1-2. Ka kwagh u kpilighyol u nyi yange er sha iyange i Pentekosti u inyom i 33 laa?

YANGE sev hungwa av ken Yerusalem sha iyange i Lahadi ken inyom i 33 la; iyange ne lu iyange i Pentekosti. Mbahenen mba kuman iyenge er 120 nahan kohol sha kpoyou u sha u iyou igen. (Aer. 1:13-15; 2:1) Ken ayange kpuaa a karen ken ijime cii ve iyange ne la, Yesu kaa a ve ér ve lu ken Yerusalem sha ci u gba u a na ve iyua i injaa igen. (Aer. 1:4, 5) Nahan lu nyi i ere?

² “Ica i gbe ga yô, ihyuran due sha aôndo, er ahumbe a taver nga a toon nahan.” Ihyuran la iv iyou la cii. Maa kwagh va tema mbahenen mbara sha mto “er ka iniomborusu nahan,” ve cii “ve iv a icighan jijingi.” (Aer. 2:2-4) Kape Yehova na ior mbara icighan jijingi na sha gbenda u kpilighyol je la. (Aer. 1:8) Mbahenen mban maa hingir ior mba hiihii mba i shighe ve mkurem shin i tsegha ve sha icighan jijingi * shi i na ve ishimaverenkeghen i za hemen vea Yesu sha yô.

3. Er nan ve lu u ior mba ve lu sha iyange i Pentekosti la vea hen a hen ér icighan jijingi tsegha ve ga?

³ Luun er u lu môm ken mbahenen mba yange ve kumba sha kpoyou u sha, sha iyange shon la yô, ma u tsa ma u hungur a kwagh la ga. U shi umbur er yange kwagh va tema u sha ityo er  nomborusu nahan, maa u hii u lamen ken zwa ugen yô! (Aer. 2:5-12) Yange ma u fa dedoo a akperan shio je wer icighan jijingi tsegha u shin i shighe u mkurem. Kpa ior mba icighan jijingi a tsegh ve la cii kwagh ne ngu a er ve sha ma gbenda u kpilighyol, shin hen shighe mômô? Ei. Er nan se fe nahana?

4. Mbakristu mba yange i shighe ve mkurem sha ayange a mbaapostoli la cii yange i shighe ve hen shighe mômô? Ta iwanger.

⁴ De se ôr ase kwagh u shighe u a fatyô u tseghan or la. Ka mbahenen mba 120 la tseegh yange i tsegha ve sha iyange i Pentekosti u inyom i 33 la ga. Sha iyange shon la je, iorov mbagen mba kuman 3,000 nahan ngohol icighan jijingi. Yange mba eren ve batisema je maa icighan jijingi tsegha ve. (Aer. 2:37, 38, 41) Kpa ken anyom a a dondo la, lu Mbakristu mba i shighe ve mkurem cii i tsegha ve shin i shighe ve mkurem hen shighe u ve er batisema la ga. Ior mba ken Samaria yange ve er batisema shighe kar cii ve i va tsegha ve shin i shighe ve mkurem ye. (Aer. 8:14-17) Shi Korneliu vea tsombor na di gbenda u i tsegha ve shin i shighe ve mkurem la lu kposo a ior mbagen cii. Yange i shighe ve mkurem cii ve, ve er batisema ye.—Aer. 10:44-48.

5. Takerada u 2 Mbakorinte 1:21, 22 tese ér ka nyi ka i er zum u i tsegh or sha icighan jijingi?

⁵ Shi se nenge ase kwagh u ka a er zum u i tsegh or sha icighan jijingi shin i shigh nan mkurem la. Alaghga sha hiihii la a taver mbagen mba i tsegh ve la u lumun ér Yehova tsua ve. Alaghga vea pine ér, ‘Er nan Aôndo a tsuama?’ Mbagen yô, alaghga a lu ve nahan ga. Aluer ka nahan shin ka nahan ga kpa, apostoli Paulu yange pase kwagh u ka a er hanma or shighe u i tsough nan yô. A kaa ér: “Ne mba ne jighjigh yô, i ver ne ikyav * sha icighan jijingi u yange i tôndo zwa u nan ne la, jijingi la ka ibumun i i tsenga nan se sha kwagh u dyako wase” yô. (Ef. 1:13, 14) Nahan Yehova ngu a er tom a icighan jijingi na u pasen Mbakristu mban wang ér un tsua ve. Sha nahan yô, icighan  jijingi ka “ibumun” i i ne ve ér ken hemen yô, vea va za lu uma gbem sha won sha, a lu shin tar ga yô.—Ôr 2 Mbakorinte 1:21, 22.

