NDRIMA NYA GIHEVBULO 4
“Liphuvbo la limwedo la gu . . . fakaza”
“Liphuvbo la limwedo la gu tshangana ni hefemulo wathu gasi li fakaza gukhilo hi sanana sa Nungungulu.” — ROM. 8:16.
NDZIMO 25 Vathu va lumbago Nungungulu
ESI HI NA SI HEVBULAGO AVBA NYA NDRIMA YEYI *
Jehovha guhude liphuvbo laye nya guage khu ndziya nyo samadzise ga tsawa nya 120 maKristo khu litshigu nya Pentekosta (Wona dzindrimana 1-2)
1-2. Gigiro muni nya gu samadzise gi giregidego khu Pentekosta nya 33 E.C.?
GU DIRI dzimindru nya Dimingo Jerusalema. Khu litshigu nya Pentekosta, khu mwaga nya 33 E.C. Tsawa nya tanga nya 120 vapizane va di tshanganide nyumbani ya vbatshani ndrangani nyo khaguri. (Mith. 1:13-15; 2:1) Matshigwana hwane, Jesu a di gu va leletede gu mba khuga khu Jerusalema gasi gu va hakha giningwa nyo hathege. (Mith. 1:4, 5) Ginani gi nga girega khu gulandreya?
2 “Khu githugedza, gu di gira ligwaha na li gu tshiga khu Ndzadzini, gu di pwala gufurugedza liphuvbo nya tshivba.” Ligwaha lakona li di gu pwala nyumbani mule. Khavbovbo gu di tumbunuga “malimi nya malavbelavbe nya nilo” hungoni nya vapizane vatshavbo, khavbovbo va “tala khu Liphuvbo nya Guage.” (Mith. 2:2-4) Khu ndziya yeyi nya gusamadzise Jehovha a di guhula liphuvbo laye nya guage ga tsawa wule. (Mith. 1:8) Avo khavo nya gupheye gu todzwa khu liphuvbo nya guage * ni gu ningwa gutumba nya guya fume ni Jesu ndzadzini.
GINANI GI GIREGAGO TEPO MUTHU NYO KHAGURI A TODZWAGO?
3. Khu ginani vale va nga todzwa khu Pentekosta va nga ne gu kanakana gu khavo va todzidwe khu liphuvbo nya guage?
3 Nari khatshi u diri moyo nya vale va nga ba va tshanganide nyumbani mule ga vbatshani khu litshigu lile, gima na wa sa li divala. Gilo nyo khatshi lidimi nya nilo, gita khala hungoni gwago, khavbovbo u pheya gu ganeya mambe malimi! (Mith. 2:5-12) Na wa sa kanakana ne vbadugwana gu khuwe u todzidwe khu liphuvbo nya guage. Ganiolu, ina vatshavbo va todzidwego khu liphuvbo nya guage va todzidwe khu ndziya yayimweyo nyo samadzise nigu khu tepo mweyo guvbanyani gwavo? Ahihi. Ha gu dziti kharini?
4. Ina ava va todzidwego ga lizana myaga nya gupheye va todzidwe khu tepo yamweyo guvbanyani gwawe? Tshamuseya.
4 Hi na ganeya khu tepo eyi muthu a todzwago. Tsawa wule nya 120 maKristo khandruwo wonga wu todzidwego khu liphuvbo nya guage khu Pentekosta nya 33 E.C. Khu hwane nya tepo khu litshigu lalimwedo, tanga nya 3000 vathu va hakhide navo liphuvbo nya guage. Avo va todzidwe tepo va nga bhapatiswa. (Mith. 2:37, 38, 41) Ganiolu, ga myaga yi nga landreya khandri yatshavbo maKristo nya gutodzwe, ma todzidwego tepo ma nga bhapatiswa. Vasamariya va todzidwe gitepwana hwane nya gubhapatiswe. (Mith. 8:14-17) Nigu gutodzwa ga Korineliyo ni ndranga yaye kha ga nga ba gu olovelegide kholu avo va todzidwe na va si gu bhapatiswe.— Mith. 10:44-48.
