1-2. Naa dui dia diambo diakasalema lushi la Pɛntɛkɔsta 33 T.D.?

TEKƆ la Jɛrusalɛma Lushi la lomingu la pindju, lo ɔnɔnyi wa 33 T.D., lushi la Pɛntɛkɔsta. Olui w’ambeki oko 120 ntshumana lo luudu lɔmɔtshi la laadiko. (Ets. 1:13-15; 2:1) Nshi ngana la ntondo ka laasɔ, Yeso akawatɛ dia ntshikala la Jɛrusalɛma nɛ dia vɔ waki suke la nongola woshasha ɔmɔtshi wa laande. (Ets. 1:4, 5) Kakɔna kambotomba oma laasɔ?

² “Mbala kakɔ ɔtɔi, londjo la[mb]okɛma oma l’olongo oko watɔpɛpaka lɔpɛpɛ la wolo.” Londjo lambokɛma lo luudu l’otondo. Oma laasɔ, “nemi yele oko ya dja” yambɛnama laadiko di’ɛtɛ w’ambeki, ndo vɔ tshɛ “wa[mbo]lodiama la nyuma k’ekila.” (Ets. 2:2-4) Lo yoho ya diambo shɔ mbambotshulwɛ Jehowa olui w’anto asɔ nyuma kande k’ekila. (Ets. 1:8) Vɔ wambonga anto wa ntondo wambokitama nyuma k’ekila * ndo wambowosha elongamelo ka toolɛ kaamɛ la Yeso l’olongo.

3. Lande na kele wanɛ waki lo Pɛntɛkɔsta komonga la taamu dia kana vɔ wakakitama nyuma k’ekila?

³ Otondonga ndo wɛ mbaki l’atei w’ambeki wakatshumana lo luudu la la diko lushi lɔsɔ, ondo totoyohɛ dui sɔ. Ɛngɔ kɛmɔtshi kele oko lolemi la dja kakayahema l’ɔtɛ ayɛ ndo wɛ akatatɛ ntɛkɛta l’ɛtɛkɛta ekina! (Ets. 2:5-12) Totoyoyaoka ambola  dia mbeya dia kana wɛ akakitama nyuma k’ekila. Ko, onde anto tshɛ wakitama nyuma k’ekila nongolaka leeta lawɔ lo yoho ya diambo ndo l’etena kakɔ kaamɛ lo lɔsɛnɔ lawɔ? Ndooko. Ngande weyaso dui sɔ?

4. Onde akitami wa lo ntambe ka ntondo tshɛ wakalongola leeta l’etena kakɔ kaamɛ lo lɔsɛnɔ lawɔ? Lembetshiya.

⁴ Nyɛsɔ tɔsɛdingole etena konga onto okitami. Aha olui w’Akristo oko 120 asɔ ato mbakakitama nyuma k’ekila lo Pɛntɛkɔsta, 33 T.D. L’ɔkɔngɔ diko lushi lɔsɔ, anto akina oko 3 000 wakalongola nyuma k’ekila. Vɔ wakakitama nyuma etena kakawalongola batisimu. (Ets. 2:37, 38, 41) Koko lo ɛnɔnyi wakayelana, aha Akristo w’akitami tshɛ mbakakitama nyuma etena kakawabatizama. Ase Samariya wakonge akitami l’etena kɛmɔtshi l’ɔkɔngɔ wa batisimu kawɔ. (Ets. 8:14-17) Ndo kɛnɛ kaki dui dia laande l’etena kɛmɔtshi ele woho wakakitama Kɔnɛliyo la ase luudu lande nyuma ntondo ka kaanga vɔ batizama.​—Ets. 10:44-48.

