1, 2. Ndiéjunʼ rí phú mitsaanʼ nirígá nákha mbiʼi pentecostés tsiguʼ 33 rá.

NININDXU̱U̱ mbá miʼcha̱ domingo, náa ndxa̱a̱ Pentecostés tsiguʼ 33. Náa Jerusalén nikúwi̱i̱n mbá 120 discípulos náa mbá guʼwá rí maʼni a̱jma̱ piso (Hech. 1:13-15; 2:1). Nguáthá mbiʼi wapháá, Jesús niʼthún rí maguanún náa xuajen, numuu rí mundrígú mbá rí kiejunʼ wéñuʼ (Hech. 1:4, 5). Ndiéjunʼ nirígá rá.

² “Nda̱a̱ tsu̱ma̱ niwáán asndu mekhuíí, xóo mbá giñánʼ gakhi̱i̱ wéñuʼ, ga̱jma̱a̱ nito̱ʼo̱o̱ náa xúgíʼ guʼwá”. Ikhú discípulos ‹ndiyáá nikujmaa mbaʼa xóo raju̱ún riʼyu̱u̱ aguʼ› rí nigrigu náa edxu̱ún, ga̱jma̱a̱ “xúgínʼ nindrigú xi̱ʼ kaʼwu” (Hech. 2:2-4). Xígi̱ mitsaanʼ niʼni Jeobá rí nixnúún xi̱ʼ kaʼwu discípulos buʼko̱ (Hech. 1:8). Ikhiin ninindxu̱ún timbíin bi̱ nixtaʼwiin ga̱jma̱a̱ xi̱ʼ kaʼwu * ga̱jma̱a̱ bi̱ nikhánun rí mutañajunʼ gajmiún Jesús náa mekhuíí.

3. Náá numuu rí cristianos buʼko̱ ndiyáá kaʼwu rí nixtaʼwíin ga̱jma̱a̱ xi̱ʼ kaʼwu rá.

³ Á mu ikháanʼ ninindxa̱a̱ʼ mbáa rí ikhiin, nditháan xámbumaaʼ dí nirígá mbiʼi rúʼko̱. Nindxu̱u̱ xóo mbá raju̱ún dí riʼyu̱u̱ aguʼ rí nigrigu náa edxa̱ʼ, ga̱jma̱a̱ ikháán nitagíʼdi̱i̱ niratá i̱mba̱ ajngáa (Hech. 2:5-12). Matayaa gajkhun rí nixtiʼña̱nʼ ga̱jma̱a̱ xi̱ʼ kaʼwu. Mú, lá ikháá má xúʼko̱ káʼnii eʼni Dios mu maraʼwiin  ga̱jma̱a̱ xi̱ʼ kaʼwu bi̱ mutañajunʼ mekhuíí ráʼ. Na̱nguá. Xú káʼnii eʼyáá rá. Guʼyáá.

4. Nákha siglo timbá, lá mbeʼtha̱án nindrigú xi̱ʼ kaʼwu bi̱ kaxtaʼwíin mu magu̱u̱n mekhuíí ráʼ. Arathá.

⁴ Guʼyáá ginii nguáná rí mbáa naxtiʼyaaʼ ga̱jma̱a̱ xi̱ʼ kaʼwu. Bi̱ mbá 120 cristianos raʼkháa i̱ndó ikhiin ninindxu̱ún bi̱ nixtaʼwíin ga̱jma̱a̱ xi̱ʼ kaʼwu nákha Pentecostés tsiguʼ 33. Wakhííʼ má mbiʼi rúʼko̱, imbá 3,000 xa̱bu̱ nindrigú xi̱ʼ kaʼwu dí Jesús niʼthí makhánun. Mú ikhiin nindrigú xi̱ʼ kaʼwu índo̱ nijngún iyááʼ (Hech. 2:37, 38, 41). Mú nguáthá tsiguʼ nda̱wa̱á, raʼkháa xúgínʼ bi̱ kaxtaʼwíin nindrigú rí magu̱u̱n mekhuíí índo̱ nijngún iyááʼ. Samaritanos nixtaʼwíin nguáthá mbiʼi nda̱wa̱á rí nijngún iyááʼ (Hech. 8:14-17). Maski má i̱ndó ikhiin, Cornelio gajmíi̱n bi̱ kúwá náa goʼwóo nixtaʼwíin nákha xóó tséʼngúún iyááʼ (Hech. 10:44-48).

