STADI ATIKOL 4
“Spirit Bilong God . . . i Tokaut”
“Spirit bilong God wantaim bel na tingting bilong yumi i tokaut olsem yumi pikinini bilong God.”—ROM 8:16.
SINGSING 25 [46] Wanpela Spesel Lain Bilong God
PRIVIU *
Long de Pentikos, Jehova i yusim narakain wei tru long kapsaitim holi spirit long 120 Kristen (Lukim paragraf 1-2)
1-2. Wanem narakain samting i kamap long de Pentikos bilong yia 33 C.E.?
EM SANDE moning na ol disaipel i stap long Jerusalem. Em yia 33 C.E., na em de bilong Pentikos. Inap olsem 120 disaipel i bung long wanpela haus na ol i stap long wanpela rum antap. (Apo. 1:13-15; 2:1) Sampela de paslain, Jisas i tokim ol long stap yet long Jerusalem bikos ol bai kisim wanpela presen. (Apo. 1:4, 5) Wanem samting i kamap?
2 “Wantu wanpela nois i kam long heven na i krai olsem wanpela strongpela win i spit i kam.” Dispela nois i pulapim tru haus. Ol “samting i olsem ol liklik hap paia” i stap antap long het bilong ol disaipel, na “holi spirit i pulap long olgeta” bilong ol. (Apo. 2:2-4) Jehova i yusim dispela narakain wei tru long kapsaitim holi spirit long olgeta disaipel long dispela grup. (Apo. 1:8) Ol i kamap fes lain em God i anointim long holi spirit * na ol i gat hop bilong mekim wok king wantaim Jisas long heven.
WANEM SAMTING I SAVE KAMAP TAIM GOD I ANOINTIM MAN?
3. Long de Pentikos, wai na olgeta Kristen i holim wanpela tingting tasol olsem God i anointim ol long holi spirit?
3 Sapos yu wanpela bilong ol disaipel husat i bin stap long dispela rum antap long dispela de, yu no inap lusim tingting long samting i kamap. Wanpela samting i luk olsem liklik hap paia i stap antap long het bilong yu, na yu stat long mekim narapela tokples! (Apo. 2:5-12) Yu bai holim wanpela tingting tasol olsem God i anointim yu long rot bilong holi spirit. Tasol taim God i anointim ol Kristen, yu ting em i anointim olgeta bilong ol long narapela kain wei na anointim ol long wankain taim? Nogat. Hau na yumi save long dispela?
4. Yu ting God i bin anointim ol Kristen bilong pastaim long wankain taim? Eksplenim.
4 Yumi ken stori long wanem taim God i save anointim man. Long Pentikos bilong yia 33 C.E., God i bin anointim 120 Kristen, na i no ol tasol. Long wankain de, em i anointim 3,000 moa disaipel. Em i anointim ol taim ol i kisim baptais. (Apo. 2:37, 38, 41) Tasol long ol yia bihain, God i anointim ol Kristen long kain kain taim, na i no long de ol i kisim baptais. Ol Kristen bilong lain Samaria i kisim baptais pinis, na bihain God i anointim ol. (Apo. 8:14-17) Tasol God i anointim Kornilius na ol wanhaus bilong em paslain long ol i kisim baptais.—Apo. 10:44-48.
5. Olsem 2 Korin 1:21, 22 i kamapim, wanem samting i save kamap taim God i yusim holi spirit long anointim man?
5 Yumi ken stori long wanem samting i save kamap taim God i anointim man. Taim God i anointim ol Kristen, sampela bilong ol i hatwok long bilip olsem Jehova i makim ol. Ol inap tingting olsem, ‘Wai na God i makim mi?’ Ating sampela i no inap pilim olsem. Maski ol i pilim olsem wanem, aposel Pol i stori long samting i save kamap long man taim God i anointim em, na Pol i tok: “Long rot bilong Krais, taim yupela i bilip pinis, God i putim mak * bilong holi spirit long yupela olsem em i bin promis long en. Holi spirit i strongim tok olsem yumi bai kisim ol samting God i promis long givim yumi.” (Efe. 1:13, 14; ftn.) Jehova i yusim holi spirit long kamapim klia long ol dispela Kristen olsem em i makim ol. Long dispela rot, holi spirit “em i wanpela promis” bilong strongim ol long bilip olsem bihain ol bai kisim laip oltaim long heven na i no long graun.—Ritim 2 Korin 1:21, 22.
