1-2. Kintu ki ekirukuhuniriza ekyabaireho ha kiro kya Pentekote ey’omu mwaka gwa 33 C.E.?

KYALI kiro kya Sande omu bwire bwa nyenkyakara omu rubuga Yerusalemu omu mwaka gwa 33 C.E., ha kiro kya Pentekote. Ekitebe ky’abegeswa nka 120 baali besoroliize omu nju omu kisiika ekya haiguru. (Eng. 1:13-15; 2:1) Ebiro bike enyumaho, Yesu akaba aragiire abegeswa be kwikara omu Yerusalemu habwokuba bakaba nibagenda kutunga ekisembo eky’embaganiza. (Eng. 1:4, 5) Kiki ekyahondireho?

² “Ahonaho okuhirra kukaruga ha iguru, nkekiyaga okukihirra namani.” Iraka likahulirwa omu nju yoona. Hanyuma, endimi nk’ez’omurro zikaakira ha mitwe y’abegeswa kandi boona “baijura omwoyo ogurukwera.” (Eng. 2:2-4) Omu mulingo gunu ogurukuhuniriza, Yahwe akasesaho ekitebe eki omwoyo gwe ogurukwera. (Eng. 1:8) Abegeswa banu nubo babandize kuseswaho amagita * kandi n’okutunga okunihira okw’okulema hamu na Yesu omu iguru.

3. Habwaki abageswa ha kiro ekya Pentekote bakaba bataine okugurukyagurukya kwona ngu baseserweho amagita?

³ Kakuba w’abaire omu h’abegeswa abakaba besoroliize omu kisiika eki, busaho kugurukyagurukya wakwikaire noijuka ekintu ekyabaireho. Kitekerezeeho, ekintu ekirukusisana n’omurro kwemerra ha mutwe gwawe kandi okatandika n’okubaza omu  ndimi! (Eng. 2:5-12) Wakubaire otaine kugurukyagurukya kwona ngu oseserweho amagita. Tugambe ngu boona abakomerwe kugenda omu iguru batunga omwoyo ogurukwera omu mulingo nugwo gumu? Nangwa. Kinu nitukimanya tuta?

4. Boona abakomerwe kugenda omu iguru omu kyasa eky’okubanza bakatunga omwoyo ogurukwera omu mulingo nugwo gumu? Soborra

⁴ Leka tubazeeho obwire nambere omuntu asobora kuseserwaho amagita. Ekitebe eky’Abakristaayo nka 120 tibali nubo bonka abaseserweho omwoyo ogurukwera ha kiro ekya Pentekote omwaka gwa 33 C.E. Kiro eki kyonyini, abegeswa abandi nka 3,000 nabo bakaseswaho omwoyo ogurukwera. Banu bakaseswaho amagita hanyuma y’okubatizibwa. (Eng. 2:37, 38, 41) Omu myaka eyahondiireho, Abakristaayo abamu batasesweho amagita hanyuma y’okubatizibwa. Abasamaliya bakaseswaho amagita harabireho obwire hanyuma y’okubatizibwa. (Eng. 8:14-17) Kandi omulingo Koruneryo n’ab’omu ka ye baseserweho amagita nugwo gurukukira kuhuniriza habwokuba bakaba batakabatiziibwe.​—Eng. 10:44-48.

5. Kusigikirra ha 2 Abakolinso 1:21, 22, kiki ekibaho omuntu obwaseswaho amagita?

⁵ Leka tubazeeho ekibaho omuntu obwaseswaho amagita. Abamu abaseswaho amagita kibanza kubagumira muno kwikiriza ngu Yahwe abakomere. Nibasobora n’okwekaguza, ‘Habwaki Ruhanga ankomere?’ Abandi basobora kutahunirra. Omulingo omuntu ayehurra tikiri kikuru. Omukwenda Paulo nasoborra ekibaho hali abo boona abaseswaho amagita, nagamba ati: “Obumwaikiriize, Ruhanga akabateekaho akokurorraho * n’akozesa omwoyo ogurukwera ogw’araganiziibwe, nubwo bwakaiso oburukugumya ngu nitwija kutunga obugwetwa bwaitu.” (Bef. 1:13, 14, NW) Nahabweki Yahwe akozesa omwoyo gwe ogurukwera kugumiza kimu Abakristaayo abo nk’oku abakomere. Omu mulingo ogu, omwoyo ogurukwera gukora ‘nk’omukwatirizo [okweraga rundi omurago]’ ogubaheebwa kubagumya ngu omu kasumi ak’omu  maiso nibaija kwikara omu iguru ebiro byona hatali omu nsi.​—Soma 2 Abakolinso 1:21, 22.

