1-2. Hal᷊ẹ̌ makạlaherang apa nariadi su ěllong Pentakosta taung 33 M?

SU TAUNG 33 M, su Misa mal᷊ukadẹ̌, ěndịu 120 muritẹ̌ nẹ̌komol᷊ẹ̌ su ruangan bageang dasị su sěmbaụ wal᷊e. Ene kai ěllong Pentakosta. (Kis. 1:13-15; 2:1) Pira ěllo kal᷊imona, Yesus něngoro si sire gunang tatapẹ̌ su Yerusalem ual᷊ingu i sire sarung měnarimạ hadiah istimewa. (Kis. 1:4, 5) Apa nariadi su tempong i sire nẹ̌komol᷊ẹ̌ su ruangan ene?

² Su tempo ene, ”sěngkělěndịu piạ tingihẹ̌ maghahẹ bọu langị, mẹ̌sul᷊ungu anging maihạ”. Tingihẹ̌ ene nikaringihẹ̌ su wal᷊e ene. Bọu ene, ”barang kere putung kadodọ” siměpụ su wowong těmbọu manga muritẹ̌, ”kụ i sire napenẹu rohkẹ̌ masusi”. (Kis. 2:2-4) Bọu cara makạlaherang ene, Yehuwa něgělị rohkẹ̌’E masusi su manga muritẹ̌ ene. (Kis. 1:8) I sire ini kahumotongange nilanisu rohkẹ̌ masusi * dingangu nakaěbạ pělaharapẹ̌ gunang mẹ̌parenta dingangi Yesus su sorga.

3. Kawe nụe manga muritẹ̌ su ěllong Pentakosta tawe ragu i sire seng nilanisu rokẹ̌ masusi?

³ Kěnang pẹ̌tiněna i kau ene dingangu manga muritẹ̌ su ruangan bageang dasị. I kau tantu tawe miwul᷊e apa nariadi su tempo ene. Piạ barang kere putung siměpụ su wowong těmbọu, kụ i kau něnětạ nẹ̌bisara bawera wal᷊inẹ. (Kis. 2:5-12) I kau tantu tawe ragu i kau nilanisu rohkẹ̌ masusi. Katewe, apa kěbị taumata apang nilanisu rohkẹ̌ masusi  sěntiniạ nilanisẹ̌ dingangu cara mẹ̌sul᷊ung? Tala. Bọu apa i kitẹ masingkạ?

4. Apa kěbị tau Kristen su abad humotong nilanisẹ̌ su tempong i sire nibaptisẹ̌? Lahẹko.

⁴ Mahịe i kitẹ měngěndung soal u kange taumata aramanung nilanisẹ̌. Su Pentakosta 33 M, taumata apang nilanisu rohkẹ̌ masusi bal᷊inẹ kětạeng 120 muritẹ̌ apang natampung su ruangan bageang dasị. Su ěllo ene lai, ěndịu piạ 3.000 su kataune taumata nilanisu rohkẹ̌ masusi nirianding i Yesus. I sire nilanisẹ̌ su tempong nibaptisẹ̌. (Kis. 2:37, 38, 41) Katewe, pira taung tuhụe, tawe kěbị tau Kristen nilanisẹ̌ su tempong nibaptisẹ̌. Tau Samaria nilanisẹ̌ diọ marěngụ bọu tempong i sire nibaptisẹ̌. (Kis. 8:14-17) Bọu ene lai, Kornelius dingangu kěluargane nilanisẹ̌ těntal᷊ang i sire bědang tawe nibaptisẹ̌. Ene hal᷊ẹ̌ tawe wiasa.​—Kis. 10:44-48.