6. Ka nyi i gbe u Orkristu u i shigh nan mkurem la nana er ve nana zua a injar i yemen sha laa?

⁶ Aluer i shighe Orkristu mkurem yô, maa tese ér kwagh u bunden nan u yemen sha kera ngu gaa? Ei. Ka mimi, nan fa wang ér i tsua nan u yemen sha. Nahan kpa, gba u nana umbur kwaghwan ne. A kaa ér: “Anmgbianev, lu nen a gbashima i hemba ave a tse, sha er kwagh u i yer ne shi i tsough ne sha u ne̱ lu la, una kar ne ga yô. Gadia aluer ne za hemen u eren akaa ne yô, mayange ne gba ga.” (2 Pet. 1:10) Kwagh ne tese ér aluer i tsua or u yemen sha kpa, saa nana za hemen u tilen sha mimi ve nana zua a injar la ye.—Fil. 3:12-14; Heb. 3:1; Mpa. 2:10.

7. Ka i er nan ve or fa ér i tsua nan ér nana yem sha?

⁷ Ka i er nan ve or fa ér i tsua nan u yemen sha? Se fatyô u zuan a mlumun sha mpin ne ken kwagh u Paulu nger hen Mbakristu mba ken Roma mba ‘i yila ve sha u ve lu uicighanmbaiorov la.’ Yange kaa a ve ér: “Ne ngohol ka jijingi u lun ken kpan, sha u ne hide shi ne lu ken mcie ga, kpa ne ngohol ka jijingi u hingir ônov; man ka sha jijingi shon kpaa se yilan ser: ‘Aba, Tere!’ ye. Jijingi la iyol na ka a er shiada vea jijingi wase ér se mba ônov mba Aôndo.” (Rom. 1:7; 8:15, 16) Nahan Yehova ngu a er tom a icighan jijingi na u pasen mba i tsegh ve la wang je ér un yila ve u yemen sha.—1 Tes. 2:12.

8. Ka sha nyi gbenda nahan 1 Yohane 2:20, 27 a tese ér gba u Mbakristu mba i tsegh ve la vea kegh ér orgen nana pase ve ér i tsegha ve ga?

⁸ Zum u Yehova a tsough or ér nana yem sha yô, ngu a pase nan kwagh ne wanger wanger sha er nana lu a akperan ken ishima ga yô. (Ôr 1 Yohane 2:20, 27.) Mbakristu mba i tsegh ve la kpa ka i gba u vea ngohol ityesen i Yehova sha ikyev i tiônnongo di vough er ior mbagen nahan. Kpa u ngu wer ka orgen ka i gba u nana pase ve ér mimi mimi je i shighe ve mkurem ga. Yehova ngu a pase ve wang sha ikyev i icighan jijingi na u a lu tahav mbu hemban sha won cii la ér un shighe ve mkurem!

9. Er i pase ken Mbaefese 1:18 nahan, ka nyi ka i gema ken or zum u Aôndo a shigh nan mkureme?

⁹ Mbacivir Aôndo nyian kpishi ka i taver ve u kaven kwagh u ka a er or zum u Aôndo a shigh nan mkurem yô. Er nan ve kwagh ka a lu nahana? Ka sha ci u ve i tsegha ve ga. Aôndo yange gba uumace ér ve lu uma gbem sha won shin tar, ka sha ga. (Gen. 1:28; Ps. 37:29) Kpa Yehova tsua mbagen ér ve yem ve za lu sha. Nahan ka una tseghan ve yô, a gema ishimaverenkeghen ve kua gbenda u ve henen kwagh la sha gbenda u vesen. Kwagh ngu a luun nahan yô, maa ve lu a ishimaverenkeghen i yemen sha.—Ôr Mbaefese 1:18.