5. Lo ndjela 2 Kɔrɛtɔ 1:21, 22, kakɔna keta naka onto ɔmɔtshi ambokitama nyuma k’ekila?

⁵ Nyɛsɔ tɔsɛdingole nto kɛnɛ keta naka onto ɔmɔtshi ambokitama nyuma k’ekila. Ondo akitami amɔtshi koka monga l’okakatanu l’etatelo dia mbetawɔ dia Jehowa ambaasɔna. Vɔ koka ndjambola ɔnɛ: ‘Lande na kambɔsɔna Nzambi dimi?’ Ondo akina hawoyambola ngasɔ. Oyadi woho akɔna wayaoka onto, ɔpɔstɔlɔ Pɔɔlɔ akalembetshiya kɛnɛ kasalema le onto tshɛ lele okitami ate: “L’ɔkɔngɔ wa nyu monga la mbetawɔ, nyu nyakadjama tshapa * lo tshimbo yande la nyuma k’ekila kakalakema kele ɔkɔlɛ watoshikikɛ [la ntondo] dia tayokondja etenyi kaso k’okitɔ.” (Ɛf. 1:13, 14; nɔtɛ) Diakɔ diele, Jehowa kambaka la nyuma kande dia mɛnya Akristo asɔ hwe ɔnɛ vɔ wambɔsɔnama. Lo nsala ngasɔ, nyuma k’ekila kekɔ “ɔkɔlɛ [ɛngɔ ka lotshungɛ kana daka]” diawashikikɛ ɔnɛ lo nshi yayaye vɔ wayɔsɛna pondjo pondjo l’olongo, koko aha la nkɛtɛ.​—Adia 2 Kɔrɛtɔ 1:21, 22.

6. Kakɔna kahomba Okristo w’okitami nsala dia nongola difuto diande dia l’olongo?

 ⁶ Naka Okristo ekɔ okitami, kete laasɔ weho akɔ tshɛ nde ayolongola difuto diande dia l’olongo? Ndooko. Nde ekɔ l’eshikikelo dia nde akasɔnama dia ntshɔ l’olongo. Koko, nde pombaka mbohɔ ɔhɛmwɛlɔ ɔnɛ: “Analengo le, nyoleke mbidja etete k’efula dia nkukutɛ diɛsɛ diele la nyu dia mbelamɛ ndo sɔnama, nɛ dia naka nyu ntetemala nsala akambo asɔ, kete hanyɔkɔki pondjo.” (2 Pe. 1:10) Diakɔ diele, kaanga naka Okristo w’okitami akasɔnama kana akelamɛ dia ntshɔ l’olongo, nde ayolongola difuto diande paka naka nde ntshikala la kɔlamelo.​—Flpɛ. 3:12-14; Hɛb. 3:1; Ɛny. 2:10.

7. Ngande weya akitami dia vɔ wambolongola leeta la ntshɔ l’olongo?

⁷ Ko ngande weya onto dia nde ambolongola leeta la ntshɔ l’olongo? Sho tanaka okadimwelo wa hwe l’ɛtɛkɛta wa Pɔɔlɔ wakandafundɛ ase Rɔmɔ ‘wakelamɛ ekilami.’ Nde akawatɛ ate: “Nyu konongola nyuma ka lɔhɔmbɔ kanyosha wɔma nto, koko nyakalongola nyuma kanyetɛ ana. L’ekimanyielo ka nyuma kakɔ mbataso la dui dia wolo shate: ‘Aba, Papa!’ Nyuma tɔamɛ shikikɛka kaamɛ la nyuma kaso dia tekɔ ana wa Nzambi.” (Rɔmɔ 1:7; 8:15, 16) Ɔnkɔnɛ, lo tshimbo ya nyuma k’ekila, Nzambi salaka di’akitami mɛna hwe ɔnɛ vɔ wambolongola leeta l’otsha l’olongo.​—1 Tɛs. 2:12.