5. Tumuhụ 2 Korintus 1:21, 22, apa nikapěndangengu taumata apang nilanisẹ̌?

⁵ I kitẹ lai sarung měngěndung soal u apa nikapěndangengu taumata apang nilanisẹ̌. Pirang katau apang nilanisẹ̌ aramanung nẹ̌pěndang tawe layak nipileng Yehuwa. I sire aramanung měpẹ̌pikirẹ̌, ’Kawe nụe Mawu němile si siạ?’ Sěnggạ aramanung tawe nẹ̌pěndang kerene. Katewe, tawẹ soale apa nikapěndangeng i sire, Rasul Paulus nělahẹ kerea i sire nilanisẹ̌, ”Su apang i kamene nangimang, Mawu něpakẹ si sie gunang měniala si kamene dingangu meterai, * ene kai rohkẹ̌ masusi seng niriandi, kụ ene kai jaminan i kitẹ sarung makatarimạ pusakạ.” (Ef. 1:13, 14, catatan kaki.) Hakị u ene, Yehuwa něpakẹ rohkẹ̌’E masusi gunang mapakal᷊ahẹ su manga tau Kristen ene i Sie seng němile si sire. Ual᷊ingu ene, rohkẹ̌ masusi nakoạ ”jaminan [tanda jadi, arau diandi]” makakoạ si sire mangimang su tempo mahi i sire sarung měbiahẹ̌ kěkalẹ̌ su sorga, bal᷊inẹ su dunia.​—Basa 2 Korintus 1:21, 22.

6. Tadeạu botonge makoạ sarang sorga, apa harusẹ̌ turusẹ̌ koatengu tau Kristen apang nilanisẹ̌?

⁶ Mạeng tau Kristen seng nilanisẹ̌, apa ene mangal᷊ene i sie mang makoạ sarang  sorga? Tala. Su tempong nilanisẹ̌, i sie mangimang i sie seng nipile gunang makoạ sarang sorga. Katewe, i sie harusẹ̌ mẹ̌tahěndung sasasa ini: ”Anạu sěmbaụ, pẹ̌tawakal᷊ịe tadeạu i kamene tatapẹ̌ makoạ taumata nikui dingangu nipile. Mạeng i kamene turusẹ̌ měkoa manga hal᷊ẹ̌ ene, i kamene tantu tawe manawo.” (2 Ptr. 1:10) Hakị u ene, maning tau Kristen apang nilanisẹ̌ seng nipile, arau nikui, gunang makoạ sarang sorga, i sie hědo makatarimạ hadiah ene mạeng i sie tatapẹ̌ masatia.​—Flp. 3:12-14; Ibr. 3:1; Why. 2:10.

7. Kerea taumata apang nilanisẹ̌ nakasingkạ i sire nakaěbạ kakui sarang sorga?

⁷ Katewe, kerea taumata makasingkạ i sie seng nakaěbạ kakui sarang sorga? Sasimbahe botonge kasilong i kitẹ su bawerang i Paulus su tau Roma ”apang nikui gunang makoạ taumata masusi”. I sie nẹ̌bera si sire, ”Rohkẹ̌ masusi tawe někoạ si kitẹ makoạ ělang arau saụ matakụ, katewe, lumiung rohkẹ̌ ene, i kitẹ nihengkẹ nakoạ anạu Mawu kụ nawahangsang gunang mẹ̌kui, ’Abba, Amang!’ Rohkẹ̌ masusi ene hala něgělị kesaksian sěngkasio dingangu naung i kitẹ, i kitẹ kai anạ u Mawu.” (Rm. 1:7; 8:15, 16) Hakị u ene, lumiung rohkẹ̌’E masusi, Mawu napakal᷊ahẹ su tau Kristen apang nilanisẹ̌ i sire kai nikui gunang makoạ sarang sorga.​—1 Tes. 2:12.

8. Tumuhụ 1 Yohanes 2:20, 27, kawe nụe tau Kristen apang nilanisẹ̌ tawe perlu taumata wal᷊inẹ gunang mapakal᷊ahẹ i sire seng nilanisẹ̌?

