1, 2. ¿Ambe úkuarhispi jurhiatikua Pentekostesirhu uéxurhini 33 jimbo?

DOMINGU máespti tsípa, Pentekostesirhu uéxurhini 33 jimbo, ka Jerusaleni, ma 120 chúxapatichaksï tánguarhintatixapti kʼumanchikueri kuartu ma jimbo enga karhakua japka (Uku. 1:13-15; 2:1). Máru jurhiatikuecha antesi, Jesusi arhiaspti imeri chúxapatichani eskaksï imani kʼéri ireta jimbo pakarapiringa, jimbokaksï ambakiti ambe intsïnhapiringa (Uku. 1:4, 5). ¿Ambe úkuarhispi?

² “Ma repentku kuraakuarhispti ma ruidu auandarhu uératini komueska enga xáni uinhamu tarhiajka ka uinintaspti imani kʼumanchikua jimbo”. Jimajkani, Jesusiri chúxapatichaksï exespti “ma chpirini jásï enga etsakurhipka ka andajtsikueraani imechani”, ka iáminduechaksï “uinispti Espiritu Santu” (Uku. 2:2-4). Ísï úparini, Jeoba espiritu santu íntsaaspti imani chúxapatichani (Uku. 1:8). Jeoba imechani orheta erakuaspti espiritu santu jimbo * ka íntsaaspti sésikua paraksï úni Jesusi jingoni juramuni auandarhu.

3. ¿Andiksïsï seguru japi ima kristianuecha eskaksï espiritu santu jimbo erakunhaspka?

³ Engajtsï cha chúxapati máepiringa enga jima japka, nójtsï  méni mirikurhipiringa ambe enga jiáni úkuarhipka. Chpirini jásï máksïni andajtsïkueraspti ka chájtsï uénaspka mámaru jásï idioma uandani (Uku. 2:5-12). ¿A no eskajtsï seguru japiringa eskajtsï espiritu santu jimbo erakunhaspka? Peru imecha engaksï espiritu santu jimbo erakukatejka, ¿Tata Diosï májkueni erakuasïni iáminduechani? Nómbe. Ju je exeni andichisï ísï uandajki.

4. ¿Jeoba májku tiempu jimbo pʼímarhiaspi primeru siglurhu anapu kristianuechani paraksï auandarhu nirani? Uandanta je.

⁴ Ju je orheta exeni káni erakunhasïni nema espiritu santu jimbo. No solu ima 120 kristianuechaksï erakunhaspti espiritu santu jimbo Pentekostesirhu uéxurhini 33 jimbo. Ísï tátsekua ima mismu jurhiatikua jimbo, máteru 3,000 kʼuiripuechaksï intsïnhaspti espiritu santu ísï eska Jesusi na aiakuapka. I 3,000 kʼuiripuechaksï jiáni erakunhaspti engaksï itsï atakuarhipka (Uku. 2:37, 38, 41). Peru ísï tátsekua, nóksï iámindu erakukatecha intsïnhaspti erokuarhikua para auandarhu nirani jiáni engaksï itsï atakuarhipka. Samaritanuechaksï ísï tátsekua erakunhaspti engaksï na itsï atakuarhipkia (Uku. 8:14-17). Ka Tata Diosï jiáni erakuaspti Korneliuni ka imeri kʼumanchikuarhu anapuechani engaksï nótki itsï atakuarhini japka, ambe ma enga no méni ísï úkuarhini japka (Uku. 10:44-48).

5. Eska na arhijka 2 Korintu 1:21, 22, ¿ambe úkuarhisïni enga nema espiritu santu jimbo erakunhajka?

⁵ Iásï, ju je exeni ambe enga úkarhijka jiáni enga nema espiritu santu jimbo erakunhajka. Uénani jámani, jamberiksï máru no úni jarhajti kurhanguni andisï Jeoba imechani erakua. Ka jamberi máteru erakukatechaksï ménderueni pʼikuarherajti. Néna uéjkini, apostuli Pablu uandasïndi ambe ma enga úkuarhijka iámindu erakukatecha jingoni: “Desdekajtsï jakajkuka imani, mindakata jarhaskajtsï * imani jingoni Espiritu Santuni jimbo engajtsï eiaminhaka, enga jindeka ma mínda engajtsï intsïnhaka parajtsï seguru jatsini chári erensiani” (Efes. 1:13, 14). Ísïsti, Jeoba úrasïndi imeri espiritu santuni paraksï imecha meru seguru jarhani eska  Tata Diosï erakuaskia. Jimajkani, espiritu santu jindesti ambe engaksï íntsinhaka paraksï “seguru jatsini” eskaksï sánderu orhepani irekaaka para méntkisï jini auandarhu ka no ixú Echerirhu (arhinta je 2 Korintu 1:21, 22).