6. Omukristaayo anyakuseserweho amagita asemeriire kukora ki kutunga empeera ye ey’omu iguru?

⁶ Kakuba Omukristaayo aseswaho amagita, eki nikimanyisa ngu mpaka alitunga empeera ye ey’okugenda omu iguru? Nangwa. Baitu aba n’akigumya ngu akomerwe kugenda omu iguru. Eki n’obukiraaba kiri kiti, asemeriire kwijuka okutererra kunu: ‘Nukwo bene baitu mweyongere okwekamba okugumiza kimu okwetwa kwanyu nokukomwamu kwanyu, baitu obumura ba nimukora binu timulitabaijuka ebiro byona.’ (2 Pet. 1:10) Nahabweki Omukristaayo n’obwaraaba akomerwe, rundi ayeserwe kugenda omu iguru alitunga empeera ye obwalikara ali mwesigwa.​—Baf. 3:12-14; Baheb. 3:1; Kus. 2:10.

7. Abaseserweho amagita bakimanya bata ngu bakomerwe kugenda omu iguru?

⁷ Omuntu akimanya ata ngu akomerwe kugenda omu iguru? Eky’okugarukamu nitukisanga omu bigambo bya Paulo hali Abakristaayo abakaba bali omu Roma abakaba ‘beserwe okuba abarukwera.’ Akabagambira ati: ‘Mutaheebwe omwoyo ogw’obwiru oguleta okutiina omurundi gundi, baitu mukaheebwa omwoyo ogw’okufooka abaana, kandi habw’omwoyo ogu niyo ensonga habwaki tutokera haiguru ngu, ‘Abba, Isiitwe!’, Omwoyo gwa Ruhanga guha obwakaiso hali omwoyo gwaitu ngu tuli baana ba Ruhanga.’ (Bar. 1:7; 8:15, 16, NW) Nahabweki, Ruhanga akozesa omwoyo gwe ogurukwera kugumya abaseserweho amagita ngu beserwe kugenda omu iguru.​—1 Bas. 2:12.

8. 1 Yohana 2:20, 27 eyoleka eta ngu Abakristaayo abaseserweho amagita tibarukwetaaga abantu abandi kubagambira ngu baseserweho amagita?

⁸ Yahwe aletera emitima n’ebitekerezo eby’abaseserweho amagita kukigumiza kimu ngu abakomere kugenda omu iguru. (Soma 1 Yohana 2:20, 27.) N’obukiraaba kiri kiti, abaseserweho amagita nibetaaga kwegesebwa Yahwe kuraba omu kitebe nk’Abakristaayo abandi. Baitu tikirukwetagisa abandi kubagambira ngu baseserweho amagita. Habwokuba Yahwe aba akozeseze omwoyo ogurukwera, amaani agarukukirrayo kimu omu buhangwa bwona kubamanyisa ngu abakomere!

9. Nk’oku kyolekerwe omu Abefeso 1:18 omuntu obwaseswaho amagita ahinduka omu mulingo ki?

⁹ Abaheereza ba Yahwe baingi kasumi kanu nikisobora kubagumira kwetegereza ekihika ha muntu Ruhanga ow’aba asesereho amagita. Kinu tikirukuhuniriza habwokuba bo tibaseserweho amagita. Ruhanga akahanga abantu kwikara omu nsi ebiro byona hatali omu iguru. (Kub. 1:28; Zab. 37:29) Baitu Yahwe akomeremu abamu kugenda kwikara omu iguru. Nahabweki obw’abasesaho amagita, ahindura okunihira kwabo kandi ahindurra kimu entekereza yabo nukwo batandika kugonza kugenda omu iguru.​—Soma Abefeso 1:18.