⁸ Yehuwa tawe němala pěndang ragu piạ su tiněna dingangu naungu taumata apang nakaěbạ kakui sarang sorga. (Basa 1 Yohanes 2:20, 27.) Tantu, tau Kristen apang nilanisẹ̌ tatapẹ̌ harusẹ̌ těntirong i Yehuwa lumiung sidang, kere anạu sěmbaụ i sire wal᷊inẹ. Katewe, i sire tawe perlu taumata wal᷊inẹ gunang mapakal᷊ahẹ i sire kai seng nilanisẹ̌. Yehuwa seng něpakẹ katatoghasẹ̌ sěbạe katoghasenge su alam semesta ini, ene kai rohkẹ̌’E masusi, gunang mapakal᷊ahẹ i sire seng nilanisẹ̌.

9. Tumuhụ Efesus 1:18, pẹ̌bawal᷊ui apa nariadi su taumata apang nilanisẹ̌?

⁹ Kal᷊awokange ělangu Mawu orasẹ̌ ini aramanung masigěsạ makaěna apa nikapěndangengu tau seng nilanisẹ̌. Ini normal ual᷊ingu i sire bědang tawe pernah nilanisẹ̌. Mawu něndiadi taumata gunang měbiahẹ̌ su dunia, bal᷊inẹ su sorga. (Kej. 1:28; Mz. 37:29) Katewe, Yehuwa seng němile pirang katau taumata gunang měbiahẹ̌ su sorga. Hakị u ene, su tempong nělanisẹ̌ si sire, i Sie němal᷊ui pělaharapẹ̌ dingangu cara i sire mẹ̌tiněna, hakị u ene i sire měngẹ̌ngampal᷊ẹ̌ tempone měbiahẹ̌ su sorga.​—Basa Efesus 1:18.

10. Apa mangal᷊ene ”saụ nalahirẹ̌”? (Pěmanda lai catatan kaki.)

¹⁰ Su tempong tau Kristen nilanisu rohkẹ̌ masusi, i sire ”saụ nalahirẹ̌”, arau ”nalahirẹ̌ bọu rasị”. * Yesus lai něnodẹ taumata apang tawe nilanisẹ̌ tawe kahěngang-hěngang makaěna kerea pěndange ”saụ nalahirẹ̌”, arau ”nalahirẹ̌ bọu rohkẹ̌ masusi”.​—Yoh. 3:3-8; catatan kaki.

11. Lahẹko kerea cara taumata mẹ̌tiněna nẹ̌bal᷊ui su tempong i sie nilanisẹ̌.

¹¹ Su tempong taumata nilanisẹ̌, apa nẹ̌bal᷊ui bọu cara tau ene mẹ̌tiněna? Těntal᷊ang bědang tawe nilanisẹ̌ i Yehuwa, tau ene piạ pělaharapẹ̌ měbiahẹ̌ kěkalẹ̌ su dunia. I sie sěbạe měngẹ̌ngampal᷊ẹ̌ tempone Yehuwa měmal᷊ui dunia ini makoạ  firdaus dingangu mapakailang kěbị karal᷊akisẹ̌. I sie aramanung seng nẹ̌tiněna sarung měněnsomahẹ̌ kěluargane arau hapịe apang seng nate. Katewe, su apang nilanisẹ̌, cara i sie mẹ̌tiněna seng nẹ̌bal᷊ui. Kawe nụe? I sire bal᷊inẹbe seng malasẹ̌ měbiahẹ̌ su dunia. I sire tawe němal᷊ui pělaharapẹ̌ ual᷊ingu sěbạe nasusah naung arau nasigěsạ. I sire tawe sěngkělěndịu nakapěndang pěbawiahẹ̌ su dunia ene makạsahe. Katewe, Yehuwa něpakẹ rohkẹ̌’E masusi gunang měmal᷊ui cara i sire mẹ̌tiněna dingangu měmal᷊ui pělaharapi sire.

