyi pabitale lukulupilo lwabo?
12 Muntu abadi beele mwimu mulombene kupwandikisha’shi buno bushito ta mbumulombene nya. Anka te na nsaa ya kwela mpaka’shi Yehowa mmumusangule. E na muloo ukata na lutumbu bwa lukulupilo lwaye lwa kwikala na muwa mwiyilu.—Badika 1 Mpyeele 1:3, 4.
13. Bedibwe mwimu abapushaa naminyi pabitale muwa wabo pa nsenga?
13 Byabya nkwamba’shi bedibwe mwimu abakuminaa kufwa? Mpoolo mutumibwa aluula ku luno lukonko. Apwandikisha mbidi ya muntu n’epema’shi: “Mwanda, atwe be mu dino epema, tukwete kwidila, twibapoombe; eyendo: taatukyebe kufuula, anka kufwala imo mbidi pa ingi, bwa’shi mbidi ya lufu ishimine mu muuwa.” (2 Kod. 5:4) Bano bena Kidishitu tabakutwaa kwata uno muwa na muulo, na kukimba kufwa budikidi. Pamutwe pa byabya, abasangeela muwa na abakumina kufuba nao efuku dyooso bwa kufubila Yehowa na bifuko byabo na ba kuuku babo. Anka, sunga bekala abakitshi kinyi, abatentekyeshaa lukulupilo lwabo lwa ntumbo lwabadi nalo bwa mafuku e kumpala.—1 Kod. 15:53; 2 Mp. 1:4; 1 Yo. 3:2, 3; Kibaf. 20:6.
YEHOWA MMUKWELE MWIMU SU?
14. Nkinyi kish’akilesha’shi muntu mmwedibwe mwimu ku bukwashi bwa kikudi ki selele?
14 Pangi okwete kwiyipusha su we mwedibwe mwimu ku bukwashi bwa kikudi ki selele. Su mbyabya, banda kunangushena ku ino nkonko: We na lukalo lukata lwa kukita akikyebe Yehowa su? W’epushaa’shi we na katshintshi ngofu mu bulungudi? We mulongi a Eyi dy’Efile Mukulu mufule kulonga pabitale ‘myanda ifwame y’Efile Mukulu’? (1 Kod. 2:10, Kilombeno kipya 2014) Opwandikishaa’shi Yehowa mmukupe bipeta bikile buwa mu bulungudi? Opushaa’shi we na bushito bukata bwa kulongyesha bangi pabitale Yehowa su? We na bishinkamisho abikulesha’shi Yehowa mmukukwashe mu mishindo ibungi mu nshalelo oobe su? Su bokumiina ku ino nkonko, bino abishinkamisha’shi we mwitaminyibwe bwa kwenda mwiyilu su? Nya ta nabyo. Bwakinyi? Mwanda bafubi b’Efile Mukulu booso mbalombene kupusha nka byabya, byabekala bedibwe mwimu sunga ingi mikooko. Na ku bukwashi bwa kikudi kyaaye ki selele, Yehowa mukumbene kupa mufubi aye oso buno bukome, sunga ekala na lukulupilo lwi naminyi. Anka, su okwete kwiyipusha su we mwedibwe mwimu, penda nka yaaya mpaka ngilombeene kulesha’shi twe mwedibwe mwimu nya. Bano babadi betamine kwi Yehowa tabealashenaa bwa kuuka su mbedibwe mwimu sunga’shi ta mbebeele mwimu! Abauku!
Yehowa badi mufube na kikudi kyaye ki selele bwa kupa Abrahame, Saraa, Daavide, na Yowano Mubatshishi bukome bwa kukita myanda ya kukanya, anka tabadi mwikifubishe bwa kwibapa lukulupilo lwa kwenda mwiyilu (Tala kikoso 15-16) *
