1, 2. ¿Bin-a te chajpnax kʼot ta pasel ta skʼajkʼalel Pentekostes ta jaʼbil 33?

TA SAB domingo ta skʼajkʼalel te Pentekostes ta jaʼbil 33, stsoboj sbaik 120 ta tulniwan jnopojeletik ta schaʼkajal na ta Jerusalén (Hech. 1:13-15; 2:1). Cheʼoxeb kʼajkʼal ta nailto albotik yuʼun Jesús te yakuk xjilik ta Jerusalén yuʼun ay bin kʼax jelawen yutsil ya yichʼik akʼbeyel (Hech. 1:4, 5). ¿Bin kʼot ta spasel?

² «Repente nax ay bin xjuʼet cʼopoj tal ta chʼulchan hich bin utʼil tulan icʼ, hul spuhl sba ta yutil na». Te jnopojeletik «la yilic chicnaj hich te bin utʼil yat cʼahcʼ te la spuc sba ta stojol jujutuhl. Ta spisilic noj ta yoʼtanic te Chʼul Espíritu» (Hech. 2:2-4). Chajpnax ta aʼiyel-a te bitʼil te Jehová la yakʼtiklanbey te schʼul espiritu te jnopojeletik-abi (Hech. 1:8). Jaʼik te machʼatik nail la yichʼik tsael ta swenta te chʼul espiritu * yuʼun ya xjuʼ xbajtik ta wentainwanej sok Jesús ta chʼulchan.

3. ¿Bin yuʼun jkʼaxel seguro ayik te jchʼuunjeletik te la yichʼik tsael ta swenta te chʼul espiritue?

³ Te tey ayukat-a te kʼalal jich kʼot ta spasele, maniwan ayuk bin-ora ya xchʼay ta awoʼtan te bin kʼot ta pasele. Ay bin chiknaj ta ajol te pajal sok kʼajkʼ yilele sok kajat ta kʼop ta yanyantik kʼopiletik  (Hech. 2:5-12). Ya jnaʼtik te seguro ayat te la awichʼ tsael ta swenta te chʼul espiritu te jichuke. Pero, ¿pajalbal te bin-ora ya yichʼik tsael yuʼun Dios te machʼatik ya xbajtik ta chʼulchan sok spisilbal-ora chajpnax ya xkʼot ta pasel te bitʼil ya yichʼik tsaele? Maʼuk. ¿Bin-utʼil ya jnaʼtik? Kilbeytik skʼoplal.

4. Ta sbabial siglo, ¿pajalbal te bin-ora la yichʼik tsael yuʼun Dios te machʼatik ya xbajtik ta chʼulchane? Cholbeya skʼoplal.

⁴ Ta nail kilbeytik skʼoplal te bin-ora ay machʼa ya yichʼ tsael ta swenta te chʼul espiritue. Ma jaʼuknax la yichʼik tsael ta swenta chʼul espiritu te 120 ta tulniwan jnopojeletik ta Pentekostes ta jaʼbil 33, melel ta kʼajkʼal-abi 3,000 ta tulniwan ants winiketik la yichʼik tsael yuʼun te chʼul espiritu te la yalbey jilel skʼoplal te Jesuse. La yichʼik tsael te kʼalal la yichʼik jaʼe (Hech. 2:37, 38, 41). Pero cheʼoxeb jaʼbil ta patil ay machʼatik ma jaʼuk la yichʼik tsael-a te kʼalal la yichʼik te jaʼe. Te samaritanoetik la yichʼik tsael te kʼalal kʼaxemix tiempo te yichʼojik jaʼ-ae (Hech. 8:14-17). Pero yan stukel te Cornelio sok te machʼatik ay yuʼun ta sna la yichʼik tsael te kʼalal mato yichʼojik jaʼ-ae (Hech. 10:44-48).

5. Jich bitʼil ya yal 2 Corintios 1:21, 22, ¿bin ya xkʼot ta pasel kʼalal ay machʼa ya yichʼ tsael ta swenta te chʼul espiritue?