6. ¿Ambe jatsiski para úni erakukata ma para úni auandarhu nirani?

⁶ Enga kristianu ma espiritu santu jimbo erakunhajka, ¿arhikuekasïni eska meru segurueskia eska auandarhu niuaka? Nómbe. Solu arhikuekasïndi eska pʼímarhinhaska. Peru jatsisti para miáni arini ambe: “Ermanuecha, sánderu mintsita jingoni jánguarhi je xarhatakuarhini eskajtsï sési jimbo ióarhinhaska ka erakukatentsï”, jimboka engajtsï seguiriska iámindu ini ambe úni, “nójtsï méni terongutanhaaka” (2 Ped. 1:10). Ísï jimbo, nájkiruka kristianu ma erakukata jauakia, uáti nirani auandarhu solu enga no méni jurajkuska Jeobani (Filip. 3:12-14; Ebr. 3:1; Jaŋ. 2:10).

7. ¿Néna mítesïni nema eska pʼímarhinhaska para auandarhu nirani?

⁷ Jiájkani, ¿néna mítesïni nema eska pʼímarhinhaska para auandarhu nirani? Exentasïngachi mókuntskuani imani uandakuecharhu enga Pablu karakuapka imechani engaksï Roma japka ka engaksï ióarhinhapka paraksï pímbinhasïni. Arhiaspti: “Chájtsï no pʼiraska ma espirituni engaksïni jántspiri uáka parajtsï ménderu chéni pʼikuarherani, sino parakajtsï indeni espirituni engajtsï jimbo pʼíkunhantakia parajtsï jindeni Diosïri uájpecha ka imani jimbo arhisïngajtsï Diosïni: “Abba”, enga arhikuekajka “Táti”. Ka mismu Diosïri Espiritu pʼikuastasïndi juchari espirituni eskachi jindeska Diosïri uájpecha” (Rom. 1:7; 8:15, 16). Ísï jimbo, imeri espiritu santu jimbo Tata Diosï aianguasïndi erakukatechani eskaksï ióarhinhaska para auandarhu nirani (1 Tes. 2:12).

8. Eska na arhijka 1 Juanu 2:20, 27, ¿nénachi míteski eskaksï imecha engaksï erakukateka no uétarhinchasïnga eska máteru nema arhiauaka eskaksï meru erakukateska?

⁸ Jeoba úsïndi eskaksï imecha engaksï pʼímarhinhaka para auandarhu nirani, meruksï mintsita jingoni seguru jauaka (arhinta je 1 Juanu 2:20, 27). Ísïsti, májkueni eska iámindu kristianuecha, erakukatechajtuksï uétarhinchasïndi eska Jeoba jorhendauaka imeri kúnguarhikuani úraparini. Peruksï no uétarhinchasïndi eska máteru nema arhiauaka eskaksï meru erakukateska. Jeobaesti enga újka eskaksï meru seguru jauaka úraparini imeri espiritu santuni, enga jindeka sánderu kʼéri uinhapikua.

9. Eska na arhijka Efesu 1:18, ¿ambe úkuarhinchasïni ima enga Tata Diosï erakujka para auandarhu irekani?

⁹ Ini jurhiatikuecha jimbo, jamberiksï sáno iámindu Tata Diosïri marhuaricha úkua jukanchajti kurhanguni na enga pʼikuarherajka ima enga Jeoba erakuka para auandarhu nirani. ¿Andiksïsï úkua jukanchajki kurhanguni? Jimbokaksï imecha no erakukateska. Tata Diosï kuerauasti kʼuiripuechani paraksï irekani para méntkisï ixú Echerirhu no jini auandarhu (Gén. 1:28; Sal. 37:29). Peru erakuasti máru paraksï auandarhu irekani. Ísï jimbo jiáni enga erakuaajka, úsïndi eska imecheri erokuarhikua ka imecheri eratsikua mátirku mójtakurhiaka ka eskaksï tsitiaka auandarhu irekani (arhinta je Efesu 1:18).

