NKHANI YAKUSAMBIRA YA NAMBALA 4
“Mzimu Yiwu Weneku, Uchitiya Ukaboni”
“Mzimu yiwu weneku, uchitiya ukaboni limoza ndi mzimu widu kuti te ŵana aku Chiuta.”—ARO. 8:16.
SUMU 25 Ŵanthu Apade
VO TISAMBIRENGI MU NKHANI IYI *
Yehova wangupunguliya mzimu waki pa Akhristu 120 pa Pentekositi (Wonani ndimi 1-2)
1-2. Kumbi ntchinthu chakuziziswa nichi cho chinguchitika pa Pentekosti mu 33 C.E.?
PENGA pa Sabata ndi mlenji ku Yerusalemu. Lenili lenga zuŵa la Pentekosti mu chaka cha 33 C.E. Akusambira 120 anguwungana muchipinda chamuchanya. (Machi. 1:13-15; 2:1) Mazuŵa ngamanavi kuvuli, Yesu wanguŵakambiya kuti ajaliyi ku Yerusalemu chifukwa ŵenga pafupi kulonde mphasu yapade. (Machi. 1:4, 5) Kumbi ndi vinthu wuli vo vinguchitika?
2 “Mwamabuchibuchi, kuchanya kunguvwika chiwawa nge kupoma kwa chimphepu chanthazi.” Ndipu chiwawa ichi chinguzaza nyumba yosi. Pavuli paki, ‘milipu ya motu yinguwoneka nge malilimi’ pa mitu ya akusambira ndipu wosi “anguzazika ndi mzimu wakupaturika.” (Machi. 2:2-4) Munthowa iyi, Yehova wangupunguliya mzimu waki pa ŵanthu ŵenaŵa. (Machi. 1:8) Yiwu ŵenga Akhristu akwamba kusankhika ndi mzimu wakupaturika * kuti akalamuliyi ndi Yesu kuchanya.
NTCHINTHU WULI CHO CHICHITIKA ASANI MUNTHU WASANKHIKA?
3. Ntchifukwa wuli wo ŵenga pa Pentekosti angukayikiya cha kuti asankhika ndi mzimu wakupaturika?
3 Mukaŵengepu pa zuŵa ili, mwatingi muluwengi cha vo vinguchitika. Tiyeruzgiyi ktui chinthu chinyaki chakuwoneka nge mulipu wa motu che pa mutu winu ndipu mutamba kuŵereŵeta vineneru vakupambanapambana! (Machi. 2:5-12) Mungakayikiya cha kuti mwasankhika ndi mzimu wakupaturika. Kweni kumbi Akhristu wosi asankhika mwakuyanana kweniso pa nyengu yimoza nge mo akusambira 120 anguchitiya? Awa. Kumbi tiziŵa wuli?
4. Kumbi Akhristu wosi akusankhika a mu nyengu ya akutumika angusankhika nyengu yimoza? Konkhoskani.
4 Tiyeni tikambiskani nyengu yo Yehova wasankhiya ŵanthu. Mbakhristu 120 pe cha wo angusankhika ndi mzimu wakupaturika pa Pentekosti mu 33 C.E. Pa zuŵa lenili, ŵanthu pafufupi 3,000 nawu angulonde mzimu wakupaturika wo Yesu wangukamba. Yiwu angusankhika pa zuŵa lo angubatizikiya. (Machi. 2:37, 38, 41) Kweni Mbakhristu wosi cha wo asankhikanga pa nyengu yo abatizikanga. Mwakuyeruzgiyapu, Asamariya angusankhika ndi mzimu wakupaturika ŵati abatizika kali. (Machi. 8:14-17) Penipo Koneliyasi ndi ŵanthu a munyumba yaki, angusankhika ndi mzimu wakupaturika ŵechendabatiziki.—Machi. 10:44-48.
5. Mwakukoliyana ndi 2 Akorinto 1:21, 22, ntchinthu wuli cho chichitika asani Mkhristu wasankhika ndi mzimu wakupaturika?