⁵ Ta ora ini kalbeytik skʼoplal te bin ya xkʼot ta pasel kʼalal ay machʼa ya yichʼ tsael ta swenta te chʼul espiritue. Ta nail ayniwan wokol ya xkʼot ta yoʼtan te bitʼil tsabil yuʼun te Jehovae sok yaniwan snop te bin yuʼun jaʼ la yichʼ tsaele. Ay yantik te yan-a te bin yaʼiyel ya yaʼiy sbaike. Chikan te bin-utʼil ya yaʼiy sbaike, te jpuk-kʼop Pablo ya yal te bin ya xkʼot ta pasel ta stojol spisil te machʼatik ya yichʼik tsaele, jich la yal: «Te cʼalal la achʼuhunic la awichʼic asellohilic, * ha te Chʼul Espíritu te halbil ya xtale. Te Chʼul Espíritu ha seña te quichʼojtic te ya yacʼ ta naʼel te ya me xʼaʼbotic quichʼtic te bin halbil yuʼun Dios» (Efes. 1:13, 14). Te Jehová ya stuuntes te schʼul espiritu yuʼun ya yakʼbeyik snaʼ ta jamal te tsabilik yuʼune. Jich yuʼun te chʼul espiritu jaʼ ya x-akʼbotik snaʼ ta jamal te ya smaliyik te kuxinel ta sbajtelkʼinal  ta chʼulchan, ma jaʼuk ta Balumilal (kʼopona 2 Corintios 1:21, 22).

6. ¿Bin ya skʼan ya spas te machʼa tsabil yuʼun ya xjuʼ ya xbajt ta chʼulchan?

⁶ Teme ay machʼa la yichʼ tsael yuʼun te chʼul espiritue, ¿jaʼbal ya skʼan ya yal te yananix xbajt ta chʼulchan-ae? Maʼuk. Jaʼnax ya skʼan yal te tsabil yuʼun ya xjuʼ ya xbajt ta chʼulchan. Pero ya skʼan ayuk ta yoʼtan te jultesel oʼtanil ini: «Quermanotac, acʼahic xan fuersa te smelelil ya xcʼoht te iqʼuel soc te tsahel awuʼunic, como teme hich yac apasic, ma jaymehl ya xyahlex» (2 Ped. 1:10). Jich yuʼun manchukme ay machʼa tsabil yuʼun ya xbajt ta chʼulchan jaʼnaxme ya xbajt teme jun yoʼtan ta stojol te Jehovae (Filip. 3:12-14; Heb. 3:1; Apoc. 2:10).

7. ¿Bin-utʼil ya snaʼik te ikʼbilik yuʼun ya xbajtik ta chʼulchan te machʼatik tsabilike?

⁷ Jich yuʼun, ¿bin-utʼil ya snaʼ te ikʼbil yuʼun ya xbajt ta chʼulchan te machʼa tsabile? Ya jnaʼtik ta lek ta swenta te bin la yal te Pablo ta stojol te machʼatik nainemik ta Roma sok te ikʼbilik yuʼun chʼultesbil ya xkʼotik (Rom. 1:7). ¿Bin la yal te Pabloe? Jich la yal: «Melel te Espíritu te acʼbotex awiqʼuique, ma jaʼuc ya yaqʼuex xan ta mosoil yuʼun te xiwele. Melel jaʼ ya yaqʼuex ta alnichʼan yuʼun te Diose. Jaʼ swentail te jich ya caltique: “Jtat”, te xootic ta stojole. Jaʼ nix te Espíritu te ya xcʼopoj ta coʼtantique, te ya yacʼ jnaʼtic te joʼotic yal-snichʼanotic te Diose» (Rom 8:15, 16, TZOXCH). Ta swenta te chʼul espiritu ya xjuʼ x-akʼbotik snaʼ yuʼun te Dios te ikʼbilik yuʼun ya xbajtik ta chʼulchan (1 Tes. 2:12).

8. Jich bitʼil ya yal 1 Juan 2:20, 27, ¿bin yuʼun jnaʼojtik te ma jaʼuk ya smaliyik te ay machʼa ya x-albotik yuʼun te tsabilike?