10. ¿Ambe arhikuekasïni ménderu kánguarhinhantani?

¹⁰ Enga kristianu ma, espiritu santu jimbo erakunhajka, ménderu kánguarhinhantasïndi o iótakuarhu kánguarhinhani. * Ístu Jesusi uandaspti eska nema no úsïnga aianguni imani enga no erakukateka na enga pʼikuarherajka ima enga ménderu kánguarhinhantaka o enga espiritu jimbo kánguarhinhantaka (Juanu 3:3-8).

11. Enga kristianu ma na erakunhajkia, ¿néna mójtakurhisïni imeri eratsikua?

 ¹¹ Enga kristianu ma na erakunhajkia, ¿néna mójtakurhisïni imeri eratsikua? Antesi, kánikua jukaparharasïrendi míteni eska irekapiringa para méntkisï ixú Echerirhu. Meru uékasïrendi exeni na enga Jeoba kʼámajkuaka iámindu no sési jásï ambe ka Paraisu ma úntani Echerini. Jamberi eranhaskendi erontani imeri familiarini o amiguni ma enga tsintaaka. Peru iásï enga erakukatekia, nóteru májkueni eratsesïndia. ¿Andi? No jindesti jimboka nóteru tsitisïnguia Echerirhu irekani, ni uandanhiatecha jimbo, ni jimboka uénaska ísï exeni eska kuatantaaka irekani para méntkisï ini parhakpinirhu. Jeoba úrasti imeri espiritu santuni para ima iásï ménderueni eratsenia ka máteru erokuarhikua jatsini.

12. Eska na arhijka 1 Pedru 1:3, 4, ¿néna pʼikuarherasïni erakukata ma enga eratsejka ambe enga erokuarhini jaka?

¹² Ima kristianu enga erakunhajka, jamberi ísï pʼikuarherajti eska no jukanchaska xáni kʼéri kóntperata ma intsïnhani, peru meru seguru jarhasti eska Jeoba erakuska. Enga eratsejka ambe enga erokuarhini jaka, kánikua tsípisïndi ka jukaparharani indeni kóntperatani (arhinta je 1 Pedru 1:3, 4).

13. ¿Nénaksï exesïni erakukatecha imecheri irekuani ixú Echerirhu?

¹³ ¿Arhikuekasïni i ambe eskaksï erakukatecha uékasïnga uarhini? Apostuli Pablu mókuntasïndi ini kurhamarhikuani, ima uandaspti: “Ísï jimbochisï uandanhiaparini uerajka jucha engachi irekani jaka ini kuerpuni jimbo, no jimbokachi uékapiringa nómbe kuerpu jatsini, sino jimbokachi uékasïnga jatsini jimbanhi kuerpuni paraka tsípikua jimbo andanhaaka inde ambe enga uarhijka” (2 Kor. 5:4). Jimajkani, no arhikuekasïndi eskaksï erakukatecha kuatantaskia ixú irekani ka eskaksï uékasïnguia sóntku uarhini. Sánderu sési, kánikuaksï tsípikua jingoni irekaxati ka uékasïndiksï pauani pauani sési marhuakuni Jeobani imecheri familiaricha ka amiguecha jingoni. Peru no arhiparini ambe engaksï úni jaka, méntkisïksï miáni jarhasïndi ambakiti erokuarhikuani engaksï jatsika (1 Kor. 15:53; 2 Ped. 1:4; 1 Juanu 3:2, 3; Jaŋ. 20:6).

14. ¿Ambe ka ambe xarhatasïni eska nema no erakukateska espiritu santu jimbo?