5. Guya khu 2 Vakorinto 1:21, 22, ginani gi dugeleyago tepo muthu a todzwago khu liphuvbo nya guage?
5 Hongoleni hi ganeya khesi si dugeleyago ga muthu tepo a todzwago khu liphuvbo nya guage. Vambe tepo va todzwago, gupheyani si ngu va garadzeya gu dzumeya gu khavo Jehovha a va hathide. Adzina va nga dzi wudzisa khavo: ‘Khu ginani Jehovha a nga hatha eni?’ Ganiolu khandri vatshavbo va dzipwago khu ndziya yoyo. Gani muthu a ngu dzipwa khu ndziya muni, mupostoli Pawulo a ngu tshamuseya esi si dugeleyago ga vatshavbo va todzwago: “Khu gukhodwa, mu tiyisidwe khu gifungo * nya liphuvbo nya Guage hi nga bani hi tumbisidwe. Khilo gitumbiso nya thomba yathu.” (Efes. 1:13, 14) Khu kharato, Jehovha a gu thumisa liphuvbo laye nya guage gasi gu maKristo yoyo ma si manegi ni gukanakana nya gu khayo uye a ma hathide. Khu ndziya yoyo liphuvbo nya guage khilo “gitumbiso” a va ningago gasi va si kanakani gu khavo mindru wa tshigu va naya vbanya kala gupindruga ndzadzini nasiri mafuni. — Leri 2 Vakorinto 1:21, 22.
6. Ginani egi muKristo a todzidwego a yedego gu gira gasi a mana tshatshazelo nyo hongole ndzadzini?
6 Tepo muKristo a todzwago, ina isoso so thula gu khiso gimwalo gi mu himbedzeyago gu hongola ndzadzini? Ahihi. Uye kha kanakani gu khuye a hathidwe gasi gu hongola ndzadzini. Ganiolu, uye a yede gu dundruga gigengedzo gegi: “Vandriyangu, zamani, mu simama gutiya guranwani gwanu, ni guhathwani gwanu. Mwa gu girani kharato, gima kha mu na tshunganiswa mu thega.” (2 Ped. 1:10) Khu kharato, abari gu muKristo nyo khaguri hathidwe mwendro ranidwe gasi gu hongola ndzadzini, uye a na mana tshatshazelo wowo a gu simama na tumbegide basi. — Filp. 3:12-14; Hebh. 3:1; Gutu. 2:10.
MUTHU A GU DZITI KHARINI GU KHUYE TODZIDWE?
7. Ava va todzidwego va gu dziti kharini gu khavo va ranidwe gasi gu hongola ndzadzini?
7 Ganiolu, a gu dziti kharini muthu gu khuye ranidwe gasi gu hongola ndzadzini? Hlamulo yomo guagani avba nya malito ya Pawulo a nga loveya vaRoma va “ranidwego gu khala va nya guaga.” Uye a di va embeya esi: “Kholu, Liphuvbo mu hakhidego kha li mi giri dzikhumbi ni gu mi thela hwanga; aholu la gu mi gira sanana sa Nungungulu. Khilo li hi kutsago gu rana khethu: ‘Abbha! Baba wathu.’ Ilo Liphuvbo la limwedo la gu tshangana ni hefemulo wathu gasi li fakaza gukhilo hi sanana sa Nungungulu.” (Rom. 1:7; 8:15, 16) Khu kharato, khu gu thumisa liphuvbo laye nya guage, Nungungulu a gu si vega guagani ga vale va todzidwego gu khuye avo va na ni gutumba gogu ga ndzadzini. — 1 Tes. 2:12.
8. 1 Johane 2:20, 27, a gu yeyedza kharini gu khuye ava va todzidwego kha va vireyi gu embedwa khu muthu gupwani va todzidwe?
8 Jehovha kha tshiyi gukanakana ni gudugwana mapimoni ni myonyoni ya vathu vale va ranwago gasi gu hongola ndzadzini. (Leri 1 Johane 2:20, 27.) Khu lisine maKristo ma todzidwego anayo gu vbwetega va hevbudzwa libandlane gufana ni hatshavbo. Ganiolu kha si lombi gu va embedwa khu mumbe muthu gupwani va todzidwe. Jehovha a gu thumisa tshivba nya yikhongolo ngudzu ga dzatshavbo mafuni ni ndzadzini a gu liphuvbo laye nya guage gasi gu gira vathu vava va si kanakani ne vbadugwana gu khavo va todzidwe!