10. Aluer i kaa ér ‘i hide i mar or’ yô, inja i kwagh la ér nyi? (Nenge ngeren u shin kpe la kpaa.)

¹⁰ Ka a tsegha Orkristu sha icighan jijingi yô, ‘i hide i mar nan’ shin i “mar nan sha.” * Yesu kpa yange tese ér aluer i shighe or mkurem ga yô, a pase nan er ka “a hide a mar” or shin a ‘mar nan sha jijingi’ ve i lu la kpa nana kav ga.—Yoh. 3:3-8; ngeren u shin kpe.

11. Pase er ka a tsegha or ve gbenda u nan henen kwagh la u gema yô.

¹¹ Ka a shighe Orkristu mkurem yô, gbenda u nan henen kwagh la u gema nena? Cii man Yehova tsegha Mbakristu mban shin shighe ve mkurem yô, ve vande lun a ishimaverenkeghen i lun uma gbem sha won shin tar, shi ishimaveren  la doo ve kpishi. Yange ve lu veren ashe tsung keghen shighe u Yehova una bee a hanma iferkwagh kera shi una gema tar ua hingir paradiso la. Alaghga je yô, ve ta ashe ve nenge er vea lu keghen or u hen tsombor ve shin ijende ve gbenda shighe u a nder nan shin ku yô. Kpa mba va shighen ve mkurem yô, gbenda u ve henen kwagh la gema. Er nan kwagh a lu nahana? U ngu wer kwagh u va lun uma gbem sha won shin tar la yange kuma ve ga ze. Lu sha ci u ve ya ican kpishi shin ve ure, nahan ve kera soo ishimaverenkeghen i va lun uma shin tar la ga ze. Yange ve nder kpoo tsô maa ve hii u henen ér kwagh u va lun uma gbem sha won shin tar la, una va due ve ishima ga. Lu Yehova er tom a icighan jijingi na u geman gbenda u ve henen kwagh la, kua ishimaverenkeghen i doon tsung i ngise ve lu a mi la ye.

12. Takerada u 1 Peteru 1:3, 4 tese ér ka i lu mba i shigh ve mkurem la ken ishima nena sha ishimaverenkeghen ve laa?

¹² Alaghga or u i shigh nan mkurem la nana nenge ér nan kuma u zuan a ian i icivirigh i injaa ne ga. Nahan kpa shighe môm nan henen a hen ér shin i tsua nan mimi je-o, ga. Ka nana hen sha kwagh u ishimaverenkeghen la yô, nan iv a iember ken ishima kpishi shi nan lu a iwuese kpaa.—Ôr 1 Peteru 1:3, 4.

13. Mba i shigh ve mkurem mbara mba nengen uma ve u shin tar ne nena?

¹³ Nahan kwagh ne tese ér ka i sar mba i shigh ve mkurem la u kpene? Apostoli Paulu na mlumun sha mpin la. Yange tôô iyol ve i inyam man awambe la kar sha tenti, maa kaa ér: “Jighilii yô, se mba se lu ken tenti shon ne se mba kinen shi ishima ngi nyian se tsung, sha ci u se soo u eren ngun kera ga, kpa se gema se soo u haan ugen la iyol, sha er uma una mena kwagh u a kpen ne yô.” (2 Kor. 5:4) Mbakristu mban vôr a uma u shin tar ne ga, shi sar ve u kpen kera fese ga. Kpa doo ve u lun uma shi ve soo ér vea civir Yehova hanma iyange a tsombor ve kua azende a ve. Nahan kpa, ka a lu nyi vea eren je kpa ve umbur ishimaverenkeghen i vesen i ve lu a mi sha kwagh u ken hemen la.—1 Kor. 15:53; 2 Pet. 1:4; 1 Yoh. 3:2, 3; Mpa. 20:6.