⁸ Jaʼnix te Jehová ya yakʼ te mero seguro ayik te machʼatik ya xbajtik ta chʼulchan te yuʼun-nix ikʼbilik-ae (kʼopona 1 Juan 2:20, 27). Jaʼnix jich ya skʼan ya yichʼik nojptesel yuʼun Jehová ta swenta te kongregasion jichnix bitʼil te yantik j-abatetik yuʼune. Pero ma jaʼuk ya smaliyik te ay machʼa ya x-albotik yuʼun te tsabilike, melel akʼbilik snaʼ ta jamal yuʼun te Jehová ta swenta te schʼul espiritu, te jaʼ te yuʼel te maʼyuk bin ya spaje.

9. Jich bitʼil ya yal te Efesios 1:18, ¿bin ya xjelon ta spensar te machʼa ya yichʼ tsael yuʼun te Diose?

⁹ Jteb ma spisil te j-abatetik yuʼun Dios maniwan ya xkʼot ta yoʼtanik te bin ya xkʼot ta pasel ta stojol te kʼalal ay machʼa ya yichʼ tsael yuʼun te Jehovae. Stalel te ma xkʼot ta yoʼtanike, melel maba tsabilik stukelik. Te Jehová la spas te ants winiketik yuʼun ya xkuxinik sbajtelkʼinal liʼ ta Balumilal, ma jaʼuk ta chʼulchan (Gén. 1:28; Sal. 37:29). Pero ay machʼatik stsaoj yuʼun ya xkuxinik ta chʼulchan. Jaʼ yuʼun te kʼalal ay machʼa ya yichʼ tsael, te Jehová jkʼaxel ya sjelbey te spensar sok te bin ya smaliy swenta ya skʼan ya xkuxin ta chʼulchan (kʼopona Efesios 1:18).

10. ¿Bin ya skʼan ya yal te ay machʼa «ya xchaʼayin xan»? (Ilawil-euk te nota).

¹⁰ Kʼalal ay machʼa ya yichʼ tsael ta swenta te chʼul espiritu «ya xchaʼayin xan». * Te Jesús jaʼnix jich la yakʼ ta naʼel te wokol ta cholbeyel yaʼiy te machʼa maba tsabil te bin-utʼil ya yaʼiy sba te machʼa «ya xchaʼayin xan» o te «ya xʼayin ta scuenta te Espíritu» (Juan 3:3-8).

11. ¿Bin ya xjelon ta spensar te machʼa tsabil yuʼun ya xbajt ta chʼulchane?

¹¹ ¿Bin ya xjelon ta spensar te machʼa tsabil yuʼun ya xbajt ta chʼulchane? Ta nailto sok spisil yoʼtan yak ta smaliyel-a te kuxinel sbajtelkʼinal liʼ ta Balumilal. Jaʼ yak ta smaliyel-a te bin-ora ya slajin Jehová spisil te bin chopol  sok te ya xkʼot ta jun Nichimal Kʼinal te Balumilale. Ayniwan ya snop ta yoʼtan te ya smey te sfamilia o yamigo te ya xchaʼkuxaje. Pero te kʼalal la yichʼ tsael ta swenta te chʼul espiritue jelon ta jkʼaxel te spensare. ¿Bin yuʼun? Ma jaʼuk yuʼun te ma smulanix te ya xkuxin liʼ ta Balumilale. Jaʼnix jich ma jaʼuknax ta swenta te bintik ya smel yoʼtan yuʼun o te swokol, sok ma jaʼuk yuʼun te kaj snop te yaniwan xchʼajub ta kuxinel sbajtelkʼinal liʼ ta Balumilale. Jaʼ ta skaj te jelbot spensar yuʼun te Jehová swenta jaʼ ya smaliy te ya xkuxin ta chʼulchane.