5. Xó má na̱ʼkha̱ raʼthí náa 2 Corintios 1:21, 22, ndiéjunʼ erigá índo̱ mbáa naxtiʼyaaʼ ga̱jma̱a̱ xi̱ʼ kaʼwu rá.

⁵ Rí xúgi̱ guʼyáá ndiéjunʼ erígá índo̱ mbáa naxtiʼyaaʼ ga̱jma̱a̱ xiʼ kaʼwu. Mbáa mbiʼi rúʼko̱, bi̱ kaxtaʼwíin naʼniún gakhii munimbu̱u̱n rí Jeobá niraʼwíin ga̱jma̱a̱ asndu nurajximíjna̱ náá numuu. Mú eʼwíinʼ mbáa i̱mba̱ núthu xóo eni. Tséʼniuu asndu xkáʼníí má, Apóstol Pablo niʼthí ndiéjunʼ eguáʼníin bi̱ naxtaʼwíin: “Nda̱wa̱á rí ikháanʼ ninimbala, nindrigúla sello * ga̱jma̱a̱ xi̱ʼ kaʼwu rí nijuiʼtá makhánala, rí nindxu̱u̱ xóo mbá rí kiʼninumáá mu mundrígu̱u̱ nda̱wa̱á” (Efes. 1:13, 14; nota). Jeobá najmuu xi̱ʼ kaʼwu ndrígóo mu masngájmuu kaʼwu bi̱ kixtiʼyaaʼ. Ikha jngó, xi̱ʼ kaʼwu nindxu̱u̱ mbá rí “naʼni mbuyáá” mu xúʼko̱ mbuyáá gajkhun rí nda̱wa̱á makuwá kámuu náa mekhuíí, raʼkháa náa tsu̱du̱u̱ ku̱ba̱ʼ (atraxnuu 2 Corintios 1:21, 22). *

6. Ndiéjunʼ rí ndayóoʼ maʼni mbáa bi̱ kixtiʼyaaʼ mu maʼga̱a̱ mekhuíí rá.

⁶ Á mu mbáa cristianos nindxu̱u̱ bi̱ nixtiʼyaaʼ  ga̱jma̱a̱ xi̱ʼ kaʼwu, lá rúʼko̱ nandoo gáʼthúu̱n rí gajkhun maʼga̱a̱ mekhuíí xáʼ. Na̱nguá. I̱ndó nandoo gáʼthúu̱n rí nixtiʼyaaʼ mu maʼga̱a̱ mekhuíí. Gíʼdoo rí marmáʼáan a̱jkiu̱u̱n rígi̱: “A̱ngui̱nʼ gu̱ni̱ tsiakimíjna mu makuwáanʼ gajkhun náa rí nixtaʼwáanʼla mu̱ʼgua̱a̱ʼ, numuu rí á mu nunila rígi̱, xájngutiguáanʼla nditháan” (2 Ped. 1:10). Ikha jngó, maski ajndu mbáa cristiano nixtiʼyaaʼ o nikhánúu rí maʼga̱a̱ mekhuíí, i̱ndó ma̱ndoo maʼga̱a̱ á mu nawi̱ji̱ jmbu (Filip. 3:12-14; Heb. 3:1; Apoc. 2:10).