10. Nikimanyisa ki kuzaarwa ogwakabiri? (Rora obugambo bwa hansi.)

¹⁰ Abakristaayo obu baseswaho amagita baba ‘bazairwe ogwakabiri,’ rundi bazairwe kuruga ha iguru. * Yesu nauwe akakyoleka ngu tikirukusoboka kusoborra omuntu ow’ataseserweho amagita omulingo omuntu ‘ow’azairwe ogwakabiri’ rundi “anyakuzarwa omwoyo” ayehurra.​—Yoh. 3:3-8.

11. Soborra omulingo entekereza y’omuntu ehinduka obwaseswaho amagita.

¹¹ Abakristaayo obu baseswaho amagita entekereza yabo ehinduka eta? Abakristaayo banu bakaba baine ekihika eky’okwikara omu nsi  ebiro n’ebiro Yahwe obwakaba atakabasesereho amagita. Nibasobora kuba bakaba balindiriire n’ekihika kingi akasumi Yahwe alimaraho ebintu ebibi byona kandi afoole ensi yoona orugonjo orurungi. Nibasobora kuba bateramuga akasisani nibatangirra omunyabuzaale wabo rundi omunywani wabo ayafiire. Baitu hanyuma y’okuseswaho amagita, entekereza yabo ehinduka. Habwaki? Batatandike kutekereza ngu kwomeera omu nsi habw’ebiro n’ebiro kibi. Batahindule entekereza yabo habw’okwetuntura ekihinguraine rundi habw’okubonabona muno. Kandi batatekereze ngu kwikara omu nsi tikyakubasemiize. Baitu, Yahwe akakozesa omwoyo gwe ogurukwera kuhindura entekereza yabo kandi n’okunihira kwabo.

12. Kusigikirra ha 1 Petero 1:3, 4, abaseserweho amagita behurra bata habw’omugisa ogubahairwe?

¹² Omuntu obw’aseswaho amagita nasobora kwehurra ngu omugisa gunu tigumusemeriire. Baitu tasobora kugurukyagurukya nakake Yahwe obwaraaba amukomere. Omutima gwe gwijura okusemererwa kwingi n’okusiima obwatekerezaaho omugisa ogwahairwe.​—Soma 1 Petero 1:3, 4.

13. Abaseserweho amagita behurra bata habwomeezi obu baine kasumi kanu?

¹³ Hati tugambe ngu abaseserweho amagita nibegomba kufa? Omukwenda Paulo nagarukamu ekikaguzo kinu. Akalengesaniza omubiri gwabo n’eheema kandi yagamba ati: ‘Baitu itwe abali omu mubiri [eheema] ntusinda tulemeriirwe: kunu titurukwenda okujurwa, baitu okujwekwa, nukwo okufa kumirwe obwomezi.’ (2 Kol. 5:4) Abakristaayo banu tibatamirwe obwomeezi obw’omu nsi kandi tibarukugonza kufa bwangu. Baitu begondeza omu bwomeezi kandi bagonza kukozesa obwomeezi bwabo kuheereza Yahwe bali n’abanyabuzaale hamu n’abanywani baabo. N’obu baraaba nibakora binu byona, tibebwa okunihira okw’ekitiinisa okubaine okurahikirra omu kasumi ak’omu maiso.​—1 Kol. 15:53; 2 Pet. 1:4; 1 Yoh. 3:2, 3; Kus. 20:6.