15. Atuuku naminyi’shi ta mbooso babadi bapete kikudi ky’Efile Mukulu basangudibwe bwa kwenda mwiyilu?
15 Mu Bible, mwi bileshesho bibungi bya balume basha lukumino babaadi bapete kikudi ki selele; anka, bashibadi bapete lukulupilo lwa kwenda mwiyilu. Daavide badi mukunkushibwe na kikudi ki selele. (1 Sam. 16:13) Kikudi ki selele kibadi kimukwashe bwa kupusha myanda ifwame ya Yehowa na kumukunkusha bwa kufunda mikanda ya mu Bible. (Mak. 12:36) Sunga mbyabya, Mpyeele mutumibwa bakwile pabitale Daavide shi “taa mmukamine kwiyilu.” (Bik 2:34) Yowano mubatshishi baadi “muwule na kikudi ki selele.” (Luk. 1:13-16) Yesu bambile’shi takubadi muntu mukile Yowano, akupu bambile’shi Yowano t’ekala mu Bufumu bwa mwiyilu nya. (Mat. 11:10, 11) Yehowa badi mufube na kikudi kyaaye bwa kwibapa bukome bwa kukita bintu bya kukanya, anka tabadi mufube na kyakya kikudi bwa kwibasangula bwa’shi bekale na muwa mwiyilu. Nyi nkwamba’shi abadi na lukumiino lushaadile pe lwa bano basangudibwe bwa kukunkusha mwiyilu? Nya. Abilesha penda’shi Yehowa akebasangula bwa kwikala na muwa mu Mpaladiiso pa nsenga.—Yo. 5:28, 29; Bik. 24:15.
16. Bafubi b’Efile Mukulu bebungi abatengyela bwedi kinyi lelo uno?
16 Bafubi b’Efile Mukulu bebungi be pa nsenga lelo uno, tabe na lukulupilo lwa kwenda mwiyilu. Anka bu Abrahame, Saraa, Daavide, Yowano Mubatshishi, na bangi balume na bakashi ba kala, abatengyela kwikala na muwa wa looso pa nsenga ku bukunkushi bwa Bufumu bw’Efile Mukulu.—Eb. 11:10.
17. Atukataluula nkonko kinyi mu mwisambo aulondo?
17 Pamwanda bangi bedibwe mwimu bakii munkatshi mwa bafubi b’Efile Mukulu lelo uno, kwi ingi nkonko ayiboo. (Kibaf. 12:17) Kileshesho, su muntu mmwedibwe mwimu, abitungu’shi emone naminyi? Su muntu a mu kakongye kenu babanga kudya mukate na kutoma nfinyo ku Kitentekyesho, we mulombene kumumona naminyi? Twi kwamba naminyi su bungi bwa bantu abamba’shi mbedibwe mwimu bukwete nka kukamina? Uno mwanda ngulombeene nkukalakasha su? Atukaluula ino nkonko mu mwisambo aulondo.
^ par. 5 Kubanga mu Pentekote mu kipwa kya 33 bipungo byetu (B.B.) mpa na lelo uno, Yehowa mmupe bangi bena Kidishitu lukulupilo lwipabwalo—lukulupilo lwa kumunana na Mwana aye mwiyilu. Mushindo kinyi awiukaa bano bena Kidishitu’shi abebasangula bwa luno lukulupilo? Nkinyi akikitshikaa nsaa i muntu apete luno lwitamino? Uno mwisambo awisambila myanda imune i mu Kitenta kya Mulami kya mweshi wa kumpala 2016. Awaluula dingi ino yoso nkonko.
^ par. 2 KISHIMA KYABADI BAPATUULE: Kwedibwa mwimu ku bukwashi bwa kikudi ki selele: Yehowa afubishaa kikudi kyaye ki selele bwa kusangula muntu akamunana na Yesu mwiyilu. Kubukwashi bwa kikudi kyaye, Yehowa apa yawa muntu lukulupilo bwa mafuku aafiki, sunga “kyeeko.” (Ef. 1:13, 14) Bano bena Kidishitu mbalombene kwamba’shi kikudi ki selele “akishinkamîsha,” sunga kwibalesha patooka’shi efuto dyabo dii mwiyilu.—Lom. 8:16.
^ par. 5 KISHIMA KYABADI BAPATUULE: Kitampi. Yehowa elaa muntu kino kitampi mafuku apeela kumpala kwa’shi afwe na lulamato na akele bangi kumpala kwa’shi mpombo ikata ibangye.—Ef. 4:30; Kibaf. 7:2-4; tala “Nkonko ya bantu ababadikaa” mu Kitenta kya Mulami kya mu 4/2016 mu Fwalanse.
LOONO 27 Kufumbulwa kwa bana b’Efile Mukulu
^ par. 57 BI MU BIFWATULO: Sunga betwela mu lukano bwa lukumiino lwetu, sunga twekala balungantu bwa kulungula na kulongyesha bya binyibinyi, abitungu tutengyele bwa kwikala na muwa pa nsenga ku bukunkushi bwa Bufumu bw’Efile Mukulu.