12. Jich bitʼil ya yal 1 Pedro 1:3, 4, ¿bin-utʼil ya yaʼiy sba te machʼa tsabil yuʼun ya xbajt ta chʼulchane?

¹² Te machʼa tsabil yuʼun ya xbajt ta chʼulchane ayniwan jich ya yaʼiy te ma snujpʼ te ya yichʼ te mukʼul majtanil-abi, pero seguro ay ta jkʼaxel te tsabil yuʼun te Jehovae. Jich yuʼun kʼalal ya snop ta yoʼtan te bin yak ta smaliyele ya x-akʼbot stseʼelil yoʼtan sok ya yal wokol yuʼun (kʼopona 1 Pedro 1:3, 4).

13. ¿Bin yilel ya yilik te skuxlejalik liʼ ta Balumilal te machʼatik tsabilik yuʼun ya xbajtik ta chʼulchane?

¹³ ¿Jaʼbal ya skʼan ya yal-abi te ya skʼan ya xlajik te machʼatik tsabilik yuʼun ya xbajtik ta chʼulchane? Te jpuk-kʼop Pablo ya yakʼbey sujtib te jojkʼoyel-abi. Jich la yal: «Te jayeb cʼaal ya jnaintic in jbaqʼuetaltic to, yacotic ta ajcʼan, yuʼun ay bayal jwocoltic ya caiytic. Ma yuʼunuc ya jcʼantic te ya jloqʼuestic te pocol jbaqʼuetaltique. Jaʼ ya jcʼantic te yacuc jlaptiquix ta ora te yachʼile swenta yuʼun te bila ya xlaje, ya me xcʼatpʼuj ta swenta cuxinel» (2 Cor. 5:4, TZOXCH). Mame yuʼunuk ma smulanikix te kuxinel sok te ya skʼanik te yakuk xlajikixe. Maʼuk, ya smulanbeyik yutsilal te kuxinel sok ya smulanik sjokinel te sfamiliaik sok yamigotakik yuʼun jujun kʼajkʼal ya x-abatinik ta stojol te Jehovae. Jich yuʼun chikan te bin yakik ta spasele, spisil-ora ay ta yoʼtanik te mukʼul majtanil yakik ta smaliyele (1 Cor. 15:53; 2 Ped. 1:4; 1 Juan 3:2, 3; Apoc. 20:6)

14. ¿Bintik ya xjuʼ ya jpastik te ma jaʼuk ya yakʼ ta naʼel te tsabilotik yuʼun ya xbootik ta chʼulchan?

¹⁴ Ayniwan ya xtal ta awoʼtan teme tsabilat yuʼun te Jehová ta swenta te schʼul espiritue. Teme jich ya anope mukʼ skʼoplal te jich ya ajojkʼoybey aba: ¿Jichbal ya awaʼiy te mero ya amulan spasbeyel skʼanojel yoʼtan te Jehovae?, ¿yabal amulan ta lek scholel te skʼop Diose?, ¿yabal amulan ta jkʼaxel skʼoponel sok snopel te Bibliae?, ¿jichbal ya awil te yakʼojbat bayal bendision te Jehová ta swenta te bintik apasoj ta scholel te skʼope?, ¿jichbal ya awaʼiy te mukʼ skʼoplal ta awoʼtan te ya akoltay te yantik yuʼun lekuk ya yil sbaik sok te Jehovae?, ¿aybal ataoj ta ilel ta lek te skoltayejat te Jehová ta akuxlejale? (1 Cor. 2:10). Teme jich kʼoem ta pasel ta atojol ya awile, ¿jaʼbal ya skʼan ya yal te stsaojat te Jehová yuʼun ya xbaat ta chʼulchane? Maʼuk, melel spisil te j-abatetik yuʼun Dios jich ya xjuʼ ya yaʼiy sbaik chikan teme ya xbajtik ta chʼulchan o teme maʼuke. Jaʼnix jich te Jehová ya xjuʼ ya skoltay ta spisil te j-abatetik yuʼun ta swenta te schʼul espiritue. Teme maba seguro ayat te tsabilat yuʼun te Jehovae, jaʼ ya skʼan ya yal te maba stsaojate. Te machʼatik tsabilik yuʼun ya xbajtik ta chʼulchan maba yato snopik teme tsabilik o teme maʼuke, melel seguro ayik ta jkʼaxel te tsabilike.