14. Biki ebitasemeriire kuletera omuntu kutekereza ngu aseserweho amagita?

¹⁴ N’osobora kuba noyekaguza obworaaba oseserweho amagita. Obukiraaba nukwo kiri, tekerezaaho ebikaguzo binu ebikuru: Oine ekihika ky’amaani eky’okugonza kukora Yahwe eby’agonza? Oyehurra ngu oli mwekambi muno omu mulimo ogw’okutebeza? Oine ekihika eky’okugonza kwega ebintu eby’omwoyo ebigumire ebiri omu Kigambo kya Ruhanga? (1 Kol. 2:10) Noyehurra ngu Yahwe akuhaire emigisa nyingi omu mulimo ogw’okutebeza? Oine ekihika ky’amaani eky’okugonza kukonyera abantu abandi omu by’omwoyo? Oine obwakaiso oburukwoleka ngu Yahwe akukonyire omu miringo erukwahukana omu bwomeezi bwawe? Eky’okugarukamu kyawe ha bikaguzo binu obukiraaba kiri ego, kinu nikigumya ngu okomerwemu kugenda omu iguru? Nangwa, tinukwo kiri. Habwaki? Habwokuba abaheereza ba Ruhanga boona nukwo behuura bati kababe baseserweho amagita rundi nangwa. Kandi Yahwe nasobora kukozesa omwoyo gwe ogurukwera kuha abaheereza be amaani ag’okukora ebintu binu, kababe baine okunihira okw’okugenda omu iguru rundi okw’okwikara omu nsi. Amananu gali, obworaaba nogurukyagurukya ngu oseserweho amagita, eki nikimanyisa ngu tokomerwe kugenda omu iguru. Abo Yahwe abayesere tibagurukyagurukya nakati, baitu bakimanyiire kimu ngu baseserweho amagita.

15. Nitumanya tuta ngu abo boona abatungire omwoyo gwa Yahwe batakomwe kugenda omu iguru?

¹⁵ Omu Baibuli harumu ebyokurorraho bingi eby’abaheereza ba Yahwe abesigwa abatungire omwoyo ogurukwera, baitu abaali bataine  okunihira okw’okugenda omu iguru. Nk’ekyokurorraho, Daudi akaterekerezebwa omwoyo ogurukwera. (1 Sam. 16:13) Omwoyo gukamukonyera kwetegereza ebintu eby’omwoyo ebigumire kandi gwamuterekereza kuhandiika bimu ha bintu ebiri omu Baibuli. (Mar. 12:36) N’obwaraaba yakozere binu byona, omukwenda Petero akagamba ngu Daudi “atagende omu iguru.” (Eng. 2:34) Yohana Omubatizi akaba ‘aijwire omwoyo ogurukwera.’ (Luk. 1:13-16) Kandi Yesu akagamba ngu busaho muntu n’omu akaba nakira Yohana, baitu akongera yagamba ngu Yohana tali omu hali abo abarukugenda omu Bukama obw’omu iguru. (Mat. 11:10, 11) Yahwe akakozesa omwoyo gwe ogurukwera kusobozesa abasaija abo kukora ebintu ebirukuhuniriza, baitu atagukozese kubakoma kugenda omu iguru. Kinu kyali nikimanyisa ngu kwikiriza kwabo kwali kuceke obw’okukulengesaniza n’okwabo abarukugenda omu iguru? Nangwa. Oihireho nikimanyisa ngu Yahwe naija kubahumbuura abahe obwomeezi omu rugonjo orurungi omu nsi.​—Yoh. 5:28, 29; Eng. 24:15.

16. Abaheereza ba Yahwe abarukira obwingi omu kasumi kanu balindiriire mpeera ki?

¹⁶ Abaheereza ba Yahwe abarukukira obwingi kasumi kanu tibaine okunihira okw’okugenda omu iguru. Baitu balindiriire n’ekihika kwikara omu nsi hansi y’Obukama bwa Ruhanga kusisanaho na Iburahimu, Sara, Daudi, Yohana Omubatizi, hamu n’abasaija n’abakazi abandi baingi abarukubazibwaho omu Baibuli.​—Baheb. 11:10.

17. Bikaguzo ki ebiturukwija kugarukamu omu kicweka ekirukwongeraho?

¹⁷ Nk’oku omu kasumi kanu haroho Abakristaayo abaseserweho amagita, nitusobora kwekaguza ebikaguzo ebimu. (Kus. 12:17) Ekyokurorraho, abaseserweho amagita basemeriire kwetwaza bata? Kakuba omuntu omu kitebe kyanyu atandika kulya ha mugati kandi akanywa naha viino, osemeriire kumutwaza ota? Kandi tusemeriire kweralikirra ngu omuhendo ogwabo abarukugamba ngu baseserweho amagita gwikara nigweyongera? Ekicweka ekirukwongeraho nikiija kugarukamu ebikaguzo ebi.