¹⁴ Jamberijtsï kurhamarhikuarhijka sinksïni Jeoba chánksïni erakuski espiritu santu jimbo. Enga ísïka, eratsianta je arini kurhamarhikuechani: ¿kánikuajtsï tsitisïni úni ambe enga Jeoba uéjka?, ¿kánikua tsípikua jingontsï aianhpisïni?, ¿kánikuajtsï tsitisïni Bibliani estudiarini ka jorhenguarhini asta imani ambe “enga sánderu úkua jukaka”?, ¿exesïntsï eskaksïni Jeoba újchakurasïnga na engajtsï xáni jánguarhintajka aianhpikuarhu?, ¿ísïjtsï pʼikuarherasïni eskajtsï jatsiska para máteruechani jarhuataani paraksï ambakiti pájperakua ma jatsini Jeoba jingoni?, ¿exesïntsï eskaksïni Jeoba jarhuataskia mámaru ambe jimbo? (1 Kor. 2:10). Engajtsï mókuantaska eska jo, ¿arhikuekasïni i ambe eskajtsï erakunhaskia para auandarhu nirani? Nómbe, jimboka iámindu Jeobaeri marhuaricha, nájkirukaksï erakukateka o nómbe, uátiksï májkueni pʼikuarherani eska cha. Ístu, espiritu santu jimbo, Jeoba uáti májkueni uinhapikua íntsaani imeri marhuarichani no arhiparini nákiua imecheri erokuarhikua. Enga cha no seguru jaka eskajtsï espiritu santu jimbo erakunhaska, inde ambe arhikuekasïndi eskajtsï no erakukateska. Imecha engaksï erakukateka, nóksï kurhamarhikuarhisïndi sinksï erakukateski o nómbe; ¡imechaksï meru seguru jarhasïndi!

15. ¿Nénachi míteski eskaksï no iámindu engaksï espiritu santu intsïnhajka erakukateska para auandarhu nirani?

¹⁵ Bibliarhu, uánikua kʼuiripuecheri uandasïndi engaksï intsïnhapka espiritu santu,  peruksï no jatsispti erokuarhikua para auandarhu nirani. Por ejemplu, Dabidi uánikua ambe úspti espiritu santu jimbo (1 Sam. 16:13). Espiritu santu jarhuataspti para uánikua ambe kurhanguni Jeobaeri ambe nájkiruka úkua jukapka ka ístu jarhuataspti para uánikua Bibliaeri partichani karaani (Mar. 12:36). Nájkiruka inde ambe úpka, apostuli Pedru uandaspti eska Dabidi ‘no kenchintaspka auandarhu’ (Uku. 2:34). Ka ístu, Juanu el Bautista uinirhixapti “espiritu santu” (Luk. 1:13-16). Ka Jesusi mismu uandaspti eska “no méni kánguarhinhaska ma enga sánderu kʼéri ambeka ka eska Juanu [el] Bautista”. Peru uandaspti eska Juanu no japiringa auandarhu anapu Juramukuarhu (Mat. 11:10, 11). Jeoba imeri espiritu santuni úraspti para uinhapikua íntsaani ini kʼuiripuechani paraksï kʼéri ambe úni, peru no para erakuani paraksï auandarhu nirani. ¿Í ambe arhikuekasïni eskaksï no xáni sési marhuakuspka Jeobani, ísï eskaksï imecha engaksï erakunhaka para auandarhu juramuni? Nómbe, solu arhikuekasïndi eska Jeoba Paraisurhu tsítantauaka ixú Echerirhu (Juanu 5:28, 29; Uku. 24:15).

16. ¿Nániksï uékasïni irekani sáno iámindu erachicha ka pirenchicha?

¹⁶ Ini jurhiatikuecha jimbo, sáno iámindu Tata Diosïri marhuaricha engaksï Echerirhu irekani jaka, nóksï jatsisti imani erokuarhikuani para auandarhu nirani. Ísï eska Abraani, Sara, Dabidi, Juanu el Bautista ka máteru uánikua acheeticha ka uarhiiticha enga Biblia uandaajka, uékasïndiksï Echerirhu irekani enga Tata Diosïri Reinu juramuni jauakia (Ebr. 11:10).

17. ¿Náki kurhamarhikuechanchi mókuantauaka máteru semana jimbo?

¹⁷ Útasïksï máru erakukatecha Echerirhu irekaxati. Jimbochisï ménisï kurhamarhikuarhijka máru ambe (Jaŋ. 12:17). Por ejemplu, ¿nénaksï jatsiski para exekuarhini erakukatecha? Enga juchari kúnguarhikuarhu anapu ma uénaaka arhani kurhinda ka binu Miántskuarhu, ¿nénachi jatsiski para kámani? ¿Jatsiskichi para uandanhiani engaksï mándani uéxurhini sánderu uánini jaka imecha engaksï uandajka eskaksï erakukateska? Máteru semana jimbochi mókuantauaka ini kurhamarhikuechani.