15. ¿Bin-utʼil ya jnaʼtik te ma spisiluk te machʼatik ya yichʼik te chʼul espiritu tsabilik yuʼun ya xbajtik ta chʼulchan?

¹⁵ Ta Biblia ya xjuʼ ya jtabeytik skʼoplal ants winiketik te akʼbotik te chʼul espiritu, pero maba la yichʼik tsael yuʼun ya xbajtik ta chʼulchan. Jich bitʼil te David «uʼuntayot  yuʼun te espíritu yuʼun Jehová» (1 Sam. 16:13). Jaʼ koltayot te chʼul espiritu yuʼun ya xkʼot ta yoʼtan te bin wokol ta naʼel ta swenta te Jehová sok jaʼ tojobtesot yuʼun swenta ya xjuʼ ya stsʼibay cheʼoxeb parte yuʼun te Bibliae (Mar. 12:36). Manchukme jich-abi te jpuk-kʼop Pedro la yal te ma «mo bahel ta chʼulchan» te Davide (Hech. 2:34). Jaʼnix jich te Juan J-akʼ-ichʼjaʼ noj «ta yoʼtan te Chʼul Espíritue» (Luc. 1:13-16). Te Jesús jich la yal ta stojol te Juane: «Spisil machʼatic alataybilic yuʼun ants, mayuc chicnajem te cʼax hich scʼoblal a te bin utʼil Juan te Jʼacʼ-ichʼ-haʼ». Manchukme jich-abi te Jesús la yal te maba och ta Wentainel yuʼun Dios ta chʼulchane (Mat. 11:10, 11). Te Jehová jaʼ la yakʼtiklanbey te schʼul espiritu te winiketik-abi yuʼun ya spasik te aʼtelil te yanax sbae, pero maba la stsatiklan yuʼun ya xbajtik ta chʼulchan. ¿Jaʼbal ya skʼan yal te maba mero jun yoʼtanik ta stojol Jehová te bitʼil ma la yichʼik tsael yuʼun ya xbajtik ta chʼulchane? Maʼuk, jaʼnax ya skʼan ya yal te ya yichʼik chaʼkuxajtesel yuʼun te Jehová swenta ya xkuxinik ta Nichimal Kʼinal liʼ ta Balumilal (Juan 5:28, 29; Hech. 24:15).

16. ¿Banti ya skʼan yoʼtan ya xkuxinik jteb ma spisiluk te j-abatetik yuʼun te Dios ta kʼajkʼal ini?

¹⁶ Ta kʼajkʼal ini, jteb ma spisiluk te j-abatetik yuʼun Dios te yakik ta kuxinel liʼ ta Balumilal ma jaʼuk ya smaliyik te ya xbajtik ta chʼulchane. Jich bitʼil te Abraham, Sara, David, Juan J-akʼ-ichʼjaʼ sok bayal ta tul ants winiketik ta namey kʼinal, jaʼ ay ta yoʼtanik te ya skʼan ya xkuxinik liʼ ta Balumilal te kʼalal yakix ta mantalteswanej-a te Wentainel yuʼun te Diose (Heb. 11:10).

17. ¿Bintik jojkʼoyel ya yichʼ akʼbeyel sujtib ta yan artikulo?

¹⁷ Ayto chaʼoxtul te machʼatik tsabilik yuʼun ya xbajtik ta chʼulchan te liʼto ayik ta Balumilal. Jaʼ yuʼun stalelnanix-a te ay bintik ya jojkʼoybey jbatik yuʼune (Apoc. 12:17). Jich bitʼil, ¿bin-utʼil ya skʼan ya yil sbaik ta jujuntul te machʼatik ya xbajtik ta chʼulchane? ¿Bin-utʼil ya skʼan ya kiltik teme ay machʼa ta jkongregasiontik ya xkaj sweʼ te pan sok ya yuchʼ te bino ta Snaʼojibal slajel te Jesuse? ¿Yabal skʼan ya jmel koʼtantik teme ya xtoy yajtalul ta jujun jaʼbil te machʼatik ya sweʼik te pan sok ya yuchʼik te binoe? Ta yan artikulo jaʼ ya kilbeytik te sujtibe.