5 Sonu tiyeni tikambiskani vo vichitika asani munthu wasankhika ndi mzimu wakupaturika. Ŵanthu anyaki wo asankhika, pakwamba vingaŵasuzga kuvwisa kuti Yehova waŵasankha nadi. Yiwu angajifumba kuti, ‘Ntchifukwa wuli Chiuta wakundisankha?’ Penipo anyaki angachita viyo cha. Mwemosi vo vingaŵiya, wakutumika Paulo wangukamba vo vichitika kwaku wosi wo asankhika. Iyu wangukamba kuti: “Mwati mwagomezga, mungudindika chidindu * kuporote mwaku iyu ndi mzimu wakupaturika wo mungulayizgika. Mzimu wenuwu ntchikoli chakuperekeke limu cha chihara chidu.” (Aefe. 1:13, 14; mazu ngamumphata.) Yehova wagwiriskiya ntchitu mzimu waki wakupaturika kuti wasimikiziyi Akhristu ŵenaŵa kuti waŵasankha. Mu nthowa yeniyi, mzimu wakupaturika “ntchikoli [ntchisimikizu cha vinthu vo vituza]” cho Chiuta watiŵapaska kuti waŵasimikiziyi kuti kunthazi amuja kwamuyaya kuchanya, pacharu chapasi cha.—Ŵerengani 2 Akorinto 1:21, 22.
6. Kumbi Mkhristu wakusankhika watenere kuchitanji kuti wakalonde mphotu yaki kuchanya?
6 Kumbi asani Mkhristu wasankhika, ndikuti wazamuluta kuchanya mwemosi mo vingaŵiya? Awa. Iyu wakayikiya cha kuti waluta kuchanya. Kweni watenere kukumbuka fundu iyi: “Abali, yesesani ndi mtima wosi kuti yimwi mwaŵeni musimikiziyi kudanika kweniso kusankhika kwinu, pakuti asani mulutirizga kuchita venivi mwazamukuwa cha mwemosi mo vingaŵiya.” (2 Petu. 1:10) Mwaviyo, chinanga kuti Mkhristu wangasankhika pamwenga kudanika kuti waluta kuchanya, kweni wazamulonde mphotu yaki pijapija asani walutirizga kugomezgeka.—Afi. 3:12-14; Ahe. 3:1; Chivu. 2:10.
KUMBI MUNTHU WAZIŴA WULI KUTI WASANKHIKA?
7. Kumbi Akhristu akusankhika aziŵa wuli kuti aluta kuchanya?
7 Kweni kumbi munthu waziŵa wuli kuti wazamuluta kuchanya? Kwamuka kusanirika mu mazu ngo Paulo wangukambiya Akhristu akusankhika a ku Roma wo ‘angudanika kuti aje akupaturika.’ Iyu wanguŵakambiya kuti: “Mukulonde mzimu wa ukapolu cha wo uchitiska so mantha, kweni mukulonde mzimu wakuti muje ŵana ŵaki, ndipu ndi mzimu weniwo tidaniriza kuti: ‘Aba, Ada!’ Mzimu yiwu weneku, uchitiya ukaboni limoza ndi mzimu widu kuti te ŵana aku Chiuta.” (Aro. 1:7; 8:15, 16) Mwaviyo, Chiuta wagwiriskiya ntchitu mzimu wakupaturika kuti wawovyi Akhristu akusankhika kuziŵa kuti azamuluta kuchanya.—1 Ate. 2:12.
8. Kumbi lemba la 1 Yohane 2:20, 27, lilongo wuli kuti Akhristu akusankhika akhumbika munthu munyaki cha kuti waŵasimikiziyi kuti akusankhika?
8 Yehova watovya Akhristu akusankhika kuti aleki kukayikiya kuti azamuluta kuchanya. (Ŵerengani 1 Yohane 2:20, 27.) Mbuneneska kuti Akhristu akusankhika nawu akhumbika kusambizika ndi Yehova kuziya mu mpingu nge mo viliri ndi Mkhristu weyosi. Kweni akhumbika munthu munyaki cha kuti waŵasimikiziyi kuti akusankhika. Yehova wagwiriskiya ntchitu mzimu waki wakupaturika kuti uŵasimikiziyi kuti akusankhika nadi! Mzimu uwu ngwanthazi ukongwa kuluska munthu weyosi!