8. Ngande wɛnya 1 Joani 2:20, 27 ɔnɛ Akristo w’akitami bu l’ohomba w’anto akina mbashikikɛ ɔnɛ vɔ wekɔ akitami?

⁸ Jehowa salaka dia minya taamu lo timba ndo l’etema wa wanɛ walongola leeta la ntshɔ l’olongo. (Adia 1 Joani 2:20, 27.) Lo mɛtɛ, Akristo w’akitami pombaka mbetshama oma le Jehowa lo tshimbo y’etshumanelo oko anto akina tshɛ. Koko vɔ bu l’ohomba w’onto ɔmɔtshi mbashikikɛ ɔnɛ vɔ wekɔ akitami. Jehowa kambaka la wolo ande waaheme l’andja w’otondo, mbuta ate nyuma k’ekila dia mbaɛnya hwe ɔnɛ vɔ wekɔ akitami!

9. Etena konga onto okitami, otshikitanu akɔna woonga le onto ɔsɔ oko wotamidiɔ lo Ɛfɛsɔ 1:18?

⁹ Ekambi wa Nzambi efula wa nshi nyɛ mbeyaka monga l’okakatanu dia nshihodia kɛnɛ keta le onto ɔmɔtshi naka Nzambi ambɔsɔna oko okitami. Ekɔ ngasɔ nɛ dia vɔamɛ bu akitami. Nzambi akatonge anto dia vɔ sɛnaka pondjo pondjo la nkɛtɛ, koko aha l’olongo. (Eta. 1:28; Os. 37:29) Koko Jehowa ekɔ lo nsɔna anto amɔtshi dia tɔsɛna l’olongo. Diakɔ diele, etena kaasɔnande, nde tshikitanyaka elongamelo kawɔ ndo ekanelo kawɔ mbala kakɔ ɔtɔi, dia vɔ kongɛɛ l’asolo walomɔlomɔ dia tɔsɛna l’olongo.​—Adia Ɛfɛsɔ 1:18.

10. Kakɔna kalembetshiya “mbotɔ nto”? (Enda ndo nɔtɛ.)

¹⁰ Etena kakitama Akristo nyuma k’ekila, vɔ ‘mbotɔka nto’ kana “mbotɔ[ka] oma la diko.” * Yeso akɛnya nto dia ekɔ dui dia wolo nembetshiya dimɛna onto ɔmɔtshi lele bu okitami kɛnɛ kalembetshiya “mbotɔ nto,” kana “[mb]otɔ oma le nyuma.”​—Jni. 3:3-8; nɔtɛ.

11. Lembetshiya otshikitanu wasalema lo yimba etena konga onto ɔmɔtshi okitami.

¹¹ Otshikitanu akɔna wonga lo yimba etena koonga Akristo akitami? Ntondo ka Jehowa nkita Akristo asɔ nyuma, vɔ ngɛnangɛnaka elongamelo ka nsɛna pondjo pondjo la nkɛtɛ. Vɔ kongɛɛka l’asolo walomɔlomɔ etena kayonya Jehowa awui wa kɔlɔ tshɛ ndo kayondokadimola nkɛtɛ paradiso. Ondo vɔ wakakanyiyaka  woho wayowolongola ose nkumbo kawɔ kana ɔngɛnyi awɔ ɔmɔtshi lakavu. Koko l’ɔkɔngɔ wa vɔ kitama nyuma, vɔ ndjotatɛka nkanyiya woho okina. Lande na? Aha ɔnɛ vɔ wakɔsaka elongamelo ka nsɛna la nkɛtɛ oko dui di’anyanya. Vɔ kotshikitanya ekanelo kawɔ l’ɔtɛ w’ekiyanu kana l’ɔtɛ wakawasowaka efula. Vɔ kombɔsa yɛdikɔ la shashimuya lo mɛna ɔnɛ nsɛna la nkɛtɛ pondjo pondjo howangɛnyangɛnya. Koko, Jehowa akakambe la nyuma kande dia ntshikitanya woho wakanyiyawɔ ndo elongamelo kɔsawɔ la nɛmɔ kɛsɔ.

