1-2. Un apaiti soni bi pasa a di Pensiti daka u di jaa 33 baka Keesitu?

SÖWAN 120 bakama u Jesosi bi ko makandi a wan kamba di dë a wan libawosu a Jelusalen. De bi ko makandi a wan sonde mamate, a di Pensiti daka u di jaa 33 baka Keesitu (Tjab. 1:13-15; 2:1). Wantu daka a fesi, Jesosi bi piki dee bakama fëën taa de musu fika a Jelusalen, u di de bi o feni wan apaiti kado (Tjab. 1:4, 5). Andi bi ko pasa?

² „De jei wan soni kuma gaan ventu kumutu a liba ta ko te a ko dou a di wosu dendu vooo sö, ka de dë sindosindo.” Hii sëmbë di dë a di wosu bi ta jei di ventu aki. Baka di dë, hën de si wan „soni kuma faja töngö” paaja fingafinga go nama a hiniwan u de. Hën di ’[jeje] u Masa Gadu ko a de liba’ (Tjab. 2:2-4). A di lö fasi dë Jehovah bi da dee bakama u Jesosi di santa jeje fëën (Tjab. 1:8). De bi dë dee fosu sëmbë di Jehovah bi salufu ku di santa jeje * fëën, nöö de bi o sa libi makandi ku Jesosi a liba ala.

3. Unfa a waka taa dee sëmbë dee bi dë a di Pensiti daka bi dë seiki taa Jehovah bi salufu de ku di santa jeje fëën?

³ U dë seiki taa ee i bi dë wan u dee bakama u Jesosi di bi dë a di kamba a Jelusalen di daka dë, nöö nöiti i bi o fëëkëtë di  soni di bi pasa. Pakisei taa wan soni kuma faja töngö saka ko a i hedi, nöö i ta bigi fan wan woto töngö! (Tjab. 2:5-12) I bi o dë seiki taa Jehovah salufu i ku di santa jeje fëën. Ma hii sëmbë Jehovah ta salufu a wan foombo fasi ö? A ta salufu hii sëmbë a di wan seei ten u? Wë nönö. Unfa u du sabi di soni aki?

4. Hii dee Fesiten Keesitu sëmbë dee bi dë salufuwan Jehovah bi salufu a di wan seei ten u?

⁴ Boo taki na un ten Gadu sa tei wan sëmbë ko salufuwan. Na dee 120 Keesitu sëmbë nöö Jehovah bi salufu ku di santa jeje fëën a di Pensiti daka u di jaa 33 baka Keesitu. A di wan seei daka dë, di santa jeje bi ko a söwan 3000 sëmbë liba jeti. Di soni aki bi pasa di de bi tei dopu (Tjab. 2:37, 38, 41). Ma a dee jaa baka di dë, Jehovah an bi salufu hii dee Keesitu sëmbë di de bi tei dopu. Jehovah bi salufu dee Samalia sëmbë wan pisiten baka di de bi tei dopu (Tjab. 8:14-17). Jehovah bi salufu Konelisi ku dee sëmbë fëën wosudendu a wan apaiti fasi seei. De an bi tei dopu jeti seei di Jehovah bi salufu de.​—Tjab. 10:44-48.

5. Te u luku di soni di sikifi a 2 Kolenti 1:21, 22, nöö andi ta pasa te Jehovah salufu wan sëmbë?

⁵ Boo luku andi ta pasa te Jehovah salufu wan sëmbë ku di santa jeje fëën. Kandë bigibigi a sa taanga da so sëmbë di Jehovah salufu u de tei taa Jehovah tei de. Kandë de sa ta pakisei taa: ’Faandi mbei Gadu tei mi?’ Kandë wotowan an o ta pakisei sö. Aan toobi unfa wan sëmbë ta fii te Gadu tei ën. Ma apösutu Paulosu bi konda andi ta pasa ku dee sëmbë dee Jehovah ta salufu. A bi taki taa: „Di un jei [di Bunu Buka] nöö hën un piki ën, nöö hën a da unu di [jeje] fëën kuma wan nöbu taa un dë sëmbë fëën. Nöö di [jeje] u Gadu di u ta taki aki, a dë kuma wan gaan gudu a da u a fesi” (Ef. 1:13, 14). U ta si gbelin taa Jehovah ta wooko ku di santa jeje fëën faa mbei wan Keesitu sëmbë sabi taa a dë wan salufuwan. A di lö fasi aki di santa jeje dë kuma wan „sitampu” * di ta mbei de dë seiki  taa a di ten di ta ko, de o libi u teego a liba ala, ma na a goonliba aki.​—Lesi 2 Kolenti 1:21, 22.