YIWU ‘ABALIKASO’
9. Nge mo pakambiya pa Aefeso 1:18, kumbi munthu wasintha wuli asani wasankhika?
9 Ateŵeti anandi aku Chiuta mazuŵa nganu, vitiŵasuzga kuvwisa vo vichitikiya munthu asani Chiuta wamusankha. Venivi vakuvwika chifukwa chakuti yiwu akusankhika cha. Chiuta wangulenga ŵanthu kuti ajengi kwamuyaya pacharu chapasi, kuchanya cha. (Chiy. 1:28; Sumu 37:29) Kweni wakusankha ŵanthu anyaki kuti aluti kuchanya. Mwaviyo, asani munthu wasankhika maŵanaŵanu ngaki ngasintha ukongwa ndipuso vo walindiza navu visintha, mwakuti wakhumbisiska kuluta kuchanya.—Ŵerengani Aefeso 1:18.
10. Kumbi ‘kubalika so’ kung’anamuwanji? (Wonani mazu ngamumphata.)
10 Asani Mkhristu wasankhika ndi mzimu wakupaturika “wabalika so,” pamwenga kuti “wabalika kutuliya kuchanya.” * Yesu wangulongo so kuti vingachitika cha kukonkhoske munthu yo wechendasankhiki mo munthu wavwiya asani “wabalika so,” pamwenga kuti “wabalika kutuliya kuchanya.”—Yoha. 3:3-8; mazu ngamumphata.
11. Konkhoskani mo munthu wasinthiya maŵanaŵanu asani wasankhika.
11 Kumbi Akhristu wo asankhika asintha wuli maŵanaŵanu? Yehova wechendaŵasankhi, Akhristu ŵenaŵa alindizganga kuzija pacharu chapasi kwamuyaya. Yiwu alindizganga nyengu yo Yehova wazamutuzgapu vinthu vosi viheni kuti charu chapasi chizije paradayisu. Panyaki ajiyeruzgiyanga kuti alonde abali pamwenga abwezi ŵawu kutuwa ku masanu. Kweni asani asankhika, asintha. Chifukwa wuli? Yiwu asintha chifukwa chakuti panu pasi mphaheni cha pamwenga chifukwa cha masuzgu ngo akumana nangu. Pamwenga asintha chifukwa chakuŵanaŵana kuti umoyu wamuyaya pacharu chapasi wazamukuŵa wakuvukisa cha. Mumalu mwaki, Yehova wagwiriskiya ntchitu mzimu waki kuti wasinthi maŵanaŵanu ngawu kweniso vo alindizga.
12. Mwakukoliyana ndi 1 Peturo 1:3, 4, kumbi Akhristu akusankhika atuvwa wuli asani aŵanaŵaniya vo alindizga?
12 Anyaki wo asankhika angajiwona kuti mbambula kwenere mwaŵi uwu. Kweni akayikiya cha chinanga nkhamanavi kuti Yehova wakuŵasankha. Yiwu akondwa ndi kuwonga asani aŵanaŵaniya vitumbiku vo azamulonde kunthazi.—Ŵerengani 1 Peturo 1:3, 4.
13. Kumbi Akhristu akusankhika atiwuwona wuli umoyu wawu panu pacharu chapasi?
13 Kumbi venivi ving’anamuwa kuti Akhristu akusankhika akhumba kufwa? Paulo wangumuka fumbu lenili. Iyu wanguyeruzgiya maliŵavu nga Akhristu akusankhika ndi chihema. Wanguti: “Ndipu isi tija muchihema chenichi, titamantha, tizitiskika, chifukwa tikhumba cha kuzuwa chihema chenichi, kweni tikhumba kuvwala chinyaki, kuti umoyu umezi cho chingafwa.” (2 Akori. 5:4) Akhristu akusankhika avuka nawu cha umoyu wunu ndipu akhumba cha kufwa luŵi. Mumalu mwaki, akondwa ndi umoyu ndipu zuŵa lelosi akhumba kuteŵete Yehova limoza ndi abali ŵawu ndipuso mabwezi ngawu. Kweni pa vosi vo achita, nyengu zosi akumbuka unkhankhu wo azamulonde kunthazi.—1 Akori. 15:53; 2 Petu. 1:4; 1 Yoha. 3:2, 3; Chivu. 20:6.