7. Xú káʼnii eyáá bi̱ kaxtaʼwíin rí nindrigú rí magu̱u̱n mekhuíí rá.

⁷ Mú, xú káʼnii eʼyoo mbáa rí nixtiʼyá mu maʼga̱a̱ mekhuíí rá. Rí naxtiʼña̱a̱ nakujmaa kaʼwu náa ajngáa dí niʼnirámáʼ Pablo náa inún bi̱ kúwá náa Roma ga̱jma̱a̱ bi̱ “nijuiʼthúún mani̱ndxu̱ún bi̱ mikaʼwiin”. Niʼthúún: “Ikháanʼ tundrígú xi̱ʼ rí mani̱ndxa̱la yumbáá rí maʼni mamiñala mbu̱júu̱ʼ, ikháanʼla nindrígulá mbóoʼ xi̱ʼ rí mani̱ndxa̱la xóo e̱ji̱i̱n, xi̱ʼ rí naʼni muʼthá: ‹¡Abba, Anu̱ʼ!›. Ikhaa má xi̱ʼ naʼthúu̱n xi̱ʼ ndrígúlú rí ni̱ndxu̱lú e̱ji̱i̱n Dios” (Rom. 1:7; 8:15, 16). Ikha jngó, Dios nijmuu xi̱ʼ kaʼwu mu maʼni mbuyáá bi̱ kaxtaʼwíin rí nindrigú rí magu̱u̱n mekhuíí (1 Tes. 2:12).

8. Xó má naʼthí náa 1 Juan 2:20, 27, náá numuu nduʼyáá rí bi̱ kaxtaʼwíin tséyóoʼ má rí eʼwíínʼ mutún rí ikhiin ni̱ndxu̱ún bi̱ kaxtaʼwíin rá.

⁸ Jeobá naʼni rí bi̱ nidrígú rí magu̱ún mekhuíí xuni a̱jma̱ a̱jkiu̱ún (atraxnuu 1 Juan 2:20, 27). * Nakujmaa kaʼwu, ikhaa má xóo eʼwíinʼ cristiano, bi̱ kaxtaʼwíin mangiin nda̱ñúnʼ rí Jeobá maʼsngúún náa congregación. Mú tséyóoʼ má rí eʼwíinʼ mutún rí ikhiin ni̱ndxu̱ún bi̱ kaxtaʼwíin. Jeobá nijmuu tsiakii rí itháan mba̱a̱ náa xúgíʼ numbaaʼ rí nindxu̱u̱ xi̱ʼ kaʼwu mu masngájmún kaʼwu rí ikhiin ni̱ndxu̱ún bi̱ kaxtaʼwíin.

9. Ndiéjunʼ rí naxtiʼkhuu náa mbáa índo̱ naxtiʼyaaʼ ga̱jma̱a̱ xi̱ʼ kaʼwu ndrígóo Dios, xó má naʼthí náa Efesios 1:18 rá.

⁹ Rí mbiʼi xúgi̱ mbaʼin xa̱bi̱i̱ Dios naʼniún mingíjyúuʼ makru̱ʼu̱u̱n ndiéjunʼ egíʼnuu mbáa cristiano índo̱ Jeobá nda̱yáaʼ. Xúʼko̱ má gárígá, numuu rí Dios na̱nguá niraʼwíin mu makuwá mekhuíí. Dios niʼnii xa̱bu̱ numbaaʼ mu makuwá náa tsu̱du̱u̱ Ku̱ba̱ʼ, raʼkháa mekhuíí (Gén. 1:28; Sal. 37:29). Mú Jeobá niraʼwíin nguáthi̱i̱n mu magu̱u̱n gákuwá mekhuíí. Ikha jngó, índo̱ naxtaʼwíin, naxtiʼkhu̱u̱ mbá kayuuʼ xóo nundxa̱ʼwa̱míjna̱ ga̱jma̱a̱ nandún rí makuwá mekhuíí (atraxnuu Efesios 1:18). *

10. Ndiéjunʼ nandoo gáʼthúu̱n ‹magumáán nuxi̱ʼ› rá. (Atayáá ma̱ngaa nota).

¹⁰ Índo̱ mbáa cristiano naxtiʼyaaʼ ga̱jma̱a̱ xi̱ʼ kaʼwu, ‹nagumaa nuxi̱ʼ› o “nagumaa mbu̱júu̱ʼ”. * Jesús ma̱ngaa niʼthí rí mingíjyúuʼ maratha̱a̱n mbáa bi̱ na̱nguá kixtiʼyaaʼ xóo rí nakumu̱ún bi̱ “nagumiin rí nuxi̱ʼ” o bi̱ “nigumaa ga̱jma̱a̱ xi̱ʼ” (Juan 3:3-8; nota).