6. Kristen em God i anointim i mas mekim wanem na bai em i kisim prais bilong go long heven?
6 Taim God i anointim man, yu ting em bai kisim nating dispela prais bilong go long heven? Nogat. Em i save olsem God i makim em long go long heven. Tasol em i mas tingim dispela tok: “Ol brata, God i bin singautim yupela na makim yupela pinis. Olsem na yupela i mas wok strong tru long kisim dispela samting God i singautim na makim bilong yupela long kisim. Sapos yupela i wok yet long bihainim ol dispela pasin, orait bai yupela i no inap pundaun.” (2 Pita 1:10) Olsem na maski God i anointim wanpela Kristen, dispela Kristen bai kisim prais bilong go long heven sapos em yet i stap gut long God.—Fili. 3:12-14; Hib. 3:1; Rev. 2:10.
OLSEM WANEM MAN INAP SAVE OLSEM GOD I ANOINTIM EM?
7. Olsem wanem ol lain God i anointim i save olsem ol i gat hop bilong go long heven?
7 Olsem wanem man inap save olsem God i anointim em? Yumi inap kisim bekim bilong dispela askim taim yumi skelim tok Pol i mekim long ol Kristen long Rom em God i “makim [ol] long kamap manmeri holi.” Em i tokim ol: “Spirit bilong God i no save mekim yumi i kamap wokboi na mekim yumi pret gen. Tasol long rot bilong dispela spirit God i save adoptim yumi olsem pikinini bilong em na dispela spirit i kirapim yumi long singaut olsem, ‘Aba, Papa!’ Spirit bilong God wantaim bel na tingting bilong yumi i tokaut olsem yumi pikinini bilong God.” (Rom 1:7; 8:15, 16) Long rot bilong holi spirit, God i kamapim klia long ol lain em i anointim olsem ol i gat hop bilong go long heven.—1 Tes. 2:12.
8. Olsem wanem 1 Jon 2:20, 27 i soim olsem ol lain God i anointim i no nidim ol narapela long kamapim klia long ol olsem God i anointim ol?
8 Taim Jehova i anointim ol manmeri, ol i holim wanpela tingting na bilip olsem ol i kisim singaut bilong i go long heven. (Ritim 1 Jon 2:20, 27.) Ol Kristen em God i anointim, ol tu i mas kisim skul long Jehova long rot bilong kongrigesen. Tasol ol i no nidim ol narapela long kamapim klia long ol olsem God i anointim ol. Jehova i yusim holi spirit, em bikpela strong bilong em i winim olgeta samting long ples antap na graun, long kamapim klia long ol olsem em i anointim ol!
OL I “BON GEN”
9. Olsem Efesus 1:18 i kamapim, wanem senis i save kamap long Kristen taim God i anointim em?
9 Planti wokman bilong God inap pilim hatwok long kliagut long tingting bilong man em God i anointim. Em nomol long ol i pilim olsem bikos God i no anointim ol. God i wokim ol manmeri bilong i stap oltaim long graun na i no long heven. (Stt. 1:28; Sng. 37:29) Tasol Jehova i makim sampela manmeri long i go long heven. Taim em i anointim ol, em i senisim tru hop na wei bilong ol long tingting, olsem na ol i amamas tru na wet long kisim laip long heven.—Ritim Efesus 1:18.
10. Taim man i “bon gen,” dispela i makim wanem samting? (Lukim tu futnot.)
10 Taim holi spirit i anointim ol Kristen, i olsem ol i “bon gen,” o “bon long heven.” * Sapos yumi laik eksplenim gut dispela samting long man em God i no anointim, tok bilong Jisas i soim olsem dispela man bai hatwok tru long kliagut long tingting na filings bilong man husat i “bon gen,” o “bon long rot bilong holi spirit.”—Jon 3:3-8; ftn.