AVO VA GU “VELEGWA NYALUPHYE”
9. Guvbindrugedza muni gu tshamusedwago omu ga Vaefeso 1:18 gu giregago ga muthu tepo a todzwago?
9 Sithumi nya singi sa Jehovha muhuno si ngu si garadzeya gu pwisisa esi si dugeleyago tepo muthu a todzwago khu Nungungulu. Isoso si ngu pwala kholu avo kha va todzwa. Nungungulu giride vathu gasi va vbanya mafuni kala gupindruga, nasiri ndzadzini. (Gen. 1:28; Ndzi. 37:29) Ganiolu Jehovha a ngu hatha vambe gasi guya vbanya ndzadzini. Khu kharato, tepo a va todzago uye a gu vbindrugedza gutumba gwawe ni mapimo yawe khu ndziya nyo samadzise ngudzu, gasi avo va vireya guya vbanya ndzadzini.— Leri Vaefeso 1:18.
10. So thula ginani “guvelegwa nyaluphye”? (Wona tshamuselo wa vbavbatshi.)
10 Tepo maKristo ma todzwago khu liphuvbo nya guage, ayo ma “guvelegwa nyaluphye.” * Jesu yeyedzide gu khuye kha si kodzegi gu tshamuseya muthu a nga ne todzwa edzi a dzipwago khidzo muthu a nga “velegwa nyaluphye,” mwendro a “velegidwego khu Liphuvbo.” — Joh. 3:3-8.
11. Tshamuseya guvbindrugedza nya mapimiselo nya muthu tepo a todzwago.
11 Guvbindrugedza muni nya mapimiselo gu giregago ga muKristo tepo a todzwago? Na ma si gu todzwi khu Jehovha, maKristo yaya ma di gu tsaka ngudzu khu gutumba nya gu vbanye mafuni kala gupindruga. Avo va di gu vireya khu maho nyo fuviye tepo eyi Jehovha a nga hadzi dusa guvivba gwatshavbo a bwe a gira mafu ma khala paradhesi. Si nga gira na va dzi dundrugede na va gu hakha nongo mwendro pari yi wugidego khu gufani. Ganiolu hwane nya gutodzwe avo va di pheya gu pimisa khu yimbe ndziya. Khu ginani? Khandri khatshi avo va di pheya gu wona gutumba nya gu vbanye mafuni na gu si tsakisi. Khandri va di vbindrugedza mapimo yawe khu gu ba va emisanide ni sigaradzo nya sikhongolo ngudzu mwendro gu tshaniseka ngudzu. Khandri khatshi khu githugedza va di pheya gu pimisa gu khavo va di hadzi garala khu gu vbanya mafuni kala gupindruga. Wulangani nya isoso, Jehovha a di thumisa liphuvbo laye nya guage gasi gu vbindrugedza mapimiselo yawe ni gutumba va gu dogoreyago.
12. Guya khu 1 Pedro 1:3, 4, maKristo ma todzidwego ma gu dzipwa kharini khu gutumba gwawe?
12 Muthu nyo khaguri a todzidwego si nga gira a dzipwa na si yedwi khu gu mana lithomo lolo nyo hathege. Ganiolu uye gima kha kanakani gu khuye Jehovha mu hathide. Uye a ngu tsaka ngudzu ni gu bonga ngudzu tepo a pimisago khu gutumba nya gu vbanye ndzadzini. — Leri 1 Pedro 1:3, 4.
13. Ava va todzidwego va gu dzipwa kharini khu guvbanya gwawe omu mafuni?
13 Ganiolu, ina isoso so thula gu khiso ava va todzidwego va ngu dzina gufa? Mupostoli Pawulo hlamude giwudziso gyogyo. Uye a di fananisa givili gyawe nya nyama ni tshatsha mwendro litendra, uye a di khuye: “Na hi ngu gu vbanya tshatshani momu hi ngupwa wuvi ni gusaniseka, kholu kha hi dzini gu tshudwa, aholu ha guvbweta gu ambagiswa gasi gufa gu midzwe khu guvbanya nya guphya.” (2 Kor. 5:4) Makristo yaya kha ma garala khu gu vbanya mafuni avbo nya gu va vbweta gu vbiredzeya gufa. Wulangani nya isoso avo va ngu tsakiswa khu guvbanya nigu va gu vbweta gu thumeya Jehovha gumogo ni valongo vawe ni dzipari dzawe tshigu ni tshigu. Ambari ulolo, tepo yatshavbo avo va ngu dundruga khu gutumba nyo tsakise ngudzu va gu nago khu mindru wa tshigu. — 1 Kor. 15:53; 2 Ped. 1:4; 1 Joh. 3:2, 3; Gutu. 20:6.