11. Ndiéjunʼ rí naʼni maxtiʼkhu̱u̱ rí nandxaʼwóo edxu̱u̱ bi̱ kixtiʼyá rá.

¹¹ Ndiéjunʼ rí naxtiʼkhuu xóo endxa̱ʼwáminaʼ bi̱ kixtiʼyaaʼ rá. Nákha ginii ikhaa nadxuu  gíʼthu̱u̱n rí maxtáa kámuu náa tsu̱du̱u̱ Ku̱ba̱ʼ. Ga̱jma̱a̱ ra̱ʼkhá tháán nandoo mbaʼyoo xú káʼnii Jeobá gáʼni̱i̱ mbá Ku̱ba̱ʼ mitsaanʼ ga̱jma̱a̱ maʼni gámbáa rí tséjmaa. Mbáa asndu naku̱mu̱u̱ xú káʼnii gágruiguíí mbáa bi̱ kaʼyoo o bi̱ nambájxu̱u̱ ga̱jma̱a̱. Mú, índo̱ nixtiʼyaaʼ, niriʼkhu̱u̱ xóo nandxa̱ʼwáminaʼ. Náá numuu rá. Raʼkháa numuu rí nánguá ni̱gu̱u̱ maxtáa náa tsu̱du̱u̱ Ku̱ba̱ʼ. Asndu má raʼkháa ga̱jma̱a̱ numuu rí naxmiéjuunʼ o ga̱jma̱a̱ numuu xkujndu rí gíʼdoo, ni má raʼkháa ga̱jma̱a̱ numuu rí naku̱mu̱u̱ rí maʼskhóo rí maxtáa kámuu mbiʼi náa tsu̱du̱u̱ Ku̱ba̱ʼ. Nindxu̱u̱ numuu rí Jeobá nijmuu xi̱ʼ kaʼwu mu mariʼkhu̱u̱ xóo endxaʼwóo edxu̱u̱ ga̱jma̱a̱ rí i̱mba̱ nuxi̱ʼ rí magiʼthu̱u̱n.

12. Xó má eʼthí 1 Pedro 1:3, 4, xú káʼnii eku̱mu̱u̱ cristiano bi̱ kixtiʼyaaʼ índo̱ nandxa̱ʼwáminaʼ rí gíʼthu̱u̱n rá.

¹² Cristiano bi̱ kixtiʼyaaʼ mbáa maku̱mu̱u̱ rí na̱nguá kaʼyoo rí makhánáá mbá ñajunʼ rí mba̱a̱, mú ndaʼyoo gajkhun rí Jeobá ndiyáaʼ. Rí phú naʼni, índo̱ nandxa̱ʼwáminaʼ ga̱jma̱a̱ numuu rí gíʼthúu̱n nda̱wa̱á, ra̱ʼkhá tháán nadxuu ga̱jma̱a̱ naxtáa gagi (atraxnuu 1 Pedro 1:3, 4). *