12. Tumuhụ 1 Petrus 1:3, 4, kerea pěndangu tau Kristen apang nilanisẹ̌ soal u pělaharapi sire?

¹² Tau seng nilanisẹ̌ aramanung nẹ̌pěndang tawe layak nakaěbạ kesempatan istimewa ene. Katewe, i sie tawe ragu Yehuwa seng němile si sie. I sie sěbạe mal᷊uasẹ̌ dingangu makitarimakasẹ su tempong mẹ̌tiněna pělaharape gunang měbiahẹ̌ su sorga.​—Basa 1 Petrus 1:3, 4.

13. Kerea pěndangu tau Kristen apang nilanisẹ̌ soal u pěbawiahẹ̌ su dunia?

¹³ Mạeng kerene, apa ini mangal᷊ene taumata apang nilanisẹ̌ mapulu lighạ mate? Pěmanda sasimbahi Rasul Paulus. I sie napẹ̌sul᷊ung badangu taumata dingangu kemah, kụ i sie nẹ̌bera, ”Sěběnarẹ̌e, i kitẹ apang ene su kemah ini sụsangị su ral᷊ungu naung dingangu nakapěndang nawěhạ, ual᷊ingu i kitẹ bal᷊inẹbe mapulu měmělọ ini, katewe i kitẹ mapulu měpakẹ wal᷊inẹ, tadeạu badang botonge mate sarung gantiangu pěbawiahẹ̌ kěkalẹ̌.” (2 Kor. 5:4) Hakị u ene, tau Kristen apang nilanisẹ̌ tawe nasahe dingangu pěbawiahẹ̌ su dunia, lai madiri mal᷊ighạ mate. I sire sěbạe puluang dingangu pěbawiahẹ̌ su dunia lai mapulu turusẹ̌ mẹ̌tahamawu si Yehuwa dingangu keluarga lai hapị i sire. Katewe, maning apa kẹ̌koateng i sire orasẹ̌ ini, i sire sěntiniạ mětẹ̌tiněna pělaharapẹ̌ makạlaherang sarung kaěbạkeng i sire su tempo mahi.​—1 Kor. 15:53; 2 Ptr. 1:4; 1 Yoh. 3:2, 3; Why. 20:6.

14. Hal᷊ẹ̌ apa tawe makoạ bukti taumata seng nilanisu Mawu?

¹⁴ Aramanung i kau mětẹ̌tiněna apa i kau seng nilanisu rohkẹ̌ masusi. Mạeng kerene, pẹ̌tiněna manga kakiwal᷊o penting ini: Apa si kau piạ kapulu sěbạe matoghasẹ̌ gunang měkoạ kapulung i Yehuwa? Apa i kau nakapěndang i kau sěbạe masěmangatẹ̌ měnginjilẹ̌? Apa i kau puluang měngěndung ”tiněnang Mawu sěbạe maral᷊ung” su Alkitapẹ̌? (1 Kor. 2:10) Apa i kau nẹ̌pěndang Yehuwa něgělị hasilẹ̌ mapaelẹ̌ su tempong i kau něnginjilẹ̌? Apa i kau nẹ̌pěndang piạ tanggung jawab gěguwạ gunang mẹ̌tul᷊ung taumata měngěndung soal i Yehuwa? Apa i kau nakasilo bukti Yehuwa nẹ̌tul᷊ung si kau su haghing cara su pěbawiahu? Mạeng i kau simimbahẹ̌ iya gunang kěbị kakiwal᷊o ene, apa ene botonge makoạ bukti i kau seng nilanisẹ̌ gunang měbiahẹ̌ su sorga? Tala. Kawe nụe? Ual᷊ingu kěbị ělangu Mawu lai piạ pěndang kerene, tawẹ soale i sire nilanisẹ̌ arau tala. Kụ bọu rohkẹ̌’E masusi, Yehuwa botonge měgělị katatoghasẹ̌ mẹ̌sul᷊ung su kěbị ělang’E, tawẹ soale apa pělaharapi sire. Sěběnarẹ̌e, mạeng i kitẹ bědang měkẹ̌kiwal᷊o arau ragu apa i kitẹ nilanisẹ̌ arau tala, ene mangal᷊ene i kitẹ tawe nipile gunang měbiahẹ̌ su sorga. Taumata apang nipileng Yehuwa tawe ragu. I sire kahěngang-hěngang mangimang i sire nilanisẹ̌!