11. Stori long olsem wanem wei bilong ol Kristen long tingting i save senis taim God i anointim ol.
11 Taim God i anointim ol Kristen, olsem wanem wei bilong ol long tingting i save senis? Paslain long Jehova i anointim ol dispela Kristen, ol i amamas tru long hop bilong i stap oltaim long graun. Ol i laik tru long lukim taim bai kamap we Jehova bai pinisim olgeta pasin nogut na mekim graun olgeta i kamap paradais. Ating ol i piksaim long tingting olsem ol i welkamim wanpela wanfamili o pren husat i bin i dai. Tasol taim God i anointim ol, wei bilong ol long tingting i senis. Wai? I no olsem ol i no amamas long kisim laip oltaim long graun. Na i no olsem ol i senisim tingting bikos ol i bel hevi tru o karim bikpela hevi. Na tu, i no olsem wantu ol i pilim olsem laip oltaim long graun em skin dai samting, nogat. Jehova i yusim holi spirit long senisim hop bilong ol na wei bilong ol long tingting.
12. Olsem 1 Pita 1:3, 4 i kamapim, Kristen em God i anointim i pilim olsem wanem long hop bilong em?
12 Taim God i anointim wanpela Kristen, dispela Kristen inap pilim olsem em i no fit long kisim dispela blesing. Tasol em i holim wanpela tingting tasol olsem Jehova i makim em. Em i amamas tru taim em i tingim hop bilong em long i go long heven.—Ritim 1 Pita 1:3, 4.
13. Ol Kristen em God i anointim i pilim olsem wanem long stap laip long graun?
13 Yu ting ol Kristen em God i anointim i luk fowed long dai? Aposel Pol i bekim dispela askim. Em i tok bodi bilong ol i olsem haus sel, na em i tok: “Yumi husat i stap yet long dispela haus sel, yumi pilim hevi na krai i stap. I no olsem yumi laik rausim dispela haus sel, nogat. Tasol yumi laik putim dispela narapela haus bilong heven. Long dispela rot laip oltaim bai kisim ples bilong laip i save pinis.” (2 Kor. 5:4) Ol dispela Kristen i no pilim olsem laip long graun i no gat mining na ol i luk fowed long dai, nogat. Ol i enjoim laip, na long olgeta de ol i laik wok bung wantaim ol wanfamili na ol pren long mekim laik bilong Jehova. Maski ol i mekim wanem wok, oltaim ol i tingim gutpela hop tru bilong laip ol bai kisim long bihain.—1 Kor. 15:53; 2 Pita 1:4; 1 Jon 3:2, 3; Rev. 20:6.
YU TING JEHOVA I ANOINTIM YU?
14. Sapos Kristen i givim bel long mekim wok lotu na Jehova i blesim ol wok em i mekim, yu ting dispela i makim olsem holi spirit i anointim em?
14 Ating yu gat tupela tingting na yu laik save sapos holi spirit i bin anointim yu. Skelim ol dispela bikpela askim: Yu gat bikpela laik tru long mekim laik bilong Jehova? Yu pilim olsem yu givim bel tru long autim tok? Yu save amamas tru long stadi long Baibel na kisim skul long “ol bikpela tok hait bilong God”? (1 Kor. 2:10) Yu pilim olsem Jehova i blesim wok autim tok bilong yu? Yu pilim olsem yu gat bikpela wok tru long helpim ol narapela long sait bilong bilip? Yu luksave long ol samting i soim klia olsem Jehova i helpim yu long planti samting long laip bilong yu? Sapos yu tok yes long ol dispela askim, orait yu ting dispela i makim olsem holi spirit i anointim yu? Nogat, i no olsem. Wai? Bikos olgeta wokman bilong God inap pilim olsem, maski God i anointim ol o nogat. Long rot bilong holi spirit, Jehova inap strongim olgeta wokman bilong em long mekim ol dispela wok, maski ol i gat hop long kisim laip long graun o long heven. Yu gat tupela tingting na yu laik save sapos holi spirit i bin anointim yu, olsem na dispela i makim olsem holi spirit i no anointim yu. Ol lain em Jehova i makim ol, ol i no holim tupela tingting! Ol i save tru olsem God i anointim ol!