KUMBI YEHOVA WAKUKUSANKHANI?
14. Asani munthu ngwaphamphu pamwenga asani Yehova watimuwovya pa umoyu waki, kumbi ving’anamuwa kuti wakusankhika ndi mzimu wakupaturika?
14 Panyaki muŵanaŵana kuti mukusankhika ndi mzimu wakupaturika. Asani ndimu muwone, mutenere kuŵanaŵaniya mafumbu yanga: Kumbi mukhumbisiska kuchita khumbu laku Yehova? Kumbi muwona kuti mukhumbisiska kugwira ntchitu yakupharazga? Kumbi mutanja kuŵerenga Mazu Ngaku Chiuta kuti muvwisi “vinthu vandimba vaku Chiuta”? (1 Akori. 2:10) Kumbi muwona kuti Yehova watikutumbikani ukongwa pa ntchitu yakupharazga? Kumbi mukhumbisiska kuwovya anyinu kuziŵa Chiuta? Kumbi mwe ndi ukaboni wakulongo kuti Yehova wakuwovyani mu nthowa zinandi pa umoyu winu? Asani mungamuka kuti hinya mafumbu yanga, kumbi ving’anamuwa kuti Yehova wakukudanani kuti muziluti kuchanya? Awa, ndimu viliri cha. Chifukwa wuli? Chifukwa vinthu ivi vichitikiya ateŵeti wosi aku Chiuta, kwali aluta kuchanya pamwenga cha. Ndipuso Yehova wangagwiriskiya ntchitu mzimu waki wakupaturika kuti wawovyi ateŵeti ŵaki wosi, kwali azamuja panu pasi pamwenga aluta kuchanya. Mwakuti asani mukayikiya kuti mukusankhika ndi mzimu wakupaturika, mbwenu mukusankhika cha. Wo Yehova wakuŵasankha akayikiya cha kuti akudanika! Yiwu aziŵa kuti akusankhika!
Yehova wangugwiriskiya ntchitu mzimu waki wakupaturika kuti Abrahamu, Sara, Davidi ndi Yohane Mubatizi achiti vinthu vakuziziswa, kweni wanguŵasankha kuti aziluti kuchanya cha (Wonani ndimi 15-16) *
15. Kumbi tiziŵa wuli kuti ndi wosi cha wo angulonde mzimu wakupaturika wo azamuluta kuchanya?
15 Mu Bayibolu, mwe ŵanthu anandi achivwanu wo angulonde mzimu wakupaturika, kweni alindizganga kuluta kuchanya cha. Davidi walongozgekanga ndi mzimu wakupaturika. (1 Samu. 16:13) Mzimu wakupaturika ungumuwovya kuti wavwisi vinthu va ndimba vakukwaskana ndi Yehova kweniso kuti walembi vigaŵa vinyaki va mu Bayibolu. (Mariko 12:36) Kweni wakutumika Peturo wangukamba kuti Davidi “wakuluta kuchanya cha.” (Machi. 2:34) Yohane Mubatizi ‘wanguzazika ndi mzimu wakupaturika.’ (Luka 1:13-16) Yesu wangukamba kuti ŵanthu wosi wo akubalika ndi anthukazi, palivi munthu mura kuluska Yohane Mubatizi. Kweni pavuli paki wangukamba so kuti Yohane we mu gulu la ŵanthu wo amuwusa mu Ufumu wakuchanya cha. (Mat. 11:10, 11) Yehova wangugwiriskiya ntchitu mzimu waki wakupaturika kuti ŵanthu ŵenaŵa achiti vinthu vakuziziswa, kweni wangugwiriskiya ntchitu mzimu uwu kuti waŵasankhi kuti aziluti kuchanya cha. Kumbi venivi ving’anamuwa kuti yiwu ŵenga akugomezgeka kamanavi kweni wo aluta kuchanya ndiwu mbakugomezgeka ukongwa? Awa. Ving’anamuwa ŵaka kuti azamuja ndi umoyu wamuyaya mu Paradayisu penipanu pacharu chapasi.—Yoha. 5:28, 29; Machi. 24:15.