15. Bọu apa i kitẹ masingkạ tawe kěbị taumata nakatarimạ rohkẹ̌ masusi nipile gunang makoạ sarang sorga?

¹⁵ Alkitapẹ̌ nẹ̌sěbạ lawọ taumata masatia  nakaěbạ rohkẹ̌ masusi katewe tawe nakaěbạ pělaharapẹ̌ měbiahẹ̌ su sorga. Sěmbaụ contone ute i Daud. I sie lẹ̌ahạkengu rohkẹ̌ masusi. (1 Sam. 16:13) Rohkẹ̌ masusi nakatul᷊ung si sie nakaěna manga hal᷊ẹ̌ maral᷊ung soal i Yehuwa. Rohkẹ̌ masusi lai něngahạ si sie němohẹ piram baụ bageangu Alkitapẹ̌. (Mrk. 12:36) Maning kerene, Rasul Petrus naul᷊ị i Daud ”tawe naawị sarang sorga”. (Kis. 2:34) Contoh wal᷊inẹ lai ute i Yohanes Pembaptis. I sie ’napenẹu rohkẹ̌ masusi’. (Luk. 1:13-16) Yesus naul᷊ị tawẹ apa taumata limembong gěguwạ bọu i Yohanes. Katewe, Yesus lai naul᷊ị Yohanes tawe mẹ̌parenta su sorga. (Mat. 11:10, 11) Yehuwa něpakẹ rohkẹ̌’E masusi gunang měgělị katatoghasẹ̌ su manga esẹ ene gunang měkoạ manga hal᷊ẹ̌ makạlaherang. Katewe, Yehuwa tawe něpakẹ rohkẹ̌’E masusi gunang měgělị si sire pělaharapẹ̌ měbiahẹ̌ su sorga. Kawe nụe? Apa ene ual᷊ingu i sire tawe tumanịu masatia sul᷊ungu taumata apang nipile mẹ̌parenta su sorga? Tala. Alasange sederhana: I sire piạ pělaharapẹ̌ nẹ̌tatěntang. Yehuwa sarung mapakawiahẹ̌ si sire su Firdaus su dunia.​—Yoh. 5:28, 29; Kis. 24:15.

16. Kal᷊awokange ělangu Mawu orasẹ̌ ini měngẹ̌ngampal᷊ẹ̌ apa?

¹⁶ Orasẹ̌ ini, kal᷊awokange ělangu Mawu su dunia tawẹ apa pělaharapẹ̌ měbiahẹ̌ su sorga. I sire měngẹ̌ngampal᷊ẹ̌ měbiahẹ̌ su dunia, kụ makoạ rakyatu Kararatuangu Mawu. Ene lai lẹ̌harapeng i Abraham, Sara, Daud, Yohanes Pembaptis, dingangu lawọ esẹ lai wawine wal᷊inẹ su zaman Alkitapẹ̌.​—Ibr. 11:10.

17. Manga kakiwal᷊o apa sarung ěndungang i kitẹ su pěngangěndungang tuhụe?

¹⁷ Ual᷊ingu su tal᷊oarang umatu Mawu orasẹ̌ ini bědang piạ taumata apang nilanisẹ̌, aramanung piạ piram baụ kakiwal᷊o tẹ̌tiněnang i kitẹ. (Why. 12:17) Contone, kerea taumata apang nilanisẹ̌ harusẹ̌ měmanda watangeng i sire? Mạeng su sidangu piạ u kimaěng borotẹ̌ dingangu něnginung anggorẹ̌ su Pẹ̌tatahěndungang, kerea caranu měkoạ si sie? Kụ, mạeng taumata apang něngakụ nilanisẹ̌ kakạtambane, apa i kitẹ harusẹ̌ guměnggang? Manga kakiwal᷊o ene sarung lahẹkang su pěngangěndungang tuhụe.