Jehova i yusim holi spirit long strongim Abraham, Sara, Devit, na Jon Bilong Baptais na ol i mekim ol narakain bikpela wok, tasol em i no yusim holi spirit long anointim ol long kisim laip long heven (Lukim paragraf 15-16) *
15. Wanem ol eksampel i soim olsem maski sampela man i kisim holi spirit, ol i no kisim singaut bilong go long heven?
15 Long Baibel, i gat planti eksampel bilong ol bilipman em ol i kisim holi spirit, tasol ol i no kisim singaut bilong go long heven. Holi spirit i stiaim Devit. (1 Sml. 16:13) Holi spirit i helpim em long kliagut long ol bikpela tok hait bilong Jehova, na stiaim em long raitim sampela hap bilong Baibel. (Mak 12:36) Maski i olsem, aposel Pita i tok Devit “i no bin i go long heven.” (Apo. 2:34) “Holi spirit [i] pulap” long Jon Bilong Baptais. (Luk 1:13-16) Jisas i tok i no gat man i winim Jon, tasol maski i olsem, Jisas i tok Jon i no inap go insait long Kingdom bilong heven. (Mat. 11:10, 11) Jehova i yusim holi spirit long strongim ol dispela bilipman long mekim ol narakain bikpela wok, tasol em i no yusim holi spirit long anointim ol. Yu ting dispela i makim olsem ol i no stap gut long God olsem ol Kristen em holi spirit i anointim ol? Nogat. Jehova bai kirapim bek ol na ol bai stap laip long Paradais long graun.—Jon 5:28, 29; Apo. 24:15.
16. Bikpela lain manmeri i mekim laik bilong God long nau i bilip na wet long wanem samting?
16 Bikpela lain manmeri husat i mekim laik bilong God long graun long nau, ol i no gat hop bilong go long heven. Olsem Abraham, Sara, Devit, Jon Bilong Baptais, na planti narapela man na meri em Baibel i stori long ol, bikpela lain manmeri tu i bilip na wet long kisim laip oltaim long graun taim Kingdom Bilong God i bosim graun.—Hib. 11:10.
17. Long neks atikol, yumi bai kisim bekim bilong wanem ol askim?
17 Long nau, sampela bilong ol Kristen em God i anointim, ol i stap yet wantaim yumi, olsem na yumi gat sampela askim. (Rev. 12:17) Olsem: Ol Kristen God i anointim i mas holim wanem tingting long ol yet? Sapos wanpela long kongrigesen bilong yu i stat long kisim bret na wain long Memorial, orait yu mas mekim wanem kain pasin long em? Olsem wanem sapos namba bilong ol lain i kisim bret na wain i wok yet long i go antap? Yu ting i stret long yu tingting planti long ol dispela samting? Yumi bai kisim bekim bilong ol dispela askim long neks atikol.
^ par. 5 Stat long Pentikos 33 C.E., Jehova i givim wanpela gutpela hop long sampela Kristen—hop bilong mekim wok king wantaim Jisas long heven. Hau na ol dispela Kristen i save olsem God i bin makim ol long kisim dispela gutpela blesing? Wanem samting i save kamap taim wanpela Kristen i kisim dispela blesing? Dispela atikol i kamapim gen sampela tok i bin stap long Wastaua bilong Janueri 2016. Dispela atikol bai bekim ol dispela askim.
^ par. 2 MINING BILONG TOK: Anointim long holi spirit: Jehova i yusim holi spirit long makim ol lain husat bai mekim wok king wantaim Jisas long heven. Long rot bilong holi spirit, God i tok promis long blesing ol bai kisim long bihain, na i olsem “holi spirit i strongim tok.” (Efe. 1:13, 14) Ol dispela Kristen inap tok olsem holi spirit “i tokaut,” o kamapim klia long ol olsem ol bai kisim blesing long heven.—Rom 8:16.
^ par. 5 MINING BILONG TOK: Mak. Dispela mak inap senis. Tasol sapos Kristen i stap gut long God, em bai kisim mak bilong i stap oltaim paslain long em i dai, o paslain liklik long traipela hevi tru i kirap.—Efe. 4:30; Rev. 7:2-4; lukim “Askim” long Wastaua bilong Epril 2016.
^ par. 10 Bilong kisim sampela save moa long mining bilong dispela tok “bon gen,” lukim Wastaua bilong Epril 1, 2009, p. 3-12.
SINGSING 27 [9] Ol Pikinini Bilong God i Kamap Klia
^ par. 57 STORI BILONG PIKSA: Maski ol i kalabusim yumi bikos yumi holimpas bilip o yumi stap fri long autim tok na skulim ol man long tok i tru, yumi inap bilip na wet long kisim laip long graun taim Kingdom Bilong God i bosim graun.