13. Ndiéjunʼ nundxa̱ʼwa̱míjna̱ bi̱ kaxtaʼwíin rí xóó kúwá náa tsu̱du̱u̱ Ku̱ba̱ʼ rá.

¹³ Lá rígi̱ nandoo gáʼthúu̱n rí bi̱ kaxtaʼwíin nandún rí makhañún ráʼ. Apóstol Pablo nariʼña̱a̱ graxe̱ rígi̱. Índo̱ niʼnimbrígui̱i̱ ga̱jma̱a̱ numuu mbáa bi̱ kixtiʼyaaʼ ga̱jma̱a̱ mbá guʼwá xtíin, niʼthí: “Bi̱ kuwáánʼlu náa guʼwá xtíin rígi̱ najmúlú ga̱jma̱a̱ kuwááʼlu gíná raʼkháa numuu rí tsíyulú muʼnijngudi̱i̱ guʼwá rígi̱, nindxu̱u̱ numuu rí nandulú i̱mba̱, mu rí ndaʼya maʼni gámbáa rí nakháñulú” (2 Cor. 5:4). Ikha jngó, raʼkháa numuu rí bi̱ kaxtaʼwíin nánguá eñún makuwíin náa numbaaʼ rígi̱ o nandún rí mambáa mbá nacha̱ rí xtáa rarígá. Rí ikhin nuni, nakúwi̱i̱n gagi ga̱jma̱a̱ nandún rí xúgíʼ mbiʼi rí kúwá muni ñajuunʼ Jeobá gajmiún bi̱ kúwá náa guʼwún ga̱jma̱a̱ bi̱ nambájxu̱u̱n gajmiún. Tséʼniuu má asndu ndiéjunʼ má dí kúwá runi, narmáʼáan má xúʼko̱ a̱jkiu̱ún dí kuáʼti̱i̱n nda̱wa̱á (1 Cor. 15:53; 2 Ped. 1:4; 1 Juan 3:2, 3; Apoc. 20:6).

14. Ndiéjunʼ rí tséraximínaʼ mbáa bi̱ kixtiʼyaaʼ ga̱jma̱a̱ xi̱ʼ kaʼwu rá.

¹⁴ Mbáa natrajximínaʼ á mu Jeobá niraʼwíin ga̱jma̱a̱ xi̱ʼ kaʼwu ndrígóo. Á mu xúʼko̱ ku̱ma̱a̱ʼ, gíʼdoo wéñuʼ numuu dí matani graxe̱ rígi̱: Lá nandoʼ mani itháan ñajuunʼ Dios ráʼ. Lá nataráʼa ga̱jma̱a̱ xúgíʼ a̱jkiu̱nʼ ráʼ. Lá naniguʼ wéñuʼ manigajmaa Biblia ga̱jma̱a̱ majmañuʼ “asndu dí rígá itháan mi̱jnu̱ʼ rí endxa̱ʼóo edxu̱u̱ Dios” rá. Lá nda̱yo̱o̱ rí Jeobá naʼni tsajkurámúúnʼ ga̱jma̱a̱ tsiakii rí nani náa nataráʼa ráʼ. Lá nda̱yo̱o̱ rí ndayóoʼ mambáñún eʼwíínʼ mu mambajxúun itháan májánʼ gajmiún Dios ráʼ. Lá ndi̱yo̱o̱ xóo nimbáyúʼ Jeobá mbaʼa nuthu ráʼ. (1 Cor. 2:10.) Á mu rí ikháán natriʼña̱a̱ rí xúʼko̱ nindxu̱u̱, lá rúʼko̱ nandoo gáʼthi rí ikháán nindxa̱a̱ʼ mbáa bi̱ maʼga̱a̱ mekhuíí ráʼ. Na̱nguá, numuu rí xúgínʼ xa̱bi̱i̱ Jeobá tséʼniuu má á mu kaxtaʼwíin o na̱nguá, ma̱ndoo maku̱mu̱ún xóo nakuma̱a̱ʼ ikháán. Jeobá ma̱ndoo majmuu xi̱ʼ kaʼwu ndrígóo mu maxnún tsiakii xúgínʼ xa̱bi̱i̱, tséʼniuu má náá guáʼthi̱i̱n makuwá. Á mu ikháán tsítayáá májánʼ á mu nindxa̱a̱ʼ bi̱ kixtiʼyaaʼ, rúʼko̱ eyoo gáʼthi rí na̱nguá. Bi̱ kaxtaʼwíin tséraximíjna̱ á mu magu̱u̱n mekhuíí; ¡ikhiin nduyáá májánʼ rí magu̱u̱n mekhuíí!