16. Kumbi ateŵeti anandi aku Chiuta alindizganji mazuŵa nganu?
16 Ŵanthu anandi wo ateŵete Chiuta mazuŵa nganu alindizga kuluta kuchanya cha. Nge mo venge ndi Abrahamu, Sara, Davidi, Yohane Mubatizi ndi ateŵeti anyaki akugomezgeka a mu nyengu yakali, nawu alindizga kuzija pacharu chapasi ndipuso kuziwusika ndi Ufumu waku Chiuta.—Ahe. 11:10.
17. Kumbi tazamukambiskananji sabata yamawa?
17 Chifukwa chakuti akusankhika anyaki ŵeche pacharu chapasi, mungaŵa ndi mafumbu nganyaki. (Chivu. 12:17) Mwakuyeruzgiyapu, kumbi Akhristu akusankhika atenere kujiwona wuli? Kumbi mutenere kuchita wuli asani munthu munyaki mu mpingu winu wayamba kurya chiŵandi ndi kumwa vinyu pa Chikumbusu? Wuli asani chiŵerengeru cha ŵanthu wo akamba kuti akusankhika chikwera? Kumbi mutenere kufipa mtima? Mafumbu yanga ngazamumukika mu nkhani ya sabata yamawa.
^ ndimi 5 Kwambiya pa Pentekositi mu 33 C.E., mpaka sonu, Yehova wasankha Akhristu anyaki kuti akalamuliyi ndi Mwana waki kuchanya. Kweni kumbi Akhristu ŵenaŵa aziŵa wuli kuti asankhika? Ntchinthu wuli cho chichitika asani munthu wasankhika? Nkhani iyi yimukengi mafumbu ngenanga ndipu fundu zaki zatuwa mu Chigongwi cha Alinda cha January 2016.
^ ndimi 2 VO MAZU NGANYAKI NGANG’ANAMUWA: Kusankhika ndi mzimu wakupaturika: Yehova wagwiriskiya ntchitu mzimu waki wakupaturika kusankha munthu kuti wakalamuliyi limoza ndi Yesu kuchanya. Mwakugwiriskiya ntchitu mzimu wakupaturika, Chiuta watimupaska chisimikizu cha vinthu vo vituza pamwenga kuti ‘chikoli.’ (Aefe. 1:13, 14) Akhristu ŵenaŵa angakamba kuti mzimu wakupaturika “uchitiya ukaboni” pamwenga kuti utiŵasimikiziya kuti mphotu yawu ye kuchanya.—Aro. 8:16.
^ ndimi 5 VO MAZU NGANYAKI NGANG’ANAMUWA: Chidindu. Akusankhika adindika chidindu ichi kakumaliya asani kwaja kamanavi kuti afwi pamwenga asani kwazija kamanavi kuti chisuzgu chikulu chiyambi.—Aefe. 4:30; Chivu. 7:2-4; wonani nkhani ya mutu wakuti “Vo Akuŵerenga Afumba” mu Chigongwi cha Alinda cha April, 2016.
^ ndimi 10 Kuti muziŵi vo “kubalika so” kung’anamuwa, wonani Chigongwi cha Alinda cha Chichewa cha April 1, 2009, peji 3 mpaka 11.
SUMU 27 Kuvumbulika kwa Ŵana aku Chiuta
^ ndimi 57 CHITHUZI: Kwali tikumangika chifukwa cha chivwanu chidu pamwenga te ndi wanangwa wakupharazga ndi kusambiza ŵanthu uneneska, tingazija pacharu chapasi pa nyengu yo Ufumu waku Chiuta wazakutilamuliyanga.