6. Andi wan salufu Keesitu sëmbë musu du ee a kë feni di paka u go libi a liba ala?

⁶ A dë sö tuu taa u di Jehovah salufu wan Keesitu sëmbë, mbei a musu u go a liba ala u? Wë nönö. Di sëmbë ta dë seiki taa Jehovah salufu ën faa go libi a liba ala, ma a musu hoi wan soni a pakisei. Wë di soni dë, da di soni di sikifi a di tëkisi aki. A ta taki taa: ’Faa i si taa Masa Gaangadu kai i tei fii ko sëmbë fëën, nöö i musu biinga be a dë sö tuu a i libi fu sëmbë si e. Biga te i biinga ku dee soni u taki dë, nöö ja o kai kumutu a di pasi u Gadu möönsö’ (2 Pet. 1:10). Aluwasi ee Jehovah salufu wan Keesitu sëmbë faa go libi a liba ala, tökuseei a musu hoi hënseei a Jehovah hii hën libi longi ufö a o sa feni di paka dë.​—Fil. 3:12-14; Heb. 3:1; Ako. 2:10.

7. Unfa dee salufuwan ta sabi taa Gadu kai de u de go libi a liba ala?

⁷ Ma unfa wan sëmbë sa sabi ee Gadu kai ën faa go libi a liba ala? U sa feni di piki aki a di soni di Paulosu bi taki di a bi dë a Loomë. A bi piki dee sëmbë dee bi „ko dë apaiti sëmbë” da Gadu taa: „Di jeje u Gadu an ta mbei u ko toon saafu möön, fuun musu ta dë fëëëfëëë hiniwan ten kumafa un bi dë a fesi. Ma di jeje mbei taa Gadu tei unu ko miii fëën. Nöö hën mbei u ta kai Gadu „Abba, Taata!” Di jeje u Gadu seei ta lei u gbelin taa u da miii u Gadu” (Lom. 1:7; 8:15, 16, NW). Ku di santa jeje fëën, Gadu ta mbei dee salufuwan sabi taa a kai de u de go libi a liba ala.​—1 Tes. 2:12.

8. Unfa 1 Johanisi 2:20, 27 ta lei taa an dë u wan sëmbë piki wan salufu Keesitu sëmbë taa Gadu salufu ën?

⁸ Jehovah ta mbei dee sëmbë dee a kai u go libi a liba ala sabi gbelingbelin taa de o go ala tuutuu. (Lesi 1 Johanisi 2:20, 27.) Dee salufu Keesitu sëmbë ta kisi lei a dee komakandi tu, leti kumafa hii dee woto Keesitu sëmbë ta kisi lei. Ma an dë u wan sëmbë piki de taa Gadu salufu de. Jehovah bi wooko ku di santa jeje fëën di dë di möön makiti soni a mundu, u mbei de sabi gbelingbelin taa de da salufuwan!

9. Andi ta tooka a wan sëmbë te Gadu salufu ën, te i luku di soni di sikifi a Efeise 1:18?

⁹ A sa ta taanga da gaansë u dee dinima u Gadu a di ten aki u de fusutan andi ta pasa ku wan sëmbë te Gadu salufu ën. Faandi mbei a dë sö? Wë, u di de an dë salufuwan. Gadu bi mbei libisëmbë u de libi u teego a goonliba aki, ma na u de libi a liba ala (Ken. 1:28; Ps. 37:29). Ma Jehovah tei so sëmbë u de go libi a liba ala. Fëën mbei te Jehovah salufu wan sëmbë, nöö a ta mbei di sëmbë ko ta si soni woto fasi sö taa di sëmbë dë ta ko abi di hangi u libi a liba ala.​—Lesi Efeise 1:18.