INA ANUWE U TODZIDWE KHU JEHOVHA?
14. Silo muni si gu siri giyeyedzo nyo khigyo muthu nyo khaguri a di todzwa khu liphuvbo nya guage?
14 Adzina u ngu dzi wudzisa gu khuwe gani u todzidwe khu liphuvbo nya guage mwendro ne. Abari kharato, nga dundrugeya khu siwudziso sesi nya lisima: Ina u na ni gudogoreya nya gukhongolo ngudzu nya gu gire gugola ga Jehovha? U ngu dzipwa na wu gu dzigaradza ngudzu thumoni nya gutshumayele? U ngu tsakiswa ngudzu khu gu leri lito la Nungungulu ni gu hevbula “misihalo nya guete ya Nungungulu”? (1 Kor. 2:10) Wa gu dzipwa khatshi Jehovha a ngu gu ninga mihandro nyo samadzise thumoni nya gutshumayele? U ngu dzipwa na wu gu yela gu phasa vambe khu liphuvboni? U ngu wona siyeyedzo nyo khiso Jehovha a ngu gu phasa khu dzindziya nyo khaguri dzi wonegago guvbanyani gwago? Wa gu ba u hlamude khuwe ina ga siwudziso satshavbo sesi, ina isoso so thula gu khiso u todzidwe? Ahihi, kha si thuli isoso. Khu ginani? Kholu satshavbo sithumi sa Jehovha si ngu kodzega gu dzipwa khu ndziya yoyo gani si todzidwe mwendro kha sa todzwa. Nigu khu gu thumisa liphuvbo laye nya guage, Jehovha a nga phasa ni wevbini a gu githumi gyaye gu gira silo sesi, ambari na todzidwe mwendro na sa todzwa. Khu lisine wa gu ba u kanakana gu khuwe u todzidwe khu liphuvbo nya guage mwendro ne, gukanakana gogo giyeyedzo nyo khigyo kha wa todzwa. Avo va ranidwego khu Jehovha kha va kanakani gu khavo va todzidwe mwendro ne! Avo va ngu dziti!
Jehovha thumiside liphuvbo laye nya guage gasi gu ninga Abrahama, Sara, Dhavhidhe ni Johane Mubhapatisi tshivba nya gu gire silo nya gusamadzise, ganiolu uye kha thumisa liphuvbo lolo gasi gu va ninga gutumba nya guya vbanye ndzadzini (Wona dzindrimana 15-16) *
15. Ha gu dziti kharini gu khethu khandri vatshavbo va hakhidego liphuvbo nya guage va nga hathwa gasi gu hongola ndzadzini?
15 Omu nya Bhibhiliya, gu ni siyeyedzo nya singi nya vama nya gukhodwe va nga hakha liphuvbo nya guage, ambari ulolo va gu mwalo gutumba nya guya vbanye ndzadzini. Dhavhidhe a di gu gimbidziswa khu liphuvbo nya guage. (1 Sam. 16:13) Liphuvbo nya guage li mu phaside gu pwisisa silo nya guete maningano ni Jehovha li bwe li mu thangeya gasi gu lova sipandre nyo khaguri nya Bhibhiliya. (Marko 12:36) Ambari ulolo mupostoli Pawulo lovide gu khuye Dhavhidhe “kha gwela Ndzadzini.” (Mith. 2:34) Johane Mubhapatise a di gu ‘tade khu liphuvbo nya guage.’ (Luka 1:13-16) Jesu ganede khuye gu mwalo mumbe muthu a gu khongolo guvbindra Johane, ganiolu a vbedza khuye uye kha na nga gira gipandre nya Mufumo wa Ndzadzini. (Mat. 11:10, 11) Jehovha thumiside liphuvbo laye nya guage gasi gu ninga vama vava tshivba nyo gire silo nyo samadzise, ganiolu uye kha thumisa liphuvbo lolo gasi gu va hatha gasi gu vbanya ndzadzini. Ina isoso so thula gu khiso avo kha va nga tumbega nga vale va hathidwego gasi guya fuma ndzadzini? Ahihi. Isoso so thula gu khiso Jehovha a na va wusa khu gufani gasi va ta vbanya Paradhesini mafuni. — Joh. 5:28, 29; Mith. 24:15.