14. Ka akaa a nyi nahan aa er or kpa a lu ikyav i tesen ér icighan jijingi tsua nan u yemen sha ga?

¹⁴ Alaghga u ngu henen a hen wer i shighe u mkurem shin i tsegha u sha icighan jijingi. Aluer kwagh ngu nahan yô, hen ase sha mbampin mba vesen mban: Ka i sar u tsung u eren ishima i Yehova? U nenge wer u ngu a gbashima sha tom u pasen kwagh kpishi? Ka i doo u u timen ken Mkaanem ma Aôndo kpishi shi tôvon fan “mbamhen mba Aôndo mba ve cimin” laa? (1 Kor. 2:10) U nenge wer Yehova ver tom wou u pasen kwagh la doo doo, akaa a doon tsung due kere? Ka u nenge wer gba hange hange u u nôngo kwagh tsung u wase mbagen ve fa Yehova? U nenge a akav jighilii ken uma wou a a tese u ér Yehova wase u sha igbenda kpishi yôô? Aluer u na ikyar sha mbampin mban cii wer een yô, kwagh la maa tese ér we kpa i tsua u ér u yem shaa? Ei, tese nahan ga. Sha ci u nyi? Sha ci u hanma or u civir Aôndo cii nana fatyô u henen akaa ne ken ishima, aluer i tsua nan u yemen sha shin i tsua nan ga kpaa. Shi Yehova una fatyô u nan hanma or u civir un cii tahav mbu eren akaa ne sha ikyev i icighan jijingi na, aluer nan ngu veren ishima u va yemen sha shin va lun shin tar kpaa. Jighilii je yô, aluer u ngu henen a hen wer i shighe u mkurem u yemen sha yô, kwagh la maa tese jighilii je ér i tsua u ga. Mba Yehova a tsough ve u yemen sha la mba henen a hen ga! Ka ve fa kwagh ne wang!

15. Er nan se fe ser ka hanma or u Aôndo a ne nan icighan jijingi cii i tsough nan u yemen sha ga?

 ¹⁵ Bibilo ôr kwagh u ior mba jighjigh mba sha ayange a tsuaa mba yange ve ngohol icighan jijingi yô; nahan kpa, ve lu a ishimaverenkeghen i yemen sha ga. Icighan jijingi yange hemen Davidi. (1 Sam. 16:13) Icighan jijingi yange wase un u kaven akaa a zan shimi sha kwagh u Yehova, shi mgbegha un u ngeren mtom ma Bibilo ma gen. (Mar. 12:36) Nahan cii kpa apostoli Peteru kaa ér Davidi “kôndo yem sha ga.” (Aer. 2:34) Yohane u eren Batisema kpa yange i “iv un a icighan jijingi.” (Luka 1:13-16) Yesu yange kaa ér or môm lu u hemban Yohane ga, nahan kpa shi kaa ér Yohane ngu môm ken mba yemen sha Tartor u sha ga. (Mat. 11:10, 11) Yehova yange na ior mba se ter ve mban agee sha ikyev i icighan jijingi ve er akaa a kpilighyol, nahan kpa kera tsegha ve sha jijingi shon ér ve yem sha ga. Kwagh ne tese ér jighjigh ve yange yina sha u mba i tsough ve u za hemen sha laa? Ka nahan ga cii. Kwagh la tese di tsô ér Yehova una va nder ve vea hide a lu uma ken Paradiso shin tar.—Yoh. 5:28, 29; Aer. 24:15.

16. Ka ishimaverenkeghen i nyi mbacivir Aôndo nyian kpishi ve lu a mi?

¹⁶ Ikpelaior ken mba ve lu civir Aôndo shin tar nyian la mba a ishimaverenkeghen i va yemen sha ga. Mba veren ashe u va lun uma shin tar shighe u Tartor u Aôndo ua lu hemen ve la, di vough er Aberaham man Sara man Davidi kua Yohane u eren Batisema man nomso man kasev mbagen kpishi sha ayange a i ngeren Bibilo la nahan.—Heb. 11:10.

17. Ka nyi se lu timen sha mi ken ngeren u a dondo ne?

¹⁷ Nahan cii kpa er asande a mba i shigh ve mkurem la a lu civir Aôndo a vese imôngo shin tar her yô, alaghga se lu a mbampin sha kwagh ve. (Mpa. 12:17) Ikyav i tesen yô, doo u mba i shigh ve mkurem la vea nengen ayol a ve nena? Aluer or u ken tiônnongo wou hii u yan beredi shi man wain shighe u M-umbur yô, doo u u eren kwagh a nan nena? Man aluer iyenge i mba ve kaa ér i shighe ve mkurem la ngi seer a seer yô, doo u ishima ia za u iyol sha kwagh shono? Se na mlumun sha mbampin mban ken ngeren u a dondo ne.