10. Andi a kë taki u „toona pai” wan sëmbë? (Luku di pisi a basu tu.)

¹⁰ Te Gadu salufu wan Keesitu sëmbë ku di santa jeje fëën, nöö a dë kuma de „toona pai” ën. * Jesosi seei bi taki taa a taanga u konda da wan sëmbë di an dë wan salufuwan, unfa a dë te de „toona pai” wan sëmbë.​—Joh. 3:3-8.

11. Konda unfa wan sëmbë ta bigi si soni baka te Gadu salufu ën.

¹¹ Andi ta pasa ku wan Keesitu sëmbë te Gadu salufu ën? Ufö Jehovah salufu wan Keesitu sëmbë, nöö a ta hangi di ten ka a o libi u teego a goonliba aki. Fosufosu dee sëmbë aki bi ta wakiti di ten seei ka Jehovah o puu hogidu,  nöö a mbei di goonliba toon wan paladëisi. Kandë de bi ta si kaa unfa de o wai ku dee sëmbë u de, nasö ku dee mati u de, te de o weki ko a libi baka. Ma baka di Jehovah salufu de, hën de bigi ta si soni woto fasi. Faandi mbei? Wë na pakisei dee sëmbë aki bigi pakisei taa di libi u teego a goonliba aki an o bunu tjika da de. Na u di de ta tja fuka, nasö u di de feni taa di teego libi a goonliba aki an o suti, mbei de ko ta si soni woto fasi. Ma Jehovah wooko ku di santa jeje fëën u tooka di fasi fa de bi ta si soni.

12. Unfa wan salufu Keesitu sëmbë ta si di paka di a o feni, te u luku 1 Petuisi 1:3, 4?

¹² Wan sëmbë di Gadu salufu sa ta si kuma an fiti faa feni sö wan apaiti gaandi. Ma nöiti a ta hakisi hënseei ee Jehovah salufu ën tuutuu. A ta wai seei te na soni, te a ta pakisei taa a o sa go libi a liba ala. Nöö a ta tei di soni aki u bigi seei.​—Lesi 1 Petuisi 1:3, 4.

13. Unfa dee salufuwan ta si di libi u de a goonliba aki?

¹³ Di soni aki kë taki taa dee sëmbë dee Gadu salufu ta kë dëdë u? Apösutu Paulosu bi piki di hakisi aki. A bi tei di libisëmbë sinkii maaka ku wan tenti. A bi taki taa: „Fa u ta libi a di sinkii fuu a goonliba aki, nöö u ta tja fuka nëën tuu. U ta tja sömëni hebi nëën. Ma nöö fa mi ta fan aki seei, ma an dë taa buuse u ta buuse di sinkii fuu aki sö e. Nönö. Ma u ta hangi fuu go libi a di oto sinkii fuu ala, be di sinkii fuu aki di ta dëdë musu tooka ko kuma di an ta dëdë möönsö” (2 Kol. 5:4). Na libi wë dee Keesitu sëmbë aki an ta kë libi a goonliba aki möön. Dee Keesitu sëmbë aki ta wai taa de dë a libi, nöö hiniwan daka de ta dini Jehovah makandi ku dee famii u de ku dee mati u de. Hii fa de ta du hii dee soni aki, tökuseei hii juu de ta mëni di gaan soni di de o feni a di ten di ta ko.​—1 Kol. 15:53; 2 Pet. 1:4; 1 Joh. 3:2, 3; Ako. 20:6.