12. Lo ndjela 1 Petero 1:3, 4, ngande wayaoka Akristo w’akitami lo kɛnɛ kendana l’elongalo kawɔ?

¹² Onto ɔmɔtshi lambonga okitami mbeyaka mbɔsa dia nde hasungana nongola diɛsɛ dia diambo sɔ. Koko, nde hadje taamu kaanga yema ɔnɛ Jehowa hɔsɔnyi. Otema ande ndolaka tɔɔ l’ɔngɛnɔngɛnɔ ndo la lowando etena kakanyiyande elongamelo kande ka lo nshi yayaye.​—Adia 1 Petero 1:3, 4.

13. Ngande wayaoka akitami lo kɛnɛ kendana la lɔsɛnɔ lawɔ la lanɛ la nkɛtɛ?

¹³ Ko onde dui sɔ nembetshiyaka ɔnɛ akitami nangaka mvɔ? Ɔpɔstɔlɔ Pɔɔlɔ mbishaka okadimwelo lo dimbola sɔ. Nde akɛdika demba diawɔ di’emunyi la luudu la dipɛma ndo akate ate: “Lo mɛtɛ, sho wanɛ wele lo luudu la dipɛma lɔnɛ tekɔ lo nkuma akumu, tele la ekiyanu efula nɛ dia sho hatolange likolola, koko sho nangaka ndɔta lokina, dia lɔsɛnɔ mɛna kɛnɛ kavɔ.” (2 Kɔr. 5:4) Akristo asɔ hawoshisha nsaki ka nsɛna lɔsɛnɔ la lanɛ la nkɛtɛ lo nyanga dia lishisha esadi eto. Koko, vɔ ngɛnangɛnaka la lɔsɛnɔ ndo nangaka nkamba la lɔ lushi tshɛ dia kambɛ Jehowa kaamɛ la nkumbo ndo angɛnyi awɔ. Oyadi kakɔna tshɛ kasalawɔ, mbala tshɛ vɔ mbohɔka elongamelo ka dimɛna efula kele la wɔ lo nshi yayaye.​—1 Kɔr. 15:53; 2 Pe. 1:4; 1 Jni. 3:2, 3; Ɛny. 20:6.

14. Kakɔna kahɛnya ɔnɛ onto ɔmɔtshi akakitama nyuma k’ekila?

¹⁴ Ondo wɛ koka ndjambola dia kana wɛ akakitama nyuma k’ekila. Naka ngasɔ, kete kana yimba la ambola w’ohomba anɛ: Onde wɛ ekɔ la nsaki k’efula ka nsala lolango la Jehowa? Onde wɛ mɛnaka dia wɛ ekɔ l’ohetoheto w’efula l’olimu w’esambishelo? Onde wɛ ekɔ ombeki w’Ɔtɛkɛta wa Nzambi walanga mbeka awui wendana la “akambo wa lotshimola waki Nzambi”? (1 Kɔr. 2:10) Onde wɛ mɛnaka dia Jehowa ekɔ lo nsala dia wɛ monga l’etombelo wa diambo l’olimu w’esambishelo? Onde wɛ mbɔsaka dia wɛ ekɔ l’ɔkɛndɛ wa woke wa nkimanyiya anto akina lo nyuma? Onde wɛ ekɔ lo mɛna tolembetelo ɔnɛ Jehowa ekɔ lo kokimanyiya efula lo toho tɔmɔtshi shikaa lo lɔsɛnɔ layɛ? Naka wɛ nkadimola ɔnɛ eelo lo ambola asɔ tshɛ, onde dui sɔ mɛnyaka ɔnɛ wɛ ambolongola leeta l’otsha l’olongo l’etena kɛnɛ? Ndooko, aha ngasɔ. Lande na? Nɛ dia ekambi wa Nzambi tshɛ koka ndjaoka woho akɔ waamɛ, oyadi wekɔ akitami kana bu. Ndo lo tshimbo ya nyuma k’ekila, Jehowa koka mbisha okambi ande tshɛ wolo akɔ waamɛ, oyadi elongamelo kakɔna kele la nde. Lo mɛtɛ, naka wɛ ekɔ lo ndjambola dia kana wɛ akakitama nyuma k’ekila, kete okandokando wele la yɛ ɔsɔ mɛnyaka dia wɛ bu okitami. Anto wele Jehowa ambowaelɛ hawoyambola dia kana vɔ wekɔ akitami kana bu! Vɔ mbeyaka!