16. Gutumba muni gu viredwago khu sithumi nya singi sa Nungungulu muhuno?
16 Gutala nya sithumi sa Nungungulu mafuni muhuno si mwalo gutumba nya guya vbanye ndzadzini. Kha nga Abrahama, Sara, Dhavhidhe, Johane Mubhapatisi ni vambe vama ni vanyamayi va dziteponi nya Bhibhiliya, avo va gu vireya guta vbanya mafuni na va gu fumedwa khu Mufumo wa Nungungulu. — Hebh. 11:10.
17. Siwudziso muni hi na ganeyago khiso avba nya ndrima yi landreyago?
17 Muhuno gu ngari ni maKristo ma todzidwego vbakari gwathu khu kharato si nga gira hi manega ni siwudziso nyo khaguri. (Gutu. 12:17) Khu giyeyedzo, ava va todzidwego va yede gu dzi wona kharini? A gu tshuka muthu nyo khaguri libandlani gwago a pheya gu hodza gibaba ni gu seya vhinyu teponi nya Gidundrugiso, u yede gu mu wona kharini? Ahati wa gu simama gu engedzeya tengo nya vale va ganeyago gu khavo va todzidwe ke? Ina u yede gu garadzega khu isoso? Ndrima yi landreyago yi na hlamula siwudziso sesi.
^ ndri. 5 Gu khugeya khu Pentekosta nya 33 E.C kala muhuno, Jehovha a ngu ninga maKristo nyo khaguri gutumba nyo tsakise ngudzu — gutumba nya guya fume ni Gyanana gyaye ndzadzini. Makristo yaya ma gu dziti kharini gu khayo ma hathidwe gasi gu mana lithomo lolo? Ginani gi giregago ga muthu a gu hathwa khu Jehovha gasi a hongola ndzadzini? Ndrima yeyi ya gu seketedwa ga eyi yi gomogo omu nya Mukhedziseyi nya Janeiro nya 2016 khu giThwa. Ndrima yeyi yi na hlamula siwudziso soso.
^ ndri. 2 MITSHAMUSELO NYA MALITO NYO KHAGURI: Va nya gu todzwa khu liphuvbo nya guage: Jehovha a gu thumisa liphuvbo laye gasi gu hatha vale va na guya fuma ni Jesu ndzadzini. Khu gu thumisa liphuvbo laye, Nungungulu a gu ninga muthu yoyo “gitumbiso” nya mindru wa tshigu. (Efes. 1:13, 14) Makristo yaya ma nga ganeya gu khayo liphuvbo nya guage li ngu “fakaza” mwendro la gu si vega guagani gu khilo tshatshazelo wavo womo ndzadzini. — Rom. 8:16.
^ ndri. 5 MITSHAMUSELO NYA MALITO NYO KHAGURI: Gifungo. Gifungo gegi kha gi dzegeyi gu vegwa ga muthu kha nga nyo pindruge kala gitepwana na si gufi na tumbegide muthu yoyo mwendro gitepwana hwane nya gu na yi phede tshanisa nya yikhongolo. — Efes. 4:30; Gutu. 7:2-4; wona “Siwudziso sa valeri” omu nya Mukhedziseyi nya Abril nya 2016 khu giThwa.
^ ndri. 10 Gasi gu mana mahungu nyo engedzelege maningano ni tshamuselo nya gu “velegwa nyaluphye,” wona Mukhedziseyi nya 1 nya Abril nya 2009, dzipajina 3-12, khu Giputukezi.
NDZIMO 27 Guwonegiswa ga sanana sa Nungungulu
^ ndri. 57 MITSHAMUSELO NYA DZIFOTO: Gani hi khothedwe khu kotani nya gukhodwa gwathu gani hi tshulegide gu tshumayela ni gu hevbudza lisine, hi nga vireya gu ta vbanya mafuni tepo Mufumo wa Nungungulu wu na hi fumeyago.