14. Andi wan sëmbë an musu luku, nöö a taki taa Jehovah salufu ën?

¹⁴ Kandë i ta hakisi iseei ee Gadu salufu i ku di santa jeje fëën. Ee i ta hakisi iseei di soni aki, nöö buta pakisei a dee fanöudu hakisi aki: I ta abi di hangi u du andi Jehovah kë fii du ö? I ta du di peleikiwooko fajafaja seei ö? I da wan sëmbë di lo’ u lei soni a di Wöutu u Gadu ö? I lobi „dee tjubitjubi soni u Gadu” ö? (1 Kol. 2:10, NW) I ta si taa Jehovah ta mbei soni waka bunu da i a di peleikiwooko u? I ta fii taa ju abi di faantiwöutu u heepi wotowan u de ko sabi soni u Jehovah u? I ta si taa Jehovah ta heepi i a peipei fasi a i libi ö? Kandë joo piki aai a hii dee hakisi aki. Ma di soni dë kë taki taa joo go libi a liba ala u? Wë nönö. Faandi mbei u taki sö? U di hii dee dinima u Gadu ta fii sö, aluwasi ee de o go libi a liba ala nasö ee de o dë a goonliba aki. Boiti di dë, Jehovah sa wooko ku di santa jeje fëën u da hii dee dinima fëën di kaakiti di de abi fanöudu, aluwasi ka de o libi. Ee i ta hakisi iseei ee i da wan salufuwan, hën da ja dë wan salufuwan. Dee sëmbë dee Jehovah kai u de go libi a liba ala, an ta hakisi deseei ee Gadu salufu de tuutuu. De dë seiki taa Gadu salufu de!

15. Unfa u du sabi taa na hii sëmbë di bi abi di jeje u Gadu, Gadu bi tei u go libi a liba ala?

¹⁵ Sömëni woto dë a di Bëibel u sëmbë di bi abi wan taanga biibi, nöö Jehovah bi ta da de di santa jeje fëën. Ma tökuseei Jehovah an bi kai de u de go libi a liba ala. Di santa jeje bi ta tii Dafiti (1 Sam. 16:13). Di santa jeje bi heepi ën faa fusutan dee lei u Jehovah, söseei faa sikifi so pisi u di Bëibel (Maik. 12:36). Hii fa soni bi dë sö, tökuseei apösutu Petuisi bi taki taa „Dafiti [an] bi go a Masa Gadu a liba ala” (Tjab. 2:34). Di santa jeje bi dë ku Johanisi di Dopuma (Luk. 1:13-16). Jesosi bi taki taa sëmbë an bi dë di bi hei möön Johanisi, ma a bi  taki tu taa Johanisi an bi o dë a di Könuköndë u liba ala (Mat. 11:10, 11). Jehovah bi da dee womi aki di santa jeje fëën u de du gaan soni, ma an bi kai de u de go libi a liba ala. Di soni aki kë taki taa de an bi ta hoi deseei a Gadu kuma dee woto sëmbë dee Gadu tei ö? Nönö. Di soni aki kë taki taa Jehovah o weki de ko a libi baka a di Paladëisi a goonliba aki.​—Joh. 5:28, 29; Tjab. 24:15.

16. Un paka gaansë u dee dinima u Gadu a di ten aki ta wakiti u de feni?

¹⁶ Gaansë u dee dinima u Gadu a goonliba aki, an o go libi a liba ala, leti kumafa Abahamu, Sala, Dafiti, Johanisi di Dopuma, ku sömëni woto womi ku mujëë fu awooten an bi go a liba ala tu. Dee sëmbë aki tuu ta wakiti di ten ka di Könuköndë u Gadu o ta tii hii di goonliba aki.​—Heb. 11:10.

17. Andi woo taki a di woto di ta ko?

¹⁷ A di ten aki, salufuwan dë a u mindi jeti, nöö kandë woo kë sabi wantu soni (Ako. 12:17). Unfa dee salufuwan musu ta si deseei? Unfa i musu libi ku wan sëmbë di dë a di kemeente ka i nango, te a bigi njan di bëëë ku te a bigi bebe di win te u ta mëni di dëdë u Jesosi? Nöö unfa a dë ee dee sëmbë dee ta taki taa de da salufuwan ta ko möön hia? I musu ta booko i hedi ku di soni aki ö? A di woto di ta ko woo taki u dee soni aki.