15. Náá numuu eʼyáá dí raʼkháa xúgínʼ bi̱ nundrigú xi̱ʼ kaʼwu ma̱ndoo magu̱u̱n mekhuíí rá.

 ¹⁵ Náa Biblia na̱ʼkha̱ raʼthí ga̱jma̱a̱ numún mbaʼin xa̱bu̱ bi̱ niguájun jmbu bi̱ nindrigú xi̱ʼ kaʼwu, mú na̱nguá guáʼti̱i̱n rí magu̱u̱n mekhuíí. Mbá xkri̱da, David nixnúu ikha xi̱ʼ kaʼwu (1 Sam. 16:13). Rígi̱ nimbáyúu mu makro̱ʼo̱o̱ májánʼ ga̱jma̱a̱ numuu Jeobá ma̱ngaa nixnúu ikha mu maʼnirámáʼ mbaʼa níʼkhóo Biblia (Mar. 12:36). Maski ajndu xúʼko̱, apóstol Pedro niʼthí rí David “tátsimuu mekhuíí” (Hech. 2:34). Ga̱jma̱a̱ rí Juan Bi̱ Nakumíínʼ iyááʼ xa̱bu̱ “magiʼdoo xi̱ʼ kaʼwu” (Luc. 1:13-16). Ga̱jma̱a̱ mínaaʼ má Jesús niʼthí: “Táxtáa nimbáa bi̱ itháan giʼnii ki xóo Juan Bi̱ Nakumíínʼ iyááʼ xa̱bu̱”. Maski ajndu xúʼko̱, niʼthí rí Juan xáʼga̱a̱ mekhuíí mu maʼtáñajunʼ náa Reino (Mat. 11:10, 11). Jeobá nijmuu xi̱ʼ kaʼwu mu maxnún tsiakii xa̱bi̱i̱ bugi̱ mu muni mbá rí mitsaanʼ wéñuʼ, mú na̱nguá nijmuu maraʼwíin mu magu̱u̱n mekhuíí. Lá nandoo gáʼthúu̱n rúʼko̱ rí na̱nguá ninindxu̱ún xa̱bu̱ jmbiin o rí na̱nguá ejmiin mu magu̱u̱n mekhuíí xáʼ. Na̱nguá, I̱ndó nandoo gáʼthúu̱n rí Jeobá maʼni rí makuwá mbu̱júu̱ʼ náa Ku̱ba̱ʼ mitsaanʼ (Juan 5:28, 29; Hech. 24:15).

16. Náá guáʼthi̱i̱n makuwíin mbaʼin xa̱bi̱i̱ Dios rí mbiʼi xúgi̱ rá.

¹⁶ Mbaʼin bi̱ nuni ñajuunʼ Jeobá rí mbiʼi xúgi̱ xágu̱u̱n mekhuíí. Xó má Abrahán, David, Juan Bi̱ Nakumíínʼ iyááʼ xa̱bu̱ ga̱jma̱a̱ eʼwíínʼ xa̱bekha mangiin gu̱ʼu̱ bi̱ nikúwá wajyúuʼ, nandún makuwá náa tsu̱du̱u̱ Ku̱ba̱ʼ náa gáʼtañajunʼ Reino ndrígóo Dios (Heb. 11:10).

17. Xú káʼnii graxe̱ gáxti̱ʼña̱a̱ náa imbo̱ʼ artículo rá.

¹⁷ Xóó naguanún tikhun bi̱ kaxtaʼwíin náa tsu̱du̱u̱ Ku̱ba̱ʼ. Ikha jngó xígi̱ nurajximíjnalu xígi̱ káʼnii (Apoc. 12:17). Mbá xkri̱da, xú káʼnii gíʼmaa mbuʼyamijná bi̱ kaxtaʼwíin rá. Á mu mbáa bi̱ xtáa náa congregación ndrígúlú nagíʼdu̱u̱ na̱ʼkhu̱ pan ga̱jma̱a̱ naʼga̱a̱n vino náa Conmemoración, xú káʼnii gíʼmaa muʼni̱i̱ xá. Ga̱jma̱a̱ á mu rí mámbá tsiguʼ na̱jkha̱ raʼni itháan mbaʼin bi̱ nuthi rí magu̱u̱n mekhuíí, lá gíʼmaa maxmiéjunlú ráʼ. Náa imbo̱ʼ artículo maxtiʼña̱a̱ graxe̱ rígi̱.