15. Ngande weyaso dia aha anto tshɛ wakalongola nyuma k’ekila ka Nzambi mbakasɔnama dia ntshɔ l’olongo?

¹⁵ Bible kekɔ la bɛnyɛlɔ efula di’anto waki la mbetawɔ wakalongola nyuma k’ekila; koko vɔ komoga l’elongamelo ka tɔsɛna l’olongo. Davidɛ akalɔmbɔma la nyuma k’ekila. (1 Sam. 16:13) Nyuma k’ekila kakokimanyiya dia nshihodia akambo wa lo tshimola  wendana la Jehowa ndo tɔ kakokimanyiya nto dia mfunda tenyi dimɔtshi dia lo Bible. (Makɔ 12:36) Kaanga mbele ngasɔ, ɔpɔstɔlɔ Petero akate ɔnɛ Davidɛ “kombidɛ l’olongo.” (Ets. 2:34) Joani Obatizanyi “a[ka]lodiama la nyuma k’ekila.” (Luka 1:13-16) Yeso akate dia ndooko onto lakaleke Joani woke, koko oma laasɔ nde akate dia Joani hatonga l’atei w’anto wayonga lo Diolelo dia l’olongo. (Mat. 11:10, 11) Jehowa akakambe la nyuma kande k’ekila dia mbisha apami asɔ wolo wa nsala akambo wa diambo, koko nde kokamba la nyuma kande k’ekila dia mbasɔna dia tɔsɛna l’olongo. Onde dui sɔ nembetshiyaka dia vɔ waki la mbetawɔ ka tshitshɛ oleki wanɛ wakasɔnama dia tolɛ l’olongo? Ndooko. Kɛsɔ nembetshaka tsho ɔnɛ Jehowa ayowaolola dia ndjɔsɛna lo Paradiso ka la nkɛtɛ.​—Jni. 5:28, 29; Ets. 24:15.

16. Difuto diakɔna diakongɛɛ ekambi wa Nzambi efula ɛlɔ kɛnɛ?

¹⁶ Ɛlɔ kɛnɛ, olui a woke w’ekambi wa Nzambi wa la nkɛtɛ bu l’elongamelo ka tɔsɛna l’olongo. Oko Abrahama, Sara, Davidɛ, Joani Obatizanyi ndo apami la wamato akina efula waki lo nshi yakafundamaka Bible, vɔ wekɔ lo kongɛɛ l’asolo wa lomɔlomɔ dia ndjɔsɛna la nkɛtɛ etena koyolɛ Diolelo dia Nzambi laadiko diawɔ.​—Hɛb. 11:10.

17. Ambola akɔna wayotɔsɛdingola lo sawo diayela?

¹⁷ Lam’ele akitami amɔtshi wekekɔ l’atei w’ekambi wa Nzambi ɛlɔ kɛnɛ, sho koka ndjaoka ambola amɔtshi. (Ɛny. 12:17) Ɛnyɛlɔ, ngande wahomba akitami ndjaɔsa? Naka onto ɔmɔtshi la l’etshumanelo kanyu ambotatɛ ndɛ mapa la nnɔ vinyɔ lo Eohwelo, ngande wahombayɛ nsalɛ onto ɔsɔ akambo? Ndo kayotota naka lofulo la wanɛ wayata dia vɔ wekɔ akitami lekɔ lo tatetemala mbidɛ? Onde wɛ pombaka ndjakiyanya lo dikambo sɔ? Tayokadimola ambola asɔ lo sawo diayela.